पुणे प्रार्थना समाज वार्षिकोत्सव : संस्थेचे १५६ व्या वर्षात पदार्पण
पुणे : पुणे प्रार्थना समाजाच्या स्थापनेस ४ डिसेंबर रोजी १५५ वर्षे पूर्ण होत आहेत. संस्थेच्या वार्षिकोत्सवानिमित्त विविध पुरस्कार प्रदान करण्यात येणार आहेत. गुरुवार, दिनांक ४ डिसेंबर रोजी सायंकाळी ५ वाजता, भांडारकर प्राच्यविद्या संस्थेच्या नवलमल फिरोदिया सभागृहात पुरस्कार प्रदान सोहळा होणार आहे. अच्युत गोडबोले, डाॅ. अभिजीत सोनवणे आणि डाॅ. मनीषा सोनावणे, डाॅक्टर्स फाॅर बेगर्स ,यांच्या सोहम संस्थेला आणि नेत्रा पाटकर यांच्या झेप संस्थेला यंदाच्या वार्षिकोत्सव सोहळ्यात पुरस्कार प्रदान करण्यात येणार आहेत, अशी माहिती संस्थेचे सचिव डॉ. दिलीप जोग यांनी पत्रकार परिषदेत दिली.

यावेळी पुणे प्रार्थना समाजाचे धनराज निंबाळकर उपस्थित होते. डेक्कन महाविद्यालयाचे माजी संचालक पद्मश्री डाॅ. के. पद्दय्या यांच्या हस्ते पुरस्कार वितरण होणार आहे.

अच्युत गोडबोले यांना डॉ रामकृष्ण गोपाळ भांडारकर पुरस्काराने सन्मानित करण्यात येणार आहे. पुरस्काराचे हे दहावे वर्ष असून, मराठी ही ज्ञानभाषा व्हावी यासाठी मराठीतून विज्ञानासहित अनेक विषयांद्वारे विपुल साहित्य निर्मिती केल्याबद्दल त्यांना सन्मानित करण्यात येणार आहे.

डॉ. अभिजीत सोनवणे व डॉ. मनीषा सोनवणे ,’डॉक्टर्स फॉर बेगर्स’,सोहम ट्रस्ट या संस्थेला महर्षी विठ्ठल रामजी शिंदे पुरस्काराने सन्मानित करण्यात येणार आहे. समाजातील वेगवेगळ्या घटकांमधील सामंजस्यांसाठी कार्य करणाऱ्या व्यक्ती किंवा संस्थेस हा पुरस्कार देण्यात येतो. याही पुरस्काराचे दहावे वर्ष आहे.

‘झेप रिहॅबिलिटेशन सेंटर फॉर स्पेशल चिल्ड्रन’ या संस्थेच्या संस्थापिका नेत्रा पाटकर यांची डेव्हिडा रॉबर्टस् पुरस्कारासाठी निवड करण्यात आली आहे. विशेष गरज असलेल्या बालकांसाठी काम करणाऱ्या व्यक्ती किंवा संस्थेला हा पुरस्कार दिला जातो. पुरस्काराचे यंदा अकरावे वर्ष आहे. रुपये २५ हजार रुपयांचा धनादेश आणि मानचिन्ह असे तीनही पुरस्कारांचे स्वरूप आहे.

डॉ. दिलीप जोग म्हणाले, रविवार, दिनांक ३० नोव्हेंबर रोजी सकाळी १० वाजता बुधवार पेठेतील हरिमंदिर, पुणे प्रार्थना समाजात उपक्रमोपासना होणार आहे. शनिवार, दिनांक ६ डिसेंबर रोजी संध्याकाळी ५ वाजता ‘स्वातंत्र्यवीर सावरकर यांचे धर्मविषयक विचार’ या विषयावर सार्वजनिक सभेचे अध्यक्ष विद्याधर नारगोलकर यांचे व्याख्यान होणार आहे. त्यानंतर सायंकाळी ६ वाजता दिपोत्सव होईल. रविवार दिनांक ७ डिसेंबर रोजी सकाळी १० वाजता ईश्वरोपासना होणार आहे. त्यानंतर नमिता मुजुमदार सह बारे खुर्द कीर्तन मंडळ, सायलीताई महाराज कीर्तन मंडळ यांचे कीर्तन होणार आहे. हे कार्यक्रम बुधवार पेठेतील पुणे प्रार्थना समाजाच्या हरिमंदिरात होणार आहेत.

