पुणे: येथील एमआयटी आर्ट, डिजाईन, टेक्नाॅलाॅजी विद्यापीठ, पुणे आणि आंतरराष्ट्रीय कौन्सिल ऑफ ज्युरिस्ट्स (लंडन) यांच्या संयुक्त विद्यमाने “व्यावसायिक नैतिकता आणि मानवी मूल्ये” या विषयावर कार्यशाळा मोठ्या उत्साहात संपन्न झाली. या कार्यशाळेचा उद्देश कायदा व्यवसायातील नैतिकतेचे महत्त्व अधोरेखित करणे आणि विद्यार्थ्यांना न्याय व मूल्यांसाठी प्रेरित करणे होता.
कार्यक्रमाची सुरुवात एमआयटी-एडीटी विद्यापीठाचे कार्यकारी अध्यक्ष प्रा. डॉ. मंगेश तु. कराड यांच्या अध्यक्षतेखाली झाली. त्यांच्यासोबत कुलगुरू प्रा. डॉ. राजेश एस., प्र-कुलगुरू प्रा. डॉ. रामचंद्र पुजेरी विद्यापीठातील अधिष्ठाता आणि संचालक उपस्थित होते. प्रा. डॉ. कराड यांनी कायदा व्यवसायाचे महत्त्व सांगताना म्हटले की, “कायदा व्यवसाय हा केवळ एक करिअर नसून, तो न्याय व सत्यासाठी लढणारे श्रेष्ठ क्षेत्र आहे, जे व्यक्तीला समाजात मान व प्रतिष्ठा देते.”
कार्यशाळेत प्रमुख पाहुणे म्हणून डॉ. आदिश अग्रवाल, अध्यक्ष, इंटरनॅशनल कौन्सिल ऑफ ज्युरिस्ट्स (लंडन), यांनी मार्गदर्शन केले. आपल्या भाषणात त्यांनी म्हटले की, “कायदा व्यवसाय समाज घडविण्याचे व न्यायासाठी लढण्याचे शक्तिशाली साधन आहे. हा व्यवसाय नैतिकता व समर्पणाची मागणी करतो आणि व्यक्तीला समाजात नेतृत्व करण्यासाठी प्रेरित करतो.”
कार्यक्रमानंतर डॉ. आदिश अग्रवाल यांनी विद्यार्थ्यांसोबत थेट संवाद साधला. त्यांनी त्यांच्या अनुभवांचे शेअरिंग करत विद्यार्थ्यांच्या प्रश्नांची उत्तरे दिली, ज्यामुळे विद्यार्थ्यांना प्रेरणा मिळाली. ही कार्यशाळा डॉ. सपना सुकृत देव, अधिष्ठाता, स्कूल ऑफ लॉ, विद्यापीठाचे कुलसचिव डॉ. महेश चोपडे यांच्या नेतृत्वाखाली आयोजित करण्यात आली. कार्यक्रमाचे समन्वयक म्हणून प्रा.आदित्य केदारी यांनी महत्त्वाची भूमिका बजावली.

बारामती, दि. ३ फेब्रुवारी २०२५ :- महावितरण कंपनीच्या राज्यस्तरीय आंतरपरिमंडलीय क्रीडा स्पर्धा २०२४-२५ चे आयोजन बारामती येथील विद्या प्रतिष्ठाणच्या विद्यानगरी संकुलात दि ५ ते ८ फेब्रुवारी दरम्यान करण्यात आले आहे. या स्पर्धेत १६ परिमंडलातील सुमारे अकराशे खेळाडू सहभागी होणार आहेत.

वीज कर्मचाऱ्यांच्या क्रीडा कौशल्याला वाव देण्यासाठी महावितरणमध्ये दरवर्षी राज्यस्तरीय क्रीडा स्पर्धेचे आयोजन करण्यात येते. २०२४-२५ च्या स्पर्धेचे यजमानपद बारामती परिमंडलाकडे आहे. या स्पर्धेचे उद्घाटन बुधवारी (दि. ५) सकाळी ९ वाजता महावितरणचे अध्यक्ष व व्यवस्थापकीय संचालक श्री. लोकेश चंद्र यांच्या हस्ते होणार आहे. कार्यक्रमाच्या अध्यक्षस्थानी संचालक (संचालन/मानव संसाधन) श्री. अरविंद भादीकर राहतील तर प्रमुख पाहुणे म्हणून छत्रपती संभाजीनगर प्रादेशिक विभागाचे सहव्यवस्थापकीय संचालक श्री. राहुल गुप्ता, कोकण प्रादेशिक विभागाचे सहव्यवस्थापकीय संचालक श्री. दिलीप जगदाळे, संचालक (वित्त) श्री. अनुदीप दिघे, संचालक (प्रकल्प) श्री. प्रसाद रेशमे, संचालक (वाणिज्य) श्री. योगेश गडकरी, नागपूर प्रादेशिक संचालक श्री. परेश भागवत, पुणे प्रादेशिक संचालक व आयोजन समितीचे अध्यक्ष श्री. भुजंग खंदारे, स्पर्धेचे मुख्य समन्वयक तथा मुख्य औद्योगिक संबंध अधिकारी श्री. संजय ढोके उपस्थित राहणार आहेत.

