पुणे : राज्यात शासनाने मुख्यमंत्री ग्रामीण पेयजल कार्यक्रमांतर्गत नळपाणी पुरवठा योजनेची कामे हाती घेतली आहेत. या योजनेमुळे गावातील प्रत्येक माणसाला पिण्यासाठी शुध्द पाणी मिळाले पाहिजे, यासाठी आपण प्रयत्नशील आहोत, असे प्रतिपादन पाणी पुरवठा व स्वच्छता मंत्री बबनराव लोणीकर यांनी केले.

पुणे जिल्ह्यातील शिक्रापूर येथे मुख्यमंत्री पेयजल कार्यक्रमांतर्गत नळपाणी पुरवठा योजनेचे भुमिपूजन श्री.लोणीकर यांच्या हस्ते काल झाले त्यावेळी ते बोलत होते. यावेळी आमदार बाबुराव पाचर्णे, जिल्हा परिषदेचे मुख्य कार्यकारी अधिकारी सुरज मांढरे, महाराष्ट्र जीवन प्राधिकरणाच्या अधीक्षक अभियंता श्रीमती मनिषा पलांडे, मुख्य अभियंता एस.एस.गरंडे, उपविभागीय अभियंता श्रीमती अनिता कुलकर्णी, कार्यकारी अभियंता व्ही.एस.आवटे, शिरुर तालुक्याचे गट विकास अधिकारी संदिप जठार, पुणे जिल्हा परिषदेच्या सदस्या श्रीमती रेखाताई बांदल, शिरुर तालुक्याचे सभापती सुभाषराव उमाप, सरपंच जयश्री भुजबळ, माजी सरपंच रामभाऊ सासवडे आदि उपस्थित होते.

श्री.लोणीकर म्हणाले, राज्यामध्ये नळपाणी पुरवठा योजना राबविण्यासाठी शासनाकडून अडीच हजार कोटी इतक्या रक्कमेची प्रशासकीय मान्यता मिळाली आहे. ही चांगली योजना सरकारच्या वतीने देण्यात आली आहे. या योजनेच्या माध्यमातून राज्यात अनेक ठिकाणी कामे सुरु करण्यात आली आहेत. या योजनेमुळे राज्यातील जनतेला पिण्यासाठी शुध्द पाणी मिळू शकेल. दुषित पाणी पिल्याने गावातील लोक आजारी पडतात, ती आजारी पडू नयेत, त्यांचे आरोग्य चांगले राहाण्यासाठी  सरकार प्रयत्न करत आहे. महाराष्ट्रातील जनतेला चांगले पाणी मिळाले पाहिजे. या नळपाणी पुरवठा योजनेसाठी पुणे जिल्हयाला जास्तीत जास्त निधी उपलब्ध करुन देण्यात आला आहे. ही योजना 50 वर्षे टिकेल अशी दर्जेदार कामे झाली पाहिजेत. मुख्यमंत्री टप्पा दोन योजनेचाही आराखडा तयार करण्याचे काम चालू आहे. राज्यातील अनेक जिल्हे हे हागणदारी मुक्त झाले आहेत. राज्यात स्वच्छता अभियानाचेही भरीव कामे झाली आहेत. बऱ्याचशा नदया दुषित झाल्या आहेत. देशाचा विकासासाठी स्वच्छता अभियान राबवून चांगली कामे केली पाहिजेत. शिक्रापूरच्या विकासासाठी अधिक निधीची आवश्यकता असल्यास प्रस्ताव सादर करावा. त्यासाठी निधी उपलब्ध करुन दिला जाईल, असेही ते म्हणाले.

आमदार बाबुराव पाचर्णे म्हणाले, या गावामध्ये अनेक विकासाची कामे सुरु केली आहेत. शासनानेही या गावातील बऱ्याचशा समस्या सोडविल्या आहेत. शिक्रापूर-चाकण रस्त्याचे काम लवकरच सुरु करण्यात येणार आहे. या गावातील प्रत्येकाने गावच्या विकासासाठी सहभाग घेवून योग्य नियोजन करुन कामे करावीत.

