पुणे, दि. 10 : दैनंदिन जीवन जगताना अनेक प्रकारच्या समस्यांना नागरिकांना सामोरे जावे लागते. मानवी चुकांमुळे घडणारे अपघात तसेच नैसर्गिक आपत्तीच्या काळात वेगवेगळ्या आव्हानांना नागरिकांना सामोरे जावे लागते. या आव्हानांचा सामना करताना अंमलात आणावयाच्या उपाययोजनांची माहिती नागरिकांना व्हावी यासाठी जिल्हा आपत्ती व्यवस्थापन कक्षाच्यावतीने चित्ररथ तयार करण्यात आला आहे. या चित्ररथाला आज जिल्हाधिकारी सौरभ राव यांनी झेंडा दाखवून मार्गस्थ केले. नूतन जिल्हाधिकारी कार्यालयाच्या आवारात संपन्न झालेल्या या कार्यक्रमाला निवासी उपजिल्हाधिकारी राजेंद्र मुठे, सार्वजनिक बांधकाम विभागाचे कार्यकारी अभियंता भारतकुमार बावीस्कर, आपत्ती निवारण व्यवस्थापन विशेषज्ञ रिया सहा, जिल्हा आपत्ती निवारण व्यवस्थापन अधिकारी विठ्ठल बनोटे उपस्थित होते.

आपत्ती निवारण कार्याची माहिती सर्वसामान्य नागरिकांना व्हावी यासाठी, या चित्ररथाद्वारे जिल्हयात जनजागृती करण्यात येणार आहे. या चित्ररथासोबत रुक्मिणी कदम, शामा जळगांवकर, मंगला हरिभक्त, अंजू परदेशी, चंद्रकला पाचकर, सीमा पवार, मीना शहा या प्रशिक्षीत कार्यकर्त्यांचे पथक सहभागी झाले आहे.

नैसर्गिक आपत्ती मग ती कोणतीही असो, टाळता येत नसली तरी अशा संभाव्य आपत्तींना सामोरे जाण्याची नागरिकांची पूर्वतयारी असावी यासाठी या चित्ररथाद्वारे जनजागृती करण्याचा उद्देश असल्याचे जिल्हाधिकारी सौरभ राव यांनी स्पष्ट केले. या चित्ररथाद्वारे करण्यात येणाऱ्या जनजागृती अभियानाचा नागरिकांनी लाभ घेऊन आपत्ती निवारणासाठी सक्षम करावे, असे आवाहन केले.

 जिल्हाधिकारी कार्यालयाची अत्याधुनिक इमारत !

‘जिल्हाधिकारी’ तथा ‘जिल्हा दंडाधिकारी’ म्हणजे जिल्हयाचे प्रशासकीय प्रमुख!  जिल्हयाचा प्रशासकीय कारभार चालवायचा तर ते कार्यालयही तसंच दिमाखदार हवं!  पुणे जिल्हाधिकारी कार्यालयाची नवीन इमारत अत्याधुनिक आणि सुसज्ज असून ही इमारत पुण्याच्या शिरपेचात मानाचा तुरा म्हणावी अशी तयार झाली आहे.  या भव्यदिव्य अशा नूतन  इमारतीचं उद्घाटन दि. 7 ऑक्टोबर 2017 रोजी राज्याचे मुख्यमंत्री देवेंद्र फडणवीस यांच्या हस्ते आणि महसूल मंत्री चंद्रकांत पाटील, पुणे जिल्हयाचे पालकमंत्री गिरीष बापट, महापौर, लोकप्रतिनिधी, विभागीय आयुक्त चंद्रकांत दळवी, जिल्हाधिकारी सौरभ राव व अन्य मान्यवरांच्या प्रमुख उपस्थितीत झालं.  जुन्या वास्तूचे नव्या वास्तूत रुपांतर होतानाच्या घडामोडी आणि हा दिमाखदार लोकार्पण सोहळा पाहण्याचा योग मला आला, ही भाग्याचीच गोष्ट… या वास्तूविषयी थोडसं…

