Ø  गरिबांच्या चेहऱ्यावर हास्य फुलविणाऱ्या ‘सौभाग्य’ योजनेचा शुभारंभ

Ø  डिसेंबर 2018 पर्यंत राज्यातील प्रत्येक घरापर्यंत वीज

Ø  राज्याला वीज वितरण सक्षमीकरणासाठी केंद्राकडून निधी

नागपूर – स्वातंत्र्यप्राप्तीनंतर प्रत्येक देशवासियांनी हक्काचे घर, पाणी, वीज तसेच शेतीला सिंचणासाठी पाणी उपलब्ध होण्याचे स्वप्न पहिले होते. प्रधानमंत्री नरेंद्र मोदी हे उजाला, प्रधानमंत्री आवास योजना, उज्ज्वला योजना व सौभाग्य योजना तसेच प्रधानमंत्री सिंचाई आदी विविध योजनेच्या माध्यमातून देशवासीयांचे स्वप्न पूर्ण करण्याचे काम करीत आहेत, त्यामुळे खऱ्या अर्थाने हे शासन गरिबांच्या सर्वांगीण विकासाचे असल्याचे प्रतिपादन मुख्यमंत्री देवेंद्र फडणवीस यांनी केले.

डॉ. वसंतराव देशपांडे सभागृहात प्रधानमंत्री सहज बिजली, हर घर योजना अर्थात ‘सौभाग्य’ योजनेचे राज्यस्तरीय उद्घाटन मुख्यमंत्री देवेंद्र फडणवीस, केंद्रीय ऊर्जा व नवीकरणीय ऊर्जा राज्यमंत्री आर. के. सिंग आणि भूपृष्ठ वाहतूक मंत्री नितीन गडकरी यांच्या हस्ते झाले, त्याप्रसंगी आयोजित कार्यक्रमात मार्गदर्शन करताना मुख्यमंत्री बोलत होते. ऊर्जा क्रांतीचे प्रतिक ठरणाऱ्या सौभाग्य योजनेमुळे देशातील प्रत्येक घरांना वीज जोडणी देण्यात येणार आहे. गावागावात वीज पोहोचावी, तसेच या योजनेंतर्गत गरिबांना मोफत तर इतरांना केवळ 500 रुपयांत वीज जोडणी देण्याच्या महत्त्वाकांक्षी योजनेचा शुभारंभ झाला असून राज्यातील सुमारे 111 गावातील 2 लक्ष 73 हजार घरांना पारंपारिक तर 21 हजार घरांना अपारंपरिक ऊर्जा डिसेंबर 2018 अखेर पर्यंत पोहचविण्यात येणार आहे.

सौभाग्य योजनेच्या राज्यस्तरीय शुभारंभ कार्यक्रमास राज्याचे ऊर्जा व अपारंपरिक ऊर्जा मंत्री चंद्रशेखर बावनकुळे, खासदार कृपाल तुमाने, खासदार डॉ. विकास महात्मे, आमदार सुधाकर देशमुख, आमदार सुधाकर कोहळे, आमदार गिरीश व्यास, जिल्हा परिषद अध्यक्षा निशाताई सावरकर, ऊर्जा विभागाचे प्रधान सचिव अरविंद सिंह, महावितरणचे अध्यक्ष तथा व्यवस्थापकीय संचालक संजीव कुमार, महाराष्ट्र ऊर्जा विकास अभिकरणचे महासंचालक राजाराम माने, विभागीय आयुक्त अनुप कुमार, महाजनकोचे व्यवस्थापकीय संचालक बिपीन श्रीमाळी, महापारेषणचे राजीवकुमार मित्तल आदी वरिष्ठ अधिकारी उपस्थित होते.

फिडर सेपरेशन, दिन दयाळ ग्रामज्योती विद्युतीकरण योजना तसेच आयपीडीएस आदी योजनांसाठी केंद्र शासनाच्यावतीने दोन हजार कोटी रुपयांच्या निधीची मागणी करण्यात आली आहे. ती केंद्रीय ऊर्जा राज्यमंत्र्यांनी मान्य केल्यामुळे शेतकऱ्यांना दिवसा 12 तास वीज तसेच वीज वितरण यंत्रणा अधिक सक्षम करण्यासाठी सहाय्य होणार असल्याचेही मुख्यमंत्री देवेंद्र फडणवीस यांनी सांगितले.

