पुणे :राज्य शासन नवीन व नवीकरणीय ऊर्जा स्त्रोतांचा प्रचार व प्रसार करण्यासाठी कटीबद्ध्‍ आहे. सौर ऊर्जा ही काळाची गरज असून पुढील दहा वर्षाच्या कालावधीत जवळपास चाळीस लाख शेती पंप सौर ऊर्जेवर चालविण्यात येणार असल्याचे प्रतिपादन ऊर्जा तसेच नवीन व नवीकरणीय ऊर्जा  मंत्री चंद्रशेखर बावनकुळे यांनी आज येथे केले.

महाराष्ट्र ऊर्जा विकास अभिकरण अर्थात महाऊर्जातर्फे दरवर्षी ऊर्जा संवर्धन क्षेत्रात उल्लेखनीय कार्य केलेल्या संस्थांना व व्यक्तींना पारितोषिक देऊन गौरविण्यात येते. २०१५-१६ या  वर्षात ऊर्जा संवर्धन क्षेत्रात उल्लेखनीय कार्य केलेल्या ७४ संस्था आणि व्यक्तींना आज ऊर्जा मंत्री चंद्रशेखर बावनकुळे यांच्याहस्ते मानचिन्ह व प्रशस्तीपत्र  देऊन गौरविण्यात आले त्यावेळी ऊर्जा मंत्री बोलत होते. यावेळी आमदार मेधा कुलकर्णी, आमदार जगदिश मुळीक, महाऊर्जाचे महासंचालक राजाराम माने, पुरस्कार निवड समितीचे अध्यक्ष धनंजय गंधे उपस्थित होते.

यावेळी बोलताना ऊर्जा मंत्री चंद्रशेखर बावनकुळे म्हणाले, राज्य शासनाने नुकतेच स्वतंत्र ऊर्जा संवर्धन धेारण जाहिर केले आहे. राज्य ऊर्जा संवर्धन धोरणाच्या अंमलबजावणीमुळे सन २०२०-२१ पर्यत कोळश्यापासून निर्माण करण्यात येणारी सुमारे १००० मे.वॅट ऊर्जेची बचत होणार आहे. ऊर्जा संवर्धन धोरणात सर्व प्रकाच्या ग्राहकांचा समावेश करण्यात आला आहे. या धोरणामध्ये व्यावसायीक क्षेत्रातील शॉपींग मॉल, मल्टिफलेक्स्, मोठे हॉस्पीटल, शासकीय इमारती, नगरपालिका, महानगरपालिका, घरगुती क्षेत्रांचा समावेश करण्यात आला आहे. राज्य ऊर्जा संवर्धन धोरण राबविल्यामुळे राज्याचा ऊर्जा प्रश्न सुटणार असल्याचेही ते म्हणाले. महाऊर्जेच्या माध्यमातून महाराष्ट्र घडविण्याचे आवाहन त्यांनी यावेळी केले.

महाऊर्जाचे महासंचालक राजाराम माने यांनी कार्यक्रमाचे प्रास्ताविक केले. प्रास्ताविकामध्ये त्यांनी ऊर्जा संवर्धन व ऊर्जा व्यवस्थापनात सहभागी झालेल्या सर्व घटकांनी ऊर्जा बचतीसाठी सुमारे ५७७ कोटी रुपयांची गुंतवणूक केली व त्यापासून सुमारे ४२१ कोटी एवढी वार्षिक ऊर्जा बचत साध्य झाल्याचे सांगितले. त्यामुळे या योजनेतून २६४० दशलक्ष युनिट म्हणजेच ३८६ मे.वॅट विद्युत ऊर्जेची बचत झाली आहे, अशी माहिती दिली.

पुरस्कार निवड समितीचे अध्यक्ष धनंजय गंधे यांनी यावेळी पुरस्कार निवड पारदर्शक पध्दतीने केल्याचे सांगितले. ऊर्जेच्या बाबतीत देश स्वयंपूर्णतेकडे जात असून ऊर्जा संवर्धनात गुणात्मक  वाढ झाल्याचे सांगितले.

कार्यक्रमाची सुरुवात दिप प्रज्वलनाने करण्यात आली. पुरस्कार निवड समिती सदस्यांचा यावेळी ऊर्जा मंत्रयांच्याहस्ते सत्कार करण्यात आला. कार्यक्रमाचा समारोप महाऊर्जेचे वरिष्ठ महाव्यवस्थापक उमाकांत पांडे यांनी केला.

पुणे-दि मुस्लिम वेल्फेअर एज्युकेशन सोसायटीच्यावतीने पुणे शहर व जिल्ह्यामधील ३५ शाळेमधील अडीच हजार विद्यार्थ्यांना शालेय साहित्य वाटप व गुणवंत विद्यार्थ्यांचा सत्कार व सेवा निवृत्त शिक्षकांचा सत्कार नगरसेवक रफिक शेख यांच्याहस्ते करण्यात आले .

