पुणे,दि. 15: एम.आय.डी.सी हिंजवडी परिसरातील रस्त्यांची तसेच हिंजवडी-म्हाळुंगे दरम्यानच्या मुळा नदीवरील पुलाच्या कामाची   पाहणी करून, सद्यस्थितीचा आढावा अन्‍न व नागरी पुरवठा मंत्री तथा जिल्‍ह्याचे पालकमंत्री गिरीश बापट यांनी आज घेतला. हिंजवडी परिसरातील वाहतूक व्‍यवस्‍था जलद, सुरक्षित होण्‍यासाठी आवश्‍यक ती कार्यवाही गतीने करण्‍याच्‍या सूचना पालकमंत्री बापट यांनी संबंधितांना दिल्‍या.

वाहतूक व्‍यवस्‍था जलद, सुरक्षित होण्‍यासाठी आवश्‍यक ती कार्यवाही गतीने करा. हिंजवडी परिसरातील वाहतुकीचा, कचऱ्याचा प्रश्न ग्रामस्थ, लोकप्रतिनिधी तसेच एमआयडीसी क्षेत्रातील लोकांना सोबत घेऊन समन्वयाने लवकरात लवकर सोडविण्यात येईल असे प्रतिपादन हिंजवडी इंडस्ट्रीज असोशिएशन तसेच एमआईडीसीच्या वतीने आयोजित बैठकीत राजीव गांधी इन्फोटेक पार्क येथील सभागृहात केले.

बैठकीस जिल्‍हाधिकारी सौरभ राव, पीएमआरडीए चे मुख्य कार्यकारी अधिकारी किरण गित्ते, वाहतूक शाखेचे उपायुक्त अशोक मोराळे,आ.लक्ष्मण जगताप एमआईडीसीचे प्रादेशिक अधिकारी संजीव देशमुख तसेच सार्वजनिक बांधकाम विभागाचे अधिकारी व हिंजवडी इंडस्ट्रीज असोसिएशन चे पदाधिकारी उपस्थित होते.

यामध्ये परिसरातील शेतकऱ्यांच्या समस्या, एमआयडीसी संदर्भातील समस्या पीएमआरडीए च्या टाउन प्लॅनिंग स्कीम मुळे हिंजवडी परिसरातील वाहतूक तसेच पार्किंगचे 75 टक्के प्रश्न सुटतील. शेतकऱ्यांच्या तसेच नागरिकांच्या हिताचा विचार करूनच सर्व प्रश्न मार्गी लावण्यात येतील, अशी माहिती श्री.बापट यांनी यावेळी दिली.

स्वच्छता क्रमवारीत देशात दुसरे मानांकन: मानांकन यादीतील महाराष्ट्रातील एकमेव कॉलेज
बारामती: स्वच्छ भारत अभियानांतर्गत मनुष्यबळ विकास मंत्रालयाच्यावतीने देशपातळीवरील शिक्षण संस्थांची स्वच्छता
मानांकने जाहिर करण्यात आली. या मानांकनात विद्याप्रतिष्ठानच्या आर्टस, सायन्स ॲण्ड कॉमर्स कॉलेजने स्वच्छता मानांकनात
देशात दुसरे स्थान पटकविले. देशभरातील साडेतीन हजार शिक्षण संस्थांनी या स्पर्धेसाठी ऑनलाईन अर्ज केला होता, महाराष्ट्रातील
केवळ याच कॉलेजला मानांकन यादीत स्थान मिळविण्याचा मान मिळाला आहे.
दिल्ली येथील हॉटेल अशोका येथे झालेल्या कार्यक्रमात केंद्रिय मनुष्यबळ मंत्री प्रकाश जावडेकर यांच्या हस्ते
विद्याप्रतिष्ठानच्या विश्वस्त सुनेत्रा पवार आणि आर्टस, सायन्स ॲण्ड कॉमर्स कॉलेजचे प्राचार्य डॉ. भरत शिंदे यांनी हा पुरस्कार स्विकारला. या कार्यक्रमाला युजीसीचे चेअरमन डॉ. विरेंदरसिंग चौहान, एआयसीटीईचे चेअरमन डॉ. अनिल सहस्त्रबुध्दे आदी मान्यवर उपस्थित होते.
देशात सुरू असणाऱ्या स्वच्छ भारत अभियानांतर्गत केंद्रिय मनुष्यबळ मंत्रालयाच्यावतीने पाच वेगवेगळ्या विभागासाठी
देशातील एकूण 40 हजार शिक्षण संस्थांकडून ऑनलाईन अर्ज मागविले होते. या अभियानाला प्रतिसाद देत देशातील सुमारे साडेतीन हजार शिक्षण संस्थांनी या स्पर्धेत भाग घेतला होता. या अर्जातील गुणांकनात सरस असणाऱ्या 174 शिक्षण संस्थांना देशाच्या राजधानी दिल्लीत बोलविण्यात आले होते. निमंत्रित करण्यात आलेल्या या निवडक 174 शिक्षण संस्थांपैकी 25 संस्था पुरस्कारासाठी निवडण्यात आल्या. या पैकी स्वच्छता मानांकनात विद्या प्रतिष्ठान बारामतीच्या आर्टस, सायन्स ॲण्ड कॉमर्स कॉलेजला देशात दुसरे स्थान मिळाले. यामध्ये कॉलेज, विद्यापीठ, टेक्निकल इन्स्टिट्यूट, आणि सरकारी संस्थांचा समावेश आहे.
या विभागात तामिळनाडूच्या कोंगू आर्ट आणि सायन्स कॉलेज अव्वल स्थानावर राहिले. बारामतीचे आर्टस, सायन्स ॲण्ड
कॉमर्स कॉलेजला दुसरे मानांकन तर चेन्नईतील रामकृष्ण मिशन विवेकानंद कॉलेजचा तिसरा क्रमांक आला.
आर्टस, सायन्स ॲण्ड कॉमर्स कॉलेजच्या या कामगिरीने विद्याप्रतिष्ठानच्या शिरपेचात मानाचा तुरा खोवला गेला आहे.
संस्थेचे अध्यक्ष आदरणीय शरद पवार साहेब, माजी मुख्यमंत्री अजितदादा पवार, खासदार सुप्रियाताई सुळे, सुनेत्रावहिनी पवार यांच्या मार्गदर्शनामुळे महाविद्यालयाला हे यश लाभले. या स्वच्छता अभियानात संस्थेचे सर्व विश्वस्त महाविद्यालयाचे प्राध्यापक, शिक्षकेत्तर कर्मचारी व विद्यार्थ्यांचा मोलाचा वाटा आहे. कॉलेजच्या या कामगिरीबद्दल सर्व स्तरातून कॉलेजचे अभिनंदन होत आहे.

