पुणे:

डॉ.बाबासाहेब आंबेडकर यांच्या महापरिनिर्वाण दिनी संविधान ग्रुप च्या वतीने डॉ. आंबेडकरांचे विचार असलेली ५ हजार पुस्तके वाटून प्रसार करण्यात आला.

६८ व्या महापरिनिर्वाणदिनी डॉक्टर बाबासाहेब आंबेडकरांचे विचार सर्वसामान्य लोकांपर्यंत पोचावे अशी संकल्पना संविधान ग्रुपने हाती घेतली. आज पाच हजार पुस्तके वाटून आंबेडकरांना अभिप्रेत असलेला समाज व सुशिक्षित समाज घडवण्यासाठी पुढाकार घेतला. या वाटपावेळी संविधान ग्रुपचे राष्ट्रीय अध्यक्ष सचिन गजरमल,संविधान ग्रुपचे संस्थापक अध्यक्ष राकेश सोनवणे,महाराष्ट्र प्रदेशाध्यक्ष स्वाती गायकवाड,महाराष्ट्र उपाध्यक्ष आरती केदारी, संविधान ग्रुपचे शहराध्यक्ष गणेश लांडगे,उपाध्यक्ष राजवर्धन कांबळे,महाराष्ट्राचे संपर्कप्रमुख प्रवीण सोनवणे असे अनेक कार्यकर्ते व पदाधिकारी उपस्थित होते.तसेच डॉ.आंबेडकर यांच्या पुतळ्याला पुष्पहार अर्पण करून अभिवादन करण्यात आले.

पुणे-

महाराष्ट्र विधानसभा निवडणूक २०२४ चा निकाल लागला असून महायुतीने या निवडणुकीत बहुमत मिळवलेलं आहे. काल भाजपच्या शिष्टमंडळाने देवेंद्र फडणवीस यांची विधिमंडळ गटनेतेपदी निवड केली. त्याचवेळी आज ५ डिसेंबर २०२४ रोजी आझाद मैदानात संध्याकाळी ५:३० वाजता मुख्यमंत्री आणि उपमुख्यमंत्री पदाचा शपथविधी सोहळा पार पडणार आहे. याबाबत शिवसेना नेत्या तथा विधानपरिषद उपसभापती डॉ. नीलम गोऱ्हे यांनी एका वृत्तवाहिनीला दिलेल्या मुलाखतीत प्रतिक्रिया दिली आहे. त्याचबरोबर विरोधकांवर थेट हल्लबोल केला आहे.

“महायुतीचा सरकारी येत आहेत आणि आमचे मुख्यमंत्री होत आहेत याचा मला अतिशय आनंद आहे. देणाऱ्याचे हात हजारो दुबळी माझी झोळी असं म्हणता येईल इतकं घवघवीत यश आम्हाला जनतेने दिलंय. मा. माजी मुख्यमंत्री श्री. एकनाथजी शिंदे शिवसेनेचे मुख्य नेते यांनी आणि देवेंद्र फडणवीस अजित पवार आणि शेकडो हजार कार्यकर्त्यांनी जे काम केलं त्याचं आम्हाला यश मिळालं. मी तर याचं पहिलं श्रेय देवाला देते. कारण आमची प्रार्थना होती की महाराष्ट्रामध्ये जो विकासाचा रथ चाललेला आहे त्याला आडकाठी येईल अशा कुठल्याही घटना घडू नये यादृष्टीने लोकसभा निवडणुकीनंतर आम्ही भरपूर काम केलं.

विशेष म्हणजे शिवसेनेला पूर्वी 63 जागा मिळाल्या होत्या पण त्याच्यातही मूळच्या शिवसेनेच्या 56 जागा होत्या आणि आता आमच्या मूळच्या शिवसेनेच्या 57 जागा विधानसभेला निवडून आलेल्या आहेत. त्याच्याबद्दल मनामध्ये समाधान आहे पण यामध्ये महायुतीचे अतिशय चांगले आमदार निवडून आलेले आहेत त्यामुळे काम चांगलं होऊ शकेल आणि कुठल्याही प्रकारे अडसर येण्यापेक्षा सकारात्मक भूमिका राहील”, असं डॉ. नीलम गोऱ्हे स्पष्ट शब्दात म्हणाल्या.

