पुणे- नियमबाह्य होर्डींग्ज,बेकायदा होर्डींग्ज यांचा पुण्यात बाजार उठवू पाहणाऱ्या आणि योग्य दर आकारणी ला विरोध करणाऱ्यांचा सामना करणाऱ्या स्थायी समिती अध्यक्ष आणि महापालिका आयुक्त यांच्या भूमिकेला पाठींबा देत ‘आपले पुणे आपला आपला परिसर’ संस्थेचे आणि महापालिकेतील माजी विरोधी पक्षनेते उज्वल केसकर,सुहास कुलकर्णी तसेच माजी नगरसेवक प्रशांत बधे यांनी ,’संघटीत शक्तीपुढे मान तुकवू नका,आम्ही सोबत आहोत,पुणेकर सोबत आहेत’ अशा शब्दात या दोहोंचे मनोबल वाढविले आहे.

महापालिका आयुक्त नवल किशोर राम यांना दिलेल्या पत्रात त्यांनी म्हटले आहे कि,’असंघटित पुणेकरांवर अन्याय होणार होता तो जागृत नागरी संघटना आणि लोकप्रतिनिधींनी दूर केला मालमत्ता करामध्ये वाढ होऊ दिली नाही.प्रशासनाने मांडलेले होल्डिंगचे दरपत्रक संघटित व्यवसायिकांमुळे मागे घ्यावे लागले असा आम्ही आरोप केला त्यात तथ्यही होते.पण आपण काल आढावा घेऊन कठोर भूमिका घेतली जी घेणे आवश्यक आहे कारण महानगरपालिकेचे उत्पन्न वाढले तर आणि तरच आपल्याला विकास कामे करणे शक्य आहे. पुणे महानगरपालिकेचे क्षेत्र हे मुंबई महानगरपालिका क्षेत्रापेक्षा जास्त मोठे आहे.अर्थात मुंबईच उत्पन्नाचं पोटेन्शिअल आणि पुण्याचे यामध्ये फरक आहे.
लंडन महानगरपालिका उत्पन्नाचा मुख्य स्त्रोत हा होर्डिंगचे उत्पन्न आहे.
मुळात बेकायदेशीर होर्डिंग कायदेशीर करण्यासाठी एक “अभय योजना” तयार करावी खरं म्हणजे आमचा अभय योजनेला नेहमीच विरोध राहिलेला आहे परंतु गेले दहा वर्ष वर्तमानपत्रात बेकायदेशीर होर्डिंगची संख्या किती याबाबत वेगवेगळ्या दावे प्रति दावे होत असतात. हा विषय इतका सोपा आहे पुणे महानगरपालिकेचे प्रत्येक क्षेत्रीय कार्यालयातील कर्मचारी यांनी त्यांच्या क्षेत्रीय कार्यालयामध्ये असणाऱ्या सर्व होर्डिंग ची संख्या फोटो त्यांच्याकडे लेझर गन दिली तर त्याचे माप सुद्धा अचूक मिळू शकेल इतकं तंत्रज्ञान पुढे आलेले आहे.
म्हणजे प्रशासनाला अंदाज येईल की महानगरपालिकेला पैसे न भरता किती जण उत्पन्न मिळवत आहेत त्यांच्याकडून आपल्याला महसूल उत्पन्न मिळवता येईल अर्थात त्याचा दर हा नेहमीपेक्षा जास्त असला पाहिजे.आणि मग ज्या वेळेला आपले एकदा जाहिरातीचे धोरण ठरले त्याप्रमाणे मग पुढच्या काळामध्ये शहर विद्रुप न होता चांगले होऊन उत्पन्न वाढेल.आपण याबाबत आम्ही केलेल्या आव्हानाला प्रतिसाद म्हणून एक पाऊल पुढे टाकले आहे त्यामुळे आपले पुनश्च एकदा अभिनंदन.अध्यक्ष स्थायी समिती याने महसूल वाढवण्यासाठी प्रयत्न करण्याचे ठरवले त्याप्रमाणे ते कामही करत आहेत एक समिती ही नेमली आहे उत्पन्नाचे स्त्रोत वाढवण्यासाठी आम्ही देखील आपल्या सोबत आहोत हा आमचा शब्द आहे.असेही केसकर,कुलकर्णी आणि बधे यांनी म्हटले आहे.

