पुणे-EVM हटावो आणि मत मिळविण्याच्या उद्देशाने पैसे वाटप करणाऱ्या योजना निवडणुकीच्या तोंडावर आणण्याच्या प्रवृत्तीविरोधात सुरु केलेले आंदोलन सुरूच राहील मात्र उपोषण ९५ वर्षीय ज्येष्ठ सामाजिक कार्यकर्ते डॉ. बाबा आढाव यांनी आज उद्धव ठाकरे, संजय राऊत, जयंत पाटील यांच्या उपस्थितीत स्थगित केले. तत्पूर्वी अजित पवार , शरद पवार यांनीही बाबा आढाव यांच्या भेटी घेतल्या . आणि आपले मत संसदेत , सभागृहात प्रकर्षाने मांडण्याचे त्यांना आश्वासन दिले .

राज्यातील विधानसभा निवडणुकीत EVM आणि पैशांच्या मोठ्या प्रमाणातील वापराविरोधात त्यांनी आंदोलन, उपोषण केलं होतं. उद्धव ठाकरे आणि महाविकास आघाडीने हे आंदोलन पुढे घेऊन जावं, अशी अपेक्षाही त्यांनी व्यक्त केली. उद्धव ठाकरेंच्या उपस्थित, त्यांच्या हस्ते पाणी पिऊन त्यांनी उपोषण सोडलं. बाबा आढाव यांनी उपोषण मागे घेतल्यानंतर उद्धव ठाकरेंनी त्यांची प्रतिक्रिया दिली. एवढ्याशा आंदोलनाने काय होणार असं कोणाला वाटत असेल, तर वणवा पेटवायला एक ठिणकी कारणीभूत असते आणि ती ठिणगी आज पडलेली आहे, अशा शब्दांत उद्धव ठाकरेंनी या आंदोलनावर भाष्य केलं आहे.
तुम्ही म्हातारपण स्वीकारायला तयार नाहीत, आजही तुम्ही आम्हाला प्रेरणा देता. माझं मत आहे प्रेरणा कधीच म्हातारी होऊ शकत नाही, अशी प्रतिक्रिया उद्धव ठाकरे यांनी बाबा आढावांबद्दल दिली.पुढे ते म्हणाले, ‘एक सरकारी ताफा आता इथून गेला. महत्त्वाचा मुद्दा हा की जिंकलेले सुद्धा इथे येत आहेत आणि आम्ही हारलेले सुद्धा इथे येतोय. थोडक्यात या निकालावर ना हारलेल्यांचा विश्वास आहे ना जिंकलेल्यांचा विश्वास आहे. जिंकले त्यांना धक्का आहे की आम्ही जिंकलो कसे आणि आम्ही हारलो आम्हाला धक्का बसला आहे की आम्ही हरलो कसे. याच कारण स्पष्ट आहे. जे आमच्याकडून वदवून घेतलं, सत्यमेव जयते, आता सत्तामेव जयते सुरू झालं आहे आणि त्याच्याविरोधात आपण उभे राहिलो आहोत’, असं म्हणत उद्धव ठाकरेंनी महायुतीवर तोफ डागली.’आताशी सुरुवात झाली आहे.

पैशांचा अमाप वापर झाला हे आपल्याही कानावर आलं. सर्वांनी विनोद तावडेंचा तो व्हिडिओही बघितला. योजनांचा पडणारा पाऊस पाहिला. थोडक्यात या सरकारने काय केलं आहे, की योजनांचा ऍनेस्थेशिया देऊन आपलं सत्तेचं ऑपरेशन पूर्ण केलं.”मह्त्तावाचा मुद्दा एक नाहीये, असे अनेक मुद्दे आहेत. त्यापैकी एक ईव्हीएमचा मुद्दा आहे आणि म्हणूनच मी उल्लेख केला, की जिंकलेले सुद्धा हारल्यासारखे येतात आणि हारलेले सुद्धा जिंकल्यासारखे येतात. याला एक कारण नक्कीच ईव्हीएम आहे’, अशा म्हणत उद्धव ठाकरेंनी EVM घोटाळा मुद्दावर भाष्य केलं.

पुणे-निवडणुकीच्या तोंडावर आम्ही योजना आणली त्या आम्हाला लाडक्या बहिणींनीच विजयी केले आहे हे मान्य करत EVM चा मुद्दा सुप्रीम कोर्टाच्या आणि आयोगावर ढकलून अजित पवार बाबा आढावांना भेटून माघारी परतले.

