वाचक कट्टा उपक्रमाअंतर्गत पुणे नगर वाचन मंदिरात व्याख्यान

पुणे : कृत्रिम बुद्धिमत्तेच्या (ए. आय.) वापरामुळे बेरोजगारी वाढण्याची भीती नाही. कृत्रिम बुद्धिमत्तेचा सकारात्मक वापर करून शैक्षणिक क्षेत्र, मार्केट रिसर्च, अभियांत्रिकी, माहिती संकलन, शेती आदी कार्य क्षेत्रांमध्ये अनेक संधी उपलब्ध होऊ शकतात, असे प्रतिपादन माहिती तंत्रज्ञान क्षेत्रातील अग्रणी, प्रसिद्ध संगणकतज्ज्ञ दीपक शिकारपूर यांनी केले. ए. आय. तंत्रज्ञानाला स्पर्धक समजू नका तर त्याचा मदतनीस म्हणून वापर करा, सजक वापरकर्ते व्हा, असा सल्लाही त्यांनी दिला.

‌‘ए आय आणि संधी‌’ या विषयावर वाचन कट्टा या उपक्रमाअंतर्गत पुणे नगर वाचन मंदिरातर्फे शिकारपूर यांचे आज (दि. 16) व्याख्यान आयोजित करण्यात आले होते. त्या वेळी ते बोलत होते. सहकार्यवाह प्रसाद जोशी, वाचक कट्टाचे प्रमुख, कार्यकारिणी सदस्य विनायक माने उपस्थित होते. पुणे नगर वाचन मंदिरात व्याख्यान झाले.

कृत्रिम बुद्धिमत्तेच्या क्षेत्रात नवीन संधी उपलब्ध होतील, असे सांगून शिकारपूर पुढे म्हणाले, आजच्या युगात कृत्रिम बुद्धिमत्तेचा वापर माहिती, संवाद आणि इमेज प्रोसेसिंग या क्षेत्रात मोठ्या प्रमाणावर केला जात आहे. वापरकर्ता हाच माहितीचा वाहक असल्यामुळे कृत्रिम बुद्धिमत्तेचा वापर सजगतेने होणे आवश्यक आहे. अयोग्य माहिती देणे नीतिमत्तेचे प्रश्न निर्माण करू शकते. या तंत्रज्ञानाचा अतिरेकी वापर करू नये. म्हणूनच मर्यादित डिजिटल प्रेझेन्स आवश्यक आहे. सोशल मीडियाचा अतिरेकी वापर, माहितीचा अयोग्य वापर यातून सायबर गुन्हे वाढू शकतात. म्हणूनच युवा पिढीला सायबर संस्कार देणे ही काळाची गरज आहे. सायबर सिक्युरिटीविषयी कायद्याचे मुलभूत ज्ञान प्रत्येकाला असणे आवश्यक आहे.
कृत्रिम बुद्धिमत्तेचा वापर कितीही मोठ्या प्रमाणात झाला तरी मानवी मेंदूत असलेल्या नॉन डिजिटल अनुभवांपुढे कृत्रिम बुद्धिमत्तेचे सामर्थ्य नेहमीच कमी राहणार आहे. कृत्रिम बुद्धिमत्तेविषयक अंधविश्वास न ठेवणे, भावनिक गुंतवणूक न करणे, सततचा वापर योग्य नसून आज डिजिटल उपासाची समाजाला गरज आहे, असेही ते म्हणाले.

दीपक शिकारपूर यांचा परिचय आणि स्वागत सहकार्यवाह प्रसाद जोशी यांनी केले तर सूत्रसंचालन विनायक माने यांनी केले. कार्यकारिणी सदस्य राजीव मराठे यांनी आभार मानले.

पुणे- मंगळवार पेठेतील ससून डेड हाउस च्या अगदी समोरची ,आंबेडकर सांस्कृतिक भवनालगत ची जागा रस्ते विकास महामंडल एका खाजगी बिल्डरच्या घशात अवघ्या ७० कोटीला घालीत असून या कृतीस आता मोठा विरोध होऊ लागला आहे. हा बिल्डर कोण? कशासाठी हि जागा दिली जातेय या सर्व बाबी मात्र कोणीही जाहीर करण्यास उत्सुक असल्याचे दिसत नाही .

दरम्यान या संदर्भात महापालिकेतील माजी विरोधी पक्षनेते उज्ज्वल केसकर,सुहास कुलकर्णी आणि माजी नगरसेवक प्रशांत बधे यांनी मुख्यमंत्री देवेंद्र फडणवीस,उपमुख्यमंत्री एकनाथ शिंदे,अजितदादा पवार,तसेच मंत्री चंद्रकांतदादा पाटील,माधुरी मिसाळ
आणि केंद्रीय मंत्री तथा पुण्याचे खासदार मुरलीधर मोहोळ यांना साकडे घालून या संदर्भात काही मागण्या केल्या आहेत .