भवानी पेठमधील गोल्डन ज्युबली एजुकेशन ट्रस्टच्या सभागृहात झालेल्या या कार्यक्रमाच्या अध्यक्षस्थानी  गोल्डन ज्युबली एजुकेशन ट्रस्टचे अध्यक्ष शाहिद इनामदार  , दि मुस्लिम वेल्फेअर एज्युकेशन सोसायटीचे अध्यक्ष वाहिद बियाबानी , बंधू भाव भाईचारा संघटनेचे अध्यक्ष शब्बीर शेख , मुस्लिम को ऑप. बँक संचालक एस. ए. इनामदार व विद्यानिकेतन एजुकेशन ट्रस्ट सिमा फरीद तुंगेकर उपस्थित होते .

या कार्यक्रमात सेवा निवृत्त शिक्षकांचा शाल श्रीफळ आणि स्मृतीचिन्ह देउन सत्कार करण्यात आला . पुणे शहरामधील उर्दू माध्यमातील शाळांमधील दहावीमधील शाळेत प्रथम क्रमांक प्राप्त केलेल्या विद्यार्थ्यांचा स्मृतिचिन्ह , प्रमाणपत्र व भेटवस्तू सत्कार करण्यात आला .

या कार्यक्रमाच्या अध्यक्षस्थानी  गोल्डन ज्युबली एजुकेशन ट्रस्टचे अध्यक्ष शाहिद इनामदार  यांनी सांगितले कि ,   दि मुस्लिम वेल्फेअर एज्युकेशन सोसायटीच्यावतीने कौतुकास्पद असून पुढील वर्षी प्रमाणे मुलांना माहिती तंत्रज्ञान प्राप्त होण्यासाठी लॅपटॉप आणि आयपॉड गुणवंत विद्यार्थ्यांना देण्यासाठी आपण पूर्ण सहकार्य करण्याचे आश्वासन दिले . मुस्लिम समाजातील विद्यार्थ्यांनी भरघोस यश प्राप्त होत असल्याने त्यांचे व पालकांचे कौतुक केले . मागील वीस वर्षांपासून दि मुस्लिम वेल्फेअर एज्युकेशन सोसायटी या कार्यक्रमाचे आयोजन करत आहे . सोसायटीचा हा उपक्रम कौतुकास्पद आहे .

नगरसेवक रफिक शेख  यांनी दि मुस्लिम वेल्फेअर एज्युकेशन सोसायटी भविष्यकाळात मदत करण्याचे आश्वासन दिले . गरजू होतकरू विद्यार्थ्यांना मदत करण्यात येईल , पुणे महापालिकेकडून मदत मिळवून देण्याचे आश्वासन दिले .

या कार्यक्रमात उपस्थितांचे स्वागत दि मुस्लिम वेल्फेअर एज्युकेशन सोसायटीचे अध्यक्ष वाहिद बियाबानी यांनी केले तर सूत्रसंचालन अहमद बागवान यांनी केले तर आभार मोहंमद मुतलिब मोहम्मद मुख्तार यांनी मानले .

या कार्यक्रमास हाजी गुलाम एजुकेशन ट्रस्टचे शाहिद मुनीर शेख , अब्दुल वहाब (पार्टी), आफिया मोहमदअली , अब्दुल सत्तार , खान फिरोज गुलशेर, मतीन शेख , अमीन शेख , व समाजातील अन्य मान्यवर , मुख्याध्यापक , पालक आणि शिक्षक आदी मान्यवर उपस्थित होते

पुणे-रास्ता पेठमधील एथेल गॉर्डन अध्यापिका महाविद्यालयामध्ये  विधानपरिषदेचे आमदार अनंतराव गाडगीळ यांच्या आमदार निधीमधून सहा संगणक प्रदान करण्यात आली . या संगणक संगणक कक्षाचे उदघाटन आमदार अनंतराव गाडगीळ यांच्याहस्ते फीत कापून करण्यात आले .

यावेळी एथेल गॉर्डन अध्यापिका महाविद्यालयाच्या  मुख्याध्यापिका  प्रतिभा म्हंकाळे , विल्सन मॅसी ,अनिल गडकरी ,  सुजया पुणेकर , गोपाळराव पायगुडे , सर्वेश्वर थोरात आदी मान्यवर उपस्थित होते .

यावेळी  विधानपरिषदेचे आमदार अनंतराव गाडगीळ यांनी सांगितले कि , राजीव गांधी यांनी संगणकाच्या माध्यमातून माहिती तंत्रज्ञानाची क्रांती आणली . त्या क्रांती मुळे आज आय टी उद्योगात तरुणांना रोजगार मिळाले . यासाठी आपण आपला आमदार निधीतून शैक्षणिक क्षेत्रात देत आहोत . जेणे करून आपण संगणकाचे ज्ञान प्राप्त करावे .

या कार्यक्रमात उपस्थितांचे स्वागत एथेल गॉर्डन अध्यापिका महाविद्यालयाच्या  मुख्याध्यापिका प्रतिभा म्हंकाळे यांनी केले तर सूत्रसंचालन शिल्पा पंडित यांनी केले तर आभार मनिषा गडकरी यांनी मानले .

