पुणे-सिंधू सेवा दलाच्यावतीने रुग्णांसाठी रुग्णपयोगी साहित्य भेट देण्याचा उपक्रमाचे उदघाटन प्रसिध्द अस्थिरोग तज्ञ डॉ. बलदेव दुधानी यांच्याहस्ते करण्यात आले .भवानी पेठमधील  पदमजी कंपाउंड येथील सिंधू सेवा दलाच्या कार्यालयात झालेल्या या कार्यक्रमास सिंधू सेवा दलाचे अध्यक्ष दीपक वाधवानी , उपाध्यक्ष अशोक वासवानी , सचिव सचिन तलरेजा , खजिनदार पुरुषोत्तम परियानी, सहसचिव परमानंद भटिजा , सदस्य पीटर दलवानी , रमेश लालचंदानी , रमेश छाब्रिया , सुरेश फेरवानी , मनोहर फेरवानी आदी मान्यवर उपस्थित होते .

या उपक्रमामध्ये रुग्णांना व्हीलचेअर , वॉकर , काठी , बेड पॅन , वॉटर बेड , युरीन पॉट ,बेडशीट व  गादी देण्यात येणार आहे . ज्यांना हे रुग्णपयोगी साहित्य हवे असल्यांस त्यांनी .भवानी पेठमधील  पदमजी कंपाउंड येथील सिंधू सेवा दलाच्या कार्यालयात येऊन कार्यालयीन सचिव वर्षा मोहीनानी मोबाइल ९०४९४६४१५१ कार्यालयीन दूरध्वनी – ०२० – २६३३३१५६ यावर संपर्क साधून या उपक्रमाचा लाभ घ्यावा असे आवाहन केले .

यावेळी प्रसिध्द अस्थिरोग तज्ञ डॉ. बलदेव दुधानी  यांनी सांगितले कि , सिंधू सेवा दल समाजपयोगी कार्य करीत आहे . रुग्णांसाठी  रुग्णपयोगी साहित्य भेट देण्याचा उपक्रम कौतुकास्पद आहे . याचा लाभ रुग्णांनी जरूर घ्यावा असे आवाहन त्यांनी केले .

या कार्यक्रमात उपस्थितांचे स्वागत व कार्यक्रमाचे प्रास्तविक सिंधू सेवा दलाचे अध्यक्ष दीपक वाधवानी यांनी केले तर सूत्रसंचालन दीपक वाधवानी यांनी केले तर आभार रमेश लालचंदानी यांनी मानले . 