यावेळी शिरुर पंचायत समितीचे सभापती सुभाषराव उमाप, पुणे जिल्हा परिषदेचे मुख्य कार्यकारी अधिकारी सुरज मांढरे, अधीक्षक अभियंता मनिषा पलांडे यांची समयोचित भाषणे झाली. कार्यक्रमाचे प्रास्ताविक माजी सरपंच रामभाऊ सासवडे यांनी केले तर उपस्थितांचे आभार ग्रामपंचायतीचे सदस्य नवनाथ सासवडे यांनी मानले.

यावेळी ग्रामपंचायतीचे उपसरपंच, सदस्य व परिसरातील नागरिक उपस्थित होते.

पुणे -शहरातील रेल्वे लाईन्स नजीक राहणाऱ्या नागरिकांच्या सुरक्षेचा आणि स्वच्छतेचा प्रश्न लक्षात घेऊन खा अनिल शिरोळे ह्यांनी आज महानगर पालिका आयुक्त कुणाल कुमार आणि रेल्वेचे “ विभागीय व्यवस्थापक मिलिंद देऊसकर ह्यांच्या सोबत एक बैठक घेऊन विस्तृत चर्चा केली. त्यानुसार एस आर ए योजना राबवून ह्या नागरिकांना घरे उपलब्ध करून देण्याविषयी सकारात्मक चर्चा झाल्याचे खासदार अनिल शिरोळे ह्यांनी सांगितले. त्याचप्रमाणे ह्या रेल्वेमार्गावरील स्वच्छतेसाठी निधी रेल्वे का मनपा यांनी खर्च करावा यासंबंधी देखील ह्या बैठकीत विचारविनिमय करण्यात आला. ह्या बैठकीस नगरसेवक सिद्धार्थ शिरोळे हे देखील उपस्थित होते.

पुणे- पुणे रेल्वे स्थानकाच्या पुनर्विकासाच्या कामासाठी रेल्वे बोर्डाने 50 कोटी रुपयांचा निधी मंजूर केला आहे. पुनर्विकासाच्या कामासह फलाट क्र. 2 ते 6 ची लांबी वाढविण्यात येणार आहे. त्यामुळे स्थानकावरील सर्वच फलाटांवर 26 कोचच्या गाड्या थांबू शकतील. मार्च 2019 पर्यंत पूर्ण हे काम पूर्ण करण्याचे उद्दिष्ट ठेवण्यात आले आहे, असे पुणे विभागाचे व्यवस्थापक मिलिंद देऊस्कर यांनी पत्रकार परिषदेत सांगितले.

सध्या पुणे रेल्वे स्थानकाच्या फलाट क्र. 2 ते 6 ची लांबी कमी असल्याने तेथे 26 डब्यांची गाडी थांबविली जात नाही. केवळ एक क्रमांकाच्या फलाटावरच 26 डब्यांच्या गाड्या थांबतात, असे नमूद करून देऊस्कर म्हणाले, ‘‘रेल्वे स्थानकाची लांबी कमी असल्याने या फलाटांवर मालगाडी थांबविता येत नाही. त्यामुळे एक्स्प्रेस गाड्यांना थांबवून मालगाडीला प्रथम सोडावे लागते. परिणामी, इतर गाड्यांना 10 मिनिटे उशीर होतो. परंतु, लवकरच 2 ते 6 फलाटांची लांबी वाढविण्यात येणार आहे.

देऊस्कर म्हणाले, ‘‘सर्व फलाटांवर 26 डब्यांच्या गाड्या उभ्या करता याव्यात, या दृष्टीने शिवाजीनगरच्या दिशेला या फलाटांची लांबी वाढविली जाणार आहे. पुणे-लोणावळा मार्गावर आॅटोमॅटिक सिग्नल ब्लॉकिंगचे काम सुरू असून, अात्तापर्यंत पुणे ते कामशेतदरम्यानचे काम पूर्ण झाले आहे.

