विश्व हिंदू परिषद मातृशक्ती आणि दुर्गावाहिनीच्या वतीने  पुण्यश्लोक अहिल्याबाई होळकर आणि राणी दुर्गावती यांच्या  जयंतीनिमित्त आयोजन
पुणे:  विश्व हिंदू परिषद दुर्गावाहिनी आणि मातृशक्ती यांच्या वतीने पुण्यश्लोक अहिल्याबाई होळकर आणि राणी दुर्गावती यांना मानवंदना देण्यासाठी भव्य पथसंचलनाचे आयोजन करण्यात आले आहे. रविवार दिनांक २६ जानेवारी २०२५ रोजी दुपारी ४ वाजता, ज्ञानज्योती सावित्रीबाई फुले स्मारक येथून पथसंचलनाला सुरुवात होणार आहे, अशी माहिती संयोजिका प्रिया रसाळ आणि सोनाली नाथ यांनी पत्रकार परिषदेत दिली.
यावेळी दुर्गावाहिनी शक्ती साधना प्रमुख समृद्धी सराफ यांच्या सह अन्य पदाधिकारी उपस्थित होते.

 प्रिया रसाळ म्हणाल्या, भारतीय इतिहासात महत्त्वपूर्ण योगदान असणाऱ्या पुण्यश्लोक अहिल्याबाईंच्या जन्माला तीनशे वर्षे पूर्ण होणार आहेत,त्यांनी आपल्या साठी केलेले कार्य आणि महिला म्हणून समाजकार्यात दिलेले योगदान, मंदिराची,घाटाची स्थापना त्यांनी केली यातून  त्याची धर्माबाबत असणारे प्रेम,आणि त्याच्या हातात असणारे शिवलिंग हे सुध्दा आपल्याला त्यांची श्रध्दा दर्शवते.
यंदाच्याच वर्षी राणी दुर्गावती यांच्या जयंतीला पाचशे वर्षे पूर्ण होणार आहेत. राणी दुर्गावती या गोंडवाना क्षेत्राच्या राणी होत्या. राणी दुर्गादेवी यांचा इतिहास झाशीच्या राणी प्रमाणे आहे . त्या वीर रणांगना होत्या. त्यांनी अनेक वर्ष मुघलांबरोबर लढा दिला अशा या धर्मरक्षक ,शासक, धाडसी, आणि समाजसेवक विरांगना चा आदर्श समोर ठेवून त्याच्या कार्याला उजाळा देण्यासाठी तसेच ते संस्कार आपल्या भावी पिढीवर रुजवण्यासाठी आणि मुलींमध्ये शौर्य निर्माण करण्यासाठी मानवंदना पथसंचलन होणार आहे.

सोनाली नाथ म्हणाल्या, अश्याच प्रकारचे मानवंदना संचलन विश्व हिंदू परिषद दुर्गावाहिनी मातृशक्ती च्या माध्यमातून देश भरात होत आहे. पथसंचलनात सहभागी तरुणींसाठी पांढरा ड्रेस भगवी ओढणी तर महिलांसाठी भगवी साडी असा पोशाख ठरवण्यात आला आहे. राष्ट्रीयत्वाचा मान राखणारा तिरंगा आणि परमपवित्र भगवा ध्वज सोबत घेऊनच हे संचलन पार पडणार आहे. संचलन झाल्यानंतर राष्ट्रीय वक्ता ह.भ.प. कृतिका दीदी  कदम ह्या मार्गदर्शन करणार आहेत. 
ज्ञानज्योती सावित्रीबाई फुले सभागृह गंजपेठ-महात्मा फुले वाडा-मासे आळी-मिठगंज पोलीस चौकी-शितळादेवी चौक-जैन मंदिर चौक-सुभान शहा दर्गा चौक- रांका ज्वेलर्स-कस्तुरे चौक-श्रमदान मारुती मंडळ- क्रांतिवीर लहुजी वस्ताद साळवे तालीम मार्गे ज्ञानज्योती सावित्रीबाई फुले सभागृह येथे समारोप असा मानवंदना संचलन मार्ग आहे.

हा कार्यक्रम यशस्वी होण्यासाठी, विश्व हिंदू परिषदेचे प्रांत मंत्री किशोर चव्हाण तसेच अन्य कार्यकारणी, दुर्गावाहिनीच्या दुर्गा, मातृशक्तीच्या मातृ, पुणे पश्चिम आणि पूर्व विभागाचे पदाधिकारी, तसेच शहरातील असंख्य कार्यकर्ते परिश्रम घेत आहेत. पुणे शहरामध्ये अशा प्रकारचे हे बहुधा पहिलेच संचालन आहे. त्यामुळे स्त्रीशक्तीचा जागर आणि प्रदर्शन अनुभवण्याकरता पुणे शहरातील जास्तीत जास्त नागरिकांनी या संचलनात सामील व्हावे, असे आवाहन करण्यात आले.