बाबासाहेब आंबेडकर यांनी आपल्याला संविधान दिलेले आहे आणि त्याप्रमाणे प्रत्येकाला आपले मत मांडण्याचा अधिकार असल्याचे अजित पवार यांनी म्हटले आहे. लोकसभा निवडणुकीत महाविकास आघाडीच्या जास्त जागा निवडून आल्या. त्यावेळी जनतेने दिलेले जनमत आम्ही मान्य केले. लोकसभा निवडणुकीत मी देखील बारामती मध्ये जो उमेदवार दिला होता त्याचा 48 हजार मतांनी पराभव झाला. तर दुसरीकडे विधानसभेत त्याच लोकांनी मला एक लाखापेक्षा जास्त मतांनी विजयी केले. त्यामुळे जनतेला कोण प्रश्न विचारावे? त्यांनी ठरवले त्याला निवडून दिले असल्याचे अजित पवार यांनी म्हटले आहे.

जनतेचा पाच महिन्यात कौल बदलला असेल तर त्याला आम्ही काय करणार? असा प्रश्न देखील अजित पवार यांनी उपस्थित केला. बाबा आढाव यांनी मांडलेल्या काही गोष्टी या सुप्रीम कोर्टाशी संबंधित आहे. तर काही गोष्टी निवडणूक आयोगाच्या संबंधित असल्याचे अजित पवार यांनी म्हटले आहे. मात्र, जनतेचा कौल पाच महिन्यात बदलत असेल तर तो मान्य केला पाहिजे, असे देखील अजित पवार यांनी म्हटले आहे. यावेळी त्यांनी लोकसभा आणि विधानसभा या एकत्र एकत्रित झालेल्या निवडणुकीचा दाखला दिला. एकाच मतदान केंद्रावर एका बाजूला शरद पवार यांना लोकसभेसाठी लोकांनी मतदान केले तर विधानसभेसाठी मला मतदान केले होते. मात्र शरद पवार यांची लीड माझ्यापेक्षा पन्नास हजारांनी जास्त होती. त्यावेळी लोकांना वाटले असेल तिथे मला विधानसभेत पाठवू नये. मात्र, त्या वेळी मी देखील असा प्रश्न उपस्थित केला नव्हता. अशी आठवण त्यांनी करुन दिली.

लाडकी बहिण योजनेवर बाबा आढाव यांनी उपस्थित केलेल्या प्रश्नाला देखील अजित पवारांनी प्रत्युत्तर दिले. संजय गांधी निराधार योजनेचे उदाहरण देखील अजित पवार यांनी दिले. साठ रुपयापासून सुरू झालेल्या योजनेचे आता दीड हजार रुपये झाले आहेत. ती योजना देखील चालूच आहे. या माध्यमातून जनतेला मदत करणे हा एकच हेतू असल्याचे अजित पवार यांनी म्हटले आहे. आम्ही बहिणींना दीड हजार रुपये दिले तर 2100 रुपये देण्याचे आश्वासन दिले. तर दुसरीकडे महाविकास आघाडीने देखील तीन हजार रुपयांचे प्रलोभण दाखवलेच होते ना? असा प्रश्न देखील अजित पवार यांनी उपस्थित केला. लाभार्थ्यांना लाभ देण्याचे निर्णय आम्ही घेतले तसे मध्य प्रदेश, कर्नाटक मध्ये देखील महिलांसाठी योजना सुरू आहेत. दिल्लीमध्ये देखील अरविंद केजरीव यांनी अनेक योजना मोफत केल्या आहेत. शंभर युनिट पर्यंत वीज देण्याचे आश्वासन त्यांनी पंजाब मध्ये देखील दिले आहे.

विरोधकांच्या बाजूने निकाल लागला तर, ईव्हीएम चांगले आणि विरोधात निकाल लागला की, ईव्हीएम वाईट, असे योग्य नसल्याचे अजित पवार यांनी म्हटलं आहे. तुमचे काही मुद्दे असतील तर ते मांडण्याची संसदेमध्ये परवानगी द्यावी अशी मागणी आम्ही दिल्लीत संसदीय कामकाज मंत्र्यांडके करणार असल्याचे देखील अजित पवार यांनी म्हटले आहे.

