पुणे-११ डिसेंबर रोजी पादचारी दिनानिमित्त शहरातील मध्यवर्ती भागातील मुख्य बाजारपेठ लक्ष्मी रस्ता वाहतुकीस बंद ठेवण्यात येणार असल्याचे पुणे वाहतूक पोलिसांनी स्पष्ट केले आहे. लिंबराज महाराज चौक (नगरकर तालीम चौक) ते गरुड गणपती चौक दरम्यान सकाळी आठ ते रात्री आठपर्यंत सर्व प्रकारच्या वाहनांना प्रवेश बंद करण्यात येणार आहे. वाहनचालकांनी पर्यायी मार्गांचा वापर करावा, असे आवाहन पुणे वाहतूक शाखेचे पोलीस उपायुक्त अमोल झेंडे यांनी केले आहे.

दरवर्षी प्रमाणे पुणे महापालिकेकडून ११ डिसेंबर रोजी पादचारी दिन साजरा करण्यात येणार आहे. त्या अनुषंगाने लक्ष्मी रस्त्यावरील वाहतूक बंद ठेवण्यात येणार असून, यादिवशी विविध कार्यक्रमांचे आयोजन करण्यात येणार आहे. ११ डिसेंबर रोजी सकाळी आठ ते रात्री आठपर्यंत नगरकर तालीम चौक ते गरुड गणपती चैाक दरम्यान वाहतूक बंद ठेवण्यात येणार आहे. वाहनचालकांनी पर्यायी मार्गांचा वापर करावा, असे असे आवाहन करण्यात आले आहे.पर्यायी मार्ग पुढीलप्रमाणे – लक्ष्मी रस्त्याने नगरकर तालीम चौकातून टिळक चौकाकडे जाणाऱ्या वाहनांनी नगरकर तालीम चौकातून डावीकडे वळून बाजीराव रस्ता, अप्पा बळवंत चौकमार्गे इच्छितस्थळी जावे. कुमठेकर रस्त्याने लक्ष्मी रस्त्याकडे जाणाऱ्या वाहनांनी शनिपार चौक (चितळे कॉर्नर ) येथून वळून बाजीराव रस्तामार्गे अप्पा बळवंत चौकमार्गे इच्छितस्थळी जावे. नारायण पेठेतील लोखंडे तालीम चौकातून लक्ष्मी रस्त्याकडे जाणाऱ्या वाहनांनी केळकर रस्ता, टिळक चौकमार्गे इच्छितस्थळी जावे.

महापालिकेच्या मिळकत कर विभागाने पाच दिवसात केली १४ कोटी १४ लाख २६ हजार २१२ रुपयांची वसुली .

आणि २६ मिळकती केल्या जप्त

पुणे- सिंहगड टेक्निकल इन्स्टिट्यूटच्या मिळकत कराच्या ४७ कोटीच्या थकबाकी वसुलीसाठी PMC ने जप्तीची कारवाई केली असल्याची माहिती मिळकत कर प्रमुख माधव जगताप यांनी येथे दिली .सिंहगड टेक्निकल इन्स्टिट्यूटच्या एरंडवणे येथील मिळकतीवर थकबाकी रक्कम रु. ४७,४३,१८,३०३/- (सत्तेचाळीस कोटी त्रेचाळीस लाख अठरा हजार तीनशे तीन रुपये फक्त) एवढी असल्याने मिळकतीवर जप्तीची कारवाई करण्यात आली.

