अपघातातील जखमींवर तातडीने उपचार सुरु;
मृतांच्या नातेवाईकांना चार लाखांची मदत

मुंबई, दि. 11 :- पुणे जिल्ह्यातील पाईट (ता. खेड) येथे श्री क्षेत्र कुंडेश्वराच्या दर्शनासाठी जात असताना महिलांना घेऊन जाणारी पिकअप गाडी खोल दरीत कोसळून झालेला अपघात अत्यंत दुर्दैवी आणि वेदनादायी आहे. या अपघातातील जखमींना तातडीने उपचार मिळावेत, तसेच अपघातग्रस्तांना सर्वतोपरी मदत करण्यात यावी, यासाठी प्रशासनाला आवश्यक त्या सूचनाही देण्यात आल्या आहेत. या दुर्घटनेत प्राण गमावलेल्या माता-भगिनींना भावपूर्ण श्रद्धांजली अर्पण करतो. मृतांच्या कुटुंबीयांप्रती सहसंवेदना व्यक्त करत, या कठीण प्रसंगात शासन त्यांच्या सोबत ठामपणे उभे असल्याचा विश्वास, उपमुख्यमंत्री तथा पुणे जिल्ह्याचे पालकमंत्री अजित पवार यांनी व्यक्त केला आहे.

आपल्या संदेशात उपमुख्यमंत्री अजित पवार म्हणतात की, पाईट येथे झालेल्या या अपघाताची माहिती मिळताच स्थानिक नागरिकांच्या मदतीने प्रशासन, पोलीस व आरोग्य विभागाने तातडीने बचाव व मदतकार्य सुरू केले. जखमींना जवळच्या शासकीय तसेच खाजगी रुग्णालयात दाखल करून तातडीने उपचार सुरु करण्यात आले आहेत. जखमींना आवश्यक सर्व वैद्यकीय मदत व उपचार उपलब्ध करून देण्याचे निर्देश संबंधित अधिकाऱ्यांना दिले आहेत. तसेच वरिष्ठ अधिकाऱ्यांना घटनास्थळी जाऊन मदत व बचावकार्य वेगाने पार पाडण्याचे आदेश दिले आहेत. मृतांच्या कुटुंबीयांना राज्य सरकारतर्फे चार लाख रुपयांची आर्थिक मदत देण्यात येणार आहे. राज्य शासन या संकटाच्या काळात अपघातग्रस्त नागरिक व त्यांच्या कुटुंबीयांच्या पाठीशी खंबीरपणे उभे असल्याची माहिती, उपमुख्यमंत्री अजित पवार दिली आहे.

पुणे- जिल्ह्यातल्या कुंडेश्वर येथे महादेवाच्या दर्शनाला जाणारी पिकअप व्हॅन उलटून 9 महिला भाविकांचा मृत्यू झाल्याची घटना आज दुपारी घडली. या अपघातामध्ये जवळपास 35 भाविक जखमी झाल्याचे समजते.पुणे जिल्ह्यातल्या राजगुरूनगर तालुक्यात पाईट येथील कुंडेश्वर येथे महादेवाचे सुप्रसिद्ध मंदिर आहे. श्रावणी सोमवारनिमित्त येथे दर्शनासाठी भाविकांची गर्दी होते. या भाविकांच्या व्हॅनचा अपघात झाल्याची घटना घडली आहे.