पुणे– महापालिकेत गेल्या काही दिवसापासून रितसर सेवा प्रवेश नियम डावलले जात असल्याचे समोर येत आहे. विशेष म्हणजे महापालिकेतील वरिष्ठ अधिकारी देखील याला कुठलाही विरोध करत नाहीत. यामुळे मात्र महापालिकेच्या कर्मचाऱ्यांवर अन्याय होत असल्याचे चित्र आहे. अशा गोष्टीवर वेळीच तोडगा नाही काढला तर कर्मचाऱ्यांवर सातत्याने अन्याय होत राहील, अशी चर्चा आता महापालिका वर्तुळात सुरू आहे.

असाच प्रकार क्रीडा अधिकारी (वर्ग २) या पदावरून सुरू आहे. महापालिकेत याची दोन पदे रिक्त आहेत. या पदाच्या आकृतीबंध नुसार यातील एक जागा ही सरळसेवा किंवा नामनिर्देशन ने भरणे बंधनकारक आहे. तर एक जागा ही पदोन्नती ने भरणे बंधनकारक आहे. असे असताना देखील या दोन्ही जागा नामनिर्देशन अनुसार भरण्याचा घाट घातला गेला आहे.
राज्य सरकारने महापालिकेला आदेशित केले आहे की, शिवराज राक्षे आणि रेश्मा पुणेकर या दोघांना क्रीडा अधिकारी या पदावर नियुक्ती द्यावी. मात्र याला कर्मचारी निवड समितीने हरकत घेतली होती. नियमानुसार असे करता येणार नाही, त्यामुळे याबाबत राज्य सरकारनचे मार्गदर्शन घ्यावे, अशी शिफारस समितीने केली होती. मात्र प्रशासनातील वरिष्ठ अधिकाऱ्यांनी ही शिफारस लक्षात न घेता क्रीडा समिती आणि मुख्य सभेत या बाबतचा प्रस्ताव मान्य करून घेतला आहे.

यामुळे महापालिका कर्मचारी जे पदोन्नती मिळण्याची वाट पाहून आहेत, त्यांच्यावर होणार आहे. त्यांना आता आहे त्याच पदावर काम करावे लागणार आहे. पदोन्नती ची संधी त्यांच्या हातून निसटणार आहे. दरम्यान याबाबत कर्मचारी संघटनेने देखील विरोध केला होता, असे असताना देखील या नियुक्तीला मान्यता देण्यात आली आहे. प्रशासनाच्या या निर्णयावर कर्मचारी नाराज आहेत. कर्मचाऱ्यांनी कोर्टाची पायरी चढण्याची देखील तयारी केली आहे.

मानवी गुणांनी युक्त असणे हीच मानवाची खरी ओळख होय–सतगुरु माता सुदीक्षाजी महाराज

पिंपरी (पुणे) 24 जानेवारी, 2025 मनुष्य रुपात जन्म प्राप्त केल्यानंतर मानवीय गुणांनी युक्त असणे हीच मानवाची खरी ओळख होय असे उद्‌गार सतगुरु माता सुदीक्षाजी महाराज यांनी महाराष्ट्राच्या 58व्या वार्षिक निरंकारी संत समागमाध्या शुभारंभ प्रसंगी मानवतेच्या प्रति संदेश देताना व्यक्त केले.

या तीन दिवसीय संत समागमामध्ये महाराष्ट्राच्या कानाकोपऱ्यातून तसेच देश-विदेशातून लाखोंच्या संख्येने भाविक भक्तगण व प्रभुप्रेमी सज्जनांनी भाग घेतला आहे.सतगुरु माताजी यांनी पुढे सांगितले, की विज्ञान व तंत्रज्ञानाच्या आधारे सांसारिक उपलब्धिच्या बाबतीत मानवाने खूपच प्रगती आणि विस्तार केला आहे. जेव्हा सद्‌बुद्धीने युक्त होऊन या उपलब्धिचा वापर केला जातो तेव्हा तो निश्चितच मानवासाठी शांतीसुखाचे कारण बनतो. परंतु जर यांचा सदुपयोग केला नाही तर त्या उपलब्धी मानवासाठी नुकसानकारक ठरतात. ब्रह्मज्ञानाद्वारे जेव्हा परमात्म्याला जीवनात उत्तरविले जाते तेव्हा सहजपणेच मानवाला सुमती प्राप्त होते, त्याच्या मनातील आप पर भाव नाहीसा होतो आणि प्रत्येक मानवासाठी त्याच्या मनात परोपकाराचा भाव उत्पन्न होतो. मानवाने शुद्ध भावनेने या परमात्म्याला आपल्या हृदयामध्ये स्थान द्यावे ज्यायोगे प्रत्येक मानवाच्या प्रति त्याच्या मनामध्ये प्रेम व सेवेचा भाव उत्पन्न होऊ शकेल .