पुणे- लेझर आणि बिम लाईटने डोळ्यांना अपाय होऊ शकतो अशा लाईटचा उधळ सार्वजनिक वापर अपघातही घडवून आणू शकतो यामुळे त्यास बंदी असताना गणेश विसर्जन मिरवणुकीत प्रतिबंधित लेझर आणि बिम लाईटचा वापर केल्याप्रकरणी भैरवनाथ मित्र मंडळाचे (वैदवस्ती, पिंपळे गुरव) अध्यक्ष गोपी पंढरीनाथ लोखंडे (वय ३४) यांना न्यायालयाने शिक्षा सुनावली आहे. त्यांना १ हजार रुपये दंड आणि २ दिवसांची साधी कैद ठोठावण्यात आली आहे.कर्णकर्कश्श ध्वनी क्षेपक वापरून लहानगी मुले ,वृद्ध नागरिक ,रुग्ण यांना आणि ज्यांना आवश्यक नाही अशांना त्रासदायी वर्तन रस्तोरस्ती करणाऱ्या मंडळ अध्यक्ष आणि कार्यकर्त्यांना देखील अशा प्रकारे गुन्हे , खटले दाखल झाले तर जेलची हवा खावी लागणार आहे.

पिंपरी चिंचवड पोलिस आयुक्त विनयकुमार चौबे यांनी भारतीय नागरी सुरक्षा संहिता (बीएनएसएस) कलम १६३ अंतर्गत संपूर्ण आयुक्तालय क्षेत्रात प्रखर बिम लाईट व लेझर लाईटचा वापर पूर्णपणे प्रतिबंधित केला होता. याबाबत सर्व गणेश मंडळांना लेखी आणि तोंडी सूचना देण्यात आल्या होत्या.या आदेशाचे उल्लंघन करत, ४ सप्टेंबर २०२५ रोजी सायंकाळी ८.३० ते रात्री ११.४५ या वेळेत पिंपळे गुरव परिसरात भैरवनाथ मित्र मंडळाच्या विसर्जन मिरवणुकीत डोळ्यांना इजा पोहोचेल अशा तीव्र लेझर व बिम लाईटचा वापर करण्यात आला.याची दखल घेऊन सांगवी पोलिस ठाण्यात बीएनएसएस कलम २२३ (तत्कालीन भादवि कलम १८८) अन्वये गुन्हा दाखल करण्यात आला. सांगवी पोलिसांनी तपास पूर्ण करून दोषारोपपत्र दाखल केले. प्रथमवर्ग न्यायदंडाधिकारी, पिंपरी यांच्यासमोर सुनावणी होऊन न्यायालयाने आरोपी गोपी लोखंडे यांना दोषी ठरवले.

ही कारवाई पोलिस आयुक्त विनयकुमार चौबे, अपर पोलिस आयुक्त सारंग आव्हाड, पोलिस उपायुक्त (परिमंडळ-१) संदिप आटोळे, सहाय्यक आयुक्त शशिकांत महावरकर आणि सचिन हिरे यांच्या मार्गदर्शनाखाली सांगवी ठाण्याचे वरिष्ठ पोलिस निरीक्षक जितेंद्र कोळी, पोनि अमोल नांदेकर, पोउनि रोहित पाटील, विजय शेलार, पोहवा विशाल चौधरी, प्रमोद जराड, तुषार साळुंखे यांच्या पथकाने केली.पोलिस उपायुक्त संदिप आटोळे यांनी सांगितले की, भविष्यातही अशा प्रतिबंधित लेझर व बिम लाईटचा वापर आढळल्यास कठोर कारवाई केली जाईल. नागरिकांनी आणि मंडळांनी पोलिस आदेशांचे पालन करावे, असे आवाहनही त्यांनी केले.

; पुण्यातून मोठ्या प्रमाणावर खेळाडू घडविण्याचा मान्यवरांचा निर्धार

खासदार क्रीडा महोत्सवाची सांगता; विजेत्यांचा गौरव

पुणे, ता. २७ : ‘लहान मुले हल्ली मोबाइल गेममध्ये रमली आहेत. त्यामुळे मैदानात येणाऱ्या मुलांची संख्या कमी झाली आहे. अशा परिस्थितीत पुण्यातून ४४ हजार खेळाडू मैदानात उतरतात, ही मोठी गोष्ट आहे. खेळातूच उत्तम आरोग्य घडत असते आणि आरोग्य हीच यशाची गुरुकिल्ली आहे,’ असे मत अभिनेता अक्षय कुमारने व्यक्त केले. त्याने पुण्याचे खासदार आणि केंद्रीय सहकार व नागरी हवाई वाहतूक राज्यमंत्री मुरलीधर मोहोळ यांचे खेळाला महत्त्व दिल्याबद्दल अभिनंदनही केले.
पुण्याचे खासदार आणि केंद्रीय सहकार व नागरी हवाई वाहतूक राज्यमंत्री मुरलीधर मोहोळ यांच्या पुढाकाराने आयोजित खासदार क्रीडा महोत्सवाचा गुरुवारी गणेश कला क्रीडा रंगमंच येथे समारोप झाला. मुरलीधर मोहोळ यांनी भारतमातेची प्रतिमा देऊन अक्षयकुमारचा सत्कार केला. या कार्यक्रमात विजेत्या चार हजार खेळाडूंना गौरविण्यात आले. अक्षय कुमार यांनी लहान खेळाडूंशी संवादही साधला. अक्षय कुमार आणि खासदार मुरलीधर मोहोळ सायकल चालवत व्यासपीठाजवळ आले. या वेळी उच्च व तंत्रशिक्षणमंत्री चंद्रकांत पाटील, राष्ट्रीय स्वयंसेवक संघाचे प्रांत कार्यवाह डॉ. प्रवीण दबडघाव, खेलरत्न पुरस्कार प्राप्त आंतरराष्ट्रीय नेमबाज अंजली भागवत, मुख्य समन्वयक मनोज एरंडे, ऑलिम्पियन रेखा भिडे, माजी कबड्डीपटू शांताराम जाधव, ऑलिम्पियन बॉक्सर मनोज पिंगळे, तेनसिंग नोर्गे पुरस्कार प्राप्त ज्येष्ठ गिर्यारोहक उमेश झिरपे, माजी कबड्डीपटू शकुंतला खटावकर, ध्यानचंद पुरस्कार प्राप्त टेनिसपटू नितीन कीर्तने, माजी क्रिकेटपटू केदार जाधव, सुरेखा द्रविड, श्रीरंग इनामदार या आजी-माजी खेळाडूंसह प्रकाश जावडेकर, धीरज घाटे, खासदार मेधा कुलकर्णी, आमदार भीमराव तापकीर, आमदार सुनील कांबळे, आमदार सिद्धार्थ शिरोळे, आमदार हेमंत रासने, राजेश पांडे, सचिन भोसले, श्रीनाथ भिमाले आदी मान्यवर उपस्थित होते.

