पुणे, दि.२९: अभियोग्यता व बुद्धिमत्ता चाचणी- २०२५ (टीएआयटी) साठी प्रविष्ट झालेल्या डिप्लोमा इन एलिमेंटरी एज्युकेशन (डी.एल.एड.) द्वितीय वर्षाचे अंतिम सत्राच्या परीक्षेस प्रविष्ठ विद्यार्थ्यांची टीएआयटीची ऑनलाइन परीक्षा ३ जून ऐवजी ३० मे २०२५ रोजी नियोजित आहे. तरी संबंधित विद्यार्थ्यांनी बदलाची नोंद घेऊन सुधारित तारखेला परीक्षेस उपस्थित राहावे, असे आवाहन महाराष्ट्र परीक्षा परिषदेच्या आयुक्त अनुराधा ओक यांनी केले आहे.

महाराष्ट्र राज्यातील सर्व स्थानिक स्वराज्य संस्था व खाजगी व्यवस्थापनाच्या शाळांमध्ये पवित्र या संगणकीय प्रणालीद्वारे शिक्षक भरती करिता शिक्षक अभियोग्यता व बुद्धिमत्ता चाचणी (टीएआयटी) २०२५ या परीक्षेच्या ऑनलाईन पद्धतीने घेण्याची नियोजन २७ ते ३० मे २०२५ व २ ते ५ जून २०२५ या कालावधीत करण्यात आलेली आहे. तथापि, १ हजार १०७ उर्दू माध्यमाच्या विद्यार्थी/उमेदवारांची डी.एल.एड. परीक्षा व (टीएआयटी) परीक्षा एकाच दिवशी येत आहे. त्यामुळे या विद्यार्थ्यांसाठी हा बदल करण्यात आला असून विद्यार्थ्यांनी स्वतःची माहिती तपासून प्रवेश पत्र ऑनलाइन पद्धतीने प्राप्त करून घ्यावीत. नियोजित परीक्षेस उपस्थित व्हावे, याबाबत सर्वस्वी जबाबदारी उमेदवारावर राहील याची नोंद घ्यावी, असेही आयुक्तांनी कळविली आहे.
0000

पुणे -पुणे महापालिकेचा क्रीडा शिष्यवृत्ती प्रदान समारंभ आज येथे संपन्न झाला यावेळी ३७ खेळाडूंना ८७ लाख २० हजार रुपये एवढी शिष्यवृत्ती प्रदान करण्यात आली.

महानगरपालिका क्रीडा विभागाच्या अंर्तगत सुधारीत क्रीडा धोरणानुसार खेळाडूंसाठी विविध १८ योजना राबवण्यात येत आहेत. यामधील उदयोन्मुख खेळाडूंसाठी क्रीडा शिष्यवृत्ती अंतर्गत त्यांना स्पर्धा साहित्य खरेदी किंवा स्पर्धेच्या तयारीसाठी ठराविक रक्कम धनादेशाद्वारे आदा करण्यात येते.
सन २०२४-२५ या वर्षाकरीता खेळाडूंना शिष्यवृत्ती देणेकामी क्रीडा विभागाकडून जाहिरात देण्यात आली होती. त्यास मोठ्या प्रमाणात प्रतिसाद मिळाला असून एकूण ७४३ खेळाडूंनी शिष्यवृत्ती मिळण्यासाठी अर्ज दाखल केले होते. त्यापैकी ३४४ खेळाडू शिष्यवृत्तीसाठी पात्र ठरले आहेत. क्रीडा शिष्यवृत्तीसाठी पात्र खेळाडूंना एकूण ८७,२०,०००/- इतक्या रकमेचे धनादेश, सन्मानचिन्ह व प्रमाणपत्र वितरण समारंभ आज दि.२९/०५/२०२५ रोजी सकाळी १० वाजता बालगंधर्व रंगमंदिर येथे संपन्न झाला .
सदर कार्यक्रमास प्रमुख पाहुणे अतिरिक्त महापालिका आयुक्त (विशेष) ओमप्रकाश दिवटे, यांच्यासह उप आयुक्त (प्राथमिक शिक्षण विभाग)आशा राऊत, उप आयुक्त (मालमत्ता व व्यवस्थापन) श्रीमती प्रतिभा पाटील, मुख्य कामगार अधिकारी नितिन केंजळे , क्रीडा अधिकारी प्राथ. शिक्षण विभाग माणिक देवकर इत्यादी अधिकारी उपस्थित होते.