होर्डींग्ज नियमावलीतील अत्यल्प भाग पहा

भक्ती, संगीत आणि आत्मशोधाचा प्रवास घडवणारे भव्य नाटक – भाऊसाहेब भोईर

पिंपरी, पुणे (दि.१३ मे २०२६) पंढरीची वारी हा जगातील एकमेव सोहळा आहे की, या सोहळ्यात सर्व अठरा पग्गड जाती एकत्र येऊन वारी मध्ये सहभागी होतात. देहू, आळंदी पासून पंढरपूर पर्यंत वारीत सहभागी होण्याचे आत्मिक समाधान हे अडीच तासात देण्याचा प्रयत्न “अंतर्नाद” या संगीत नाटकातून प्रेक्षकांना मिळेल. लहान मुलांपासून ते ज्येष्ठांपर्यंत सर्वांच्या पसंतीला उतरेल असा ५१ कलाकारांचा सहभाग असलेल्या या प्रयोगात अभंग, गवळण, भारुड, पोवाड्याचा समावेश या सात्विक कार्यक्रमात आहे. अंतर्मनातील नाद समजून घेण्यासाठी आणि स्वतः मधला विठ्ठल शोधण्यासाठी सर्वांनी
‘अंतर्नाद’ या संगीत नाटकाचा शुभारंभाचा प्रयोग शनिवारी, (दि.१६) सायंकाळी ७ वाजता, चिंचवड येथील प्रा. रामकृष्ण मोरे प्रेक्षागृहात येऊन पहावा असे आवाहन अखिल भारतीय नाट्य परिषदेचे पिंपरी चिंचवड शहराध्यक्ष व मोरया थिएटरचे संस्थापक, “अंतर्नाद” चे निर्माते भाऊसाहेब भोईर यांनी केले.
पिंपरी आचार्य अत्रे सभागृह येथे आयोजित केलेल्या पत्रकार परिषदेत भोईर बोलत होते. यावेळी प्रणव सपकाळे, मनोज डाळिंबकर, निरंजन पेडगावकर, अंकिता शिवतरे, राजू बंग आदी उपस्थित होते.
यावेळी भाऊसाहेब भोईर यांनी सांगितले की, वारीचं महत्व नवीन पिढीला “अंतर्नाद” मधून कळेल आणि त्यांना प्रेरणा मिळेल. संतांविषयी अनेक साहित्य, अभंग आहेत. परंतु या नाटकात त्याची आम्ही त्याची कॉपी केली नाही तर सर्व नवीन आहे. लोकसंगीतात वापरली जाणारी बहुतांशी सर्व वाद्य या संगीत नाटकात वापरली आहेत. आपल्या अंतरात्म्याचा आवाज समजून घेण्यासाठी आपण अंतर्नाद पहावे. संगीत, भक्ती आणि कलेचा वारसा जपणाऱ्या पिंपरी चिंचवडच्या सांस्कृतिक विश्वात ‘मोरया थिएटर्स’ एक नवी कोरी कलाकृती घेऊन येत आहे. पंढरीच्या वारीचा आणि आत्म्याचा प्रवास मांडणाऱ्या या भव्य संगीत नाटकाचा दुसरा प्रयोग हडपसर येथील विठ्ठलराव तुपे नाट्यगृहात शुक्रवारी (दि. २२ मे), सायंकाळी सात वाजता होणार आहे. रसिक प्रेक्षकांसाठी या नाटकाची तिकिटे ‘बुक माय शो’ आणि ‘तिकीट खिडकी’ या ऑनलाइन प्लॅटफॉर्मवर उपलब्ध आहेत. तसेच चिंचवड येथील नाट्यगृहाच्या तिकीट खिडकीवरही विक्री सुरू आहे अशी माहिती दिग्दर्शक मनोज डाळिंबकर यांनी दिली.
नाटकाचे कथानकः “अंतर्नाद” हे केवळ नाटक नसून तो आत्म्याशी संवाद साधणारा एक भावस्पर्शी प्रवास आहे. आषाढी एकादशीच्या निमित्ताने पंढरपूरच्या पवित्र भूमीकडे निघालेल्या माऊलींच्या पालखी सोहळ्याचे आणि त्यातील वारकऱ्यांच्या श्रद्धेचे जिवंत चित्रण यात पाहायला मिळेल. दिंडीत सहभागी झालेल्या एका युवा वारकऱ्याची विठ्ठल भक्ती आणि त्यातून घडलेला त्याचा अंतर्मनातील प्रवास म्हणजे ‘अंतर्नाद’ होय. या नाटकाचा निर्माता म्हणून काम करताना, वारकरी परंपरेला अभिवादन करणारी ही आधुनिक कलाकृती रसिकांच्या मनाला नक्कीच स्पर्श करेल, असा मला विश्वास भाऊसाहेब भोईर यांनी व्यक्त केला.
नाटकाचे लेखन विनोद रत्ना यांनी केले असून, संकल्पना व दिग्दर्शन मनोज डाळींबकर यांचे आहे. संगीत निरंजन पेडगावकर यांनी दिले आहे आणि मुराद तांबोळी यांनी गीते शब्दबद्ध केली आहेत. नृत्यदिग्दर्शन अंकिता शिवतरे व सौगंध कापसे यांनी केले आहे. तांत्रिक बाजू अभिप्राय कामठे (प्रकाश योजना), कमलेश बिचे (रंगभूषा) आणि वेदिका काळे (वेशभूषा) यांनी सांभाळली आहे. सहाय्यक दिग्दर्शन आकाश थिटे यांनी केले आहे.