तत्पूर्वी आज सकाळी मिलिटरी डेअरी फार्मच्या विशाल मैदानांवर सतगुरु माता सुदीक्षाजी महाराज आणि आदरणीय निरंकारी राजपिता रमितजी यांच्या दिव्य आगमनाचे औचित्य साधुन श्रद्धालु भक्तांनी एका भव्य शोभायात्रेचे आयोजन केले ज्यामध्ये एका बाजुला भक्तांनी आपल्या हृदयसम्राट सद्गुरुंचे भावपूर्ण स्वागत केले तर दुसऱ्या बाजुला मिशनच्या शिकवणूकीवर आधारित महाराष्ट्र तसेच भारताच्या वेगवेगळ्या संस्कृतींचे अद्‌भूत मिलन दर्शविणान्या चित्ररथ स्वरूप कार्यक्रमांची सुंदर दृश्ये प्रस्तुत केली जी प्रेक्षकांच्या आकर्षणाचे कारण ठरली.

या शोभायात्रेत मिशनची विचारधारा आध्यात्मिकतेचे महत्व, मानव एकता व विश्वबन्धुत्वाच्या भावनेचा विस्तार आदि विषयावर प्रकाश टाकण्यात आला. त्यामध्यें विस्तार अनंताच्या दिशेने सदगुणांचा विस्तार ब्रह्माची प्राप्ति-भ्रमाची समाप्ती, प्रत्येक भाषा, प्रत्येक देशाचे सारे मानव आपलेच असती. सारे मिळून प्रेममय जग बनवुया, आपुलकीची भावना, खेळा आणि हसाही, नर सेवा, नारायण पूजा, स्वच्छ जल स्वच्छ मन इत्यादि प्रेरणादायक ठरले, या प्रस्तुती सादर करणा-यामध्ये महाराष्ट्राच्या पुणे, कोल्हापुर मुंबई, नाशिक, त्तातारा, धुळे, अहिल्या नगर, छत्रपती संभाजी नगर नागपुर, रायगड, सोलापुर तसेच इतर राज्यापैकी हैद्राबाद येथील भक्तगणानी भाग घेतला.

दिव्य युगुलाचे भव्य स्वागत

समागम स्थळावर आगमन होताच सतगुरु माता जी आणि आदरणीय निरंकारी राजपिताजी यांचे समागम समितीच्या सदस्यांनी व मिशनच्या अन्य पदाधिकाऱ्यांनी पुष्पमालांनी व पुष्पगुच्छ देऊन हार्दिक स्वागत केले. त्यानंतर दिव्य युगुलाला समागम मडपाच्या मधून मुख्य मंचापर्यंत एका फुलांनी सुसज्जित खुल्या वाहनातून नेण्यात आले. यावेळी उपस्थित भक्तगणानी धन निरकारच्या जयघोषानी आपला आनंद व्यक्त करत दिव्य युगुलाचे हात जोडून अभिवादन केले. सतगुरु माताजी आणि निरंकारी राजपिताजी यानी भाविक भक्तगणांच्या या भावनांचा सहर्ष स्वीकार केला आणि सुहास्य वदनाने त्यांना आपले आशीर्वाद प्रदान केले.