कार्यक्रमाचे सूत्रसंचालन सुरेश परदेशी यांनी केले तसेच क्रीडा विभागाच्या विविध योजना व क्रीडा विभागाने केलेल्या उल्लेखनीय कामांबाबत क्रीडा विभागाच्या उप आयुक्त किशोरी शिंदे यांनी माहिती दिली. आशा राऊत यांनी मनपा शिक्षण विभागाच्या ३७ खेळाडूंना शिष्यवृत्ती दिल्याबद्दल आभार मानले, तसेच या वर्षी १०० हुन अधिक शिक्षण विभागाकडील खेळाडू विविध स्पर्धामध्ये प्राविण्य प्राप्त करतील असे सांगितले. आंतरराष्ट्रीय खेळाडू सिद्धार्थ कांबळे आणि राष्ट्रीय खेळाडू सुचिता खरवंडीकर यांनी आपले मनोगत व्यक्त केले व मनपाचे आभार मानले. प्रमुख पाहुण्यांनी उपस्थित खेळाडूंना मार्गदर्शन केले. राज्य, राष्ट्रीय, आंतरराष्ट्रीय स्तरावर पोहोचून स्पर्धा जिंकण्यासाठी खेळाडू अथक प्रयत्न करतो, त्याच्या या प्रयत्नांना आर्थिक पाठबळ मिळणे आवश्यक असून पुणे मनपा क्रीडा शिष्यवृत्तीच्या माध्यमातून खेळाडूंना आर्थिक सहाय्य करीत आहे. अति. महापालिका आयुक्त यांनी क्रीडा नर्सरी व स्पोर्ट्स रिहॅब सेंटर सुरु करणेकरीता क्रीडा विभाग प्रयत्नशील असून क्रीडा नर्सरी प्रकल्प सुरू करणेस महापालिका आयुक्त यांची मान्यता प्राप्त झाली आहे असे सांगितले.
क्रीडा शिष्यवृत्ती प्रदान कार्यक्रम अत्यंत आनंदमय व उत्साहपूर्ण वातावरणात पार पडला. शिष्यवृत्ती प्रदान कार्यक्रमाचे यशस्वीरित्या आयोजन करून खेळाडू व पालकांना गौरविण्यात आल्याबद्दल सर्व खेळाडू व पालकांनी पुणे महानगरपालिकेचे आभार व्यक्त केले.

पुणे: बावधन खुर्द व बावधन बुद्रुक या गावांचा गावठाण सिटी सर्वे आजपासून औपचारिकपणे सुरू झाला आहे. या महत्त्वपूर्ण प्रक्रियेसाठी गेल्या ५ वर्षांपासून सातत्यपूर्ण पाठपुरावा करणारे माजी नगरसेवक दिलीप अण्णा वेडेपाटील यांचे अथक प्रयत्न आज यशस्वी झाले आहेत.
बावधन परिसरातील झपाट्याने वाढणाऱ्या नागरीकरणाच्या पार्श्वभूमीवर गावठाण हद्दीचे अचूक आणि कायदेशीर मोजमाप होणे ही गावाच्या भविष्यकालीन विकासासाठी अत्यावश्यक बाब होती. मात्र ही प्रक्रिया अनेक वर्षांपासून प्रलंबित होती. याला चालना देण्यासाठी दिलीप अण्णा वेडेपाटील यांनी शासन, महसूल विभाग, आणि जमाबंदी कार्यालयाशी सातत्याने संवाद साधून या विषयाला प्राधान्य देण्याची मागणी केली.
या प्रक्रियेस गती मिळवून देण्यासाठी त्यांनी महसूल मंत्री चंद्रशेखर बावनकुळे साहेब यांची विशेष भेट घेऊन बावधन गावातील स्थिती सविस्तरपणे मांडली. या बैठकीदरम्यान जमाबंदी आयुक्त सुहास दिवसे, उपायुक्त राजेंद्र गोळे, तसेच जमाबंदी नगर भूमापन विभागाचे अधिकारी हे उपस्थित होते.
सर्व संबंधित अधिकाऱ्यांच्या सहकार्याने आजपासून प्रत्यक्ष सर्वेक्षणाचे काम सुरु झाले असून गावठाण हद्द, खाजगी जमिनी, रस्ते, सार्वजनिक जागा, मंदिरे, शाळा, यांचा नकाशा व मालकी हक्कांचे दस्तऐवजीकरण करण्यात येणार आहे.

