प्रा. डॉ. विश्‍वनाथ दा.कराड यांचे मतः एमआयटीतर्फे डॉ. बाबासाहेब आंबेडकरांची जयंती साजरी
पुणे:“ डॉ. बाबासाहेब आंबेडकरांनी मागासलेल्या समाजाला हक्क व न्याय मिळवून देण्यासाठी देशात सत्याग्रह केला. मागासलेल्या समाजातील अपृश्यता दूर करण्याचे महान कार्य त्यांनी केले आहे. त्यामुळे त्यांना देशात व जगात विश्‍वरत्न म्हणून आज ओळखले जातेे.” असे उद्गार एमआयटी विश्‍वशांती विद्यापीठाचे संस्थापक अध्यक्ष प्रा. डॉ. विश्‍वनाथ दा. कराड यांनी काढले.
एमआयटी विश्‍वशांती विद्यापीठ, पुणे व विश्‍वशांती केंद्र(आळंदी), माईर्स एमआयटी शिक्षण संस्था समूहाच्यावतीने भारतरत्न डॉ. बाबासाहेब आंबेडकर यांची १२७ वी जयंती साजरी करण्यात आली.
या वेळी माईर्स एमआयटीचे अधिष्ठाता प्रा. शरदचंद्र दराडे-पाटील, एमआयटीचे प्राचार्य डॉ. एल. के. क्षीरसागर, एमआयटी डब्ल्यूपीयूचे कुलसचिव प्रा. डी. पी. आपटे, माईर्स एमआयटीचे उपकुलसचिव श्री. अभय बिरारी, डॉ.ए.ए. कुलकर्णी, प्रा. सुब्रह्मण्यम, विद्यार्थी जगन्नाथ वणवे, श्रीनिवास चक्रार्या, व भाग्यश्री पगार हे उपस्थित होते.
प्रा.डॉ.विश्‍वनाथ दा. कराड म्हणाले,“ आपल्या देशात महात्मा गांधी, वि.दा. सावरकर, छत्रपती शिवाजी महाराज व डॉ. बाबासाहेब आंबेडकर या महापुरूषांनी समाजाला दिशा देण्याचे कार्य केले आहे. या महापुरूषांच्या चरित्रांचे व ग्रंथांचे वाचन करुन ते आचरणात आणले, तर समाजात परिवर्तन होऊ शकते. डॉ. बाबासाहेब आंबेडकरांनी आयुष्यभर संघर्ष करुन अपृश्यता दूर करण्याचे काम केले आहे.”
प्रा. शरदचंद्र दराडे-पाटील म्हणाले,“ डॉ. बाबासाहेब आंबेडकर यांची देशात व जगात पूजा केली जात आहे. नुसते फोटो किंवा पुतळे उभारुन चालणार नाही. त्यांनी समाजाला दिलेला विचार आचरणात आणला पाहिजे. खरे म्हणजे पूजा ही विचारांची करावी. जात-पात विसरुन कार्य केल्यास समाजाची उन्नती होईल.”
प्रा. दीपक आपटे म्हणाले,“ घटनेवर श्रद्धा ठेऊन त्याचे पालन करावे. उल्लंघन करु नये. तन, मन व धनाने अभ्यास करावा. तेच खरे डॉ. बाबासाहेब आंबेडकरांना अभिवादन ठरेल.”
जगन्नाथ वणवे म्हणाला,“ डॉ. बाबासाहेबांचे विचार आचरणात आणल्यास समाजाचा व देशाचा सर्वांगीण विकास होईल. चांगल्या विचारातूनच समाजाची उन्नती होते.”
श्रीनिवास चक्रार्या म्हणाला,“ सर्व मानव जात एक आहे. जर समाजामध्ये एकतेची भावना रूजवली गेली, तर समाज एक संघ होऊ शकतो. तेच काम डॉ. बाबासाहेब आंबेडकरांनी केले आहे. त्यांचा आदर्श आपण तरुण पिढीने घ्यावा.”
भाग्यश्री पगारे म्हणाली,“आपण प्रत्येकजण जाती बद्दल बोलत असतो. पण तो विचार प्रत्येकाच्या मनात कोठे तरी घर करुन बसलेला असतो. जर जात हद्दपार केली तरच संपूर्ण मानव जातीचे कल्याण होईल. प्रत्येकाने मानव हीच जात व मानवता हाच धर्म मानावा.”
या प्रसंगी डॉ. एल. के. क्षीरसागर यांनी भारतरत्न डॉ. बाबासाहेब आंबेडकराबद्दलचे आपले मनोगत व्यक्त केले.
माईर्स एमआयटीच्या विद्यार्थ्यांनी व कर्मचार्‍यांनी डॉ. बाबासाहेब आंबेडकरांच्या प्रतिमेला पुष्प अर्पण करून अभिवादन केले.