मुलांना खेळासाठी पाठिंबा द्या
अक्षय कुमार म्हणाला, ‘खेळाडूंआधी पालकांचे आभार. त्यांनी मुलांना खेळासाठी पाठिंबा दिला. माझे वडील मला नेहमी म्हणायचे. सकाळी लवकर उठ, रात्री लवकर झोप. तो मंत्र मी आजही पाळला आहे. उत्तम आरोग्य सर्वांत जास्त गरजेचे आहे.’ या वेळी ४४ हजार खेळाडू क्रीडा महोत्सवात सहभागी झाले. पुढच्या वर्षी एक लाख खेळाडूंचा यात सहभाग असायला हवा, असा आशावादही त्यांनी व्यक्त केला.

पुण्यातील क्रीडा संस्कृती वाढवायची : मोहोळ
खासदार मुरलीधर मोहोळ म्हणाले, ‘विकसीत भारत हा बलवान असला पाहिजे. त्यासाठी फिट इंडिया, क्रीडा महोत्सव पंतप्रधान नरेंद्र मोदी यांनी सुरू केले. त्याचाच एक भाग म्हणून आम्ही ३७ क्रीडा प्रकारांत २९ ठिकाणी स्पर्धा घेतल्या. यात ४४ हजार खेळाडू सहभागी झाले. याबाबत सर्व खेळाडू, संघटनांचे आभार. पुण्याला क्रीडा संस्कृतीची वैभवशाली परंपरा आहे. ते समृद्ध करणे. ते वाढवणे हा या स्पर्धा आयोजनामागील उद्देश होता. या स्पर्धांमधून आणि तुमच्यातूनच भविष्यातील अंजली भागवत, शांताराम जाधव होतील. आज शहराचे नेतृत्व केले, उद्या राज्याच्या नेतृत्व कराल, देशाचे नेतृत्व कराल.’ हा जगन्नाथाचा रथ ओढवून नेणाऱ्या सर्वांचा मी आभारी आहे, असे सांगायलाही मोहोळ विसरले नाहीत.

पंच परिवर्तनामुळे वैभव
अंजली भागवत म्हणाल्या, ‘तुम्ही खूप भाग्यवान आहात. तुम्हाला चांगले व्यासपीठ मिळत आहेत. आम्हाला असे व्यासपीठच मिळायचे नाहीत. दर दिवशी स्पर्धेची तयारी कराल, तेव्हा ऑलिम्पिकपर्यंत पोहोचू शकाल. दर वर्षी या स्पर्धा व्हाव्यात, अशी माझी इच्छा आहे. पुण्यातूनच आपल्याला जास्तीत जास्त अर्जुन पुरस्कार आणि खेलरत्न पुरस्कारप्राप्त खेळाडू घडवायचे आहेत.’
डॉ. प्रवीण दबडघाव म्हणाले, ‘खेळ हा आनंद देणारा असतो. खेळामुळे सर्व जण एकत्र येतात. विषमता घालवायची असले, तर खेळ हे उत्तम व्यासपीठ आहे. खेळामुळे एक कुटुंब तयार होते. खेळात आपण पर्यावरणाचाही विचार करीत असतो. स्वदेशीचा विचार करीत असतो. नागरिक शिष्टाचाराचा विचार करीत असतो. या सर्व गोष्टी भारताला जागतिक स्तरावर अव्वल होण्यासाठी महत्त्वाच्या असतात. याला पंच परिवर्तन म्हणतात. हे देशाला वैभव मिळवून देऊ. आणि हे खेळातूच येते.’

