मुंबईतील भायखळ्यातील ‘दगडी चाळीवर’ चित्रपट करणे म्हणजे माझ्यासाठी खूप मोठे आव्हान होते. एका जीवंत व्यक्तीच्या जीवनावर चित्रपट करणे व त्या चाळीतील व्यक्तीरेखा रुपेरी पडद्यावर उतरवणे हा माझ्या आयुष्यातील म्ह्त्वाचा टप्पा होता. असे सांगतायेत दिग्दर्शक चंद्रकांत कणसे………..

  करिअरची सुरवात कशी केली.

मला लहानपणापासून अभिनयाची आवड होती. मी शाळेत असताना शाळेतील बालनाट्यात आवडीने भाग घेत असे माझ्या करिअरची सुरवात शालेय नाटकापासून केली त्या नंतर मी टेलिव्हिजन मधून अभिनेता म्हणून चित्रपटसृष्टीत आलो. अभिनेता म्हणून मी माझ्या करिअरमध्ये खूप चढ – उतार पाहिले. ‘सर आले धावून’, यदा कदाचीत, ‘आता होवून जाऊ द्या’ ही माझी नाटके विशेष लक्षात राहण्यासारखी. त्या बरोबर टी.व्ही. वरती मी सह – दिग्दर्शक म्हणून  गंगुबाई नॉन मेट्रिक ही माझी मालिका तर दिग्दर्शन म्हणून ‘अजून  ही  चांद रात आहे’, १७६० सासूबाई, ‘आभास हा’ या मालिका टेलिव्हिजन वरती  केल्या. माझ्या जीवनात संजय जाधव व राजेश देशपांडे या दोन व्यक्तींचे खूप मोठे स्थान असून ते माझे गुरु आहेत.

‘दगडी चाळ ’ चित्रपट दिग्दर्शनासाठी कसा मिळाला.

अभिनया बरोबरच मी सह – दिग्दर्शक म्हणून माझ्या करिअरला सुरवात केली. मी  संजय जाधव यांच्या सोबत फक्त लढ म्हणा, रिंगा रिंगा, दुनियादारी, प्यार वाली लव्ह स्टोरी असे चित्रपट केले. तसेच अंकुश चौधरी बरोबर ‘झक्कास’ हा चित्रपट केला होता. माझे काम पाहून अंकुश चौधरी याने माझे दिग्दर्शक म्हणून ‘दगडी चाळ’ ला नाव सुचवले आणि मला हा चित्रपट मिळाला.

तुमच्या चित्रपटाविषयी सांगा.

‘दगडी चाळ’ हा चित्रपट १९९५ – ९६ च्या गँग वॉरवरती भाष्य करणारा असला तरी या चित्रपटात छानसी लव्हस्टोरी असून एक चांगली कथा आहे. एका चाळीतील सामान्य कुटुंबातील तरुण काही कारणामुळे तो गुन्हेगारी क्षेत्राकडे ओळला जातो. त्यांनतर त्याच्या जीवनात झालेले बद्दल, त्याच्या जीवनात हळूवारपणे आलेले प्रेम त्यातून फुललेली प्रेम कथा  या गोष्टीवर या चित्रपटाचे कथानक बेतले आहे. या चित्रपटात दिग्ग्ज कलाकारांची फौज आपणास पहावयास मिळेल. या चित्रपटात दोन गीते असून एक गणपती तर  दुसरे प्रेम गीत आहे

तुमच्या चित्रपटाच्या कलाकार व तांत्रिक टीम विषयी सांगा.

या चित्रपटात मकरंद देशपांडे, अंकुश चौधरी, संजय खापरे, कमलेश सावंत व पूजा सावंत असे दिग्ग्ज कलाकार यात असून या चित्रपटात छायाचित्रण अनिकेत खंडागळे, कला दिग्दर्शक – मनोहर पाटील, संगीत – अमितराज, गीते – मंदार चोळकर, चित्रपटाचे लेखन – अजय ताम्हणे व प्रविण कमळे यांचे आहे  तर साईपूजा फिल्म एन्ड एन्टरटेन्मेंट प्रस्तुत आणि सुरेश सावंत व अमोल काळे हे या चित्रपटाचे निर्माते आहेत.

