अनिल मिश्रा यांच्या उपोषणाकडे सारिका पवार,शिवसेना संपर्क प्रमुख शिरूर लोकसभा यांनी लक्ष वेधल्याने घेतली दखल

पुणे :
दीर्घकाळ प्रलंबित असलेल्या वाघोलीतील जैन वसतीगृह ते बकोरी रस्त्याच्या विकसनाच्या प्रश्नामध्ये अखेर तोडगा निघाला आहे. या महत्त्वपूर्ण कामासाठी मा. उपमुख्यमंत्री श्री. एकनाथ शिंदे यांचे मार्गदर्शन व मा. उपसभापती विधानपरिषद डॉ. नीलम गो-हे यांचा सातत्यपूर्ण पाठपुरावा यशस्वी ठरला.हा रस्ता करण्यासाठी तांत्रिक कारणांमुळे लागणारा दिनावधी यामुळे कमी झाला असुन लवकरच रस्ता विकसन पुणे महानगरपालिकेमार्फत करण्यात यावे यासाठी उपमुख्यमंत्री यांनीदेखील पुणे महापालिका आयुक्त श्री नवलकिशोर राम यांना सूचना दिल्या आहेत.

पुणे महानगर प्रदेश विकास प्राधिकरण,पुणे महानगरपालिका,जिल्हाधिकारी पुणे यांच्यातील प्रशासकीय व तांत्रिक गुंतागुंतीमध्ये हा रस्ता प्रश्न सुटत नसल्याने डॉ नीलम गो-हे यांनी व्यक्तिशः लक्ष घालून,उपोषणकर्ते,स्थानिक पदाधिकारी आणि संबंधित अधिकारी यांच्यात समन्वयाने रस्ता प्रश्नात तोडगा काढण्यासाठी पाठपुरावा केला होता.यामध्ये उपमुख्यमंत्री श्री अजित पवार यांनीदेखील संबंधितांना सूचना दिल्या होत्या.स्थानिक नागरिक, वाहतूकदार आणि विद्यार्थ्यांसाठी दररोजची मोठी डोकेदुखी ठरलेला हा रस्ता प्रश्न आता मार्गी लागला आहे.वाघोली आणि आसपासच्या भागातील वाहतुकीचा ताण मोठ्या प्रमाणात यामुळे कमी होणार असून नागरिकांना सुरक्षित व सुकर प्रवासाचा मार्ग उपलब्ध होणार आहे.

या यशाबद्दल स्थानिक ग्रामस्थांनी उपमुख्यमंत्री श्री. शिंदे व डॉ. नीलम गो-हे यांचे मनःपूर्वक आभार मानले असून पुढील विकासकामांसाठीही अशीच साथ लाभेल, असा विश्वास व्यक्त केला.

तालुक्यांच्या ठिकाणी वाचनालये, माय मराठीची भवने उभारावीत : विश्वास पाटील

नियोजित संमेलनाध्यक्ष विश्वास पाटील यांचा मसाप, साहित्य महामंडळातर्फे जाहीर सत्कार