पुण्यातील कौशल्यावर चर्चा
चंद्रकांत पाटील म्हणाले, ‘२०१४ पासून माननीय पंतप्रधान नरेंद्र मोदी यांनी अशा प्रकारच्या स्पर्धांचा आग्रह धरला होता. त्यांनी कला, क्रीडा, शेती, नवीन तंत्रज्ञान असे चार प्रकारचे महोत्सव सुचवले होते. मोहोळ यांनी क्रीडा महोत्सवाला सुरुवात केली. त्याला प्रचंड प्रतिसाद मिळाला. कुठेही गडबड झाली नाही. खेळीमेळीच्या वातावरणात स्पर्धा झाल्या. त्यामुळे मुरलीधर मोहोळ यांचे अभिनंदन.’ सरकार खेळाबाबत मोठे निर्णय घेत आहे. आंतरराष्ट्रीय स्पर्धेत यश मिळविणाऱ्या खेळाडूंच्या बक्षीस रकमेत मोठी वाढ करण्यात आली आहे; त्याचबरोबर नोकरीही द्यायला सुरुवात केली आहे. आपल्या राज्यातून मोठ्या प्रमाणावर खेळाडू निर्माण व्हावे, यासाठीच हा उपक्रम आहे. या यशावर थांबू नका. आता तुम्हाला आंतरराष्ट्रीय व्यासपीठ गाजवायचे आहे. पुण्यातील कौशल्य जागतिक स्तरावर कसे नेता येईल, यासाठी प्रयत्न करणार आहोत, असेही चंद्रकांत पाटील म्हणाले.

चांगल्या कामासाठी मदत मागा; दानशूर सढळ हाताने देतात

डॉ. सदानंद मोरे यांचे प्रतिपादन; दिवाळीच्या सुटीत विद्यार्थ्यांनी संकलित केलेला निधी संस्थेकडे सुपूर्त

पुणे : “चांगल्या कामासाठी निधी संकलन सामाजिक अभिसरणाचा महत्वपूर्ण घटक आहे. संस्थेच्या कार्याला पुढे घेऊन जाणारा हा उपक्रम कृतज्ञता व्यक्त करण्याची संधी देतो. त्यामुळे चांगल्या कामासाठी मदत मागायला कधीही लाजू नका. निर्मळ मनाने मागितलेली मदत सढळ हाताने देणारे दानशूर समाजात आहेत,” असे प्रतिपादन अखिल भारतीय मराठी साहित्य संमेलनाचे माजी अध्यक्ष व संत साहित्याचे अभ्यासक डॉ. सदानंद मोरे यांनी केले.

सामाजिक जाणिवेतून दिवाळी सुटीत आपल्या गावी आणि परिसरात संस्थेसाठी संकलित केलेला निधी विद्यार्थ्यांनी विद्यार्थी साहाय्यक समितीकडे सुपूर्त केला. समितीमधील १३०० विद्यार्थ्यांनी जवळपास २५ लाखांचा निधी संकलित केला आहे. संस्थेच्या आपटे वसतिगृहातील मोडक सभागृहात आयोजित कार्यक्रमात समितीचे कार्यकारी विश्वस्त तुषार रंजनकर, कायम विश्वस्त तुकाराम गायकवाड, सहाय्य संकलन उपसमितीचे अध्यक्ष प्रदीप मांडके, वसतिगृह उपसमिती अध्यक्ष दिनकर वैद्य, मुख्य विकास अधिकारी चंद्रकांत कुलकर्णी व मुख्य कार्यपालन अधिकारी दुर्गेश पवार आदी उपस्थित होते.

डॉ. सदानंद मोरे म्हणाले, “समाज घडवणाऱ्या डेक्कन कॉलेज, गोखले इन्स्टिट्यूट, भारत इतिहास संशोधक मंडळ, भांडारकर इन्स्टिट्यूट याप्रमाणेच विद्यार्थी साहाय्यक समितीचे कार्य आहे. या संस्था महाराष्ट्राचे भूषण आहेत. शिक्षण, संस्कार आणि सामाजिक संवेदनशीलता रुजवण्याचे काम विद्यार्थी साहाय्यक समिती करते आहे. त्यातूनच विद्यार्थ्यांचा सर्वांगीण विकास साधला जातो. महाराष्ट्रातील लोकांमध्ये दानत आहे. चांगल्या कामासाठी लोक सढळ हाताने मदत करतात. आपले काम तेवढ्या तळमळीने आणि प्रामाणिकपणे लोकांपर्यंत पोहोचायला हवे.”

तुषार रंजनकर म्हणाले, “गेल्या ४० वर्षापासून हा उपक्रम सुरू आहे. समितीचे काम गावागावात पोहोचावे, तसेच निधी संकलन व्हावे, या उद्देशाने होणारा हा उपक्रम विद्यार्थ्यांमध्ये सामाजिक जाणीव अधिक दृढ करतो. देणारे हात असंख्य आहेत, आपण त्यांच्यापर्यंत पोहोचण्याची गरज असते.”