माधव जगताप यांनी असेही सांगितले कि,’ कर आकारणी व कर संकलन खात्याने सन २०२४-२५ चे उद्दिष्ट पूर्ततेच्या अनुषंगाने थकबाकी वसुली मध्ये मोठ्या प्रमाणात लक्ष्य केंद्रित केलेले आहे. त्या अनुषंगाने दिनांक २/१२/२०२४ पासून मिळकत कर वसुलीसाठी बँड पथकाचा समावेश असलेले म्वतंत्र वसुली पथके तयार करण्यात आलेली आहेत.
या पथकामार्फत १५ क्षेत्रिय कार्यालयाच्या कार्यक्षेत्रातील थकबाकी असलेल्या मिळकतीवर थकबाकी वसुलीची कारवाई हाती घेण्यात आलेली आहे. त्यानुसार दिनांक २/१२/२०२४ ते ६/१२/२०२४ या पाच दिवसांच्या काळामध्ये बँड पथकाद्वारे व मध्यवर्ती पथकाद्वारे १६५ इतक्या मिळकतींना भेट देण्यात येवून, रक्कम रु. १४,१४,२६,२१२/- (चौदा कोटी चौदा लाख सव्हीस हजार दोनशे बारा रुपये फक्त) इतक्या रकमेचा कर वसुल करण्यात आलेला आहे. तसेच सिंहगड टेक्निकल इन्स्टिट्यूट यांची कोंढवा बु., आंबेगाव बु., एरंडवणे येथे मिळकत असून एरंडवणे येथील मिळकतीवर थकबाकी रक्कम रु. ४७,४३,१८,३०३/- (सत्तेचाळीस कोटी त्रेचाळीस लाख अठरा हजार तीनशे तीन रुपये फक्त) एवढी असल्याने मिळकतीवर जप्तीची कारवाई करण्यात आली. आणि आज दि.०६/१२/२०२४ पर्यंत एकूण २६ इतक्या मिळकती जप्त करण्यात आलेल्या आहेत.
पुणे महानगरपालिका कार्यक्षेत्रात सुमारे १४ लाख ८० हजार मिळकती असून, त्यापैकी सुमारे ८,७४,५४६ मिळकत धारकांनी त्यांचा मिळकत कर रक्कम रु. १८०४ कोटी इतका जमा केलेला आहे. उर्वरित मिळकत कर थकबाकी धारकांकडे या पुढील कालावधी मध्ये मोठ्या प्रमाणात थकबाकी वसुली करण्यासाठी वरील पथकांमार्फत मिळकत कर वसुलीचे काम करण्यात येत आहे. तरी ज्या मिळकत धारकांनी अद्यापही कराचा भरणा केलेला नाही, त्यांचेवर कारवाई केली जाणार आहे, असे जगताप यांनी सांगितले.

पुणे:

स्टार्स  (स्किल्स ट्रेनिंग फॉर एडव्हान्समेंट इन रुरल सोसायटीज) या फोरम तर्फे  आयोजित  ‘कृत्रिम बुद्धिमत्ता आणि त्याचा सामाजिक क्षेत्रातील नेतृत्वाने करावयाचा वापर’  या विषयावरील  पंधराव्या   राष्ट्रीय परिषदेचे उदघाटन ६ डिसेंबर  रोजी  सकाळी झाले.’एमकेसीएल’ संस्थेचे चीफ मेंटॉर डॉ.विवेक सावंत,स्टार्स फोरम चे संस्थापक सदस्य डॉ.सुधीर प्रभू,अध्यक्ष अशोक कलबाग,बाएफ संस्थेचे  अध्यक्ष डॉ भारत काकडे, विश्वस्त चैतन्य नाडकर्णी ,डॉ.क्षमा म्हेत्रे हे उदघाटन सत्रात उपस्थित होते.
   ‘बाएफ ‘ हि संस्था या परिषदेची सहप्रायोजक आहे .बाएफ ( वारजे, पुणे)  येथे दि.६-७ डिसेंबर २०२४ रोजी होत असलेल्या  या परिषदेला देशविदेशातून सामाजिक,उपजीविका,शिक्षण ,रोजगार ,ग्रामविकास  क्षेत्रातील अनेक संस्थांचे  प्रतिनिधी उपस्थित आहेत.स्टार्स फोरम चे संचालक चैतन्य नाडकर्णी व व्यवस्थापक भक्ती तळवेलकर  यांनी स्वागत केले.कृत्रिम बुद्धिमत्ता(आर्टिफिशियल इंटेलिजन्स- AI ) विषयक माहिती,प्रत्यक्ष अनुभव,यशकथा,भवितव्य ,सामाजिक क्षेत्रासाठी कृत्रिम बुद्धिमत्तेचे उपयोजन अशा अनेक मुद्द्यांवर परिषदेत चर्चा होत  आहे.वैयक्तिक,व्यावसायिक आणि सामाजिक क्षेत्रातील कार्यक्षमता वाढविण्यासाठी मार्गदर्शन केले जात  आहे.
६ डिसेंबर रोजी सकाळी ९. ३० वाजता परिषदेचे उद्घाटन झाले. दुपारी आय आय टी ,मुंबई चे प्राध्यापक गणेश रामकृष्णन,माहिती तंत्रज्ञान तज्ज्ञ राहुल कुलकर्णी,रवी बोटवे  यांनी मार्गदर्शन केले. ७ डिसेंबर रोजी दुसऱ्या दिवशीच्या सत्रात दीपा चौधरी,डेव्हिड मेनेंजेस,डॉ.योगेश हरिभाऊ कुलकर्णी हे तज्ज्ञ मार्गदर्शन करणार आहेत. 