पुणे जिल्ह्यात पाईट नावाचे गाव आहे. येथील कुंडेश्वर मंदिर प्रसिद्ध आहे. पुण्यापासून साधारणतः दीड तासाच्या अंतरावर निसर्गरम्य ठिकाणी हे मंदिर असून, येथे भाविकांची मोठी गर्दी असते. श्रावणी सोमवारचे निमित्त साधून आज सकाळी अकराच्या सुमारास भाविकांची एक व्हॅन कुंडेश्वर येथे निघाली होती. मात्र, चालकाचे भरधाव वेगात असलेल्या वाहनावरील नियंत्रण सुटून ते दरीत कोसळले. वाहनाने तब्बल पाच-सहा पलट्या खाल्ल्या. रस्त्यावर रहदारी असल्याने तातडीने स्थानिक लोकांनी खासगी वाहने व 10 हून अधिक ॲब्युलेन्सद्वारे अपघातग्रस्त महिलांना रुग्णालयात दाखल केले. उपचारापूर्वीच 7 महिलांचा जागीच मृत्यु झाला , तर दोन जणींचा रुग्णालयात नेले असताना वाटेतच मृत्यू झाला. सध्या 35 हून अधिक जण गंभीर जखमी झाले आहेत.घाट चढताना अचानक व्हॅन मागे आली. त्यामुळे ही घटना घडल्याचे समजते. अपघातामधील मृत आणि जखमी भाविक पापळवाडी येथील असल्याचे समजते. यातील जखमींवर सध्या पाईट येथील ग्रामीण रुग्णालयात उपचार सुरू आहेत. मदतीसाठी स्थानिकांनी धाव घेतली. त्यामुळे अनेकांना वेळेवर उपचार मिळाले. अपघाताच्या घटनेचा खेड पोलिसांनी तपास सुरू केला आहे.

महावितरण मोबाईल ॲप व संकेतस्थळावर ऑनलाईन सेवा उपलब्ध

      पुणे, दि. ११ ऑगस्ट २०२५ – खरेदी-विक्री, बक्षीस पत्र, मृत्यू, वारसा आदी कारणांमुळे मिळकतीच्या मालकी हक्कात/नावात बदल होत असतो. तसाच बदल वीजग्राहकाला त्याच्या वीजबिलावरील नावातही करावा लागतो. ­­­­‘नावात बदल’ करण्यासाठी वीजग्राहकांना आता घरबसल्या व ऑनलाईन अर्ज करता येतो. त्यासाठी महावितरणच्या कार्यालयात जाण्याची गरज नाही. महावितरणच्या मोबाईल ॲपवर व wss पोर्टलवर ही सुविधा २४ तास उपलब्ध आहे.

महावितरणच्या बहुतांश ग्राहक सेवा मोबाईल ॲप व संकेतस्थळावर उपलब्ध आहेत. ग्राहकाला स्वत:चा ‘युजर नेम’ आयडी तयार करुन घरबसल्या ऑनलाईन सेवांचा लाभ घेता येतो. नवीन कनेक्शनसाठी अर्ज करणे, वीजबिल पाहणे, भरणे, तक्रारी नोंदवणे, त्याचा पाठपुरावा करणे, रिडींग नोंदवणे, वीजबिल भार कमी/जास्त करणे, जुन्या बिलांचा इतिहास, बिल कॅलक्युलेटर यांसह नावात बदल करणे ही प्रमुख सुविधा देखील मोबाईल ॲप तसेच https://wss.mahadiscom.in/wss/wss या वेबपोर्टलवर उपलब्ध आहेत.

      महावितरणचे राज्यभरात सुमारे तीन कोटींहून अधिक ग्राहक आहेत. तसेच दरवर्षी काही लाख ग्राहकांची भर त्यात पडते. खरेदी-विक्री, बक्षीस पत्र, मृत्यू, वारसा, विभक्त कुटुंब पध्दती आदींमुळे मिळकतीचे नावे बदल असतात. मालकी हक्कात नाव बदलल्यास इतर विभागाप्रमाणे वीजबिलाच्या नावात बदल करणेही गरजेचे असते. त्यासाठी पूर्वी कार्यालयात जाणे अपरिहार्य होते. विविध अर्जासोबत ‘प्रपत्र उ’ भरावे लागे. तर पुराव्यासाठी बरीच कागदपत्रे जोडावी लागायची. ‘प्रपत्र उ’ मोबाईल ॲपवर उपलब्ध आहे. मिळकतीचे नाव बदलल्याचा पुरावा व सुरक्षा ठेव नवीन ग्राहकांच्या नावे करण्यासाठी ‘Form X’ याचा फोटो काढून अपलोड केला की नाव बदलण्याची प्रक्रिया पूर्ण होते. येणाऱ्या बिलामध्ये नाव बदलून येते.