प्रदीप मांडके यांनी प्रास्ताविकात सांगितले की, मुलांमध्ये संकलनाचा संस्कार रुजावा, त्यांच्यामध्ये सामाजिक कार्याची भावना निर्माण व्हावी या उद्देशाने हा उपक्रम असतो. प्रत्येकाने किमान वीस लोकांना भेटून प्रत्येकी शंभर रुपये संकलित करावे, असा उद्देश असतो. त्यातून त्यांच्यामध्ये आपल्या संस्थेप्रती आदराची भावना तयार होते, असेही त्यांनी नमूद केले.

सहाय्य संकलनात उल्लेखनीय योगदान देणाऱ्या विद्यार्थ्यांचा व पर्यवेक्षकांचा सन्मान करण्यात आला. विद्यार्थ्यांनी निधी संकलन करताना आलेले अनुभव मांडले. कार्यकर्ते वल्लभ कोल्हटकर यांनी सूत्रसंचालन केले व आभार मानले. समितीचे विश्वस्त, सल्लागार, कर्मचारी आणि विद्यार्थी मोठ्या संख्येने उपस्थित होते.

पुणे- येथील महापालिकेतील घनकचरा व पर्यावरण विभाग यांच्या वतीने ‘नदी महोत्सव २०२५- स्वच्छ नदी, सुंदर पुणे’ अशा कार्यक्रमाचे आयोजन करण्यात आले आहे. नोव्हेंबर महिन्याचा शेवटचा आठवडा हा “RIVER WEEK” तसेच २ डिसेंबर हा “राष्ट्रीय प्रदूषण नियंत्रण दिवस” म्हणून सर्वत्र साजरा केला जातो. या अनुषंगाने पुणे शहरातील मुठा नदीपात्रातील स्वच्छता करणेसाठी “नदी महोत्सव- स्वच्छ नदी, सुंदर पुणे” आयोजित केला आहे.
हा नदी महोत्सव पुणे महानगरपालिका, युवा फॉर अॅक्शन, इकोसन सर्व्हिसेस फाउंडेशन आणि जीवितनदी – लिव्हिंग रिव्हर फाउंडेशन व इतर स्वयंसेवी संस्थांच्या सहकार्याने रविवार दि. ३० नोव्हेंबर २०२५ रोजी सकाळी ७.०० ते १०.०० भिडे पूलापासून ते म्हात्रे पूल पर्यंत स्वच्छता मोहीमद्वारे साजरा करण्यात येणार आहे.
या महोत्सवात नदी स्वच्छता मोहिम, पथनाट्य, ड्रम-सर्कल्स यांसारखे जनजागृती कार्यक्रम, पर्यावरण विषयक जनजागृती स्टॉल्स असणार आहेत. पर्यावरणीय बांधिलकीला बळकटी देण्यासाठी यामध्ये नागरिक, विद्यार्थी व स्वयंसेवक यांचा सहभाग मोठ्या प्रमाणावर असणे आवश्यक आहे.
या कार्यक्रमास पुणे महापालिकेचे आयुक्त नवल किशोर राम, पुणे जिल्ह्याचे जिल्हाधिकारी जितेंद्र हुडी, आणि पुणे शहराचे पोलिस आयुक्त अमितेश कुमार इ. मान्यवर उपस्थित राहणार आहेत.
या उपक्रमामध्ये सहभाग नोंदवण्यासाठी नोंदणी लिंक: https://forms.gle/vu4Ch33pn3Q7vinH7
उपक्रमामध्ये सहभाग मोफत असून सहभागींकरिता माहिती खालीलप्रमाणे:-
सदरची स्वच्छता मोहीम भिडे पुल ते म्हात्रे पुल या नदीपात्र रस्त्यावरील नदीपट्ट्यावर आयोजित केली जाणार आहे, संपूर्ण नदीपट्टा ६ विभागामध्ये विभाजित केला आहे या ठिकाणी पोहचण्यासाठी २ प्रवेशद्वारे आहेत.
झोन १, २ आणि ३ बाबा भिडे पूल
झोन ४, ५ आणि ६ खुडे पथ येथून नदीपात्र रस्त्यावर प्रवेश
सहभागींनी त्यांच्या नेमून दिलेल्या झोनमध्ये नदीकाठ स्वच्छ करावा.
प्रत्येक झोनमध्ये सहभागींसाठी हातमोजे आणि मास्क उपलब्ध करून दिले जातील
बॅरिकेड केलेल्या भागात किंवा नदीमध्ये उतरू नये, सहभागीनी बंद बूट परिधान करावेत.
कार्यक्रमादरम्यान रोपे वाटप करण्यात येतील.
तरी या अनोख्या कार्यक्रमात नागरिकांनी उत्साहवर्धक वातवरणात श्रमदान करून, नदी महोत्सव २०२५-स्वच्छ नदी, सुंदर पुणे यामध्ये सहभागी व्हावे असे आवाहन पुणे महापालिकेतर्फे करण्यात आले आहे.

बेकायदेशीर रस्ते खोदाई करणाऱ्या ठेकेदारावर फौजदारी कारवाई करा ..टाळाटाळ का आणि कशासाठी ?

