पुणे -क्रांतीज्योती सावित्रीबाई फुले पुणे विद्यापीठाच्या ललित कला केन्द्राचे अत्यंत प्रतिष्ठेचे असलेले या वर्षीचे एम.ए. कथक मधील सुवर्णपदक अरुंधती जितेन्द्र अभ्यंकर हिने प्राप्त केले. गेल्या एक तपाहून जास्त काळ अरुंधती कथकचे शास्त्रीय शिक्षण तिची गुरू तेजस्विनी साठे यांच्याकडे घेत आहे. नुकतेच पुणे विद्यापीठाचे एम.ए.चे निकाल जाहीर झाले. त्यात अरुंधतीने प्रथम क्रमांक पटकावला. तिला 9.06 CGPA मिळाले. 9 च्या वर CGPA मिळवणारी या वर्षीच्या संपूर्ण एम.ए. कथकच्या बॅचमधील अरुंधती अभ्यंकर ही एकमेव विद्यार्थिनी आहे.
अरुंधतीचे लहानपणापासून कथकवर असलेले प्रेम, त्यात पारंगत होण्यासाठी तिने केलेली सातत्यपूर्ण मेहनत, तिची गुरूवर असणारी निस्सीम श्रध्दा व आदर, उत्तम गुरूभगिनी व सहनृत्यांगना, या सगळ्याचे तिला मिळालेले हे फळ आहे. अरुंधतीने संस्कृत विषयात पदवी प्राप्त केली असून आजपर्यंत अनेक नृत्यस्पर्धांमधे तिने पारितोषिके मिळवली आहेत. 

पुणे, दि. १ जानेवारी : विश्व शांती केंद्र (आळंदी), माईर्स एमआयटी, पुणे भारततर्फे लोणी काळभोर येथील विश्वराज बंधारा, विश्वशांती गुरूकुल, राजबाग येथे आयोजित केलेल्या दोन दिवसीय ‘एमआयटी सांस्कृतिक संध्या’ संगीत महोत्सावाचा समारोप पं. उपेंद्र भट यांच्या सुमधुर गायनाने झाला.
यावेळी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड, सौ. उषा विश्वनाथ कराड,  प्रा.स्वाती कराड चाटे, डॉ. सुचित्रा कराड नागरे, प्रा. सुनीता कराड, डॉ. संजय उपाध्ये, नागपूर विद्यापीठाचे माजी कुलगुरू डॉ. एस.एन.पठाण, दूरदर्शनचे माजी संचालक डॉ. मुकेश शर्मा उपस्थित होते.
३१ डिसेबर रोजी झालेल्य‘एमआयटी सांस्कृतिक संध्या’ च्या समारोप प्रसंगी मध्यरात्री १२ वा. त्याग व समर्पणाचे प्रतीक असलेल्या यज्ञकुंडामध्ये काम, क्रोध, लोभ, मोह, मद व मत्सर, विकार, विकृती व विकल्प सारख्या दुर्गुणांची आहुती देण्यात आली. पुढील २०२५ वर्ष अत्यंत सुखाने, समाधानाने व शांततेने पार पडावे यासाठी प्रार्थना करण्यात आली.
विश्वधर्मी प्रा.डॉ. विश्वनाथ दा. कराड म्हणाले,” नववर्षाच्या पूर्वसंध्येला आपल्यातील अवगुणांची आहुती देऊन उद्यापासून शांतीमय जीवन प्रत्येकाने जगावे. भारतीय संस्कृती ही जगातील सर्वात श्रेष्ठ संस्कृती आहे. याचे अनुकरण करून आपल्या आयुष्याची वाटचाल करावी. तरुणांनी स्वधर्म, स्वाभिमान आणि स्वत्व जागवून खर्‍या अर्थाने भारतीय अस्मिता जागविण्याचा हा एक अल्पसा प्रयत्न करीत आहोत.”
या संगीत महोत्सावात विश्वशांती संगीत कला अकादमीच्या नृत्यशिक्षिका आदिती रिसवाडकर यांनी कथ्थक नृत्य सादर केले. त्यानंतर एमआयटी एडीटीयूच्या विद्यार्थ्यांनी संथाल लोकनृत्य सादर केले. विश्वशांती संगीत कला अकादमीचे विद्यार्थी व प्रा. अंकित गुप्ता यांचा भक्ती संगीत व हिंदी चित्रपटांचे सुवर्णकाळ त्यावर आधारित संगीतमय कार्यक्रम झाला. प्रा. शशांक दिवेकर यांचे सुगम संगीत गायन, वारकरी संप्रदायातील सुप्रसिद्ध गायिका गोदावरीताई मुंडे यांचे गायन झाले. सरतेशेवटी पं. उपेन्द्र भट यांच्या सुमधूर गायनाने या कार्यक्रमाचा समारोप झाला.
प्रा. स्वाती कराड चाटे यांनी सर्वांना नव वर्षाच्या शुभेच्छा देऊन आभार मानले.

