मनीषा नृत्यालयाच्या सुवर्णमहोत्सवी वर्षानिमित्त आयोजन*
पुणे :भारतीय शास्त्रीय आणि आशियाई पारंपरिक कलांचा मोहक संगम असणाऱ्या ‘डिव्हाईन कॉन्फ्लुएन्स २०२५’ या मनीषा नृत्यालय आयोजित कार्यक्रमाला गणेश कला क्रीडा मंच  येथे चांगला प्रतिसाद मिळाला.या भव्य सांस्कृतिक कार्यक्रमाने उपस्थितांची मने जिंकली.कार्यक्रमाचे आयोजन ज्येष्ठ नृत्यगुरु पं.मनीषा साठे यांच्या मनीषा नृत्यालयाच्या सुवर्णमहोत्सवी वर्षानिमित्त करण्यात आले होते. कथक नृत्याच्या प्रशिक्षण व प्रसार क्षेत्रात या संस्थेने दिलेल्या पाच दशकांहून अधिक योगदानाचा गौरव या निमित्ताने करण्यात आला.

या वेळी कोरियन फॅन डान्स, ड्रॅगन डान्स, हेवन लेडी आणि चायनीज स्टिक डान्स यांसारख्या आशियाई पारंपरिक नृत्यप्रकारांनी रसिक भारावले. आशियातील विविध संस्कृतींच्या रंगांची उधळण करत कार्यक्रमाने सीमोलंघन केले. खास या  सोहळ्यासाठी जपानहून भारतात दाखल झालेल्या  ताकिमोतो यांची कन्या हागोरोमो ताकिमोतो हिने ‘ओ दायको’ म्हणून संबोधल्या जाणाऱ्या जपानी ड्रमचे एकल वादन अतिशय लीलया केले. तिच्या वादनातील जोश,वेग आणि सहजता पाहून प्रेक्षक स्तिमित झाले.कार्यक्रमातील  आकर्षण ठरले ‘नृत्यधारा’ हे भावस्पर्शी कथक सादरीकरण. यामध्ये गुरु मनीषा साठे,त्यांची कन्या शांभवी दांडेकर,सून तेजस्विनी साठे आणि नात सर्वेश्वरी साठे व आलापी जोग-अशा तीन पिढ्यांतील पाच नृत्यांगनांनी एकत्र सादरीकरण करत पारंपरिकतेचा आणि कौटुंबिक वारशाचा अनोखा संगम प्रेक्षकांसमोर मांडला.

या कार्यक्रमासाठी  उच्च व तंत्रशिक्षण मंत्री चंद्रकांत पाटील,ज्येष्ठ नृत्यांगना डॉ.सुचेता भिडे-चापेकर,शमा भाटे,भारतीय जनता पार्टीचे प्रदेश  उपाध्यक्ष  राजेश पांडे ,भारतीय जनता पक्षाचे पुणे शहर सरचिटणीस पुनीत जोशी  हे मान्यवर आवर्जून उपस्थित होते. मंचावर त्यांचा सन्मान केला गेला.नृत्य गुरु पं. मनीषा साठे यांनी या प्रसंगी आपले मनोगत व्यक्त केले. त्या म्हणाल्या,’ सर्जनशीलता , परंपरा आणि नवतेचा मेळ साधणारी प्रतिभा पुढे आली पाहिजे .  दोन  वेगळ्या देशातील कलांचा संगम साधताना त्यामागे कमालीची मेहनत आणि कलाकाराने घेतलेला उत्तमाचा ध्यास  असतो’.  यापुढील काळात हे मोठमोठे जपानी ड्रम्स सुरक्षितपणे ठेवता यावेत म्हणून जागा उपलब्ध करून देण्यासाठी पुणेकरांनी पुढे यावे असे आवाहन मनीषा साठे यांनी या प्रसंगी केले. हजारो उपस्थितांपैकी दिलदार व्यक्ती नक्की अशी जागा देऊ करतील असा विश्वास त्यांनी व्यक्त केला.सूत्रसंचालन  स्वानंद पटवर्धन यांनी केले. कार्यक्रमासाठी पुण्यातून आणि पुण्याबाहेरून अनेक  नर्तक आवर्जून उपस्थित राहिले होते.

‘डिव्हाईन कॉन्फ्लुएन्स २०२५ :एक अभूतपूर्व कलाविष्कार !