उपसभापती डॉ. नीलम गोऱ्हे यांचा विरोधकांवर हल्लाबोल! नेमकं काय म्हणाल्या?

विरोधकांकडून प्रचारादरम्यान वारंवार एक टीका केली जात होती की, आमचे सरकार आल्यावर महायुतीच्या नेत्यांना तुरुंगात टाकू पण आता विरोधकांची ही इच्छा अपूर्ण राहिली असा प्रश्न विचारला असता यावर उपसभापती डॉ. नीलम गोऱ्हे म्हणाल्या की, “एक शब्द आहे, कर नाही त्याला डर कशाला त्यामुळे आम्ही काही कर चुकवलेला नाहीये आणि काही केलेलंही नाहीये परंतु समोरच्याचा अपराध म्हणजे मतभेद असणं, अशीच भूमिका काँग्रेसची पण आहे कारण त्यांनी आणीबाणी लादली होती. आज त्यांनी कसे योग्य ते नॉर्म्स टाकले याच्यावर काही वृत्तपत्रात लोक बोलतात पण मुळामध्ये त्यांची संपूर्ण कारकीर्द पाहिली, त्यांच्या राज्यपालांची, त्यांच्या भूमिकांची तर महिला आरक्षण विधेयकसुद्धा त्यांनी लोंबकळत ठेवलं. तलाक पीडित महिलांना न्यायसुद्धा दिला नाही.

दुसरीकडे आज आम्ही पाहतो की अनेक नेते उद्धव ठाकरे यांच्या नेतृत्वाखाली जे काम करतात त्यांच्यापैकी अनेकांची भूमिका होती की, आमचं सरकार आल्यावर आम्ही तुरुंगात टाकू, पण तुरूंगात कशाबद्दल टाकणार आहात? तुमच्याशी मतभेद म्हणजे हे तुरूंगात टाकण्याचं कारण होऊ शकत नाही. देशद्रोह, शांतता सुव्यवस्था बिघडवणं असं काय केलं होतं आम्ही की, ज्याबद्दल सारखं असं बोललं जातं होतं आणि यामुळेच मला वाटतं ज्याची पाठी त्याच्या काठी”, अशा शब्दात उपसभापती डॉ. नीलम गोऱ्हे यांनी विरोधकांवर हल्लाबोल केला.

पुणे, 06 डिसेंबर 2024 – महिला कबड्डी लीग (WKL) 2025 ने आज पुणे येथे आयोजित केलेल्या दुसऱ्या प्रादेशिक निवड चाचणीसह एक महत्त्वपूर्ण पाऊल पुढे टाकले. ही फेरी महाराष्ट्र, गुजरात, राजस्थान आणि मध्य प्रदेशसह भारताच्या पश्चिम भागातील प्रतिभा शोधण्यावर केंद्रित आहे. या चाचण्यांमध्ये महिलांच्या कबड्डीला चालना देण्यासाठी एक महत्त्वाचा टप्पा म्हणून संपूर्ण प्रदेशातील खेळाडूंचा उत्साही सहभाग दिसून आला.

पश्चिम प्रदेशात जवळपास 8000-10,000 महिला कबड्डीपटू आहेत, ज्यापैकी अनेकांना त्यांचा खेळ पुढील स्तरावर नेण्यासाठी महिला कबड्डी लीग उपक्रमातून प्रेरणा मिळेल. यापैकी अंदाजे 600-800 खेळाडूंनी आधीच राज्य, राष्ट्रीय किंवा आंतरराष्ट्रीय स्तरावर स्पर्धा केली आहे, ज्यांनी चाचण्यांसाठी लक्ष्यित कोर गट तयार केला आहे. पुण्यात, WKL ला सुमारे 500 नोंदणी प्राप्त झाल्या, ज्यामध्ये 350 खेळाडू सक्रियपणे चाचण्यांना उपस्थित होते. या प्रतिभावान पूलमधून, लीगच्या निवड प्रक्रियेच्या पुढील टप्प्यात जाण्यासाठी 100-150 खेळाडू निवडले जातील.