पुणे : सरहद, पुणेतर्फे दिल्ली येथे आयोजित करण्यात आलेल्या 98व्या अखिल भारतीय मराठी साहित्य संमेलनाच्या पुण्यातील संपर्क कार्यालयाचा उद्घाटन समारंभ गुरुवार, दि. 2 जानेवारी 2025 रोजी सायंकाळी 6 वाजता आयोजित करण्यात आला आहे. संपर्क कार्यालय महाराष्ट्र साहित्य परिषद, टिळक रोड येथे सुरू करण्यात येत आहे. संपर्क कार्यालयाचे उद्घाटन केंद्रीय सहकार आणि नागरी विमान वाहतूक राज्य मंत्री मुरलीधर मोहोळ यांच्या हस्ते होणार असून प्रा. मिलिंद जोशी अध्यक्षस्थानी तर डॉ. सतिश देसाई पाहुणे म्हणून उपस्थित राहणार आहेत. या प्रसंगी मुरलीधर मोहोळ प्रकाशकांचीही भेट घेणार आहेत, अशी माहिती सरहद, पुणेचे संस्थापक अध्यक्ष संजय नहार यांनी निवेदनाद्वारे कळविली आहे.
संमेलनाच्या सरकार्यवाहपदी नेमणूक केल्याबद्दलचे पत्र मंत्री मोहोळ यांना महाराष्ट्र साहित्य परिषदेचे कार्याध्यक्ष प्रा. मिलिंद जोशी, प्रमुख कार्यवाह सुनिताराजे पवार यांच्या हस्ते या वेळी देण्यात येणार आहे. तसेच पुणे शहरातील सांस्कृतिक घडामोडींचे नियमित वृत्तांकन करणाऱ्या माध्यम प्रतिनिधींचा सत्कार या प्रसंगी मंत्री मुरलीधर मोहोळ यांच्या हस्ते करण्यात येणार आहे.

पुणे- शहरातील बावधन परिसरातील वाढते नागरीकरण व त्या भागातील नागरिकांच्या वाढत्या मागणीस प्रतिसाद देऊन भारतीय टपाल खात्यातर्फे बावधन मध्ये नवीन उपटपाल कार्यालय सुरु करण्यात आले आहे. महाराष्ट्र आणी गोवा परिमंडळाचे चीफ पोस्टमास्टर जनरल अमिताभसिंग यांच्या हस्ते पुणे येथील क्षेत्रीय कार्यालयातून ऑनलाईन पद्धतीने रिमोटची कळ दाबून बावधन उपटपाल कार्यालयाचे उदघाटन करण्यात आले. या प्रसंगी पुणे क्षेत्राचे पोस्टमास्तर जनरल रामचंद्र जायभाये, डायरेक्टर पोस्टल सर्व्हिसेस सिमरन कौर व पुणे शहर पश्चिम विभागाच्या प्रवराधीक्षक रिप्पन डुल्लेट आदी मान्यवर उपस्थित होते.
नवीन बावधन उप टपाल कार्यालयाचा पिनकोड ४११०७१ असून बावधन ब्रांच टपाल कार्यालयाचे नवीन बावधन उपटपाल कार्यालयामध्ये विलीनीकरण करण्यात आले आहे.
नवीन बावधन उपटपाल कार्यालयात इंडिया पोस्ट पेमेंट बँक खाते, महिला सम्मान बचतपत्र, सुकन्या समृद्धी योजना व इतरही पोस्ट ऑफिस बचत बँकेच्या योजना यांचा लाभ घेता येणार आहे. तसेच स्पीड पोस्ट, ई –बुकिंग, पार्सल इत्यादी बुकिंग सुविधेसह आधार नोंदणी व अद्यतन सेवा ही उपलब्ध आहे. त्यामुळे नागरिकांच्या वेळ व पैशाची बचत होणार आहे. या कार्यालयाची वेळ सकाळी १० ते संध्याकाळी ६ असून सेव्हिंग बँक व इतर काउंटरच्या कामकाजाच्या वेळा वेगवेगळ्या आहेत.
या पूर्वी आर्मामेंट उपटपाल कार्यालयास (४११०२१) जोडलेला भाग म्हणजेच शिंदे नगर, कोकाटे वस्ती, पाटील नगर, गुंडे वस्ती, देशमुख नगर, विज्ञान नगर, आमची कॉलोनी, बांदल ईस्टेट, बावधन बु/खुर्द, डी.एस.के. रानवारा, बालाजी सोलानी सो., बावधन पोलीस चौकी, वैकुंठ भूमी, सूर्यदत्ता कॉलेज, पुराणिक सो., चेलाराम हॉस्पिटल, ई. भाग आता नवीन बावधन टपाल कार्यालयाला जोडण्यात आलेला आहे.
तरी या भागात राहणाऱ्या नागरिकांनी बावधन टपाल कार्यालयास भेट देऊन आपल्या भागाचा पिनकोड तपासून घ्यावा व आपल्या संबंधिताना नवीन पिनकोड कळवावा जेणेकरून नागरिकांना येणारे टपाल विनाविलंब पोहचू शकेल, असे आवाहन करण्यात येत आहे.
टपाल विभागातील अधिकारी व कर्मचारी तसेच बावधन भागातील नागरिक मोठ्या संख्येने बावधन टपाल कार्यालयात उद्घाटन प्रसंगी उपस्थित होते.