पुणे : “सध्याच्या तीव्र स्पर्धेच्या काळात ग्राहकांच्या अपेक्षा व गरजा लक्षात घेणे अत्यंत महत्त्वाचे ठरते. ग्राहकांना योग्य माहिती व सौजन्यपूर्ण वागणूक न मिळाल्यास ते इतरत्र जातात आणि त्यातून आणखी दहा संभाव्य ग्राहक दुरावण्याचा धोका असतो. त्यामुळे व्यवसायात यशस्वी व्हायचे असेल तर सातत्याने नवे ग्राहक आकर्षित करणे व जोडलेले ग्राहक टिकवून ठेवणे, याची कसोशीने काळजी घ्यावी,” असा सल्ला अल अदील समूहाचे अध्यक्ष व व्यवस्थापकीय संचालक मसालाकिंग डॉ. धनंजय दातार यांनी काल येथे नवउद्योजकांना दिला.

‘मराठी युवा उद्योजक उद्योगिनी सेवाभावी संस्था, महाराष्ट्र’तर्फे गणेश कला क्रीडा मंच येथे आयोजित ‘खासा २०१८’ या उद्योग प्रदर्शन-विक्री कार्यक्रमाचे उद्घाटन डॉ. दातार यांच्या हस्ते झाले. तत्पूर्वी टिळक स्मारक मंदिरात प्रसिद्ध निवेदिका सौ. उत्तरा मोने यांनी घेतलेल्या प्रकट मुलाखतीत ते बोलत होते.

डॉ. दातार म्हणाले, “विक्रेत्यांची बाजारपेठ (सेलर्स मार्केट) आणि खरेदीदारांची बाजारपेठ (बायर्स मार्केट) असे दोन प्रकार आहेत. विक्रेत्यांचे नियम, शैली व मर्जीनुसार चालणारी बाजारपेठ सेलर्स मार्केट असते तर ग्राहकांच्या गरजा व अपेक्षा ओळखून चालणारी बाजारपेठ बायर्स मार्केट असते. विकसित देश सध्या बायर्स मार्केट आहेत आणि उर्वरित जगाचा प्रवासही त्याच दिशेने सुरु आहे. व्यावसायिकाला यश आणि प्रसिद्धी त्याचे ग्राहक मिळवून देतात, हा माझा अनुभव आहे. मी व्यवसाय करताना नेहमी ‘डोक्यावर बर्फ व जिभेवर साखर’ (संयम आणि सौजन्य) या तंत्राचा वापर केला. त्याचवेळी अत्याधुनिक तंत्रज्ञानाचा वापर करुन उत्पादने शुद्ध, स्वच्छ व सुरक्षित असतील याची काळजी घेतली. ग्राहकांना वस्तू हाताळायला व स्वतः निवडायला आवडतात, हे ओळखून साध्या दुकानांचे रुपांतर सुपर स्टोअर्समध्ये केले. दुबईतील एका छोट्या दुकानापासून सुरवात करुन आखाती देशांमध्ये ३९ सुपर स्टोअर्सची विस्तारण्यामागे संतुष्ट ग्राहक हेच कारण आहे.”