१९९१ सालापासून गुरु मनीषा साठे या  जपानी संगीतज्ञ  यासुहितो ताकिमोतो यांच्यासह जपानी आणि भारतीय संगीतक्षेत्रात उत्कृष्ट दर्जाचे काम करत आहेत, ज्याचा रसास्वाद जपानी, भारतीय आणि जगभरातील प्रेक्षकांनी वेळोवेळी अनेक दिमाखदार सोहळ्यांमधून घेतलेला आहे.

‘डिव्हाईन कॉन्फ्लुएन्स २०२५’ कार्यक्रमाची सुरुवात पं. मनीषा साठे, त्यांची कन्या शांभवी दांडेकर, स्नुषा तेजस्विनी साठे, नात सर्वेश्वरी साठे आणि आलापी जोग यांच्या त्रिदेववंदनेने झाली आणि वातावरण मंगलमय झाले.हागोरोमो ताकिमोतो हिने ‘ओ दायको’ म्हणून संबोधल्या जाणाऱ्या जपानी ड्रमचे एकल वादन अतिशय लीलया केले. तिच्या वादनातील जोश, वेग आणि सहजता पाहून प्रेक्षक स्तिमित झाले. त्यानंतर आडा चौताल हा अनवट ताल गुरु मनीषा साठे आणि कलावतींनी तायको वादनाच्या साथीवर प्रस्तुत केला. आश्चर्य म्हणजे जपानी तायको ड्रमचे वादनही मनीषाताईंच्या शिष्या अदिती कुलकर्णी आणि प्राजक्ता द्रविड या करत होत्या. तालाचे बारकावे, रचनांचे सौंदर्य हे नृत्यातून आणि वादनातून तितक्याच प्रभावीपणे प्रकट होत होते त्यामुळे ही अप्रतिम प्रस्तुती संपूच नये अशीच प्रेक्षकांची भावना होती !

जपानी किमोनो परिधान केलेल्या युवती जेव्हा कोरियन फॅन्स  घेऊन मंचावर अवतरल्या तेव्हा त्यांच्या नृत्य लालित्याने रसिकांना जिंकून घेतले.त्यानंतर विविध प्रकारचे जपानी ड्रम्स एकाच वेळी मंचावर स्थानापन्न करण्यात आले आणि त्या प्रत्येकाची खासियत मनावर कोरली जाईल असे बहारदार वादन मनीषाताईंच्या शिष्यांनी केले. मिथिला भिडे हिने मनीषा ताईंच्या मार्गदर्शनाखाली ह्या संरचनेचे दिग्दर्शन केले होते. क्युबिकल  तायकोसेट मध्ये एकावेळी १२ तायकोंचे वादन करणे, त्यातील अवधान आणि डौल सांभाळणे, हे आव्हान वादकांनी उत्तम पेलले. उभ्या आणि आडव्या दिशेतील ड्रम्सचे वादन केवळ श्रवणीय नाही तर अत्यंत प्रेक्षणीयही होते.

कार्यक्रमाच्या उत्तरार्धाची सुरुवात ‘संयुज’ या  रचनेने झाली. त्याचे वैशिष्ट्य असे की फ्रेंच संगीतकार रावेल याच्या ‘बोलेरो’ या  रचनेला भारतीय संगीत साज चढवून कथक नृत्यांगनांनी तो सादर केला.संरचना अर्थातच गुरु मनीषा साठे यांची होती. कलासंगमाची ही छटा फारच सुंदर भासली.त्यानंतरच्या रचनेत सतारीच्या संगीताला जपानी संगीताची जोड देऊन त्यावर केलेले तायको ड्रमचे वादन तर केवळ लाजवाब झाले. ही रचना,कथक नर्तिका थेट जपानला जाऊन ताकिमोतो यांच्याकडून प्रत्यक्ष शिकून आल्या होत्या.जपान देशात देवतेचे स्थान असलेला ड्रॅगन आणि मांगल्याचे प्रतीक असणाऱ्या हिवन लेडी चे नृत्य नेत्रदीपक होते. रंगीबेरंगी लांबसडक स्कार्फ  च्या, नृत्यातून उमटणाऱ्या चित्राकृती जितक्या मोहक तितक्याच कौशल्यपूर्ण होत्या.तेजस्विनी साठे यांनी आपल्या ‘टॅन्झ अकॅडमी ‘च्या शिष्यांसमवेत सादर केलेला ‘त्रिवट’ म्हणजे दर्जेदार संगीत, रेखीव नृत्यसंरचना म्हणजे रंगमंचीय अवकाशाला जिवंत करणारी ऊर्जा यांचे प्रतीक!