समर्थ भारत अभियान व श्रीमंत भाऊसाहेब रंगारी गणपती ट्रस्टकडून आयोजनपुणे ;

पुणे – समर्थ भारत अभियान आणि श्रीमंत भाऊसाहेब रंगारी गणपती ट्रस्ट पुणे यांच्या संयुक्त विद्यमाने आयोजित आंतरशालेय ’मनाचे श्लोक’ पाठांतर स्पर्धा 2025 चे पारितोषिक वितरण नुकतेच संपन्न झाले. या स्पर्धेत 110 विद्यार्थी विजयी झाले.पुण्यातील 28 शाळांमधील साडेचार हजार विद्यार्थ्यांनी या स्पर्धेमध्ये सहभाग घेतला. त्यातून 680 विद्यार्थी अंतिम फेरीसाठी निवडली गेले व त्यामधील 110 विद्यार्थी विजयी झाले. या स्पर्धेत नर्सरी ते दहावी असे गट तयार करण्यात आले होते, यासोबतच शिक्षक आणि पालक यांच्यासाठी देखील ही स्पर्धा होती, या पारितोषक वितरण समारंभाला प्रमुख पाहुणे म्हणून गीता धर्म मंडळाचे अध्यक्ष डॉ. मुकुंद दातार, समर्थ भारत अभियानाचे डॉ. राजीव नगरकर, श्रीमंत भाऊसाहेब रंगारी गणपती ट्रस्टचे अध्यक्ष संजीव जावळे यांच्यासह पालक व विद्यार्थी मोठ्या संख्येने उपस्थित होते. कार्यक्रमाचे सूत्रसंचालन योगिता तोडकर यांनी केले.

संबंधितांवर कठोर कारवाईच्या दिल्या सूचना

पुणे, : पुणे जिल्ह्यामधील मावळ तालुक्यातील एका निवासी आश्रम शाळेत दोन अल्पवयीन मुलांवर अत्याचार झाल्याची घटना नुकतीच उघड झाली आहे. या प्रकरणाची तात्काळ दखल घेत, अत्याचाराची सखोल चौकशी करून संबंधितांवर कठोर कारवाई करण्याचे निर्देश विधानपरिषद उपसभापती डॉ. नीलम गोऱ्हे यांनी शालेय शिक्षण व क्रीडा विभाग मंत्रालय सचिव, आदिवासी विकास विभाग सचिव, महिला व बालविकास विभाग सचिव, जिल्हाधिकारी पुणे आणि पोलीस अधीक्षक पुणे ग्रामीण यांना दिले आहेत.

कंत्राटी आरोपी शिक्षक जगदीश गोपाळ घोलप याने दोन अल्पवयीन मुलांवर लैंगिक अत्याचार केल्याप्रकरणी २१ जानेवारी २०२५ रोजी वडगाव, मावळ पोलीस स्टेशन येथे एफआयआर दाखल करण्यात आला आहे.

‘ही बाब अतिशय निंदनीय आहे. हलाखीची परिस्थिती असल्यामुळे शैक्षणिक कारणास्तव निवासी शाळांमध्ये राहणाऱ्या अल्पवयीन मुलांची सुरक्षा धोक्यात असल्याचे यातून निष्पन्न होते. अल्पवयीन मुलांच्या सुरक्षे संदर्भात कायदेशीर तरतुदींचे काटेकोर पालन अंमलबजावणी यंत्रणांमार्फत अत्यंत आवश्यक असल्याचे यातून अधोरेखित होते’, असे म्हणत उपसभापती डॉ. नीलम गोऱ्हे यांनी काही महत्त्वाच्या सूचनाही दिल्या आहेत.

सदर बाल लैंगिक अत्याचाराबाबत सखोल चौकशी करण्यात यावी व यातील दोषींवर पॉक्सो इत्यादी प्रचलित तरतुदीनुसार कडक कारवाई करण्यात यावी. त्याचबरोबर, या प्रकरणातील अल्पवयीन मुलांचे संरक्षण व समुपदेशन योग्य पद्धतीने करण्यात यावे. पुणे जिल्ह्यातील बालकल्याण समितीमार्फत सदर घटनेची दखल घेऊन आवश्यक कार्यवाही करण्यात यावी.

या प्रकरणी चार्जशीट मुदतीत दाखल करून अनुभवी व निष्णात सरकारी अभियोक्ता नियुक्त करून आरोपीस कठोर शिक्षा करण्याबाबत कार्यवाही करावी. तसेच, राज्यातील निवासी आश्रम शाळांमध्ये गुड टच बॅड टच बाबत मुलांना माहिती दिली जात असल्याची खातरजमा करावी. राज्यातील निवासी आश्रम शाळांमधील बाल लैंगिक अत्याचार विषयक घटना टाळण्यासाठी जिल्हा निहाय बाल कल्याण समित्या गठीत करण्यात आल्या आहेत याबाबत खातरजमा करण्यात यावी व त्यांचे योग्य संनियंत्रण करण्यात यावे याबाबत संबंधित विभागांना त्यांनी निर्देश दिले आहेत