पहिल्या टप्प्याचे केंद्रीय मंत्री राजनाथ सिंह यांच्या हस्ते लोकार्पण होणार

नामदार चंद्रकांतदादा पाटील यांची माहिती

पुणे- पर्वती टेकडीवरील श्रीमंत बाजीराव पेशवे आणि नानासाहेब पेशवे स्मारकाच्या विकासाचे काम समाधानकारक झाले असून, पहिल्या टप्प्यातील विकासकामांचे लोकार्पण केंद्रीय मंत्री राजनाथ सिंह यांच्या हस्ते करण्यात येईल, अशी माहिती राज्याचे उच्च व तंत्रशिक्षण आणि संसदीय कार्य मंत्री चंद्रकांतदादा पाटील यांनी आज दिली.

पुण्यातील पर्वती टेकडीवर बाजीराव पेशवे स्मारक आणि नानासाहेब पेशवे संग्रहालयाचा विकास व्हावा; यासाठी नामदार चंद्रकांतदादा पाटील आग्रही असून, जिल्हा नियोजन, आमदार निधी आणि लोकसहभागातून विकास करण्यात येत आहे. यामध्ये पर्वती टेकडीवरील श्रीमंत बाजीराव पेशवे यांच्या पुर्णाकृती पुतळा परिसराच्या सुशोभीकरणासह; भारताचा उज्वल इतिहास आणि पेशवे कालीन इतिहासावर आधारित भित्तीचित्रे साकारण्यात येत आहेत.

या सर्व कामाची पाहणी आज नामदार पाटील यांनी करून आढावा घेतला. यावेळी भाजप प्रदेश प्रवक्ते संदीप खर्डेकर, पेशव्यांचे वंशज पुष्कर पेशवे, देवदेवेश्वर संस्थाचे रमेश भागवत, शिल्पकार विवेक खटावकर आदी उपस्थित होते.

या पाहाणी नंतर माध्यमांशी संवाद साधताना नामदार चंद्रकांतदादा पाटील म्हणाले की, आठ महिन्यांपूर्वी पर्वती टेकडीच्या विकासाचा विषय समोर आला होता. श्रीमंत बाजीराव पेशवे स्मारक आणि नानासाहेब पेशवे स्मारक परिसराच्या सुशोभीकरणासाठी सादरीकरण देखील झाले होते. त्यानुसार पहिल्या टप्प्यातील कामांसाठी पालकमंत्री पदाच्या कार्यकाळात जिल्हा नियोजन आणि स्थानिक आमदार माधुरीताई मिसाळ यांच्या आमदार निधीतून भरीव निधी उपलब्ध करून दिला होता. यातील काही कामे शासनाच्या नियमात बसत नसल्याने सीएसआर निधीतून ती पूर्ण करण्यात आली. ही सर्व कामे अतिशय उत्तम दर्जाची झाली आहेत.

ते पुढे म्हणाले की, पहिल्या टप्प्यातील कामाचे केंद्रीय मंत्री राजनाथ सिंह यांच्या हस्ते लोकार्पण व्हावे, असा प्रयत्न आहे. तसेच, पुढील टप्प्यांचे देखील काम लवकरच सुरु करणार असून; कामांची यादी तयार करुन सादर करण्याच्या सूचना देवदेवेश्वर संस्थान आणि स्मारक विकास समितीला केली असल्याची माहिती त्यांनी यावेळी दिली

