पुणे-वाढत्या पेट्रोल – डिझेल दरवाढीच्या निषेधार्थ पुणे शहर जिल्हा काँग्रेस कमिटीचे अध्यक्ष रमेश बागवे यांच्या नेतृत्वाखाली आज संत कबीर चौक नाना पेठ ते अल्पना टॉकीज पर्यंत दुचाकी ढकल मोर्चा काढण्यात आला. मोदी सरकारच्या विरूध्द निषेधाचे फलक घेवून कार्यकर्त्यांनी मोदी सरकारच्या विरोधात घोषणा दिल्या. ‘‘बेचारी जनता करे पुकार, लुट रही है मोदी सरकार’’, ‘‘पेट्रोल डिझेल की मंहगाई, यही है क्या अच्छे दिन की पेहचान?’’ अशा प्रकारच्या घोषणा दिल्या. त्यानंतर दुचाकी वाहने ढकलत पक्षाचे नेते, पदाधिकारी व कार्यकर्ते अल्पना टॉकिज पर्यंत गेले.
त्याठिकाणी आपल्या भाषणात शहराध्यक्ष रमेश बागवे म्हणाले, ‘‘केंद्र सरकारने
वाढविलेले पेट्रोल व डिझेलचे दर हे आजपर्यंतच्या इतिहासातले सर्वात जास्त दर आहे.पेट्रोल व डिझेलच्या वाढलेल्या किंमती सर्वसामान्यांच्या आवाक्याबाहेर गेलेल्या असून त्यामुळे जनतेमध्ये तीव्र असंतोष असून जनतेची मोठ्या प्रमाणावर लूट सुरू आहे.इंधन दरवाढीमुळे महागाई मोठ्या प्रमाणावर वाढली असून सर्व सामान्यांना याचामोठा आर्थिक फटका बसत आहे. आज राज्यात पेट्रोलचा दर प्रती लिटर ८४.५० रूपयांच्या वर गेला आहे तर डिझेल प्रती लिटर ७० रूपयांच्या वर पोहोचले आहेत. राज्यात इंधनावर अनेक कर लावले जात आहेत. काँग्रेस प्रणित यु.पी.ए. सरकार असताना अंतरराष्ट्रीय बाजार पेठेत कच्च्या तेलाचे भाव प्रती बॅरल वाढलेले असताना सुध्दा यु.पी.ए. सरकारने पेट्रोल – डिझेलचे दर नियंत्रणात ठेवले होते. त्यावेळी पेट्रोलचे दर प्रती लिटर ६० ते ६५ रूपये पर्यंत असायचे. आता या नविन दरवाढीमुळे
जीवनावश्यक वस्तूंवर सुध्दा परिणाम होणार आहे. सामान्य जनतेला जगणे कठिण झाले आहे.’’
यानंतर महाराष्ट्र प्रदेश काँग्रेस सरचिटणीस ॲड. अभय छाजेड म्हणाले की,
‘‘मोदी सरकारला पेट्रोल – डिझेलच्या दरावर नियंत्रण ठेवता आले नाही. काँग्रेस -प्रणित यु.पी.ए. सरकार असताना आतंरराष्ट्रीय कच्चा तेलाचे भाव वाढत
असताना सुध्दा जनतेचे हित लक्षात घेऊन पेट्रोल – डिझेलचे दर नियंत्रणात ठेवले
होते. मोदी सरकारच्या काळात पेट्रोल – डिझेलचे दर वाढण्याची अनेक कारणे आहेत.
मोदी सरकारचे चूकीचे आर्थिक धोरणामुळे उत्पन्न कमी आहे, बँकांमध्ये कर्जाचा बोजा वाढलेला आहे. नोटबंदीमुळे देशाची अर्थव्यवस्था कोलमडली आहे. केंद्र सरसकार व राज्य सरकार पेट्रोल – डिझेलवर लावलेले विविध कर कमी करण्यास तयार नाही आणि सरकार जनतेवर हा भुर्दंड लादत आहे.’’
यानंतर माजी आमदार बाळासाहेब शिवरकर व मोहन जोशी यांचीही भाषणे
झाली.
यानंतर काँग्रेसच्या शिष्ट मंडळाने पुणे उपजिल्हाधिकारी मा. विजयसिंह देशमुख
यांना भेटून पेट्राल – डिझेल दरवाढ कमी करणेबाबत निवेदन सादर केले.
यावेळी कमल व्यवहारे, अरविंद शिंदे, लता राजगुरू, सुजित यादव, सुजाता
शेट्टी, रविंद्र धंगेकर, अजित दरेकर, अविनाश बागवे, विरेंद्र किराड, दत्ता बहिरट,
मनीष आनंद, रमेश अय्यर, विकास टिंगरे, शेखर कपोते, मीरा शिंदे, अनुसया
गायकवाड, संगिता तिवारी, युवक अध्यक्ष विकास लांडगे, बाळासाहेब अमराळे,
नुरूद्दीन सोमजी, अमित बागुल, ब्लॉक प्रदिप परदेशी, सुनिल घाडगे, जयकुमार
ठोंबरे, भारती कोंडे, नागेश भालेराव, चेतन आगरवाल, सुमीत डांगी, विनय ढेरे, हेरॉल्ड मॅसी, चैतन्य पुरंदरे, बाळासाहेब आमराळे, अभिजीत महामुनी, राजेंद्र गायकवाड, ॲन्थोनी जेकब, विक्रम खन्ना आदी उपस्थित होते.