WKL चे लीग सल्लागार डॉ. भूपेंद्र सिंग यांनी लीगच्या परिवर्तनात्मक दृष्टीवर प्रकाश टाकला:

“महिला कबड्डी लीग ही केवळ स्पर्धा निर्माण करण्यापुरती नाही; ती एक वारसा निर्माण करण्याबद्दल आहे. या चाचण्या भारताच्या तळागाळातील प्रतिभेतील अतुलनीय क्षमता प्रतिबिंबित करतात आणि आम्हाला असे व्यासपीठ उपलब्ध करून देण्यात आनंद होत आहे जिथे या खेळाडूंना चमक दाखवता येईल आणि असंख्य इतरांना ते स्वीकारण्यासाठी प्रेरणा मिळेल.”

मीडियाला संबोधित करताना, WKL चे मीडिया प्रवक्ते डॉ. जितेंद्र कुमार यांनी त्यांचा उत्साह शेअर केला:

“येथे पुण्यात दाखवण्यात आलेली ऊर्जा आणि कौशल्य विलक्षण आहे. WKL चे उद्दिष्ट भारताच्या कानाकोपऱ्यातून उत्कृष्ट प्रतिभा ओळखणे आणि त्यांचे संगोपन करणे हे आहे आणि आज आम्ही पाहिलेला प्रतिसाद महिलांच्या कबड्डीमध्ये क्रांती घडवून आणण्याच्या आमच्या ध्येयाला पुष्टी देतो.”

कार्यक्रमास विदर्भ कबड्डी असोसिएशनचे सहसचिव श्री सतीश डफले (महाराष्ट्र असोसिएशनचे प्रतिनिधी म्हणून) यांचेही सहकार्य लाभले.

“महाराष्ट्र हा नेहमीच कबड्डीचा गड राहिला आहे आणि महिला कबड्डी लीग ही आमच्या खेळाडूंसाठी एक खेळ बदलणारी आहे. महिला खेळाडूंना मोठ्या मंचावर त्यांचे कौशल्य दाखविण्याची संधी देणारा असा सुव्यवस्थित उपक्रम पाहणे आनंददायी आहे.”

पुण्यात झालेल्या चाचण्यांनी तळागाळातील प्रतिभेला चालना देण्यासाठी आणि महिला खेळाडूंचे सक्षमीकरण करण्यासाठी WKL ची वचनबद्धता अधोरेखित केली. प्रत्येक प्रादेशिक चाचणीसह, लीग भारतातील महिला खेळांच्या लँडस्केपची पुन्हा व्याख्या करण्याच्या एक पाऊल पुढे आहे.

महिला कबड्डी लीग (WKL) बद्दल: महिला कबड्डी लीग ही भारतातील प्रमुख व्यावसायिक कबड्डी लीग आहे जी महिला खेळाडूंना प्रोत्साहन देण्यासाठी समर्पित आहे. तळागाळात आणि व्यावसायिक स्तरावर संधी उपलब्ध करून देऊन, WKL या खेळाला उन्नत करण्यासाठी आणि महिला कबड्डीपटूंसाठी जागतिक दर्जाचे व्यासपीठ निर्माण करण्यासाठी वचनबद्ध आहे.

सेवाकार्यातून लाभते मनःशांती आणि समाधान – संदीप खर्डेकर

पुणे : संपर्क संस्था बालग्राम च्या माध्यमातून अनाथ मुला मुलींचा सांभाळ करणे, त्यांचे शिक्षण पूर्ण करणे व पुढे लग्न ही लावून देणे हे कार्य कौतुकास्पद असून मी ह्या संस्थेच्या पुणे जिल्ह्यातील सहा व राज्यातील बारा शाखांना सर्वतोपरी मदत करेन असे वचन आ. चंद्रकांतदादा पाटील यांनी दिले. आज आमदार झाल्यानंतर मुंबई येथून पुण्याकडे येताना मळवली येथे क्रिएटिव्ह फाउंडेशन च्या वतीने संपर्क बालग्राम संस्थेस उपयोगी साहित्य भेट देण्याचा तसेच विद्यार्थ्यांतर्फे चंद्रकांतदादांचा सत्कार करण्याचा कार्यक्रम आयोजित केला होता यावेळी ते बोलत होते

