पुणे:
जवळपास ऐंशी लाख लोकसंख्येच्या पुणे शहर व परिसरात दिवसेंदिवस गुन्हेगारी वाढत आहे.गुनहेगारी रोखण्यासाठी रात्री दहा नंतर पब,बार, रेस्टॉरंट हाँटेल बंद ठेवण्याचा निर्णय पुणे शहर पोलिस आयुक्त अमितेशकुमार यांनी घेतला आहे. या निर्णयास पुणे शहर आम आदमी पक्षाने जाहीर पाठिंबा दिला आहे.

आम आदमी पक्षाचे शहराध्यक्ष धनंजय बेनकर यांच्या नेतृत्वाखाली महासचिव सुभाष करांडे, महासचिव सुनील सवदी, सागर झा, मिलिंद सरोदे, अविनाश भाकरे, उमेश दीक्षित, अनिकेत शिंदे, महिला आघाडीच्या ज्योती जोगदंड आणि मनोज ओझा यांनी पुणे पोलीस आयुक्त अमितेशकुमार यांची पोलीस मुख्यालयात भेट घेऊन त्यांना हा निर्णय कायमस्वरूपी लागु करण्यात यावा असे साकडे घातले..
आम आदमी पक्षाचे शहर अध्यक्ष धनंजय बेनकर म्हणाले,
कायदा सुव्यवस्था राखण्यासाठी पोलीस आयुक्तांनी शहरात दोन आठवडे जमावबंदी जारी केली आहे.
याच बरोबर रात्री दहा नंतर सर्व पब, बार, रिसॉर्ट आदी बंद ठेवण्याची अमंलबजावणी सुरू केली. सिंहगड रोड,वारजे माळवाडी धायरी नऱ्हे, कात्रज आंबेगाव धनकवडी बिबवेवाडी हडपसर आदी ठिकाणी संघटित गुन्हेगारांच्या टोळ्या सक्रिय आहेत. राजकीय वरदहस्तामुळे मध्यरात्री पासुन पहाटे पर्यंत गुन्हेगारी टोळ्या मद्यपान पार्टी करुन मुख्य रस्ते सोसायट्या लोकवस्त्यांत अशा सार्वजनिक ठिकाणी धिंगाणा घालुन दहशत निर्माण करत आहेत. टोळी युध्दात अनेक गुन्हेगार ठार झाले आहेत त्यामुळे नागरिकांत प्रचंड दहशतीचे वातावरण निर्माण झाले आहे रात्री घरी परत जाणे तसेच घराबाहेर पडणे धोक्याचे झाले आहे. त्यामुळे रात्री दहा नंतर सर्व पब हाँटेल ,बार बंद ठेवण्याचा निर्णय समाजाच्या सुरक्षिततेसाठी महत्त्वाचा आहे.
यावेळी मिरवणुकांमुळे निर्माण होणारे ट्राफिक जॅम, रुग्णवाहिकांना होणारा अडथळा, ध्वनीप्रदूषण तसेच महिला, विद्यार्थी व ज्येष्ठ नागरिकांना होणारा त्रास याबाबत पोलीस आयुक्तांना आम आदमी पक्षाच्या सविस्तर निवेदन देण्यात आले. नागरिकांच्या शांतता, सुरक्षितता आणि सुव्यवस्थेच्या दृष्टीने आवश्यक उपाययोजना करण्याची मागणी करण्यात आली.

पुणे : जनगणना कर्मचाऱ्यावर झालेली मारहाण म्हणजे शासन व्यवस्थेवर हल्ला असून आरोपींवर तात्काळ कठोर कारवाई कराअशी मागणी आम आदमी पार्टीचे पुणे शहर महासचिव – सुभाष कारंडे तसेच निरंजन मधुकर अडागळे यांनी केली आहे.