हा चित्रपट लवकरच संपूर्ण महाराष्टात प्रदर्शित करण्यात येईल. असे दिग्दर्शक चंद्रकांत कणसे यांनी सांगितले.

झी मराठीवर ९ मार्चपासून सोम. ते शनि. रात्री १०.३० वा.

मैत्री म्हणजे नेमकं काय? या प्रश्नाचं नेमकं उत्तर देणं तसं अवघडच. मैत्रीचं नातं हे सर्व बंधनापलिकडचं असतं. त्याला वयाचं, अंतरांचं, जाती-धर्माचं, वर्णाचं, लिंगाचं असं कुठलंच बंधन नसतं. शाळेत, वर्गात, कॉलेजमध्ये, कट्यावर, कार्यालयात, कधी कधी तर प्रवासातही मैत्रीचे धागे जुळतात आणि घट्ट होतात. पण ही मैत्री ख-या अर्थाने तेव्हा अधिक बहरते जेव्हा आपण आपल्या घरापासून दूर असतो . शिक्षणासाठी किंवा नोकरीसाठी घरापासून दूर असणा-यांचं ‘होस्टेल लाइफ’ किंवा ‘पीजी लाइफ’ असं एक वेगळं विश्व तयार झालेलं असतं ज्यात सर्वार्थाने केंद्रस्थानी असते ती मैत्री. अशाच एका मैत्रीची आणि मित्रांची गोष्ट सांगणारा ‘दिल दोस्ती दुनियादारी’ हा युथफुल कार्यक्रम झी मराठीवर दाखल होतोय येत्या ९ मार्चपासून सोमवार ते शनिवार रात्री १०.३० वाजता. ‘दुनियादारी’ फेम दिग्दर्शक आणि प्रसिद्ध छायादिग्दर्शक संजय जाधव यांच्या ड्रिमिंग ट्वेंटी फोर सेव्हन या संस्थेने या मालिकेची निर्मिती केली आहे.

दिल दोस्ती दुनियादारीची कथा आहे घरापासून दूर राहणा-या सहा मित्र मैत्रिणींची. कैवल्य, आशुतोष, सुजय, अॅना, मीनल आणि रेश्मा असे हे सहा जण एकत्र आलेय स्वप्नांची नगरी असलेल्या मुंबईत. यातील प्रत्येक जण वेगवेगळ्या उद्देशाने मुंबईत आलेला आहे. यात कुणाचा करिअरचा स्ट्रगल आहे तर कुणाचा काही तरी फॅमिली प्रॉब्लेम आणि हा स्ट्रगलच या सर्वांमधील एक समान धागा आहे. घरापासून आणि कुटुंबापासून दूर आलेल्या या सहा जणांचं एक नवं कुटुंब तयार झालं आहे ज्यात मैत्री, जिव्हाळा, आपुलकी, प्रेम आणि सोबतच धम्माल, मजा मस्तीही आहे. यातील प्रत्येकाने उराशी जोपासलंय एक स्वप्न. विविध स्तरातून आणि पार्श्वभूमीतून आलेला हा प्रत्येकजण आपापली स्वप्नं साकार करण्यासाठी या शहरात आलाय जिथे पावलापावलावर आहेत नवे अडथळे, नवी आव्हाने आणि नवे संघर्ष. या संघर्षांना  एकमेकांच्या साथीने तोंड देत सगळे निघालेयत अंतिम ध्येयाच्या दिशेने. काय आहेत त्यांची स्वप्नं ? आणि काय आहेत त्यांची आव्हाने? याची गोष्ट बघायला मिळणार आहे ‘दिल दोस्ती दुनियादारी’ मध्ये.