नृत्यभारतीच्या ७० व्या वर्षपूर्तीनिमित्त आयोजन

पुणे ता. २१: नृत्यभारती डान्स अकॅडमीच्या ७०व्या वर्षपूर्तीनिमित्त येत्या २७ तारखेला ‘अनुबद्ध’ या कथक मैफलीचे आयोजन करण्यात आले आहे. यशवंतराव चव्हाण नाट्यगृह, कोथरूड येथे सायंकाळी ६.३० ते १०.३० या दरम्यान ही मैफल  रंगणार असून संस्थेच्या जगभरातील शाखांमधील ५० निपुण नर्तकींचा नृत्यविष्कार एकाच व्यासपीठावर अनुभवण्याची अनोखी संधी यानिमित्ताने रसिक पुणेकरांना लाभणार आहे.

पं. रोहिणीताई भाटे यांच्या शैलीत नवीन आदर्श निर्माण करणाऱ्या अत्यंत वैशिष्ट्यपूर्ण आणि दुर्मिळ रचनांचे सादरीकरण हे ‘अनुबद्ध’ मैफलीचे प्रमुख आकर्षण ठरेल. कथक केंद्र, दिल्लीच्या अध्यक्षा कमलिनी अस्थाना यादेखील या कार्यक्रमास आवर्जुन उपस्थित राहणार असून प्रसिद्धतबलावादक पं. अरविंदकुमार आजाद आणि संगीतकार अजय पराड यांच्या सुरेल साथीने कार्यक्रमाची रंगत आणखी वाढेल.

या महासोहळ्याच्या औचित्याने संस्थेच्या शाखांकडून विविध कार्यक्रमांचे आयोजन करण्यात आले होते. यात ‘मति अमित गति ललित’, ‘संचित आणि सृजन’, ‘आवर्तन’, ‘अनुग्रह’, ‘अनाहत’ ‘एकल विद्या’, ‘उजवी बाजू’ आदी मैफलींना रसिक प्रेक्षकांची भरभरून दाद मिळाली. तसेच या माध्यमातून कलाकारांना हक्काचे व्यासपीठही उपलब्ध झाले.

कथक कलेचा आणि पं. रोहिणीताई भाटे यांच्या नृत्याविष्काराचा वारसा नृत्यभारती संस्था गेली ७० वर्षे अव्याहतपणे जपत आहेे. ‘अनुबद्ध’ मैफल म्हणजे या अथक मेहनतीचे मूर्त रूप असून याचा प्रत्यक्ष अनुभव घेण्याची संधी म्हणजे पुणेकरांसाठी पर्वणी ठरेल, असा विश्वास संस्थेच्या वतीने व्यक्त करण्यात आला आहे.

पुणे : इदगाह मैदानातील प्रलंबित कामांसाठी निधी उपलब्ध करून देवू तसेच लवकरात लवकर ही कामे पूर्ण करण्याची ग्वाही पालकमंत्री गिरीश बापट यांनी दिली. इदगाह मैदानात आज पालकमंत्री गिरीश बापट तसेच सामाजिक न्याय मंत्री दिलीप कांबळे यांच्या हस्ते वृक्षारोपण करण्यात आले. यावेळी ते बोलत होते.

या कार्यक्रमाला कॅन्टोन्मेंटचे मुख्य कार्यकारी अधिकारी डॉ. डी. एन. यादव, अभियंते सोपान गायकवाड, मौलाना निजामुद्दीन,नगरसेवक अतुल गायकवाड, दिलीप गिरमकर,रुपाली बिडकर, मनिषा लडकत, जैनुल काजी, इसाकभाई चाविवाले, ताहेर आसी अहमद शेख, रफिक शेख, युसुफ बागवान, तनवीर सय्यद, शैलेश चव्हाण यांच्यासह कार्यकर्ते उपस्थित होते.

इदगाह मैदानात पिण्याच्या पाण्याची सोय व्हावी यासाठी पाण्याची टाकी बांधावी, तसेच या मैदानाची पडलेली भिंत बांधून मिळावी, या मैदानात पेव्हिंग ब्लॉक बसवण्यात यावे अशी मागणी यावेळी कार्यकर्त्यांनी केली. ही प्रलंबित कामे लवकरात लवकर करण्याची ग्वाही श्री बापट यांनी दिली. यासाठी त्यांनी २५ लाख रुपयांचा निधी जाहीर केला. यावेळी मंत्री दिलीप कांबळे यांनीही समाजकल्याण मंत्रालयाकडून निधी देण्याचे मान्य केले.

पर्यावरणाचा समतोल राखण्यासाठी वृक्षारोपण करणे ही प्रत्येक व्यक्ती आणि समूहाची सार्वजनिक जबाबदारी आहे. त्यामुळे इदगाह मैदानात करण्यात येणारे वृक्षारोपण हा अत्यंत स्तुत्य उपक्रम आहे.  भविष्यात या झाडांचे संगोपन आणि संवर्धन ही निश्चितच होईल याची मला खात्री आहे. असही ते यावेळी म्हणाले.