काय आहेत त्यांच्या मागण्या ते पहा –
१) रस्ते विकास महामंडळाने मंगळवार पेठेतील मोक्याची जागा खाजगी बिल्डरला 70 कोटी रुपयाला लीज वर देण्याचा निर्णय घेतला आहे.हा अव्यावहारिक असून तातडीने तो रद्द करावा .
२) वैद्यकीय शिक्षण विभागाचे सचिव धीरज कुमार IAS यांनी काल ससून रुग्णालयाची पाहणी केली बैठका घेतल्या त्यावेळेला त्यांनी असे सांगितले पुण्यात स्वतंत्र कर्करोग रुग्णालय उभारणेचा प्रस्ताव तयार झाला असून लवकरच तो मंत्रिमंडळ मान्यतेसाठी ठेवणार आहे.
३) ससून हॉस्पिटल, जिल्हाधिकारी कार्यालय, सेंट्रल बिल्डिंग, पा बी जे मेडिकल कॉलेज, फोटो झिंको, पोलीस आयुक्तालय, जिल्हा परिषद इत्यादी महत्त्वाची शासकीय निमशासकीय या जागेच्या जवळ आहेत तसेच या जागेमध्ये भारतरत्न विश्वेश्वरय्या हे स्वतः बसत होते.
४) पश्चिम महाराष्ट्रामध्ये आणि पुण्यामध्ये एकही कर्करोगाचे शासकीय इस्पितळ नाही.
५) आम्ही कर्करोग रुग्णालयाची मागणी केली होती.
६) ससून रुग्णालयाच्या समोर ही जागा आहे अंडरपास अथवा पूल बांधला तर accessible आहे.
आमची आपणास हात जोडून विनंती कृपया या जागेचा व्यवहार थांबवावा आणि ही जागा कर्करोग रुग्णालय काढण्यासाठी वापरावी या रुग्णालयाला भारतरत्न विश्वेश्वरय्या यांचे नाव द्यावे.

पुणे:कविता म्हणजे फक्त भावना नसून ती एक देणगी आहे, ज्याला व्यक्त होता आल तो नशीबवान असतो. म्हणुन कविता हे कवीला दृष्टी लाभलेली कला आहे. असे प्रतिपादन कवी सागर काकडे यांनी केले. शाई प्रतिष्ठान द्वारे तारांगण पिंपरी चिंचवड येथे आयोजीत सहित्यकेसरी काव्य करंडक २०२४-२५ या स्पर्धेच्या उद्घाटन प्रसंगी ते बोलत होते.
शाई प्रतिष्ठानच्या माध्यमातून गेल्या तीन वर्षांपासून साहित्य केसरी काव्य करंडक ही स्पर्धा आयोजिली जाते. यावर्षी महाराष्ट्रभरातून एकशे पन्नास पेक्षा जास्त स्पर्धकांनी यावेळी स्पर्धेत सहभाग घेतला. तिसऱ्या व अंतिम फेरीसाठी तीस स्पर्धकांची निवड झाली.
दरम्यान या स्पर्धेसाठी प्रमुख पाहुणे म्हणून पी.एस.आय विकास अडसूळ, युवा वक्ते अक्षय इळके, व्याख्याते विवेकानंद पाटील, उद्योजक गणपत शेठ टेमकर आदी मान्यवर उपस्थित होते. परीक्षक म्हणून कवी सागर काकडे व प्रा. अमोल चिने उपस्थित होते. शाई प्रतिष्ठानचे अध्यक्ष गणेश बनसोडे, उपाध्यक्ष महेश होनमाने यांनी स्पर्धकांचे मनोबल वाढविले.
कवी प्रमोद घोरपडे, ऐश्वर्या नेहे, गजानन साबळे, पार्थ भेंडेकर, अक्षय तेलोरे, नवनाथ पाटोळे, गौरव पुंडे, निखील सुक्रे आदींनी परिश्रम घेतले.

विजेत्यांची यादी:
प्रथम क्रमांक –  वैशाली तायडे, बुलढाणा
द्वितीय क्रमांक –  सचिन चव्हान, अहिल्यानगर

तृतीय क्रमांक-  पंकज गवळी, नाशिक

विशेष लक्षवेधी- चैताली कापसे, नाशिक

उत्तेजनार्थ प्रथम –  निलेश तुरके, यवतमाळ

उत्तेजनार्थ द्वितीय – सिद्राम सोळंके, बीड

• पिपल चॉईस अवार्ड *

प्रथम क्रमांक – कोड क्रमांक – १
विद्या जाधव, पुणे
द्वितीय क्रमांक – कोड क्रमांक – २५
नयन कांबळे, कोल्हापूर
तृतीय क्रमांक – कोड क्रमांक – २२

कै. सौ. तिलोत्तमा प्रकाश निफाडकर स्मृती कर्मयोगिनी पुरस्काराने मीरा शिंदे यांचा गौरव