ॲप नोंदणी कशी कराल…

महावितरण ॲप इन्स्टॉल केल्यास सर्वप्रथम भाषा निवडावी नोंदणी करण्यासाठी सदस्य बना/ Don’t have account sign up वर क्लिक करावे. त्यानंतर 12 अंकी वीजग्राहक क्रमांक, मोबाईल क्रमांक, ईमेल, प्रवेशाचे नाव (Login ID) व पासवर्ड टाकून नोंदणी करावी. नोंदणी झाल्यानंतर login केल्यास सर्व परवानग्या (permissions) स्विकाराव्यात म्हणजे आपले ॲप विनासायस काम करु शकेल.

नावात बदल करण्यासाठी…

ॲपच्या डाव्या कोपऱ्यात सेवांची लिंक दिली आहे. त्यात बरेच पर्याय आहेत. पैकी ‘नाव बदलाची मागणी’ पर्याय निवडावा.  ग्राहक क्रमांक निवडल्यास ‘प्रपत्र उ’ येते. बदल करावयाची किंवा नविन मालकाची माहिती भरावी. बदलाचे कारण निवडून अटी मान्य कराव्यात व पुढे जाऊन मिळकतीचा पुरावा व Form x चा फोटो काढून अपलोड करावा. माहिती अपलोड होताच नोंदणी क्रमांक मिळतो.

मोबाईल ॲप व संकेतस्थळाच्या माध्यमातून महावितरणने ग्राहकांना ऑनलाईन सेवा उपलब्ध करुन दिलेल्या आहेत. वीजग्राहकांनी घरबसल्या या सेवांचा लाभ घेऊन आपले श्रम व वेळ वाचवावा.

सुनिल काकडे,मुख्य अभियंता, महावितरण, पुणे परिमंडल

पुणे, 11 ऑगस्ट 2025: सोमेश्वर फाउंडेशन यांच्या वतीने आयोजित दुसऱ्या कै. विनायक निम्हण स्मृती करंडक ५९व्या महाराष्ट्र राज्य कॅरम अजिंक्यपद स्पर्धेत पुरुष गटात प्रशांत मोरे याने तर, महिला गटात केशर निर्गुण यांनी आपापल्या प्रतिस्पर्धी खेळाडूंचा पराभव करून विजेतेपद संपादन केले.

गोविंदा गार्डन मंगल कार्यालय, सोमेश्वर कॉर्नर, बाणेर, पुणे येथे पार पडलेल्या या स्पर्धेत पुरुष गटात अंतिम फेरीत दोन वेळच्या जागतिक विजेत्या मुंबईच्या प्रशांत मोरेने मुंबईच्या विकास धारियाचा 24-10, 25-00 असा पराभव करून विजेतेपद पटकावले. 3ऱ्या व 4थ्या क्रमांकासाठी झालेल्या लढतीत ठाण्याच्या जाईद फारुकीने रत्नागिरीच्या रियाज अलीचा 24-11, 23-20 असा पराभव करून तिसरा क्रमांक पटकावला.

महिला गटात अंतिम फेरीत सिंधुदुर्गच्या केशर निर्गुण हिने ठाण्याच्या समृद्धी घडीगावकरचा 22-17, 24-14 असा पराभव करून विजेतेपदाचा मान पटकावला. 3ऱ्या व 4थ्या क्रमांकासाठी झालेल्या लढतीत मुंबईच्या सोनाली कुमारीने मुंबई उपनगरच्या प्राजक्ता नारायणकरचा 00-25, 22-17, 20-15 असा पराभव करून तिसरे स्थान पटकावले.

यावेळी अर्जुन पुरस्कार विजेते शांताराम जाधव म्हणाले की, कॅरम खेळताना चौकस बुद्धी, एकाग्रता खूप महत्वाची असते. दिवसेंदिवस या खेळाचा प्रसार वाढत चालला असून या खेळाची लोकप्रियता देखील अशा स्पर्धांमुळे वाढत चालली आहे.