पुणे : विधानसभा निवडणुकीच्या निकालाविरोधात पुण्यामध्ये ज्येष्ठ समाजसेवक बाबा आढाव यांचे गेल्या तीन दिवसांपासून आत्मक्लेश आंदोलन सुरू आहे. या आंदोलनाला शरद पवार यांनी भेट दिली होती. त्यानंतर अजित पवार दुपारी भेट घेण्यासाठी आले होते. यावेळी बाबा आढाव यांनी पत्रकार परिषद घेत विनोद तावडे पैसे वाटप प्रकरण, अदानी प्रकरणावरून दादांसमोरच सरकारचे वाभाडे काढले. त्यासोबतच पंतप्रधान नरेंद्र मोदींवरही निशाण साधल्याचं पाहायला मिळालं.
महाराष्ट्राच्या १९५२ पासून आजतागयत जेवढ्या निवडणुका झाल्या, त्यामधील या निवडणुकीमध्ये पैशांचा धुमाकूळ झाला. निवडणुकीच्या तोंडावर सरकारच्या तिजारीमधून बहिणींना पैसे देण्यात आले. हा जो प्रकार आहे. लोकसभा आणि विधानसभा निवडणुकीला झालेल्या मतदानामध्ये एवढा बदल का झाला. मला मतदान करताना वाटलं होतं की काहीतरी गडबड आहे. बटेंगे तो कटेंगेचे नारे देण्यात आले. यावेळेला ज्या प्रकारचं सरकारी वर्णन दिसलं ते भयंकर आहे. त्यामुळे आत्मक्लेशाचा मार्ग स्वीकारला, कारण मला वेदना झाल्या. अदानी हा फॅक्टर दुर्लक्ष करून चालणार नाही. या प्रकरणाचाही तपास व्हायला पाहिजे. माझ्यासारख्या सुजाण नागरिकाला हे खुपत नाही. केंद्र सरकार लोकशाही हा प्रकार जुमानत नाही. पार्लमेंटमध्ये हजर राहायचं नाही आणि चर्चाही होऊ द्यायची नाही आणि पत्रकारांसोबत बोलायचं नाही. तिकडे विदेशातील लोकांनी सल्ला द्यायचा तो तर भाग वेगळा असल्याचं म्हणत बाबा आढाव यांनी थेट पंतप्रधान मोदींवर निशाणा साधला.आमची मागणी एकच आहे या सगळ्या प्रकरणाचा छडा लागला गेला पाहिजे. तो छडा सरकार लावू देणार नाही. हातातील सत्ता कोण सोडणार आहे, त्यासाठी जनतेमध्ये गेले पाहिजे. त्याप्रमाणे आम्ही इथे आलो आणि लोकं याची दखल घेत आहेत. याचं निराकारण झालं पाहिचे, त्यांनी दाबायचा प्रकरण केला जमणार नाही. माझ्यासारखी माणसं प्रसंगी मरण पत्करतील पण हा जाच सहन करणार नाही. बाबासाहेबांनी हे स्वातंत्र्य फुकट मिळालं नाही, त्यासाठी लढावं लागलं. महात्मा गांधी यांनी इंग्रजांना सांगितलं चले जाव, करेंगे या मरेगें, मग इंग्रजांनी हे नाही सांगितलं की हे सांगणारे तुम्ही कोण? त्यांनी थट्टा नाही केली. माझ्या प्रश्नांचं निराकरण झालं नाहीतर मी महात्मा गांधींनी सांगितलेल्या मार्गाने चालणार. मी दगड उचलणार नाही, मला याआधी अटक झाली आहे. पण सत्याग्रहात झालीये. मी एक दोन नाहीतर ५२ वेळा तुरूंगात गेलोय. माझं म्हणणं आहे की जो मार्ग मी आयुष्यात उचलला तो जनतेला सांगेल, असंही बाबा आढाव म्हणाले.