पुणे- एकीकडे नगर अभियंता पदासाठी देव पाण्यात बुडवून ठेवलेले महापालिकेतील पथ विभाग प्रमुख अनिरुद्ध पावसकर सोशल मीडियामध्ये रोज शक्तिमान चहाचा आस्वाद घेताना दिसत असले, तरी दुसरीकडे मात्र ते बेकायदेशीर पणे रस्ते खोदणाऱ्या किरकोळ किरकोळ ठेकेद्रांना सुद्धा घाबरत असल्याचे आरोप आता होताना दिसत आहेत याच पार्श्वभूमीवर आज शिवसेनेचे पुणे शहरप्रमुख संजय मोरे, गजानन थरकुडे, राजेंद्र शिंदे, मकरंद पेठकर, अशोक हरणावळ,उपशहरप्रमुख प्रशांत राणे, आबा निकम, पराग थोरात, अनंत घरत, युवासेना शहर अधिकारी राम थरकुडे, सोहम जाधव, परेश खांडके, हेमंत यादव, संतोष तोडे, राजेश मोरे, जुबेर शेख, अनिल दामजी, गौरव गायकवाड, अभिषेक जगताप, आतिष अनारसे, सचिन घोलप, प्रतिक आल्हाट, दिलीप पोमण, गणेश घोलप, निलेश वाघमारे, सुरज खंडाळे, संजय साळवी यांनी पावसकर यांना घेराव घालून बेकायदेशीर रस्ते खोदाई करणाऱ्या ठेकेदारावर फौजदारी कारवाई करा ..टाळाटाळ का आणि कशासाठी ? असे सवाल करत भांडून सोडले . आणि नंतर लेखी निवेदन दिले.

या संदर्भात संजय मोरे यांनी सांगितले कि,’ दिवाळीच्या आधीपासून सुरू झालेली रस्तेखोदाई अजून पर्यंत मनमानी पद्धतीने चालूच आहे. तसेच ज्या ठिकाणी रस्ते खोदलेले आहेत त्या ठिकाणी फक्त राडाराडा टाकून खड्डे झाकण्यात आलेले आहेत. काही ठिकाणी राडारोडा असाच पडलेला आहे.आपणास वारंवार आमच्या युवासेने मार्फत पत्र देऊन फोटो दाखवून व्हाट्सअप वर व्हिडिओ पाठवून याबाबत कल्पना देण्यात आलेली आहे. परंतु आपणा कडून कोणत्याही पद्धतीची ठेकेदारावर जरब बसेल अशी कारवाई करण्यात आलेली नाही. त्यामुळे निष्क्रिय पथविभागाचा निषेध करण्यासाठी आज आम्ही हे पत्र आपणांस देत आहोत. आज फक्त आपणास घेराव घालून पुणे शहरातील रस्त्यांच्या बेकार अवस्थेच्या फोटोंची माळ आणून तशी जाणीव करून दिली आहे. रस्ते सुधारणांबाबत आपल्या खात्यामार्फत योग्य ती कार्यवाही करावी. तसेच कामचुकार ठेकेदारांना काळ्या यादीत टाकण्यात यावे. व त्यांच्यावर महानगरपालिकेची फसवणूक केल्याबद्दल गुन्हा दाखल करण्यात यावा. अन्यथा पुणेकरांच्या प्रश्नाबाबत आपले खाते उदासीन असल्याबाबत नागरिकांसाठी उग्र आंदोलन करण्यात येईल, याची नोंद घ्यावी.

पुणे महानगरपालिकेला रस्त्याच्या झालेल्या दुरावस्था कामाबाबत कोणताही भुर्दंड नको अशी आमची भूमिका आहे. महानगरपालिका प्रशासनाला झालेल्या त्रासाबद्दल व पुणेकर नागरिकांना होत असलेल्या त्रासाबाबत या ठेकेदारांवर फौजदारी गुन्हा दाखल करण्यात यावा अशी मागणी घेराव घालून पत्र देउन पथ विभागाचे प्रमुख अनिरूध्द पावस्कर यांच्याकडे करण्यात आली. त्यानुसार पावसकर यांनी ठेकेदेरांना खोदलेला रस्ता व्यवस्थित करण्याचे आदेश पारीत केले.

पुणे : ‘विद्येचे माहेरघर असलेले पुणे हे बुद्धिवंतांचे शहर असून, राज्याची सांस्कृतिक राजधानी आहे. पुण्यनगरीच्या या वैभवात पुणे पुस्तक महोत्सव भर घालत असून, वाचन संस्कृती बळकट करत आहे. या महोत्सवाची ख्याती आता दिल्लीतही पोहोचली आहे. पुणेकरांच्या उत्साहामुळे या महोत्सवाची व्यापकता व भव्यता वाढत असून, यंदाही हा महोत्सव नवा विक्रम प्रस्थापित करेल,’ असा विश्वास केंद्रीय नागरी हवाई वाहतूक आणि सहकार राज्यमंत्री मुरलीधर मोहोळ यांनी बुधवारी व्यक्त केला.