कार्यक्रमाची सांगता ‘मेलांज’ या आगळ्या रचनेने झाली. कथकची देहबोली प्रतिबिंबित करणारे डौलदार तायको वादन आणि ड्रम्सच्या गगनभेदी ध्वनीला पूरक असे जोशपूर्ण नर्तन यामुळे ही मैफल रंगली.त्यातही प्रस्तुतीचा कळस गाठला तो स्वतः गुरु मनीषा साठे यांनी केलेल्या तायको वादनाने!रसिकांनी भरभरून दिलेली दाद ही त्यांना दिलेली मानवंदनाच होती.

राष्ट्रीय स्वयंसेवक संघाचे सरसंघचालक मोहन भागवत, पद्मभूषण डॉ.शां.ब.मुजुमदार यांची प्रमुख उपस्थिती

पुणे : आयुर्वेद, समाजसेवा, संशोधन आणि राष्ट्रीय स्वयंसेवक संघाच्या माध्यमातून विविध क्षेत्रात मोलाचे कार्य करणारे आयुर्वेद भास्कर कै. वैद्य परशुराम य. वैद्य खडीवाले तथा दादा यांच्या उत्तुंग जीवनकार्याच्या आढावा घेणा-या चरित्रग्रंथाचा प्रकाशन सोहळा पुण्यात आयोजित करण्यात आला आहे. ‘दर्शन योगेश्वराचे – आयुर्वेद भास्कर प.य. तथा दादा वैद्य खडीवाले’ या चरित्रग्रंथाचे प्रकाशन शुक्रवार, दिनांक २७ जून रोजी सायंकाळी ५.३० वाजता बालगंधर्व रंगमंदिर येथे होणार आहे, अशी माहिती आयोजक वैद्य विनायक परशुराम वैद्य खडीवाले यांनी पत्रकार परिषदेत दिली.

पत्रकार परिषदेला संगीता विनायक वैद्य खडीवाले, निखिल विनायक वैद्य खडीवाले आदी उपस्थित होते.

चरित्रग्रंथाचे प्रकाशन राष्ट्रीय स्वयंसेवक संघाचे सरसंघचालक मोहन भागवत यांच्या हस्ते होणार असून सिंबायोसिस आंतरराष्ट्रीय विद्यापीठाचे कुलपती पद्मभूषण डॉ. शां.ब.मुजुमदार यांची प्रमुख उपस्थिती असणार आहे. पुण्यासह संपूर्ण महाराष्ट्रातील आयुर्वेद, संशोधन आणि राष्ट्रीय स्वयंसेवक संघाशी निगडीत मान्यवर कार्यक्रमाला उपस्थित राहणार आहेत.

वैद्य विनायक वैद्य खडीवाले म्हणाले, सर्वच क्षेत्रातील नवीन पिढीला दादांच्या उत्तुंग व्यक्तिमत्वाचा आणि बहुआयामी कायार्चा परिचय व्हावा, याउद्देशाने हा चरित्रग्रंथ साकारण्यात आला आहे. याद्वारे त्यांच्यासमोर एक खरा आदर्श साकारावा, असा आमचा उद्देश आहे. आयुर्वेद, समाजसेवा, संशोधन यांसह जनकल्याण रक्तपेढी, जनकल्याण नेत्रपेढी, हरी परशुराम औषधालय कारखाना व दवाखाना, निराधार मुलांकरता आधार केंद्र, सावित्रीबाई फुले पुणे विद्यापीठामध्ये औषधी वनस्पती उद्यान उभारणी, निराधार महिलांकरता वंदनीय ताई आपटे महिला विकास प्रतिष्ठान अशा अनेक संस्थांची उभारणी दादांनी केली आहे. त्यांनी आयुर्वेद व रा. स्व. संघाविषयी च्या १०० च्या पेक्षा जास्त पुस्तके लिहिली. विविध क्षेत्रात दादांचे मोठे कार्य आहे. ते यामाध्यमातून समाजासमोर आणण्याचा प्रयत्न असल्याचे त्यांनी सांगितले.