पुणे-

रोटरी क्लब ऑफ पुणे सेंट्रल आणि पुणे सिटी बॉक्सिंग असोसिएशन महिला बॉक्सिंग खेळाडूंना प्रोत्साहन देण्याच्या उद्देशाने महिला खेळाडू दत्तक योजनेचा एक भाग म्हणून 2023 पासून “शी कॅन अँड शी विल” हा विशेष उपक्रम संयुक्तपणे राबवत आहेत.

या उपक्रमासाठी मनापासून निधी देणाऱ्या रोटरी क्लब ऑफ पुणे सेंट्रलच्या अध्यक्षा रोटरियन लेखा नायर आणि या प्रकल्पासाठी प्रमुख देणगीदारांपैकी एक असलेल्या रोटरियन योगेश शाह यांनी पुण्यातील महिला बॉक्सर्सना राज्य आणि राष्ट्रीय बॉक्सिंग चॅम्पियनशिपमध्ये पोडियम फिनिश करताना पाहण्याची उत्सुकता व्यक्त केली आहे.

या उपक्रमांतर्गत पुणे शहर, पुणे जिल्हा आणि पिंपरी-चिंचवडमधील निवडक ६० महिला बॉक्सर्ससाठी विशेष प्रशिक्षण शिबिराचे आयोजन करण्यात आले आहे, ज्यांनी उत्कृष्ट कामगिरीचे प्रदर्शन केले आहे. हे शिबिर २२ एप्रिल ते ३० एप्रिल, २०२६ या कालावधीत जनरल अरुणकुमार वैद्य स्टेडियम, पुणे येथे आंतरराष्ट्रीय बॉक्सिंग प्रशिक्षक श्री. शिवकुमार पाल यांच्या तज्ञ मार्गदर्शनाखाली होणार आहे.

वरिष्ठ प्रशिक्षक श्री. शिवकुमार पाल यांनी भारतातील अनेक आंतरराष्ट्रीय पदक विजेत्या बॉक्सरना प्रशिक्षण दिले आहे आणि आता पुण्यातील महिला खेळाडूंना त्यांच्या अनुभवाचा फायदा होईल.

या उपक्रमाद्वारे, सहभागी खेळाडूंना उच्च दर्जाचे प्रशिक्षण, क्रीडा उपकरणे आणि योग्य पोषण (आहार योजना) बद्दल तपशीलवार मार्गदर्शन मिळेल.

शिबिराच्या शेवटी अंतिम टप्प्यासाठी एकूण 15 महिला खेळाडूंची निवड केली जाईल. या निवडक 15 खेळाडूंना “महिला खेळाडू दत्तक योजनेत” समाविष्ट केले जाईल, ज्या अंतर्गत त्यांना प्रगत प्रशिक्षण, क्रीडा उपकरणे, योग्य आहार नियोजन आणि त्यांची कामगिरी वाढवण्यासाठी वर्षभर तज्ञांचे मार्गदर्शन मिळेल.

