पुणे : ज्या वेळी इतर चित्रपट नसतात, त्या वेळी मराठी चित्रपट लावणे आणि चित्रपटांचा प्राइम टाइम सोडून इतर वेळ मराठी चित्रपटांना देणे, ही पद्धत बंद करून मराठी चित्रपटच मल्टिप्लेक्समध्ये प्राइम टाइममध्ये लावणे बंधनकारक करायचा विचार असल्याचे सांस्कृतिक मंत्री विनोद तावडे यांनी सांगितले.
मराठी चित्रपट परिवाराच्या वतीने सोमवारी कलावंत आर्थिक साह्य योजेनेचा कार्यक्रम घेण्यात आला, त्या वेळी ते बोलत होते. घोले रस्त्यावरील नेहरू सांस्कृतिक भवनामध्ये झालेल्या कार्यक्रमाला ज्येष्ठ दिग्दर्शक राजदत्त, ज्येष्ठ अभिनेत्री मधू कांबीकर, सतीश रणदिवे, विजय कोंडके, रामदास फुटाणे उपस्थित होते. या वेळी शरद वर्तके, दत्तोबा भडाळे, सुधा माने, शशिकला जाधव, राजाराम जाधव, रमाकांत सांगलीकर आदी कलाकार तसेच निर्मिती व्यवस्थापक म्हणून कार्यरत असलेल्यांना धनादेश देऊन त्यांचा सन्मान करण्यात आला.
तावडे म्हणाले, ‘‘स्वत:चे आयुष्य पूर्णत: कलेला समर्पित केलेल्यांचा सन्मान कोणत्याही मंत्र्यांच्या हस्ते करण्यापेक्षा त्यातील जाणकाराने केला, तर केवळ त्या कलेचाच नाही, तर कलाकाराचादेखील सन्मान होतो. कलेला राजकारण्यांपेक्षा राजाश्रय मिळायला पाहिजे.’’
मिळणाऱ्या मानधनापैकी खूप कमी वाटा कलाकारांपर्यंत पोहोचतो, अशी खंत व्यक्त करून कांबीकर म्हणाल्या, ‘‘आज चित्रपटांना व कलाकारांना चांगले दिवस आले आहेत; परंतु जुने कलाकार हलाखीतच जीवन जगत आहेत. काहींना सांभाळणारे कोणी नाही, तर काहींना वयामुळे आता कष्ट होत नाहीत. अशा व्यवहारी जगात असा सन्मान महत्त्वाचे आहे.’’ मेघराज राजेभोसले यांनी प्रास्ताविक केले