निवडणुकीच्या तोंडावर पैसे वाटप करणारी सरकारी योजना जाहीर करणे म्हणजे भ्रष्टाचाराला अधिकृत करणे आहे. त्यावर निवडणूक आयोगाने कोणताही आक्षेप घेतला नाही, हे अनाकलनीय आहे-बाबा आढाव

पुणे-सरकारी तिजोरीतून लोकांना पैशांचे वाटप करण्यात आले असल्याचा आरोप ज्येष्ठ सामाजिक कार्यकर्ते बाबा आढाव यांनी केला आहे. बाबा आढाव यांचे तीन दिवसापासून सुरू केले आहे. त्यांच्या उपोषण स्थळी शरदचंद्र पवार राष्ट्रवादी काँग्रेस पक्षाचे नेते शरद पवार यांनी भेट दिली. ईव्हीएम मध्ये घोटाळा झाला असल्याचा आरोप देखील बाबा आढाव यांनी केला आहे. सरकारी तिजोरीची लूट सुरू असल्याचे यावेळी आढाव म्हणाले. राज्यभरातून या उपोषणाला पाठिंबा मिळत आहे.ज्येष्ठ सामाजिक कार्यकर्ते बाबा आढाव यांनी ईव्हीएम विरोधात आंदोलन सुरू केले आहे. राज्यघटना आणि लोकशाहीची सध्या थट्टा सुरू असल्याची त्यांनी टीका केली. बाबा आढाव पुणे येथील फुले वाडा येथे आंदोलनाला बसले आहेत. महात्मा फुले यांच्या पुण्यतिथीचे औचित्य साधून त्यांनी वयाच्या 95 व्या वर्षी 3 दिवसांचे आत्मक्लेश उपोषण सुरू केले. ईव्हीएमवरील मतदान प्रक्रिया संशयास्पद म्हणत लोकशाहीचे वस्त्रहरण सुरू असल्याचे बाबा आढाव यांनी म्हटले आहे.

सरकारला विरोधक नकोच आहेत. त्यांना तुम्ही नकोच असल्याचे बाबा आढाव यांनी शरद पवार यांच्याशी बोलताना सांगितले. तर शरद पवार यांनीही आमचा बाबा आढाव यांच्या आंदोलनाला पाठिंबा असल्याचे जाहीर केले. सरकार जनतेची फसवणूक करत असल्याचे देखील बाबा आढाव यांनी म्हटले आहे. इतकेच नाही तर ईव्हीएममध्ये नागरिकांनी टाकलेले हेच खरे मतदान आहे, याचा पुरावा काय? असा प्रश्न बाबा आढाव यांनी या वेळी उपस्थित केला.

उद्योगपती गौतम अदानी यांच्यावर देखील कारवाई झाली पाहिजे. अदानींच्या विरोधात लोकसभेत बोलू दिले जात नाही. ही गंभीर बाब आहे. त्यामुळे याबाबत मी सरकारच्या विरोधात सत्याग्रह करत असल्याचे आढाव यांनी म्हटले आहे. सरकार जर चुकत असेल तर त्यांना वेळीच सांगितले पाहिजे. लोकशाहीतील एक नागरिक म्हणून माझे ते कर्तव्य आहे.

पुणे–निवडणुकीच्या दिवशी अखेरच्या दोन तासांची आकडेवारी आली आहे. ती आकडेवारी अत्यंत धक्कादायक असल्याचा आरोप शरद पवार यांनी केला आहे. यासंबंधी बाळासाहेब थोरात यांनी केलेल्या आरोपावर सखोल चर्चा करण्याची आवश्यकता असल्याचे पवार यांनी म्हटले आहे. एकत्रित बसून इंडिया आघाडीच्या आघाडी संघटनेच्या माध्यमातून त्यांनी हा विषय हातात घ्यावा, अशी चर्चा सुरू असल्याचे पवार यांनी सांगितले. या संदर्भात लवकरच काहीतरी निर्णय होईल, असा दावा देखील शरद पवार यांनी केला आहे.मला जे लोक भेटले त्या सर्वांना जयप्रकाश नारायण यांची आठवण आली. लोकांमधील असलेली अस्वस्थता पाहूनच बाबा आढाव यांनी पुढाकार घेतला आहे. त्यामुळे एक प्रकारचा दिलासा मिळाला असल्याचे लोकांना वाटते. राष्ट्रीय कर्तव्य आणि देशाची आवश्यकता असल्यामुळे त्यांनी ही भूमिका घेतली. मात्र त्यांनी एकट्याने भूमिका घेणे हे योग्य नाही. या विरोधात जनतेने उठाव करणे आवश्यक असल्याचे पवार यांनी म्हटले आहे. असेच सुरू राहिले तर संसदीय पद्धती संपुष्ठात येईल, अशी चर्चा या ठिकाणी आज दिसत असल्याचे पवार यांनी म्हटले आहे.