पुणे- माय मराठीचा जागर करण्यासाठी ९८ वे अखिल भारतीय मराठी साहित्य संमेलन दिल्ली येथे २१, २२ आणि २३ फेब्रुवारी रोजी संपन्न होत आहे. हा आपल्या अस्मितेचा आणि अभिमानाचा ऐतिहासिक साहित्यक्षण आहे.याच पार्श्वभूमीवर सरहद संस्थेच्या सीबीएससी शाळेमध्ये विविध उपक्रमांचे आयोजन केले जाते. त्यातीलच एक भाग म्हणून नाट्य प्रशिक्षण कार्यक्रमाचे आयोजन करण्यात आले होते .
नाटक म्हणजे कलाकाराच्या अंतःकरणाच्या सखोल गर्तेतून निर्माण होणाऱ्या भावनांच्या उत्तुंग लहरींच्या खळबळाटानं होणाऱ्या प्रयत्नांची वाटचाल. नाटक म्हणजे एक साधना आहे.नाट्य प्रशिक्षणाने व्यक्तिमत्व विकास होतो, तसेच अभिनय, नाट्य वाचन, काव्यवाचन,संवाद लेखन, सूत्रसंचालन,निवेदन, नृत्य आणि रंगमंचांशी निगडित विविध अंगाचे प्रशिक्षण व त्यातून व्यक्तिमत्व विकास साधण्याची संधी मिळते. अशा अनेक बाबींची माहिती विद्यार्थ्यांना या कार्यक्रमातून मिळाली.
कार्यक्रमासाठी प्रमुख अतिथी म्हणून लेखक दिग्दर्शक व नाट्य प्रशिक्षक देवेंद्र भिडे उपस्थित होते. प्रशिक्षण शिबिरातून मुलांमधील सुप्त अभिनय कलागुणांना योग्य वळण मिळते. मार्गदर्शन आणि प्रशिक्षणामुळे त्यांच्यातील कलाकार घडतो. नाटक करताना नाटकातील काही तांत्रिक गोष्टी माहित असणे आवश्यक आहे. नाटकाची सगळी अंगे शिकण्यासाठी सराव आवश्यक आहे. नाटकातील संवाद एकमेकांवर अवलंबून असतात. वाक्य आणि हालचाल यांचा समन्वय झाला पाहिजे. नाटकातील पात्र आणि विषय समजून घेऊन संवाद पाठांतर करणे आवश्यक आहे. आत्मविश्वास महत्त्वाचा. असे अनेक नाटकातील बारकावे
याविषयी विद्यार्थ्यांना मार्गदर्शन केले.
याप्रसंगी मुख्याध्यापिका कविता वानखेडे, पर्यवेक्षिका स्वाती राऊत उपस्थित होत्या. कार्यक्रमाचे सूत्रसंचालन सुनीता राहुल पवार यांनी तर आभार प्रदर्शन शितल सदामते यांनी केले.

पिंपरी, पुणे- महाराष्ट्राचे आद्य पत्रकार आचार्य बाळशास्त्री जांभेकर यांनी ६ जानेवारी १८३२ रोजी मराठीतील दर्पण हे पहिले वृत्तपत्र सुरू करुन मराठी पत्रिकारितेची मुहुर्तमेढ रोवली. दरवर्षी ६ जानेवारी पत्रकार दिन म्हणून साजरा केला जातो. त्यानिमित्त पिंपरी चिंचवड महानरपालिकेच्या पत्रकार कक्षात बाळशास्त्री जांभेकर यांच्या प्रतिमेस मराठी पत्रकार परिषदेचे उपाध्यक्ष गणेश मोकाशी व पिंपरी चिंचवड पत्रकार संघाचे अध्यक्ष अनिल वडघुले यांच्या हस्ते पुष्पहार अर्पण करून अभिवादन करण्यात आले.
यावेळी महापालिका जनसंपर्क अधिकारी प्रफुल्ल पुराणिक आणि पिंपरी चिंचवड शहरातील अनेक पत्रकार उपस्थित होते.
तसेच मराठी पत्रकार परिषदेच्या उपाध्यक्षपदी गणेश मोकाशी यांची नियुक्ती झाल्याबद्दल आणि महापालिका जनसंपर्क अधिकारी प्रफुल्ल पुराणिक यांचा विशेष सन्मान करण्यात आला. नाशिक येथे झालेल्या राज्यस्तरीय पुरस्कार वितरण कार्यक्रमात पिंपरी चिंचवड पत्रकार संघाचे विशेष कौतुक करण्यात आले त्यामुळे अध्यक्ष अनिल वडघुले यांना देखील पुष्पगुच्छ देवून सन्मानित करण्यात आले. यावेळी पत्रकार विनय सोनवणे, माऊली भोसले, रामकुमार शेडगे, सागर सूर्यवंशी, पराग डिंगणकर, अशोक कोकणे, संतोष गोतावळे, सचिन पाटील आदी उपस्थित होते.

पुणे :’जीविधा’ या पर्यावरण संवर्धन आणि जनजागृतीच्या क्षेत्रात कार्यरत संस्थेच्या वतीने  आयोजित ‘निर्मिती भारतभूमीची’  या प्रदर्शनाचे उदघाटन राज्यसभा खासदार डॉ.मेधा कुलकर्णी यांच्या हस्ते ९ जानेवारी २०२५ रोजी  सायंकाळी ६ वाजता झाले.