मराठी मालिकांच्या विश्वात कायम काही तरी नवीन आणि दर्जेदार कथा देणा-या झी मराठी वाहिनीवरून ही ‘फ्रेश’ विषयावरची मालिका प्रेक्षकांच्या भेटीस येत आहे. विषयासोबतच यात नाविन्य आहे ते यातील कलाकारांचं. यातील सहाही व्यक्तिरेखांसाठी अतिशय फ्रेश चेह-यांची निवड करण्यात आली आहे. अमेय वाघ, सुव्रत जोशी, पुष्कर चिरपुटकर, सखी गोखले, पूजा ठोंबरे आणि स्वानंदी टिकेकर अशी नव्या दमाची कलाकार मंडळी या मालिकेत बघायला मिळणार आहे. मराठीमध्ये अनेक दर्जेदार चित्रपटांचे दिग्दर्शन आणि छायांकन करणारे संजय जाधव यांनी या मालिकेची निर्मिती केली आहे. तर ‘एका लग्नाची तिसरी गोष्ट’ या मालिकेचे दिग्दर्शन करणारे विनोद लव्हेकर यांनी या मालिकेचं दिग्दर्शन केलं आहे. संजय जाधव आणि आशिष पाथरे यांची कथा आहे तर आशिषच्या सोबतीने मनस्विनी लता रविंद्र यांनी पटकथा आणि संवाद लिहिले आहेत.

आजच्या तरूणाईची गोष्ट त्यांच्याच भाषेत मांडणारी ही मालिका युथफुल असली तरी ती सर्व प्रेक्षकांचा विचार करून बनवली आहे त्यामुळे ती सर्वांनाच आवडेल अशी झालीये. नात्यांच्या पलिकडची मैत्रीची ही गोष्ट ‘दिल दोस्ती दुनियादारी’ दाखल होतेय येत्या ९ मार्चपासून सोमवार ते शनिवार रात्री १०.३० वा. फक्त झी मराठीवर.