क्रीडा स्पर्धेचा पारितोषिक वितरण कार्यक्रम शनिवारी (दि. ८) दुपारी ३.३० वाजता विद्या प्रतिष्ठाणच्या गदिमा सभागृहात संचालक (संचालन/मानव संसाधन) श्री. अरविंद भादीकर यांच्या हस्ते होणार आहे. या कार्यक्रमाच्या अध्यक्षस्थानी पुणे प्रादेशिक संचालक श्री. भुजंग खंदारे राहणार आहेत.

या स्पर्धेत क्रिकेट, बॅडमिंटन, टेबल टेनिस, टेनिक्वाईट, कॅरम, कबड्डी, व्हॉलीबॉल, खो-खो, ॲथलेटिक्स, कॅरम आणि ब्रिज आदी २२ क्रीडा प्रकारांचा समावेश असून वैयक्तिक, सांघिक आणि सर्वसाधारण या तिन्ही प्रकारात विजेत्यांना पारितोषिके दिली जाणार आहेत. स्पर्धेच्या आयोजनासाठी मुख्य अभियंता व आयोजन समितीचे कार्याध्यक्ष श्री. धर्मराज पेठकर, उपमुख्य औद्योगिक संबंध अधिकारी व आयोजन समितीचे सचिव श्री. श्रीकृष्ण वायदंडे तसेच विविध समित्या पुढाकार घेत आहेत.

ऐसे कैसे झाले भोंदू |कर्म करोनी म्हणती साधू ||
अंगा लावूनिया राख |डोळे झाकोनी करती पाप ||
दावी वैराग्याचा कळा |भोगी विषयाचा सोहळा ||
तुका म्हणे सांगो |जळो तयाची संगती ||

राष्ट्रवादी आध्यात्मिक व वारकरी आघाडीची मागणी; धनंजय मुंडेंची पाठराखण केल्याने वारकरी संप्रदाय आक्रमक

पुणे: संतोष देशमुख हत्या प्रकरण, खंडणी, वाल्मिक कराड गँगशी संबंध आदी मुद्यांवरून अडचणीत आलेले मंत्री धनंजय मुंडे यांची पाठराखण करणे दुर्दैवी आहे. भगवानगडाचे महंत नामदेव शास्त्री यांनी गुन्हेगारीचे समर्थन करणारी भूमिका मांडली असून, याचा आम्ही निषेध करतो. याप्रकरणी नामदेव शास्त्री यांनी त्वरित वारकरी संप्रदायाची माफी मागावी; अन्यथा शास्त्री यांच्याविरोधात राज्यभर तीव्र आंदोलन करण्याचा इशारा राष्ट्रवादी आध्यात्मिक व वारकरी आघाडीने सोमवारी पत्रकार परिषदेत दिला.

राष्ट्रवादी आध्यात्मिक व वारकरी आघाडीचे राज्यप्रमुख हभप विठ्ठल आबा मोरे यांनी पत्रकार परिषद घेऊन शास्त्री यांच्या भूमिकेचा निषेध करत दोषींवर कारवाई करण्याची मागणी केली. पुणे जिल्हा अध्यक्ष हभप समाधान महाराज देशमुख, राज्य उपाध्यक्ष मुबारकभाई शेख, राज्य युवासंपर्कप्रमुख हभप सुरज महाराज लवटे, आळंदी शहर अध्यक्ष हभप दत्तात्रेय महाराज साबळे, मुस्लिम संत विभागाचे संपर्कप्रमुख राजूभाई इनामदार, जिल्हा संघटक हभप आकाश महाराज जगताप, पुरंदर तालुका अध्यक्ष हभप तुकाराम पवार, सुपा प्रांत अध्यक्ष हनुमंत चांदगुडे, उपाध्यक्ष ऋषिकेश गाडेकर, बारामती तालुका अध्यक्ष रामचंद्र चांदगुडे, इंदापूर तालुका अध्यक्ष हभप दत्ता अर्जुन आदी उपस्थित होते.

राष्ट्रवादी आध्यात्मिक व वारकरी आघाडीचे नामदेव शास्त्रींना सवाल…

नामदेव शास्त्री बुवा उत्तर देणार का?