राष्ट्रीय पुस्तक न्यासतर्फे आयोजित पुणे पुस्तक महोत्सव १३ ते २१ डिसेंबर या कालावधीत फर्ग्युसन महाविद्यालयाच्या मैदानावर होणार आहे. त्या निमित्ताने संविधान दिनाचे औचित्य साधत यंदाच्या तिसऱ्या पुणे पुस्तक महोत्सव कार्यालयाचे उदघाटन केंद्रीय राज्यमंत्री मोहोळ यांच्या हस्ते करण्यात आले. फर्ग्युसन महाविद्यालयाच्या ग्रंथालयाच्या प्रांगणात झालेल्या या सोहळ्याला उच्च व तंत्र शिक्षणमंत्री चंद्रकांत पाटील, ज्येष्ठ संपादक व लेखक अरुण खोरे, ज्येष्ठ साहित्यिका व माजी अखिल भारतीय मराठी साहित्य संमेलन अध्यक्षा डॉ. अरुणा ढेरे, पुणे पुस्तक महोत्सवाचे प्रमुख संयोजक राजेश पांडे, डेक्कन एज्युकेशन सोसायटीचे अध्यक्ष प्रमोद रावत, लोकमान्य सोसायटीचे संस्थापक-अध्यक्ष डॉ. किरण ठाकूर, सावित्रीबाई फुले पुणे विद्यापीठाचे कुलगुरू डॉ. सुरेश गोसावी, प्र-कुलगुरू डॉ. पराग काळकर, महोत्सव संयोजक प्रसेनजित फडणवीस आणि आनंद काटीकर, तसेच बागेश्री मंठाळकर व डॉ. संजय चाकणे आदी मान्यवर उपस्थित होते.

‘मोबाइल आणि समाजमाध्यमांच्या काळात पुणे पुस्तक महोत्सवातून पुस्तक वाचनाबाबतची जागृती होत आहे. ‘पुणेकर वाचत आहेत,’ या उपक्रमातून वाचन चळवळीला नवे बळ मिळत आहे. या महोत्सवाचा प्रतिसाद वर्षागणिक वाढत आहे. त्यामुळे हा महोत्सव राष्ट्रीय स्तरावर प्रसिद्ध पावला असून, संसदेच्या अधिवेशनातही त्याची चर्चा होत आहे,’ असेही मोहोळ यांनी अभिमानाने सांगितले.

चंद्रकांत पाटील म्हणाले, ‘पुस्तकांची जादू वेगळीच असून, ती सर्वसामान्यांच्या जीवनाला प्रेरणा व दिशा देतात. पुस्तकांची ही ताकद पुणे पुस्तक महोत्सव अधोरेखित करते. युनेस्कोच्या ‘जागतिक पुस्तक राजधानी’ दर्जासाठी पुणे शहराला नामांकन मिळाले असून, त्यासाठी यंदाचा पुणे पुस्तक महोत्सव अतिशय महत्त्वाचा आहे.’

संविधान दिनी पुणे पुस्तक महोत्सवाच्या कार्यालयाचे उदघाटन होत असल्याचा आनंद व्यक्त करत डॉ. अरुण खोरे यांनी राज्यघटनेचे शिल्पकार डॉ. बाबासाहेब आंबेडकर, राज्याचे पहिले मुख्यमंत्री यशवंतराव चव्हाण आणि थोर साहित्यिक-संशोधक डॉ. रा. चिं. ढेरे यांच्या पुस्तक प्रेमाच्या आठवणी सांगितल्या. ‘या पुणे महोत्सवाने सर्वसामान्यांना पुस्तकांच्या ज्ञानसागरात विहार करण्याचा आनंद दिला असून, तो अधिक वृद्धिंगत व्हावा,’ अशी अपेक्षा त्यांनी व्यक्त केली. ‘पुणे पुस्तक महोत्सवातून ‘वाचणारा माणूस’ घडावा,’ असे डॉ. अरुणा ढेरे म्हणाल्या.

पुणे पुस्तक महोत्सवाचे प्रमुख संयोजक राजेश पांडे यांनी महोत्सवाच्या आगामी उपक्रमांची माहिती दिली. ‘डॉ. आंबेडकर यांना पुस्तक वाचनाची प्रचंड आवड होती. संविधान हे आपल्या सर्वांचे आदर्श आहे. त्यामुळे संविधान दिनानिमित्त राज्यघटनेचे पूजन करून पुस्तक महोत्सवाच्या कार्यालयाचे उदघाटन करत आहोत. राज्यघटनेला ७५ वर्षे पूर्ण झाल्यानिमित्त गत वर्षीच्या पुणे पुस्तक महोत्सवात ९७ हजार पुस्तकांच्या साह्याने संविधानाचे मुखपृष्ठ साकारण्याचा विश्वविक्रम करण्यात आला. यंदाच्या पुणे पुस्तक महोत्सवाला प्रचंड प्रतिसाद मिळत असून, एक हजार पुस्तकांचे स्टॉल आरक्षित झाले आहेत. पुणेकरांनी या वाचन चळवळीला अधिक बळकट करावे,’ असे आवाहन त्यांनी केले. तत्पूर्वी, संविधानाच्या प्रतिमेचे पूजन आणि उद्देशिकेचे वाचन करण्यात आले. संयोजक आनंद काटीकर यांनी प्रास्ताविक केले. मिलिंद कुलकर्णी यांनी सूत्रसंचालन केले. सुनील भणगे यांनी आभार मानले.