अन्न व औषध प्रशासन मंत्री गिरीश बापट यांच्या हस्ते उद्घाटन

पुणे : धार्मिक स्थळी भाविकांना दिला जाणारा प्रसाद हा अधिक सुरक्षित असावा यासाठी अन्न व औषध प्रशासनाच्या पुणे विभागामार्फत एक दिवसीय कार्यशाळेचे आयोजन करण्यात आले होते. मराठा चेंबर्स ऑफ कॉमर्स येथे आयोजित कार्यशाळेचे उद्घाटन राज्याचे अन्न व औषध प्रशासन मंत्री गिरीश बापट यांच्या हस्ते झाले.

यावेळी बोलताना मंत्री बापट म्हणाले, अन्न दान हे श्रेष्ठ दान आहे. त्यामुळे लोकांना सुरक्षित व चांगल्या प्रतीचे अन्न देणे ही अन्न दात्याची जबादारी आहे. लोकांना अधिक सुरक्षित अन्न मिळावे यासाठी अन्न व औषध प्रशासनामार्फत राज्यभर कार्यशाळा आयोजित करण्यात येत आहेत. या कार्यशाळेत विविध धार्मिक प्रसादालयातील विश्वस्त, आचारी,कर्मचारी तसेच  परिसरातील हॉटेल  खाद्यपदार्थ विक्रेते यांना सुरक्षित अन्न पदार्थाची निर्मिती, साठवणूक व वाटप वितरण या बाबत प्रशिक्षित केले जात आहे. धार्मिक संस्थांमधील अन्न सुरक्षा व्यवस्थापन अधिक चांगले असले पाहिजे. प्रसाद तयार करण्यासाठी वापरण्यात येणाऱ्या प्रत्येक घटकाची गुणवत्ता उत्तम असली पाहिजे. त्याचप्रमाणे तेथे स्वच्छतेचे निकष पाळले गेलेच पाहिजेत. सुरक्षित अन्न मिळवण्यासाठी लोकांनीही सजग राहिले पाहिजे.

उद्योजक आनंद चोरडिया म्हणाले, ग्राहकाची काळजी घेणे हे व्यावसायिकाचे प्रथम कर्त्यव्य आहे. ग्राहकाला चांगल्या दर्जाचे अन्न पदार्थ दिल्यास लोकांचा त्या व्यावसायिकावरील विश्वास वाढतो त्यामुळे त्याच्या व्यवसायात प्रगती होते. पर्यायाने व्यावसायिक आणि ग्राहक यांना समाधान लाभते.

आपल्या प्रास्तविकात अन्न व औषध प्रशासन पुणे विभागाचे सह आयुक्त शिवाजी देसाई यांनी पुणे विभागाच्या वतीने आज पर्यंत १५ धार्मिक स्थळांच्या प्रसादालयातील आचारी तसेच विश्वस्त यांच्या सह २०० हून अधिक लोकांना प्रशिक्षित केल्याचे सांगितले.

आज संपन्न झालेल्या कार्यशाळेस जैन श्वेतांबर, दादावाडी, मंदिर ट्रस्ट सारसबाग, श्री.शंकर महाराज समर्थ मठ धनकवडी, पुणे, एन व्ही सी इस्कॉन  मंदिर कात्रज, गुरुद्वारा श्री गुरुसिंग साहेब गणेश पेठ पुणे, गुरुनानक दरबार , कॅम्प,पुणे, श्री अक्कलकोट स्वामी महाराज मठ, बुधवार पेठ, पुणे, स्वामी नारायण मंदिर आंबेगाव या धार्मिक स्थळांचे विश्वस्त  तसेच प्रसादालयाचे आचारी तसेच  एस.एन.डी.टी महाविद्यालयातील मुली,हॉटेल मॅनेजमेंट अॅंड केटरिंग महाविद्यालयाच्या मुलांनी सहभाग घेतला होता. या कार्यशाळेत एम.एम चितळे यांनी उपस्थितांना प्रशिक्षण दिले.

पुणे- शहर जिल्हा काँग्रेस कंमिटी पर्वती विधानसभा मतदार संघ तर्फे पेट्रोल डिझेल दरवाढ व महागाई विरुद्ध निदर्शने पुणे सातारा रोड ( उत्सव हॉटेल चौक ) येथे करण्यात आले. या प्रसंगही रमेश बागवे ( अध्यक्ष पुणे शहर जिल्हा काँग्रेस कंमिटी), अभय छाजेड व अनेक कार्यकर्ते उपस्थित होते.