त्यांनी म्हटले आहे कि ,’जनगणना करण्यासाठी अधिकृत शासकीय कर्तव्य बजावत असलेल्या कर्मचाऱ्यावर झालेली मारहाण ही केवळ एका व्यक्तीवरील हिंसा नसून संपूर्ण शासन व्यवस्थेवर केलेला भ्याड हल्ला आहे. कायद्याचा धाक संपला आहे का? असा प्रश्न आता सामान्य नागरिक विचारत आहेत.
देशाच्या महत्त्वाच्या प्रशासकीय प्रक्रियेसाठी घराघरात जाऊन काम करणाऱ्या कर्मचाऱ्यांना मारहाण करणे, धमकावणे आणि शासकीय कामात अडथळा निर्माण करणे हा गंभीर आणि अक्षम्य गुन्हा आहे. अशा प्रवृत्तींना राजकीय किंवा स्थानिक दबावाखाली संरक्षण मिळत असेल तर ते आणखी धोकादायक आहे.
आम आदमी पार्टीच्या वतीने संबंधित आरोपींवर कठोर कलमान्वये तात्काळ गुन्हा दाखल करून अटक करण्यात यावी, अशी जोरदार मागणी करण्यात येत आहे. तसेच या प्रकरणातील पोलिस व प्रशासनाच्या भूमिकेचीही चौकशी झाली पाहिजे.
जर शासकीय कर्मचारीच सुरक्षित नसतील तर सामान्य नागरिकांच्या सुरक्षेची हमी कोण देणार? प्रशासनाने या घटनेकडे हलक्यात पाहू नये. दोषींना त्वरित अटक झाली पाहिजे

पुणे-दापोडी व हडपसर येथे घडलेल्या घटनेची वस्तुस्थिती व त्याअनुषंगाने केलेली उपाययोजना याबाबत राज्य उत्पादन शुल्क विभागाने मैती प्रसारी केली असून यात म्हटले आहे की,’
दि. २६/०५/२०२६ ते २८/०५/२०२६ दरम्यान संजयनगर, फुगेवाडी, दापोडी येथील काही व्यक्तींना विषबाधेसदृश लक्षणांमुळे विविध रुग्णालयांमध्ये दाखल करण्यात आले. त्यापैकी ०५ व्यक्तींचा मृत्यू झाला. माहिती प्राप्त होताच राज्य उत्पादन शुल्क विभागाने तात्काळ अधिकाऱ्यांची पथके रुग्णालये व घटनास्थळी पाठवून माहिती संकलन व तपासाची कार्यवाही सुरू केली.
दापोडी पोलीस स्टेशन येथे गु.र.क्र. ११४/२०२६ दाखल करण्यात आला असून तपासादरम्यान कर्नल सिंग बिरका व गुरुमंगतसिंग बिरका यांना अटक करण्यात आली. प्राथमिक तपासात मिथेनॉल मिश्रित गावठी दारू सेवनामुळे मृत्यू झाल्याचे निष्पन्न झाले आहे.
हडपसर येथील पांढरेमळा परिसरातही अशाच प्रकारच्या घटनेत ०४ व्यक्तींचा मृत्यू झाल्याची माहिती प्राप्त झाली असून दोन्ही घटना परस्पर संबंधित असल्याचे तपासात दिसून आले.
तपासादरम्यान योगेश व्हानकडे उर्फ सिकंदर राठोड याने संबंधित आरोपींना प्रथमदर्शनी मिथेनॉल मिश्रीत विषारी गावठी दारूचा पुरवठा केल्याचे निष्पन्न झाल्याने त्यास राज्य उत्पादन शुल्क विभागाने ताब्यात घेऊन पुढील तपासासाठी पोलीस विभागाच्या स्वाधीन केले. तसेच चौकशीत राधेश्याम उर्फ राजू प्रजापती याच्याकडून गावठी दारूचा पुरवठा होत असल्याचे निष्पन्न झाल्याने त्यास ताब्यात घेऊन त्यालाही पोलीस विभागाच्या ताब्यात देण्यात आले.
मुख्य सुत्रधार योगेश व्हानकडे याच्या चौकशीतून प्रथमदर्शनी मिथेनॉल मिश्रीत गावठी दारु वितरीत झालेल्या ठिकाणी राज्य उत्पादन शुल्क, पुणे विभागाद्वारे दि.२९/०५/२०२६ रोजी मध्यरात्री तात्काळ कारवाई करुन आकाश जाधव, पांढरेमळा, हडपसर याचेकडून ७० लि, इरफान कुरेशी, पवार वस्ती, दापोडी याचेकडून १५५ लि व आर्यन धोत्रे, वडारवाडी, गोखलेनगर याचेकडून ४२० लि. असा एकूण ६४५ लिटर प्रथमदर्शनी मिथेनॉल मिश्रीत गावठी दारु जप्त करण्यात आली असून संबंधितांविरुद्ध गुन्हे दाखल करण्यात आले आहेत.
आरोपो योगेश व्हानकडे विरुद्ध ०३, आकाश जाधव विरुद्ध ०४, कर्नेल सिंग विरका विरुद्ध ०१ व राधेश्याम प्रजापती विरुद्ध ०४ असे गुन्हे नोंद आहेत तसेच त्यांच्या विरुध्द प्रतिबंधात्मक कारवाईचा प्रस्ताव सक्षम प्राधिकारी यांच्याकडे सादर करण्यात आलेला आहे.
संबंधित घटनेच्या पार्श्वभूमीवर कार्यक्षेत्रीय एकुण ९ अधिकारी व ४ कर्मचाऱ्यांना मा. आयुक्त यांच्या आदेशानुसार तात्काळ प्रभावाने निलंबित करण्यात आले आहे.
राज्य उत्पादन शुल्क विभागाद्वारे नियमितपणे विशेष मोहिमा राबवून सन २०२५-२०२६ या वर्षामध्ये एकुण ६४६२ इतके गुन्हे नोंद केले असून त्यामध्ये एकुण रु. २९.७४ कोटी इतका मुद्देमाल जप्त करण्यात आलेला आहे. तसेच एकुण ५ हातभट्टी व्यवसाय करणाऱ्या आरोपींविरुध्द एम.पी.डी.ए कायद्यान्वये स्थानबध्दतेची कारवाई करण्यात आलेली आहे. घटनेच्या गांभीर्यता लक्षात घेता अशा प्रकारच्या घटना पुन्हा घडू नयेत यासाठी व्यापक तपास व प्रतिबंधात्मक कारवाई सुरू असुन कार्यक्षेत्रामधील सर्व अधिकारी यांना सतर्क राहुन हातभट्टी निर्मिती, वाहतुक व बिक्री विरुध्द विशेष मोहिम राबवून संबंधितांबर कठोर कारवाई करण्यात येत आहे.