पुणे : वाघोली व परिसरातील वीजविषयक प्रश्नांवर लवकरच तोडगा काढण्यात येणार आहे. वीजपुरवठा सुरळीत ठेवण्यासाठी वीजयंत्रणेच्या आवश्यक दुरुस्तीसह नवीन वाहिनीद्वारे वीजपुरवठा करण्यात येणार आहे. तसेच नादुरुस्त मीटर बदलून ग्राहकांना अचूक वीजबिल देण्यात येणार असल्याची माहिती मुळशी विभागाचे कार्यकारी अभियंता श्री. रवींद्र बुंदेले यांनी दिली.

वाघोली ग्रामपंचायतीच्या कार्यालयात मंगळवारी (दि. 22) झालेल्या बैठकीत ते बोलत होते. यावेळी सरपंच वसुंधराताई उबाळे, जिल्हा परिषदेचे माजी सदस्य श्री. रामभाऊ दाभाडे, श्री. संदीप सातव, उपकार्यकारी अभियंता श्री. राजेंद्ग भुजबळ, सहाय्यक अभियंता श्री. नंदकुमार वैरागर आदींसह परिसरातील नागरिक उपस्थित होते.

वाघोली परिसरातील वीजयंत्रणेच्या दुरुस्तीबाबत सर्व्हेक्षण करण्यात आले आहे. वीजयंत्रणेची दुरुस्ती कामे करण्यासोबतच आवश्यक ठिकाणी वीजयंत्रणेतील जुने भाग सुद्धा बदलण्यात येणार आहे. यासाठी सुमारे 28 लाख रुपयांचा आराखडा मंजूर झाला असून कामांना प्रत्यक्षात सुरवात झालेली आहे. याशिवाय कवडेवस्ती येथील रोहित्र स्थानांतरीत करण्यात येणार आहे. ज्या ठिकाणी वीजचोरी होत असल्याचे निदर्शनास आलेﾠआहे तेथे एरियल बंच केबल टाकण्यात येणार असल्याची माहिती यावेळी देण्यात आली.

सुमारे 44 हजार वीजग्राहकांना सुरळीत वीजपुरवठा व्हावा यासाठी लोणीकंद उपकेंद्गातून 22 केव्ही क्षमतेच्या वाघेश्वर भूमिगत वाहिनीचे काम लवकरच पूर्ण करण्यात येईल. या नवीन वाहिनीमुळे सद्यस्थितीत वीजपुरवठा करणाऱ्या वाहिन्यांवरील वीजभार कमी होणार आहे. याशिवाय नादुरुस्त वीजमीटर तातडीने बदलण्याचे काम सुरु करण्यात आले आहे. वीजग्राहकांना वीजवापराचे अचूक बिल देण्यासाठी उपाययोजना करण्यात येत असल्याचीही माहिती यावेळी महावितरणकडून देण्यात आली.