सनी निम्हण म्हणाले की, भविष्यात देखील कॅरमच्या स्पर्धा आम्ही सोमेश्वर फाउंडेशनच्या वतीने सातत्याने आयोजित करण्याचा नक्कीच प्रयत्न करत राहू.

मिलिंद दिक्षित म्हणाले की, कॅरम खेळाशी कोणत्या ना कोणत्या गोष्टीने मी नेहमीच जोडला गेलेलो आहे. कॅरमला आता स्पर्धात्मक स्वरूप तर प्राप्त झाले आहेच. पण व्यावसायिकता देखील यामध्ये आली आहे. सनी निम्हण यांच्या पुढाकाराने अशा स्पर्धेमुळे आणखी गुणवान खेळाडू घडतील आणि जागतिक स्तरावर आणखी आपले नाव उंचावतील याची मला नक्कीच खात्री आहे.

स्पर्धेतील विजेत्या व उपविजेत्या खेळाडूना करंडक व रोख रकमेची पारितोषिके देण्यात आली. स्पर्धेचे पारितोषिक वितरण अर्जुन पुरस्कार विजेते शांताराम जाधव, सोमेश्वर फाउंडेशनचे सदस्य व माजी नगरसेवक सनी निम्हण, क्रीडा व युवक सेवा संचालनालय महाराष्ट्र राज्याचे सहाय्यक आयुक्त मिलिंद दिक्षित यांच्या हस्ते करण्यात आले. यावेळी एमसीएचे चेअरमन भरत देसलडा, उपाध्यक्ष धनंजय साठे, मानद सचिव अरुण केदार, केतन चिखले आदी मान्यवर उपस्थित होते. कार्यक्रमाचे सूत्रसंचालन डॉ. सुप्रिया कुणाल यांनी केले.

पुणे- शहरातील कात्रज घाटात रंगकाम करणाऱ्या कंत्राटदाराने गळफास घेऊन आत्महत्या केली आहे. चंदर पिराजी मोहिते (वय 56) या कंत्राटदाराने मध्यरात्री कात्रज घाटातील अन्विषा लॉजमागील झाडाला गळफास घेऊन जीव दिला.

मोहिते यांच्या पत्नी शकुंतला यांनी दिलेल्या फिर्यादीनुसार, बांधकाम व्यावसायिक संतोष चोरगे यांच्याविरुद्ध आत्महत्येस प्रवृत्त केल्याचा गुन्हा भारती विद्यापीठ पोलिस ठाण्यात दाखल करण्यात आला आहे.

चंदर मोहिते हे गृहप्रकल्पातील रंगकामाचे कंत्राट घेत असत. चोरगे यांनी त्यांना तीन गृहप्रकल्पात रंगकाम करण्याचे काम दिले होते. या कामाच्या बदल्यात चोरगे यांनी मोहिते यांना एक सदनिका आणि साडेदहा लाख रुपये देण्याचे मान्य केले होते.

मोहिते यांनी परिचितांकडून हातउसने पैसे घेऊन तीनही गृहप्रकल्पांचे रंगकाम पूर्ण केले. मात्र, व्यवहारात ठरल्यानुसार चोरगे यांनी मोहिते यांना पैसे आणि सदनिका दिली नाही. मोहिते यांनी रंगकामाचे पैसे मागितले असता चोरगे यांनी त्यांना जातीवाचक शिवीगाळ केली.

शिवीगाळ आणि आर्थिक फसवणुकीमुळे मानसिक तणावात असलेल्या मोहिते यांनी आत्महत्या केल्याचे त्यांच्या पत्नीने फिर्यादीत नमूद केले आहे. सहायक पोलीस निरीक्षक एस. आवारे हे या प्रकरणाचा पुढील तपास करत आहेत.