पुणे-हे दुर्घटनेचे बळी नाहीत ओ ..हे तर सरकार आणि प्रशासनाच्या निष्काळजीपणामुळे झालेले सामूहिक खून आहेत असा आरोप महापालिकेतील कॉंग्रेस पक्षाचे गटनेते ॲड रामचंद्र उर्फ चंदूशेठ कदम यांनी केला आहे.

ते म्हणाले,’फुगेवाडीमध्ये घडलेली विषारी दारूची घटना ही केवळ दुर्घटना नाही, तर सरकार आणि प्रशासनाच्या निष्काळजीपणामुळे झालेला सामूहिक खून आहे. पुण्यासारख्या शहरात महसूल विभाग, पोलीस यंत्रणा आणि उत्पादन शुल्क विभाग यांच्या नाकावर टिच्चून विषारी दारूची विक्री सुरू असते, लोक खुलेआम मृत्यूच्या दारात ढकलले जातात, आणि तरीही प्रशासनाला त्याचा मागमूस लागत नाही, ही बाब अत्यंत संतापजनक आहे. फुगेवाडीतील अनेक कुटुंबांनी आपल्या घरातील कमावते सदस्य गमावले, अनेक मुलांच्या डोक्यावरून वडिलांचे छत्र हरपले, अनेक संसार एका रात्रीत उद्ध्वस्त झाले. तरीही प्रत्येक वेळी चौकशी, कारवाई आणि निलंबनाचीच भाषा केली जाते; पण अशा अवैध धंद्यांना संरक्षण कोण देतं, हा खरा प्रश्न आहे.

