दिनदर्शिकेच्या माध्यमातून राष्ट्रीय स्वयंसेवक संघाचे विचार घरोघरी पोहोचविणे स्तुत्य – रवींद्र वंजारवाडकर.

पुणे-राष्ट्रीय स्वयंसेवक संघाच्या शताब्दी वर्षात उद्यम विकास सहकारी बँक , पुणे ने “रा.स्व.संघाबद्दल” माहिती देणारी दिनदर्शिका काढली आणि ह्या माध्यमातून संघ विचार घरोघरी पोहोचविण्याचा संकल्प केला हे स्तुत्य असल्याचे गौरवोदगार राष्ट्रीय स्वयंसेवक संघाचे पुणे महानगर संघचालक रवींद्र वंजारवाडकर यांनी काढले. यावेळी रा.स्व.संघाचे पुणे महानगर कार्यवाह सचिन भोसले, बँकेचे अध्यक्ष सीए.दिनेश गांधी, उपाध्यक्षा सौ.लीनाताई अनास्कर, माजी अध्यक्ष व संचालक संदीप खर्डेकर, बँकेचे संचालक सर्वश्री सीए अभय शास्त्री,राजाभाऊ पाटील, शैलेश टिळक , मनोज नायर व जयंत काकतकर उपस्थित होते.
दिनदर्शिकेच्या मुखपृष्ठावर संघाची प्रार्थना तिच्या अर्थासहीत व आतील पानांवर आजवरच्या संघाच्या सहा सरसंघचालकांची छायाचित्रे व त्यांची माहिती तर अन्य पानांवर विश्व हिंदू परिषद, राष्ट्रसेविका समिती, सहकार भारती, वनवासी कल्याण आश्रम व आंतरराष्ट्रीय स्तरावर हिंदू संघटनाचे कार्य करणाऱ्या हिंदू स्वयंसेवक संघ या राष्ट्रीय स्वयंसेवक संघाच्या प्रमुख संघटनांची माहिती दिली असल्याचे बँकेचे अध्यक्ष सीए दिनेश गांधी व संचालक संदीप खर्डेकर यांनी सांगितले.
उद्यम विकास सहकारी बँकेच्या संचालक व कर्मचाऱ्यांसाठी राष्ट्रीय स्वयंसेवक संघाचे विचार हे प्रेरणास्रोत असून आम्ही सामान्य नागरिकांना केंद्रस्थानी ठेवून सचोटीने व ग्राहकोन्मुख दृष्टिकोनातून बँकेचा व्यवसाय करण्यावर भर देतो असे बँकेचे अध्यक्ष सीए.दिनेश गांधी म्हणाले.

 पुणे – पुणे शहर हरित करून प्रदूषण मुक्त करण्याच्या मोहिमेचा प्रचार प्रसार करण्याच्या उद्द्देशाने  दाउदी बोहरा समाजाच्या वतीने आयोजित चौथे सैफी बुरहानी एक्सपो पुणे 2025 तर्फे गो ग्रीन पुणेे रॅलीचे रविवार, 29 डिसेंबर 2024  सकाळी 9.30 वाजता  आयोजन करण्यात आली होती . या रॅलीत जानब अब्दली भाईसाब – अमिल साब पुणे, जनब इदरीस भाईसाब, मोइज़ जमाली, हुज़ेफा परदावाला, कुरेश घोडनादिवाला,  फखरुद्दीन चोपड़ावाला, हमजा छत्रिस,
अब्दुल कादिर सद्भावना सह लहान मुलांपासून तर वृद्धांचा समावेश होता. गो ग्रीन पुणे रॅली मध्ये  1२ कार आणि 60 बाइक्ससह ग्रीन पुणे कॅम्पेन आणि एक्स्पोचा प्रचार करणारे पोस्टर्स सह सहभागी झाल्या होत्या. .
सदर गो ग्रीन पुणे रॅली पुणे कॅम्पपासून फ्लॅग दाखून  सुरुवात  करण्यात आली. सदर रॅली पुढे    सोलापूर रोड, हडपसर, फातिमानगर, वानवडी, साळुंके विहार, एनआयबीएम, फाखरी हिल्स, एमजी रोड, लक्ष्मी रोड, डेक्कन, फर्ग्युसन कॉलेज रोड, पुणे विद्यापीठ रोड, बंड गार्डन रोड, कल्याणी  नगर, विमान नगर, डेक्कन कॉलेज ग्राऊंड करीत पुन्हा कॅम्प येथे संपली .