याशिवाय, या खेळाडूंना राष्ट्रीय आणि आंतरराष्ट्रीय स्तरावर स्पर्धा करण्यास सक्षम बनविण्याच्या उद्देशाने विशेष तयारीसह त्यांना आर्थिक मदत दिली जाईल.
2023 पासून सुरू असलेल्या या उपक्रमाचा एक भाग म्हणून, यापूर्वी राज्य आणि राष्ट्रीय स्तरावर उत्कृष्ट कामगिरीचे प्रदर्शन करणाऱ्या पुणे शहरातील आठ महिला खेळाडूंची निवड करण्यात आली होती.

या कार्यक्रमांतर्गत 11 ते 15 डिसेंबर 2023 या कालावधीत द्रोणाचार्य पुरस्कार विजेते ज्येष्ठ बॉक्सिंग प्रशिक्षक श्री. डी. चंद्रालाल यांच्या मार्गदर्शनाखाली जनरल अरुणकुमार वैद्य स्टेडियम येथे उच्चस्तरीय प्रशिक्षण शिबिर घेण्यात आले.

कार्यक्रमादरम्यान, खेळाडूंना बॉक्सिंग किट, बॉक्सिंग ग्लोव्हज, ट्रॅकसूट आणि रिंग शूजसह आवश्यक क्रीडा साहित्याचे वाटप करण्यात आले. योग्य पोषण (डाएट प्लॅन) आणि प्रशिक्षण याबाबत मार्गदर्शनही करण्यात आले.

या उपक्रमातील अनेक खेळाडूंनी राज्य आणि राष्ट्रीय स्तरावर उल्लेखनीय यश संपादन केले आहे:

1. झीनत शेख – शालेय राष्ट्रीय अजिंक्यपद: कांस्य पदक; आर्मी स्पोर्ट्स इन्स्टिट्यूटसाठी निवड
2. सृष्टी चोरगे – शालेय राष्ट्रीय अजिंक्यपद: रौप्य पदक
3. हर्षदा लोहट – राज्य स्पर्धा: सुवर्णपदक; अखिल भारतीय विद्यापीठ स्पर्धेत सहभाग
4. वैष्णवी कदम – राष्ट्रीय स्पर्धा: सुवर्णपदक
5. समीक्षा सूर्यवंशी – राज्य स्पर्धा: सुवर्णपदक
   ६. भूमिका खिलारे – राज्य स्पर्धा: सुवर्णपदक
6. सोनिया सूर्यवंशी – पश्चिम विभागीय चॅम्पियनशिप: सुवर्णपदक
7. रिया कुटे – शालेय राज्य स्पर्धा: सुवर्णपदक

“शी कॅन अँड शी विल” हा प्रकल्प महिलांचे सक्षमीकरण आणि त्यांचा खेळातील सहभाग वाढवण्याच्या उद्देशाने राबविण्यात येत आहे. भविष्यातील यशस्वी महिला बॉक्सरचे राष्ट्रीय आणि आंतरराष्ट्रीय स्तरावर पालनपोषण करण्याच्या दिशेने हा एक महत्त्वपूर्ण प्रयत्न आहे.

इंडियन बॉक्सिंग कौन्सिलचे अध्यक्ष ऑलिंपियन बॉक्सिंग रेफरी ब्रिगेडियर पीकेएम राजा, पुणे शहर बॉक्सिंग संघटनेचे अध्यक्ष श्री. अविनाश बागवे, महाराष्ट्र बॉक्सिंग संघटनेचे महासचिव श्री. भरतकुमार व्हावळ, शिवछत्रपती पुरस्कार विजेते व पिंपरी चिंचवड शहर बॉक्सिंग संघटनेचे सचिव तथा पुणे विभागीय सचिव श्री. विजय यादव, आंतरराष्ट्रीय कोच व पुणे शहर बॉक्सिंग संघटनेचे सचिव श्री. विजय गुजर, राष्ट्रीय पंच व पुणे जिल्हा बॉक्सिंग संघटनेचे महासचिव श्री. अभिमान सुर्यवंशी यांच्यासह पुण्यातील तीनही संघटनांचे पदाधिकारी हा कार्यक्रम यशस्वी करण्यासाठी एकत्रितरित्या परिश्रम घेत आहेत.

पुणे : NEET परीक्षा रद्द झाल्यानंतर देशभरात विद्यार्थ्यांमध्ये संतापाची लाट उसळली असून, त्याच पार्श्वभूमीवर राष्ट्रवादी काँग्रेस पार्टी शरदचंद्र पवार पक्षाच्या विद्यार्थी संघटनेकडून पुणे शहरात आक्रमक निषेध आंदोलन करण्यात आले. “विद्यार्थ्यांच्या भविष्याचा बाजार मांडणाऱ्या व्यवस्थेविरोधात आता रस्त्यावर उतरल्याशिवाय पर्याय नाही,” असा इशारा आंदोलनकर्त्यांनी दिला.