पुणे : मराठी माणूस नोकरीनिमित्त परप्रांतात गेल्यानंतर तेथील स्थानिक भाषा शिकण्यास प्राधान्य देतो, परंतु मुंबईत राहून अमराठी माणूस मराठी शिकणार नाही असा दुराग्रह बाळगतो, मराठी भाषेला मुबंईमध्ये अनेक वर्षे विरोधच होत आहे हे अयोग्य आहे, अशी टीका सातारा येथे होत असलेल्या 99व्या अखिल भारतीय मराठी साहित्य संमेलनाचे नियोजित अध्यक्ष पानिपतकार विश्वास पाटील यांनी केली. पुस्तकाचे एकच गाव आणि सगळीकडे जाहिरात अशा उपरोधिक स्वरात भाष्य करून प्रत्येक तालुक्याच्या ठिकाणी पुस्तकाचे गाव, वाचनालये निर्माण व्हावीत, माय मराठीची भवने बांधावीत असे आग्रही मतही त्यांनी व्यक्त केले.
महाराष्ट्र साहित्य परिषद, पुणे आणि अखिल भारतीय मराठी साहित्य महामंडळ या संस्थांतर्फे सातारा येथे होणाऱ्या 99व्या अखिल भारतीय मराठी साहित्य संमेलनाचे नियोजित अध्यक्ष, ज्येष्ठ साहित्यिक विश्वास पाटील यांचा बुधवारी (दि. 16) जाहीर सत्कार करण्यात आला. त्या वेळी सत्काराला उत्तर देताना पाटील बोलत होते. महाराष्ट्र साहित्य परिषदेचे अध्यक्ष, ज्येष्ठ विचारवंत डॉ. रावसाहेब कसबे यांच्या हस्ते सत्कार करण्यात आला. यावेळी अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस, अखिल भारतीय मराठी साहित्य महामंडळाचे अध्यक्ष, प्रा. मिलिंद जोशी, अखिल भारतीय मराठी साहित्य महामंडळाचे कोषाध्यक्ष विनोद कुलकर्णी, अखिल भारतीय मराठी साहित्य महामंडळाच्या प्रमुख कार्यवाह सुनिताराजे पवार यांची प्रमुख उपस्थिती होती. शाल, हार आणि सातारी कंदी पेढा भरवून सत्कार करण्यात आला. महाराष्ट्र साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते. महाराष्ट्र साहित्य परिषदेच्यावतीने प्रा. मिलिंद जोशी यांनी पाटील यांचा सत्कार केला.
लेखक हा टीपकागदासारखा असावा लागतो. लेखकाला, कवीला जात नसते तर त्याला धर्म असतो. त्याचा संबंध अश्रूंशी असतो. लेखकाने टीकेची पर्वा न करता स्वत:च्या मनाला वाटेल-पटेल ते लिहावे. पडलेल्या प्रश्नांची उत्तरे शोधणे हे लेखकाचे काम आहे, असे नमदू करून विश्वास पाटील पुढे म्हणाले, मराठी वाचक अत्यंत जागरूक आहे. एका केसाएवढी चूकही त्याचा नजरेतून सुटत नाही. धोका पत्करल्याशिवाय आणि घरात बसून लेखन होऊ शकत नाही.
साहित्य संमेलनाच्या अध्यक्षपदी एकमताने निवड झाल्याचा आनंद व्यक्त करून विश्वास पाटील म्हणाले, साहित्य संमेलनाच्या अध्यक्षपदासाठी मी कधीच व्याकुळ नव्हतो. 2009साली मला अध्यक्षपदाची संधी चालून आली होती, मात्र मी ‌‘माझे वय लिहायचे आहे‌’ असे सांगून ती नाकारली.
आपण सध्या एका मन्वंतरातून चाललो आहोत. आज आपले देव, आपली भाषा सुरक्षित नाही. त्यावर संकट आलेले आहे. आजची युवा पिढी मोबाईलच्या गर्तेत अडकलेली आहे. अशा युवा पिढीला साहित्याच्या प्रांगणात आणण्याचा प्रयत्न संमेलनाच्या माध्यमातून करण्याचा मानस आहे. साहित्याशी आणि नोकरीशी मी प्रामाणिक आहे. माझ्यावर झालेले वाङ्मय चौर्याचे आरोप अतिशय दु:खद आहेत. मोघम बोलून चुकीच्या वावड्या उठविणे योग्य नाही. मला मायमराठी वाचकांची साथ लाभलेली असून माझ्या साहित्यकृतींमधील शब्दांची आणि सत्याची धार याला वाचकांनी न्याय दिला आहे. न्यायदेवता माझ्या शब्दांकडे लक्ष ठेवून असल्यामुळे पुढील काळातही मला उत्तम लेखन करावेच लागेल.
अध्यक्षपदावरून बोलताना रावसाहेब कसबे म्हणाले, साहित्य संमेलन हा एक आनंदोत्सव असावा. साहित्य संमेलनाच्या माध्यमातून युवा पिढीला तुम्हीही लिहू शकता असा विश्वास देणे आवश्यक आहे. लिहिणे ही कुणा एका जाती-धर्म-लिंगाची मक्तेदारी नाही. साहित्यकृती हा नुसता समाज किंवा निसर्गाशी संवाद नसतो तर तो स्वत:शीच संवाद असतो त्यातून प्रश्न निर्माण होतात आणि ते सोडविण्यासाठी साहित्यकृतींची निर्मिती होते.
डॉ. श्रीपाल सबनीस म्हणाले, विश्वास पाटील हे असत्याची पेरणी होणाऱ्या काळातील सत्याची पेरणी करणारे साहित्यिक आहेत. आपल्या साहित्य निर्मितीसाठी त्यांनी देशाचाच नव्हे तर जगाचा नकाशा धुंडाळला आहे. ते अभिजन आणि बहुजनांचेही लेखक आहेत. ते पुढे म्हणाले, राजकारणी नव्हे तर साहित्य संमेलनाध्यक्ष हाच खरा समाजाचा नायक असतो. विश्वास पाटील हे साहित्य संमेलनाचेच नव्हे तर सांस्कृतिक संमेलनाचे देखील अध्यक्ष आहेत.
प्रास्ताविकात प्रा. मिलिंद जोशी म्हणाले, विश्वास पाटील यांची लेखणी इतिहास आणि वर्तमानालाही स्पर्श करणारी आहे. त्यांच्याकडे अव्वल दर्जाची प्रतिभा आहे. ते उथळ पाण्यात रमणारे नाहीत तर अथांग सागराची ओढ असणारे प्रतिभावान साहित्यिक आहेत.
राजहंस प्रकाशनाचे डॉ. सदानंद बोरसे म्हणाले, विश्वास पाटील फक्त शब्दातून कारागिरी करणारे साहित्यिक नसून पुस्तके, कादंबऱ्यांमधील परिसर, पात्रे, माणसे यांच्याशी नाळ जुळलेला लेखक आहेत.
सुनिताराजे पवार यांनी विश्वास पाटील यांचा परिचय करून दिला तर सूत्रसंचालन महाराष्ट्र साहित्य परिषदेच्या कार्यवाह अंजली कुलकर्णी यांनी केले. आभार विनोद कुलकर्णी यांनी मानले.