याप्रसंगी क्रिएटिव्ह फाउंडेशन चे अध्यक्ष संदीप खर्डेकर,फाउंडेशन च्या विश्वस्त व माजी नगरसेविका मंजुश्री खर्डेकर,विश्वस्त सतीश कोंडाळकर, बालग्राम चे संस्थापक अमितकुमार बॅनर्जी, सामाजिक कार्यकर्ते सचिन निंबाळकर, चेतन जोशी, संस्थेचे शिक्षक व विद्यार्थी उपस्थित होते.
मा. ना. चंद्रकांतदादा पाटील प्रचंड मताधिक्याने निवडून आल्यावर त्यांना काय भेट द्यावी याचा विचार करत होतो – मग त्यांनी ज्या पद्धतीने तळागाळातील नागरिकांना काय हवं नको याकडे लक्ष दिले व त्यांना ते पुरविण्याचा ध्यास घेतला – त्याच धर्तीवर विविध सामाजिक संस्थांना मदत करावी असे ठरविले आणि त्यास अनुसरून आज मळवली येथील संपर्क बालग्राम मधील 130 विद्यार्थ्यांसाठी दादांच्या हस्ते सोलापूरी चादरी तसेच स्पीकर सेट भेट देण्याचा उपक्रम पार पडला असे क्रिएटिव्ह फाउंडेशन चे अध्यक्ष संदीप खर्डेकर म्हणाले.सेवाकार्यातून मनःशांती व समाधान लाभते असे सांगतानाच राजकीय कार्यकर्त्यांनी सामाजिक क्षेत्रात अधिकाधिक योगदान द्यावे व जेथे गरज आहे तेथे मदत पोहोचवावी असेही संदीप खर्डेकर म्हणाले.
क्रिएटिव्ह फाउंडेशन चे अध्यक्ष संदीप खर्डेकर हे चांगलं काम करणाऱ्या योग्य संस्थेची निवड करतात आणि त्यांना ज्या गोष्टींची आवश्यकता आहे ते पुरवितात असे आवर्जून नमूद करतानाच मा. चंद्रकांतदादा पाटील म्हणाले “बालग्राम संस्था खूप चांगलं काम करत असून एवढ्या अनाथ मुलांचा सांभाळ करण्याचे महत्वपूर्ण काम करत आहेत, त्यामुळेच मी देखील शासनाच्या स्तरावर आणि वैयक्तिक सी एस आर निधीतून संस्थेसाठी काय करता येईल याची यादी करून त्यासाठी प्रयत्न करेन” असेही चंद्रकांतदादांनी स्पष्ट केले.
संस्थेच्या वतीने आ.चंद्रकांतदादा पाटील, संदीप खर्डेकर, मंजुश्री खर्डेकर यांचा ह्रद्य सत्कार करण्यात आला.संस्थेतील विद्यार्थिनींनी सलामी देऊन मान्यवरांना अभिवादन केले.
संदीप खर्डेकर यांनी प्रास्ताविक तर अमितकुमार बॅनर्जी यांनी स्वागत व आभार प्रदर्शन केले.
कार्यक्रमाचे संयोजन क्रिएटिव्ह फाउंडेशन च्या विश्वस्त मंजुश्री खर्डेकर यांनी केले.

खेड:खेड जिल्हा व अतिरिक्त सत्र न्यायालयाचे जिल्हा न्यायाधीश ए. एस. सय्यद यांच्या सातरकस्थळ येथील देव्हरकर कॉलनीतील ज्ञानदीप पंतस्मृती या बंद बंगल्याच्या मुख्य दरवाजाचे कडी-कोयंडा तोडून अज्ञात चोरट्यांनी घरातील रोख रक्कम, सोने आणि महत्त्वाची कागदपत्रे असा एकूण २ लाख २५ हजार रुपयांचा ऐवज चोरून नेला आहे.याबाबत न्यायालयातील कर्मचारी रोहिदास पंडित चव्हाण यांनी खेड पोलिस स्टेशनमध्ये फिर्याद दाखल केली आहे. मंगळवारी (दि.३) रात्री साडेनऊ ते दहाच्या दरम्यान जिल्हा न्यायाधीश सय्यद राहत असलेला सातरकस्थळ येथील ज्ञानदीप बंगला बंद असल्याचे निदर्शनास आल्यावर चोरट्यांनी याचा बंगल्यात चोरी केली. यापूर्वी दोन-तीन दिवस परिसरातील जागरूक नागरिकांमुळे चोरीचे दोन-तीन प्रकार फसले होते.