आज महाराष्ट्रात विषारी दारू, ड्रग्ज, बेटिंग आणि गुन्हेगारी यांचे जाळे दिवसेंदिवस वाढत चालले आहे. सामान्य नागरिक वारंवार आवाज उठवत आहेत, पण राज्यकर्त्यांना त्याची गंभीरता जाणवत नाही. कारण सत्ताधारी पक्षाला जनतेचे प्रश्न सोडवण्यापेक्षा जाती-धर्माचे राजकारण करण्यात अधिक रस आहे. बेरोजगारी, व्यसनाधीनता, गुन्हेगारी आणि तरुणांचे उद्ध्वस्त होत चाललेले भविष्य यावर बोलण्याऐवजी समाजाला वेगवेगळ्या मुद्द्यांमध्ये गुंतवून ठेवण्याचा प्रयत्न सुरू आहे. तरुणांना नशेच्या आहारी जाऊ द्या, जनता प्रश्न विचारणार नाही, सरकारला जाब विचारणार नाही, अशीच व्यवस्था निर्माण केली जात आहे का, असा प्रश्न आता जनतेच्या मनात निर्माण झाला आहे.

फुगेवाडीतील मृत्यूंना फक्त विषारी दारू विकणारे गुन्हेगार जबाबदार नाहीत, तर त्यांना मोकळे रान देणारी संपूर्ण व्यवस्था जबाबदार आहे. जर प्रशासन वेळेवर जागे झाले असते, अवैध दारू अड्ड्यांवर कठोर कारवाई झाली असती, संबंधित अधिकाऱ्यांनी आपले कर्तव्य प्रामाणिकपणे पार पाडले असते, तर आज अनेक निष्पाप लोक जिवंत असते. त्यामुळे या प्रकरणात केवळ खालच्या स्तरावरील आरोपींना अटक करून चालणार नाही, तर या संपूर्ण रॅकेटला संरक्षण देणारे आणि दुर्लक्ष करणारे अधिकारी व जबाबदार लोकप्रतिनिधी यांच्यावरही कठोर कारवाई झाली पाहिजे. फुगेवाडीतील प्रत्येक मृत्यू हा प्रशासनाच्या अपयशाचा पुरावा आहे आणि या निष्पाप जीवांच्या मृत्यूचा हिशोब सरकारला द्यावाच लागेल.

पुणे- श्रेष्ठ नाटककार राम गणेश गडकरी व गुरुवर्य दादोजी कोंडदेव यांच्या पुतळ्यांची पुनर्स्थापना करावी अशी जोरदार मागणी आता होऊ लागली आहे .संदीप खर्डेकर,भालचंद्र कुलकर्णी,ॲड. सौ. ईशानी जोशी,विश्वजीत देशपांडे यांनी त्यासाठी महापौर मंजुश्री नागपुरे यांना साकडे घातले आहे.
खर्डेकर म्हणाले कि,’ महापालिकेच्या छत्रपती संभाजी उद्यानात (जंगली महाराज रोडवरील) नुकतेच छत्रपती संभाजी महाराजांच्या पुतळ्याचे राज्याचे मुख्यमंत्री. देवेंद्र फडणवीस यांच्या हस्ते उद्घाटन करण्यात आले, याबद्दल सकल ब्राह्मण समाजाच्या वतीने आपले मनापासून अभिनंदन करीत आहोत. शंभूराजांचा तेजस्वी पुतळा तितक्याच सुशोभनीय पध्दतीने बसवण्यात आला आहे, याचा आम्हा सर्वांना अत्यंत आनंद आहे.
काही समाजकंटकांच्या चिथावणीखोर वक्त्यव्यांमुळे तसेच सामाजिक सौहार्दता टिकवण्यासाठी काही महिन्यांपूर्वी छत्रपती संभाजी उद्यानातील श्रेष्ठ नाटककार राम गणेश गडकरी यांचा पुतळा काढून टाकण्यात आला आहे. श्रेष्ठ लेखक, संयुक्त महाराष्ट्र चळवळीतील नेते आचार्य प्र. के. अत्रे यांनी हा पुतळा संभाजी उद्यानात बसवला होता. त्यामुळे सदरच्या राम गणेश गडकरी यांच्या पुतळ्याची सुयोग्य ठिकाणी सन्मानाने पुनर्स्थापना करावी अशी आमची मागणी आहे.