जिल्हाधिकारी कार्यालयाची पर्यावरणपूरक ही नवीन भव्यदिव्य इमारत पाहताना जुनी इमारत डोळयांसमोर आली. जुनी इमारत सुमारे 125 वर्षांपुर्वीची कौलारु इमारत होती. पुण्याच्या वाढत्या लोकसंख्येबरोबरच वेळोवेळी होणारी बांधकामं, वाढणारं कामकाज, अभिलेखांची संख्या, नागरिकांची वाढणारी गर्दी तसंच वाहनांच्या पार्किंगची गंभीर समस्या यामुळं ही इमारत नव्यानं बांधणं गरजेचं होतं. तत्कालीन जिल्हाधिकारी चंद्रकांत दळवी यांनी आवारातील सर्व कार्यालयं एकाच छताखाली आणण्याच्या हेतुनं नविन प्रशासकीय इमारतीचा प्रस्ताव शासनाकडे सादर केला. या प्रस्तावास शासनाने सन 2009 मध्ये 42 कोटी 13 लाख रुपयांच्या खर्चाची प्रशासकीय मान्यता दिली.  1880 साली बांधण्यात आलेल्या हेरिटेज दर्जा दोनमध्ये समाविष्ठ असलेली इमारत धोकादायक झाली असल्याने हेरिटेज कमिटीमार्फत ती पाडण्याचा निर्णयही घेण्यात आला. मात्र जुन्या इमारतीची स्मृती राहील, या दृष्टीनं चौमुखी राजमुद्रा असणारं बांधकाम नविन इमारतीच्या रचनेत  तसंच ठेवण्यात आलं. सन 2014 मध्ये या नियोजित प्रकल्पाचं भूमीपुजन तत्कालिन उपमुख्यमंत्री अजित पवार यांच्या हस्ते झालं. त्यानंतर या जागेतील कार्यालयांचे स्थलांतर करुन मार्च 2014 मध्ये शुभम सिव्हिल प्रोजेक्टस् या कंत्राटदाराकडून प्रत्यक्ष बांधकामास सुरुवातही झाली.

जिल्हाधिकारी कार्यालय आवारात अस्तित्वात असलेल्या 197 झाडांपैकी कमीत कमी झाडे बाधित होतील, याप्रमाणं इमारतीची संकल्पना करण्यात आली.    तत्कालीन जिल्हाधिकारी चंद्रकांत दळवी, विकास देशमुख यांच्यासह सध्या कार्यरत जिल्हाधिकारी सौरभ राव यांनी वेळोवेळी पाठपुरावा केल्यामुळं  ही भव्य व देखणी इमारत तीन वर्षातच उभी राहिली. या नवीन जिल्हाधिकारी कार्यालयाच्या इमारतीचे  एकुण बांधकाम क्षेत्र 18 हजार 445 चौरस मीटर असुन, मुख्य इमारत  ए व बी विंग जी +4 मजले व सी विंग केवळ 5 वा मजला अशी  तब्बल 10 हजार 214 चौरस मीटर चटई क्षेत्राची आहे.  तर केवळ पार्कींग करीता जी+3 मजल्यांची 7 हजार 766 चौ. मी. क्षेत्रफळाची स्वतंत्र इमारत बांधण्यात आली आहे. या    बांधकामाचा नकाशा हरित इमारत संकल्पनेवर आधारीत आहे. हे बांधकाम केंद्र सरकारच्या गृह (GRIHA) संस्थेच्या हरित इमारतीसाठीच्या चार तारांकीत मानांकनाकरीता नोंदणीकृत आहे. बांधकामामध्ये पर्यावरण पुरक बांधकाम साहित्यांचाही वापर करण्यात आला आहे.

या इमारतीसाठी 66 कोटी 30 लाख रुपये खर्च झाला असुन, त्यातील 47 कोटी 50 लाख रुपये स्थापत्य कामासाठी तर अन्य रक्कमेत विद्युत सुविधा, अंतर्गत रस्ते, संरक्षक भिंत, अंतर्गत सुशोभिकरण व इतर सुविधा निर्माण करण्यात आल्या आहेत.   इमारतीमध्ये 213 क्षमतेचे बहुउद्देशीय सभागृह, 109 आसन क्षमतेचे बैठक सभागृह तसेच व्हिडिओ कॉन्फरन्सींग सभागृहाचाही समावेश आहे. याबरोबरच अंतर्गत पाणी साठवण, अग्निरोधक यंत्रणा, लिफ्ट ची सोय करण्यात आलेली आहे.  200 चारचाकी व 1 हजार 96  दुचाकी गाड्यांच्या पार्कींगची व्यवस्थाही येथे करण्यात आली आहे.  जिल्हाधिकारी यांच्यासह साधारणपणे 500  अधिकारी व कर्मचारी बसतील अशी व्यवस्था या इमारतीत करण्यात आली आहे. सुरक्षेच्या दृष्टिने 94 सीसीटिव्ही कॅमेरे इमारतीच्या अंतर्गत व बाह्य भागात बसविण्यात आलेले आहे.