जिल्हा न्यायाधीशांचा बंगला बंद असल्याचे लक्षात आल्यावर चोरट्यांनी मुख्य दरवाजाचा कडी-कोयंडा तोडला व घरात प्रवेश केला. चोरट्यांनी घरातील १५ हजार रुपये रोख, सव्वादोन लाखांचे तीन तोळे सोने व काही महत्त्वाची कागदपत्रे चोरली. या प्रकरणात खेड पोलिस स्टेशनच्या वतीने अज्ञात चोरट्यांच्या विरोधात गुन्हा दाखल करण्यात आला आहे.

सातरकस्थळ परिसरात गेल्या काही दिवसांपासून चोरीच्या घटनामध्ये वाढ होताना दिसत आहे. दोन चार दिवसांपासून चोरटे चोरी करण्याचे प्रयत्न करत होते. मात्र, सजग नागरिकांमुळे चोरट्यांचा चोरीचा डाव दोन वेळा फसला. यामध्ये एक वेळ तर एका पोलिस कर्मचाऱ्यांच्याच घरी चोरट्यांनी चोरीचा प्रयत्न केला होता. याबाबत खेड पोलिसस्टेशनमध्ये तक्रारदेखील दाखल करण्यात आली होती

पुणे-पवनाधरण परिसरातील दुधिवरे गावाच्या हद्दीमध्ये बुधवार (दि.४ ) रोजी दुपारी चार वाजण्याच्या सुमारास पवनाधरण परिसरात फिरण्यासाठी गेलेल्या दोन पर्यटकांचा बोट उलटल्याने मृत्यू झाला आहे.पवनाधरण जलाशयात मोठ्या प्रमाणावर बेकायदेशीर बोटी फिरत असून त्याकडे कोणत्याही प्रकारचा परवाना आणि नोंदणी क्रमांक देखील नाहीत. मयूर रविंद्र भारसाके (वय २५) तर तुषार रविंद्र अहिरे (वय.२६ दोघेही सध्या रा.पुणे, मुळ,रा.लालजैन मंदिराच्या पाठिमागे, पद्मावती नगर,वरणगांव,भुसावळ)असे बुडून मृत्यू झालेल्यांची नावे असून ते बालेवाडी येथे एका खाजगी कंपनी मध्ये नोकरी करत होते.

लोणावळा ग्रामीण पोलिसांनी दिलेल्या माहितीनुसार, बालेवाडी पुणे येथील स्केन रियालिटी प्राव्हेट लिमिटेड या खाजगी कंपनी मध्ये काम करणारे सुमारे ८ मित्र पवना धरण लगत असलेल्या दुधिवरे येथील एका हाँटेल वर फिरण्यासाठी आले होते. यामधील काहीजण पवनाधरणाच्या पाण्यात दुपारी ०४:०० वाजण्याच्या सुमारास बोट घेऊन पाण्यामध्ये फेरफटका मारण्यासाठी गेले. ती उलट्यामुळे दोघांचा पाण्यात बुडून मृत्यू झाला. त्यांना वाचविण्यासाठी शिवदुर्ग रेस्क्यू टिम व मावळ वन्य जीव रक्षक यांच्या वतीने धरणात बुडालेल्या दोन पर्यटकांचा शोध सुरु केल्यानंतर बुधवार ( दि.४ रोजी ) संध्याकाळी आठ च्या सुमारास एकाचा मृतदेह मिळून आला. त्यानंतर रात्री अंधार झाल्यामुळे शोधकार्य बंद करण्यात आले व गुरुवार दि.५ रोजी सकाळी ९ वाजण्याच्या सुमारास शोधकार्य सुरु केले व दुपारी ०२:३० वाजण्याच्या सुमारास दुसरा मृतदेह मिळून आला. यानंतर श्ववच्छदेनेसाठी खंडळा येथील प्राथमिक आरोग्य केंद्र येथे नेण्यात आला असून पुढील तपास लोणावळा ग्रामीण पोलीस स्टेशन चे सहाय्यक पोलीस निरीक्षक प्रशांत आवारे, युवराज बनसोडे, सिताराम बोकड, नवनाथ चपटे, नितीन कदम हे करत आहे.