सिटी सर्वेचे नागरिकांना होणारे फायदे :
• मालमत्तेवर कायदेशीर हक्क सिद्ध होणार.
• जमिनीच्या नोंदी शासकीय दस्तऐवजांमध्ये समाविष्ट होतील.
• बँक कर्ज, वारसा नोंदणी यांसारख्या प्रक्रियेस सुलभता.
• शासकीय योजना व नागरी सुविधांसाठी अडथळे दूर.
• बावधन गावाच्या नियोजनबद्ध विकासाला चालना मिळणार.

दिलीप अण्णा वेडेपाटील यांनी यावेळी सांगितले की,
“हा सिटी सर्वे म्हणजे फक्त नकाशा काढण्याची प्रक्रिया नसून, हे गावाच्या विकासाच्या दृष्टीने एक मूलभूत पाऊल आहे. गावातील प्रत्येक नागरिकाचा कायदेशीर हक्क निश्चित व्हावा, हीच माझी भूमिका होती. आज ती पूर्ण होताना पाहून समाधान वाटतं. s”या ऐतिहासिक निर्णयामुळे बावधन गावाच्या भविष्यकालीन पायाभरणीत महत्त्वाची भर पडणार असून, येत्या काळात अनेक विकासकामांना गती मिळणार आहे.

स्वानंद चॅरिटेबल ट्रस्टतर्फे मी सावरकर उपक्रम अंतर्गत विनामूल्य व्रतबंध सोहळा

पुणे : गणेश पूजन…पारंपरिक पद्धतीने केलेले चौलकर्म…मातृभोजन… व्रतबंधन असे शास्त्रोक्त पद्धतीने विधी करत समाजातील वेगवेगळ्या घटकातील आणि अनाथ – विशेष मुलांची मुंज विधिवत पार पडली. व्रतबंध या पवित्र संस्कारामुळे मूळ संस्कृतीशी मुलांची नाळ जोडत ५८ मुले आणि मुली यांचा एकत्रित व्रतबंध सोहळा पार पडला. सामाजिक एकतेचा स्वातंत्र्यवीर सावरकरांचा विचार या माध्यमातून समाजापर्यंत पोचविण्यात आला.

स्वानंद चॅरिटेबल ट्रस्टतर्फे मी सावरकर उपक्रम अंतर्गत हिंदूंच्या १८ विविध समाजातील ५८ मुलामुलींच्या सामुदायिक व्रतबंध सोहळ्याचे आयोजन कर्वे रस्त्यावरील अश्वमेध मंगल कार्यालयात करण्यात आले होते. यावेळी सावित्रीबाई फुले पुणे विद्यापीठाचे माजी कुलगुरू डॉ. नितीन करमाळकर, विद्यापीठाचे प्र कुलगुरू डॉ. पराग काळकर उपस्थित होते.