पुणे : पुणे महानगरपालिकेने आयोजित केलेल्या ‌‘हर घर तिरंगा‌’या उपक्रमाअंतर्गत तसेच महापालिकेच्या अमृत महोत्सवानिमित्त शौर्य गाजविणाऱ्या माजी सैनिकांचा बुधवारी गौरव करण्यात येणार आहे.
कार्यक्रम बुधवार, दि. 13 ऑगस्ट 2025 रोजी सायंकाळी 5 वाजता बालगंधर्व रंगमंदिर येथे आयोजित करण्यात आला आहे. माजी सैनिकांचा गौरव महापालिका आयुक्त नवल किशोर राम यांच्या हस्ते करण्यात येणार असून अतिरिक्त आयुक्त पृथ्वीराज बी. पी., एम. जे. प्रदीपचंद्रन, ओमप्रकाश दिवटे यांची प्रमुख उपस्थिती असणार आहे.
या निमित्ताने देशभक्तीपर हिंदी, मराठी गीतांचा ‌‘माँ तुझे सलाम‌’हा विशेष कार्यक्रम होणार आहे. कार्यक्रमाची संकल्पना आणि निर्मिती संवाद, पुणेचे अध्यक्ष सुनील महाजन यांची असून सूत्रधार निकिता मोघे आहेत तर केतकी महाजन-बोरकर संयोजन करीत आहेत. जितेंद्र भुरुक, गणेश मोरे, अश्विनी खुरपे, आकाश सोळंकी गीते सादर करणार असून रशिद शेख, सुनील जाधव, बाबा खान, रोहित जाधव, सोमनाथ फाटक, सुनील साळवी साथसंगत करणार आहेत. कार्यक्रम महापालिकेच्या सांस्कृतिक केंद्र विभागातर्फे आयोजित करण्यात आला आहे. पुणेकर रसिकांसाठी कार्यक्रम विनामूल्य आयोजित करण्यात आला असून रसिकांनी कार्यक्रमास उपस्थित रहावे, असे आवाहन सांस्कृतिक विभागाचे उपायुक्त सुनील बल्लाळ आणि प्रशासन अधिकारी राजेश कामठे यांनी दिली.

बोपोडी येथील पाणी साठवण टाकीचे लोकार्पण

पुणे:

स्थानिक कार्यकर्ते आणि पदाधिकारी यांच्याकडून करण्यात येणारा पाठपुरावा, त्याला मिळणारी लोकप्रतिनिधींची साथ, मंत्री व खुद्द मुख्यमंत्री यांचा सकारात्मक प्रतिसाद यामुळे राज्य विकासाकडे वाटचाल करत आहे, असे प्रतिपादन शिवाजीनगर विधानसभा मतदारसंघाचे आमदार सिद्धार्थ शिरोळे यांनी केले.

डॉ. बाबासाहेब आबेडकर हॉकी स्टेडीयम चिखलवाडी, बोपोडी येथे समान पाणी पुरवठा प्रकल्पा अंतर्गत नव्याने बांधण्यात आलेल्या ३० लाख लिटर क्षमतेच्या पाणी साठवण टाकीचे उद्घाटन आज (दि. १०) आमदार सिद्धार्थ शिरोळे यांच्या च्या हस्ते करण्यात आले. यावेळी माजी उपमहापौर सुनीता वाडेकर, रिपब्लिकन पक्षाचे प्रदेश संघटन सचिव परशुराम वाडेकर, माजी नगरसेका सनी निम्हण , रिपब्लिकन पक्षाचे शहराध्यक्ष संजय सोनवणे , शिवाजीराव मतदारसंघ अध्यक्ष अविनाश कदम , माजी नगरसेवक आनंद छाजेड, दलीत पँथर चे अध्यक्ष यशवंत नडगम , खडकी बोर्डाचे माजी उपाध्यक्ष अभय सावंत, सामजिक कार्यकर्ते बाळासाहेब रांनवडे  , बी एल येडे , ॲड सुनील जपे ॲड रीटा उपाध्याय , शहाबुद्दीन काजी, राजेश अग्रवाल, खडकीचे पोलिस निरीक्षक विक्रमसिंह कदम, श्याम काची, योगेश करनूर, अमित मोहिते, अप्पासाहेब वाडेकर, अनिल जोशी, सादिक शेख यांच्यासह परिसरातील विविध सोसायट्यांचे अध्यक्ष, प्रतिनिधी उपस्थित होते.