या आंदोलनाचे नेतृत्व विद्यार्थी संघटनेचे प्रदेशाध्यक्ष सुनील गव्हाणे यांनी केले. यावेळी राष्ट्रवादी काँग्रेस पार्टीचे पुणे शहराध्यक्ष श्रीकांत पाटील प्रमुख उपस्थित होते. आंदोलनादरम्यान केंद्र सरकार आणि परीक्षा व्यवस्थापनाविरोधात जोरदार घोषणाबाजी करण्यात आली.

प्रदेशाध्यक्ष सुनील गव्हाणे यांनी सरकारवर टीका करताना म्हटले की,
“मागील काही वर्षांपासून NEET व इतर परीक्षांमध्ये पेपरफुटी, गैरव्यवहार आणि गोंधळाची मालिका सुरू आहे. लाखो विद्यार्थी रात्रंदिवस अभ्यास करून परीक्षा देतात, मात्र भ्रष्ट आणि निष्क्रिय यंत्रणेमुळे त्यांचे भविष्य अंधारात ढकलले जात आहे. मोदी सरकारला विद्यार्थ्यांच्या आणि जनतेच्या प्रश्नासंदर्भात काहीही देणे घेणे राहिलेले नाही. ते केवळ निवडणुकांचा प्रचार आणि आपले इव्हेंट करण्यात व्यस्त आहेत. विद्यार्थ्यांच्या आयुष्याशी खेळ करणाऱ्यांना जनता माफ करणार नाही.”

यावेळी श्रीकांत पाटील यांनीही केंद्र सरकारवर निशाणा साधत, “शिक्षण व्यवस्थेचा पूर्णपणे बोजवारा उडाला आहे. विद्यार्थ्यांच्या न्यायासाठी राष्ट्रवादी काँग्रेस पक्ष रस्त्यावर उतरला असून, दोषींवर कठोर कारवाई आणि पारदर्शक परीक्षा प्रणाली लागू होईपर्यंत संघर्ष सुरू राहील,” असे सांगितले.

या आंदोलनात पिंपरी चिंचवड विद्यार्थी शहराध्यक्ष राहुल आहेर, प्रदेश सरचिटणीस शार्दुल उबाळे, प्रदेश सचिव राजवीर ठवरे, पुणे विद्यार्थी संघटनेचे अजय पवार, संघराज शेलार, युवक प्रदेश सचिव अशोक बेंद्रे, पुणे युवक शहराध्यक्ष किशोर कांबळे, युवक कार्याध्यक्ष अजिंक्य पालकर, प्रसिध्दी प्रमुख अमोघ ढमाले अजय पवार, साहिल कांबळे, ओम पोकळे, जयदीप देवकुळे, रोहन पवार, अर्जुन गांजे, रिषभ भडाळे , स्वप्नील खंडागळे, आर्यन गायकवाड, ज्ञानेश्वर वाघमारे यांच्यासह मोठ्या संख्येने विद्यार्थी व पदाधिकारी सहभागी झाले होते.

“NEET घोटाळ्याची निष्पक्ष चौकशी करा”, “विद्यार्थ्यांच्या भविष्याशी खेळ बंद करा”, “पेपरफुटी करणाऱ्यांना कठोर शिक्षा झालीच पाहिजे” अशा घोषणांनी परिसर दणाणून गेला.

महानगरपालिकेत आठवड्यातून एक दिवस ‘सार्वजनिक वाहतूक दिन’ पाळण्याचा महापौरांचा प्रस्ताव

पुणे,: पुणे महानगरपालिकेतील अधिकारी व कर्मचारी वर्गाने आठवड्यातून किमान एक दिवस खाजगी वाहनांचा वापर टाळून सार्वजनिक वाहतुकीचा वापर करावा, असा महत्त्वपूर्ण प्रस्ताव महापौर सौ. मंजुषा दीपक नागपुरे यांनी मांडला आहे. यासंदर्भात त्यांनी आयुक्त यांना अधिकृत पत्र पाठविले आहे.