• ज्यांनी संतोष देशमुख यांची हत्या केली त्यांची मानसिकता तशी का बनली हे देखील पाहिले पाहिजे.. म्हणजे शास्त्री बुवा तुम्ही हत्येचे समर्थन करता का?
• शास्त्री बुवांनी संतोष देशमुख यांच्या हत्येचे उघड समर्थन केले, मग आरोपी फरार असताना शास्त्री बुवांनी त्यांना छुपा आश्रय होता का याची चौकशी का होऊ नये?
• दोन तास धनंजय मुंडेंशी चर्चा करून त्यांची मानसिकता समजून घेतली आणि दुःख झाले, तर संतोष देशमुख यांच्या परिवाराची मानसिकता काय असेल याचे उत्तर बुवा देणार का?
• धनंजय मुंडे गुन्हेगार नाही म्हणता, तर हार्वेस्टर घोटाळा, कृषी साहित्य घोटाळा, राख घोटाळा, वीमा घोटाळा, वाळूमाफिया, खंडणी वसुलने, जमिनी बळकावणे, गुन्हेगारी टोळी बनवणे, व्यभिचार करणे हे सदगृहस्थाचे लक्षण आहे?
• धनंजय मुंडेंमध्ये संत दिसत असेल तर भगवानगडाचे महंतपद त्यांना देणार का?
• शास्त्री बुवा खुनी, भ्रष्टाचारी, खंडणीखोरांसाठी धावून आले, याचा अर्थ खंडणीतील वाट त्यांना मिळाला असे का समजू नये.
• दोन समाजाला समोरासमोर लढा असे सांगणे भगवानगडाच्या महंताला शोभते का?
• धनंजय मुंडेंची पार्श्ववभूमी गुन्हेगारीची नाही तर बीडमध्ये गुन्हेगारांची टोळी करून त्यांना बळ कोणी दिले?
• गावातील दलित बांधवांची बाजू घेऊन सरपंचांनी मध्यस्ती केली म्हणून हत्या केली. या न्यायाने हत्या झाल्यावर कोणते पाऊल उचलणे शास्त्री बुवांना अपेक्षित आहे?
• शास्त्री बुवा, पीडितांना न्याय देणे संस्कृती आणि गुन्हेगारांची पाठराखण करणे विकृती आहे. या न्यायाने तुमची मानसिकता विकृत नाही का?
• धनंजय मुंडेंच्या भेटीनंतर दुसऱ्याच दिवशी पत्रकार परिषद घेऊन आकाची पाठराखण केली. राज्यातील गरजवंत मराठा आरक्षणासाठी अनेक वर्षांपासून लढा देत आहे. त्यावर मत व्यक्त करावे असे वाटले नाही का?
• संतोष देशमुख यांची हत्या करणारे धनंजय मुंडेचे निकटवर्तीय आहेत. धनंजय मुंडेचा इतिहास पाहता मंत्रीपदावर असताना त्यांचा तपासामध्ये हस्तक्षेप होऊ शकतो. त्यामुळे मंत्रीपदाचा राजीनामा द्यावा या मागणीत काय गैर आहे?
• धनंजय मुंडे सलाईन लावल्या हाताने भेटायला आले म्हणून हळहळ वाटली. मनोज जरांगे पाटील प्राणांतिक उपोषण करतात, संतोष देशमुख यांना हालहाल करून मारले तेव्हा तुमच्या पाषाण काळजाला वेदना का झाल्या नाहीत?