जाधवर ग्रुप आॅफ इन्स्टिटयूटस्, सिंहगड रोड पोलीस स्टेशन तर्फे आयोजन

पुणे : अर्थ आणू जीवनाला, विसरुन जावू मद्यपानाला…मद्य करते बुद्धी भ्रष्ट, का करता जीवन नष्ट…सशक्त भारताचा एकच नारा, मद्यपानाला देऊ नका थारा…अशा घोषणा देत जनजागृतीच्या माध्यमातून सशक्त भारताकरिता दारु सोडा, दूध प्या असा संदेश देण्यात आला. सिंहगड रस्त्यावर पोलीस अधिका-यांसह, महाविद्यालयीन विद्यार्थी, सामाजिक कार्यकर्ते यांनी व्यसनाधिनतेच्या विळख्यात अडकत चालेल्या तरुणाईला निरोगी आरोग्याचा मार्ग दाखविण्याकरिता पुढाकार घेत दूध वाटप केले.

सिंहगड रस्त्यावरील वडगाव पुलाखालील चौकामध्ये जाधवर ग्रुप आॅफ इन्स्टिटयूट्स, सिंहगड रोड पोलीस स्टेशन तर्फे दारु सोडा, दूध प्या अभियान राबविण्यात आले. यावेळी सिंहगड पोलीस स्टेशनचे वरिष्ठ पोलीस निरीक्षक दिलीप दायगडे, हवेली पंचायत समिती माजी सभापती प्रभावती भूमकर, निलेश गिरमे, हरिदास चरवड, श्रीकांत सावंत, सारंग नवले, शिवा पासलकर, राणी डफळ, यशवंत मानखेडकर, एकनाथ भूमकर, सुरेश परकड, संस्थेचे अध्यक्ष प्राचार्य डॉ.सुधाकर जाधवर, उपाध्यक्ष अ‍ॅड.शार्दुल जाधवर आदी उपस्थित होते.

प्राचार्य डॉ.सुधाकर जाधवर म्हणाले, तरुणांनी नशेच्या आहारी न जाता चांगले संकल्प करून नव्या वर्षाचे स्वागत केले पाहिजे. व्यसनांमुळे अनेक कुटुंबे उध्वस्त झाली आहेत, त्यामुळे याविरोधात जनजागृती करण्यात आली. नवीन वर्षाचे स्वागत करण्यासाठी अनेक तरुण मद्यधुंद होऊन व्यसनाच्या विळख्यात अडकतात. मद्यपान करून भरधाव वेगाने गाडी चालविल्यामुळे अनेक अपघात देखील होतात. नव्या वर्षाच्या सुरूवातीला असे कोणतेही अनुचित प्रकार घडू नये यासाठी दारू नको दूध घ्या हा उपक्रम आवश्यक आहे.

अ‍ॅड.शार्दुल जाधवर म्हणाले, देशाची युवा पिढी निरोगी असेल तर देशाचा अधिक विकास होतो. आपल्या देशाला महासत्ता बनवायचे असेल तर तरुणांनी निरोगी असले पाहिजे. तरुणांनी नशेच्या आहारी न जाता चांगले संकल्प करून नव्यावर्षाचे स्वागत केले पाहिजे. नववर्षाचे स्वागत करताना चांगले विचार आणि संकल्प मनात ठेवून प्रत्येकाने व्यसनमुक्त भारताचे स्वप्न रंगवावे, याकरीता या उपक्रमाचे आयोजन करण्यात आले, असेही त्यांनी सांगितले.