सौभाग्य योजनेतून गडचिरोलीसारख्या अतिदुर्गम भागातील कुटुंबाच्या घरांपर्यंत वीज पोहचली असून त्यांना विजेचे जोडणीचे प्रमाणपत्र देताना त्यांच्या चेहऱ्यावर आनंद व्यक्त होत आहे. त्यामुळे गरिबांपर्यंत विकास व प्रगती पोहोचविण्यासाठी शासन राबवीत असलेल्या योजनांबद्दल सांगताना मुख्यमंत्री पुढे म्हणाले की, राज्यातील महावितरण कंपनीतर्फे माहिती व तंत्रज्ञानाचा प्रभावी वापर करून ग्राहकांना अत्यंत पारदर्शक व चांगली सेवा देण्यासोबतच कामकाजात सुलभता व प्रभावीपणे कार्यशैली वाढविण्यावर विशेष भर देण्यात येत आहे. या सेवेचा ग्राहकांना चांगला लाभ मिळणार असल्याचेही यावेळी सांगितले.

केंद्रीय मंत्री नितीन गडकरी

सौभाग्य योजनेमुळे विकास व प्रगतीपासून वंचित राहिलेल्या कुटुंबांपर्यंत वीज पोहोचणार असून शेतकऱ्यांनाही सिंचनासाठी विजेचे कनेक्शन देण्याच्या राज्य शासनाच्या महत्त्वाकांक्षी उपक्रमाचा विशेष उल्लेख करताना केंद्रीय भूपृष्ठ वाहतूक मंत्री नितीन गडकरी म्हणाले की, ऊर्जा निर्मितीसाठी सिंचनाच्या पाण्याचा वापर न करता पुनर्वापर केलेले पाणी वापरल्यास शेतीला सिंचनाचा लाभ मिळू शकेल. गंगा नदी शुद्धीकरण प्रकल्प अंतर्गत निर्माण झालेले पाणी केंद्रीय ऊर्जा विभागाने थर्मल पॉवर स्टेशनसाठी वापरावे. प्रदूषण टाळण्यासाठी 25 वर्षांपेक्षा जास्त जुने असलेले प्रकल्प बदलवून त्याऐवजी अत्याधुनिक तंत्रज्ञानाचा वापर करून वीज निर्मिती करावी, अशी सूचना यावेळी त्यांनी केली.

विजेच्या जास्तीत जास्त वापर करण्याच्या दृष्टीने विजेवर चालणारी वाहनानाचे संशोधन व वापरला प्रोत्साहन देण्यात येत असल्याचे सांगताना केंद्रीय मंत्री श्री. गडकरी म्हणाले की, वीज तसेच इथेनॉलसारख्या बायो-इंधनाचा वापर केल्यास मोठ्या प्रमाणात परकीय चलन वाचणार आहे. ग्रीन बस इथेनॉलवर चालविण्यात येत असून त्यासोबतच मोटारसायकल सुद्धा इथेनॉलवर येणार आहे. विजेच्या जास्तीत जास्त वापरासंदर्भात बोलताना ते म्हणाले की, प्रत्येक ठिकाणी विजेवरील वाहनाच्या चार्जिंग स्टेशनची सुविधा झाल्यास विजेवरील वाहनांचा वापर वाढेल. समृद्धी महामार्गावर वीज वाहणी टाकल्यास ट्रक सुध्दा विजेवर चालू शकतील, असा विश्वासही त्यांनी यावेळी व्यक्त केला.

केंद्रीय ऊर्जा राज्यमंत्री आर. के. सिंग

गरिबांना मोफ वीज जोडणी देण्याचा संकल्प प्रधानमंत्री नरेंद्र मोदी यांनी केला असून त्यासाठी सौभाग्य योजना सुरु करण्यात आली आहे. ज्या गावात अद्याप वीज पोहचली नाही, तेथे वीज पोहचविण्याचे काम गतीने सुरु आहे. त्यासाठी विद्युत वितरण यंत्रणेचे सक्षमीकरण केले जात आहे, तसेच नवीकरणीय विद्युत निर्मितीसाठी 28 हजार कोटींचा ग्रीन कॉरिडोर बनविण्यात येत आहे.