सैफी बुरहानी एक्सपो पुणे 2025 गेल्या तीन वर्षांपासून करित असून यंदा चौथे वर्ष आहे. सैफी बुरहानी एक्सपो पुणे 2025 येत्या 4  जानेवारी 2025 पासून सुरु होत असून 6 जानेवारी पर्यंत डेक्कन कॉलेज ग्राऊंड येथे चालणार आहे. सैफी बुरहानी एक्सपो पुणे 2025 व हरित पुणे मोहिम चा प्रचार व प्रसार करण्याच्या उ्द्देशाने  गो ग्रीन पुणे रॅली  आयोजित करण्यात आली होती .

पुणे-खडक पोलिस ठाण्याचे हद्दीत एका इंग्लिश मिडियम शाळेतील २७ वर्षीय शिक्षिकेने स्वत:ची लैंगिक इच्छा भागविण्यासाठी, दहावी मध्ये शिक्षण घेणाऱ्या विद्यार्थ्यास प्रेमाच्या जाळयात ओढून त्याच्यावर लैंगिक अत्याचार केल्याचा धक्कादायक प्रकार उघडकीस आला आहे. याप्रकरणी पीडित विद्यार्थ्याच्या पालकांनी शिक्षिकेविरोधात पोलिसांकडे तक्रार दाखल केल्यानंतर, आरोपी शिक्षिकेस अटक करण्यात आली आहे.

पोलिसांनी दिलेल्या माहितीनुसार, आरोपी महिला या शिक्षिका असून इंग्रजी माध्यमाच्या शाळेत शिक्षक पदावर काम करत आहे. शाळेतील विद्यार्थ्यांची शाळेचे कालावधीत पालकत्वाची शिक्षिक या नात्याने संपूर्ण जबाबदारी आपली असते हे माहिती असताना देखील, त्यांनी १० वी इयत्तेत शिक्षण घेणाऱ्या एका १७ वर्षीय अल्पवयीन विद्यार्थ्याचा अज्ञानपणाचा फायदा घेऊन त्याच्या सोबत प्रेमसंबंध जुळवले. तो प्रिलियम परिक्षेस शाळेत हजर असताना, त्यास प्रेमाची भुरळ पाडून शारिरिक संबंधासाठी प्रोत्साहित व उत्तेजीत करुन आपल्या शरीर सुखासाठी त्याचा वापर करुन त्याच्याशी शाळेच्या आवारात शारिरिक संबंध प्रस्थापित करुन अल्पवयीन विद्यार्थ्याची लैंगिक सतावणूक केली. याबाबत खडक पोलिस पुढील तपास करत आहे.