पुणे:रोल बॉल या खेळाला महाराष्ट्र शासनाची मान्यता आहे परंतु हा खेळ छत्रपती पुरस्कार यादी मध्ये नाही तसेच ५% आरक्षण यादीमध्ये देखील या खेळाचा समावेश नाही, ह्या दोन्ही गोष्टी घडाव्यात या साठी मी प्रयत्न करणार आहे असे ना. चंद्रकांतदादा पाटील यांनी जाहीर केले.तसेच बाणेर येथील रोल बॉल स्टेडीयमला कवर/शेड करून देण्यासाठी देखील मी प्रयत्न करेन म्हणजे खेळाडूंना उन्हाळ्यात आणि पावसाळा दरम्यान सरावासाठी काही अडचण येणार नाही आणि ते चांगली पदकं जिंकू शकतील असेही ना. चंद्रकांतदादा म्हणाले.
आज रोलबॉल ह्या खेळाच्या बावीसाव्या वर्धापनदिना निमित्त मा.ना.चंद्रकांत दादा पाटील,उच्च व तंत्रशिक्षण मंत्री महाराष्ट्र राज्य यांच्या हस्ते अंतरराष्ट्रीय व राष्ट्रीय विजेत्या खेळाडूंचा भेटवस्तू देऊन सत्कार करण्यात आला त्या वेळी ते बोलत होते. यावेळी ह्या खेळाचे जनक राजू दाभाडे सर, रोलबॉल असोसिएशन चे महाराष्ट्र प्रदेश अध्यक्ष संदीप खर्डेकर, पुणे जिल्हा अध्यक्ष गजानन थरकुडे, जिल्हा रोल बॉल संघटना उत्कर्ष तरटे- मेजर भारतीय सैन्यदल, जनक टेकाळे माजी क्रीडा सहसंचालक, श्रीमती चैत्राली दहिवाल मुख्य कार्यकारी संचालक,इंफ्राटेक कंपनी यांची प्रमुख उपस्थिती होती व मोठ्या प्रमाणावर खेळाडू व प्रशिक्षक उपस्थित होते.
पुण्यातील तरुण स्केटिंग प्रशिक्षक राजू दाभाडे यांनी ह्या खेळाची निर्मिती केली आणि आज हा खेळ जागतिक स्तरावर पोहोचला आहे याचा अभिमान वाटतो असे संदीप खर्डेकर म्हणाले. हा खेळ सातासमुद्रापार पोहोचला असून लवकरच याचा समावेश ऑलम्पिक मध्ये होईल यासाठी आम्ही प्रयत्नशील आहोत असेही संदीप खर्डेकर म्हणाले.यावेळी राजू दाभाडे सर यांचा ना. चंद्रकांतदादा पाटील यांच्या हस्ते सत्कार करण्यात आला.
ह्या खेळाच्या प्रगतीमुळे मी भारावून गेलो असून ना. चंद्रकांतदादा पाटील हे आमचे पालक असून ते जी मदत करत आहेत त्याबद्दल आम्ही सर्वजण कृतज्ञ असल्याचे राजू दाभाडे म्हणाले.
दोन फेब्रुवारी हा रोल बॉल ह्या खेळाचा वर्धापन दिन !! हा दिवस संपूर्ण जगा मध्ये रोल बॉल दिन म्हणून साजरा करण्यात येतो.आपल्या पुण्यामध्ये २१ व्या शतकामध्ये तयार झालेला रोल बॉल हा खेळ गेल्या बावीस वर्षामध्ये जागतिक स्तरावर आणि राष्ट्रीय स्तरावर उल्लेखनीय प्रगती करीत आहे.ह्या खेळाच्या आज पर्यंत ६ जागतिक स्पर्धा झाल्या आहेत त्यातील चार स्पर्धा भारताने जिकल्या आहेत तर चार एशियन स्पर्धा झाल्या आहेत. यातील चारही स्पर्धा भारताने जिंकल्या आहेत. रोल बॉल च्या ८० खेळाडूंना केंद्र शासनाच्या मध्यमातून नोकरी मिळाली आहे. स्पोर्ट्स कोटा मधून मेडिकल, इंजिनिअरिंग, इ. माध्यमामध्ये खेळाडूना प्रवेश देखील मिळत आहे.
या मध्ये प्रामुख्याने एशियन रोल बॉल स्पर्धा भारताने जिकली त्यातील पुण्यातील खेळाडूंचा मोठा वाटा होता या पुण्यातील मधुसूदन रत्नपारखी, वेदांत घुगे, रोहन दाभाडे, महेश उभे, सुहानी सिंग, श्रुती बघट, प्राची फराटे. कोरिया, इंडोनेशिया येथील आईस स्केटिंग सी ट्रॉफी विजेते खेळाडू आरव पटवर्धन, अद्वय कोठारी, श्सिद्धांत मांडेगे, येश जामदार. खेलो इंडिया विंटर गेम्स २०२५ लेह इथे झालेल्या स्पर्धेमध्ये महाराष्ट्राच्या पुरुषांमध्ये सुमित तापकीर, व्योम सावंत, इशान दारव्हेकर, अथर्व परदेशी, पृथ्वीराज विनोद, महिलांमध्ये स्वरूपा कड-देशमुख, अन्वयी देशपांडे, यशस्वी पाटील, कुहू विद्वांस, रिया गायकवाड, निरजा लुबल या खेळाडूंचा तसेच इतर राष्ट्रीय विजेत्या खेळाडूंचा सत्कार करण्यात आला.