उद्यमशील तरुणाईला व्यवसायाचे महत्त्वपूर्ण कानमंत्र देताना ते म्हणाले, “कोणताही नवा व्यवसाय स्थिरावायला तीन वर्षे लागतात. तान्ह्या बाळाप्रमाणेच व्यवसायाचे संगोपन करावे लागते आणि नंतरही व्यवसायावर बारीक लक्ष ठेवावे लागते. नजर हटी तो दुर्घटना घटी, हे रस्त्यावरील इशारादर्शक वाक्य व्यवसायालाही लागू होते. सध्याचा काळ तीव्र स्पर्धेचा असल्याने मनात इर्ष्या ठेऊन व्यवसाय करावा. उलाढालीपेक्षा पदरात नफा किती पडतो, यावर श्रीमंती अवलंबून असते. त्यामुळे महत्त्व नफ्याला द्यावे. व्यवसाय ही कुठल्याही समाजाची मक्तेदारी नसते. देवाने प्रत्येकाला समान बुद्धी दिलेली आहे. त्याला कष्ट व प्रामाणिकपणाची जोड दिल्यास कुणीही व्यवसायात प्रगती करु शकतो.”

ते पुढे म्हणाले, “व्यवसायात  ‘जो दिखता है वो बिकता है’ हे तत्त्व म्हणजेच दृश्यमानता (व्हिजिबिलिटी) फार महत्त्वाची असते. अगदी उद्योजकाचे व्यक्तीमत्त्व, व्यवसायस्थळाची रचना व सौंदर्य, उत्पादनाची मांडणी व पॅकेजिंग, प्रसिद्धी या सगळ्यात त्याचे प्रतिबिंब पडते. म्हणून उद्योजकांनी केवळ उत्पादनांचेच नव्हे तर आपल्या व्यवसायाचे व स्वतःचेही ब्रँडिंग करावे. परिवर्तन संसार का नियम है या वचनानुसार कालसुसंगत बदल घडवावेत. व्यवसायात समस्या येतात आणि त्यातील केवळ पाच टक्के समस्या शांत राहून आपोआप सुटतात. उर्वरित ९५ टक्के समस्या आपल्याला तटवाव्या लागतात. समस्यांना घाबरु नये. उलट आपण समस्येपेक्षा मोठे व्हावे. कोणत्याही स्थितीत व्यवसायातून पाय मागे घेणार नाही, ही जिद्द बाळगावी, सर्वांत महत्त्वाचे आरोग्याकडे दुर्लक्ष करुन निव्वळ पैशाच्या मागे लागू नये. घाम गाळून मिळवलेला पैशाचा कुटुंबासमवेत आनंद घ्यावा.”

मुलाखतीदरम्यान डॉ. दातार यांनी आजवरचा आपला संघर्षमय प्रवास उलगडून सांगितला. बालपणातील गरिबीचे दिवस, तरुण वयात दारोदार फिरुन घेतलेला विक्रीकलेचा अनुभव, व्यवसायात पहिल्याच वर्षी झालेले प्रचंड नुकसान, ते भरुन काढण्यासाठी आईने मंगळसूत्र विकून जागवलेला निर्धार, दुबईतील कष्टमय वाटचाल, इराक-कुवेत युद्धादरम्यान उद्भवलेले धंदा बुडण्याचे संकट, व्यवसायातील प्रगतीसाठी पत्नीची झालेली अनमोल मदत असे अनुभव विशद केले.

‘मराठी युवा उद्योजक उद्योगिनी सेवाभावी संस्था, महाराष्ट्र’चे सुनील दातार यांनी धनंजय दातार यांचे तर आशिष संकपाळ यांनी सौ. वंदना दातार यांचे पुष्पगुच्छ देऊन स्वागत केले. या कार्यक्रमात मराठी चेंबर ऑफ बिझनेस अँड इंडस्ट्रीजचे संस्थापक अध्यक्ष चंद्रकांत साळुंखे यांचे, तसेच डॉ. सुनील काळे यांचे यशस्वी जीवनासाठी मार्गदर्शनपर व्याख्यान झाले. कार्यक्रमात डॉ. अंजली चौगुले (मॉडेलिंग), मनाली पाळंदे (पाळंदे टेक सोल्यूशन्स), मिलिंद आपटे (चित्रकार), नितीन ढेपे (पर्यटन), नवनाथ येवले (येवले अमृततुल्य) या पाच उद्योजकांना यशस्वी मराठी उद्योजकता पुरस्कार देऊन गौरवण्यात आले. योगिता बडवे यांनी सूत्रसंचालन व आभार प्रदर्शन केले.

