पुणे-

भारतीय लष्कराच्या दक्षिण विभागाचे प्रमुख, लेफ्टनंट जनरल धीरज सेठ (पीव्हीएसएम, यूवायएसएम, एव्हीएसएम) यांनी आज पुण्यात दोन कार्यक्रमांचे अध्यक्षस्थान भूषवले. सेठ यांनी पुणे लष्करी तळावर ‘सुदर्शन चौक’ आणि ‘कोणार्क चौक’ यांचे उद्घाटन केले; तसेच ‘आर्मी इन्स्टिट्यूट ऑफ फिजिकल ट्रेनिंग’ इथे त्यांनी एका अत्याधुनिक कृत्रिम लष्करी अडथळा शर्यत मार्गाचे‌ उद्घाटनही  केले.सुदर्शन आणि कोणार्क चौकांचे उद्घाटन: लेफ्टनंट जनरल धीरज सेठ यांनी ‘दक्षिण विभागाच्या पराक्रमी तुकड्या—’सुदर्शन चक्र काॅर्प्स’ आणि ‘कोणार्क काॅर्प्स’—यांचे शौर्य, उत्कृष्ट सेवा आणि लढाऊ वृत्तीला आदरांजली म्हणून ‘सुदर्शन चौक’ आणि ‘कोणार्क चौक’ यांचे उद्घाटन केले. पुणे लष्करी स्टेशनच्या प्रतिष्ठित परिसरात वसलेल्या या दोन्ही वास्तू देशातील सर्वात जुन्या लष्करी ठाण्यांपैकी एक असलेल्या पुण्याच्या समृद्ध आणि वैभवशाली इतिहासात लष्करी कर्तृत्वाची भर घालणाऱ्या ठरल्या आहेत.

दक्षिण विभागाच्या लष्करी कर्तृत्वाच्या वारशा मोठे योगदान देणाऱ्या या दोन्ही वास्तू, दलांच्या जिवंत मूल्यांचेही प्रतिनिधित्व करतात. त्यांची स्थापना, पराक्रमाच्या स्मृती जतन करणे, अभिमान जागृत करणे आणि तिच्या युद्ध-अनुभवी दलांच्या वारशात कमांडची विद्यमान ओळख दृश्यरूपात स्थापित करणे या जाणीवपूर्वक केलेल्या संस्थात्मक प्रयत्नांचे द्योतक आहे.

लष्कराच्या शारीरिक प्रशिक्षण संस्थेमध्ये अत्याधुनिक कृत्रिम लष्करी अडथळा शर्यतमार्गाचे उद्घाटन : लष्कर कमांडरांनी अत्याधुनिक कृत्रिम लष्करी अडथळा शर्यतमार्गाचे उद्घाटन केले. अधिक तंदुरुस्त, कणखर आणि युद्धसज्ज सैन्यदल तयार करण्याच्या सदर्न कमांडच्या निरंतर प्रयत्नांमधील हे एक महत्त्वाचे पाऊल आहे.

बारमाही काळात सुरू राहणाऱ्या  या अडथळा शर्यतमार्गावर विविध परिस्थितींमध्ये वास्तववादी, उच्च-तीव्रतेचे आणि दीर्घकाळ टिकणारे शारीरिक प्रशिक्षण सुलभ व्हावे, यादृष्टीने काळजीपूर्वक केलेले अडथळे आणि रात्रीच्या प्रशिक्षणाची क्षमता यांचा समावेश आहे.युद्धाच्या बदलत्या स्वरूपामुळे शारीरिकदृष्ट्या कणखर, मानसिकदृष्ट्या चपळ आणि कारवाईत जुळवून घेणाऱ्या सैनिकांची आवश्यकता आहे, यावर सेठ यांनी आपल्या भाषणात भर दिला. अशा प्रकारच्या विशेष प्रशिक्षण पायाभूत सुविधा एक कणखर, चपळ आणि भविष्यासाठी सज्ज सैन्यदल घडवण्यात महत्त्वाची भूमिका बजावतील.  या कार्यक्रमांतून लष्करी वारसा जतन करण्याप्रती आणि भविष्यातील युद्धसज्जता वाढवण्याप्रती दक्षिण विभागाची कटिबद्धता अधोरेखित झाली. 

पुणे

अवकाळी पावसामुळे शहरात निर्माण झालेल्या परिस्थितीच्या पार्श्वभूमीवर मा. महापौर मंजुषा दीपक नागपूरे यांनी तातडीने उपाययोजना करण्याचे आदेश दिले आहेत.