पुणे-“भैरोबा नाल्यात सुरू असलेल्या नाला सौन्दर्यीकरण (नाला गार्डन) कामाची पाहणी आज शिंदे छत्री भागात करण्यात आली. या प्रसंगी पुणे कॅन्टोन्मेंट बोर्डाच्या उपाध्यक्षा प्रियांकाजी श्रीगिरी, स्थानिक नगरसेवक विनोदजी मथुरावाला , भारत सरकारच्या रेल्वे सल्लागार समितीचे सदस्य दिनेशजी होले, बुंदेलाजी उपस्थित होते. पंतप्रधान नरेंद्रजी मोदी यांच्या संकल्पनेतील स्वच्छ भारत अभियान अंतर्गत या कामासाठी निधी उपलब्ध करून देण्यात आला आहे. स्वामी विवेकानंद प्रतिष्ठान च्या वतीने या कामाचा सातत्याने पाठपुरावा करण्यात येत आहे. या बरोबरच शिंदे छत्री – खड्डा वस्ती – ताडी मळा येथुन नाल्यावरील पूलापासुन ते शंकर मठ ते एस आर पी रस्ता असा रस्ता देखील करण्यात येणार आहे. नाला सौन्दर्यीकरणाचे (नाला गार्डन) चे काम वानवडी गाव – गंगा सॅटेलाइट – शिंदे छत्री – ताडी मळा- जगतात नगर- दिव्या नगर- चौगुले नगर- होले नगर- भैरोबा नाला – टेन स्क्वेअर – फातिमा कॉन्व्हेंट- भैरोबा मंदिर- विद्या भवन कॉलेज- सेंट पॅट्रिक्स शाळा- चिमटा वस्ती- जांभुळकर मळा- उदय बाग- सोपान बाग- कवडे मळा या भागातुन जाणाऱ्या संपुर्ण नाल्यामध्ये करण्यात येणार आहे.”

पुणे: अत्यंत प्रतिकूल परिस्थितीमध्ये स्त्री शिक्षणाबरोबरच वंचित व शोषित घटकांच्या उन्नतीसाठी शिक्षणाचा वसा घेऊन पुण्यात शिक्षण संस्था उभ्या करणाऱ्या भारतरत्न महर्षी धोंडो केशव कर्वे यांच्या नावे समाजकार्याचे महाविद्यालय स्थापन करून व्यावसायिक समाजकार्यकर्त्यांची एक फळी उभी करणाऱ्या कर्वे समाज सेवा संस्थेच्या वतीने यावर्षीपासून प्राथमिक शिक्षण देखील उपलब्ध केले असून महाराष्ट्र शासन मान्यताप्राप्त इंग्रजी माध्यमाच्या प्ले ग्रुप ते इयत्ता चौथीपर्यंतच्या “ विवेक वर्धिनी” या प्राथमिक शाळेची सुरुवात करण्यात आली असल्याची माहिती संस्थेचे सचिव एम. शिवकुमार यांनी दिली आहे.

कर्वे समाज सेवा संस्थच्या वतीने १९६३ साली महर्षी कर्वे यांच्या नावे समाजकार्य महाविद्यालयाची स्थापना करण्यात आली व काही वर्षातच नावारूपास आलेल्या संस्थेच्या या समाजकार्य महाविद्यालयाने समाजकार्याचे शिक्षण देणाऱ्या महाराष्ट्रातील द्वितीय क्रमांकाचे तर देशपातळीवरील प्रथम दहा महाविद्यालयांपैकी एक असा बहुमान मिळविण्याची किमया केली आहे. कर्वे समाज सेवा संस्था ही गेली ५५ वर्षे शिक्षणाबरोबरच सामाजिक क्षेत्रामध्ये देखील अविरत कार्यरत असून अनेक सामाजिक उपक्रम राबवून समाजातील सर्व घटकांना त्याचा फायदा पोहोचावा यासाठी संस्था प्रयत्नशील आहे.

स्पर्धेच्या युगामध्ये शिक्षणाचे माहेरघर असणार्या पुणे शहरामध्ये दर्जेदार प्रतीचे प्राथमिक शिक्षण उपलब्ध करून देण्याचे आव्हान समाजकार्याचा वसा असणार्या कर्वे समाजसेवा संस्थेने स्वीकारले असून यावर्षीपासून हिंगणे- कर्वेनगर परिसरातील विद्यार्थ्यांसाठी प्ले ग्रुप, नर्सरी, जुनिअर व सिनिअर केजी तसेच पहिली ते चौथी पर्यंतच्या इंग्रजी माध्यमाच्या “विवेक वर्धिनी” या प्राथमिक शाळेची सुरुवात करण्यात आली आहे.

समाजकार्याचा वसा असणार्या व आधुनिक सोयी सुविधांनी तसेच अद्ययावत असणार्या या शाळेमध्ये माफक दरामध्ये प्रवेश प्रक्रिया सुरु असून अधिक माहिती व प्रवेशासाठी कर्वे समाज सेवा संस्थेच्या कर्वेनगर येथील वनदेवी मंदिराशेजारील १८, हिल साइड येथील “विवेक वर्धिनी” शाळेच्या कार्यालयाशी ०९८८१८१६६६२ व ०९८८१८१६६६३ या क्रमांकावर संपर्क साधण्याचे आवाहन सचिव एम. शिवकुमार यांनी केलेले आहे.