सन्मानित करण्यात आलेले इतर खेळाडू

14 मिनी राष्ट्रीय रोल बॉल चॅम्पियनशिप दिसपूर आसाम महाराष्ट्र संघातील विजयी खेळाडू ओवी सागर पवार, प्रज्ञा वडवेराव, सिमरन चुग, तनिषा ठोंबरे
16 वी ज्युनियर राष्ट्रीय रोल बॉल चॅम्पियनशिप रिज स्कूल कुर्नूल आंध्रप्रदेश विजयी खेळाडू प्रज्ञा मारणे, प्रांजल जाधव, अनन्या गायके
फेडरेशन कप, शिलाँग, मेघालय विजयी खेळाडू मधुसूदन रत्नपारखी, शौर्यराज माथवाड, सिद्धांत ढोबळे, वेदांत घुगे, आर्यन काजळेपाटील, निलेश शिंदे
पश्चिम विभाग राष्ट्रीय रोल बॉल चॅम्पियनशिप छत्रपती शाहू क्रीडा संकुल, सातारा विजयी खेळाडू अनया भिंगे, हृतिका व्यवहारे, दिव्या कापसे, सिमरन अझीझ, कृष्णा अग्रवाल, श्रेया भिरूड, श्रेया भंडारी.

शिरष्णे (ता.बारामती)-ठेकेदार राजकारणातून पदाधिकारी झाल्याने जनतेमध्ये चीड निर्माण होते, अर्थातच त्यामुळे पक्ष प्रमुख म्हणून आम्ही जनतेच्या त्या प्रचंड रोषाचे धनी होतो. याशिवाय अधिकाऱ्यांनाही सरकारी कामे दर्जेदार करण्यास अडथळा निर्माण होतो.हा दुहेरी तोटा आता मला सहन होत नाही.मी आठ वेळा आमदार झालो, यापुढे मी कसाही आमदार म्हणून सभागृहात जाईल, परंतु ठेकेदार लोकांना राजकारणाचे दरवाजे बंद केल्याशिवाय स्वस्थ बसणार नाही. अशी नवीन राजकीय भूमिका उपमुख्यमंत्री अजित पवार यांनी शिरष्णे (ता.बारामती) येथील शेतकरी मेळाव्यात जाहीर केली. यावेळी उपस्थितांनी मात्र एकच टाळ्यांचा कडकडाट करीत पवारांच्या भूमिकेला पाटींबा दिला.

शिरष्णे (ता.बारामती) येथे श्री स्वामी समर्थ सहकारी दूध उत्पादक संस्थेने नव्याने दूध बल्क कुलरची उभारणी केली आहे. त्या कामी संस्थेचे प्रमुख संतोष जाधव यांनी पुढाकार घेतला होता. या कुलरच्या उद्धाटन प्रसंगी अजित पवार बोलत होते. बारामतीसह राज्यात ठेकेदार राजकारणातून पदाधिकारी होण्यासाठी इच्छुक असतात. ही संख्या मोठी होत चालली आहे. अर्थात हे लोकांना आवडत नसल्याचे लोकसभा आणि विधासभा निवडणूत प्रखरशाने जाणवले, असे सांगून पवार म्हणाले,“ ज्यांना राजकारण अथवा कार्यकर्ता व्यहाचे आहे, त्यांनी ठेकेदार क्षेत्रात यायचे नाही.तसे झाल्यास नवीन आणि गावपातळीवर चांगले पक्षाचे काम करणाऱ्या चेहर्‍यांना संधी मिळेल. परिणामी अधिकाऱ्यांनाही दर्जेदार काम करणे सोईचे होईल. जनतेमध्येही राष्ट्रवादी काॅग्रेस पक्षाची प्रतिमा उंचविण्यास मदत होईल.“ राष्ट्रवादीच्या बुथ कमीटीमध्ये ज्या सदस्यांनी चांगले काम केले, त्यांच्या मताचा अधिकाधिक विकास प्रक्रियेत विचार केला जाईल, असे पवार यांनी जाहिर केले.

पुणे : ७६ व्या भारतीय प्रजासत्ताक दिनाचे औचित्य साधून कीर्तने अँड पंडित संस्थेच्या वतीने ‘रन फॉर द रिपब्लिक’ मॅरेथॉन २०२५ चे नुकतेच आयोजन केले होते. कर्वे रस्त्यावरील कीर्तने अँड पंडित संस्था, दशभुजा गणपती, करिष्मा सोसायटी चौक, कर्वे रोडने कर्वे पुतळा, शिवाजी महाराज चौक, कर्वे रोडने पुन्हा कीर्तने अँड पंडित या मार्गाने ही मॅरेथॉन झाली. तीन किलोमीटरच्या मॅरेथॉनमध्ये संस्थेतील सर्व पदाधिकारी, कर्मचारी, विद्यार्थी शेकडोंच्या संख्येने सहभागी झाले होते.

कीर्तने अँड पंडितचे सीए मिलिंद लिमये, सीए पराग पानसरे आदी उपस्थित होते. बाबू बावधने, यश दाते, श्रवण बिश्नोई व धैवत आपटे यांना अनुक्रमे प्रथम, द्वितीय, तृतीय व चतुर्थ क्रमांकाने, तर इतर सर्व सहभागींना प्रमाणपत्र व पदक देऊन गौरविण्यात आले. स्नेहा पाटोळे व सहकाऱ्यांनी मॅरेथॉनचे यशस्वी संयोजन केले.