महाराष्ट्रातील फिडर सेपरेशन, दीनदयाळ ग्रामज्योती योजना व विद्युत वितरण यंत्रणा सक्षमीकरण (आयपीडीएस)साठी राज्याचे ऊर्जामंत्री चंद्रशेखर बावनकुळे यांनी 4 हजार 600 कोटी रुपये निधीची मागणी केंद्राकडे केली असून त्यासंदर्भातील प्रस्ताव केंद्र शासनाला प्राप्त झाला आहे. त्यापैकी 2 हजार कोटी रुपये मागणीच्या प्रस्तावसंदर्भात बोलताना केंद्रीय ऊर्जा राज्यमंत्री सिंग यांनी कालबद्ध कार्यक्रमानुसार योजना पूर्ण करण्यासाठी सहाय्य देण्याचा प्रस्ताव मान्य करण्यात आला असल्याचे सांगितले. नवीकरणीय ऊर्जा विकासाठी देशात प्राधान्य असून सध्या 60 हजार मेगावॉट वीज तयार होत असून 2022 पर्यंत 2 लक्ष मेगावॉट वीज निर्माण करण्याचे लक्ष असल्याचे त्यांनी सांगितले.

ऊर्जामंत्री चंद्रशेखर बावनकुळे

विजेच्या बाबतीत महाराष्ट्र स्वयंपूर्ण करण्याच्या दृष्टीने वीज निर्मितीची क्षमता वाढविण्यात आली असल्याचे सांगताना ऊर्जामंत्री बावनकुळे म्हणाले की, 3 हजार 250 मेगावॉट क्षमता वाढविण्यात आली असून 30 ते 35 वर्षांपेक्षा जास्त जुने झालेले ऊर्जानिर्मिती प्रकल्पाच्या जागी अत्याधुनिक प्रकल्प बसविण्यात येत असून भुसावळ येथे 660 मेगावॉट क्षमतेच संचाचे तसेच इतर प्रकल्पांमधून १ हजार ६०० मेगावॉट वीज निमिर्ती करण्याचे लक्ष आहे.

राज्यात 30 हजार मेगावॉट क्षमता वाढविण्याच्या दृष्टीने दिनदयाळ ग्रामज्योती विद्युतीकरण योजना, फिडर सेपरेशन व आयपीडीएस अंतर्गत केंद्राकडे 10 हजार कोटींची मागणी केली आहे. यानुसार 4 हजार 600 कोटी रुपये तत्काळ मिळावेत. तसेच 2 हजार कोटी वाढवून देण्याची मागणी केंद्रीय ऊर्जा राज्यमंत्र्यांना यावेळी करण्यात आली. सौरउर्जेच्या बाबतीतही येत्या पाच वर्षात प्रत्येक कृषिपंप सौरउर्जेवर आणण्याची योजना असल्याचे त्यांनी सांगितले.

यावेळी ऊर्जा विभागाचे प्रधान सचिव अरविंद सिंह तसेच महावितरणचे व्यवस्थापकीय संचालक संजीव कुमार यांनी मनोगत व्यक्त केले. सौभाग्य योजनेंतर्गत गडचिरोली सारख्या आदिवासी गावांमध्ये राहणाऱ्या पाच लाभार्थ्यांना वीज जोडणीचे प्रमाणपत्र देण्यात आले. तसेच केंद्रीय भूपृष्ठ वाहतूक मंत्री नितीन गडकरी यांच्या हस्ते महावितरणच्या जागेवर सुरु करण्यात आलेल्या चार्जिंग स्टेशनचे उद्घाटन तसेच मुख्यमंत्री देवेंद्र फडणवीस यांच्या हस्ते डिजिटल इंडिया अंतर्गत सुरु करण्यात आलेल्या ‘डिजीटल महावितरण’ अंतर्गत कर्मचा-यांकरिता सुरु करण्यात आलेल्या डॅशबोर्ड आणि इतरही विविध उक्रमांचा शुभारंभ यावेळी करण्यात आला. महाराष्ट्र ऊर्जा विकास अभिकरणचे महासंचालक राजाराम माने यांनी आभार मानले. यावेळी महावितरण, महानिर्मिती, महापारेषण, महाऊर्जा या चारही कंपन्यांचे संचालक, वरिष्ठ अधिकारी, अभियंते, कर्मचारी व नागरिक मोठ्या संख्येने उपस्थित होते. यावेळी सौभाग्य योजनेंतर्गत गडचिरोली जिल्ह्याच्या अतिदुर्गम भागातील वीज जोडणी मिळालेल्या नागरिकांना उपस्थित मान्यवरांच्या हस्ते वीज जोडणी प्रमाणपत्र प्रदान करून सन्मानित करण्यात आले.