संस्काराचे समाजव्यापी महत्त्व ओळखून स्वातंत्र्यवीर सावरकर यांनी रत्नागिरीत आपल्या कार्यकाळात सर्व हिंदू समाजासाठी सामुदायिक व्रतबंध सोहळ्याची संकल्पना मांडली होती. सावरकरांनी मालवणला तथाकथित १५० अस्पृश्यांच्या मुंजी लावल्या होत्या आणि त्यांना स्वतः जानवं घातली होती. त्यांच्या या विचारातून प्रेरणा घेऊन स्वानंद चॅरिटेबल ट्रस्ट मागील चार वर्षे हा उपक्रम सातत्याने राबवत आहे.

बदलत्या काळात शिक्षण आणि जीवनशैलीत अनेक बदल झाले असले, तरी भारतीय हिंदू संस्कृतीतील मूलभूत संस्कारांची गरज अजूनही तितकीच महत्त्वाची आहे. त्यापैकीच एक म्हणजे व्रतबंध संस्कार, ज्ञानार्जनाच्या प्रवासाची सुरुवात करणारा एक पवित्र टप्पा आहे.

पुणे:शहरातील सर्वात अधिक दाट लोकवस्तीच्या धायरी परिसरातील शिवकालीन वहिवाटीचे व सरकारी नकाशातील गाव पांदण,शिव रस्ते खुले करण्यात याव्यात अशी मागणी धायरी ग्रामस्थांनी जिल्हाधिकारी व हवेली तालुका तहसीलदारांकडे केली आहे.
धायरी येथील बहुतांश सरकारी नकाशातील शिवकालीन वहिवाटीच्या पांदण,शिव रस्त्यांवर बेकायदा अतिक्रमणे झाली आहेत त्यामुळे शेतकऱ्यांसह रहिवाशांना ये जा करणे गैरसोयींचे झाले आहे.याकडे पुणे शहर आम आदमी पक्षाचे शहराध्यक्ष धनंजय बेनकर यांनी जिल्हा व तालुका प्रशासनाचे लक्ष वेधले आहे.
या बाबत आम आदमी पक्षाचे शहराध्यक्ष धनंजय बेनकर, समस्त धायरी ग्रामस्थ समितीचे निलेश दमिष्टे, सनी रायकर अनिल रायकर संदीप विठ्ठल पोकळे संतोष चौधरी अमर खेडेकर चिंतामणी पोकळे आदींनी निवेदन दिले आहे.
आम आदमी पक्षाचे शहराध्यक्ष धनंजय बेनकर म्हणाले,शासनाने शंभर दिवसांची मोहीम राबवुनही
धायरी गावातील अनेक पाणंद व शिव रस्ते अजुनही खुले झालेले नाहीत. या रस्त्यावर मोठ्या प्रमाणात अतिक्रमण सुरू आहेत त्यामुळे आगामी काळात हे रस्ते खुले करण्यात अडचणी निर्माण होणार आहेत..उपमुख्यमंत्री व जिल्हाचे पालकमंत्री अजित पवार यांनी शिव व पाणंद रस्ते तातडीने खुले करण्याचे आदेश दिलेले आहेत. धायरी गाव हे शहरातील गाव असुन सदर गावात नागरीकरण हे प्रचंड वाढले असुन गावची लोकसंख्या दिड ते दोन लाखाच्या आसपास गेलेली आहे. रस्ते मात्र पुर्वीचेच असुन त्यामध्ये कुठलीही वाढ झालेली नाही. त्यामुळे धायरी गावातील सर्व पाणंद व शिवरस्ते नागरीकांसाठी खुले करणे गरजेचे आहे. तरी ग्रामस्थांच्या मागणीनुसार धायरी गावातील सर्वच पाणंद व शिव रस्ते आपण तातडीने सरकारी मोजणी करूनबेकायदा अतिक्रमणे काढून सर्व पांदण शिव रस्ते खुले करण्याचे साकडे धायरी ग्रामस्थांनी शासनाला घातले आहे.