पुणे : आई क्षणोक्षणी आपल्या भोवतीच असते. ती शरीर रूपाने आपल्या जवळ नसली तरी तिचे अस्तित्व आपल्या भोवती धुक्यासारखे लपेटलेले असते. सागरासारखी व्याप्ती असलेल्या आईच्या मनाचा तळ शोधणे सोपे नाही. आईचे आईपण आपल्यात ओतप्रोत भरून घेतल्यानंतर आपल्याला आई कळते, असे प्रतिपादन ज्येष्ठ कवयित्री, लेखिका मीरा शिंदे यांनी केले. आईच्या आठवांचा जागर पुरस्कार रूपाने करणे ही मोलाची गोष्ट आहे. कर्मयोगिनी पुरस्कार म्हणजे आईचा आशीर्वाद होय, असेही त्या म्हणाल्या.
कै. सौ. तिलोत्तमा प्रकाश निफाडकर यांच्या स्मरणार्थ यंदाच्या कर्मयोगिनी पुरस्काराने मीरा शिंदे यांचा गौरव करण्यात आला. सत्काराला उत्तर देताना त्या बोलत होत्या. पुरस्काराचे वितरण कवयित्री मृणालिनी कानिटकर-जोशी यांच्या अध्यक्षतेखाली आयोजित कार्यक्रमात करण्यात आले. महाराष्ट्र साहित्य परिषदेचे कार्यवाह ॲड. प्रमोद आडकर यांची प्रमुख उपस्थिती होती. भारतीय विचार साधना सभागृहात कार्यक्रमाचे आयोजन करण्यात आले होते. कवयित्री तनुजा चव्हाण यांच्या आईंच्या स्मृतिप्रित्यर्थ दिल्या जाणाऱ्या पुरस्काराचे यंदाचे सहावे वर्ष आहे. नितीन चव्हाण या वेळी मंचावर होते. ज्येष्ठ विचारवंत, महाराष्ट्र राज्य विश्वकोष मंडळाचे अध्यक्ष राजा दीक्षित, ज्येष्ठ कवयित्री अंजली कुलकर्णी आदी उपस्थित होते.
मीरा शिंदे पुढे म्हणाल्या, आईचे आशीर्वाद आणि आठव मनात धरून आपण आयुष्यातील अनेक चढउतारांना सामोरे जाऊ शकतो. या पुरस्काराच्या निमित्ताने आईच्या आईपणाचा जागर होत आहे.
अध्यक्षपदावरून बोलताना मृणालिनी कानिटकर-जोशी म्हणाल्या, कर्मयोगिनी पुरस्कारामागील भावना मोलाची आहे. हा पुरस्कार फक्त कवितेचाच नव्हे तर कवयत्रीचा देखील आहे. मीरा शिंदे यांच्या कविता राजस, डौलदार आणि ऋजू असून अंतर्मुख भावनेतून व्यक्त झालेल्या आहेत. निसर्गाने दिलेल्या कवितेच्या दानाची कोमल ऱ्हदयाने काळजी घेत मीरा शिंदे साहित्य क्षेत्रात कार्यरत आहेत.
ॲड. प्रमोद आडकर म्हणाले, तनुजा चव्हाण यांनी आईच्या नावाने दिलेल्या कर्मयोगिनी पुरस्काराने त्यांच्या स्मृती जतन केल्या आहेत. कविता म्हणजे केवळ शब्द नव्हे तर ती तुमच्या गालावरील आसवे पुसते, कधी वार करणारी तलवार बनते. कधी पाठीवर मित्रत्वाचा हात ठेवते. समाजात घडणाऱ्या चांगल्या-वाईट घटना, मनातील घुसमट, विचारांची गर्दी कवी मन टिपते आणि त्यातून कविता निर्माण होते.
सुरुवातीस तनुजा चव्हाण यांनी पुरस्कारमागील भूमिका विशद केली तर प्रास्ताविक नितीन चव्हाण यांनी केले.
पुरस्कार वितरण सोहळ्यानिमित्त आयोजित करण्यात आलेल्या निमंत्रितांच्या कविसंमेलनात भारती पांडे, माधव हुंडेकर, मिलिंद धेंडे, कांचन सावंत, नूतन शेटे, सुजित कदम, ऋचा कर्वे, चंचल काळे, अतुल कुलकर्णी, राहुल शिंदे यांचा सहभाग होता. कार्यक्रमाचे सूत्रसंचालन व आभार प्रदर्शन शिल्पा देशपांडे यांनी केले.