“ग्लोबल ग्रुप आणि क्रिएटिव्ह फाउंडेशन च्या वतीने दुर्गम भागातील शाळेत जर्किन भेट”

पुणे-कार्यकर्त्यांनी त्यांच्यातला “कार्य” “कर्ता” जिवंत आणि जागता ठेवावा असे आवाहन क्रिएटिव्ह फाउंडेशन चे अध्यक्ष संदीप खर्डेकर यांनी केले आहे. आता काळ बदललाय,सध्या अनेक धनाढ्य व्यक्ती विविध माध्यमातून समाजात मदत कार्य करत आहेत, काही इव्हेन्ट च्या माध्यमातून तर काही जण सी एस आर मधून उपक्रम राबवितात असे सांगतानाच संदीप खर्डेकर म्हणाले की ” ही दानशूरता स्वागतार्ह असली तरी यामुळे समाजात काम करणारे कार्यकर्ते निष्क्रिय होण्याचा धोका दिसतोय.
म्हणून कार्यकर्त्यांनी पूर्वीप्रमाणेच गंगाजळीतून पै पै गोळा करूनच समाजकारण सुरु ठेवावे, पंचवीस वर्षांपूर्वी आम्ही अगदी अकरा रुपये ते एकशे एक रुपये गोळा करून गरजूना मदत करायचो, आता कैक पटीने देणारे हात आहेत, पण जुन्या काळातील ही कष्टाने पैसे गोळा करायची सवय मोडू नका, हाच नववर्षाचा संकल्प करा असेही संदीप खर्डेकर म्हणाले.
नववर्षाचे स्वागत करताना भोर जवळील भाटघर धरणाच्या पाणलोट क्षेत्रातील वाढाणे आणि करंदी गावातील येसाजी कंक विद्यालयातील 80 विद्यार्थ्यांना क्रिएटिव्ह फाउंडेशन आणि ग्लोबल ग्रूप च्या वतीने जर्किन भेट देण्यात आले त्यावेळी ते बोलत होते.
यावेळी क्रिएटिव्ह फाउंडेशन चे अध्यक्ष संदीप खर्डेकर,शिक्षण समितीच्या अध्यक्षा माजी नगरसेविका मंजुश्री खर्डेकर, कै. विश्वनाथ भेलके प्रतिष्ठान चे अध्यक्ष विशाल भेलके,क्रिएटिव्ह फाउंडेशन चे विश्वस्त प्रतीक खर्डेकर, सौ. कल्याणी खर्डेकर, शाळेच्या मुख्याध्यापिका सौ. खटाटे, उत्साहाने शैक्षणिक कार्यासोबत सामाजिक कामात पुढाकार घेणार शिक्षक सोपान शिंदे इ उपस्थित होते.
ह्या शाळेत बहुतांश प्रकल्पग्रस्त नागरिकांची मुलं शिकत असून बहुतांश नागरिक हे मुंबईला कुल्फी विक्रीचा व्यवसाय करतात, तरीही जिद्दीने येथे मुलं शिक्षण घेतात म्हणून आम्ही ह्या शाळेला मदत करण्याचा निर्धार केला असे मा. नगरसेविका मंजुश्री खर्डेकर म्हणाल्या.तसेच विद्यार्थ्यांनी आणि विशेष करून मुलींनी कोणत्याही कारणास्तव अर्ध्यावर शिक्षण सोडू नये, त्यांनी उच्च शिक्षण घेऊन आपली स्वप्न पूर्ण करावीत, त्यासाठी क्रिएटिव्ह फाउंडेशन सर्वतोपरी मदत करेल असेही मंजुश्री खर्डेकर म्हणाल्या.ह्यापूर्वी शाळेला कपाटांची मदत केली होती आता येणाऱ्या शैक्षणिक वर्षात छत्र्या आणि बुटांची मदत देखील करू असे ग्लोबल ग्रूप चे संचालक संजीव अरोरा व मनोज हिंगोरानी म्हणाले.
सोपान शिंदे सरांनी सूत्रसंचालन केले तर मंजुश्री खर्डेकर यांनी प्रास्ताविक केले.
प्रतीक खर्डेकर व कल्याणी खर्डेकर यांनी संयोजन केले.
विशाल भेलके यांनी आभार प्रदर्शन केले.