पुणे:

बंडगार्डन, येथील नवीन सुजाता को-ऑपरेटिव्ह हाऊसिंग सोसायटीने २४ व २५ मे २०२५ रोजी दोन
दिवसांच्या रंगतदार कार्यक्रमांसह आपला सुवर्ण महोत्सव साजरा केला.
शनिवारी उत्सवाची सुरुवात भक्तीमय सुंदरकांड पठणाने झाली. त्यानंतर शैक्षणिक क्षेत्रात यश
मिळवलेल्या तरुण विद्यार्थ्यांचा सत्कार करण्यात आला. विविध वयोगटातील सभासदांच्या सहभागाने
सादर झालेल्या सांस्कृतिक कार्यक्रमाने सोसायटीतील ऐक्य आणि उत्साही वातावरणाचा प्रत्यय दिला.
रविवारी कार्यक्रम सौ. पूर्णिमा शिंदे यांच्या सूत्रसंचालनाखाली पार पडला. कार्यक्रमाची सुरुवात शिवेश
आणि त्यांची कन्या स्वरा यांच्या सुस्वर गणेश वंदनेने झाली. नंतर दिवंगत सभासदांना श्रद्धांजली
वाहण्यात आली आणि अजीत मोरे यांनी तयार केलेल्या ‘डाऊन मेमरी लेन’ या भावस्पर्शी लघुपटाने जुन्या
आठवणींना उजाळा मिळाला.
कार्यक्रमास नामवंत बांधकाम व्यावसायिक नाईकनवरे आणि चौधरी कुटुंबीय, श्री. व सौ. वागास्कर, श्री.
लक्ष्मीनारायण आणि वास्तुविशारद रवी कदम यांची उपस्थिती लाभली. श्री. आनंद नाईकनवरे यांच्या
हस्ते सोसायटीचा विशेष कॅटलॉग प्रकाशित करण्यात आला.
कार्यक्रमाचा समारोप प्रा. शशांक दिवेकर आणि त्यांच्या संगीतमय समूहाच्या सुरेल ऑर्केस्ट्राने झाला.
हुतोक्षी वेलिंकर आणि सोसायटीची मॅनेजिंग कमिटी यांच्या संकल्पनेतून आणि आयोजनातून पार पडलेल्या
या सुवर्ण महोत्सवामुळे नवीन सुजाता को-ऑपरेटिव्ह हाऊसिंग सोसायटीच्या गौरवशाली वाटचालीस
नवयुगीन साज लाभला.

पुणे: मुख्यमंत्री देवेंद्र फडणवीस यांच्या संकल्पनेतून सुरू झालेला म्हाळुंगे टीपी स्कीम प्रकल्प गेल्या अनेक वर्षांपासून प्रलंबित आहे. या योजनेला स्थानिक शेतकरी आणि नागरिकांचा सकारात्मक प्रतिसाद असून, त्यांनी योजनेस आपली मान्यता दिली आहे, अशी माहिती अमोल बालवडकर यांनी दिली आहे.

बालवडकर यांनी मुख्यमंत्र्यांना पाठवलेल्या विनंती पत्रात नमूद केले आहे की, या योजनेचा आराखडा लवकरात लवकर तयार होऊन त्याला अंतिम मान्यता मिळावी, जेणेकरून विकासकामांना गती मिळू शकेल.पीएमआरडीएच्या माध्यमातून या योजनेवर गेल्या काही वर्षांपासून काम सुरू आहे. मात्र, काही तांत्रिक अडचणी असल्यामुळे अद्याप योजनेस अंतिम मान्यता मिळालेली नाही. परिणामी, या भागातील रस्ते, पाणीपुरवठा व अन्य मूलभूत सुविधा आणि अन्य विकासकामे प्रलंबित आहेत.

बालवडकर यांनी स्पष्ट केले की, “मुख्यमंत्र्यांनी तांत्रिक अडचणी दूर करून या योजनेला तातडीने अंतिम मान्यता द्यावी, जेणेकरून संपूर्ण परिसराचा चेहरामोहरा बदलेल आणि सामाजिक व आर्थिक विकासाला चालना मिळेल.”या प्रकल्पाची अंमलबजावणी झाल्यास परिसराचा एकात्मिक आणि नियोजित विकास सुनिश्चित होईल, असा विश्वासही त्यांनी व्यक्त केला आहे.