 सामाजिक संस्थांसाठी कौशल्य विकासपर प्रशिक्षण
मागील १५ वर्षात स्टार्स फोरमने अनेक राष्ट्रीय परिषदा, औद्योगिक कौशल्य विकासपर प्रशिक्षण कार्यक्रम आयॊजित केले आहेत. सर्व समाजेवी संस्थांना एकाच व्यासपीठावर आणणे  व विविध कौशल्यांची देवाण घेवाण करणे हा  या फोरमचा उद्देश आहे.  आजपर्यंत देशभरातून ३०० हुन अधिक संस्था स्टार्स फोरम शी संलग्न होऊन या प्रयत्नात सहभागी झाल्या आहेत.   
ग्राम विकास व  उपजीविका या क्षेत्रात काम करणा-या संस्थानी, एकत्र प्रयत्न करुन ग्रामीण रोजगार निर्मितीकडे समाजाचे लक्ष वेधण्यासाठी तसेच या विषयातील विचार व कल्पना यांची  देवाण- घेवाण  करण्यासाठी  STARS Forum (Skills Training for Advancement in Rural Societies)- स्टार्स फोरम हि संस्था २०१० सालापासून कार्यरत आहे. ग्रामीण व निमशहरी  लोकांमध्ये असलेल्या कौशल्याचा योग्य वापर करून त्यांच्याकरता  उपजीविका निर्माण करणा-या विविध स्वयंसेवी संस्थांना एकत्र आणणे व त्या करता विविध प्रशिक्षण शिबिरे आयोजित करणे हे  या संस्थेचे  उद्दिष्ट आहे. याच अनुषंगाने दरवर्षीप्रमाणे या वर्षी स्टार्स फोरम आपली पंधरावी  वार्षिक राष्ट्रीय परिषद पुणे येथील  ‘बाएफ’ संस्थेमध्ये ६ व ७ डिसेम्बर रोजी आयोजित करत आहे.

बाणेर-बालेवाडी भागात चौक्या वाढविण्यासाठी सर्वतोपरी मदत करु!- आमदार चंद्रकांतदादा पाटील

पुणे-बाणेर- बालेवाडी पाषाण सूस भागामध्ये बेदरकारपणे गाडी चालवत दहशत निर्माण करणाऱ्यांना कठोर शासन करुन जरब बसववी, असे निर्देश आमदार चंद्रकांतदादा पाटील यांनी आज वरीष्ठ पोलीस निरीक्षक महेश बोळकोटगी यांना दिले. तसेच,नव्याने निर्माण झालेल्या बाणेर पोलीस स्टेशन हद्दीत चौक्यांचे आणि गस्त वाढवावी, अशा सूचना ही त्यांनी यावेळी पोलीस अधिकाऱ्यांना दिल्या.

बाणेर मध्ये गुरुवारी ग्लॉस्टर गाडी चालकाने बेदरकारपणे गाडी चालवत; पाच वाहनांना जोरदार धडक दिली. त्यामुळे परिसरात भितीचे वातावरण निर्माण झाले होते. त्या पार्श्वभूमीवर आज कोथरूडचे आमदार चंद्रकांतदादा पाटील यांनी बाणेर पोलीस स्टेशनला भेट देऊन; सर्व घटनेचा सविस्तर आढावा घेतला.