पुणे २७ नोव्हेंबर : प्रोग्रेसिव्ह कौन्सिल ऑफ कॉमर्स अँड इंडस्ट्री (पीसीसीआय) यांच्या वतीने भारत-जपान बिझनेस मीटचे आयोजन शनिवार, २९ नोव्हेंबर रोजी दुपारी ३.३० ते रात्री १०.०० वाजेपर्यंत पुण्यातील क्राउन प्लाझा येथे करण्यात येणार आहे. तसेच यावेळी उद्योन्मुख उद्योजकांसाठी प्रोग्रेसिव्ह कौन्सिल ऑफ कॉमर्स अँड इंडस्ट्रीज (पीसीसीआय)चा शुभारंभ ही करण्यात येईल. अशी माहिती पीसीसीआयचे अध्यक्ष, लॉर्ड बुद्धा फायनान्स लिमिटेडचे व्यवस्थापकीय संचालक आणि एम्पेरिया बिल्टकॉन चे व्यवस्थापकीय भागीदार डॉ. भगवान गवई यांनी पत्रकार परिषदेत दिली.

यावेळी पीसीसीआयचे संचालक आणि क्रिपॉन एज्युटेक प्रायव्हेट लिमिटेड, पुणे चे संस्थापक आणि सीईओ प्रा. दीपक बागडे, एलबीएमआयएफएल आणि एलबीएफएल आणि पीसीसीआय चे संचालक अ‍ॅड. ओमप्रकाश मौर्य व पीसीसीआय आणि व्यावसायिक महिला, पुणे च्या संचालिका श्रीमती विशाखा गायकवाड उपस्थित होत्या.

या परिषदेला टोकियो येथील व्हानेज लिमिटेडचे सीईओ डॉ. प्रमोद वाहने हे भारत-जपान व्यावसायिक सहकार्यावर मुख्य भाषण देतील. तसेच टोकियो येथील ग्रीन रिन्यूएबल एनर्जी इंकचे सीईओ एन.डोवाकी हे विशेष अतिथि म्हणून उपस्थित राहणार आहेत. १० राज्यातील ४५ जिल्ह्यांमध्ये पसरलेल्या ४५ दिवसीय आर्थिक सशक्तिकरण अभियानाची माहिती ही येथे देण्यात येणार आहे.

ही शिखर परिषद बिल्डिंग ब्रिजेसःइंडिया-जपान बिझनेस कोलॅबोरेशन या थीम वर आधारित असून तंत्रज्ञान, गुंतवणुक आणि नवोन्मेषामध्ये शाश्वत भागीदारी निर्माण करण्यासाठी दोन्ही राष्ट्रांच्या व्यावसायिक नेत्यांना एकत्र आणणार आहे. परिषदेत शाश्वत भागीदारीवर तज्ञ पॅनेलबरोबर चर्चा करण्यात येईल. त्याच प्रमाणे शाश्वत भागीदारीतील दहा उद्योजकांचे स्टार्टअप प्रदर्शन आणि हरित ऊर्जा, आरोग्य सेवा, कौशल्य विकास आणि महिला उद्योजकतेवरील सत्रांचा समावेश आहे.

यावेळी प्रोग्रेसिव्ह कौन्सिल ऑफ कॉमर्स अँड इंडस्ट्री (पीसीसीआय) उदयोन्मुख उद्योजकांसाठी एक व्यासपीठ उपलब्ध करणे, लॉर्ड बुद्धा फायनान्स लिमिटेड (एलबीएफएल) – ग्रामीण आणि अर्ध-शहरी भांडवली गरजा पूर्ण करणारी प्रस्तावित (एनबीएफसी) आणि होम बेठे डिजिटल व्यापार संधीसाठी ई कॉमर्स प्लॅटफॉर्म उपलब्ध करुन देण्यात येणार आहे.

आर्थिक सशक्तिकरण अभियानाचे शिल्पकार डॉ. भगवान गवई यांनी सांगितले की, ही शिखर परिषद भागीदारी निर्माण करणाच्या आमच्या वचनबद्धतेचे प्रतिनिधित्व करते. जपानी तांत्रिक उत्कृष्टता ही भारतीय उद्योजकीय उर्जेला पूरक आहे. तसेच आर्थिक सक्षमीकरणासाठी सर्व समावेशक भविष्य निर्माण करण्याचा प्रयत्न करणार आहे. हा उपक्रम सर्व क्षेत्रांमध्ये आणि समुदायांमध्ये आर्थिक संधींचे लोकशाहीकरण करण्याच्या भारताच्या दृष्टीकोनासह सतत सुधारणा करण्याच्या जपानच्या कैझेन तत्वज्ञानाशी सुसंगत आहे.