संगीता विनायक वैद्य खडीवाले म्हणाल्या, बीड सह पुणे जिल्ह्यामध्ये विविध १२५ ठिकाणी दादांनी मोफत आरोग्य शिबिरे आयोजित करून १ लाखाहून अधिक रुग्णांना आरोग्य सेवा दिली आहे. तसेच ठाणे जिल्ह्यातील पालघर तालुक्याच्या पुढे देवबांध या ग्रामीण भागात मोठ्या प्रमाणात सर्व डोंगर हिरवे करण्यासाठी दादांनी मोहीम हाती घेतली होती. याशिवाय वैद्य ग्रंथ भांडार, महर्षी अण्णासाहेब पटवर्धन वैद्यकीय पुरस्कार, आयुर्वेद प्रचारक व हिंदू तनमन, विश्व वैद्य संमेलने, अन्नकोट प्रदर्शने असे अनेक उपक्रम देखील दादांनी राबवले. मनपा कोटणीस दवाखान्यात एचआयव्ही एड्स करीता ३० वर्षे त्यांनी मोफत रुग्णसेवा दिली. तब्बल ४० वर्षे त्यांनी गुरुकुल पद्धतीने विनामूल्य आयुर्वेद प्रशिक्षण वर्ग घेतले. त्यांच्या कार्याची महती सांगणारा हा चरित्रग्रंथ ३२० पानांचा आहे. हा चरित्र ग्रंथ प्रकाशन कार्यक्रम सर्वांसाठी विनामूल्य खुला असून मोठया संख्येने सहभागी व्हावे, असे आवाहन त्यांनी केले.

पुणे : समाजात शिक्षण हा परिवर्तनाचा खरा पाया आहे. गरजू विद्यार्थ्यांना शैक्षणिक मदत करून त्यांना प्रगतीची संधी देणे हे अत्यंत महत्वाचे काम आहे. विद्यार्थ्यांना शिक्षणाच्या वाटचालीत अशी छोटी-मोठी मदत मिळणे ही काळाची गरज आहे. अशा सामाजिक उपक्रमांमुळे समाजात सकारात्मकता निर्माण होते आणि सेवा भाव वाढीस लागतो. श्री वेताळबाबा मंदिर ट्रस्ट व जय भवानी मित्र मंडळ यांचे हे कार्य निश्चितच प्रेरणादायी आहे, असे प्रतिपादन श्री देवदेवेश्वर संस्थानचे मुख्य विश्वस्त रमेश भागवत यांनी व्यक्त केले.

शिवकालीन श्री वेताळ मंदिराचे श्री वेताळ बाबा मंदिर ट्रस्ट आणि जय भवानी मित्र मंडळ पर्वती यांच्या वतीने गरजू ५०३ विद्यार्थ्यांना मोफत वह्यांचे वाटप करण्यात आले. हा उपक्रम गेल्या २४ वर्षांपासून सातत्याने राबवला जात असून, दरवर्षी गरजू विद्यार्थ्यांना शैक्षणिक साहित्य दिले जाते. पर्वती पायथा येथील शिवकालीन वेताळ बाबा मंदिराशेजारी कार्यक्रमाचे आयोजन करण्यात आले होते. या उपक्रमासाठी प्रमुख पाहुणे म्हणून  रमेश भागवत उपस्थित होते. ट्रस्टचे अध्यक्ष किशोर ठाकूर यांच्या मार्गदर्शनाखाली वह्यांचे वितरण करण्यात आले.

यावेळी हेमंत भाटी, अमोल हुबरे, निवास गाडेकर, आनंद भाटी, भरत आरगडे आदी मान्यवर उपस्थित होते. समाजातील वंचित विद्यार्थ्यांना शैक्षणिक मदत करण्याचा हेतू या उपक्रमामागे असून, वर्षभर विविध समाजोपयोगी कार्ये ट्रस्ट आणि मंडळाकडून राबवली जातात.

रमेश भागवत म्हणाले, पर्वती पायथा परिसरातील मुलांसाठी श्री देवदेवेश्वर संस्थान च्या वतीने मोफत मल्लखांब प्रशिक्षण वर्ग देखील सुरू करण्यात आला आहे, त्याला देखील मुलांनी चांगला प्रतिसाद दिला आहे.

किशोर ठाकूर म्हणाले, शिक्षण हे प्रत्येक मुलासाठी मूलभूत गरज आहे. गरजू मुलांना शैक्षणिक साहित्य मिळावे यासाठी आमचा हा छोटासा प्रयत्न आहे. समाजाने एकत्र येऊन अशा उपक्रमांत सहभाग घेतला, तर अधिक विद्यार्थ्यांपर्यंत मदत पोहोचू शकते.