यावेळी परिमंडळ ४ चे पोलीस उपायुक्त हिमंत जाधव, खडकी विभागाच्या पोलीस सहायक पोलिस आयुक्त अनुजा देशमाने, बाणेर शाखेच्या वाहतूक निरीक्षक श्रीमती सरोदे, बाणेर पोलीस चौकीचे सहाय्यक पोलीस निरीक्षक बाबासाहेब झरेकर, अनिल केकाण, भाजप कोथरुड उत्तरचे अध्यक्ष सचिन पाषाणकर, पुणे शहर सरचिटणीस गणेश कळमकर, प्रल्हाद सायकर, प्रकाशतात्या बालवडकर, लहू बालवडकर, सचिन दळवी, यांच्या सह सर्व पोलीस अधिकारी आणि कर्मचारी उपस्थित होते.

यावेळी पोलीस निरीक्षक महेश बोळकोटगी यांनी घटनेची सविस्तर माहिती आमदार चंद्रकांतदादा पाटील यांना दिली. तसेच, पुढील कारवाई सुरू असल्याचे स्पष्ट केले. त्यावर आ. पाटील यांनी पोलीस प्रशासनाने योग्य कारवाई करुन; दोषींवर कठोर कारवाई करावी अशा सूचना दिल्या. तसेच, भागाच्या सुरक्षेसाठी बेदरकारपणे गाडी चालवत दहशत निर्माण करणाऱ्या वाहनचालकांवर कठोर शासन करावी असेही निर्देश दिले.

तसेच, पुणे शहरातील टेकड्या व अन्य ब्लॅक स्पॉट सुरक्षित केले जावे यासाठी पुणे पोलिसांकडून विशेष उपाययोजना राबवण्यात येत आहेत. शहरातील 13 पेक्षा अधिक टेकड्या आणि 7 पेक्षा अधिक ब्लॅक स्पॉट निश्चित करण्यात आले असून, संबंधित ठिकाणे सीसीटीव्ही आणि लाईट्स च्या माध्यमातून सुरक्षित केली जाणार आहे. याची कडक अंमलबजावणी करुन टेकड्या सुरक्षित करण्याचे निर्देश दिले.

शहराचा वाढता विस्तार आणि कायदा सुव्यवस्थेच्या पार्श्वभूमीवर गृह विभागाने पुणे पोलिस आयुक्तालयात सात नवीन पोलिस ठाण्यांना मंजुरी दिली आहे. त्यासाठी सुमारे ६० कोटी रुपयांच्या निधीची तरतूद करण्यात आली आहे. यामध्ये बाणेर पोलीस स्टेशनचा ही समावेश असून; ८ कोटी ६० लाखाची तरतूद करण्यात आली आहे. भविष्यातही मनुष्यबळ आणि पोलीस चौक्या वाढविण्यासाठी सर्वतोपरी मदत करण्याची ग्वाही यावेळी दिली.

पुणे- विकास कामांमध्ये अधिकाअधिक पारदर्शकता आणून गतीने कामे मार्गी लावण्यासाठी महापालिका प्रशासनाने इंटेलिजन्ट वर्क्स मॅनेजमेन्ट सिस्टिम (आय.डब्ल्यू.एम.एस) सुरू केली असून तिचा वापरही सुरू केला आहे. यामुळे एकाच ठिकाणी विविध विभागांची कामे करताना कामांचे नियोजन करणे, कामाचे डुप्लिकेशन रोखणे यासह डिफेक्ट लायबलिटी पिरियडमध्ये ठेकेदाराकडूनच दुरूस्ती करून घेणे यासारखी कामे एका क्लिकवर समजणार आहेत. त्याचवेळी अगदी कामाच्या एस्टीमेटपासून ते कामाचे बिल अदा करण्यापर्यंतची सर्व कामे पेपरलेस होणार आहे. पुढील महिन्याभरात नागरिकांना त्यांच्या परिसरात सुरू असलेल्या कामांची माहिती ऑनलाईन पाहाता येईल यासाठी महापालिका आयुक्त डॉ. राजेंद्र भोसले (Rajendra Bhosale) यांच्या मार्गदर्शनाखाली प्रणाली तयार करण्यात येईल, अशी माहिती शहर अभियंता प्रशांत वाघमारे (Prashant Waghmare) यांनी दिली.महापालिकेकडून शहरात दरवर्षी हजारो कोटींची विकासकामे केली जातात. मात्र, या सर्व कामांची प्रक्रिया कागदोपत्री होते. अनेकदा त्यात चुकाही होतात. ही कामे पारदर्शक होत असल्याचे पडताळण्यासाठी कोणतीही महापालिकेकडे नव्हती. त्यावर प्रशासनाने आता इंटेलिजंट वर्क्स मॅनेजमेंट सिस्टीम अर्थात “आयडब्ल्यूएमएस’ प्रणाली विकसित केली आहे.