पुणे-मनपा निवृत्त सेवकांना ७ व्या वेतन आयोगाच्या ‘फरकाच्या देणे रकमे पैकी’, तब्बल ३ वर्षात तीन हप्ते मिळाले, मात्र ४था व ५ वा हप्ता मिळणे अद्याप बाकी आहे.वास्तविक शासन आदेश (प्र. क. १८७ / नवि २२ / १६-०९-२०२१) व पुणे मनपा मुख्य सभा ठराव (क्र २५७ – १०-०३-२१) बघीतल्यास.. ‘दोन वर्षात अथवा मनपा आर्थिक स्थिती नुसार वा ३ हप्त्यात’ देणे बाबत निर्देश असतांना ही, वेतन आयोग फरक देण्यात पुणे मनपा प्रशासनाची दिरंगाई का.(?) असा प्रश्न करीत, सेवानिवृत्त सेवकांना तातडीने फरकाची रक्कम देण्याची विनंती वजा मागणी काँग्रेस नेते व इंटक कामगार संघटनेचे सल्लागार गोपाळदादा तिवारी यांनी आयुक्त श्रीराजेंद्र भोसले यांच्कयाडे केली आहे .
अन्यथा कामगार संघटने सह उपोषण – आंदोलन करावे लागेल, असा इशारा ही पत्रकारांसोबत बोलतांना त्यांनी दिला.
या प्रसंगी पुणे मनपा निवृत्त सेवक संघाचे अध्यक्ष जयंत (बापू) पवार, कार्याध्यक्ष संजीव मोरे, उपाध्यक्ष  राजे भोसले व पदाधिकारी उपस्थित होते.
ते पुढे म्हणाले की,पुणे मनपा निवृत सेवकांनी’ संयमाने व अडचणी सोसून ‘तीन हप्त्या मध्ये’ वेतन फरकाची रक्कम स्वीकारली आहे.ते म्हणाले की, वास्तविक, शासन आदेश व ठराव हे रक्कम देण्यासाठी पृष्टी देणारे असतील तर फरक सत्वर देणे बाबत आयुक्त यांनी आश्वासित ही केले होते.मात्र लेखापालां कडून कार्यालयीन कार्यवाही बाबत दिशाभूल व असह्य दिरंगाई होत असल्याचे त्यांनी सांगितले.
         महाराष्ट्रात ‘पुणे महानगरपालिके’चे वेगळे स्थान असून सांस्कृतिक राजधानी व ऐतिहासिक शहर म्हणून गणना होते. ‘पुणे मनपा प्रशासनाने कार्यक्षमतेच्या स्पर्धेत विविध पुरस्कार प्राप्त केले आहेत. स्वाइन फ्लू ,कोरोना साथीच्या काळात पुणे मनपा’च्या सर्व श्रेणीतील अधिकारी ते कनिष्ठ सेवकांनी तसेच पीमपीमएल सेवकांनी जोखीम घेऊन सेवा दिलेली आहे. पीमपीमएल निवृत्त-सेवकांना ही फरकाची रक्कम पूर्ण मिळालेली नसून, ‘पीएमपीएमएल’चे उत्तरदाईत्व देखील मनपा’कडे असल्याने त्यांचे बाबतीत ही सत्वर व सकारात्मक निर्णय बाबत PMPML चे ‘पदसिद्ध संचालक’ नात्याने आयुक्त यांनी लक्ष घालण्याची मागणी केली.
एकीकडे पुणे मनपा’चे महसु‌ली जमा रक्कम सु २०० कोटी हे बँकेत मुदत_ठेव म्हणून ठेवले जातात, मात्र उतार वयात, सेवा-निवृतांना आधार असलेले ‘हक्काचे पैसे’ वेळेत मिळत नाही, हे योग्य नाही, निवृत्ती नंतर ‘फरकाच्या रक्कमे’ची वाट पाहत सुमारे ३५ % सेवकांचे निधन झाले, याकडे ही लक्ष वेधले. सेवानिवृत्तांच्या हयातीत गरजेच्या काळात, ‘हक्काची रक्कम मिळाल्यास, त्याचे महत्व आहे.या बाबत अधिक विलंब झाल्यास मनपा भवन बाहेर उपोषण – आंदोलन करू असा इशारा ही गोपाळदादा तिवारी यांनी दिला आहे.

पुणे दि. १ जानेवारी २०२५ : पुणे जिल्ह्यात लोणावळा परिसरातील वेहेरगाव-कार्ला नावाने प्रसिद्ध असणारा गड आहे. या गडावर एकविरा आई आदिशक्ती म्हणून प्रसिद्ध आहे. पुणे जिल्ह्यातील सर्वात प्रसिद्ध असे हे देवीचे जागृत देवस्थान मानले जाते. आज १ जानेवारी २०२५ नवीन वर्षाची नव्याने सुरूवात करत शिवसेना नेत्या तथा विधानपरिषद उपसभापती डॉ. नीलम गोऱ्हे यांनी आई एकविरा देवीचे दर्शन घेतले. यावेळी त्यांच्या भगिनी स्त्री आधार केंद्राच्या विश्वस्त जेहलम जोशी उपस्थित होत्या.