महापौरांच्या निर्देशानुसार शहरातील झाडांची छाटणी, धोकादायक फांद्या हटविणे, तसेच नाल्यांची व गटारांची साफसफाई ही कामे तातडीने हाती घेण्यात येणार आहेत. पावसामुळे नागरिकांना कोणतीही अडचण निर्माण होऊ नये यासाठी प्रशासन सतर्क असून आवश्यक त्या सर्व उपाययोजना करण्यात येत आहेत.

यासोबतच आपत्ती व्यवस्थापन विभाग तसेच महानगरपालिकेच्या १ ते ५ परिमंडळातील उपायुक्तांना तत्काळ आणि प्रभावी कार्यवाही करण्याच्या स्पष्ट सूचना देण्यात आल्या आहेत. नागरिकांच्या सुरक्षिततेला सर्वोच्च प्राधान्य देत प्रशासन पूर्ण क्षमतेने कार्यरत आहे.

नागरिकांनी कोणतीही आपत्कालीन परिस्थिती उद्भवल्यास महानगरपालिकेच्या संबंधित विभागांशी संपर्क साधावा, असे आवाहन प्रशासनाच्या वतीने करण्यात येत आहे.

आपत्कालीन संपर्क क्रमांक :
📞 02025506800
📞 02025501269

दिवसभर दर्शन; सायंकाळी महाआरती व दिमाखदार वरघोडा
पुणे, :
पुण्यातील तुळशीबाग–मंडई परिसर जैन संघाच्या वतीने भगवान महावीर स्वामींच्या २६२५व्या जन्मकल्याणकानिमित्त भव्य कार्यक्रमाचे आयोजन करण्यात आले आहे. यंदा प्रभूंच्या दर्शनी मूर्तीला २५ वर्षे पूर्ण होत असल्याने उत्सवाला विशेष महत्त्व प्राप्त झाले आहे.
या निमित्ताने भगवान महावीर स्वामींची आकर्षक व दर्शनीय मूर्ती तयार करून ती दिवसभर मंडई परिसरात दर्शनासाठी ठेवण्यात येणार आहे. जैन समाजाबरोबरच इतर नागरिकांनाही प्रभूंचे दर्शन घेण्याची संधी उपलब्ध होणार आहे.
सायंकाळी प्रभूंची भव्य महाआरती आयोजित करण्यात येणार असून “कौन बनेगा भाग्यशाली” या लकी ड्रॉचेही आयोजन करण्यात आले आहे. तसेच लक्ष्मी रोडवरून दिमाखदार वरघोडा काढण्यात येणार असून, मागील २५ वर्षांपासून पुणे सकल संघाच्या वरघोड्यात या मंडळाचा बक्षीसपात्र सहभाग राहिला आहे.
उत्सवाबाबत माहिती देताना मोहन साखरिया यांनी सांगितले की, तुळशीबाग–मंडई परिसर जैन संघाच्या वतीने हा कार्यक्रम आयोजित करण्यात आला असून प्रभूंच्या दर्शनी मूर्तीला यंदा २५ वर्षे पूर्ण होत आहेत. हा उत्सव जैन समाजाच्या श्रद्धा आणि एकात्मतेचे प्रतीक असून अधिकाधिक भक्तांनी उपस्थित राहून दर्शन, आरती व वरघोड्यात सहभागी व्हावे, असे आवाहन त्यांनी केले.

पुणे-समाविष्ट ३२ गावातील नवीन प्रकल्पांना मुबलक पाणी देण्याची जबाबदारी बिल्डरचीच आहे. तसे हमीपत्र देखील बिल्डर देतात. मात्र प्रत्यक्षांत पाणीपुरवठा करत नाहीत. त्यामुळे मुबलक पाणी देण्याबाबत बिल्डरला खरेदी करारनाम्यात ही बाब नमूद करावी लागणार आहे. तसेच मान्य प्रस्तावांची यादी महापालिका वेबसाईट वर टाकण्यात येणार आहे. याबाबतचे आदेश शहर अभियंता अनिरुद्ध पावसकर यांनी जारी केले आहेत.