• दिव्यांग सहायता अभियानात १२०० हून अधिक दिव्यांगांना १७५० कृत्रिम साहित्यांचे वाटप
• पंतप्रधान नरेंद्र मोदींच्या वाढदिवसानिमित्त केंद्रीय मंत्री मुरलीधर मोहोळ यांचे आयोजन

पुणे :’सेवा हाच संकल्प’, या ब्रीदवाक्याला प्रत्यक्षात उतरवत पंतप्रधान नरेंद्र मोदी यांच्या वाढदिवसाच्या निमित्ताने १२०० हून अधिक दिव्यांगांना १७५० पेक्षा अधिक कृत्रिम अवयव आणि सहाय्यक साहित्यांचे वितरण करण्यात आले. पंतप्रधान मोदी यांच्या वाढदिवसानिमित्त आयोजित ‘सेवा पंधरवडा’ अंतर्गत हा हृदयस्पर्शी उपक्रम केंद्रीय मंत्री मुरलीधर मोहोळ यांच्या माध्यमातून राबविण्यात आला.

केंद्रीय मंत्री मुरलीधर मोहोळ यांच्या पुढाकाराने व त्यांच्या वतीने या शिबिराचे आयोजन करण्यात आले. स.प. महाविद्यालयाच्या मैदानात झालेल्या या विधायक आणि भव्य उपक्रमात दिव्यांग बांधवांसाठी विविध प्रकारचे सहाय्यक उपकरणे, कृत्रिम अवयव, कानांचे यंत्र, चालण्यासाठी सहाय्य करणारी उपकरणे, इलेक्ट्रिक व्हीलचेअर्स आणि विशेषतः अंधांसाठी स्मार्ट फोन यांसारख्या वस्तूंचे वाटप करण्यात आले. या शिबिरात दिव्यांग बांधवांच्या चेहऱ्यावर उमटलेला आनंद आणि आत्मविश्वास, याच शिबिराच्या यशाची साक्ष देत होता.

या कार्यक्रमाला माजी केंद्रीय मंत्री श्री. प्रकाश जावडेकर, आमदार हेमंत रासने, पुणे महापालिका आयुक्त नवल किशोर राम, विमानतळ प्राधिकरणाचे वाय के गुप्ता, संतोष ढोके, एअरपोर्टचे सरबजीत सिंग, भाजपा शहराध्यक्ष धीरज घाटे, कर्णबधीर भाषा दुभाषी माधुरी गाडेकर, अमोल शिंगारे यांच्यासह शेकडो दिव्यांग बांधव मोठ्या संख्येने उपस्थित होते. साहित्य वितरण सुलभ व्हावे यासाठी विशेष म्हणजे लाभार्थ्यांची पूर्वनोंदणी, उपकरणांची मोजमापानुसार निवड, तांत्रिक चाचण्या आदी सर्व प्रक्रिया पार पाडण्यात आली.

पंतप्रधान नरेंद्र मोदी यांच्या वाढदिवसानिमित्त भारतीय जनता पार्टीकडून दरवर्षी “सेवा पंधरवडा” राबवला जातो. या काळात विविध ठिकाणी सामाजिक, आरोग्य, स्वच्छता व सेवा उपक्रमांचे आयोजन केले जाते. याच परंपरेतून, या वर्षीही दिव्यांगांसाठीचे सहाय्यता शिबिर हे सेवाभावाचा उत्कट प्रत्यय देणारे ठरले.

केंद्रीय मंत्री मुरलीधर मोहोळ म्हणाले, ‘पंतप्रधान मोदी हे केवळ भारताचे नेतृत्व करत नाहीत, तर ते सेवाभावाचे प्रतीक आहेत. त्यांच्या कार्यपद्धतीत “सत्ता ही सेवेची संधी आहे” हा दृष्टिकोन सातत्याने दिसतो. आजच्या या शिबिरातूनही त्याच मूल्यांची प्रचिती आली. दिव्यांग बांधवांना केवळ सहाय्यक साधनेच नव्हे, तर सन्मान, आत्मविश्वास आणि जगण्याची नवी उमेद मिळाली.