पुण्याच्या आत्मीय आठवणी

पुणे शहराबाबतच्या आपल्या जुन्या आठवणींना उजाळा देताना डॉ. दातार म्हणाले, “सन १९९६ मध्ये मी कराडवरुन मुंबईला येत असताना शिरवळजवळ माझ्या कारला एका ट्रकने जबरदस्त धडक दिली होती. त्या अपघातात मी, माझी पत्नी व चालक बेशुद्ध झालो तर माझा एक वर्षाचा मुलगा दुखापत होऊन रडत होता. आम्ही सर्वजण दरवाजे लॉक झाल्याने गाडीत अडकलो होतो आणि गाडीने बाहेरुन पेट घेतला होता. त्यावेळी पुण्यातील एक मारवाडी सद्गृहस्थ तेथून चालले होते. त्यांनी मुलाच्या रडण्याचा आवाज ऐकून तातडीने धाव घेतली व काचा फोडून आम्हाला बाहेर काढून रुग्णालयात दाखल केले. बरा झाल्यावर मी माझी अपघातग्रस्त कार पुण्यातील गॅरेजमध्ये दुरुस्तीला टाकली. त्यानंतर विमा भरपाईच्या पूर्ततेसाठी मला सतत मुंबईहून पुण्याला यावे लागायचे. पुण्यात उत्तम आणि रुचकर खाद्यपदार्थ मिळत असल्याने मी या फेऱ्यांत अशा पदार्थांचा मनापासून आस्वाद घ्यायचो.”

पुणे-“डॉ. बाबासाहेब आंबेडकरांनी उच्च शिक्षण घेऊन स्वतःसह समाजाचा उत्कर्ष साधला. आपल्या विकासात शिक्षणाचे महत्व त्यांनी अधोरेखित केले आहे. त्यामुळे आजच्या तरुणांनी बाबासाहेबांचे विचार डोक्यात घेऊन शिक्षणाकडे गांभीर्याने पाहायला हवे. ‘वाचाल तर वाचाल’ हा मूलमंत्र ध्यानात घेऊन वाचन करत बाबासाहेबांचे विचार आत्मसात करायला हवेत” असे मत आमदार भीमराव तापकीर यांनी व्यक्त केले.

भारतीय राज्यघटनेचे शिल्पकार डॉ. बाबासाहेब आंबेडकर यांच्या 127व्या जयंतीनिमित्त डॉ. बाबासाहेब आंबेडकर संघर्ष समितीच्या वतीने ‘नाचून मोठे होण्यापेक्षा वाचून मोठे होऊया’ या उपक्रमाअंतर्गत महापुरुषांची १० हजार चरित्र पुस्तके वाटण्यात येणार आहेत. नालंदा विहार, पद्मावती येथे झालेल्या या उपक्रमाच्या शुभारंभप्रसंगी भीमराव तापकीर बोलत होते. यासाठी बनविण्यात आलेल्या ‘छत्रपती-फुले-शाहू-आंबेडकर विचाररथा’चे फीत कापून त्यांनी उद्घाटन केले.

याप्रसंगी चाटे शिक्षण समूहाचे प्रा. फुलचंद चाटे, आरपीआय नेते महेश शिंदे, स्थानिक नगरसेवक महेश वाबळे, आरपीआयचे राष्ट्रीय निमंत्रक मंदार जोशी, सचिन गजरमल, पत्रकार नंदकिशोर शहाडे,संघर्ष समितीचे महाराष्ट्र प्रदेशाध्यक्ष शशिकांत कांबळे, सल्लागार दत्ता पवार, युवा अध्यक्ष विकास कांबळे यांच्यासह इतर मान्यवर उपस्थित होते. यावेळी पद्मावती, दत्तनगर परिसरातील विद्यार्थ्यांना पुस्तके वाटण्यात आली.