भूविज्ञान,भूगोल आणि  जैवविविधता बाबत योगदान देणाऱ्या डॉ.श्रीकांत कार्लेकर, डाॅ.संजीव नलावडे, प्रा.इरावती नलावडे यांचा  उदघाटन कार्यक्रमात  खा.डॉ.मेधा कुलकर्णी यांच्या हस्ते सत्कार करण्यात  आला.

दि.९ ते १२ जानेवारी २०२५  दरम्यान बालगंधर्व कलादालन(शिवाजीनगर) येथे हे प्रदर्शन आयोजित करण्यात आले आहे. ‘जीविधा’ च्या वतीने अध्यक्ष राजीव पंडित यांनी स्वागत केले. सौ.वृंदा पंडित यांनी प्रास्ताविक केले.

डॉ.मेधा कुलकर्णी म्हणाल्या,’जीविधा ‘ चे हे प्रदर्शन उपयुक्त, अभ्यासपूर्ण आहे.त्यातून सर्वांना प्रेरणा आणि दृष्टी मिळेल. पर्यावरण टिकले तर आपण टिकणार आहोत.रस्ता महत्वाचा की टेकडी महत्वाची, हे आपल्याला कळले पाहिजे. लहानपणापासून पर्यावरणाची शिकवण मिळाली पाहिजे. पृथ्वी बद्दल जाणून घेण्यासाठी अशा प्रदर्शनाचा उपयोग होणार आहे.शाळांमधून आपण अशी प्रदर्शन भरवली पाहिजेत. पुण्यात ९०० हून अधिक हेक्टर जैवविविधता पार्क  आरक्षण आहे,ते जपले पाहिजे.

‘शांतता,वृक्ष शोधायला शहराबाहेर जावे लागत आहे. म्हणून 

टेकडीफोड थांबवली पाहिजे.. मोठ्या आवाजात सण साजरे करण्याची सवय आपल्याला लागली आहेत. पक्ष्यांना त्रास होऊ नये, म्हणून रात्री आवाज करू नये,असे सांगीतले तर अनेकांना ते कळत नाही. निसर्गाची हानी करणे टाळले पाहिजे. छोट्या छोट्या गोष्टीतून शिकले पाहिजे’, असेही खा. कुलकर्णी यांनी सांगितले.

डॉ.श्रीकांत कार्लेकर म्हणाले,’शालेय वयात भूगोल सारख्या विषयात रुची निर्माण केली पाहिजे. विद्यार्थ्यांना प्रत्यक्ष पाहायला,अनुभवायला मिळाले पाहिजे. सहलीतून असे हेतू साध्य केले पाहिजेत.भू -वारसा जपला पाहिजे.या विषयाचे क्लब सुरु झाले पाहिजेत’.

उंची,तपमान,पर्जन्यमान यात प्रचंड विविधता असणाऱ्या भारतभूमीच्या निर्मितीचा प्रवास  भित्तीपत्रक स्वरूपात या प्रदर्शनात मांडण्यात आले आहे. याशिवाय महत्वाच्या भूवैज्ञानिक घटनांचे प्रारूपे (माॅडेल्स) व  नकाशे ठेवण्यात आले आहेत. यासोबत ‘माय अर्थ मिनरल्स’यांच्यातर्फे  भारतात आढळणारे खडक, खनिजे  व फाॅसिल्स यांचा संग्रह याच  प्रदर्शनात ठेवला   आहे. प्रदर्शनाचा मुख्य हेतू भूविज्ञान, भूगोल यामुळे जैवविविधता निर्माण करणे  आणि या तीनही बाबींची जपणूक करणे ,ही आपली जबाबदारी आहे ,याबाबत जनजागृती करणे, हा आहे.सकाळी ११ ते रात्री ८ या वेळात हे प्रदर्शन सर्वांसाठी मोफत खुले आहे.

भूविज्ञान, भूगोल आणि  जैवविविधता बाबत चे कार्य ताकदीने पुढे नेणाऱ्या डाॅ.श्रीकांत गबाले, हार्दिक संकलेचा व सौनीत सिसोळकर या तरुण संशोधकांना ‘ यंग अचिव्हर’ पुरस्काराने शनिवार,दि.११ जानेवारी रोजी  सायंकाळी ५  वाजता सन्मानित करण्यात येणार आहे.