पुणे : ‘शहरात वाहतुकीचा प्रश्न बिकट होत असून, पुणेकरांना वाहतूक कोंडीतून मुक्त करण्यासाठी कात्रज ते येरवडा हा भुयारी मार्ग महत्त्वाची भूमिका बजाविणार आहे. दोन्ही बाजूंनी प्रत्येकी तीन मार्गिका करण्याचे नियोजन असून, मेट्रोसाठी त्याच्या बाजूने अजून एक मार्ग तयार करता येईल का, याचा अभ्यास केला जात आहे. पुढील पाच वर्षांत हा संपूर्ण प्रकल्प पूर्ण करण्याचे नियोजन आहे,’ असे उपमुख्यमंत्री आणि पुण्याचे पालकमंत्री अजित पवार यांनी सांगितले.
पुणे महापालिकेच्या अमृतमहोत्सवानिमित्त अजित पवार यांनी पुणे महापालिकेला भेट देऊन पुणेकरांना शुभेच्छा दिल्या. या वेळी पत्रकारांशी बोलताना ते म्हणाले, ‘पुणे शहराचा विस्तार होत असून, वाहतूक कोंडीचा प्रश्न गंभीर होत चालला आहे. भुयारी मार्ग यावर उपाय आहे. तो करण्यासाठी सर्वेक्षण करण्यात आले आहे. शहरातील विविध भागांतील नागरिकांनादेखील या रस्त्याचा उपयोग करता यावा, यासाठी सुरुवातीला केवळ दोन ठिकाणी बाहेर पडण्यासाठी आणि आत जाण्यासाठी रस्ता उपलब्ध करून दिला जाणार होता. मात्र, आता यामध्ये वाढ करावी लागेल.’‘भुयारी मार्ग तयार करताना अत्याधुनिक यंत्रणेचा वापर केला जात असल्याने त्याचा शहरातील दैनंदिन कामांवर काहीही परिणाम होणार नाही. एका वेळी दोन्ही बाजूंनी काम सुरू करून हे काम मार्गी लावता येईल. या रस्त्याचे काम कमी वेळेत पूर्ण व्हावे, यासाठी चार ठिकाणांवरून कामाला सुरुवात करण्याचे नियोजन आहे. ये-जा करण्यासाठी दोन्ही बाजूंनी तीनपदरी मार्ग केले जाणार आहेत. तसेच, याच्या बाजूनेच मेट्रो प्रकल्पाचा चौथा मार्ग करता येईल का, याचादेखील अभ्यास केला जात आहे,’ असे पवार म्हणाले.

GBS कोंबड्यांचे कच्चे मांस खाणे हे देखील एक कारण

सिंहगड रस्त्यावरील खडकवासला, किरकिटवाडी आणि आजूबाजूच्या परिसरामध्ये गुइलेन बॅरे सिंड्रोमचे (जीबीएस) रुग्ण वाढण्यामागे दूषित पाणी हे केवळ एक कारण नाही, तर कोंबड्यांचे कच्चे मांस खाणे हे देखील एक कारण आहे,’ अशी माहिती समोर आली आहे. राज्याचे उपमुख्यमंत्री आणि पुण्याचे पालकमंत्री अजित पवार यांनीच याबाबत माहिती दिली आहे.‘नागरिकांनी मांस खाताना ते शिजवून खावे. या भागातील कोंबड्या मारू किंवा जाळून टाकू नका. हा आजार अधिक वाढू नये, यासाठी नक्की काय केले पाहिजे, कोणत्या उपाययोजना करण्याची गरज आहे, याबाबत मार्गदर्शन करणारी माहिती नागरिकांना द्यावी, अशा सूचना विभागीय आयुक्तांसह आरोग्य खात्याच्या अधिकाऱ्यांना केल्या आहेत’.कोंबड्यांचे मांस खाल्याने हा आजार होत असला तरी कोंबड्यांना मारून टाकण्याची किंवा जाळून टाकणं असे करणे आवश्यक नाही. नागरिकांनी कच्चे मांस न खाता ते चांगल्या प्रकारचे शिजवून मगच खावे, असे स्पष्टीकरण पवार यांनी दिले.

उपमुख्यमंत्री अजित पवार म्हणाले, ‘पुण्यापेक्षा पिंपरी-चिंचवडचा विस्तार अधिक होणार असून, २०५४ पर्यंत पिंपरी-चिंचवडची लोकसंख्या पुण्यापेक्षा अधिक असेल. या दोन्ही शहरांतील नागरिकांच्या पाणीपुरवठा, घनकचरा व्यवस्थापन या गरजा भागविण्यासाठी आतापासून नियोजन करावे लागणार आहे. मुळशी धरणातील पाणी पिण्यासाठी वापरण्यास मिळावे, यासाठी मुख्यमंत्री देवेंद्र फडणवीस यांच्याशी चर्चा सुरू आहे.’‘स्थानिक स्वराज्य संस्थांच्या रखडलेल्या निवडणुका लवकरात लवकर व्हाव्यात, यासाठी राज्य सरकारकडून प्रयत्न केले जात आहेत. या निवडणुकींचा मार्ग मोकळा व्हावा, यासाठी सर्वोच्च न्यायालयात चांगले वकील देऊन हा प्रश्न सोडविण्याचा प्रयत्न आहे. इतर मागासवर्गीयांसह (ओबीसी) सर्व घटकांना आरक्षण देऊन या निवडणुका होण्यासाठी प्रयत्नशील आहे,’ असे अजित पवार यांनी सांगितले.
‘आमदार सुरेश धस यांनी मंत्री धनंजय मुंडे यांची आजारी असल्याने भेट घेतली. माणुसकीच्या नात्याने हे केले असेल, तर त्यात गैर नाही,’ असे अजित पवार यांनी सांगितले. तसेच, फडणवीस आणि शिंदे यांच्यात कोणतेही शीतयुद्ध सुरू नसल्याचा निर्वाळा त्यांनी दिला. ‘या बातम्या धादांत खोट्या आहेत,’ असे ते म्हणाले.