भीमराव तापकीर म्हणाले, “बाबासाहेबांनी दिलेला प्रत्येक विचार आपल्या आयुष्याला कलाटणी देणारा आहे. जयंतीदिवशी केवळ डीजेपुढे नाचण्यापेक्षा वाचन करून बाबासाहेब समजून घेतले तर आपला उत्कर्ष होईल. त्यामुळे अधिकाधिक युवकांनी महापुरुषांची चरित्रे वाचून त्यांचे विचार दैनंदिन जीवनात अंमलात आणावेत”

शशिकांत कांबळे म्हणाले, “डॉ. बाबासाहेब आंबेडकर यांच्या प्रभावशाली विचारांतून प्रेरणा घेऊन युवापिढी घडली पाहिजे. बाबासाहेबांनी दिलेला ‘शिका, संघटित व्हा आणि संघर्ष करा’ हा मूलमंत्र घेऊन त्यांना अभिप्रेत समाजाची निर्मिती व्हायला हवी. याच विचारांतून यंदाच्या जयंतीनिमित्त ‘नाचून मोठे होण्यापेक्षा वाचून मोठे होऊया’ हा संकल्प आम्ही सोडला आहे.”

हा ‘छत्रपती-शाहू-फुले-आंबेडकर विचाररथ’ पुण्यातील विविध दलित वसाहतींमध्ये फिरणार आहे. यामध्ये दत्तनगर, पर्वती, कासेवाडी, राजेवाडी, ढोले पाटील रोड, विश्रांतवाडी, बोपोडी, औंध, रामनगर, वारजे, धनकवडी, पद्मावती, मंगळवार पेठ, कामगार पुतळा आदी ठिकाणांचा समावेश आहे. या रथाद्वारे पुस्तक वाटपासह जनजागृती केली जाणार आहे. प्रा. फुलचंद चाटे यांनीयावेळी आपले मनोगत व्यक्त केले .

पुणे- राजाराम पूल ते म्हात्रे पूल डी पी रस्ता ३६ मीटर होणार कधी…? असा सवाल करणारे पत्र क्रिएटिव्ह फाउंडेशन चे अध्यक्ष संदीप खर्डेकर यांनी महापालिका आयुक्तांना दिले आहे

खर्डेकर यांनी या पत्रात म्हटले आहे कि ,म्हात्रे पुलाकडून राजाराम पुलाकडे जाणाऱ्या डी पी रस्त्याची व येथील रहिवाश्यांनी व्यथा आपल्या समोर मांडत आहे,एकात्मिक रस्ते विकास योजने अंतर्गत या रस्त्याचे रुंदीकरण व काँक्रिटीकरणाचे काम गेले अनेक वर्ष रखडले आहे,मी सातत्याने पाठपुरावा करून किमान काँक्रिटीकरणाचे काम वेगाने पूर्ण व्हावे यासाठी गेले वर्षभर प्रयत्नरत आहे ..यात विविध विभागातील समन्वयाअभावी आणि इच्छाशक्ती अभावी ह्या रस्त्याचे स्वरूप हास्यास्पद झाले आहे.म्हात्रे पुलाकडून राजाराम पुलाकडे जाताना उजव्या बाजूस रस्ता १८ मीटर झाला आहे तर डाव्या बाजूस कुठे ९ मीटर,कुठे १२,तर कुठे १५ मीटर,कुठे चिंचोळा…..ज्या वस्तीतील लोकांचे पुनर्वसन झाले आहे त्यांना उठवून रस्ता करायला ही विविध विभागांची टोलवाटोलवीचाच अनुभव येतोय,मधला एक पट्टा न्यायप्रविष्ट तर अन्यत्र जागा ताबा घेण्याची प्रक्रिया सुरु आहे असे सांगितले जाते,तरी ह्या रस्त्याचे रुंदीकरण व काँक्रिटीकरणाचे काम कधी पूर्ण होणार याची माहिती द्यावी.
तसेच सदर रस्ता हा नो हॉकर्स झोन केला जावा व येथील उत्तम पदपथावर कोणत्याही परिस्थितीत पथारीवाले बसणार नाहीत याबाबत काळजी घ्यावी अशी आग्रही मागणी करत आहे,हे न केल्यास या भागातील नागरिकांसह आंदोलन उभारावे लागेल याची नोंद घ्यावी. असा इशारा खर्डेकर यांनी दिला आहे.

