पुणे : आबूधाबी येथे आयोजित करण्यात आलेल्या जागतिक दर्जाच्या वर्ल्ड स्किल स्पर्धेत आळंदी येथील एमआयटी अ‍ॅकॅडमी ऑफ इंजिनियअरिंगच्या (एमआयटी एओई) विभोर मेश्राम व समर्थ गौदर या दोन विद्यार्थ्यांनी मोबाइल रोबोटिक्स कौशल्य स्पर्धेत ‘मेडल ऑफ एक्सलन्स’चा पुरस्कार प्राप्त करून देशाचा सन्मान वाढविला. त्यांच्या या यशाबद्दल एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ.विश्‍वनाथ दा. कराड यांच्या हस्ते त्यांचा विशेष सत्कार करण्यात आला.
आबूधाबी येथे वर्ल्ड स्किल-2017 स्पर्धेत एमआयटी अ‍ॅकॅडमी ऑफ इंजिनियरिंगचे विद्यार्थी विभोर मेश्राम आणि समर्थ महेश गौदर याने भारताचे प्रतिनिधीत्व करतांना ‘मेडल ऑफ एक्सलन्स’चा पुरस्कार प्राप्त केला आहे. ‘प्ले ग्राउंड मानेटरिंग रोबो’ या थीमच्या स्पर्धेत विद्यार्थ्यांनी मोबाइल रोबोटिक्सचे कौशल्य दाखवीत हे पदक प्राप्त केले. त्यांनी या रोबोचेे डिझाइन, फॅब्रिकेशन आणि प्रोग्रॅम स्वतः तयार केला होता. स्पर्धेत 59 देशातील 1300 पेक्षा अधिक विद्यार्थी सहभागी झाले होते. यामध्ये सिंगापूर, फ्रान्स, जर्मनी, जपान, कोरिया, चीन, रशिया, नेदरलँड्स, हाँगकाँग बरोबरच अन्य देशातील विद्यार्थी सहभागी झाले होते.
या विद्यार्थ्यांना एमआयटी अ‍ॅकॅडमी ऑफ इंजिनिअरिंगचे प्राचार्य डॉ.योगेश भालेराव, डॉ.महेश गौदर आणि डॉ. आनंद मालेवार यांनी मार्गदर्शन केले.
कॉलेजचे प्राचार्य डॉ.भालेराव यांनी सांगितले की, या विद्यार्थ्यांना बक्षिसाच्या स्वरूपात प्रत्येकी एक एक लाख रूपये आणि नॅशनल स्किल डेव्हलमेंट ऑफ कार्पोरेशनकडून नोकरीची हमी देण्यात आली आहे.

पुणे-फेरीवाल्यांच्या विरोधातील आंदोलनाला मनसेने काल दोन दिवसांचा अवधी दिला असताना आज दुपारी  काही कार्यकर्त्यांनी  राजाराम पूल आणि फर्ग्युसन कॉलेज रस्त्यावरील फेरीवाल्यांवर  अटॅक आंदोलन केले. या ठिकाणी असलेल्या फेरीवाल्यांचे विक्रीसाठी मांडलेल्या वस्तू, सामान, फळे रस्त्यावर इतरस्ततः फेकून देण्यात आली .आणि मनसे च्या विजयाच्या घोषणा देण्यात आल्या .
मुंबई मधील फेरीवाल्यांच्या विरोधात मनसेकडून आक्रमक आंदोलन केले जात आहे. आता मुंबई पाठोपाठ पुण्यातही परप्रांतीय अनधिकृत फेरीवाले मनसेच्या रडार वर  आले आहेत. फेरीवाल्यांवर दोन दिवसांत कारवाई करण्याचे पत्र मनसेकडून यापूर्वी महापालिका आयुक्त कुणाल कुमार यांना दिले होते. कारवाई न झाल्यास तीव्र आंदोलन करण्याचा इशारा मनसे शहराध्यक्ष अजय शिंदे यांनी दिला होता. मात्र, या दोन दिवसात फेरीवाल्यांवर महापालिकेकडून कारवाई झाली नाही. तथापि मनसे पदाधिकारी मुंबईत व्यस्त असल्याने पुण्यातील आंदोलन आणखी दोन दिवस पुढे ढकलण्यात आल्याचे मनसेकडून कालच सांगण्यात आले होते.मात्र आज गुरुवारी दुपारी चार वाजण्याच्या सुमारास अचानक फेरीवाल्यांच्या विरोधात आंदोलन करण्याचा निर्णय घेण्यात आला. त्याप्रमाणे गट करून शहरातील विविध भागांत पाठविण्यात आले.
जंगली महाराज रस्त्यावर कपडे, खाद्यान्न, पाणीपुरी विकत असलेल्यांना लक्ष्य करण्यात आले. त्यांचे स्टॉल उधळून लावण्यात आले. काही जणांना धक्काबुक्कीही करण्यात आली. पादत्राणांच्या दुकानांनाही या आंदोलनाचा फटका बसला.  राजारामपुलावरील फळविक्रेत्यांवर हल्ला करीत या विक्रेत्यांचे सर्व सामान, फळे रस्त्यावर फेकून दिली. तसेच फर्ग्युसन कॉलेज रस्‍ता, कर्वे रस्‍ता येथेहीकार्यकर्त्यांनी तोडफोड केली. फेरीवाल्यांचे साहित्य रस्‍त्यावर फेकून दिले.