पुण्यातील निरंजन सेवाभावी संस्थेचा उपक्रम ; दुष्काळग्रस्त बीड सह अहिल्यानगर आणि पुणे जिल्हयातील विद्यार्थ्यांचा समावेश ; क्लिन सायन्स अ‍ँड टेक्नॉलॉजीचे विशेष सहकार्य

पुणे : केवळ पैशाअभावी शिक्षणापासून वंचित राहणा-या महाराष्ट्रातील २५०० विद्यार्थ्यांचे शैक्षणिक पालकत्व पुण्यातील निरंजन सेवाभावी संस्थेने घेतले आहे. दुष्काळग्रस्त बीड सह अहिल्यानगर आणि पुण्यासह आजूबाजूच्या ग्रामीण भागात शिक्षणाची ज्योत प्रज्वलित करुन गरजू  व गरीब मुलांचे शैक्षणिक पालकत्त्व घेण्याचे कार्य संस्था अनेक वर्षे करीत आहे. याअंतर्गत पुणे आणि परिसरातील १५०० विद्यार्थ्यांना शैक्षणिक किट प्रदान कार्यक्रम शनिवार, दिनांक २८ जून रोजी सकाळी ९ वाजता स्वारगेटजवळील गणेश कला क्रीडा मंच येथे होणार आहे, अशी माहिती संस्थेचे अध्यक्ष डॉ. नवनीत मानधनी यांनी पत्रकार परिषदेत दिली.

पत्रकार परिषदेला संस्थेचे सचिव सीए दुर्गेश चांडक,वैभव लामतुरे, भारत वेदपाठक आदी उपस्थित होते.

सीए दुर्गेश चांडक म्हणाले, शैक्षणिक किट प्रदान कार्यक्रमाला तौरल इंडिया चे संचालक भरत गीते हे प्रमुख पाहुणे म्हणून उपस्थित राहणार आहेत. तसेच क्लिन सायन्स अ‍ँड टेक्नॉलॉजीचे कार्यकारी संचालक कृष्णकुमार बूब, राष्ट्रीय खो खो खेळाडू व म्हाडा अधिकारी संजय नाईक, महसूल प्राधिकरण सदस्य राजेंद्र क्षीरसागर, महाराष्ट्र बॉयलर विभागाचे संचालक संदीप चिवटे, संगम कृषी सेवा संस्थेचे चेअरमन दिलीप शिंदे आदी मान्यवर उपस्थित राहणार आहेत. 

शैक्षणिक किट मध्ये १६ प्रकारच्या वस्तू असून या प्रत्येक विद्याथ्यार्ला देण्यात येणार आहेत. यामध्ये सॅक, छत्री, भूमिती बॉक्स, टोपी, पॅड, पेन्सिल बॉक्स, डबा, रजिस्टर, चित्रकला वही, एकेरी वह्या – २०० पानी व ५२ पानी, दुरेघी वह्या – ५२ पानी, पाण्याची बाटली, बॉल पेन, रंगीत पेन अशा वर्षभर पुरेल अशा वस्तूंचा समावेश आहे.

चिमुकल्यांच्या आयुष्यात शिक्षणाचा प्रकाश पडावा आणि भविष्याच्या वाटा उज्ज्वल व्हाव्या, याकरीता संस्थेने बीडमधील दुष्काळग्रस्त व आत्महत्याग्रस्त शेतक-यांच्या मुलांचे शैक्षणिक पालकत्व घेण्याच्या उपक्रमाला २०१२ साली सुरुवात केली. त्यानंतर पुणे, रायगडसह तोरणा, लोहगड, तुंग मधील व मुळशीतील नांदगाव मधील जिल्हा परिषदेच्या शाळांतील विद्यार्थ्यांचे शैक्षणिक पालकत्व स्विकारले. त्यापाठोपाठ जम्मू-काश्मिरमधील आणि अहिल्यानगर मधील गरजू विद्यार्थ्यांना यामध्ये समाविष्ट करुन घेण्यात आले.