‘हे नवीन वर्ष महाराष्ट्रासह देशाला सुख समाधानाचे, शेतकऱ्यांना न्याय देणारे असावे. त्यासोबतच सर्वांना आरोग्य, सौख्य, यश आणि विजयलक्ष्मी प्राप्त व्हावी’, अशी प्रार्थना यावेळी उपसभापती डॉ. नीलम गोऱ्हे यांनी आई एकवीरा देवीच्या चरणी केली. त्यानंतर, 2024 च्या विधानसभा निवडणुकीमध्ये जे नेत्रदीपक यश महायुतीला मिळाले त्याबद्दल एकविरा मातेचे त्यांनी नवस फेडले आणि श्रीफळ व प्रसाद देऊन त्या नवसाची पूर्तता केली. तसेच डोंगरावरील देवी माता आणि पायथा मंदिर या दोन्ही देवी आईंना साडी-ओटीचा नैवेद्य देखील डॉ. नीलम गोऱ्हे यांनी अर्पण केला.

देवी संस्थान असलेले हे पायथ्याशी असणारे एकविरा मातेचे पायथा मंदिर म्हणूनही ओळखले जाते. तिथे आज नवीन वर्षाच्या सुरूवातीला दर्शनासाठी आलेल्या भाविकांची प्रचंड गर्दी होती. परंतु या सर्व गर्दीमध्ये जनतेने खूप चांगले सहकार्य देऊन अतिशय प्रेमाने डॉ. नीलमताई गोऱ्हे यांचे स्वागत करून त्यांना पुढील वाटचालीसाठी शुभेच्छा दिल्या. लोणावळा पोलिसांनी अगदी चोख व्यवस्था केलेली, असं मतही डॉ. नीलमताई गोऱ्हे यांनी याठिकाणी व्यक्त केले.

यावेळी तंटामुक्ती अध्यक्ष श्री. मधुकर पडवळ, उद्योजक श्री. अशोक पडवळ, पोलीस पाटील श्री. अनिल पडवळ, मंदिर व्यवस्थापक श्री. संतोष देवकर, पुजारी श्री. तेजस तात्या खिरे आणि मा. सरपंच श्री. दत्तात्रय मारुती पडवळ उपस्थित होते.