पुणे, दि. १५: पुणे महानगरपालिकेच्या अमृत महोत्सवानिमित्त महानगरपालिकेच्या प्रांगणात आयोजित कार्यक्रमास उपमुख्यमंत्री तथा जिल्ह्याचे पालकमंत्री अजित पवार यांनी भेट देऊन शुभेच्छा दिल्या.

यावेळी उच्च व तंत्र शिक्षण मंत्री चंद्रकांत पाटील, महाराष्ट्र राज्य महिला आयोगाच्या अध्यक्षा रुपाली चाकणकर, नगरविकास राज्यमंत्री माधुरी मिसाळ, खासदार सुनील तटकरे, आमदार विजय शिवतारे, चेतन तुपे, सिद्धार्थ शिरोळे, महानगरपालिका आयुक्त डॉ. राजेंद्र भोसले, पिंपरी चिंचवड मनपा आयुक्त शेखर सिंह तसेच लोकप्रतिनिधी उपस्थित होते.

यावेळी श्री. पवार यांनी प्रांगणातील छत्रपती शिवाजी महाराज, महात्मा ज्योतिबा फुले व महामानव डॉ. बाबासाहेब आंबेडकर यांच्या पुतळ्यास पुष्प अर्पण करुन अभिवादन केले. यावेळी विविध मान्यवर तसेच महानगरपालिकेतील अधिकारी- कर्मचारी मोठ्या संख्येने उपस्थित होते.

0000

पुणे, दि.१५: राज्य सरकारच्यावतीने पोलीस दलाकरीता नवीन कार्यालये, वाहने, सीसीटिव्ही,अत्याधुनिक तंत्रज्ञान अशा प्रकारच्या पायाभूत सुविधा उपलब्ध करुन देण्यात आल्या आहेत. पोलिसांनी गेल्या काही वर्षांमध्ये अतिशय नेत्रदीपक अशा प्रकारची कामगिरी केलेली असून येत्या काळातही सामान्य नागरिकांना दिलासा देण्याचे काम राज्यातील पोलीस दल करेल, अशी अपेक्षा मुख्यमंत्री देवेंद्र फडणवीस यांनी व्यक्त केली.

पुणे शहर पोलीस आयुक्तालयातर्फे शिवाजीनगर येथील पोलीस मुख्यालयात आयोजित ‘तरंग-२०२५’ कार्यक्रमाप्रसंगी ते बोलत होते. यावेळी उपमुख्यमंत्री तथा जिल्ह्याचे पालकमंत्री अजित पवार, केंद्रीय सहकार राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांतदादा पाटील, नगरविकास राज्यमंत्री माधुरी मिसाळ, खासदार सुनेत्रा पवार, सुनील तटकरे, आमदार अमित गोरखे, योगेश टिळेकर, विजय शिवतारे, सुनील कांबळे, सिद्धार्थ शिरोळे, सुनील शेळके, हेमंत रासने, राज्य महिला आयोगाच्या अध्यक्षा रुपाली चाकणकर, विभागीय आयुक्त डॉ. चंद्रकांत पुलकुंडवार, पुणे शहर पोलीस आयुक्त अमितेश कुमार, सहपोलीस आयुक्त रंजनकुमार शर्मा, जिल्हाधिकारी जितेंद्र डूडी, पुनीत बालन यांच्यासह विविध क्षेत्रातील मान्यवर आदी उपस्थित होते.

श्री. फडणवीस म्हणाले, पुणे हे महाराष्ट्रातील अत्यंत महत्त्वाचे शहर असून ते राज्याचे उत्पादन व तंत्रज्ञानाचे हब आहे; शहरात आंतरराष्ट्रीय पातळीवरील विविध नागरिक याठिकाणी येत असतात. त्यामुळे शहरातील कायदा व सुव्यवस्था सुस्थितीत राखण्यासोबत वाहतूकीच्या नियमांचे पालन झाले पाहिजे. नागरिकांना उत्तमप्रकारच्या सेवा देवून त्यांना न्याय दिला पाहिजे, अपराध घडल्यानंतर अपराध्यांना शिक्षा झाली पाहिजे या गोष्टीवर प्रचंड भर पुणे पोलिसांच्या माध्यमातून देण्यात येत असतो. पुणे पोलीसांनी गंभीर घटनेच्यावेळी चांगल्या प्रकारे जलद प्रतिसाद देत त्या घटनांचा उलगडा केलेला आहे. त्यामधील आरोपींना जेरबंद करुन शिक्षा मिळत आहे, हे आपल्याकरीता अधिक महत्त्वाचे आहे. यापुढेही पुण्यासारख्या शहरांमध्ये अधिकाधिक घटनेच्या अनुषंगाने पोलिसांचा प्रतिसादाचा वेळ कमीत कमी असला पाहिजे. पोलिसांचा वावर नागरिकांना जाणवला पाहिजे.