पुणे-उपमुख्यमंत्री अजित पवार आज पुण्याच्या दौऱ्यावर आहेत. त्यांनी विविध कामांचा आढावा घेतला. सायंकाळी चारच्या सुमारास त्यांनी माध्यमांशी संवाद साधत कामांची माहिती दिली. यादरम्यान, पत्रकारांनी अजित पवारांना प्राथमिक आणि माध्यमिक शिक्षकांचे जानेवारी महिन्यातील पगार झाले नसल्याचे सांगितले. त्यानंतर अजित पवारांनी पत्रकार परिषद सुरू असतानाच अर्थ विभागाच्या सचिवांना फोन करून शिक्षकांच्या पगारासाठी झालेल्या दिरंगाईबाबत विचारणा केली.

अजित पवार म्हणाले, शासकीय कर्मचाऱ्यांचे पगार वेळेत झाले पाहिजे. त्याच्यात विलंब होण्याचे कोणतेही कारण असू नये. तरी देखील मी आता अधिकाऱ्यांना विचारतो. शिक्षकांचे पगार झाले नसतील, तर का झाले नाही? याबाबत विचारणा करतो आणि शिक्षकांचे पगार ताबडतोब कसे होतील, याबाबतची माहिती घेतो, असे सांगत असतानाचा त्यांनी संबंधित अधिकाऱ्यांना फोन फिरवला.

अजित पवार यांनी मंत्रालयातील सीपी ओ.पी. गुप्ता यांना फोन केला आणि शिक्षकांच्या चालू महिन्यातील पगाराबाबत विचारणा केली. आपण पगाराचे पैसे सगळ्या विभागांना उपलब्ध करून दिल्याचे संबंधित अधिकाऱ्यांनी अजित पवारांना सांगितले. प्रत्येक विभागात पगार देत असताना, काही त्रुटी किंवा संबंधित विभागाचा काही अंतर्गत प्रश्न निर्माण झाला असेल, असे एसीएस सांगितल्याचे उपमुख्यमंत्री पवार म्हणाले. त्यामुळे विभागाने सर्वांचे पैसे दिल्याचे स्पष्ट झाले आहे. शिक्षकांच्या पगाराबाबत सीपींशी बोलणे झाले आहे, आता शिक्षण सचिवांशी देखील मी बोलतो. यापुढे असा प्रकार होणार नाही, अशी खबरदारी घेतली जाईल, असेही अजित पवार म्हणाले.

अजित पवार यांनी या पत्रकार परिषदेत पुण्यातील विविध प्रश्नांवरही भाष्य केले. पुणेकरांचा वाहतुकीचा प्रश्न फार जटील बनला आहे. त्यामुळे आपल्याला यावर तोडगा काढण्याशिवाय गत्यंतर नाही. त्यामुळे मी यासंदर्भात सर्व अधिकाऱ्यांशी चर्चा केली आहे. पुन्हा एकदा बैठक होणार असून यात मी लोकप्रतिनिधींना देखील सामील करून घेणार असल्याचे अजित पवार म्हणाले. पीसीएमसी कमिशनरने देखील माझा वेळ घेतला होता, त्यात पिंपरी येथे काही चांगली कामे करण्यात आली आहेत, त्यासंदर्भात देखील मी चर्चा केल्याचे ते म्हणाले. याच सोबत पुण्यात गुन्हेगारी वाढत असून नवीन अधिकाऱ्यांची नियुक्ती करण्यात येणार, अशी माहिती देखील अजित पवार यांनी दिली.

आम आदमी पक्षाचा पाठपुरावा
पुणे:
दहा वर्षापूर्वी महापालिकेत समाविष्ट करण्यात आलेल्या धायरी नांदेडसह शहरा लगतच्या ३४ गावत दगड खडी,क्रेसेटची वाहतूक व बांधकाम प्रकल्पामुळे रस्त्यासह लोकवस्त्या, सोसायट्यांत दररोज धुळीचे लोट पसरत आहेत. त्यामुळे हवेची गुणवत्ता खालवली आहे.याबाबत पालिकेच्या आरोग्य,पर्यावरण व बांधकाम प्रशासनाने तातडीने योग्य कार्यवाही सुरू करावी अशी सूचना महाराष्ट्र प्रदुषण विकास महामंडळाचे उपप्रादेशिक अधिकारी कार्तिकेय लंगोटे यांनी दिल्या आहेत.
याबाबत पुणे शहर आम आदमी पक्षाचे शहराध्यक्ष धनंजय बेनकर यांनी प्रदुषण विकास महामंडळाचे लक्ष वेधले आहे.