सामाजिक बांधिलकी म्हणून मदत देण्यास अनेकजण इच्छुक असतात, परंतु त्यांना योग्य व्यासपीठ आणि दिशा मिळणेही तितकेच गरजेचे आहे. लहान मुलांचे शाळेत जाऊन शिकण्याचे आणि खेळण्याचे वय असूनही केवळ पैशाअभावी शिक्षण घेता येत नसल्याची परिस्थिती अनेक ठिकाणी आहे. त्यामुळे निरंजन सेवाभावी संस्थेच्या माध्यमातून अशा विद्यार्थ्यांना शैक्षणिक किट प्रदान केले जाते. यावर्षी महाराष्ट्रातील ७५ हून अधिक शाळा व संस्थांतील विद्यार्थ्यांचा या उपक्रमात समावेश करण्यात आल्याचे संस्थेतर्फे सांगण्यात आले.

महावितरणचे संचालक (मानव संसाधन) राजेंद्र पवार यांचा सन्मान सोहळा

पुणे, दि. २३ जून, २०२५ : कंपनीहित व ग्राहकहिताचा विचार व ‘व्हिजन @२०५०’ डोळ्यासमोर ठेवून पायाभूत विकासकामे केल्याने मला पुणे परिमंडलात यशस्वीपणे काम करता आले. अर्थातच याकामी वरिष्ठांचे सहकार्य व माझ्या सर्व अभियंते, वीज कर्मचाऱ्यांची साथ मिळाली म्हणूनच मला ग्राहकांची सेवा करणे शक्य झाले असल्याचे प्रतिपादन पुणे परिमंडलाचे तत्कालिन मुख्य अभियंता व महावितरणचे नूतन संचालक (मानव संसाधन) राजेंद्र पवार यांनी केले. महावितरण पुणे परिमंडलातर्फे शनिवारी (दि. २१) भोसरी येथे आयोजित सन्मान सोहळ्यास उत्तर देताना ते बोलत होते.

व्यासपीठावर महावितरणचे पुणे प्रादेशिक संचालक भूजंग खंदारे, मुख्य अभियंता सुनील काकडे, हभप पंकज महाराज गावडे, अधीक्षक अभियंते ज्ञानदेव पडळकर, सिंहाजीराव गायकवाड, युवराज जरग, अमित कुलकर्णी, विजयानंद काळे, संजीव नेहते व अनिल घोगरे आदींची उपस्थिती होती.

पुढे बोलताना राजेंद्र पवार म्हणाले, ‘शंभर टक्के वीजबिल वसुलीसह, वीज कनेक्शन वाढविण्यावर मी भर दिला. दोन वर्षांत ४.५ लाखांहून अधिक वीज कनेक्शन दिले. त्यामुळे महसूल वाढला. १ टक्का वितरण हानी कमी झाली. सोलारचे ६० मेगावॅटचे प्रकल्प पूर्ण केले. भविष्यातील पुणे शहराची वाढती विजेची मागणी पूर्ण करण्यासाठी २१ अतिउच्चदाब उपकेंद्राचा प्रस्ताव तयार केला. त्यातील ८ मंजूर झाली असून, इतरही होतील. औद्योगिक ग्राहकांना चांगली सेवा देण्यासाठी योजना तयार केली. १८ ठिकाणी ईव्ही चार्जिंग स्टेशन चालू केली. यावरच मी थांबलो नाही. तर प्रत्येक वीज कर्मचाऱ्यांपर्यंत पोहोचण्याचा प्रयत्न केला. त्यांच्या कलागुणांना प्रोत्साहन दिले. त्यातूनच प्रतिक वाईकर सारखा प्रतिभावान खेळाडू देशाला मिळाला. त्याच्या नेतृत्वाखाली पहिलाच खो-खो वर्ल्डकप भारताने जिंकला. याचा मला अभिमान आहे. कंपनीची प्रतिमा उंचावण्यासाठी मी जे-जे काही करता येईल ते केले. ग्राहकाला वीज अभियंता किंवा कर्मचाऱ्यांकडून फार मोठी अपेक्षा नसते. त्यासाठी फार छोट्या छोट्या गोष्टी कराव्या लागतात. त्या मी केल्या. त्यामुळे ग्राहक-महावितरण व माझे एक घट्ट नाते तयार झाले.’

हभप पंकज महाराज गावडे म्हणाले, ‘समर्पण व निरपेक्ष प्रेमातून आत्मिक आनंद मिळत असतो. पवार यांनी याच भावनेतून नाविन्यपूर्ण योजना राबवून बदल घडविण्याचे धाडस दाखविले. त्यांच्यामुळे इतरांच्या आयुष्यातही सकारात्मक बदल घडले असून, महावितरणचा इतिहास जेंव्हा लिहला जाईल तेंव्हा राजेंद्र पवार यांचा उल्लेख आवर्जून करावा लागेल.