‘सलग तीन वर्षांपासून दिव्यांग बांधवांसाठी हे कार्यक्रम आयोजित केले जात आहेत. भारतीय विमानतळ प्राधिकरणाच्या सीएसआर निधीतून हा उपक्रम राबवण्यात आला, हा निधी उपलब्ध करून दिल्याबद्दल प्राधिकरणाचे आभार मानतो. पंतप्रधानांना शुभेच्छा देण्यासाठी ७५ हजार पुण्यातील विद्यार्थी पत्रे लिहिणार आहेत. दिव्यांग बांधवांच्या शुभेच्छांमुळे पंतप्रधानांना आणखी जोमाने काम करण्यासाठी बळ मिळेल,” असे ते म्हणाले.

प्रकाश जावडेकर म्हणाले, “पंतप्रधानांच्या वाढदिवसानिमित्त देशभरात लाखो कार्यक्रम होत आहेत. मात्र हा कार्यक्रम विशेष आहे. असे चांगले उपक्रम राबवण्यासाठी नियोजन आवश्यक असते. पंतप्रधान मोदींनी ‘अपंग’ हा शब्द न वापरता ‘दिव्यांग’ असा सन्मानपूर्वक उल्लेख केला आहे. सर्व दिव्यांग बांधवांना न्याय देणे हेच त्यांचे उद्दिष्ट आहे.”

पुणे महापालिका आयुक्त म्हणाले, “केंद्र, राज्य आणि स्थानिक स्तरांवर दिव्यांग बांधवांसाठी चांगले उपक्रम सुरू आहेत. या कार्यात खाजगी संस्थांनीही सक्रिय सहभाग घ्यावा, ही अपेक्षा आहे. कार्यक्रमाचे सूत्रसंचालन हर्षल दारकुंडे यांनी केले.

पुणे, दि. 16 –
पुणे जिल्हा परिषदेच्या वतीने राबविण्यात आलेल्या ‘कॉफी विथ सीईओ’ या अभिनव उपक्रमांतर्गत जिल्ह्यातील उपक्रमशील शिक्षकांचा सन्मान करून त्यांच्याशी थेट संवाद साधण्यात आला.

या विशेष कार्यक्रमास जिल्हा परिषदेचे मुख्य कार्यकारी अधिकारी गजानन पाटील, शिक्षणाधिकारी संजय नाईकडे, माध्यमिक शिक्षणाधिकारी भाऊसाहेब कारेकर, योजना शिक्षणाधिकारी सुचिता पाटेकर, उपशिक्षणाधिकारी सिद्धार्थ चव्हाण तसेच ओपन लिंक्स फाउंडेशनचे संजय दालमिया व त्यांची टीम उपस्थित होती.

या उपक्रमाचा उद्देश उपक्रमशील शिक्षकांना त्यांच्या कार्याची दखल घेऊन प्रोत्साहन देणे, अध्यापनातील अडचणी जाणून घेणे तसेच त्यांच्या उपक्रमांची माहिती इतर शिक्षकांपर्यंत पोहोचवून प्रेरणा देणे हा आहे. अनौपचारिक वातावरणात झालेल्या संवादात शिक्षकांनी तंत्रज्ञानाचा वापर, ऑनलाइन शिक्षण पद्धती, स्मार्ट क्लासरूम, ग्रामस्थ व लोकसहभागातून राबविण्यात येणारे उपक्रम, अध्यापनातील आव्हाने व आवश्यक भौतिक सुविधांबाबत अनुभव मांडले.

मुख्य कार्यकारी अधिकारी गजानन पाटील यांनी शिक्षकांच्या सूचनांची नोंद घेऊन आवश्यक ती उपाययोजना करण्याचे आश्वासन दिले. यावेळी ते म्हणाले, “शिक्षक हे समाज घडवणारे खरे शिल्पकार आहेत. ‘कॉफी विथ सीईओ’ हा उपक्रम शिक्षकांशी थेट संवाद साधण्याचे व्यासपीठ ठरले आहे. तुमच्यासारख्या उपक्रमशील शिक्षकांमुळेच पुणे जिल्हा शैक्षणिक क्षेत्रात आघाडीवर आहे. जिल्हा परिषदेचे तुमच्या कल्पना व प्रयत्नांना नेहमीच पाठबळ राहील.”

या यशस्वी संवादामुळे प्रशासन व शिक्षक यांच्यातील सहयोग अधिक दृढ होऊन शिक्षण क्षेत्रात सकारात्मक बदल घडवण्यासाठी नवा उत्साह निर्माण होणार असल्याचे मत उपस्थित मान्यवरांनी व्यक्त केले.