त्याचबरोबर काही वर्षांपूर्वी लाल महालात असलेल्या गुरुवर्य दादोजी कोंडदेव यांचा पुतळा देखील सामाजिक असंतोषामुळे काढून टाकला होता व सद्यस्थितीत हा पुतळा सिंहगड रस्त्यावरील पु. ल. देशपांडे उद्यानात वाईट अवस्थेत पडून आहे. सदरचा पुतळा देखील पुणे शहरात सुयोग्य ठिकाणी पुन्हा सन्मानाने बसवण्यात यावा अशी आमची सर्वांची एकमुखी मागणी आहे.
आम्ही खालील सह्या करणारे सकल ब्राह्मण समाज (पुणे शहर) पदाधिकारी म्हणून प्रातिनिधीक सह्या करीत आहोत. पुणे शहरातील सुमारे ३५ ब्राह्मण संस्था / संघटना या सकल ब्राह्मण समाज संघटनेच्या सदस्य आहेत. पुणे शहरातील सर्वच समाजातील महापुरुषांच्या जयंती / पुण्यातिथीनिमित्ताने संबंधित पुतळ्यांबाबत पुणे महापालिका सन्मानाने यथोचित कार्यक्रम करीत असते, अशा वेळी वरील नमूद दोन्ही महापुरुषांच्या पुतळ्यांचा सन्मान राखून त्यांची सुयोग्य ठिकाणी पुनर्स्थापना करावी व सन्मान राखला जावा, अशी आमची आग्रहाची मागणी व विनंती आहे.

पुणे, दि.२९: ‘जनगणना २०२७’ अंतर्गत स्व-गणना पूर्ण केलेल्या नागरिकांनी त्यांना प्राप्त झालेला स्व-गणना ओळखक्रमांक (एसई आयडी) प्रगणकांस देण्यात यावा तसेच ‘घरसुचीकरण व घरांची गणना’ प्रक्रिया विहीत वेळेत पूर्ण होण्याकरिता प्रगणकांद्वारे विचारण्यात येणारी माहिती वेळेत उपलब्ध करून द्यावी, असे आवाहन प्रभारी जिल्हाधिकारी गजानन पाटील यांनी केले आहे.

जिल्ह्यात प्रगणकाद्वारे १६ मे पासून ‘घरसुचीकरण व घरांची गणना’ करण्यात येत आहे, यामध्ये नागरिकांनी १ ते १५ मे २०२६ या कालावधीत स्व-गणनेत भरलेली माहितीची पडताळणी करुन अंतिम मान्यता देण्याची प्रक्रिया करण्यात येत आहे. नागरिकांनी एसईआयडी उपलब्ध करून दिल्यानंतरच ‘घरयादी आणि गृहगणना’ प्रक्रिया पूर्ण होणार आहे. ज्यांनी स्व-गणना केलेली नाही, अशाची देखील गणना करुन ते अंतीम करण्याचे काम काम १४ जून २०२६ पर्यंत सुरु राहणार आहे.

जनगणना कायदा १९४८ च्या तरतुदींनुसार राबवला जाणारा अत्यंत महत्त्वाचा राष्ट्रीय उपक्रम आहे. प्रभावी धोरण निर्मितीला पूरक ठरणारा आणि जिल्ह्याच्या सर्वांगीण विकासात योगदान देणारा विश्वसनीय माहितीचा संग्रह (डेटा) निर्माण करण्यासाठी सक्रिय लोकसहभाग आवश्यक आहे, असेही श्री. पाटील यांनी केले आहे.