मुख्य अभियंता सुनिल काकडे म्हणाले, ‘राजेंद्र पवार साहेबांचे व्यक्तिमत्व फार संघर्षातून तयार झाले आहे. त्यांच्या अनुभवाचा पुणे परिमंडलास फायदा झाला आहे. तर अध्यक्षीय भाषणात प्रादेशिक संचालक भूजंग खंदारे यांनी सांगितले की,, ‘राजेंद्र पवारांनी माणसं वाचली, समजून घेतली. तसेच इथपर्यंतच्या प्रवासात त्यांनी नितिमूल्य ढळू दिले नाही. हे त्यांचे वैशिष्ट्य असून, ते एक प्रयत्नवादी व मेहनती व्यक्तिमत्व आहेत.’

याप्रसंगी राजेंद्र पवार यांच्या महावितरणमधील आजवरच्या प्रवासावर तयार करण्यात आलेली चित्रफित दाखविण्यात आली. यातून त्यांच्या व्यक्तिमत्वाचे अनेक पैलू उपस्थितांसमोर आले. सूत्रसंचालन दिपश्री सरोदे व ऐश्वर्या वस्त्रद यांनी केले तर कार्यकारी अभियंता सोमनाथ मुंडे यांनी आभार मानले. कार्यक्रमाला महावितरणच्या अधिकारी, कर्मचाऱ्यांची मोठी उपस्थिती होती.

राजेंद्र पवार यांची ‘पुस्तक तुला‘

संचालक राजेंद्र पवार हे सर्वव्यापी व्यक्तिमत्व आहे. त्यांना पुस्तकांचाही छंद आहे. लेखक, साहित्यिक यांच्याशाही त्यांचे तितकेच चांगले संबंध आहेत. त्यामुळे पुणे परिमंडलाने वाढदिवसाच्या निमित्ताने राजेंद्र पवार यांची ‘पुस्तक तुला’ केली. यातील सर्व पुस्तके वाचनालयास भेट स्वरुपात दिली जाणार आहेत.

‘नाते प्रकाशाचे’ पुस्तकाचे प्रकाशन

महावितरणचे संचालक (मानव संसाधन) राजेंद्र पवार यांच्या पुणे येथील मुख्य अभियंता पदाच्या कार्यकाळातील कामगिरीवर आधारित व उपमुख्य जनसंपर्क अधिकारी निशीकांत राऊत लिखित ‘नाते प्रकाशाचे !’ या पुस्तकाचे प्रकाशनही या सन्मान सोहळ्यात मान्यवरांच्या हस्ते झाले.

आंतरराष्ट्रीय कृष्णभावनामृत संघ – इस्कॉन, पुणे यांच्यातर्फे आयोजन ; यंदा तब्बल १ लाख भाविकांना मिळणार महाप्रसाद

पुणे : आंतरराष्ट्रीय कृष्णभावनामृत संघ – इस्कॉन, पुणे यांच्यातर्फे रविवार, दिनांक २९ जून रोजी दुपारी १ वाजता टिळक रस्त्यावरील स.प.महाविद्यालय येथून जगन्नाथ रथयात्रा सोहळ्याला प्रारंभ होणार आहे. ओडिसामधील जगन्नाथ पुरी येथे रथयात्रा मोठया उत्साहात साजरी होते. त्याच पार्श्वभूमीवर पुण्यामध्ये रथयात्रा होणार आहे. रथयात्रेच्या दिवशी इस्कॉन कात्रज-कोंढवा रस्ता, पुणे मंदिरातील भगवान जगन्नाथ, बलराम आणि सुभद्रा यांना खास दर्शनासाठी रथावर आणले जाते, अशी माहिती इस्कॉन मंदिराचे प्रवक्ते जनार्दन चितोडे यांनी पत्रकार परिषदेत दिली.

पत्रकार परिषदेला इस्कॉन मंदिराचे उपाध्यक्ष संजय भोसले, रथ यात्रेचे समन्वयक अनंतगोप प्रभू आणि जनसंपर्क प्रमुख प्रसाद कारखानीस उपस्थित होते.