पोलीसांच्या कामकाजात तंत्रज्ञानाचा अधिकाधिक वापर करण्याच्यादृष्टीने देशातील सगळयात चांगला सायबर फ्लॅटफॉर्म राज्याने निर्माण केला आहे. केंद्र शासनाने १९४५ हा क्रमांक राज्याकरीता दिला असून तक्रारदाराला २४ तासाच्या आत कारवाई करुन अहवाल देण्यात येत आहे. पोलीस दलातील अधिकारी व कर्मचाऱ्यांना चांगल्या आरोग्यदायी वातावरणात जगता यावे, याकरीता पोलीस कल्याणाच्यामाध्यमातून आरोग्य, निवासस्थाने अशा अनेक गोष्टी राज्यशासनाने अजेंडावर घेवून मार्गी लावण्याचा प्रयत्न केला आहे.

नागरिकांना उत्सव चांगल्याप्रकारे साजरा करता यावा, याकरीता राज्यातील पोलीस दल २४ तास बंदोबस्त करीत असतात, उत्सवाच्या काळात कुटुंबापासून दूर राहावे लागते, म्हणून अशा पोलिसांना आपल्या परिवारासोबत एखादा उत्सव साजरा करता यावा, याकरीता पुणे शहर पोलीस आयुक्तालयाच्यावतीने पोलिसांचा उत्सव म्हणून ‘तरंग’एक अतिशय सुंदर असा हा कार्यक्रम आयोजित केला आहे. पोलीस दलातील अधिकारी-कर्मचारी आपल्या जीवाची पर्वा न करता सामान्य नागरिकांच्या जीवनामध्ये हास्य असले पाहिजे, त्यांना सुखशांती मिळाली पाहिजे, अपराधापासून मुक्ती मिळाली पाहिजे याकरीता पोलीस काम करीत असतात, अशा उत्तम कामगिरी करणाऱ्या पोलीस अधिकारी व कर्मचाऱ्यांचा सत्कार करुन त्यांचे अभिनंदन करुन यापुढेही अशाच प्रकारचे चांगले काम करतील, अशी अपेक्षा श्री.फडणवीस यांनी व्यक्त केली.

श्री. पवार म्हणाले, राज्यात कायदा व सुव्यवस्था सुस्थितीत राहिले पाहिजे, जातीय सलोखा राहिला पाहिजे, शहरातील वाहतूक कोंडी सुटली पाहिजे, नागरिकांना होणारा त्रास टाळण्यासाठी ‘कॉप-२४’ या उपक्रमाची सुरुवात करण्यात आली. कायदा व सुव्यवस्था सुस्थितीत ठेवण्याकरीता पोलीस दलाला पायाभूत सुविधा उपलब्ध करुन देण्यात येत असून यापुढेही राज्य सरकार कमी पडणार नाही. नागरिकांनीही आपली जबाबदारी नीटपणे पार पाडावी, असे आवाहन श्री. पवार म्हणाले.

श्री. कुमार म्हणाले, पुणे शहर पोलीस आयुक्तालयाच्यावतीने मागील एक वर्षात लोकसभा व विधानसभा निवडणूक यशस्वीपणे पार पाडण्यासोबत गुन्हेगारीला आळा घालण्याकरिता विविध उपाययोजना करण्यात आल्या. यापुढे अधिक जोमाने करुन नागरिकांना दिलासा देण्याचा प्रयत्न करण्यात येईल,असे श्री. कुमार म्हणाले.

मुख्यमंत्री श्री. फडणवीस यांच्या हस्ते कॉप-२४ उपक्रमाअंतर्गत दुचाकी व चारचाकी वाहनांना हिरवी झेंडी दाखवून लोकार्पण करण्यात आले. तसेच कार्यक्रमात उल्लेखनीय कामगिरी करणाऱ्या पोलीस अधिकारी, कर्मचारी व त्यांचे पाल्यांचा सन्मान करण्यात आला.

कार्यक्रमापूर्वी पुणे शहर पोलीस आयुक्तालयाच्या कार्याची चित्रफीत दाखविण्यात आली.