पुणे- सहकारनगर मध्ये राहणारे दोघे चोरटे पकडून त्यांच्याकडून सहकारनगर पोलिसांनी ८ दुचाकी जप्त केल्या . या संदर्भात पोलिसांनी सांगितले कि,’
दि.२६/१२/२०२४ सहकारनगर पोलीस स्टेशन कडील तपास पथकातील पोलीस अधिकारी व पोलीस अंमलदार व सहकारनगर मार्शल असे वाहन चोरी, गुन्हे प्रतिबंधक पेट्रोलिग व गुन्हेगार चेकिग करीत असताना एका यामाहा दुचाकी गाडीवर बसुन दोन इसम भरधाव वेगाने बिकानेर चौकाकडे जाताना दिसले. त्यांचा संशय आल्याने त्यांचा पाठलाग करुन त्यांना थोड्याच अंतरावर गाडीसह थांबवुन ताब्यात घेतले १) अन्वर सलीम शेख वय २१ वर्षे धंदा गॅरेज काम रा. नुर मंहम मस्जिद गल्ली दाते यसस्टॉप सहकारनगर पुणे २) फरीद लालापाशा सय्यद वय १९ वर्षे धंदा गॅरेज काम रा.नुर मंहमद मस्जिद गल्ली दाते बसस्टॉप सहकारनगर पुणे अशी त्यांची नावे आहेत.
त्यांचे ताब्यात एक यामाहा गाडी मिळून आली त्या गाडी बाबत त्याच्याकडे चौकशी करता सदरची गाडी आम्ही दोघांनी साधारण दोन महिन्यापुर्वी दाते बसस्टॉप येथील रोडवरुन चोरली असुन तीचा वापर करुन ती के. के. मार्केट भागात पार्क केली होती. हि गाडी विकण्यासाठी आम्ही गि-हाईक शोधत होतो. असे कबुल केले सदर गाडी बाबत सहकारनगर पोलीस स्टेशन येथे गु.र.नं.३३२/२०२४ भा.न्या.स.२०२३ चे कलम ३०३ (२) प्रमाणे गुन्हा दाखल असल्याची माहिती मिळाल्याने सदर आरोपीकडे अधिक चौकशी करता त्यांनी आणखी सात दुचाकी वाहने चोरल्याचे सांगितले सदर आरोपी कडुन एकुण २,४०,०००/- रु किं.ची ८ वाहने हस्तगत करण्यात आली असुन सहकारनगर पोलीस ठाण्याकडील एकूण ०६ वाहनचोरीचे गुन्हे उघड करण्यात आले आहेत. या आरोपी वर हत्यार बाळगले बाबत ०१ गुन्हा सहकारनगर पोलीस स्टेशन येथे दाखल आहेत.
सदरची कामगीरी अपर पोलीस आयुक्त पश्चिम प्रादेशीक विभाग प्रविणकुमार पाटील पोलीस उपायुक्त परि.-२, श्रीमती स्मार्तना पाटील सहा. पोलीस आयुक्त, स्वारगेट विभाग राहुल आवारे सहकारनगर पोलीस स्टेशनचे वरिष्ठ पोलीस निरीक्षक छगन कापसे, यांचे मार्गदर्शनाखाली तपास पथकाचे सहा पोलीस निरीक्षक सागर पाटील, सहा. पो उप निरी बापु खुटवड, पोलीस अंमलदार अमोल पवार किरण कांबळे, बजरंग पवार, चंद्रकांत जाधव, विनायक एडके, महेश मंडलिक, अमित पदमाळे, सागर सुतकर, खंडु शिंदे, योगेश ढोले, महेश भगत, अभिमान बागलाने, बबलु भिसे, सचिन येनपुरे, नामदेव केंद्रे यांनी केली आहे.

पुणे, दि.२८: छत्रपती शाहू महाराज संशोधन, प्रशिक्षण व मानव विकास संस्थेच्यावतीने (सारथी) ‘सरदार सूर्याजी काकडे सारथी वाहन चालक कौशल्य विकास प्रशिक्षण कार्यक्रम’ अंतर्गत मराठा, कुणबी, कुणबी-मराठा व मराठा-कुणबी समाजातील १ हजार ५०० तरुणांना वाहन चालक प्रशिक्षण देण्यात येणार आहे.

प्रशिक्षित वाहन चालकांची देशात व देशाबाहेर दिवसेंदिवस मोठ्या प्रमाणात मागणी होत आहे. त्यानुसार संस्थेने १५०० व्यक्तींना दर वर्षी हलकी मोटार वाहने (लाईट मोटर व्हेईकल) व जड मालवाहू वाहने (हेवी ट्रान्सपोर्ट व्हेईकल) चालविण्याचे कौशल्य विकास प्रशिक्षण देण्यात येणार आहे. या तरुण-तरुणींना केंद्रीय रस्ते वाहतूक आणि महामार्ग मंत्रालयाच्या रस्ता सुरक्षा उपक्रमांतर्गत असलेल्या आय.डी.टी.आर. पुणे या केंद्र शासनाच्या संस्थेमार्फत एका महिन्याचे प्रशिक्षण विनामूल्य देण्यात येईल.

दररोज आठ तासाचे हे प्रशिक्षण राहील. त्यामध्ये वाहनांचे भाग, त्यांची देखभाल, दुरुस्ती तसेच वाहनचालनाच्या भारतातील व परदेशातील नियमांची माहिती देण्यात येईल. तसेच दररोज क्षेत्रीय स्तरावर सराव व प्रशिक्षण देण्यात येईल. या विद्यार्थ्यांना एका प्रशिक्षण महिन्यासाठी रुपये १० हजार रुपये विद्यावेतन देण्यात येईल.