दगड खाणींची वाहतूक व बांधकाम प्रकल्पामुळे शहरा सभोवतालच्या ३४ गावात धुळीचे कण, लोट पसरून हवेचे प्रदुषण वाढले आहेत. त्यामुळे रहिवासी, प्रवाशांना श्वसनाचे विकार तसेच इतर गंभीर आजारांना तोंड द्यावे लागत आहे . यास जबाबदार असलेल्या दोषींवर कठोर कारवाई करण्यात यावी अशी मागणी असल्याचे धनंजय बेनकर यांनी केली आहे.

आम आदमी पक्षाचे शहराध्यक्ष धनंजय बेनकर म्हणाले,बांधकाम प्रकल्प व खाणींचे दगड खडी क्रेसेटची वाहतूक करणाऱ्या वाहने ३४ गावातील रस्त्यांवर धूळीचे साम्राज्य पसरले आहे. हवेची गुणवत्ता खालावली आहे ‌. नागरिकांना आरोग्य समस्यांना सामोरे जावे लागत असून पर्यावरणाचा समतोल बिघडला आहे. जीवनमान खालावत चालले आहे.

या गावांतील फळबागांसह गार्डन, वृक्ष धुळीच्या लोटामुळे वाया चालली आहेत. अनेक वृक्ष पांढऱ्या धुळीने माखलेले आहेत तसेच शेतीतील भाजीपाला व इतर पिके धुळीमुळे वाया जात आहेत.वनविभागानेही याकडे दुर्लक्ष केले असल्याचे धनंजय बेनकर यांनी सांगितले ‌

हवेचे प्रदूषण रोखण्यासाठी पर्यावरण विभागाने २७ आॅक्टोबर २०२३ नियमावली केली आहे. त्यानुसार ३४ गावातील प्रदुषणाची पाहणी करून कार्यवाही करण्यात यावी अशा सूचना महाराष्ट्र प्रदुषण नियंत्रण महामंडळाने दिल्या आहेत.

पर्यावरण व प्रदुषण नियंत्रण महामंडळाच्या हालगर्जीपणामुळे पालिकेत समावेश होऊनही ३४ गावातील प्रदुषणाची पातळी कमी होण्या ऐवजी वाढली आहे. नागरिक वस्त्यां लगत दगड खाणी आहेत तसेच उघड्यावर मोठ मोठे बांधकाम प्रकल्प सुरू आहेत. त्यामुळे धुळीचे लोट प्रचंड प्रमाणात पसरत आहेत. श्वसनाचे विकार होऊन निष्पाप नागरिकांचे बळी जात आहेत..
यास जबाबदार असलेल्या विभागावर कठोर कारवाई करुनहवेतील प्रदुषण रोखण्यासाठी तातडीने योग्य त्या उपाययोजना सुरू कराव्यात दोषी अधिकारी,कर्मचाऱ्यांवर कठोर कारवाई करुन त्यांना नोकरीतुन बडतर्फ करण्यात यावे अन्यथा तीव्र जन आंदोलन सुरू करण्याचा निर्धार पुणे शहर आम आदमी पक्षाने केला आहे.

मिलिन्द सबनीस लिखित ‌‘कहाणी वन्दे मातरम्‌‍‌’ची पुस्तकाचे प्रकाशन

पुणे : इंग्रज राजवटीत भारत देशाविषयीच्या चुकीच्या आणि वाईट समजुती पसरविल्या गेल्या. स्वातंत्र्य चळवळीदरम्यान राष्ट्रवाद दाखविण्यासाठी तसेच भारत भूमी आपली माता आहे, या भावनेतून बंकीमचंद्र चट्टोपाध्याय यांनी वंदे मातरम्‌‍ची रचना केली. वंदे मातरम्‌‍ हे केवळ गीतच नव्हे तर स्वातंत्र्य युद्धकाळातील मंत्र होता, असे प्रतिपादन प्रसिद्ध लेखक, ब्रॅण्डिंग तज्ज्ञ अभिजित जोग यांनी केले.