पुणे महानगरपालिका हद्दीमध्ये नविन ११ गावे (उरुळी देवाची व फुरसुंगी वगळून ९ गावे) व २३ गावे असे एकूण ३२ गावे समाविष्ट करण्यात आली आहेत. नव्याने समाविष्ठ गावांकरीता पाणीपुरवठा व्यवस्थेबाबत पुणे महानगरपालिकेमार्फत संपूर्ण पाणीपुरवठा योजना विकसित करण्याची कामे प्रगती पथावर आहेत. नव्याने समाविष्ठ ३२ गावांमधील प्राप्त विकसन व बांधकाम प्रस्तावांमध्ये विकासकामार्फत संबंधित प्रकल्पाचे विकसन पूर्ण झाले नंतर निवासी/व्यापारी वापरासाठी पुणे मनपामार्फत पुरेसा पाणी पुरवठा पुरेशा दाबाने उपलब्ध होईल तोपर्यंत विकसकामार्फत मुबलक पाणीपुरवठा सदर प्रकल्पास करणार असे हमीपत्र विकसक पुणे महानगरपालिकेस सादर करतात.

हमीपत्रानुसार पुणे मनपामार्फत कोणताही पाणीपुरवठा न झाल्यास किंवा अपुरा पाणीपुरवठा झाल्यास सदर प्रकल्पातील सदनिका धारकांना सदनिका खरेदी करारनाम्यामध्ये पाणीपुरवठ्याबाबत वरील प्रमाणे सर्व वस्तुस्थिती विशेष बाब महणून नमूद करून घेण्याची जबाबदारी विकासकाची आहे. तसेच ३२ गावांमधील पुणे मनपास हमीपत्र सादर करून विकासकामार्फत प्राप्त विकसन व बांधकाम प्रस्तावांना देण्यात आलेल्या मान्य प्रस्तावांची यादी पुणे महानगरपालिकेच्या संकेतस्थळावर प्रसिद्ध करण्यात येत असून वेळोवेळी सदर यादी अद्ययावत करण्यात येणार आहे. शहर अभियंता यांनी आपल्या आदेशात म्हटले आहे.

पुणे:हडपसर- हिंगणेमळा येथील कॅनाल च्या भरावावावरील निर्जन रस्त्यावर व कॅाक्रिट च्या भिंती वर रोज रात्री काही समाजकंटक रोज दारु पिऊन नशा करतात तसेच येणा-या जाणाऱ्या नागरिकांना महिलांना अश्लील शिवीगाळ करतात. या विरोधात या पुर्वी नागरिकांनी हडपसर पोलीस स्टेशन ला माजी नगरसेवक योगेश बापू ससाणे यांच्या नेतृत्वाखाली जाऊन गाऱ्हाणी मांडली त्यावेळी त्या प्रकारात थोडासा फरक पडला होता , परंतु हल्ली हा त्रास भयंकर वाढला आहे त्या मुळे पुन्हा एकदा योगेश बापू ससाणे यांच्या नेतृत्वाखाली काळेपडळ पोलीस स्टेशन चे पोलीस इन्पेक्टर मानसिंग पाटील यांनी हिंगणेमळ्यातील नागरिकांच्या समस्या जाणून घेण्यासाठी शनिवार दिनांक २८ मार्च २०२६ रोजी सायंकाळी ८ वाजता हिंगणे मळा येथील श्री काळभैरवनाथ मंदिरात लोकअदालत घेतली.या लोकअदालतीमध्ये परिसरातील असंख्य महीला व पुरुष मंडळी उपस्थित होते.
त्या वेळी काळेपडळ पोलीस स्टेशन चे वरीष्ठ पोलीस निरीक्षक मानसिंग पाटील यांनी महीलांना सायबर क्राईम , ११२ नंबर वरील कॅाल , बीट मार्शल बाबत माहिती, अर्थिक गुन्हे तसेच सोशलमेडीया वरील गुन्हे इं बाबत माहिती अवगत करून दिली तसेच सर्व नागरिकांना आश्वस्त केले की अशा नशेड्यांची ज्ञ आता पोलीस करणार नाही. कायदा सुव्यवस्था बाबत कधीही तक्रार करा मी तुमच्या पाठीशी खंबीरपणे उभा आहे
तसेच सर्वांना स्वतःचा मोबाईल क्रमांक त्यांनी यावेळी दिला
या वेळी सौ. अनिता हिंगणे, सुचिता हिंगणे,रुपाली हिंगणे,एैश्वर्या हिंगणे ,सुरेखा हिंगणे, लक्ष्मी हिंगणे, मंदाबाई हिंगणे,जयश्री हिंगणे, शोभा हिंगणे, सुलभा हिंगणे, अर्चना हिंगणे,कुसुम हिंगणे ,स्वप्नाली हिंगणे तसेच सर्वश्री ज्ञानेश्वर हिंगणे, सतीश हिंगणे,राजेंद हिंगणे,संदीप हिंगणे,आण्णा वाडकर ,शुभम हिंगणे,विनोद ससाणे इत्यादी नागरिक उपस्थित होते.
आभार प्रदर्शन योगेश हिंगणे यांनी केले व मानसिंग पाटील तसेच योगेश बापू ससाणे यांचे श्रीफळ व पुष्प गुच्छ देऊन स्वागत करण्यात आले.