पुणे :
गावकुसापासून शिवाराच्या पायवाटांपर्यंत आणि शेतशिवाराला जोडणाऱ्या पाणंद मार्गांपर्यंत प्रत्येक रस्त्याला आता कायदेशीर ओळख मिळणार आहे. महाराष्ट्र शासनाच्या 29 ऑगस्ट 2025 रोजीच्या ऐतिहासिक शासन निर्णयानुसार जुन्नर तालुक्यातील सर्व रस्त्यांची नोंद घेऊन त्यांना भू-सांकेतिक क्रमांक देण्याची प्रक्रिया सुरू झाली आहे. ग्रामीण भागातील लाखो शेतकरी बांधवांच्या दैनंदिन जीवनाशी थेट संबंध असलेला हा विषय असल्याने या उपक्रमाला ऐतिहासिक महत्त्व प्राप्त झाले आहे.

बोरी बु गावचा आदर्श नमुना
या उपक्रमाचा पहिला प्रयोग जुन्नर तालुक्यातील मौजे बोरी बु येथे यशस्वीरीत्या पार पडला. ग्रामपंचायत, महसूल यंत्रणा आणि ग्रामस्थ यांच्या लोकसहभागातून काढलेल्या शिवार फेरीत आधीच नकाशावर असलेले 5 रस्ते व नव्याने निश्चित झालेले 69 पाणंद, शेतरस्ते, शिवरस्ते आणि वहिवाटीचे रस्ते यांचा समावेश करण्यात आला. एकूण 74 रस्त्यांना भू-सांकेतिक क्रमांक देऊन त्यांची ग्रामसभेत मंजुरी घेण्यात आली. त्यानंतर महसूल व भूमिअभिलेख विभागाच्या संयुक्त पथकाने या सर्व रस्त्यांचे सीमांकन करून जीआयएस प्रणालीद्वारे नकाशावर नोंद केली. त्यामुळे बोरी बु हे राज्यातील रस्त्यांना सांकेतांक देवून जीआयएस नकाशावर स्थान देणारे पहिले गाव ठरले आहे.

महसूल सप्ताहात राबणार उपक्रम
राज्याचे महसूल मंत्री बावनकुळे यांच्या संकल्पनेतून उभारलेल्या या योजनेची अंमलबजावणी जिल्हाधिकारी जितेंद्र डुडी यांच्या मार्गदर्शनाखाली होत आहे. तहसीलदार डॉ. सुनिल शेळके यांच्या अध्यक्षतेखाली 3 सप्टेंबर रोजी झालेल्या तालुका समितीच्या बैठकीत महसूल सप्ताह (17 सप्टेंबर ते 2 ऑक्टोबर) आयोजित करण्याचे ठरविण्यात आले. पहिल्या टप्प्यात 17 ते 22 सप्टेंबर दरम्यान ‘पाणंद रस्ता सप्ताह’ राबविण्यात येणार आहे.

काय नोंदवले जाणार?
या प्रक्रियेत गावनकाशांवर असलेले व प्रत्यक्षात अस्तित्वात असलेले सर्व प्रकारचे रस्ते नोंदवले जाणार आहेत. यात ग्रामीण रस्ते, हद्दीचे रस्ते, पायमार्ग, शेतरस्ते, वहिवाटीचे रस्ते यांचा समावेश असेल. रस्त्याची लांबी, रुंदी, सुरुवात-शेवट, किती शेतकरी त्याचा वापर करतात, कोणत्या गटातून रस्ता जातो याचा तपशील भरणे बंधनकारक असेल.

ग्रामसभेची मंजुरी अनिवार्य
संकलित केलेली माहिती 17 सप्टेंबरपासून प्रत्येक गावातील ग्रामसभेत ठेवली जाणार असून ग्रामसभेची मंजुरी घेणे अनिवार्य असेल. अतिक्रमित वा बंद रस्त्यांबाबत मंडळ स्तरावर रस्ता समितीच्या उपस्थितीत ‘रस्ता अदालत’ घेऊन निर्णय दिला जाणार आहे.

जीआयएस प्रणालीद्वारे नकाशावर नोंदणी
ग्रामसभेत मंजूर रस्त्यांना भू-सांकेतिक क्रमांक देऊन उपाधीक्षक भूमिअभिलेख कार्यालयास माहिती पुरवली जाईल. त्यानंतर जीआयएस प्रणालीद्वारे नकाशावर अक्षांश-रेखांशासह नोंदणी होईल. परिणामी गावनिहाय नमुना 1 (फ) मध्ये रस्त्यांना अधिकृत व कायदेशीर अभिलेख प्राप्त होईल.