वंदे मातरम्‌‍ सार्थ शति (150व्या) वर्षानिमित्त वंदे मातरम्‌‍चे अभ्यासक, लेखक, चित्रकार मिलिन्द प्रभाकर सबनीस लिखित ‌‘कहाणी वन्दे मातरम्‌‍‌’ची या पुस्तकाचा प्रकाशन सोहळा आज (दि. 9) आबासाहेब अत्रे दिन प्रशालेतील बालसाहित्यकार इंदिरा अत्रे वाचनकक्षात आयोजित करण्यात आला होता. पुस्तकाचे प्रकाशन विद्यालयातील विद्यार्थिनींच्या हस्ते झाले. त्या वेळी अभिजीत जोग अध्यक्षपदावरून बोलत होते. चित्रकार चंद्रशेखर जोशी, अत्रे प्रशाला व कनिष्ठ महाविद्यालयाचे प्राचार्य प्रवीण सुपे, कार्यक्रमाचे संयोजक संदर्भ ग्रंथपाल आणि माहिती तज्ज्ञ प्रसाद भडसावळे, शिल्पा सबनीस, प्रसाद कुलकर्णी, सुवासिनी जोशी, पियूष शहा, उत्तम साळवे उपस्थित होते. वंदे मातरम्‌‍ या गीताविषयीचे चित्ररूपी प्रदर्शन वाचनकक्षात भरविण्यात आले आहे.
ग्रंथ हे गुरूच नव्हे तर मित्रही असतात, असे सांगून जोग पुढे म्हणाले, वंद मातरम्‌‍ गीताच्या 150व्या वर्षानिमित्त शालेय विद्यार्थ्यांना वंदे मातरम्‌‍ या गीताचा इतिहास ‌‘कहाणी वन्दे मातरम्‌‍‌’ची या चित्रकथारूपी पुस्तकाद्वारे माहित होणार आहे. अतिशय सोप्या भाषेत चित्रांसहित निर्मित केलेले हे पुस्तक देशभरात पोहोचणार असून शाळेतील वाचनालये, ग्रंथालये यांचा ठेवा बनणार आहे. वाचनातून आनंद घ्या, ज्ञान वाढवा, ज्या योगे तुमचा व्यक्तीमत्त्व विकास होईल, असे विद्यार्थ्यांशी संवाद साधताना जोग म्हणाले.
मिलिन्द सबनीस म्हणाले, शाळेने विद्यार्थ्यांसाठी वाचनालय आणि ग्रंथालय उपलब्ध करून दिले आहे या विषयी आनंद आहे. पुस्तकाच्या निर्मितीविषयी बोलताना ते म्हणाले, भारताचा इतिहास घडविण्यात आणि बदलण्यात वंदे मातरम्‌‍ या गीताचा मोठा वाटा आहे. या गीताविषयीचा इतिहास चित्रकथारूपाने विद्यार्थ्यांपर्यंत पोहोचावा याकरिता या पुस्तकाची निर्मिती केली आहे. हे पुस्तक भारतातील 12 भाषांमध्ये भाषांतरीत होऊन त्या-त्या प्रांतातील विद्यार्थ्यांनाही वंदे मातरम्‌‍ची महती समजणार आहे. चित्रकथारूपी पुस्तके वाचताना मुलांना गोष्टीचे अकलन लवकर होते. चित्रांपासून पुढे जात जात विद्यार्थ्यांनी गोष्टीतील आषयाकडे वळावे, असेही ते म्हणाले.

कार्यक्रमाच्या प्रास्ताविका प्रसाद भडसावळे म्हणाले, स्व. प्रभाताई अत्रे यांना वंदे मातरम्‌‍ या गीताविषयी जिव्हाळा होता. त्यांचा प्रथम स्मृतिदिन, वंदे मातरम्‌‍ गीताचे 150वे वर्ष आणि सध्या सुरू असलेला वाचन पंधरवडा याचे औचित्य साधून पुस्तक प्रकाशन सोहळा आयोजित करण्यात आला. सूत्रसंचालन आणि मान्यवरांचा परिचय केशव तळेकर यांनी करून दिला.