सारथीचे अध्यक्ष तथा निवृत्त मुख्य सचिव अजित निंबाळकर यांच्या अध्यक्षतेखाली सर्व संचालक मंडळाने १७ डिसेंबर २०२४ रोजीच्या संचालक मंडळाच्या बैठकीत या योजनेला मान्यता दिली असून हे प्रशिक्षण छत्रपती शिवाजी महाराजांच्या जयंतीच्या दिवशी १९ फेब्रुवारी २०२५ पासून सुरू करण्याचे निर्देश दिले आहे.

यामुळे राज्यातील ग्रामीण भागात तसेच परदेशात तरुणांना रोजगाराची संधी मोठ्या प्रमाणात निर्माण होणार आहे. याकरिता जास्तीत जास्त सारथी लक्षीत गटातील व्यक्तींनी या प्रशिक्षणाचा लाभ घ्यावा, असे आवाहन संस्थेचे व्यवस्थापकीय संचालक अशोक काकडे यांनी प्रसिद्धीपत्रकान्वये केले आहे.

चांगले काम करणाऱ्या वसतीगृहाचा राज्यातील इतर वसतीगृहांनी आदर्श घ्यावा- संजय शिरसाट

पुणे, दि.२८: राज्याचे सामाजिक न्याय विभागाचे मंत्री संजय शिरसाट यांनी मोशी, पिंपरी चिंचवड येथील २५० क्षमतेच्या मुलींचे शासकीय वस्तीगृहाची भेट देऊन पाहणी केली. या वसतिगृहाचे काम समाधानकारक असल्याचे सांगून चांगले काम करणाऱ्या वसतीगृहांचा राज्यातील इतर वसतीगृहांनी आदर्श घ्यावा, असेही ते म्हणाले.

यावेळी समाज कल्याण विभागाचे आयुक्त प्रवीण पुरी, सहआयुक्त प्रमोद जाधव, पुणे विभागाच्या प्रादेशिक उपायुक्त श्रीमती वंदना कोचुरे, पुणे समाज कल्याण सहाय्यक आयुक्त विशाल लोंढे, गृहप्रमुख श्रीमती मीनाक्षी येमले, गृहपाल श्रीमती प्रमिला आमले आदींसह कर्मचारी व वसतीगृहातील विद्यार्थी, विद्यार्थिनी उपस्थित होत्या.

आपल्यासमोर विद्यार्थ्यांच्या हिताला कायम प्राधान्य असल्याचे सांगून त्यादृष्टीकोनातूच राज्यातील विविध शासकीय वसतिगृहांची पाहणी करत असल्याचे श्री. शिरसाट यांनी यावेळी सांगितले. विद्यार्थिनींशी चर्चा करत वसतिगृहातील जेवण तसेच देण्यात येणारे शालेय साहित्य, पिण्याचे पाणी, सुरक्षा व्यवस्था आदी सुविधांबाबत त्यांनी मुलींकडून माहिती जाणून घेतली. वसतीगृहात असलेली स्वच्छता व इतर कामकाजाबाबत मंत्री संजय शिरसाट यांनी समाधान व्यक्त केले.

यावेळी समाजकल्याण विभागाचे अधिकारी तसेच वसतिगृहाच्या गृहप्रमुख, गृहपालांनी मंत्री श्री. शिरसाट यांना वसतिगृहाच्या कामकाजाची माहिती दिली.

अभिवादन सोहळ्याकरिता येणाऱ्या अनुयायींना सर्व सुविधा पुरविण्याची चोख व्यवस्था करा-मंत्री संजय शिरसाट

पुणे, दि. २८: पेरणे फाटा येथे १ जानेवारी २०२५ रोजी आयोजित विजयस्तंभ अभिवादन सोहळ्याकरीता येणाऱ्या अनुयायींना आवश्यक त्या सर्व सुविधा पुरविण्यासाठी यंत्रणांनी समन्वयाने चोख व्यवस्था करा, असे निर्देश सामाजिक न्याय मंत्री संजय शिरसाट यांनी दिले. दरवर्षी त्याच-त्याच सुविधा पुन्हा कराव्या लागत असल्याने कायमस्वरुपी सुविधा तयार करण्याच्या अनुषंगाने कार्यवाही करावी, अशा सूचनाही त्यांनी यावेळी केल्या.