देशामध्ये ज्या निवडणुका झाल्या त्यासंबंधीची अस्वस्थता ती सर्व भागात दिसून येत आहे. या निवडणुकीच्या निकालाबद्दल जनमत हे बाबा आढाव यांनी घेतलेल्या भूमिकेतून व्यक्त होत असल्याचा दावा राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी केला आहे. ज्या निवडणुका झाल्या त्या निवडणुकीमध्ये सत्तेचा गैरवापर आणि पैशाचा महापूर दिसून आला. तो यापूर्वी कधीही बघितला नव्हता. स्थानिक पातळीवरील निवडणूक असतात, त्यामध्ये अशा तक्रारी कुठे न कुठे ऐकायला मिळतात. मात्र संपूर्ण राज्याची आणि देशाची निवडणूक असताना एवढ्या मोठ्या प्रमाणात पैसा आणि सत्तेचा गैरवापर हा करून निवडणुकीची सर्व यंत्रणा हातात घ्यायची, असे चित्र यापूर्वी कधीही दिसले नव्हते, असे देखील पवार यांनी म्हटले आहे. असेच काही या निवडणुकीत महाराष्ट्रात घडले आहे आणि त्याचा परिणाम होऊन लोकांची अस्वस्थता वाढली असल्याचे पवार यांनी म्हटले आहे.

या विरोधात संसदेच्या दोन्ही सभागृहात प्रश्न उपस्थित करण्याचा प्रयत्न केला तर विरोधकांना बोलू दिले जात नसल्याचा आरोप शरद पवार यांनी केला आहे. आम्हाला आमचे मुद्दे मागण्यासाठी परवानगी दिली जात नाही. अशी एकही मागणी सत्ताधारी विरोधकांची मान्य करत नसल्याचे शरद पवार यांनी म्हटले आहे. मागच्या सहा दिवसात संसदेच्या सभागृहात देशाच्या मुद्यावर एकही चर्चा होऊ शकली नसल्याचे पवार यांनी म्हटले आहे. त्यामुळे राज्यकर्त्यांचा हा देशावर आघात असल्याचा आरोप देखील पवार यांनी केला.

नागरिक जागृत आहेतच मात्र त्यांनी आता उठाव केला पाहिजे. अशी आज आवश्यकता असल्याचे शरद पवार यांनी म्हटले आहे. त्याची सुरुवात बाबा आढाव यांनी केली आहे. याचे पडसाद आगामी काळात दिसून येईल, असा मला विश्वास असल्याचे पवार यांनी म्हटले आहे. ईव्हीएम मध्ये घोळ झाल्याचा पुरावा माझ्या हातात नाही. मात्र काही लोकांनी तसे दावे केले असल्याचे शरद पवार यांनी म्हटले आहे. निवडणुकीच्या आधी देखील अशी शंका व्यक्त करण्यात आली होती. मात्र, आम्ही त्यांच्यावर विश्वास ठेवला नाही. निवडणूक आयोग एवढ्या मोठ्या प्रमाणात चुकीची भूमिका घेईल असे आम्हाला वाटले नव्हते, असे देखील शरद पवार यांनी म्हटले आहे. मात्र निवडणुकीनंतर आता यामध्ये तथ्य असल्याचे दिसते, असे देखील पवार म्हणाले. राज्यभरातील काही उमेदवारांनी फेर मतमोजणीसाठी अर्ज केले आहेत. मात्र त्यातून काही पुढे येईल, याबद्दल माझ्या मनात शंका असल्याचे पवार यांनी म्हटले आहे.

इतकं स्पष्ट बहुमत असताना या राज्यामध्ये सरकार स्थापन झालेले नाही, यावर देखील पवारांनी प्रश्नचिन्ह उपस्थित केले. आजच वाचले की पाच तारखेला सरकार तयार होण्याची शक्यता आहे. याचा अर्थ स्पष्ट आहे की, लोकांचे मत किंवा बहुमत या सगळ्या गोष्टी महत्त्वाच्या नाहीत. जे काही सुरू आहे हे राज्यकारभार करणारे ठरवतात, असे देखील पवार यांनी म्हटले आहे. या माध्यमातून सरकार स्थापन झाले नसल्याच्या मुद्द्यावर देखील शरद पवार यांनी राज्य सरकारवर टीका केली.