पुणे-पाषाण सुस रोड ला एका वाहनाने काही वाहनांना धडक दिल्याचे वृत्त आहे .

सुमारे 6 वाहनांना धडक दिल्या प्रकरणी बाणेर पोलिसांनी संबधित मोटारचालकास ताब्यात घेतले आहे.
ऋत्विक श्याम बनसोडे (वय १९) असे ताब्यात घेतलेल्या मोटारचालकाचे नाव आहे. ऋत्विक हा एमजी ग्लॉस्टर मोटार (एमएच-१२ डब्लूएच-९११२) चालवत असताना हा अपघात झाला. त्याच्याविरुद्ध बाणेर पोलिस ठाण्यात गुन्हा दाखल करण्यात आला आहे. पोलिस उपनिरीक्षक अविनाश कराड यांनी दिलेल्या माहितीनुसार, मोटारचालक ऋत्विक हा एका व्यक्तीकडे ‘केअरटेकर’ म्हणून कामास आहे.

तो दुपारी साडेतीन वाजण्याच्या सुमारास दूध आणण्यासाठी मोटारीतून निघाला होता. त्याने निष्काळजीपणे मोटार चालवून एका वाहनाला धडक दिली. त्यानंतर घाबरून पळून जाण्याचा प्रयत्न करीत असताना त्याने दुसऱ्या वाहनाला धडक दिली.

तेव्हा जमावाने त्याला मोटारीतून बाहेर येण्यास सांगितले. परंतु तो बाहेर न आल्याने जमावातील काही तरुणांनी मोटारीवर दगडफेक केली. त्यात मोटारीचे काच फुटल्याने नुकसान झाले. बचावासाठी चालकाने ननावरे चौकातून सूसच्या दिशेने जाणाऱ्या रस्त्यावर मोटार भरधाव नेली. त्याने पुन्हा एका मोटारीला पाठीमागून जोरात धडक दिली. त्यात मोटारीचे मोठ्या प्रमाणावर नुकसान झाले.

पुणे, दि. 5: मोटार वाहन कर न भरलेल्या व मोटार वाहन कायद्यातील विविध गुन्ह्याअंतर्गत जप्त केलेल्या १० वाहनांचा जाहीर ई-लिलाव २६ डिसेंबर २०२४ रोजी सकाळी १० वाजता प्रादेशिक परिवहन कार्यालय, पिंपरी-चिंचवड येथे ठेवण्यात आला आहे; ई-लिलावाच्या तारखेपर्यंत वाहन कर भरण्याची संधी उपलब्ध असून वाहन मालक, चालक व वित्तदात्यांनी याची नोंद घ्यावी, अशी माहिती कराधान प्राधिकारी तथा उप प्रादेशिक परिवहन अधिकारी, पिंपरी-चिंचवड यांनी कळविले आहे.

ई-लिलाव सहभागी होण्याकरीता १६ ते १९ डिसेंबर या कालावधीत www.eauction.gov.in या संकेतस्थळावर ऑनलाईन पद्धतीने नाव नोंदणी करावी. लिलावाचे अटी व नियम ९ डिसेंबर रोजी पासुन कार्यालयीन कामकाजाच्यादिवशी प्रादेशिक परिवहन कार्यालय, पिंपरी-चिंचवड येथील नोटीस बोर्डावर सकाळी १० ते सायंकाळी ६ वाजेपर्यंत उपलब्ध राहील. तसेच सदरची वाहने पाहण्याकरीता ९ ते २४ डिसेंबर या कालावधीत प्रादेशिक परिवहन अधिकारी कार्यालय, मोशी प्राधिकरण, पिंपरी-चिंचवड येथे उपलब्ध असणार आहेत. ‘वाहने जशी आहे तशी’ या तत्वावर जाहिर ई-लिलावाद्वारे विक्री करण्यात येणार आहे.