 भारत सरकार आणि डिक्की तर्फे आयोजन; उद्योगमंत्री  सुभाष देसाई यांच्या  हस्ते उदघाटन

 पुणे  : अनुसूचित जाती जमातीच्या उद्योजकांची क्षमता उंचावण्यासाठी तसेच त्यांच्यातील उद्योजकतेला चालना देण्यासाठी भारत सरकारच्या सूक्ष्म, लघू आणि मध्यम उद्योग मंत्रालय(एनएसआयसी) आणि दलित इंडियन चेंबर ऑफ कॉमर्स अॅण्ड इंडस्ट्रीचे (डिक्की)यांच्या संयुक्त विद्यमाने एकदिवसीय राज्यस्तरीय परिषदेचे आयोजन केले आहे.या परिषदेचे उदघाटन येत्या ३ जानेवारीला उद्योग आणि खाणकाम मंत्री सुभाष देसाई यांच्या हस्ते होणार आहे. अल्पबचत सांस्कृतिक भवन येथे सकाळी ९.३० वाजता हा कार्यक्रम पार पडेल, अशी माहिती राष्ट्रीय लघु उद्योग महामंडळाचे क्षेत्रीय महाव्यवस्थापक पी कृष्ण मोहन यांनी येथे झालेल्या पत्रकार परिषदेत दिली. यावेळी दलित इंडियन चेंबर ऑफ कॉमर्स अॅण्ड इंडस्ट्रीचे (डिक्की) अध्यक्ष मिलिंद कांबळे, महिला विंग प्रमुख स्नेहल लोंढे, डिक्कीचे पश्चिम महाराष्ट्र प्रमुख देवानंद लोंढे, एनएसआयसीचे पुणे विभाग प्रमुख विकास कुमार नायक याप्रसंगी उपस्थित होते.

एनएसआयसीचे विभागीय सरव्यवस्थापक पी कृष्ण मोहन म्हणाले की,राष्ट्रीय लघु उद्योग महामंडळाच्या नियोजन व विपणन विभागाचे संचालक पी. उदय कुमार यांच्या अध्यक्षतेखाली ही परिषद घेण्यात येत असून औद्योगिक क्षेत्रातील मान्यवरही या परिषदेस आवर्जून उपस्थित राहणार आहेत. सध्याच्या एससी / एसटी आणि तळागाळातल्या उद्योजकांना एकत्र आणून यशस्वी व्यवसायासाठी त्यांना मार्गदर्शन करणे हा या परिषदेमागील मुख्य उद्देश आहे. तसेच या उद्योजकांची क्षमता वाढवून त्यांना आवश्यक ते सर्व सहाय्य करून सक्षम उद्योजक घडविणे, हे ध्येय आम्ही समोर ठेवले असल्याचेही त्यांनी सांगितले. 

 परिषदेविषयी बोलताना ते म्हणाले की, उद्योग विश्वातील चालू घडामोडींविषयी उद्योजकांना जागृत करण्याबरोबरच भविष्यात राबवल्या जाणाऱ्या उपक्रमाची थोडक्यात माहिती त्यांना यामार्फत दिली जाईल. याबरोबरच औद्योगिक क्षेत्रातील अनेक मान्यवर व तज्ज्ञांचे मार्गदर्शन सहभागी उद्योजकांना याच परिषदेच्या माध्यमातून लाभेल. आचारविचारांची देवाणघेवाण होईल, चर्चेची संधी मिळेल आणि पर्यायाने याचा फायदा त्यांचा व्यवसाय वृद्धिंगत होण्यास होईल, असा विश्वास देखील पी कृष्ण मोहन यांनी यावेळी व्यक्त केला.

 मिलिंद कांबळे यावेळी म्हणाले की, सूक्ष्म, लघू आणि मध्यम उद्योग क्षेत्राच्या माध्यमातून अनुसूचित जाती आणि जमातींच्या उद्योजकांचे उद्दिष्ट साध्य करण्यासाठी सातत्याने प्रयत्न केले जात आहेत तसेच अनेक उपक्रमही राबविले जात आहेत. हे निश्चितपणेच कौतुकास्पद आहे. गेली काही वर्षे दलित उद्योजकांना प्रोत्साहन देण्यासाठी आम्ही ‘डिक्की’ संस्थेच्या माध्यमातून सातत्याने विविध उपक्रम राबवित आहोत पण आता केंद्र व राज्य सरकारनेही पुढाकार घेतल्याने आमच्या कार्यास पाठबळ मिळेल ,यातूनच पंतप्रधान नरेंद्र मोदी यांचे ‘सबका साथ, सबका विकास’ हे स्वप्न प्रत्यक्षात येईल, असे ही त्यांनी सांगितले.