रथयात्रेचे उद्घाटन इस्कॉन संस्थेचे संन्यासी प.पू. लोकनाथ स्वामी, इस्कॉन मंदिराचे अध्यक्ष राधेश्याम प्रभू, खासदार  मेधा कुलकर्णी, केंद्रीय नागरी विमान वाहतूक राज्यमंत्री मुरलीधर मोहोळ, उच्च आणि  तंत्र शिक्षण मंत्री चंद्रकांत दादा पाटील, आमदार हेमंत रासने, सुनील कांबळे, योगेश टिळेकर यांच्यासह पुणे शहरातील सर्व आमदार, नगरसेवक, पुणे महापालिकेतील पदाधिकारी तसेच सामाजिक, राजकीय, शैक्षणिक आणि सांस्कृतिक क्षेत्रातील मान्यवरांच्या हस्ते दुपारी १२ वाजता स.प. महाविद्यालयाच्या प्रांगणात होणार आहे. मान्यवरांच्या हस्ते भगवान जगन्नाथ, बलदेव आणि सुभद्रा यांची आरती झाल्यानंतर १ वाजता रथयात्रेला प्रारंभ होईल.

भगवान जगन्नाथ, भगवान बलराम आणि सुभद्रा लोकांना दर्शन, आशीर्वाद आणि कृपा देण्यासाठी रस्त्यावर येतात. जगन्नाथ पुरी येथे शतकानुशतके ही रथयात्रा काढली जाते. हा सोहळा साजरा करण्यासाठी जगन्नाथ पुरी येथे लाखो लोक जमतात. परंतु जगन्नाथ पुरी येथे प्रत्येकजण वैयक्तिकरित्या जाऊ शकत नाही. त्यामुळे इस्कॉनचे संस्थापक आचार्य श्रील भक्तीवेदांत स्वामी प्रभुपाद यांनी भगवान जगन्नाथाची कृपा जगभर पसरवण्यासाठी रथयात्रा सुरू केली.

स.प.महाविद्यालय, अभिनव महाविद्यालय चौक, बाजीराव रस्ता, शनिपार चौक, नगरकर तालीम चौक, लक्ष्मी रस्ता, शगुन चौक, रमणबाग शाळा, ओंकारेश्वर मंदिर, बालगंधर्व रंगमंदिर, जंगली महाराज रस्ता, खंडुजीबाबा चौक, टिळक चौक, टिळक रस्ता मार्गे स.प.महाविद्यालय येथे रथयात्रेचा समारोप होणार आहे. ठिकठिकाणी या रथयात्रेचे स्वागत मोठया उत्साहात होणार असून यामध्ये अनेक संन्यासी व महापुरुष सहभागी होणार आहेत. सायंकाळी ७ वाजता आरती, दर्शन व महाप्रसादाचे आयोजन करण्यात आले आहे.

रथयात्रेतील रथाची उंची २० फूट इतकी असून फुलांसह रंगीबेरंगी कापडांनी रथावर सजावट केली जाणार आहे. हा रथ इस्कॉनचे पदाधिकारी आणि सर्व भाविक ओढणार आहेत. समारोपानंतर भगवंतांना ५६ भोगांचा नैवेद्य अर्पण करून आरती होईल. जवळपास २० हजार भाविकांना प्रसाद वाटप महाविद्यालयाच्या प्रांगणात रथयात्रेच्या सुरुवातीला आणि समारोपानंतर होणार आहे. रथयात्रा मार्गावर १ लाख प्रसादाची पाकिटे वाटण्यात येणार आहेत.

रथयात्रेमध्ये २० हजार भक्त सहभागी होणार आहेत. महाराष्ट्र, तमिळनाडू, कर्नाटक, बंगाल आणि ओरिसा प्रांतातील पारंपरिक वाद्याच्या गजरात हरे कृष्ण महामंत्राच्या घोषात जय जगन्नाथ, जय बलदेव, जय सुभद्रा असा जयघोष करीत रथयात्रा मार्गस्थ होणार आहे. रथयात्रा ही विश्व शांती आणि भक्तीचा समन्वय आहे. जगाचे स्वामी जगन्नाथ हे मंदिरातून भक्तांना दर्शन देण्यासाठी रस्त्यावर येतात. सर्व नागरिकांनी भगवंतांच्या दिव्य रथयात्रेत सहभागी होऊन त्यांची कृपा प्राप्त करावी, असे आवाहन इस्कॉन मंदिराचे अध्यक्ष राधेश्याम प्रभू यांनी केले आहे. इस्कॉन संस्थेचे पुण्यात कात्रज कोंढवा रस्ता, कँप आणि निगडी येथे मंदिरे आहेत.