श्रीपाल सबनीस उद्घाटक, दादाभाऊ गावडे संमेलनाध्यक्ष तर वंदना आल्हाट स्वागताध्यक्ष

रामदास काकडे यांच्या हस्ते भूमिपुत्र पुरस्कार वितरण सोहळा

पिंपरी, पुणे (दि. १ जानेवारी २०२५) मोशी येथे इंद्रायणी साहित्य परिषदेच्या वतीने आयोजित करण्यात आलेल्या तिसऱ्या इंद्रायणी साहित्य संमेलनाचे उद्घाटन रविवारी (दि.५ जानेवारी २०२५) सकाळी आठ वाजता, देहू आळंदी रस्त्यावरील कवयित्री बहिणाबाई चौधरी साहित्य नगरी, जय गणेश बँक्वेट हॉल, मोशी येथे होणार आहे. अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांच्या हस्ते संमेलनाचे उद्घाटन होणार आहे. ज्येष्ठ ग्रामीण साहित्यिक दादाभाऊ गावडे संमेलनाध्यक्ष पद भूषवणार आहेत. तर स्वागत अध्यक्ष म्हणून वंदना हिरामण आल्हाट यांची निवड करण्यात आली आहे अशी माहिती इंद्रायणी साहित्य परिषदेचे अध्यक्ष संदीप तापकीर, सचिव रामभाऊ सासवडे आणि निमंत्रण अरुण बोऱ्हाडे यांनी दिली.
बुधवारी मोशी नागेश्वर मंदिर, येथे आयोजित करण्यात आलेल्या पत्रकार परिषदेस उपाध्यक्ष डॉ. सीमा काळभोर, कार्याध्यक्ष सोपान खुडे, सदस्य डॉ. पौर्णिमा कोल्हे, एव्हरेस्टवीर श्रीहरी तापकीर व इतर सदस्य उपस्थित होते.
उद्घाटनापूर्वी श्री नागेश्वर महाराज मंदिर ते कवयित्री बहिणाबाई चौधरी साहित्य नगरी (संमेलन स्थळ) पर्यंत सकाळी आठ वाजता ग्रंथदिंडी काढण्यात येणार आहे. या ग्रंथदिंडीचे उद्घाटन विठ्ठल रुक्मिणी मंदिर समिती पंढरपूरचे सदस्य ॲड. माधवी निगडे यांच्या हस्ते होणार आहे. या संमेलनास संत साहित्याचे ज्येष्ठ अभ्यासक डॉ. शिवाजीराव मोहिते, महाराष्ट्र साहित्य परिषदेच्या प्रमुख कार्यवाहक सुनिताराजे पवार, शिवछत्रपती पुरस्कार विजेते डॉ. अरुण दातार, आमदार महेश दादा लांडगे, आमदार बाबाजी काळे आदी प्रमुख पाहुणे उपस्थित राहणार आहेत.
यावेळी आमदार महेश लांडगे यांच्या हस्ते अक्षर इंद्रायणी या स्मरणिकेचे आणि काल भवताल या कथासंग्रहाचे श्रीपाल सबनीस यांच्या हस्ते प्रकाशन करण्यात येणार आहे. तसेच इंद्रायणी साहित्य परिषदेचा यशवंतराव चव्हाण प्रज्ञावंत साहित्य पुरस्कार डॉ. श्रीपाल सबनीस यांना प्रदान करण्यात येणार आहे. आमदार बाबाजी काळे यांच्या हस्ते “स्वातंत्र्यसंग्रामातील समिधा” या क्रांतिकारकांच्या छायाचित्रांचे प्रदर्शनाचे उद्घाटन होणार आहे. सकाळी दहा वाजता “ज्ञानेश्वरी – काळाची गरज” या परिषदेचे उद्घाटन डॉ. आरती दातार यांच्या हस्ते करण्यात येणार आहे. या परिसंवादात संत साहित्याचे ज्येष्ठ अभ्यासक हभप डॉ. नारायण महाराज जाधव, हभप ॲड. यशोधन महाराज साखरे, योगी निरंजनाथ गुरु शांतिनथ, ज्ञानेश्वरीचे ज्येष्ठ अभ्यासक रामदास जैद आदी सहभाग घेणार आहेत. या परिसंवादाचे सूत्रसंचालन प्रा. दिगंबर ढोकले तर समन्वयक म्हणून डॉ. सीमा काळभोर काम आहे.
दुपारी दोन वाजता संमेलनाध्यक्ष दादाभाऊ जयवंत गावडे यांची ज्येष्ठ साहित्यिक राजेंद्र घावटे प्रकट मुलाखत घेणार आहेत. दुपारी तीन वाजता, डॉ. सदानंद मोरे यांची संदीप तापकीर प्रकट मुलाखत घेणार आहेत. सायंकाळी पाच वाजता “दुर्ग भटकंती” या अरुण बोराडे यांनी लिहीलेल्या पुस्तकाचे प्रकाशन निवृत्त आयपीएस अधिकारी डॉ. माधवराव सानप यांच्या हस्ते करण्यात येणार आहे. यानंतर समारोप सत्रात ज्येष्ठ उद्योजक रामदास काकडे यांच्या हस्ते भूमिपुत्र पुरस्कार वितरण सोहळा संपन्न होणार आहे. यावेळी लोकसाहित्याचे ज्येष्ठ अभ्यासक प्रभाकर ओव्हाळ, महाराष्ट्र साहित्य परिषद पिंपरी चिंचवड अध्यक्ष राजन लाखे, सूत्रसंचालक श्रीकांत चौगुले आदी उपस्थित राहणार आहेत. यावेळी वैद्यकीय सेवा डॉ. अनिल कुमार रोडे, प्रशासन सेवा कार्य संजय गोपाळ शिंदे, इतिहास संशोधन दत्तात्रय दगडू फुगे, अग्निशमन सेवा कार्य सुनील तानाजी गिलबिले, प्रशासकीय सेवा परीक्षा स्मिता प्रतीक थोरवे, प्रो कबड्डी खेळाडू अनुज काळूराम गावडे, वैद्यकीय संशोधन कार्य डॉ. मधुरा मल्हारी काळभोर, युवा कीर्तनकार हभप विठ्ठल महाराज गवळी, हभप संग्राम बापू भंडारे, हभप मंगेश महाराज सावंत, साहित्य व समाजसेवा दत्तात्रय विघ्नहर अत्रे, सीए परीक्षा उत्तीर्ण सम्यक राहुल धोका आणि सिद्धांत राहुल धोका आदींना “भूमिपुत्र पुरस्कार २०२४” देऊन सन्मानित करण्यात येणार आहे.
सायंकाळी ७:३० वाजता, शिवांजली साहित्य परिषदेचे प्रवर्तक शिवाजीराव चाळक यांच्या अध्यक्षतेखाली निमंत्रितांचे कवी संमेलन होणार आहे. यामध्ये ज्येष्ठ साहित्यिक सुरेश कंक, संतोष घुले, समन्वयक डॉ. पौर्णिमा कोल्हे आदी उपस्थित राहणार आहेत अशी माहिती इंद्रायणी साहित्य परिषदेच्या वतीने प्रसिद्धीस देण्यात आली आहे.