नवीन इमारतीमध्ये जाणे हे प्रगतीचे लक्षण आहे. या नव्या सुसज्य इमारतीमध्ये लोकाभिमूख आणि गतीमान पध्दतीने काम व्हावे, तसेच सामान्य नागरिकांबद्दल संवेदनशीलता जपून  नवी कार्यसंस्कृती निर्माण व्हावी, अशी अपेक्षा मुख्यमंत्री देवेंद्र फडणवीस यांनी या इमारतीच्या लोकार्पण सोहळ्यात व्यक्त केली. राज्याच्या मुख्यमंत्री यांनी व्यक्त केलेली ही अपेक्षा आणि नागरिकांप्रती असलेली लोकाभिमुख प्रशासनाची बांधिलकी जपण्यासाठी जिल्हा प्रशासन निश्चितच प्रयत्नशील राहील…..

  -वृषाली पाटील (माहिती अधिकारी)

                                                                                                                             जिल्हा माहिती कार्यालय,  पुणे

पुणे-
‘सेतू अभिवाचन मंच’, पुणे या संस्थेने ज्ञानपीठ पुरस्कार सन्मानित कविवर्य ‘विंदा करंदीकर’ यांच्या जन्मशताब्दी वर्षाच्या निमित्ताने, त्यांना आदरांजली वाहण्यासाठी ‘तसेच घुमते शुभ्र कबूतर’ या काव्य-मैफलीतून त्यांच्या कवितांचे अभिवाचन शनिवारी संध्याकाळी पत्रकार भवनात केले. ‘गीतांजलि जोशी’, ‘श्रुति विश्वकर्मा’ ‘मुकुंद दातार’ आणि दीपाली दातार यांनी यावेळी विंदांच्या ‘एक परी फूलवेडी’, ‘पत्ता’ यासारख्या बालकविता, ‘माझ्या मना बन दगड’, ‘ती जनता अमर आहे’ यासारख्या सामाजिक कविता, ‘प्रेम करावे असे परंतु’, ‘थोडी सुखी थोडी कष्टी’, ‘माझे मला आठवले’ अशा प्रेमकविता, ‘उपयोग काय त्याचा’, ‘साठीचा गझल’, ‘तेच ते’ यासारख्या मिश्किल कविता, ‘ऊन हिवाळ्यातील शिरशिरता’ सारख्या निसर्ग कविता, ‘झपताल’, ‘बंदिश- एक स्वरचित्र’ तसेच ‘सावल्या’, ‘कसा मी कळेना’ या सारख्या चिंतनशील कवितांचे सादरीकरण केले.
‘तसेच घुमते शुभ्र कबूतर’, ‘पवित्र मजला’, ‘ओंजळीत स्वर तुझेच’, ‘माथेरान एक भास’, ‘जन्मा आधी जन्मे’ आणि ‘कसा मी कळेना’ या कवितांना ‘श्रुति विश्वकर्मा’ यांनी अर्थवाही चाली दिल्या होत्या. केवळ तानापुर्‍याच्या स्वरांवर श्रुतिने सादर केलेल्या या कवितांच्या गायनाने रसिक श्रोते मंत्रमुग्ध झाले. नीता तोरगट्टी यांनी काढलेले विंदाचे व्यक्तिचित्र आणि सत्यश्री मांडके यांनी काढलेले ‘तसेच घुमते शुभ्र कबूतर’ ह्या कवितेवरील चित्र यामुळे कार्यक्रमात वेगळीच रंगत आली. या कार्यक्रमाची संहिता दीपाली दातार यांनी लिहिली होती. गीतांजलि जोशी यांनी कार्यक्रमाचे प्रास्ताविक केले. विंदाच्या कन्या ‘जयश्री काळे’, जावई ‘विश्वास काळे’ तसेच चिरंजीव ‘आनंद करंदीकर’ आणि स्नुषा ‘सरिता’ करंदीकर’ यावेळी उपस्थित होते. .