आंतरमहाविद्यालयीन स्पोर्ट्स लीग शिअरफोर्स स्पर्धा ; विवेकानंद इन्स्टिट्यूट ऑफ टेक्नॉलॉजी पद्मभूषण डॉ. वसंतदादा पाटील कॉलेज ऑफ आर्किटेक्चरतर्फे आयोजन
पुणे : मराठवाडा मित्र मंडळ कॉलेज ऑफ आर्किटेक्चर (एमएमसीओए), सिंहगड कॉलेज ऑफ आर्किटेक्चर या संघांनी विवेकानंद इन्स्टिट्यूट ऑफ टेक्नॉलॉजी, पद्मभूषण डॉ. वसंतदादा पाटील कॉलेज ऑफ आर्किटेक्चरच्या वतीने आयोजित आर्किटेक्चर महाविद्यालयांच्या आंतरमहाविद्यालयीन स्पोर्ट्स लीग शिअरफोर्समधील फुटबॉल स्पर्धेत आपापल्या प्रतिस्पर्ध्यावर मात केली.
वानवडी येथील एस. आर. पी. एफ.च्या मैदानावर ही स्पर्धा सुरू आहे. मुलांच्या फुटबॉलमध्ये ‘एमएमसी’ने पद्मभूषण डॉ. वसंतदादा पाटील कॉलेज ऑफ आर्किटेक्चर संघावर १-०ने मात केली. यात यश कापडीने लढतीच्या २०व्या मिनिटाला केलेला गोल निर्णायक ठरला. यानंतर सिंहगड कॉलेजने भारतीय कला प्रशिक्षण संस्था संघाचा ३-१ने पराभव केला. सिंहगड कॉलेजकडून शार्दूल वरपेने हॅट्ट्रिक नोंदवली. त्याने लढतीच्या २८, ३० आणि ३७व्या मिनिटाला गोल केले. भारतीय कला संघाकडून एकमेव गोल प्रसाद काकडेने (३६ मि.) केला. 
यानंतर कोल्हापूरच्या डॉ. ज्ञानदेव यशवंतराव पाटील स्कूल ऑफ आर्किटेक्चर संघाने ब्रिक स्कूल ऑफ आर्किटेक्चर संघाचे आव्हान ४-१ने परतवून लावले. कोल्हापूरच्या संघाकडून आर्यन खवटे (२३ मि.), अनिश पवार (३४ मि.), वेदांत खारशिंगे (३६ मि.) आणि सुजल हळदे (४० मि.) यांनी गोल केले. 
मुलींच्या गटातील फुटबॉल लढतीत सिंहगड कॉलेज ऑफ आर्किटेक्चर आणि ब्रिक स्कूल ऑफ आर्किटेक्चर या संघांतील लढत गोलशून्य बरोबरीत सुटली. यानंतर वाशिंक मोरेच्या (१५ मि.) एकमेव गोलच्या जोरावर श्रीमती काशीबाई नवले कॉलेज ऑफ आर्किटेक्चर संघाने मराठवाडा मित्रमंडळ कॉलेज ऑफ आर्किटेक्चरला १-०ने नमविले. यानंतर पिंपरी-चिंचवडच्या एस. बी. पाटील कॉलेज ऑफ आर्किटेक्चर संघाने पद्मभूषण डॉ. वसंतदादा पाटील कॉलेज ऑफ आर्किटेक्चर संघावर १-०ने मात केली. यात विजेत्या संघाकडून समीक्षा पाटीलने (१२ मि.) एकमेव गोल केला.

इतर निकाल : बास्केटबॉल मुले – डॉ. ज्ञानदेव यशवंतराव पाटील स्कूल ऑफ आर्किटेक्चर, आकुर्डी – २७ वि. वि. सिंहगड कॉलेज ऑफ आर्किटेक्चर – १३; डॉ. ज्ञानदेव यशवंतराव पाटील स्कूल ऑफ आर्किटेक्चर, आकुर्डी – २३ वि. वि. पद्मभूषण डॉ. वसंतदादा पाटील कॉलेज ऑफ आर्किटेक्चर – १३; ब्रिक स्कूल ऑफ आर्किटेक्चर – ३२ वि. वि. मराठवाडा मित्रमंडळ कॉलेज ऑफ आर्किटेक्चर – २४.
मुली – भानूबेन नानावटी कॉलेज ऑफ आर्किटेक्चर – १९ वि. वि. डॉ. ज्ञानदेव यशवंतराव पाटील स्कूल ऑफ आर्किटेक्चर, आकुर्डी – ३;मराठवाडा मित्रमंडळ कॉलेज ऑफ आर्किटेक्चर – २५ वि. वि. सिंहगड कॉलेज ऑफ आर्किटेक्चर -४; भानूबेन नानावटी कॉलेज ऑफ आर्किटेक्चर – १५ वि. वि. पद्मभूषण डॉ. वसंतदादा पाटील कॉलेज ऑफ आर्किटेक्चर – ४.
व्हॉलिबॉल – मुले – मराठवाडा मित्रमंडळ कॉलेज ऑफ आर्किटेक्चर वि. वि. आयोजन स्कूल ऑफ डिझाईन २५-२१, २५-९; एस. बी. पाटील कॉलेज ऑफ आर्किटेक्चर, पिंपरी-चिंचवड वि. वि. डॉ. ज्ञानदेव यशवंतराव पाटील कॉलेज ऑफ आर्किटेक्चर, अंबी २५-४, २५-७.
मुली – मराठवाडा मित्रमंडळ कॉलेज ऑफ आर्किटेक्चर वि. वि. एस. बी. पाटील कॉलेज ऑफ आर्किटेक्चर, पिंपरी-चिंचवड २५-१४, २५-९; सिंहगड कॉलेज ऑफ आर्किटेक्चर वि. वि. भानूबेन नानावटी कॉलेज ऑफ आर्किटेक्चर २२-२५, २५-१८, १६-१४; डॉ. ज्ञानदेव यशवंतराव पाटील स्कूल ऑफ आर्किटेक्चर, आकुर्डी वि. वि. श्रीमती काशीबाई नवले कॉलेज ऑफ आर्किटेक्चर २५-९, २५-९.