पुढे बोलताना शिरोळे म्हणाले, विकासाची ही गती यापुढेही कायम ठेवली जाणार असून बोपोडी मधील डॉ. बाबासाहेब आंबेडकर हॉकी स्टेडियम साठी राज्य शासन आणि महापालिकेकडून निधी उपलब्ध करून देऊन खेळाडूंसाठी अध्ययवत सुविधा उभारल्या जातील. त्याचप्रमाणे या परिसरातील रुग्णालयांना अत्याधुनिक स्वरूप प्राप्त करून देऊन नागरिकांना चांगल्या वैद्यकीय सुविधा देण्याचा संकल्प असल्याचे शिरोळे यांनी यावेळी सांगितले.

या परिसराच्या विकासात रिपब्लिकन पक्ष आठवले गटाचे संघटक सचिव परशुराम वाडेकर, माजी उपमहापौर सुनीताबाई वाडेकर यांचे मोठे योगदान असल्याचा उल्लेखही शिरोळे यांनी आवर्जून केला. विशेषतः जनसेवेसाठी सुनीताताई यांची जिद्द आणि आत्मीयता प्रभावित करणारी ठरली, असेही त्यांनी नमूद केले.

महायुती सरकारच्या कार्यकाळात भारतीय जनता पक्ष आणि मित्र पक्षांच्या साथीने स्थानिक पातळीपासून राज्य पातळीपर्यंत विकास आणि वेग घेतला असून विरोधक दीर्घकाळ विरोधातच राहतील, असा टोलाही त्यांनी लगावला.

प्रास्ताविक करताना परशुराम वाडेकर म्हणाले, लोकप्रतिनिधी असून देखील गेली आठ वर्ष आमच्या घरात टँकर चे पाणी येत आहे. त्यामुळे पाण्याची या भागात किती गरज आहे याची जाणीव झाली. त्यामुळे वैयक्तिकरीत्या पाठपुरावा करून बोपोडी भागातील पाण्याचा प्रश्न सुटावा यासाठी प्रयत्न केले. या कामात येथील सर्वपक्षीय नगरसेवकांची मदत झाली. असे सांगत या भागातील वाहतूक कोंडी सोडवण्यासाठी प्रयत्नशील आहोत, त्याप्रमाणेच येथील डॉ बाबासाहेब आंबेडकर हॉकी स्टेडियम हे देखील आमच्या जिव्हाळ्याचे आहे. त्याचा प्रश्नही सोडवावा ही विनंती शिरोळे यांना वाडेकर यांनी यावेळी केली.

सनी निम्हण म्हणाले, गेली आठ, नऊ वर्ष वाडेकर यांच्या कडून चिकाटीने बोपोडी भागातील पाण्याचा प्रश्न सोडविण्यासाठी प्रयत्न सुरू होते. आज राखीपोर्णिमेच्या निमित्ताने पिण्याच्या पाण्याच्या माध्यमातून येथील महिला भगिनींना ओवाळणी मिळाल्याचा आनंद आहे.

आनंद छाजेड म्हणाले, सुरवातीला बोपोडी भागात 24 तास पाणी येत होते. पण कालांतराने लोकसंख्या वाढली. अन् पाणी हळू हळूहळू कमी येऊ लागलं. मात्र आता या पाण्याच्या टाकीच्या माध्यमातून येथील रहिवाश्यांच्या पाण्याचा प्रश्न सुटला आहे.

सूत्रसंचालन ॲड. ज्ञानेश्र्वर जावीर यांनी केले, माजी उपमहापौर सुनीता वाडेकर यांनी आभार मानले.