पुणे: पुणे शहर व परिसरातील विविध शाळा- महाविद्यालयांमध्ये वर्षभर मानसिक आरोग्य जागृतीपर कार्यक्रम राबविण्यात येणार असून त्याची सुरुवात एप्रिल महिन्यातच विविध महाविद्यालयांच्या “शिक्षक जनजागृती” या कार्यक्रमाने करण्यात येणार असल्याची माहिती महाराष्ट्र राज्य मानसिक आरोग्य जागृती कार्यक्रम समितीचे प्रमुख मार्गदर्शक तथा कर्वे समाज सेवा संस्थेचे संचालक डॉ दीपक वलोकर यांनी दिली.

महाराष्ट्र राज्य अपंग कल्याण आयुक्तालयाचे आयुक्त डॉ. नितीन पाटील व सावित्रीबाई फुले पुणे विद्यापीठाचे कुलगुरू डॉ. नितीन करमळकर यांच्या मार्गदर्शनाखाली नुकत्याच नव्याने गठीत करण्यात आलेल्या शासकीय राज्यस्तरीय महाराष्ट्र राज्य मानसिक आरोग्य जनजागृती कार्यक्रम समितीची बैठक कर्वे समाज सेवा संस्थेमध्ये डॉ दीपक वलोकर यांच्या अध्यक्षतेखाली तसेच समितीचे समन्वयक प्रा. चेतन दिवाण, जेष्ठ सदस्य डॉ वासुदेव परळीकर, प्रा. साधना नातू, डॉ. सुप्रकाश चौधरी यांच्या प्रमुख उपस्थितीत पार पडली त्यावेळी डॉ वलोकर यांनी हो घोषणा केली.

मानसिक आरोग्याकडे बघण्याचा समाजाचा दृष्टीकोन अत्यंत वेगळ्या प्रकारचा असून जनतेमध्ये मानसिक आरोग्यामध्ये जनजागृती करण्यासाठी पुणे व परिसरातील विविध शाळा व महाविद्यालयांच्या विद्यार्थी व प्राध्यापकांबरोबरच त्या भागातील नगर-वस्त्यामध्ये देखील विविध संस्थांच्या मदतीने जनजागृती करण्याचा प्रयत्न करण्यात येणार असल्याची माहिती डॉ.वलोकर यांनी दिली.

समितीचे समन्वयक प्रा. चेतन दिवाण, जेष्ठ मानसोपचारतज्ञ डॉ वासुदेव परळीकर, डी. वाय. पाटील. वैद्यकीय महाविद्यालयाचे डॉ. सुप्रकाश चौधरी, माडर्न महाविद्यालयाच्या मानसशास्त्र विभागप्रमुख डॉ. साधना नातू, सिम्बोयीसीस महाविद्यालयाच्या डॉ. अल्पना वैद्य, फर्गुसन महाविद्यालयाच्या डॉ. शीतल रुईकर,स्किझोफ्रेनिया अवेरनेस असोशियेशन चे अनिल वर्तक व स्मिता गोडसे, चैतन्य पुनर्वसन केंद्राचे रॉनी जॉर्ज व राहुल शिरुरे, कानेक्टिग हेल्पलाईन चे विरेन रजपूत, बापू ट्रस्टc च्या ज्युली बापट, शिल्पा तांबे, प्रिझम फौंडेशन च्या विद्या भागवत, स्नेह फौंडेशनच्या श्रद्धा देव, तसेच नाशिक येथील मानसोपचारतज्ञ डॉ. अभिजित करेगावकर आदींनी बैठकीमध्ये सहभागी होऊन महाराष्ट्रभर विविध ठिकाणी मानसिक आरोग्य जागृतीसाठी राबविण्यात येऊ शकणाऱ्या विविध प्रकारच्या प्रतिबंधात्मक उपाय योजना,उपचार पद्धती,पुनर्वसनपद्धती, व त्यासाठी लागणाऱ्या तज्ञ मंडळींच्या मार्गदर्शन व जनतेच्या सहभागाबाबत विस्तृत चर्चा केली.