तहसीलदार डॉ. सुनिल शेळके यांचे आवाहन

“ग्रामस्थांनी महसूल सप्ताहात सक्रिय सहभाग नोंदवून आपल्या गावातील पाणंद, शेतरस्ते व शिवरस्त्यांची नोंद करून ग्रामसभेत मंजुरी घ्यावी. शासनाच्या या महत्त्वाच्या उपक्रमाला सहकार्य करून भविष्यातील कायदेशीर अभिलेखासाठी सर्वांनी एकत्र यावे,” असे आवाहन तहसीलदार डॉ. शेळके यांनी केले.

पुणे : भारत निवडणूक आयोगाने 1 नोव्हेंबर 2025 या अर्हता दिनांकावर आधारित औरंगाबाद (छत्रपती संभाजीनगर), पुणे व नागपूर विभागातील पदवीधर तसेच अमरावती व पुणे विभागातील शिक्षक विधानपरिषद मतदारसंघांसाठी नव्याने मतदार याद्या तयार करण्याचा पुनरिक्षण कार्यक्रम जाहीर केला आहे.

पुनरिक्षण कार्यक्रमाचे टप्पे पुढीलप्रमाणे आहेत :

जाहीर सूचना प्रसिद्धी – मंगळवार, 30 सप्टेंबर 2025

वर्तमानपत्रातील नोटीसीची प्रथम पुनःप्रसिद्धी – बुधवार, 15 ऑक्टोबर 2025

वर्तमानपत्रातील नोटीसीची द्वितीय पुनःप्रसिद्धी – शनिवार, 25 ऑक्टोबर 2025

प्रकरणपरत्वे नमुना 18 किंवा 19 द्वारे दावे व हरकती स्वीकारण्याचा अंतिम दिनांक – गुरुवार, 6 नोव्हेंबर 2025

हस्तलिखिते तयार करणे व प्रारुप मतदार याद्यांची छपाई – गुरुवार, 20 नोव्हेंबर 2025

प्रारुप मतदार याद्यांची प्रसिद्धी – मंगळवार, 25 नोव्हेंबर 2025

दावे व हरकती स्वीकारण्याचा कालावधी – मंगळवार, 25 नोव्हेंबर ते बुधवार, 10 डिसेंबर 2025

दावे व हरकती निकाली काढणे, पुरवणी यादी तयार करणे व छपाई – गुरुवार, 25 डिसेंबर 2025

अंतिम मतदार यादीची प्रसिद्धी – मंगळवार, 30 डिसेंबर 2025

या पुनरिक्षण कार्यक्रमानुसार संबंधित मतदारांनी वेळेत आवश्यक दावे सादर करून नाव नोंदणीसाठी सहकार्य करावे, असे आवाहन उपजिल्हा निवडणूक अधिकारी मीनल कळसकर यांनी प्रसिद्धी पत्रकान्वये केले आहे.