हवेली तालुक्यातील मोजै पेरणे फाटा येथे होणाऱ्या विजयस्तंभ अभिवादन कार्यक्रमाच्या पूर्वतयारीबाबत जिल्हाधिकारी कार्यालयात आयोजित आढावा बैठकीत ते बोलत होते. बैठकीस सामाजिक न्याय राज्यमंत्री श्रीमती माधुरी मिसाळ, प्र. समाज कल्याण आयुक्त प्रवीण पुरी, प्रभारी जिल्हाधिकारी तथा जिल्हा परिषदेचे मुख्य कार्यकारी अधिकारी संतोष पाटील, पुणे शहर पोलीस सह आयुक्त रंजन कुमार शर्मा, पिंपरी चिंचवडचे पोलीस सह आयुक्त शशिकांत महावरकर, डॉ. बाबासाहेब आंबेडकर संशोधन व प्रशिक्षण संस्था तथा बार्टीचे महासंचालक सुनील वारे, समाज कल्याण सहआयुक्त सुरेंद्र पवार, प्रमोद जाधव आदी उपस्थित होते.

जिल्हा प्रशासनाने विजयस्तंभ अभिवादन सोहळ्याच्या अनुषंगाने केलेल्या तयारीबाबत समाधान व्यक्त करुन मंत्री श्री. शिरसाट म्हणाले, कार्यक्रमासाठी दरवर्षी पार्किंगसाठी खासगी जागा ताब्यात घेणे, सपाटीकरण करणे यावर मोठा खर्च होत असतो. त्यामुळे या कार्यक्रमाच्या अनुषंगाने शासकीय जागा उपलब्ध करण्याच्या अनुषंगाने प्रयत्न करावेत. त्या परिसरात शासकीय दवाखाना, विश्रांतीकक्ष उभारण्यासाठी प्रयत्न करावेत. विजयस्तंभाच्या बाजूच्या जागेबाबत न्यायालयीन वाद सुटण्याच्या दृष्टीने उच्च न्यायालयात चांगला वकील नेमून प्रयत्न करावा, असेही ते म्हणाले.

श्री. शिरसाट पुढे म्हणाले, विजयस्तंभास अभिवादन करण्यासाठी येणाऱ्या अनुयायांच्या संख्येत दरवर्षी वाढ होत होत आहे. कार्यक्रमासाठी येणाऱ्या अनुयायांना शासनामार्फत आरोग्य सेवा देतानाच अशासकीय स्वयंसेवी संस्थांचा त्यामध्ये सहभाग घेण्यासाठी प्रयत्न करावेत. पोलीस विभागावर बंदोबस्ताची मोठी जबाबदारी असल्याने शासनाच्या सर्व विभागांनी त्या ठिकाणी केलेल्या आपल्या सुविधांची व कामाची माहिती पोलीसांना तसेच एकमेकांना उपलब्ध करुन द्यावी. कार्यक्रम अत्यंत सुंदर, चांगल्या रितीने संपन्न होईल यासाठी सर्व यंत्रणांनी समन्वयाने काम करावे, असेही ते म्हणाले.

राज्यमंत्री श्रीमती मिसाळ म्हणाल्या, विजयस्तंभ सोहळ्याचे उत्तम नियोजन करतानाच अनुयायींना कोणतीही गैरसोयीला सामोरे जावे लागणार नाही याची काळजी घ्यावी. येणाऱ्यांपैकी अनेक अनुयायी छत्रपती संभाजी महाराज यांच्या समाधीचे व बलिदानस्थळाचे दर्शनासाठी वढू बुद्रुक व तुळापूरला जात असल्याने त्या ठिकाणी देखील पार्किंग आदी सुविधा निर्माण कराव्यात. अवकाळी पावसाची शक्यता लक्षात घेता त्याअनुषंगानेही तयारी करावी, अशा सूचनाही श्रीमती मिसाळ यांनी यावेळी दिल्या.

विभागीय आयुक्त डॉ. पुलकुंडवार म्हणाले, कार्यक्रमाच्या ठिकाणी तसेच नदीपात्राच्या बाजूला एनडीआरएफचे पथक नेमण्यात येते. तसेच जिल्हा आपत्ती व्यवस्थापन दलाचे पथक नेमण्यात येते. ही पथके आवश्यक त्या सर्व सामग्रीसह सज्ज ठेवावीत. पार्किंग स्थळे रात्री चांगली प्रकाशमान राहतील याची काळजी घ्यावी. तसेच कोणताही अनुचित प्रकार घडू नये यासाठी या ठिकाणी रात्र गस्त वाढविण्यात यावी.