बैठकीच्या सुरुवातीस महाराष्ट्र राज्य मानसिक आरोग्य जनजागृती कार्यक्रम समितीच्या सर्व नवनियुक्त सदस्यांना नियुक्तीपत्रे प्रदान करीत डॉ दीपक वलोकर प्रा. चेतन दिवाण व डॉ वासुदेव परळीकर यांच्याहस्ते सत्कार करण्यात आला.

पुणे – ‘लीड मिडिया’ च्या वतीने आणि अखिल सदाशिव, शनिवार, नारायण पेठ आंबेडकर जयंती महोत्सव समिती व वंदेमातरम संघटना यांच्या सहकार्याने डॉ. बाबासाहेब आंबेडकर यांच्या १२७ व्या जयंती निमित्त त्यांना अभिवादन करण्यासाठी दि. १४ एप्रिल रोजी ‘डॉ. बाबासाहेब आंबेडकर जयंती नाचून नाही तर वाचून साजरी करूया’ हा अभिनव उपक्रम राबविण्यात येणार आहे. यामध्ये कलाकार, साहित्यिक, उद्योजक, विद्यार्थी, शिक्षक आणि माध्यम प्रतिनिधी डॉ. बाबासाहेब आंबेडकर यांना वंदन करण्यासाठी एकत्र येऊन वाचन महायज्ञ करणार आहेत.

सहभाग  – विनोद सातव, अभिनेता- दिग्दर्शक प्रवीण तरडे, अॅड. असीम सरोदे, वैभव जोशी, विश्वंभर चौधरी, मेघराज राजेभोसले, सुरेश देशमुख, सचिन इटकर, सुनील अभ्यंकर, अश्विनी दरेकर, मृण्मयी देशपांडे, पौर्णिमा गानू, अॅड. रमेश परदेशी, केदार वांजपे, शैलेंद्र नांदुरकर, दीपक रेगे, मकरंद टिल्लू, वैभव वाघ, सचिन जामगे, अनघा फाटक, वंदे मातरम् संघटना, अ. भा. मराठी नाट्य परिषद शाखा पुणे, सेवादल परिवार, एकपात्री कलाकार परिषद, रसिक साहित्य.

वाचन महायज्ञ

दिनांक – १४ एप्रिल २०१८

वेळ – सायंकाळी ४.३० ते ६.३०

ठिकाण –  सुशील बंगला, हॉटेल कोरोनेट शेजारी, संतोष बेकरी समोर आपटे रोड, पुणे.

पुणे-गेली सुमारे ३०-४० वर्षांहून अधिक काळ पुणे शहरातील रेल्वे लाईन्स नजीक राहणाऱ्याना  कायमस्वरूपी घर उपलब्ध करून देणेबाबत रेल्वे मंत्री पियुष गोयल ह्यांच्या समवेत येत्या महिन्याभरात सर्व संबंधित संस्था आणि अधिकाऱ्यांबरोबर बैठक घेणार असल्याचे मुख्यमंत्री देवेंद्र फडणवीस ह्यांनी निश्चित केल्याची माहिती खासदार अनिल शिरोळे ह्यांनी दिली आहे. काल (दि १२ एप्रिल) मुख्यमंत्र्यांशी अनिल शिरोळे यांची चर्चा झाली. त्यानुसार ही  बैठक होणार असून “Housing for all” ह्या योजने अंतर्गत ह्या सर्वांना घरे उपलब्ध करून देण्यासाठी प्रयत्नशील असल्याचे शिरो ळेयांनी सांगितले.

पुणे : इचलकरंजी येथील थ्रीडी कोलाज पोर्ट्रेट्स आर्टिस्ट डॉ. ज्योती दशावतार बडे यांनी साकारलेल्या 14 थ्रीडी कोलाज पोर्ट्रेट्सचे येत्या 16 ते 19 एप्रिल दरम्यान घोले रस्त्यावरील राजा रवी वर्मा आर्ट गॅलरी येथे पुण्यातील शिवाजी ट्रेल या संस्थेने आयोजित केले आहे. दररोज सकाळी 10.00 ते सायंकाळी 8.00 या वेळेत हे प्रदर्शन पुणेकरांना विनामूल्य पाहता येईल, अशी माहिती शिवाजी ट्रेल संस्थेचे संस्थापक मिलिंद क्षीरसागर, थ्रीडी कोलाज पोर्टेट्स आर्टिस्ट डॉ. ज्योती बडे यांनी पत्रकार परिषदेत दिली. यावेळी मुकुंद उत्पत, संजय लाहोटी, डॉ. दशावतार बडे आदी उपस्थित होते.