       पुणे-देशी फार्मस दुग्ध व्यवसाय आधुनिक पध्दतीने करत असल्याने कॅशलेस इंडियासाठी या दुग्ध व्यवसायातून क्रांती घडणार असल्याचे प्रतिपादन पुणे जिल्ह्याचे पालकमंत्री गिरीश बापट यांनी केले . सोमवार पेठ येथील कमला हाईटसमध्ये  देशी फार्मसचे शाखेचे उदघाटन महाराष्ट्र राज्याचे अन्न व नागरी पुरवठा मंत्री व पुणे जिल्ह्याचे पालकमंत्री गिरीश बापट यांच्याहस्ते फीत कापून करण्यात आले .

     त्यांनी सांगितले कि , देशी फार्मस हा आपला दुग्ध व्यवसाय आधुनिक पध्दतीने करत आहे . ग्राहकांचे पैसे हे ऑनलाईन पद्धतीने देशी फार्मसच्या खात्यावर जमा होणार आहेत . तसेच दूध न दिल्यास तशी नोंद देखील ऑनलाईन पध्दतीने होणार आहे . त्यामुळे ग्राहकास आणि दूध विक्रेता डिजिटल पध्दतीने व्यवहार होत आहे . त्यामुळे कॅशलेस इंडियासाठी या दुग्ध व्यवसायातून क्रांती घडणार आहे .

या उदघाटन सोहळ्यास शिवसेना पुणे शहर संघटक अजय भोसले , क्रीडा समिती अध्यक्ष व नगरसेवक सम्राट अभय थोरात , देशी फार्मसचे संचालक अलोक पवार , प्रतिक गुप्ता ,  देशी फार्मसचे सोमवार पेठ शाखेच्या संचालिका ऐश्वर्या सम्राट थोरात , हिराबाग मंडळाचे अध्यक्ष अभय थोरात ,शेतकरी कामगार पक्षाचे नेते प्रविण गायकवाड  नगरसेविका आरती कोंढरे , नगरसेवक अजय कोंढरे , नगरसेवक योगेश समेळ व अन्य मान्यवर उपस्थित होते .

     गीर गाय पासून उत्पादन खाद्य पदार्थ देशी फार्मसची पुण्यात सातवी ब्रँच हे सोमवार पेठेत चालू करण्यात आली . अशी माहिती देशी फार्मसचे संचालक अलोक पवार यांनी दिली .

राहुल देशपांडे यांच्या गायकीचा घेतला आस्वाद

पुणे – भय इथले संपत नाही,बगळ्यांची माळ फुले यासारख्या सुरेल संगीत रचनांनी रसिकांना मंत्रमुग्ध केले.  अशा चैतन्यमय वातावरणात पुणेकरांची रविवारची संध्याकाळ

रंगली. निमित्त होते सुरेखा कम्युनिकेशन्स प्रा. लि आयोजित‘राहुल देशपांडे लाईव्ह’ या कार्यक्रमाचे.

महालक्ष्मी लॉन्स येथे हा कार्यक्रम पार पडला. यावेळी आमदार मेधा कुलकर्णी, रांका ज्वेलर्सचे फतेचंद रांका, निरामय वेलनेस सेंटरच्या अमृता चांदोरकर, व्हीजीए डिजीटल प्रिंटर्सचे व्यंकटेश मांडके,सुरेखा कम्युनिकेशन्स प्रा. लिचे सचिन पाटील आणि अजय मोरे यावेळी उपस्थित होते.

राहुल यांनी सादर केलेली ‘सहेला रे …’ ही चीज तर खास गानसरस्वती किशोरी

आमोणकरांची आठवण ताजी करणारी होती. हर्ष, क्रोध, लोभ,मोह,मत्सर या भावनांच्या यांच्या परे घेवून जाणारे शास्त्रीय संगीत असते. अशी भावनाही त्यांनी यावेळी व्यक्त केली.

‘सुर निरागस हो’ या गाण्याने रसिकांच्या मनाचा ठाव घेत वन्स मोर मिळवला. ‘घेई छंद मकरंद’ सादर करताच रसिकांनी उस्फूर्त दाद देत या स्वरमैफिलीत खऱ्या अर्थाने रंग भरले.

यावेळी निखिल फाटक यांनी तबल्यावर सुरेख ठेका धरत रसिकांची वाहवा मिळवली.