पुणे-माझ्या मुलीवर आरोप करणाऱ्या वकिलांना देखील मुली-बाळी असतील. आता माझे लेकरु तर गेले आहेच. मात्र, तीच्यावर एवढे वाईट शिंतोडे उडवू नका, अशा शब्दात वैष्णवी हगवणेचे वडिल अनिल कस्पटे यांनी हात जोडून विनंती केली आहे. माझ्या लेकराची अशी बदनामी करु नका, असे म्हणत असताना त्यांना अश्रू अनावर झाले. हगवणे कुटुंबीयांच्या वकिलांनी न्यायालयात केलेले सर्व दावे त्यांनी फेटाळले आहेत.वैष्णवी हगवणे प्रकरणात आरोपीच्या वकिलांनी केलेले सर्व दावे तीचे वडिल अनिल कस्पटे यांनी फेटाळून लावले आहेत. आज पत्रकार परिषद घेत त्यांनी हगवणे कुटुंबावर अनेक आरोप केले. तसेच माझ्या मुलीच्या खुनात नीलेश चव्हाण यांचा जवळचा संबंध असल्याचा दावा देखील त्यांनी केला आहे.

या संबंधी बोलताना कस्पटे म्हणाले की, वैष्णवीच्या चारित्र्यावर संशय घेणे हे चुकीचे आहे. मोबाईल मधील चॅट बाबत आम्हाला कोणतीही पुसटशीही कल्पना कोणीच दिलेली नाही. उलट माझ्या जावयाला मी एक लाख 52 हजार रुपयांचा मोबाईल घेऊन दिला. त्याची पावती देखील कस्पटे यांनी दाखवली आहे. या मोबाईलचे हप्ते मी आजही फेडत असल्याचे ते म्हणाले.हगवणे कुटुंबाकडे पाच कोटी रुपयांच्या गाड्या असल्याचा दावा वकिलांनी न्यायालयात केला होता. मात्र हा दावा कस्पटे यांनी फेटाळून लावला आहे. त्यांच्याकडे केवळ एकच स्फोर्ड कंपनीची गाडी असून मी दिलेली फार्च्युनर गाडी त्यांनी मागितली होती. मी आधी दुसरी गाडी बुक केली होती. मात्र त्यांना फार्च्युनर गाडी हवी होती. मला तीच द्या नसता मी गाडीला हाथ लावणार नाही, असे त्यांनी मला सांगितले होते. त्यानंतर फार्च्युनर गाडी बुक केली असल्याचा दावा कस्पटे यांनी केला आहे.

हगवणे यांनी वैष्णवीची दोन लग्न मोडली असल्याचा दावा देखील पुन्हा एकदा कस्पटे यांनी केला आहे. मात्र या विषयी मी सध्या काही जास्त बोलू शकत नाही. हे प्रकरण न्यायप्रविष्ठ असल्याचे कस्पटे यांनी म्हटले आहे. या माध्यमातून कस्पटे यांनी हगवणे परिवाराकडून आम्हाला धमकवले जात असल्याचा अरोप पुन्हा एकदा केला आहे.

आपली सून मयत झाली हे सोडून हगवणे यांना बाळाला नीलेश चव्हाणकडे देणे कसे सुचले? असा प्रश्न कस्पटे यांनी उपस्थित केला. बाळ वैष्णवीच्या जवळच घरात होते. मग ते बाळ नीलेश चव्हाणकडे कसे पोहोचले? असा प्रश्न देखील त्यांनी उपस्थित केला. नीलेश चव्हाण देखील माझ्या वैष्णवीच्या खुनाच्या कटात सामील आहे, असा माझा ठाम आरोप असल्याचे कस्पटे यांनी म्हटले आहे.