अभिनेते नाना पाटेकरांच्या गहिवरल्या आवाजात उद्गारलेल्या ‘जगावं की मरावं… हा एकच सवाल’ या संवादाने उपस्थित मान्यवर आणि नाशिककरांना अश्रू अनावर झाले होते. निमित्त होतं ‘नटसम्राट’ चित्रपटाच्या मुहूर्ताचं. तात्यासाहेब शिरवाडकरांच्या अलौकिक प्रतिभेनं विस्तारलेलं मराठीतील एकमेवाद्वितीय नाटक म्हणजेच ‘नटसम्राट’ला कुसुमाग्रजांच्या जन्मदिनाचे औचित्य साधत चित्रपटरुपी माध्यमांतराने दिलेली ही अनोखी मानवंदनाच ठरली. नाशिकमधील कुसुमाग्रज प्रतिष्ठानात रंगलेल्या ‘नटसम्राट’ चित्रपटाच्या मुहूर्तप्रसंगी अभिनेते नाना पाटेकर, दिग्दर्शक महेश मांजरेकर, अभिनेते सुनील बर्वे, अभिनेत्री मेधा मांजरेकर, नेहा पेंडसे, संगीतकार अजित परब, कुसुमाग्रज प्रतिष्ठानचे अध्यक्ष मधु मंगेश कर्णिक आणि सल्लागार हेमंत टकले उपस्थित होते. फिनक्राफ्ट मिडिया अॅण्ड एंटरटेनमेंट प्रा. लि., गजानन चित्र आणि आणि ग्रेट मराठा एंटरटेनमेंट प्रस्तुत विश्वास विनायक जोशी, नाना गजानन पाटेकर निर्मित आणि महेश मांजरेकर दिग्दर्शित ‘नटसम्राट’ हा महत्त्वाकांक्षी चित्रपट लवकरच रसिक-प्रेक्षकांकरिता घेऊन येत आहेत.   जबरदस्त संहिता, मर्मभेदी संवाद आणि अभिनयाची जुगलबंदी असलेल्या ‘नटसम्राट’ने मराठी नाट्यसृष्टीत एक अनोखी उंची गाठली आहे. डॉ श्रीराम लागू, दत्ता भट, यशवंत दत्त, सतीश दुभाषी, चंद्रकांत गोखले, मधुसूदन कोल्हटकर, राजा गोसावी अशा अनेक प्रतिभावंतांनी आपल्या अभिनयाच्या जोरावर गणपतराव बेलवलकरांची भूमिका जगलीये असं म्हटलं तर वावगं ठरणार नाही. ‘नटसम्राट’ चित्रपटामुळे पुन्हा एकदा नटसम्राट आप्पासाहेब बेलवलकरांच्या अभिनयाची जादू अनुभवता येणार आहे. अष्टपैलू कलावंत नाना पाटेकरांच्या अभिनयाद्वारे ७०च्या दशकातील गणपतराव बेलवलकर हे पात्रं पुनरुज्जीवीत होणार आहे. नाना पाटेकरांची प्रथम निर्मिती असलेल्या ‘नटसम्राट’ विषयी बोलताना आपल्या जुन्या ऋणानुबंधांच्या आठवणी सांगितल्या. “१९७० मध्ये ‘नटसम्राट’ नाटक रंगमंचावर आलं तेव्हा मी जेमतेम २० वर्षांचा होतो पण त्याचवेळी हे नाटक एक मापदंड म्हणून मान्यता पावलेलं होतं. त्यावेळी डॉ श्रीराम लागू, दत्ता भट यांनी साकारलेल्या भूमिका काळजात रुतून बसल्या होत्या. नटसम्राट करायला मिळेल असं माझ्यातल्या नटाला कधी स्वप्नातही वाटलं नव्हतं. आत्ता आप्पासाहेब बेलवलकर यांची अजरामर भूमिका खुणावत असतानाच महेश मांजरेकरांनी ही संधी मला दिली. माझ्यासाठी ही खूपच आनंदाची गोष्ट आहे.” असं मनोगत त्यांनी व्यक्त केलं. ‘कुणी घर देतं का घर’ असे थेट विचारत प्रेक्षकांच्या काळजाचा ठाव घेणारे ‘नटसम्राट’ गणपतराव उर्फ आप्पासाहेब बेलवलकर या पात्राने ७० चा दशक खऱ्या अर्थाने गाजवला. दशकं लोटली पण या नाटकाचे नावीन्य अजूनही ओसरलेले नाही हीच बाब दिग्दर्शक महेश मांजरेकरांनी नेमकी हेरली. “मराठी साहित्यविश्व आणि रंगभूमीवर दबदबा निर्माण करणारी ‘नटसम्राट’ ही अजोड कलाकृती असून त्यावर चित्रपट काढणं म्हणजे शिवधनुष्य पेलण्यासारखेच आहे. कुसुमाग्रजांनी मांडलेली एका नटसम्राटाची कैफियत चित्रपटात मांडणं कठीण आहे. माध्यमांतर करताना मूळ नाटक आणि संहितेला धक्का न लागता ‘नटसम्राट’ चित्रपटात रुपांतरीत करण्याची महत्त्वाची जबाबदारी माझ्यावर आहे.” असे मत दिग्दर्शक महेश मांजरेकर यांनी यावेळी व्यक्त केले. तात्यासाहेब शिरवाडकरांच्या या जबरदस्त संहितेची भुरळ कोणाला पडली नसती तरच नवल. ही संधी लेखक किरण यज्ञोपवित यांना लाभली असून त्यांनी ‘नटसम्राट’चे संवाद लिहिले आहेत.आपल्या दर्जेदार अभिनयाने अजरामर केलेल्या ‘नटसम्राट’ नाटकातील भूमिकांना न्याय देण्याकरिता तितक्याच तोडीचे मातब्बर कलाकार या चित्रपटात आपल्याला पाहायला मिळणार आहेत. नाना पाटेकर, महेश मांजरेकर, विक्रम गोखले, रीमा, सुनील बर्वे, नेहा पेंडसे यांसारखे दिग्गज पहिल्यांदाच नटसम्राटच्या निमित्ताने एकत्रित येत आहेत. ‘नटसम्राट’ची संकल्पना प्रत्यक्षात उतरवण्यात कुसुमाग्रज प्रतिष्ठानचे विश्वस्त आणि ग्रेट मराठा एंटरटेनमेंटचे अनिरुद्ध देशपांडे यांची मोलाची मदत लाभली आहे. To Be or Not To Be’, ‘जगावं की मरावं’, ‘कुणी घर देतं का घर…?’ असे काळजाला हात घालणारे संवाद, टाळ्यांचा गजर, साश्रू नयनांनी ‘नटसम्राट’ला रसिकांनी दिलेली मानवंदना लवकरच रुपेरी पडद्यावर अनुभवता येणार आहे. ‘नटसम्राट’च्या चित्रीकरणाला येत्या ४ मार्चपासून मुंबईत सुरुवात होणार आहे.