जिल्हाधिकारी श्री. पाटील यांनी कार्यक्रमाच्या अनुषंगाने केलेल्या तयारीची माहिती दिली. कायमस्वरुपी पार्किंगसाठी पीएमआरडीएच्या मोकळ्या जागांबाबत पर्याय तपासण्यात येईल. तसेच कार्यक्रमाच्या वेळी पार्किंगसाठी वक्फ बोर्डाच्या जागेबाबतही प्रयत्न करण्यात येईल, असे त्यांनी सांगितले.

ग्राहकांचा फायदा आणि शाश्वतता कायम
पुणे-जागतिक ऊर्जा बाजारातील चढ-उतारांमुळे महापालिका नैसर्गिक वायू लिमिटेड (MNGL) ने आपल्या मौल्यवान ग्राहकांच्या हिताचा सर्वोच्च विचार करत काळजीपूर्वक निर्णय घेतला आहे. आयातित नैसर्गिक वायूच्या किमतीत झालेली मोठी वाढ आणि बाजाराच्या दरावर आधारित वायू पुरवठा यामुळे MNGL समोर मोठे आव्हान निर्माण झाले होते. तरीही, MNGL आपल्या ग्राहकांना मूल्य व टिकाऊपणा पुरवण्याच्या वचनबद्धतेत ठाम आहे.
ऑपरेशनल क्षमता आणि ग्राहकांच्या परवडण्याची शक्यता यांचा समतोल राखण्यासाठी, MNGL ने या वाढीचा काही भाग स्वतः काढून घेतला आहे. परिणामी, पुण्यातील संकुचित नैसर्गिक वायू (CNG) च्या दरात ₹१.१० प्रति किलोची किरकोळ वाढ होईल, ज्यात उत्पादन शुल्क आणि राज्य VAT समाविष्ट आहे, जे एकूण वाढीचा सुमारे १५% भाग आहे. या बदलामुळे MNGL च्या ग्राहकांच्या हिताची सर्वोच्च प्राथमिकता आणि वायू पुरवठ्यातील अखंडता कायम राहील, हे स्पष्ट होते.
या किरकोळ वाढीच्या बाबतीत देखील, CNG हे पेट्रोल आणि डिझेलच्या तुलनेत अद्यापही सर्वात किफायतशीर आणि पर्यावरणपूरक इंधन आहे. पुण्यात, CNG पेट्रोलच्या तुलनेत ४०% पेक्षा जास्त आणि डिझेलच्या तुलनेत २०% पेक्षा जास्त सवलतीत आहे, हे सिद्ध करत आहे की वाहनमालकांसाठी CNG हे पर्यावरणास अनुकूल आणि मूल्य वर्धित इंधन आहे.
ही दरवाढ जागतिक बाजारातील चढ-उतारांचा थेट परिणाम आहे. उदाहरणार्थ, एप्रिल २०२२ मध्ये पुण्यातील CNG ची किंमत ₹९२.०० प्रति किलो होती, जी आता ₹८९.०० प्रति किलो आहे. यामुळे MNGL च्या अत्याधुनिक धोरणाने किमतींमध्ये स्थिरता राखण्यासाठी केलेल्या प्रयत्नांचे समर्थन होते.
या वर्षी, MNGL ने पुण्यातील वाढत्या मागणीसाठी इन्फ्रास्ट्रक्चर सुधारण्याच्या दिशेने महत्त्वपूर्ण पाऊले उचलली आहेत:

• पुण्यात वायू नेटवर्क उन्नत करण्यासाठी ₹२५५ कोटींचे गुंतवणूक
• ६ लाख DPNG कनेक्शन्स यशस्वीपणे वितरण, आणि या वर्षाच्या अखेरपर्यंत ७ लाख कनेक्शन्सची लक्ष्य
• ११२ पेक्षा जास्त CNG स्टेशन, आणि या आर्थिक वर्षाच्या अखेरपर्यंत १२२ स्टेशनची योजना – राष्ट्रीय पातळीवरील सर्वात जास्त कोणत्याही नगरपालिकेतील संख्या
  तथापि, MNGL ने जरी काही खर्चावर नियंत्रण ठेवण्याचा निर्णय घेतला असला तरी, इतर बाजारातील कोणत्याही प्रतिस्पर्ध्यांनी आपले दर कमी केलेले नाहीत. हे दर्शविते की, MNGL ने ग्राहकांच्या कल्याणासाठी असामान्य प्रयत्न केले आहेत, आणि उद्योगाच्या सर्वसाधारण आव्हानांवर मात करण्यासाठी उत्तम काम केले आहे.
  MNGL चे लक्ष ग्राहकांच्या समाधानावर, इन्फ्रास्ट्रक्चरच्या गुणवत्तेवर आणि पर्यावरणाच्या टिकावावर कायम आहे. सतत गुंतवणूक आणि धोरणात्मक नियोजन यांमुळे MNGL पुणे शहराला किफायतशीर, विश्वासार्ह आणि हरित ऊर्जा उपाय प्रदान करण्यासाठी कटिबद्ध आहे.
  MNGL आपल्या ग्राहकांचे विश्वास आणि समजून घेण्याबद्दल धन्यवाद व्यक्त करत आहे आणि जागतिक आव्हानांचा सामोरा जात एक टिकाऊ भविष्य निर्माण करण्यासाठी प्रयत्नशील आहे.

चार दिवस विविध साहित्यिक, सांस्कृतिक उपक्रम; महाराष्ट्रासह देशविदेशातून ६०० कवींचा सहभाग२५ फुलेप्रेमी कवींना ‘समाजरत्न पुरस्कार’ पुरस्कार; कवी विजय वडवेराव यांची पत्रकार परिषदेत माहिती

पुणे: देशातील मुलींची पहिली शाळा भिडेवाडा आंतरराष्ट्रीय काव्यजागर अभियानांतर्गत पहिल्या आंतरराष्ट्रीय म.फुले फेस्टिव्हलचे आयोजन करण्यात आले आहे. दि. २ ते ५ जानेवारी २०२५ या कालावधीत नवी पेठेतील एस. एम. जोशी फाउंडेशनच्या सभागृहात सकाळी ९ ते रात्री ९ असा सलग १२ तास, चार दिवस हा फेस्टिव्हल होणार आहे. महाराष्ट्रासह देशविदेशातून ६०० कवी, साहित्यिक, विचारवंत, कलाकार यामध्ये सहभागी होणार असल्याची माहिती फेस्टिवलचे मुख्य आयोजक, भिडेवाडाकार कवी विजय वडवेराव यांनी पत्रकार परिषदेत दिली. सहकारी अरविंद बनसोडे यावेळी उपस्थित होते.
विजय वडवेराव म्हणाले, “क्रांतीसूर्य महात्मा जोतीराव फुले आणि ज्ञानज्योती सावित्रीमाई फुले यांनी देशातील पहिली मुलींची शाळा पुण्यातील बुधवार पेठेतील भिडेवाड्यात सुरु केली. या शाळेचा इतिहास जतन व्हावा, फुलेंच्या या कार्यकर्तृत्वाचा प्रचार व प्रसार व्हावा आणि हा इतिहास पुढच्या पिढ्यांपर्यंत पोहोचावा, हा या फेस्टिवलच्या मुख्य उद्देश आहे. या फेस्टिवलमध्ये देश-विदेशातील सहाशे कवींचा काव्य महोत्सव, भिडेवाडा या विषयावर मराठी गझल मुशायरा, एकपात्री प्रयोग, शालेय विद्यार्थ्यांच्या नाट्यछटा, एकांकिका, सांगितिक पोवाडे, महिला सक्षमीकरणासाठी लाठीकाठी, दांडपट्टा प्रात्यक्षिक असे विविध उपक्रम या चार दिवसात होणार आहेत.”
“फेस्टिवलमध्ये सर्वांसाठी विनामूल्य प्रवेश आहे. दुबईतील कवींच्या हस्ते फेस्टिव्हलचे उद्घाटन होईल. लंडन, ऑस्ट्रेलिया, अबुधाबी आदी देशांतून, तसेच केरळ, मध्यप्रदेश, राजस्थान, गुजरात, दिल्ली, उत्तरप्रदेश आदी राज्यातून कवी-कवयित्री सहभागी होत आहेत. सावित्रीमाई, फातिमाबी व महात्मा फुले यांच्या वेशात कवी सहभागी होणार आहेत, हे या फेस्टिव्हलचे आकर्षण असणार आहे. महात्मा फुले व सावित्रीबाई फुले यांचा त्याग, समर्पण आणि देशाच्या जडणघडणीतील योगदान अमूल्य आहे. फुले दाम्पत्याला भारतरत्न देण्याबाबतचा जागरही या फेस्टिवलमध्ये केला जाणार आहे. ही एक चळवळ असून, फुले विचार पुढच्या पिढीमध्ये रुजवण्यासाठी प्रयत्न करत आहे,” असे वडवेराव म्हणाले.
भिडेवाडा अभियानात विशेष कार्य करणाऱ्या जगभरातील २५ फुलेप्रेमी कवी, कवयित्री व कार्यकर्त्यांना फेस्टिव्हलमध्ये ‘आंतरराष्ट्रीय फुलेप्रेमी समाजरत्न पुरस्कार’ देऊन सन्मानित केले जाणार आहे. यामध्ये क्रांती वेंदे (धुळे), पूनम पाटील (जळगाव), नंदा मघाडे (जळगाव), सुधीर महाजन (जळगाव), मुकुंद जाधव (जळगाव), कांचन मून (पुणे), प्रतिभा कीर्तीकर्वे (पुणे), सरिता कलढोणे (पुणे), वनिता जाधव (बारामती), सुनिता नाईक (खेड), बा. ह. मगदूम (सांगली), एम. डी. कदम (सांगली), आनंद चोपडे (बेळगाव कर्नाटक), मनोज भार शंकर (अबुधाबी), अरविंद बनसोडे (पुणे), विशाल बोरे (अकोला), प्रा. माया मुळे (धाराशिव), डॉ. दिलीप नेवसे (सातारा), सुमनताई मनवर (यवतमाळ), संगिता कानिंदे (यवतमाळ), वर्षा शिंदे (पुणे), उमेश शिरगुप्पे (गोवा) यांचा समावेश आहे, असे वडवेराव यांनी नमूद केले.