सीए मिलिंद लिमये म्हणाले, “लोकशाही उत्सव साजरा करण्यासाठी व सर्वांमधील एकात्मता जपण्यासाठी प्रजासत्ताक दिनाच्या निमित्ताने ‘रन फॉर रिपब्लिक’ मॅरेथॉनचे आयोजन केले होते. संस्थेतर्फे दरवर्षी आजच्या दिवशी सामाजिक उपक्रम आयोजित केला जातो. यापूर्वीही ‘मेरा तिरंगा मेरा अभिमान’ ध्वज संकलन मोहीम, रक्तदान शिबिर, स्वच्छता अभियान असे विविध उपक्रम राबविण्यात येतात.”

पुणे: गौतम बुद्ध, भगवान महावीर आणि संत कबीर या महामानवांच्या मूल्यविचारांच्या अभ्यासक प्रा. भारती जाधव यांची विश्वबंधुता मूल्यसंवर्धन समितीच्या अध्यक्षपदी, तर औंध येथील डॉ. बाबासाहेब आंबेडकर महाविद्यालयातील प्रा. सायली गोसावी यांची सचिवपदी निवड करण्यात आल्याची माहिती विश्वबंधुता साहित्य परिषदेचे संस्थापक अध्यक्ष बंधुताचार्य प्रकाश रोकडे यांनी दिली.
स्वातंत्र्य, समता, बंधुता आणि न्याय या संविधानिक मूल्यांबरोबरच मानवता आणि धर्मनिरपेक्षता या मूल्यांच्या प्रस्थापनेसाठी समितीच्या वतीने विविध स्वरूपाचे कार्यक्रम आणि उपक्रम राबविले जातात, असे रोकडे यांनी सांगितले. प्राचार्य डॉ. संजय गायकवाड आणि प्राचार्य डॉ. अरुण आंधळे यांनी प्रा. जाधव व प्रा. गोसावी यांचे अभिनंदन केले.

पुणे: “देशभरात महिला अत्याचाराच्या तक्रारींमध्ये मोठी वाढ होत आहे. राज्य व राष्ट्रीय महिला आयोग, कौटुंबिक न्यायालयात लाखो तक्रारी प्रलंबित आहेत. ५०-६० टक्के तक्रारी कौटुंबिक वादाच्या असून, या तक्रारींचा निपटारा करण्यासाठी राष्ट्रीय महिला आयोगाने देशभर ‘महिला आयोग आपल्या दारी’ अभियान हाती घेतले आहे. विभागवार सुनावण्या घेऊन या तक्रारींचे निराकरण केले जात आहे,” असे प्रतिपादन राष्ट्रीय महिला आयोगाच्या अध्यक्षा विजया रहाटकर यांनी केले. दिव्यांगांप्रमाणे ‘अभया’लाही सन्मान देण्यासाठी केंद्र सरकारकडे पाठपुरावा करण्याचे आश्वासन रहाटकर यांनी दिले. 