निविदा प्रक्रियेपासून ते काम पूर्ण होईपर्यंत सर्व टप्प्यांवर आॅनलाइन नोंदणी आणि कामाच्या प्रगती, कामाची माहिती फोटोसह उपलब्ध असेल. मागील तीन वर्षांपासून वेगवेगळ्या विभागांत टप्प्याटप्प्याने ही प्रणाली वापरली जात आहे. त्यामुळे पालिकेच्या कामकाजात गतिमानता आणि पारदर्शकता वाढल्याची माहिती महापालिकेचे शहर अभियंता प्रशांत वाघमारे यांनी दिली. या प्रणालीचे सादरीकरण या वेळी करण्यात आले.

निविदांपासून ते थेट बिल तयार होईपर्यंतची सर्व प्रक्रिया या प्रणालीवर केली जाते. त्यासाठी प्रत्येक टप्प्यावरील अधिकाऱ्यांना “ई- सिग्नेचर’ देण्यात आल्या आहेत. त्यामुळे केवळ कामाची माहिती, बजेट कोड आणि मान्यतेची रक्कम संगणक प्रणालीमध्ये भरल्यानंतर कोणत्याही मानवी हस्तक्षेपाशिवाय निविदा तयार होतात. त्यानंतर त्या स्थायी समिती व मुख्यसभेत मान्यतेसाठी पाठवून नंतर कार्यादेश दिले जातात.

तर, काम पूर्ण झाल्यानंतर त्यासाठीची आवश्यक माहिती भरल्यानंतर कामाची पडताळणी करून बिल तयार होते. त्यामुळे कामाची सर्व माहिती विभाग प्रमुखांना एका क्लिकवर मिळते. या माहितीचा एकत्रित डॅशबोर्ड असून त्याद्वारे आयुक्त आणि अतिरिक्त आयुक्तांनाही शहरात कोणत्या विभागाची, नेमकी किती, कुठे आणि किती रकमेची कामे सुरू आहेत. किती कामे पूर्ण झालीत, किती कामांची बिले देण्यात आली आहेत अशी सर्व माहिती उपलब्ध होणार आहे.

पुणे, ६ डिसेंबर २०२४: मंत्रिमंडळाच्या पहिल्याच निर्णयात आरोग्य सेवेला प्राधान्य दिल्याबद्दल सह्याद्रि हॉस्पिटल्स माननीय मुख्यमंत्र्यांचे मनःपूर्वक आभार मानत आहे. सह्याद्रि हॉस्पिटलमध्ये बोन मॅरो ट्रान्सप्लांट (बीएमटी) उपचार घेत असलेल्या रुग्णाला आधार देण्याचा हा दयाळू आणि परिणामकारक निर्णय नागरिकांच्या हितासाठी मुख्यमंत्र्यांच्या अतूट बांधिलकीचा पुरावा देणार आहे.

सह्याद्रि नगररोड सुपर स्पेशालिटी रुग्णालयात दाखल असलेल्या चंद्रकांत शंकर कुऱ्हाडे या रुग्णासाठी मुख्यमंत्री देवेंद्र फडणवीस यांनी मुख्यमंत्री निधीतून पाच लाख रुपये मंजूर केले आहेत.यावेळी सह्याद्रि हॉस्पिटल्सचे मुख्य कार्यकारी अधिकारी आणि संचालक श्री. अब्रारअली दलाल यांनी कृतज्ञता व्यक्त करताना सांगितले की, “सह्याद्रि हॉस्पिटल्स आणि संपूर्ण आरोग्य सेवा समुदायाच्या वतीने, मी माननीय मुख्यमंत्र्यांचे, त्यांनी हा निर्णय घेतल्याबद्दल त्यांच्या दूरदर्शी नेतृत्व आणि आरोग्य सेवेच्या समर्पणाबद्दल आभार मानू इच्छितो. बीएमटी उपचार घेत असलेल्या रुग्णाला वेळेवर आधार देणे हे केवळ रुग्ण आणि त्यांच्या कुटुंबासाठी आशादायक ठरत नाही तर सुलभ आणि परवडणाऱ्या आरोग्यसेवेचे महत्त्व देखील अधोरेखित करते.”