पिंपरी, पुणे – भारतीय माजी सैनिक संघ, पुणे जिल्हा केंद्राची ४१ वी वार्षिक सर्वसाधारण सभा, आकुर्डी, मुंबई पुणे महामार्ग खंडोबा मंदिर, सांस्कृतिक भवन येथे रविवारी (दि. २९ डिसेंबर) सकाळी नऊ वाजता आयोजित करण्यात आली असल्याची माहिती संस्थेचे मानद सचिव डी. एच. कुलकर्णी यांनी प्रसिद्धीस दिली आहे.
यावेळी बँक ऑफ बडोदाचे जनरल मॅनेजर कविता सिंग, झोनल ऑफिस, ब्रिगेडियर मधुकर प्रचंड (नि), आजीव अध्यक्ष,आयइएसएल, पीडीसी, ब्रिगेडियर डढीच (नि), व्हीएसएम कर्नल आर. ई. कुलकर्णी (नि), ले. कर्नल व्ही. व्ही. वेसविकर हे प्रमुख पाहुणे म्हणून उपस्थित राहणार आहेत.
भारतीय माजी सैनिक संघ ही माजी सैनिकांसाठी कार्य करणारी देशातील सर्वात जुनी नोंदणीकृत राष्ट्रीय संस्था आहे. या संस्थेचे उद्घाटन १९६४ साली भारताचे पहिले पंतप्रधान पंडित जवाहरलाल नेहरू यांच्या हस्ते तसेच जनरल थिमया व फिल्ड मार्शल करिअप्पा यांच्या उपस्थितीत दिल्ली येथे करण्यात आले होते. महाराष्ट्रातील कार्यालय मुंबई आझाद मैदान येथे कार्यरत असून पुणे जिल्ह्यातील कार्यालय १९७८ पासून निगडी प्राधिकरण, सेक्टर २८ येथे संत ज्ञानेश्वर उद्यान येथे सुरू आहे. या संस्थेच्या माध्यमातून वृध्द माजी सैनिक, सैनिकांच्या विधवा पत्नी, वीर माता-भगिनी तसेच माजी सैनिकांचे कुटुंबीय त्यांची मुले त्याच्या अनेक विविध प्रश्नांचे विनामूल्य निराकारण करण्यात येते. या सभेस भारतीय भूतपूर्व सैनिक, सैनिक तसेच सामान्य नागरिकांनी बहुसंख्येने उपस्थित रहावे असे आवाहन संयोजकांच्या वतीने करण्यात आले आहे.