वंचित विकास व उदयकाळ फाऊंडेशन यांच्या संयुक्त विद्यमाने अभया अभियानांतर्गत आयोजित दोन दिवसीय ‘अभया’ राज्यस्तरीय परिषदेच्या उद्घाटनप्रसंगी विजया रहाटकर बोलत होत्या. लोहगाव येथील नीहार आनंदनिवासमध्ये आयोजित परिषदेत वंचित विकास संस्थेचे अध्यक्ष विजयकुमार मर्लेचा, कार्यवाह व संचालक मीना कुर्लेकर, सुनीता जोगळेकर, मीनाक्षी नवले, देवयानी गोंगले, रंजना चव्हाण, आणि उदयकाळ फाउंडेशनचे बाळकृष्ण बागुल, मयूर बागुल आदी उपस्थित होते. महाराष्ट्रातील एकल महिलांवर काम करणाऱ्या विविध जिल्ह्यातील ५० सामाजिक संस्थांचे प्रतिनिधी या परिषदेत सहभागी झाले आहेत.
विजया रहाटकर म्हणाल्या, “भारतीय कुटुंबपद्धती समाजव्यवस्थेचा आदर्श होता. मात्र, अलीकडच्या काळात विभक्त कुटुंबपद्धतीने समाजात अस्थिरता वाढली आहे. महिला एकाकी पडत आहेत. महिला घरदार सांभाळून घेत असते. मात्र, तिच्यावर वेळ येते, तेव्हा परिस्थिती, जवळची माणसे कठोर होतात. असंख्य अडचणींचा सामना त्यांना करावा लागतो. मान, सन्मान व स्वतःच्या हक्कांसाठी झगडावे लागते. महिला सन्मान व संरक्षणासाठी कायदे आहेत. तरीही अत्याचाराच्या घटना थांबत नाहीत. समाज म्हणून आपण भान जपायला हवे. मनातून आणि डोक्यातून एकल महिला ही कल्पना काढून टाकली आणि त्यांना अभय संबोधले, त्यांना आपल्यात सामावून घेतले, तर त्यांचे एकाकीपण दूर होण्यास निश्चित मदत होईल.”
“अभया ही सक्षम असते, तिला आधाराची, सकारात्मक मानसिकता देण्याची गरज असते. प्रेम, स्नेह व आपलेपणा तिला या संघर्षात ऊर्जादायी ठरतात. त्यांच्यासाठी काम करणाऱ्या संस्थांची भूमिका ही ‘कॅटॅलीस्ट’सारखी आहे. समाजाचा स्वीकार आणि सकारात्मक भावना विकसित करण्यात संस्थांनी पुढाकार घ्यावा. महिला आयोग म्हणून अभयाच्या समग्र विकासासाठी काही शिफारशींवर आमचे काम सुरु आहे. येत्या काळात या शिफारसी केंद्र सरकारकडे देऊ. तसेच ही चळवळ देशातील इतर राज्यांमध्ये घेऊन जाण्यात महिला आयोग पुढाकार घेईल,” असा शब्द विजया रहाटकर यांनी दिला.
प्रास्ताविकात मीना कुर्लेकर म्हणाल्या, “नरेंद्र मोदी सरकारचे धोरण स्त्रियांना सन्मान देणारे आहे. त्यांचे सक्षमीकरण करणारे आहे. एकल महिलांच्या प्रश्नाची गंभीरता महिला आयोगाच्या माध्यमातून केंद्र शासनापर्यंत पोहोचवावी. अभया ही चळवळ देशपातळीवर घेऊन जाण्यात विजयाताई पुढाकार घेतील, असा विश्वास वाटतो.”
एकल महिलांचे प्रश्न व सामाजिक संस्थेची जबाबदारी, तसेच कामात येणाऱ्या अडचणी समजून घेण्यासाठी परिषदेमध्ये विविध चर्चासत्रे आयोजिली होती. आर्थिक साक्षरतेवर स्वाती दुधाले, एकल महिलांचे भावनिक व मानसिक व्यवस्थापनावर डॉ. सागर पाठक यांनी मार्गदर्शन केले. शासकीय योजना व सामाजिक संस्थांना संधी याविषयीची माहिती शासकीय प्रतिनिधींनी दिली.

 63-वर्षीय रुग्णाला श्रवणशक्ती परत मिळवून दिली

·         ज्युपिटर हॉस्पिटल येथील अनुभवी ENT सर्जन्सनी केलेल्या या प्रक्रियेत चेहऱ्याच्या मज्जातंतूंसह महत्त्वाच्या संरचना जपण्यासाठी अत्यंत काळजीपूर्वक विच्छेदन करणे आवश्यक होते

पुणे,: एका अत्यंत आव्हानात्मक ENT शस्त्रक्रियेच्या प्रकरणात शहरातील अत्यंत अनुभवी सर्जन्सनी 8 तासांची अत्यंत गुंतगुंतीची शस्त्रक्रिया करून एक दुर्मिळ स्कल बेस ट्यूमर काढला आणि एका 63 वर्षीय रुग्णाची श्रवणशक्ती त्याला परत मिळवून दिली. हा रुग्ण पल्सेटाइल टिनायटसने पीडित होता, ज्यामध्ये कानात निरंतर एक आवाज येतो, जो नाडीच्या ठोक्यांशी जुळणारा असतो; तसेच कानात जड-जड वाटते. कानात वाजणाऱ्या या ठोक्यांमुळे रुग्णाची स्थिती शस्त्रक्रियेपूर्वी अत्यंत क्लेशदायक होती.

अशी आरोग्य स्थिती असलेल्या रुग्णाला ज्युपिटर हॉस्पिटल, पुणे येथे दाखल करण्यात आले होते. MRI आणि CT स्कॅनमध्ये दिसून आले की, त्याच्या जग्युलर फोरामेनमध्ये 4.5 सेंमी आकाराचा एक दुर्मिळ ट्यूमर होता, जो कानाच्या मध्यापासून मानेच्या वरील भागापर्यंत पसरला होता. त्या ट्यूमरचे आकारमान आणि स्थान पाहता, हे प्रकरण ज्युपिटर हॉस्पिटलमधील अत्यंत कुशल ENT सर्जन्सकडे पाठवणियात आले. ही शस्त्रक्रिया डॉ. (क) इंदरदीप सिंह यांनी केली, तर डॉ. दुष्यंत खेडीकर यांनी त्यांना साहाय्य केले. या प्रक्रियेत चेहऱ्याच्या मज्जातंतूंसह महत्त्वाच्या संरचना जपण्यासाठी अत्यंत काळजीपूर्वक विच्छेदन करणे आवश्यक होते तसेच ट्यूमर संपूर्णपणे काढून टाकणे देखील तितकेच महत्त्वाचे होते. विस्तारित हायपोटिम्पेनम दृष्टिकोनासह चेहऱ्याच्या मज्जातंतूच्या वर आणि खालील बाह्य बोनी कॅनल हटविण्यात आली.