जागतिक पातळीवर इंधनाशी संबंधित निर्माण होणाऱ्या आव्हानांच्या पार्श्वभूमीवर देशाचे पंतप्रधान मा. नरेंद्र मोदी यांनी इंधन बचत आणि सार्वजनिक वाहतुकीच्या वापराबाबत केलेल्या आवाहनाला प्रतिसाद म्हणून हा उपक्रम राबविण्याची गरज महापौरांनी व्यक्त केली आहे. तसेच, राज्याचे मुख्यमंत्री मा. देवेंद्र फडणवीस यांनीही शहरांमधील वाहतूक सुलभतेसाठी मेट्रोसारख्या सार्वजनिक प्रकल्पांच्या वापरावर दिलेल्या भराचा उल्लेख यावेळी करण्यात आला आहे.

महापौरांनी आपल्या पत्रात पुढील सूचना मांडल्या आहेत:

• महानगरपालिकेतील अधिकारी, कर्मचारी व लोकप्रतिनिधींनी आठवड्यातून एक दिवस ‘पीएमपीएमएल’ बस किंवा ‘पुणे मेट्रो’चा वापर करावा.
• शक्य असल्यास सायकलचा वापर करून पर्यावरणपूरक प्रवासाला प्रोत्साहन द्यावे.
• अपरिहार्य परिस्थितीत ‘कारपूलिंग’चा अवलंब करावा.

महापौरांनी नमूद केले की, प्रशासनातील अधिकारी व कर्मचारी स्वतः सार्वजनिक वाहतुकीचा वापर करत असल्यास सर्वसामान्य नागरिकांमध्ये सकारात्मक संदेश जाईल. तसेच, प्रत्यक्ष प्रवास करताना येणाऱ्या अडचणी समजून घेऊन त्या दूर करण्यासाठी प्रशासनाला अधिक प्रभावीपणे काम करता येईल.

आत्मनिर्भर भारताच्या संकल्पनेला बळकटी देण्यासाठी तसेच इंधन बचत, पर्यावरण संरक्षण आणि शहरातील वाहतूक व्यवस्थेवर ताण कमी करण्याच्या उद्देशाने हा उपक्रम राबविण्याबाबत लवकरात लवकर निर्णय घेण्याची विनंती महापौरांनी केली आहे.

पुण्यातील विद्यार्थ्यांनी राज्यात प्रथम-द्वितीय येत शहराच्या शिरपेचात मानाचा तुरा

पुणे,: “रात्र शाळा ही अतिशय गरजेची आणि समाजासाठी महत्त्वाची शिक्षण व्यवस्था आहे. प्रतिकूल परिस्थितीत शिक्षण पूर्ण करून राज्यात अव्वल येणाऱ्या या विद्यार्थ्यांचा संघर्ष खरोखर प्रेरणादायी आहे. माझे पती देखील रात्र महाविद्यालयातून शिक्षण घेतलेले आहेत. त्यामुळे अशा शिक्षण व्यवस्थेचे महत्त्व अधिक अधोरेखित होते,” असे गौरवोद्गार पुणे महानगरपालिकेच्या महापौर सौ. मंजुषा दीपक नागपुरे यांनी काढले.

दि रास्ता पेठ एज्युकेशन सोसायटी संचलित आबासाहेब अत्रे रात्र प्रशालेतील दहावी परीक्षेत राज्यात प्रथम व द्वितीय क्रमांक मिळविणाऱ्या विद्यार्थ्यांचा महापौर मॅडम यांच्या हस्ते गौरव करण्यात आला. यावेळी त्यांनी विद्यार्थ्यांचे विशेष अभिनंदन करत त्यांच्या जिद्दीचे कौतुक केले.

विद्येचे माहेरघर असलेल्या पुणे शहराच्या शिरपेचात पुन्हा एक मानाचा तुरा रोवणारी ही कामगिरी ठरली आहे. रात्र शाळेतील विद्यार्थ्यांनी प्रतिकूल परिस्थितीवर मात करत घवघवीत यश संपादन केले आहे.

दि रास्ता पेठ एज्युकेशन सोसायटी संचलित आबासाहेब अत्रे रात्र प्रशालेचा यंदाचा दहावीचा निकाल ८८.८८ टक्के लागला आहे. वसुप्रद वैभव कुलकर्णी यांनी ९०.४० टक्के गुण मिळवत राज्यात प्रथम क्रमांक पटकावला, तर अंकुश काशिनाथ रेवाळे यांनी ८४.८० टक्के गुणांसह द्वितीय क्रमांक मिळविला.