वाहनांची यादी www.eauction.gov.in या संकेतस्थळावर, प्रादेशिक परिवहन कार्यालय पिंपरी-चिंचवड, जिल्हाधिकारी कार्यालय, तहसील कार्यालय पुणे शहर, हवेली, जून्नर, मावळ, खेड, मुळशी, आंबेगाव या कार्यालयाच्या सूचना फलकावर लावण्यात येणार आहे. कोणतेही कारण न देता जाहीर लिलाव रद्द करण्याची अथवा तहकूब ठेवण्याचे अधिकार उप प्रादेशिक परिवहन अधिकारी तथा कराधान प्राधिकारी, पिंपरी-चिंचवड यांनी स्वत:कडे राखुन ठेवले आहेत.

महामाता रमामाई भीमराव आंबेडकर राष्ट्रीय स्मारक समितीतर्फे कृतज्ञता सन्मान व रमाई रत्न पुरस्काराने गौरव
पुणे : आजच्या काळात एका जातीचा-धर्माचा झेंडा घेऊन राजकारण, समाजकारण होत असताना ॲड. प्रमोद आडकर यांनी सर्व धर्मांच्या चांगुलपणाचा झेंडा खांद्यावर घेऊन सत्याच्या बेरजेतून आयुष्य उभे केले आहे, असे गौरवोद्गार प्रसिद्ध विचारवंत, अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांनी काढले. ॲड. आडकर रमाई महोत्सवाच्या अध्यक्षपदाच्या माध्यमातून संविधानाच्या शिकवणुकीचा जागर करीत असल्याबद्दल त्यांचा रमाई रत्न पुरस्काराने करण्यात आलेला सन्मान अभिनंदनीय आहे, असेही त्यांनी आवर्जून नमूद केले.
महामाता रमामाई भीमराव आंबेडकर राष्ट्रीय स्मारक समितीतर्फे महाराष्ट्र साहित्य परिषदेचे कार्यवाह, ज्येष्ठ संयोजक, लेखक, रंगत-संगत प्रतिष्ठान आणि रमाई महोत्सवाचे अध्यक्ष ॲड. प्रमोद आडकर यांच्या एकसष्टीनिमित्त कृतज्ञता सन्मान सोहळ्याचे आज (5) आयोजन करण्यात आले होते. ॲड. आडकर यांचा सन्मान डॉ. सबनीस यांच्या हस्ते करण्यात आला. त्या वेळी ते बोलत होते. रमाई महोत्सवाचे सलग 12 वर्षे अध्यक्षपद भूषवित असल्याबद्दल त्यांचा या वेळी रमाई रत्न पुरस्काराने गौरव करण्यात आला. पत्रकार भवन येथे कार्यक्रमाचे आयोजन करण्यात आले होते. कार्यक्रमाचे संयोजक विठ्ठल गायकवाड, लता राजगुरू, मैथिली आडकर, ॲड. अविनाश साळवे मंचावर होते. संविधानाची प्रत, पंचशील शाल, सन्मानचिन्ह असे पुरस्काराचे स्वरूप होते.
समाजासाठी सर्वस्व वाहून घेणाऱ्या सर्व स्तरातील, जातीधर्मातील स्त्री-पुरुषांच्या कार्याचा ॲड. आडकर सन्मान करीत आले आहेत. त्यांची ही कृती संस्कृतीची पुण्याई पेरणारी आहे, असे सांगून डॉ. सबनीस म्हणाले, आज राजकारण, समाजकारण आणि धर्मकारणात विषाची पेरणी वाढलेली असताना संस्कृती जगणे अशक्य आहे. अशा परिस्थितीत साहित्य, संस्कृती आणि समाजकारण क्षेत्रात संजीवनी देणारे, पुण्य पेरणारे कार्य त्यांच्या हातून होत आहे. ॲड. आडकर यांना समाजकार्यात सहकार्य करणाऱ्या मैथिली आडकर यांचेही त्यांनी कौतुक केले.
सत्काराला उत्तर देताना ॲड. आडकर म्हणाले, विविध क्षेत्रात महान कार्य करणाऱ्या व्यक्तींना समाजासमोर आणण्याचा गेल्या 32 वर्षांपासून प्रयत्न करीत आहे. या कार्याकरीता माता रमाईचा आशीर्वाद आणि पत्नीची खंबिर साथ मला लाभली आहे. त्यामुळे व्रतस्थपणे अखंडित हे कार्य मी सुरू ठेवेन.
ॲड. अविनाश साळवे म्हणाले, सामाजिक जीवनात कार्यरत असताना स्वत:च्या घरावर तुळशीपत्र ठेवून कार्य करावे लागते. अशा वेळी ॲड. आडकर यांना पत्नीची खंबीर साथ लाभली असल्याने ते समाजाप्रबोधनाचे कार्य करत आहेत.
कार्यक्रमाचे प्रास्ताविक आणि सूत्रसंचालन विठ्ठल गायकवाड यांनी केले. आभार लता राजगुरू यांनी मानले.