पुणे: सोलापूर विद्यापीठास पुण्यश्लोक अहिल्यादेवी होळकर असे नांव देण्याबाबत महाराष्ट्र शासनाने खोटारडेपणाचे धोरण आखलेले दिसते. “अहिल्याबाई होळकरांचे नांव सोलापूर विद्यापीठास दिल्यास जातीय तेढ निर्माण होईल व विद्यापीठाच्या निकोप विकासाला अडथळा होईल” असे राज्याचे शिक्षण मंत्री श्री. विनोद तावडे यांनी विधानसभेत नामविस्ताराच्या प्रश्नाला उत्तर देतांना सांगितले होते. त्यांचे हे विधान कामकाजात नोंदले गेले आहे. हे विधान श्री. तावडे यांनी किंवा सोलापूर विद्यापीठ व्यवस्थापन समितीने अद्याप मागे घेतलेले नाही. असे असुनही अलीकडेच नागपुरातील एका कार्यक्रमात मुख्यमंत्री देवेंद्र फडणवीस यांनी विद्यापीठाचं नामांतर अहिल्यादेवी होळकर करण्याची घोषणा केली खरी पण शिक्षणमंत्री विनोद तावडे यांनी या विद्यापीठाचे नाव बदलणार नसल्याचे विधानपरिषदेतच स्पष्ट केले. असे असतांनाही सोलापूर विद्यापीठाला अहिल्याबाई होळकरांचे नाव देण्याचा निर्णय कॅबिनेटमध्ये झाला असून, कार्यवाहीसाठी उपसमिती स्थापन करण्यात आल्याची माहिती, आदिवासी विकासमंत्री विष्णू सावरा यांनी कालच विधानपरिषदेत दिली. समजा घेतलाच असेल तर मंत्रीमंडळाचा निर्णय श्री. सावरा कसे जाहीर करू शकतात? श्री. तावडेंच्याच आधीच्या अहिल्यादेवींबाबतच्या अवमानास्पद विधानाचे काय झाले? हा सारा प्रकारच गूढ, धुळफेक व कुचेष्टा करणारा आणि अहिल्याबाई होळकरांना मानणा-या देशवासियांच्या सहनशक्तीचा अंत पाहणारा आहे असे मत महाराजा यशवंतराव होळकर गौरव प्रतिष्ठानचे अध्यक्ष संजय सोनवणी यांनी व्यक्त केले.

पाचगणी– रवाईन हॉटेल यांच्या तर्फे आयोजित एमएसएलटीए आणि एआयटीए यांच्या मान्यतेखाली होत असलेल्या रवाईन हॉटेल नॅशनल सिरीज् 16 वर्षाखालील टेनिस स्पर्धेत सोळाव्या मानांकीत ऋतुजा चाफळकरने अव्वल मानांकीत प्रेरणा विचारेचा तर क्रिशन हुडाने अर्णव पतंगेचा पराभव करत अंतिम फेरीत प्रवेश केला.

           रवाईन हॉटेल, पाचगणी येथील टेनिस कोर्ट येथे सुरु असलेल्या या स्पर्धेत एकेरीत उपांत्य फेरीत मुलांच्या गटात अव्वल मानांकीत क्रिशन हुडाने चौथ्या मानांकीत अर्णव पतंगेचा 6-1, 7-6(7) असा टायब्रेकमध्ये तर दहाव्या मानांकीत मोहित बोंद्रेने आठव्या मानांकीत आर्यन भाटियाचा 3-6, 7-6(3), 6-4 असा संघर्षपुर्ण लढतीत टायब्रेकमध्ये पराभव करत अंतिम फेरीत प्रवेश केला.

मुलींच्या गटात सोळाव्या मानांकीत ऋतुजा चाफळकरने अव्वल मनांकीत प्रेरणा विचारेचा 2-6, 6-2, 6-2 असा तीन सेटमध्ये पराभव करत खळबळजनक निकालाची नोंद केली व अंतिम फेरी गाठवी. तिस-या मानांकीत गार्गी पवारने बिगर मानांकीत वैष्णवी आडकरचा 6-1, 6-3 असा पराभव करत अंतिम फेरीत प्रवेश केला.