पुणे : येत्या 14 नोव्हेबर रोजीच्या कार्तिकी एकादशी निमित्त होणाऱ्या यात्रा सोहळयात मोठया प्रमाणात भाविक सहभागी होत असतात. या यात्रा कालावधीत सर्व यंत्रणांनी समन्वय ठेवून कामे करावीत अशा सूचना जिल्हाधिकारी सौरभ राव यांनी आज दिल्या.

नवीन जिल्हाधिकारी कार्यालय येथे जिल्हाधिकारी श्री. राव यांच्या अध्यक्षतेखाली आळंदी येथील कार्तिकी एकादशी यात्रा सोहळयाची पुर्व तयारी बैठक घेण्यात आली यावेळी ते बोलत होते. यावेळी मुख्य कार्यकारी अधिकारी डॉ. दौलत देसाई, निवासी उपजिल्हाधिकारी राजेंद्र मुठे आदी उपस्थित होते.

जिल्हाधिकारी सौरभ राव  पुढे म्हणाले की, श्री क्षेत्र आळंदी येथे होणाऱ्या कार्तिकी एकादशी यात्रा सोहळयासाठी खेडच्या उपविभागीय अधिकारी व तहसिलदार यांनी आपत्ती व्यवस्थापन कक्ष (नियंत्रण)स्थापन करावे. कायदा व सुव्यवस्थेच्या दृष्टीने आवश्यक त्या उपाययोजना कराव्यात. टँकरने पाणी पुरवठा करण्यासाठी विहीर अधिग्रहण करावी. तसेच वारकऱ्यांसाठी सरकारी दरात रॉकेल, गॅस, धान्य उपलब्ध करुन दयावे. आळंदी येथे पाहणी करुन इतरही अडचणीची दखल घ्यावी. तेथील अतिक्रमण काढावे. यात्रा कालावधीत मांसमच्छी व दारु विक्री यावर बंदी घालावी. आळंदी नगरपरिषदेने तिर्थक्षेत्रातील प्रमुख भागामध्ये (प्रदक्षिणा रोड, गोपाळपुरा, इंद्रायणी घाट) येथे विद्युत व्यवस्था करावी. पालखी तळावरील स्वच्छता व सपाटीकरण करण्यात यावे. रस्त्यावरील, गटारावरील चेंबरवरील पत्रे काढुन चेंबर झाकणेचे योग्य नियोजन करावे. तात्पुरती शौचालये उभारणे, आरोग्याच्या दृष्टीने यात्रेच्या ठिकाणी औषधांची धुर फवारणी करावी. आळंदी येथील रस्ते दुरुस्त करणे, उघडी गटारे बंद करणे, आळंदी  येथील नियंत्रण कक्षात तसेच शहरात ठिकठिकाणी सीसीटीव्ही कॅमेरे बसविणे. तसेच भाविकांची सुरक्षितता विचारात घेऊन आळंदी यात्रेच्या ठिकाणी पथारी वाले विक्रेते, खेळणी विक्रेत याबाबतचे नियोजन करणे.

पोलीस विभागाने पोलीस बंदोबस्त तैनात करणे. आळंदी येथे येणाऱ्या वाहनांचे नियोजन करणे. स्पीकरचा आवाज मार्यादीत ठेवणे विषयी दक्षता घ्यावी. तसेच ग्रामीण रुग्णालयाने रुग्णवाहिकासह सुसज्ज डॉक्टर व मेडीसिन, ओ.पी.डी. व आय.पी.डी.ची तात्काळ व्यवस्था करावी. पिंपरी चिंचवड महानगर पालिकेने नियमित पाणी पुरवठा करावा. श्री क्षेत्र आळंदी येथे अग्निशामक बंब याची सोय करावी. एस.टी.महामंडळाने शासकीय विश्रामगृहाजवळ यात्रा काळात तात्पुरते एस.टी.स्टॅण्ड उभारावे.देहुफाटा चौकाच्या बाहेर पार्किंगची व्यवस्था करावी. यात्रा कालावधीत जादा बसेसची व्यवस्था करावी. प्रादेशिक परिवहन विभागाने जड वाहने प्रवेशास प्रतिबंध करावा.तसेच जलसंपदा विभागाने इंद्रायणी नदीत दोन दिवस आधी पाणी सोडावे. भारत संचार विभागाने मोबाईल कनेक्टीव्हीटी  कॅपॅसिटी वाढवावी. विद्युत विभागाने दि.9 ते 18 नोव्हेंबर कालावधीत अखंडीत वीज पुरवठा करावा. सार्वजनिक बांधकाम विभागाने पालखी मार्गावरील रस्ते व्यवस्थित करावे आदी सूचना या बैठकीत देण्यात आल्या.