संघर्षातून यश मिळविणाऱ्या या विद्यार्थ्यांच्या कथा प्रेरणादायी आहेत. वसुप्रद कुलकर्णी यांनी वेदपाठशाळेतील शिक्षण, पौरोहित्याचे काम आणि रात्री अभ्यास करत यश मिळवले. तर अंकुश रेवाळे यांनी दिवसा सुरक्षा रक्षक व बाऊन्सर म्हणून काम करत, कौटुंबिक जबाबदाऱ्या सांभाळत आणि अत्यंत कठीण परिस्थितीत अभ्यास करून हे यश संपादन केले.

यावेळी महापौर मॅडम यांनी पुणे महानगरपालिकेतील ज्या कर्मचाऱ्यांचे शिक्षण अर्धवट राहिले आहे, त्यांनी इयत्ता पाचवी ते बारावीपर्यंतचे शिक्षण पूर्ण करण्यासाठी अशा रात्र प्रशालांमध्ये प्रवेश घ्यावा, असे आवाहन केले.

कार्यक्रमास दि रास्ता पेठ एज्युकेशन सोसायटीचे कार्याध्यक्ष संजीव महाजन, सदस्य भारत वेदपाठक, ज्येष्ठ शिक्षक संजय सातपुते, कुंभार आदी उपस्थित होते.संस्थेचे कार्याध्यक्ष संजीव महाजन यांनी संस्था शताब्दी वर्षात पदार्पण करत असताना हे यश महत्त्वाचे असल्याचे सांगितले. तर ज्येष्ठ शिक्षक संजय सातपुते यांनी रात्र शाळेतील विद्यार्थ्यांच्या जिद्दीचा गौरव करत त्यांच्या संघर्षमय प्रवासाचे विशेष कौतुक केले.

गुडलक चौक येथे NEET चा प्रतीकात्मक पुतळा जाळून शिक्षण मंत्र्यांच्या राजीनाम्याची युवक काँग्रेसची मागणी.

पुणे : देशभरातील लाखो विद्यार्थ्यांच्या भविष्याशी खेळणाऱ्या NEET परीक्षेतील सततच्या गैरव्यवस्था, पेपरफुटी आणि भ्रष्टाचाराच्या निषेधार्थ युवक काँग्रेसतर्फे आज गुडलक चौक येथे तीव्र आंदोलन करण्यात आले. यावेळी NEET चा प्रतीकात्मक पुतळा जाळून केंद्र सरकार आणि शिक्षण मंत्रालयाविरोधात जोरदार घोषणाबाजी करण्यात आली.

विद्यार्थ्यांच्या मेहनतीची खिल्ली उडवणाऱ्या आणि शिक्षण व्यवस्थेचे पूर्णपणे राजकारण करणाऱ्या केंद्र सरकारचा निषेध करत युवक काँग्रेसने केंद्रीय शिक्षण मंत्र्यांच्या तात्काळ राजीनाम्याची मागणी केली.

यावेळी महाराष्ट्र युवक काँग्रेसचे प्रदेशाध्यक्ष शिवराज मोरे म्हणाले,

“देशातील विद्यार्थी रात्रंदिवस अभ्यास करून स्वतःचे भविष्य घडवण्याचा प्रयत्न करत आहेत, पण मोदी सरकारच्या भ्रष्ट आणि निष्क्रिय व्यवस्थेमुळे विद्यार्थ्यांचे भविष्य उद्ध्वस्त होत आहे. NEET परीक्षा आता गुणवत्तेची नसून भ्रष्टाचाराची परीक्षा बनली आहे. शिक्षण मंत्र्यांनी नैतिक जबाबदारी स्वीकारून तात्काळ राजीनामा द्यावा.”

युवक काँग्रेसचे राज्याचे मीडिया विभाग अध्यक्ष अक्षय जैन म्हणाले,

“जे सरकार परीक्षा सुरक्षित ठेवू शकत नाही, ते देशाचे भविष्य काय सुरक्षित ठेवणार? विद्यार्थ्यांच्या स्वप्नांची राख करणाऱ्या या सरकारविरोधात युवक काँग्रेस रस्त्यावर उतरली आहे. विद्यार्थ्यांच्या भविष्यावर बुलडोझर चालवणाऱ्यांना जनता कधीच माफ करणार नाही. 