गंगाधाम, पुणे –
             निरंकारी सद्गुरू माता सुदीक्षा जी महाराज आणि राजपिता रमित जी यांच्या कृपाशीर्वादाने पुणे झोन तर्फे आयोजित महिला संत समागम रविवारी (दि. १४ सप्टेंबर) गंगाधाम, मार्केटयार्ड येथील संत निरंकारी सत्संग भवन येथे उत्साहात संपन्न झाला. सकाळी १० ते दुपारी २ या वेळेत झालेल्या या समागमात पुणे झोनमधील ३५०० हुन अधिक महिला भक्तांनी उपस्थित राहून सत्संगाचा लाभ घेतला. समागमापूर्वी सकाळी ९ ते १० या वेळेत महिलांनी योगाची प्रात्यक्षिके देखील केली. सदगुरू माताजींची शिकवण आहे कि परमेश्वराने आपल्याला जे शरीर दिलेले आहे ते देखील अनमोल आहे आणि ते तंदुरुस्त ठेवणे ही आपली जबाबदारी आहे. यासाठी सर्व माता भगिनींनी आपले शरीर निरोगी ठेवण्यासाठी योगाभ्यास केला. या कार्यक्रमात सर्व वयोगटांतील महिला भक्तांचा उत्साहपूर्ण सहभाग पाहायला मिळाला.
            उपस्थित सत्संगाला संबोधित करताना प.पू. बहन पूजा दिलवर जी (मुंबई) यांनी सांगितले कि ज्या पद्धतीने आपण नेहमी म्हणतो कि ‘ मुलगी शिकली प्रगती झाली ‘ त्याचपद्धतीने घरातील स्त्री आध्यत्मिकतेच्या मार्गाचा अवलंब करेल तर त्या घरामध्ये स्वर्गीय वातावरण निर्माण होऊ शकेल आणि मानवतेच्या विकासामध्ये सहायक होऊ शकेल. निरंकारी सदगुरूनी नारी शक्तीला सन्मान पूर्वक जीवन जगता यावे यासाठी स्त्रियांना समान दर्जा दिला.
        या प्रसंगी भगवद-गीता मधील श्लोकांचा आधार घेऊन त्यांनी समजावले की जिज्ञासू भक्ताने आपल्या अनेक धारणांचा त्याग करून सद्गुरुला शरण जाऊन ब्रम्हज्ञानाची प्राप्ती करणे गरजेचे आहे. आणि असे ब्रह्मज्ञान प्राप्त झाल्यानंतर त्याला सर्वांमध्ये ईश्वर आणि ईश्वरामध्ये सर्व दिसायला लागतात. अशा भक्ताचे रक्षण स्वयं भगवंत करतात. भगवंताला जाणण्यासाठी कोणत्याही कर्मकांडाची आवश्यकता नाही केवळ परमात्म्यावर निस्वार्थ प्रेम आणि समर्पणाची गरज असते.
        आज निरंकारी सद्गुरू माता सुदीक्षाजी महाराज तेच ब्रम्ह्ज्ञान देऊन समाजामध्ये बंधुत्वाची,एकतेची,समानतेची भावना जागृत करून मानवता प्रस्थापित करण्याचे कार्य करत आहेत.आजचा माणूस भौतिकतेच्या जाळ्यात अडकून एक निरंकार ईश्वरापासून दूर चालला आहे आणि म्हणून समाजामध्ये ताण तणाव, विषमता ,द्वेष,तिरस्कार अशा नकारात्मक विचारांमुळे माणसातील माणुसकी हरवत चालली आहे. सर्व सृष्टी निर्माण करता एक ईश्वर आहे आणि प्रत्येक माणसाने त्याला जाणून त्याची भक्ती केली पाहिजे असे प्रतिपादन त्यांनी शेवटी केले.  
            समागमात नाटिका, गीत, अभंग, कविता,विचार आदी सादरीकरणांद्वारे सद्गुरूंचा संदेश पोहोचवताना मराठी, हिंदी, इंग्रजी, सिंधी आणि पंजाबी अशा विविध भाषांचा आधार घेण्यात आला.
            कार्यक्रमाचे सूत्रसंचालन पूजा फटकरे व अर्चना पिसाळ यांनी केले. समारोप प्रसंगी पुणे झोन प्रमुख ताराचंद करमचंदानी यांनी सर्व भक्तांचे आभार व्यक्त केले.

पुणे:समाजवादी आंदोलनाची ९० वर्षे पूर्ण होत असल्याच्या निमित्ताने पुण्यात समाजवादी एकजूट परिषदेचे आयोजन करण्यात आले असल्याची माहिती आज  पत्रकार परिषदेत देण्यात आली.सिंहगड रस्त्यावरील राष्ट्र सेवा दलाच्या साने गुरुजी स्मारक येथे १९ ते २१ सप्टेंबर २०२५ या कालावधीत ही परिषद होणार आहे. या परिषदेचे आयोजन राष्ट्र सेवा दल, एस.एम. जोशी सोशलिस्ट फाऊंडेशन, युसुफ मेहेरअली सेंटर, महाराष्ट्र गांधी स्मारक निधी व समाजवादी समागम  यांनी संयुक्तपणे केले आहे.

आज पुणे श्रमिक पत्रकार संघ येथे आयोजित पत्रकार परिषदेत संयोजक डॉ.एन.सुनीलम,अन्वर राजन, अॅड.सविता शिंदे,साधना शिंदे,राहुल भोसले, संदेश दिवेकर,दत्ता पाकिरे यांनी ही माहिती दिली.परिषदेचे उद्घाटन उत्तर प्रदेश विधानसभेचे माजी विरोधी पक्षनेते माता प्रसाद पांडेय यांच्या हस्ते होईल, ध्वजारोहण १०० वर्षीय ज्येष्ठ समाजवादी व माजी खासदार पंडित रामकिशन करतील. समाजवादी आंदोलनावरील प्रदर्शनाचे लोकार्पण राष्ट्र सेवा दलाचे माजी अध्यक्ष पन्नालाल सुराणा यांच्या हस्ते होईल. उ‌द्घाटन सत्रात प्रा. आनंद कुमार हे प्रमुख वक्ते असणार आहेत. तर सुभाष वारे हे संविधान प्रास्ताविकेचे वाचन करतील. तर स्वागतपर आषण अॅड. सविता शिंदे देतील. 