हे शस्त्रक्रियेचे प्रकरण आव्हानात्मक आणि तितकेच आगळेवेगळेही होते, मूलतः ट्यूमरच्या गुंतागुंतीच्या रचनेमुळे आणि त्याच्या नाजुक स्थानामुळे.

या प्रकरणाच्या जटिलतेची पुष्टी करत डॉ. (कर्नल) इंदरदीप सिंह म्हणाले, “जग्युलर फोरामेनमध्ये वाढलेला हा ट्यूमर कानाच्या मध्यापासून मानेच्या खालील भागापर्यंत पसरला होता. त्यामुळे त्याच्या शस्त्रक्रियेसाठी बारकाईने आयोजन आणि अंमलबजावणी दोन्ही आवश्यक होते. या भागात क्रॅनियल नसा आणि प्रमुख रक्तवाहिन्यांसहित महत्त्वाच्या रचना गच्च भरलेल्या असतात. हा ट्यूमर चेहऱ्याच्या मज्जातंतूच्या आणि 12 व्या क्रॅनियल नसेच्या अत्यंत जवळ असल्यामुळे शस्त्रक्रियेदरम्यान नसांना नुकसान होण्याचा मोठा धोका असतो. शिवाय, ट्यूमरमध्येही खूप रक्तवाहिन्या असल्यामुळे संपूर्ण प्रक्रियेदरम्यान रक्तस्राव होण्याचा मोठा धोका होता त्यामुळे या समस्त प्रक्रियेदरम्यान रक्तस्राव व्यवस्थापन ही एक चिंतेची बाब होती.”

या प्रक्रियेसाठी विविध शाखांच्या तज्ज्ञांची मदत घेण्यात आली. ENT सर्जन्सनी शस्त्रक्रियेचे नेतृत्व केले. काही अनपेक्षित गुंतागुंत उद्भवल्यास त्याचा सामना करण्यासाठी एक कार्डिओथोरॅसिस व्हास्क्युलर सर्जन होता. शस्त्रक्रिया करणाऱ्या टीमने दुहेरी दृष्टिकोन अंगिकारला. ट्यूमरपर्यंत पोहोचण्यासाठी आणि तो काढून टाकण्यासाठी एकाचवेळी कानाच्या मध्यातून आणि मास्टॉइडमधून विच्छेदन केले.

या शस्त्रक्रियेतील वेगळेपण त्यात करण्यात आलेल्या टेकनिक्सच्या नावीन्यपूर्ण वापरात होते, ज्याच्यामुळे रक्त देण्याची गरज न पडता ट्यूमर संपूर्णपणे काढून टाकता आला.

डॉ. सिंह म्हणाले, “रक्तस्राव नियंत्रित करण्यासाठी आम्ही ट्यूमर कॅप्सूलसह मायक्रो  बायपोलर कॉटरीचा उपयोग केला. शिवाय, प्रक्रियेदरम्यान आम्ही आंतरिक जग्युलर नस आणि सिग्मॉईड साइनस बंद केले, ज्यामुळे रक्तस्राव आणखीन कमी झाला.”

ते पुढे म्हणाले, “या शस्त्रक्रियेचा एक अत्यंत समाधानकारक परिणाम हा होता की कानात ठोक्यांचा आवाज येणे आणि कान जड वाटणे यांसारखी रुग्णाची लक्षणे तत्काळ अदृश्य झाली. ट्यूमर संपूर्णपणे काढून टाकताना आम्ही रुग्णाची श्रवणशक्ती वाचवू शकलो याचा आम्हाला विशेष अभिमान वाटतो.”

या प्रकरणातून नेमकेपणा आणि टीमवर्क यांचे महत्त्व अधोरेखित झाले. महत्त्वाच्या संरचनांना धक्का न लावता, गुंतागुंत टाळून सर्जन्सनी कोणतीही न्यूरोलॉजिकल हानी होऊ न देता उत्कृष्ट परिणाम साधले. रुग्णाला त्याची श्रवणशक्ती परत मिळाल्याबद्दल त्या रुग्णाच्या कुटुंबियांनी ENT सर्जन्स आणि ज्युपिटर हॉस्पिटल, पुण्याविषयी कृतज्ञता व्यक्त केली.