दुहेरीत उपांत्य फेरीत मुलांच्या गटात क्रिशन हुडा व भुपेंद्र दहिया या जोडीने धन्या शहा व अर्जून कुंडू यांचा 7-5, 6-4 असा तर दुस-या मानांकीत नरेश बडगुजर व वंश भागटानी यांनी  अर्णव पतंगे व यशराज दळवी यांचा  6-3, 7-5 असा पराभव करत अंतिम फेरीत प्रवेश केला.

मुलींच्या गटात प्रेरणा विचारे व ह्रदया शहा यांनी संजना सिरीमुल्ला व राई वाशिमकर यांचा 7-6(4), 1-6, 10-5 असा संघर्षपुर्ण लढतीत टायब्रेकमध्ये पराभव करत अंतिम फेरी गाठली. ऋतुजा चाफळकरने आपली विजयी घोडदौड कायम राखत दुहेरीतही  सानिया मसंदच्या साथीत रेनी सिंगला व रेनी सिंग यांचा 6-3, 6-2 असा सहज पराभव करत अंतिम फेरीत प्रवेश केला.

स्पर्धेचा सविस्तर  निकाल : मुले:उपांत्य फेरी: 

क्रिशन हुडा(1)वि.वि.  अर्णव पतंगे(4)   6-1, 7-6(7);

मोहित बोंद्रे(10) वि.वि आर्यन भाटिया(8)  3-6, 7-6(3), 6-4;

मुली- ऋतुजा चाफळकर(१६)वि.वि  प्रेरणा विचारे(1) 2-6, 6-2, 6-2;

गार्गी पवार(3) वि.वि वैष्णवी आडकर 6-1, 6-3;

दुहेरी गट- मुले- उपांत्य फेरी: 

क्रिशन हुडा/भुपेंद्र दहिया वि.वि धन्या शहा/अर्जून कुंडू  7-5, 6-4;

नरेश बडगुजर/वंश भागटानी(2) वि.वि अर्णव अर्णव पतंगे /यशराज दळवी   6-3, 7-5;

मुली- प्रेरणा विचारे/ह्रदया शहा(1) वि.वि संजना सिरीमुल्ला/ राई वाशिमकर (3) 7-6(4), 1-6, 10-5;

ऋतुजा चाफळकर/सानिया मसंद(4) वि.वि रेनी सिंगला/रेनी सिंग 6-3, 6-2.

  नागपूर-राज्य परिवहन महामंडळाच्या बसेसमधून प्रवाशांना वायफाय सुविधा देण्याचा प्रकल्प कार्यान्वित करण्यात आला आहे. या प्रकल्पावर महामंडळाने कोणत्याही प्रकारचा खर्च केला नसून या उलट दरवर्षी एक कोटी इतका वार्षिक परवाना शुल्क महामंडळास अतिरिक्त महसूल म्हणून मिळणार असल्याचे परिवहन मंत्री दिवाकर रावते यांनी प्रश्नाच्या लेखी उत्तरात सांगितले.

            सदस्य सर्वश्री प्रकाश आबिटकर, बसवराज पाटील, श्रीमती प्रणिती शिंदे आदींनी राज्य महामार्ग परिवहन मंडळास एसटीमधील मोफत वायफाय सेवेमुळे होत असलेल्या नुकसानाबाबतचा प्रश्न उपस्थित केला होता. त्याला लेखी उत्तर देताना परिवहन मंत्री श्री. रावते यांनी म्हटले आहे की, एसटी बसेसमध्ये वायफाय प्रकल्प कार्यान्वित करण्यासाठी यंत्र मीडिया सोल्युशन या कंपनीची सेवा पुरवठादार म्हणून निवड करण्यात आली आहे. त्यासाठी राज्य परिवहन महामंडळाने कोणत्याही प्रकारचा खर्च केला नसून महामंडळास या प्रकल्पाद्वारे वार्षिक परवाना शुल्क म्हणून प्रतीवर्षी एक कोटी पाच लाख इतका अतिरिक्त महसूल पुढील पाच वर्षांसाठी प्राप्त होणार आहे. तांत्रिक कारणास्तव वायफाय उपकरण बंद पडल्यास सदर कंपनीकडून त्याची मोफत दुरुस्ती करुन देण्यात येते, असे श्री. रावते यांनी उत्तरात म्हटले आहे.