• प्रा. डॉ. मेधा कुलकर्णी यांच्याकडून शून्य प्रहरात मुद्दा उपस्थित; शेतजमिनींचे संरक्षण करण्याची मागणी

पुणे: देशातील कृषी क्षेत्र झपाट्याने अकृषी क्षेत्रात रूपांतरित होत असून, अन्नसुरक्षेच्या दृष्टीने ही अत्यंत गंभीर बाब आहे. भारतासारख्या कृषीप्रधान देशात शेतीयोग्य जमिनीचे प्रमाण कमी होणे चिंताजनक आहे. १४० कोटी नागरिकांच्या अन्नसुरक्षेसाठी भारताला सक्षम बनवायचे असेल, तर शेतजमिनींचे संरक्षण करणे गरजेचे आहे, असे स्पष्ट मत राज्यसभा खासदार प्रा. डॉ. मेधा कुलकर्णी यांनी संसदेत शून्य प्रहरात बोलताना मांडले. 

प्रा. डॉ. मेधा कुलकर्णी म्हणाल्या, “देशातील अनेक जिल्हे आणि शहरांमध्ये शेतीजमिनींची प्लॉटिंग करून निवासी प्रकल्प उभारले जात आहेत. यामुळे पेरणीयोग्य क्षेत्रात सतत घट होत आहे. पंजाबमध्ये मागील काही वर्षांत एक लाख हेक्टरपेक्षा अधिक जमीन अकृषिक घोषित करण्यात आली. सध्या भारतात केवळ सुमारे ४५ टक्के जमीनच शेतीखाली असून, त्यात सुमारे ९ टक्क्यांची घट झाली आहे. ही स्थिती कायम राहिल्यास अन्नसुरक्षा, शेतकऱ्यांची उपजीविका, जीएसटी उत्पन्न आणि पर्यावरणीय संतुलन यावर परिणाम होऊ शकतो.” एका अभ्यासानुसार लोकसंख्येत एक टक्क्याने वाढ झाली, तर शेती क्षेत्र ०.४५ टक्क्यांनी कमी होते, असे त्यांनी नमूद केले.

शेतकऱ्यांनी आपली शेतजमीन जपून ठेवत पुढील पिढीसाठी ती सुरक्षित करावी. आधुनिक तंत्रज्ञान, गुणवत्तापूर्ण बियाणे, सूक्ष्म सिंचन आणि सरकारी योजनांचा लाभ घेऊन उत्पादन वाढवावे, अशी सूचनाही त्यांनी केली. शेतजमिनीचे अकृषी क्षेत्रात रूपांतर केवळ व्यापक जनहिताच्या पायाभूत प्रकल्पांसाठीच मर्यादित असावे. उपजाऊ जमिनींचे संरक्षण करण्यासाठी कठोर कायदे लागू करावेत, तसेच जमिनींच्या वापरातील बदलांवर सॅटेलाइट व डिजिटल तंत्रज्ञानाद्वारे नियंत्रण ठेवावे, अशी मागणी त्यांनी केंद्र सरकारकडे कुलकर्णी यांनी केली. 

तसेच शेतजमीन शेतीसाठीच वापरली जावी. त्यातूनही शेतकऱ्यांना जमीन विकावी लागल्यास सरकारने योग्य मोबदला देऊन ती खरेदी करून शेतीसाठीच वापर सुनिश्चित करावा, असेही त्यांनी सांगितले. कृषी क्षेत्र हे भविष्यातील महत्त्वाचे उद्योग ठरणार असल्याने त्याचे संवर्धन आणि संरक्षण ही काळाची गरज असल्याचे त्यांनी अधोरेखित केले.