वामनीकॉमच्या सहकार्यामुळे आंतरराष्ट्रीय सिकटॅब परिषद पार पडली – मुरलीधर मोहोळ

आंतरराष्ट्रीय सिकटॅब परिषदेची सांगता

             पुणे –  सिकटॅब आंतरराष्ट्रीय परिषदेची सांगता भारत सरकारचे सहकार आणि नागरी विमान वाहतूक राज्यमंत्री मुरलीधर मोहोळ यांच्या प्रमुख उपस्थितीत पार पडली. या प्रसंगी ग्रामीण विकास, कृषी आणि वनीकरण मंत्रालय, लाओ पीडीआरचे उपमहासंचालक अनोसॅक फेंगथिमावोंग,
गांबिया सहकाराचे रजिस्ट्रार जनरल ॲबा जिब्रिल संकरेह, पुण्यातील नॅशनल इन्स्टिट्यूट ऑफ बँक मॅनेजमेंट संस्थेचे संचालक प्रा. पार्थ रे, इंस्टिट्यूट ऑफ रुरल मॅनेजमेंट गुजरातचे उमाकांत दास वामनिकॉम व
सिकटॅबच्या संचालक डॉ. हेमा यादव आदी मान्यवर उपस्थित होते. या परिषदेमध्ये मॉरिशस, बँकोक, नेपाल, श्रीलंका, केनिया, भूतान, नामबिया, झांबिया अशा विविध 12 देशातील तसे भारतातील विविध राज्यातील सहकार क्षेत्रातील दिग्गज मान्यवर, नेते, धोरणकर्ते आणि सहकारी तज्ञ एकत्र आले होते.

मोहोळ म्हणाले की  २०२५ हे आंतरराष्ट्रीय सहकार वर्ष म्हणून त्याची घोषणा झाली आहे. याचेच औचित्य साधून वामनीकॉममध्ये तीन दिवसीय सिकटॅब ही आंतरराष्ट्रीय परिषद पार पडली. या परिषदेमध्ये बारा देशातून 36 प्रतिनिधींनी सहभाग घेतला होता. वामनीकॉममध्ये चांगले प्रकारचे परिसंवाद या परिषदेच्या माध्यमातून पार पडले. सहकार क्षेत्रात वामनीकॉम संस्थेचे योगदान वाखाणण्याजोगे आहे. ते पुढे म्हणाले की ग्रामीण भागात सहकार क्षेत्रामुळे शाश्वत विकास झाला आहे. सहकारी बँका यांना देखील बळकटीकरण करण्यासाठी भाजप सरकारने विशेष प्रयत्न केले आहेत.  

डॉ. हेमा यादव म्हणाल्या कि  वामनिकॉम येथे  तीन दिवसीय चाललेल्या या परिषदेमध्ये सहकार क्षेत्रातील  विविध मान्यवरांनी मार्गदर्शन केले. यावेळी वामनिकॉम सहकार क्षेत्रातील दिग्गज मान्यवरांनी विचारांची देवाण घेवाण तसेच सहकार क्षेत्रातील विविध विषयांवर चर्चा करण्यात आली. या परिषदेच्या माध्यमातून भविष्यकाळात भारताबरोबर  आशिया खंडातील देशांना याचा फायदा होणार आहे.  सिकटॅब परिषदेच्या माध्यातून ग्रामीण भागात देखील रोजगाराच्या संधी उपलब्द होणार असून वामनिकॉम संस्थेतील अनेक विध्यार्थीना देशाच्या कानाकोपऱ्यात तसेच जगभरात त्यांना सहकार क्षेत्रात रोजगार मिळणार आहे. 

परिषदेचे प्रास्ताविक डॉ. हेमा यादव यांनी केले. तर सूत्रसंचालन सोनल कदम यांनी सूत्रसंचालन केले आणि परिषदेचे आभार डॉ. शंतनू घोष यांनी मानले.

तीन दिवसीय सिकटॅब परिषदेत बारा देशांचा सहभाग

तीन दिवसीय सिकटॅब परिषदेत बारा देशांचा सहभाग होता. या परिषदेमध्ये सहकार क्षेत्रातील विविध विषयांवर चर्चा करण्यात आली. शेती, शेतकरी, शेतविषय धोरणे, अर्थव्यवस्था, सहकार क्षेत्रात आलेली डिजिटल कार्यप्रणाली, यु.पी.आय प्रणाली अशा विविध बाबींवर चर्चा करण्यात आली.