अध्यक्षस्थानी रमाशंकर सिंह (कुलपती, आयटीएम वि‌द्यापीठ) तर प्रमुख पाहुणे म्हणून हरभजनसिंग सिद्धू (महामंत्री, हिंद मजदूर सभा) हे उपस्थित असतील. उद्द्घाटन सत्रात आयोजक संस्था आपली मते मांडतील, स्मारिकेचे व पुस्तकांचे प्रकाशन होईल. तसेच पंडित रामकिशन शर्मा, पन्नालाल सुराणा, प्रा. राजकुमार जैन, हिम्मत सेठ, चंद्रा अय्यर, भीमराव पाटोले, रावसाहेब पवार, वर्षा गुप्ते, प्रमिला ठाकूर -फुले, उमाकांत भावसार यांसारख्या ज्येष्ठ समाजवाद्‌यांचा सन्मान केला जाईल.

संमेलनाच्या दुसऱ्या दिवशी :२० सप्टेंबर

आर्थिक आव्हाने बेरोजगारी पर्यावरण संकट आणि भारताचा पर्यायी विकास मॉडेल या विषयावर परिसंवाद होणार आहे. या परिसंवादाचे अध्यक्षपद मेधा पाटकर भूषवतील. प्रा. नीरज हातेकर, पर्यावरणतज्ज सौम्य दत्ता, सुनीता बागल, अॅड. आराधना भार्गव हे प्रमुख वक्ते असतील. संचालन प्रफुल्ल सामंत्रा करतील.

त्यानंतरच्या सत्रात सामाजिक न्याय जनआंदोलन आणि व्यवस्था परिवर्तन या विषयावर परिसंवाद होईल. अध्यक्षस्थानी डॉ. कुमार सप्तर्षी असतील.बी.जी. कोळसे पाटील, हुसैन दलवाई, निरंजन टकले, टी. गोपालसिंग, मधु मोहिते, सुशीला ताई मोराळे, अॅड. रत्ना बोरा, टी. पी. जोसेफ हे प्रमुख वक्ते असतील. सूत्रसंचालन सुभाष लोमटे करतील.

त्यानंतर ‘समाजवादी आंदोलनाची ९० वर्षे -व्यापक एकजुटीची गरज ‘ या विषयावर परिसंवाद होईल. अध्यक्षस्थानी बी. आर.पाटील हे असतील, तर योगेंद्र यादव, रामधीरज, जावेद अली, अबू आझमी तसेच कांग्रेस, राष्ट्रवादी, राजद, सीपी आय, सीपीएम, सीपीआय एमएल, फॉरवर्ड ब्लॉक, एसयूसीआय, शेकाप या पक्षांचे नेते उपस्थित राहतील एन एस. देवरावर देखील सहभागी होतील या स त्रात स्मरणिकेचे लोकार्पण होईल

संमेलनाच्या तिसऱ्या दिवशी संविधान व लोकशाहीवरील धोके सांप्रदायिकलेची देश तोडणारी आव्हाने या विषयावर परिसंवाद होईल. डॉ मनीषा गुप्ते, जयशंकर पांडेय, अन्वर राजन, पा. शशिशेखर सिंह, मीर शाहिद सलीम, राधवेन्द्र दुबे वक्ते असतील. संचालन गुड्‌डी एस. एल. करतील.

त्यानतर पुणे घोषणा पत्र २०२५ या विषयावर सहावे सत्र होईल. गीता आर. व सुनीती हे घोषणा पत्र सादर करतील अध्यक्षपद अविनाश पाटील भूषवतील, उल्का महाजन, अशोक चौधरी, अमूल्य निधी, विनोद सिरसाट, हरिशंकर मिश्रा, प्रभात, रेजीनार्क, मंथन, हरीश खन्ना, पुतुल कुमारी आपली मते मांडतील.

त्यानंतर आंतरराष्ट्रीय प्रश्न शांतता व न्यायासाठी एकजूट या विषयावर सातवे सत्र होईल. अध्यक्षपदी फिरोज मिठीबोरवाला हे असतील. तर गुख्य वक्ते प्रा. डी. के. गिरी असतील

२१ सप्टेंबर रोजी सांयकाळी ५ वाजता  संमेलनाचा समारोप समारंभ होणार आहे. अध्यक्षस्थानी राजकुमार जैन असतील. प्रमुख पाहुणे एल. काल्लपा (अध्यक्ष, हिंद मजदुर किसान पंचायत) असतील. समारोप भाषण रमाशंकर सिंह देतील.सूत्रसंचालन अरुणकुमार श्रीवास्तव  करतील.

संमेलनाच्या तिन्ही दिवशी सायंकाळी विविध सांस्कृतिक कार्यक्रम आयोजित करण्यात आले आहेत. संदेश दिवेकर, साधना शिंदे, दत्ता पाकिरे आणि शिवराज हे आभार व्यक्त करतील. या संमेलनात युवा समाजवादी संचालन समितीची स्थापना होईल. पुढील १० वर्ष देशभरात या समितीमार्फत पुणे घोषणा पत्रनुसार कार्यक्रम होतील