 गोसेवा क्षेत्रातील तज्ज्ञांनी केले मार्गदर्शन ; देशी गोवंश आधारित नैसर्गिक शेती तालुका निहाय प्रशिक्षण पुण्यात
पुणे : भारतीय कृषी व्यवस्थेत देशी गोवंशाचे महत्व अनन्यसाधारण आहे. भूमी सोपोषणासाठी देशी गोवंश अत्यंत उपयुक्त असून नैसर्गिक शेती उत्पादक अनेक शेतकरी आपल्याकडे आहेत. त्यांच्यासह सर्वच शेतकरी वर्गापर्यंत देशी गोवंश नैसर्गिक शेती व रासायनिक शेती याचा तुलनात्मक फरक सांगून देशी गोवंश आधारित नैसर्गिक शेती उपयुक्त असल्याचे मार्गदर्शन गोसेवा क्षेत्रातील तज्ज्ञांनी केले.

महाराष्ट्र गोसेवा आयोग पुणे व पशुसंवर्धन विभाग महाराष्ट्र शासन यांच्या संयुक्त विद्यमाने आणि सोशल रिस्पॉन्सिबिलिटी समूह यांच्या सहकार्याने राज्यस्तरीय विशेष उपक्रम अंतर्गत देशी गोवंश आधारित नैसर्गिक (रसायन मुक्त) शेती प्रशिक्षण क्रमांक १ तालुका हवेली – जिल्हा पुणे चे आयोजन शुक्रवार पेठेतील भारत भवन देशपांडे टूटोरियल्स हॉल येथे करण्यात आले होते. यामध्ये ५० हून अधिक शेतकरी व स्वयंसेवकांनी सहभाग घेतला.

उद्घाटनप्रसंगी गोसेवा आयोग सदस्य डॉ. नितीन मार्कंडेय, विश्व हिंदू परिषद गो रक्षा विभाग प्रांत संयोजक महेंद्र देवी, पशधुन विकास अधिकारी (विस्तार) डॉ. प्रकाश काळे,  राष्ट्रीय कर्तव्य अभियान महाराष्ट्र मुख्य संयोजक विजय वरुडकर, ग्राम विकास प्रमुख विनय कानडे, कृषी तज्ञ जगन्नाथ तात्या मगर, डॉ. संतोष चव्हाण, विश्व हिंदू परिषद गो रक्षा विभाग सह संयोजक कौस्तुभ देशपांडे, विजया घुले, हेमंत निम्हण, संतोष लाटणेकर, नंदकुमार भोपे, नाना नलगे आदी गो कृषी विषयात काम करणारे अभ्यासक उपस्थित होते.

विजय वरुडकर म्हणाले, जगभरात जमिनी नापीक होत आहेत. त्या वाचवण्यासाठी देशी गोवंश आधारित रसायन मुक्त शेती ची गरज आहे. गो सेवा आयोग व पशु संवर्धन विभाग महाराष्ट्र शासन यांच्या सहयोगाने राज्यातील दहा जिल्ह्यात ११७ तालुक्यातून आम्ही देशी गोवंश आधारित रसायन मुक्त शेती प्रशिक्षण आयोजित करत आहोत. ज्यात किमान पाच हजार शेतकऱ्यांना मोफत प्रशिक्षण देण्यात येणार असल्याचे त्यांनी सांगितले.

डॉ नितिन मार्कंडेय यांनी सुदृढ देशी गो वंश जतन करण्यासाठी उपस्थितांना मार्गदर्शन केले. देशी गोवंश आधारित रसायन मुक्त शेती प्रसार व्हावा यासाठी राष्ट्रीय कर्तव्य अभियान द्वारे मोफत गो-कृपाआमृता चे वाटप करण्यात आले. या प्रशिक्षण अंतर्गत, बीज संस्कार पद्धती, भारतीय बीज बँक निर्मिती, माती परीक्षण व पाणी परीक्षण आवश्यकता, गांडूळ खत निर्मिती, नैसर्गिक खत बँक निर्मिती, गो कृपामृत निर्मिती पद्धत, बांधावरची प्रयोग शाळा,अशा अनेक विषयांवर शिबीरात मार्गदर्शन करण्यात आले. तसेच शासकीय योजनांची माहिती देखील देण्यात आली.

या वेळी राष्ट्रीय कर्तव्य अभियान द्वारा आत्मनिर्भर गौ-ग्राम अभियान हा विशेष प्रकल्प सुरु असल्याची माहिती देण्यात आली. ज्ञानेश्वर शिंदे यांनी सूत्र संचालन तर सुनील बेनके यांनी आभार मानले. सोशल रिस्पॉन्सिबिलिटी समूहा द्वारे प्रशिक्षण आयोजित करण्यात आले होते.