बोन मॅरो ट्रान्सप्लांट ही रक्ताचा कर्करोग आणि अनुवांशिक विकारांसारख्या गंभीर आजारांशी लढा देणाऱ्या अनेक रुग्णांसाठी एक जीवदान देणारी प्रक्रिया आहे. अशा गंभीर आरोग्यसेवेच्या गरजा पूर्ण करून मुख्यमंत्र्यांनी रुग्ण आणि त्यांच्या कुटुंबियांना भेडसावणाऱ्या आव्हानांबद्दलची सखोल जाण दाखवली आहे.

“गरजू रुग्णांना प्रगत वैद्यकीय सेवा पुरवण्यासाठी सरकारसोबत भागीदारी करण्याची संधी मिळाल्याचा आम्हाला अभिमान आहे. आमच्याकडे उपचारासाठी दाखल होणाऱ्या सर्व रुग्णांची सर्वोत्कृष्ट काळजी घेऊन त्यांना सर्वतोपरी मदत करण्यासाठी धोरणकर्त्यांसोबत हातमिळवणी करून काम करण्यास आम्ही कायमच कटिबद्ध आहोत.” श्री. अब्रारअली दलाल पुढे म्हणाले. 

हा ऐतिहासिक निर्णय अनेकांसाठी आशेचा किरण आहे. आणि राज्यभरातील आरोग्यसेवा, पायाभूत सुविधा आणि सेवांना बळकटी देण्याच्या उद्देशाने भविष्यातील उपक्रमांसाठी एक भक्कम आदर्श ठेवणारा आहे.

पुणे, दि. ६: मुंबई-पुणे द्रुतगतीमार्गावर आयटीएमएस प्रणाली अंतर्गत ५२ ठिकाणी दोन्ही बाजूने कृत्रीम बुद्धीमत्तेवर (एआय) आधारित कॅमेरे बसविण्यात आले आहेत. रडारतंत्राचा वापर करुन वाहनांचा वेग मोजण्यात येत असून वेग मर्यादेपेक्षा अधिक वेगाने वाहन चालविल्यास अशा वाहनाना ई-चलान देण्यात येत आहे.

पिंपरी-चिंचवड प्रादेशिक परिवहन अधिकारी कार्यालयाच्यावतीने मुंबई-पुणे द्रुतगतीमार्गावर आयटीएमएस प्रणाली कार्यान्वित करण्यात आली आहे. मुंबई पुणे महामार्गावर घाट परिसरामध्ये हलके मोटार वाहन (कार) ह्यांची वेग मर्यादा ६० किमी प्रतितास असून उर्वरित सर्व वाहनांची वेग मर्यादा ४० किमी प्रतितास आहे. घाट परिसर वगळता इतर ठिकाणी हलके मोटार वाहन (कार) ह्यांची वेग मर्यादा १०० किमी प्रतितास असून उर्वरित सर्व वाहनांची वेग मर्यादा ८० किमी प्रतितास आहे.

प्रणाली अंतर्गत बसविण्यात आलेल्या कॅमेऱ्याद्वारे सीटबेल्ट परिधान न करणे, वाहन चालविताना मोबाईलचा वापर करणे, लेनची शिस्त न पाळणे आदी वाहतूक नियमांचे उल्लघंन करणाऱ्या वाहनांना ई-चलान देण्यात येत आहे. तरी सर्व वाहन धारकांनी वाहतूक करतांना सर्व नियमांचे पालन करावे व वेग मर्यादेचे उल्लंघन होणार नाही, याबाबत वाहनधारकांनी दक्षता घ्यावी, असे आवाहन उप प्रादेशिक परिवहन अधिकारी राहूल जाधव यांनी प्रसिद्धी पत्रकान्वये कळविले आहे.
0000