काँग्रेसपक्षातर्फे ‘वकील दीन’ साजरा!

पुणे -देशात कसोटीच्या क्षणी, कायद्याची बूज राखण्यासाठी जागरूक व संघर्षरत राहणे ही काळाची गरज असुन, ‘संविधान व लोकशाही’च्या अस्तित्वासाठी वकील वर्गा कडून अपेक्षा अधिक असल्याने, कायद्याचे संरक्षक म्हणून वकील वर्गावर जबाबदारी अधिक असल्याचे प्रतिपादन काँग्रेस नेते व राज्य प्रवक्ते गोपाळ तिवारी यांनी केले. अध्यक्ष’स्थानी पुणे शहर जिल्हा काँग्रेस कमिटीचे अध्यक्ष अरविंद शिंदे होते.
“राष्ट्रीय वकील दिना”च्या व काँग्रेसच्या लीगल सेल’च्या पदाधिकाऱ्यांच्या वाढदिवसाचे औचित्याने सदर कार्यक्रमाचे संयोजन पुणे काँग्रेसच्या लीगल सेल’ने केले होते. महाराष्ट्र प्रदेश इंटक’चे पदाधिकारी तसेंच प्रदेश सचिव ऍड फैयाज शेख, तसेच पुणे शहर कॅांग्रेस लिगल सेल चे उपाध्यक्ष ॲडव्होकेट श्रीकांत पाटील यांच्या जन्मदिन केक कापून व वकीलांचा सत्कार करून “राष्ट्रीय वकील दिन” साजरा करण्यात आला.
ॲड फैयाज शेख व ॲड श्रीकांत पाटील हे हाडाचे कार्यकर्ते पेक्षा प्रामाणिक काँग्रेसजन असल्याचे व काँग्रेस पक्षाच्या लीगल सेल ने गरजू जनतेचे प्रश्न सोडवण्यासाठी पुढे यावे असे शहराध्यक्ष अरविंद शिंदे यांनी यावेळी बोलतांना सांगितले.
सुत्र संचालन भोला वांजळे यांनी केले तर आभार प्रदर्शन काँग्रेस लीगलचे शहर उपाध्यक्ष ऍड. आरुडे यांनी केले.
या प्रसंगी प्रदेश काँग्रेस लीगल सेल चे उपाध्यक्ष ऍड. शाहिद अख्तर शेख, ऍड. अनिल कांकरिया ऍड अयुब पठाण सि आय डी ॲड काळेबेरे, माजी नगरसेवक श्रीकांत पाटील, प्रदेश काँग्रेस प्रतिनिधी मेहबूब नदाफ यांनी शुभेच्छा दिल्या.
या प्रसंगी ॲड विद्या पेळपकर, ॲड. रशिदा सय्यद, ॲड. डिसूझा, ॲड. अतुल गुंड पाटील, ॲड. राजाभाऊ चांदेरे, ॲड. चव्हाण, ॲड. सतीश कांबळे, ॲड. बलकवडे, ॲड भुंडे, ॲड सुरेश नांगरे, ॲड बाळासाहेब बावणे इ वकील मंडळी मोठ्या संख्येने ऊपस्थित होती.. तसेच राजीव गांधी स्मारक समितीचे सदस्य तसेच जेष्ठ काँग्रेसजन बाळासाहेब मारणे, रामचंद्र शेडगे, रमण पवार, सुभाष काळे, राजेश मंजरे, धनंजय भिलारे, सुनील तिखे, विकास दवे, गणेश शिंदे, नरेश आवटे इ उपस्थित होते.