     थ्रीडी कोलाज पोर्ट्रेट्स विश्‍वातील डॉ. ज्योती बडे यांनी शिवस्मृती नामक थ्रीडी कोलाज पोर्ट्रेट्समध्ये एकूण 14 भव्य पोर्ट्रेट्स साकारली आहेत. शिवचरित्रातील प्रसिद्ध चित्रकार दलाल यांच्या मूळ चित्रावरून ही पोर्ट्रेट्स साकारली असून, ती पाहताना डॉ. ज्योती बडे यांचा चित्रकलेचा गाढा अभ्यास दिसून येतो. डॉ. ज्योती बडे यांचा हा अविष्कार अनोखा व पहिलाच असून, चित्रकलेच्या अभ्यासकांसह चित्रकला रसिकांनी त्यांचा आस्वाद घ्यावा, असे आवाहन मिलिंद क्षीरसागर यांनी केले आहे. 

     या प्रदर्शनास अनेक मान्यवरांसोबत शिवाजी ट्रेल संस्थेचे बँड अ‍ॅम्बेसेडर डॉ. अमोल कोल्हे हे देखील भेट देणार आहेत, अशी माहिती डॉ. बडे यांनी पत्रकार परिषदेत दिली.

     यापूर्वी शिवशाहीर बाबासाहेब पुरंदरे, ज्येष्ठ संगीतकार पं. ह्रदयनाथ मंगेशकर, इतिहास संशोधक डॉ. अमर आडके, संभाजी भिडे गुरुजी यांनी ही कलाकृती पाहून या पोर्ट्रेट्सची प्रशंसा केली आहे. अशा अनेक मान्यवरांनी या प्रदर्शनाची खासियत अधोरेखीत केली आहे. पुणेकरांसाठी दि. 16 एप्रिल ते 19 एप्रिल दरम्यान सकाळी 10.00 ते सायंकाळी 6.00 या वेळेत खुले राहणार आहे. रसिकांनी या प्रदर्शनाचा आस्वाद घ्यावा, असे आवाहनही डॉ. ज्योती बडे यांनी केले आहे.

पुणे, श्री साईबाबा संस्थान विश्‍वस्त व्यवस्था, शिर्डीच्या वतीने साईबाबा शताब्दीच्या निमित्ताने साईबाबांनी धारण केलेल्या चर्म पादुका पुणेकरांसाठी उपलब्ध करून दिल्या असल्याची माहिती साईगंगा प्रतिष्ठानचे अध्यक्ष राजेंद्र जाधव यांनी दिली आहे.
शनिवार पेठेतील न्यायमूर्ती रानडे बालक मंदिरात रविवारी (ता. १५ एप्रिल) पहाटे पाच ते रात्री दहा या वेळेत भाविकांना दर्शनाचा लाभ घेता येणार आहे. कोल्हापूरच्या करवीर पीठाचे श्री शंकराचार्य स्वामी विद्या नरसिंह भारती यांची प्रमुख उपस्थिती राहणार आहे.
पहाटे भूपाळी, तुकाराम दैठणकर व सुरेश लोणकर यांचे सनई वादन, साईबाबांच्या पादुकांना अभिषेक व उटी लेपन पूजा, श्रीविष्णू सहस्त्रनाम पठण, साई ग‘ंथाचे सामुदायिक पारायण, सबका मालिक एक हे सत्यश्री महाराजांचे प्रवचन, गुरुपाठ, भजन असे धार्मिक कार्यक‘म आयोजित करण्यात आले आहेत.
साई संस्थांचा विश्‍वस्तांचा शताब्दीनिमित्त सन्मान करण्यात येणार आहे. साईगंगा प्रतिष्ठान, साईदास मंडळ आणि साईबाबा पालखी सोहळा समिती यांनी या कार्यक‘माचे संयोजन केले आहे.