निखिल फाटक (तबला),भूषण माटे (गिटार), आदित्य जोग (सहयोगी संगीतकार),अभिजित भदे (रिदमिस्ट), अनय गाडगीळ (कीबोर्ड) यांनी सुरेख साथसंगत केली. मिलिंद कुलकर्णी यांनी कार्यक्रमाचे रंगतदार आणि माहितीपूर्ण निवेदन केले.

पुणे – भारतीय जनता पार्टी पुणे कॅन्टोन्मेंट विधानसभा मतदार संघातील महिला आघाडी अध्यक्षपदी लक्ष्मीताई बाळासाहेब घोडके  यांची नियुक्ती करण्यात आली . या नियुक्तीचे पत्र भारतीय जनता पार्टीचे प्रदेशाध्यक्ष रावसाहेब दानवे यांच्याहस्ते देण्यात आले .

      लक्ष्मीताई बाळासाहेब घोडके या पुणे महानगरपालिकेच्या माजी नगरसेविका आहेत , त्यांनी प्रभाग समिती अध्यक्ष , महिला बाल कल्याण समिती उपाध्यक्ष आदी पदावर काम केले असून मंगळवार पेठयेथील नरपतगीर चौकातील जय जगदंबा महिला मंडळाच्या संस्थापक अध्यक्ष आहेत .

वानवडी येथील महात्मा फुले सांस्कृतिक भवनमध्ये झालेल्या कार्यक्रमात हे नियुक्ती पत्र देण्यात आले . यावेळी भाजप पुणे शहराध्यक्ष योगेश गोगावले , महाराष्ट्र राज्याचे सामाजिक न्याय राज्यमंत्री दिलीप कांबळे ,खासदार अनिल शिरोळे , खासदार संजय काकडे , सभागृह नेते श्रीनाथ भिमाले , नगरसेवक सुनिल कांबळे ,   भारतीय जनता पार्टी पुणे कॅन्टोन्मेंट विधानसभा मतदार संघाचे अध्यक्ष जयप्रकाश पुरोहित , पुणे कॅन्टोन्मेंट बोर्डाचे अध्यक्ष संतोष इंदूरकर आदी मान्यवर उपस्थित होते . 

पुणे, दि. 9 : ग्रामिण भागाचा विकास करुन खेडेगांव स्मार्ट करण्याच्या उद्देशाने श्यामाप्रसाद मुखर्जी राष्ट्रीय रुरबन अभियान राबविण्यात येते. या अभियानाच्या नियामक समितीची बैठक आज जिल्हाधिकारी कार्यालयात जिल्हा परिषदेचे मुख्य कार्यकारी अधिकारी दौलत देसाई यांच्या अध्यक्षतेखाली संपन्न झाली. बैठकीला आमदार बाबुराव पाचरणे, अतिरिक्त जिल्हाधिकारी रमेश काळे, ग्रामीण भागातील पदाधिकारी, जिल्हा ग्रामीण विकास यंत्रणेचे प्रकल्प संचालक दिनेश डोके उपस्थित होते.

या बैठकीत राष्ट्रीय रुरबन अभियानांतर्गत जिल्हयातील कामांच्या प्रगतीचा आढावा घेण्यात आला.  लोणी काळभोर गांव समुहाअंतर्गत झालेल्या कामांचा आढावा यावेळी घेण्यात आला. विविध विकास कामांना यावेळी मान्यता देण्यात आली., या अभियानात करण्यात येणाऱ्या विविध कामांच्या योजनांचा सविस्तर प्रकल्प अहवाल, प्रशासकीय मान्यता, तांत्रिक मान्यता, निधीची उपलब्धता, कामांची अंदाजपत्रके, वडगांव, ता.मावळ येथील एकात्मिक गावसमुह आराखडा यांचा आढावा बैठकीत घेण्यात आला. आमदार बाबुराव पाचरणे यांनी या अभियानातील विकास कामांसंदर्भात अधिकाऱ्यांना मार्गदर्शन केले. राष्ट्रीय रुरबन मिशन अंतर्गत मंजूर विकास कामे पूर्ण करण्यासाठी कालबध्द कार्यक्रम राबविण्याची सूचना मुख्य कार्यकारी अधिकारी दौलत देसाई यांनी उपस्थित अधिकाऱ्यांना केली. या बैठकीला लोकप्रतिनिधी, गट विकास अधिकारी, ग्रामसेवक उपस्थित होते.