प्रदेश उपाध्यक्ष प्रथमेश अबनावे म्हणाले,

“विद्यार्थ्यांच्या कष्टावर पाणी फेरणाऱ्या या व्यवस्थेविरोधात आता देशभरातील विद्यार्थी आणि युवक रस्त्यावर उतरतील. NEET घोटाळ्याची स्वतंत्र चौकशी करून दोषींवर कठोर कारवाई झालीच पाहिजे.”

या आंदोलनात प्रदेश अध्यक्ष शिवराज मोरे, अक्षय जैन, प्रथमेश अबनावे, मोहसीन शेख, भूषण रानभरे, सौरभ अमराळे, अंजनेय साठे, अथर्व सोनार, सद्दाम शेख, अभिषेक अवचार, निखिल मलके, सागर धाडवे,ओंकार मोरे, विशाल कामेकर, दिनेश सरताळे, विकास सुपनार, अँड सूरज, प्रसन्न मोरे, तेजस बनसोड आदी  पदाधिकारी कार्यकर्ते आणि मोठ्या संख्येने युवक विद्यार्थी उपस्थित होते.

पुणे, दि. १३: महात्मा ज्योतिबा फुले यांच्या २०० व्या जयंतीनिमित्त राज्य शासनाकडून विविध उपक्रमाचे आयोजन करण्याचा निर्णय घेतला आहे, याच पार्श्वभूमीवर भिडेवाडा राष्ट्रीय स्मारकाचे काम येत्या वर्षभरात पूर्ण करण्यात येईल, असे प्रतिपादन राज्याचे इतर मागास बहुजन कल्याण मंत्री अतुल सावे यांनी केले.

श्री. सावे यांनी आज भिडेवाडा राष्ट्रीय स्मारकाच्या कामाची पाहणी केली, यावेळी ते बोलत होते. यावेळी अतिरिक्त आयुक्त प्रजित नायर, अधीक्षक अभियंता बिपिन शिंदे, निलेश गिरमे, भिडेवाडा राष्ट्रीय स्मारक समितीचे अध्यक्ष अजय खेडेकर, पीएमपीएलचे अध्यक्ष तथा नगरसेवक प्रशांत डोके आदी पदाधिकारी उपस्थित होते.
श्री. सावे म्हणाले, क्रांतीसूर्य महात्मा फुले व क्रांतीज्योती सावित्रीबाई फुले यांच्या कार्याची माहिती नागरिकांना व्हावी, याकरिता राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि दिवंगत उपमुख्यमंत्री अजित पवार यांच्यासमवेत चर्चा करुन भिडेवाडा राष्ट्रीय स्मारकाचा विकास करण्यासाठी प्रयत्न करुन कामाची सुरुवात करण्यात आली होती. सद्यस्थितीत पुणे महानगरपालिकेच्या माध्यमातून स्मारकाचे काम वेगाने सुरू असून सध्याची ९० टक्के काम पूर्ण झाले आहे, या कामाबद्दल त्यांनी समाधान व्यक्त करत उर्वरित विकास कामे गतीने पूर्ण करण्याच्या सूचना यावेळी श्री. सावे यांनी अधिकाऱ्यांना दिल्या.

यावेळी श्री. नायर यांनी पुणे महानगरपालिकेच्यावतीने भिडेवाडा राष्ट्रीय स्मारक विकास आराखड्याच्या अनुषंगाने करण्यात येणाऱ्या कामांबाबत माहिती दिली.

इमारतीची वैशिष्ट्ये आणि सुविधा: स्मारकामध्ये सावित्रीबाई फुले आणि महात्मा फुले यांच्या जीवनावर आधारित विविध आधुनिक सुविधा असणार असून यामध्ये ऑडिओ-व्हिडिओ शो, दोन्ही महापुरुषांच्या जीवनचरित्रावर आधारित ‘थीम बेस्ड’ ऑडिओ-व्हिडिओ शो आणि होलोग्राफीचे काम करण्यात येणार आहे. या दोन्ही महापुरुषांचे अर्धपुतळे आणि त्यांच्या कार्याची माहिती प्रदर्शित केली जाणार आहे. मुली आणि महिलांसाठी कौशल्य विकास केंद्र, मार्गदर्शन केंद्र आणि संगणक केंद्र उभारले जाणार आहे. स्मारकात एक ॲम्फीथिएटर देखील असणार आहे.