पुणे: फुरसुंगी, उरूळी देवाची येथील कचरा डेपो ३१ डिसेंबर २०१९ पर्यंत असेल ,त्यानंतर मात्र हे कचरा डेपो  पुर्णपणे बंद करणारच  असे जलसंपदा राज्यमंत्री विजय शिवतारे यांनी महापालिकेत पत्रकारपरिषद घेवून स्पष्ट केले .कचरा डेपोत ज्यांच्या जमिनी गेल्या त्यांच्या वारसांना महापालिकेत येत्या दोन महिन्यात नोकरी देण्यात येईल याबाबत हि  आज महापालिकेत झालेल्या बैठकीत निर्णय घेण्यात आला असे ते म्हणाले .
यावेळी अतिरिक्त आयुक्त राजेंद्र निंबाळकर, घनकचरा व्यवस्थापन विभागाचे सहआयुक्त सुरेश जगताप, शिवसेनेचे गटनेते संजय भोसले, तसेच अन्य अधिकारी व फुरसुंगी, उरूळी देवाची येथील प्रमुख ग्रामस्थ, विसर्जीत ग्रामपंचायतीचे पदाधिकारी आदी बैठकीला उपस्थित होते. शिवतारे यांनी बैठकीतील निर्णयांची माहिती पत्रकारांना  दिली.
कचरा डेपो ३१ डिसेंबर २०१९ अखेर पुर्णपणे बंद करण्याबाबत आयुक्तांनी आश्वासन दिले आहे, असे त्यांनी सांगितले. सध्या या जागेवर १ हजार मेट्रीक टन कचरा रोज येत असतो. त्यातील ५०० मेट्रीक टन करता त्वरीत कमी करण्यात येणार आहे. समाविष्ट गावांमधील ५ गावांमध्ये प्रत्येकी १०० टनांचे प्रक्रिया प्रकल्प सुरू करून तिथे हा कचरा जिरवला जाईल. उर्वरित ५०० टन कचरा कमीकमी करत डिसेंबर अखेर डेपोत कचरा आणण्याचे पुर्णपणे थांबवले जाईल. यासाठीचे वेळापत्रकच आयुक्तांनी बैठकीत सादर केले असून त्याप्रमाणे काम केले जाईल असे शिवतारे म्हणाले.
डेपोत ज्यांच्या जमिनी गेल्या त्यांचे एकूण ५७ वारस आहेत. त्यातील ४० जणांच्या वारसा हक्काबाबत काहीच संदेह नाही. त्यांना त्वरीत महापालिकेच्या सेवेत घेण्यात येईल. उर्वरित १७ जणांनी न्यायालयाकडून तेच वारस असल्याबाबतचे प्रमाणपत्र आणल्यानंतर त्यांनाही सेवेत घेतले जाईल. फुरसुंगी व उरूळी देवाचीसाठी महाराष्ट्र जीवन प्राधिकरण यांच्याकडून ७२ कोटी रूपयांची पाणी योजना राबवली जात आहे. आता ही गावे महापालिकेत आल्यामुळे त्यांना माणसी १५० लिटरप्रमाणे पाणी द्यावे लागणार आहे. त्यासाठी योजनेत काही बदल करावे लागतील. त्याबाबत प्राधिकरण व महापालिका यांच्यातील वरिष्ठ अधिकाऱ्यांनी एकत्रित बैठक घ्यावी व काय बदल करावे लागतील त्याची चर्चा करावी अशी सुचना केली असल्याची माहिती शिवतारे यांनी दिली.
सध्या आलेल्या ११ गावांचा सांडपाणी निर्मुलन आराखडा तयार केला जात आहे. आणखी काही गावे पुढच्या तीन वर्षात महापालिकेत येणार आहे. आराखडा करताना याही गावांना त्यात सहभागी करून घ्यावे असे सांगण्यात आले आहे. काही गावांमध्ये तातडीचे कामे करणे गरजेचे आहे. गंगासागर येथे १६ ते १७ गल्ल्यांमध्ये बिकट स्थिती झाली आहे. तिथे त्वरीत रस्ते करावेत. प्रमुख रस्त्यांच्या कामांच्या निविदा प्रसिद्ध केल्या जातील व पावसाळा संपल्यानंतर कामही सुरू केले जाईल. राज्य सरकारने या गावांसाठी विशेष निधी दिला नाही, मात्र मुख्यमंत्री स्तरावर त्याबाबत चांगला निर्णय होईल अशीअपेक्षाही शिवतारे यांनी व्यक्त केली.

महापालिका  केशवनगर, लोहगाव, सूखसागरनगर व अन्य २ गावांमध्ये प्रत्येकी १०० टन असे एकूण ५०० टन कचऱ्यावर प्रक्रिया करणारे प्रकल्प सुरू करणार आहे. त्या गावांमधून याला विरोध झाला तर असे विचारले असता शिवतारे यांनी महापालिकेने ते पाहून घ्यावे असे सांगितले. फुरसुंगीने २१ वर्षे हा त्रास सहन केला आहे, त्या बदल्यात महापालिकेने तिथे काही विशेष खर्च केलेला नाही. आता या गावांमधूनही महापालिकेला उत्पन्न मिळणार आहे, त्याचा समावेश महापालिकेत झाला आहे, त्यामुळे तिथे विकासाचा समतोल साधला जाईल अशी अपेक्षा शिवतारे यांनी व्यक्त केली.

पुणे-प्रेम हाच जीवनातील महामंत्र आहे. गायत्री, णमोकार यांसारख्या महामंत्रामधून जर प्रेम काढून टाकले, तर त्या मंत्रांचे महात्म्य कमी होते. हे प्रेम वासनाविरहित, मोहरहित असावे. एकत्र भोजन केल्याने कुटुंबातील प्रेम वाढते आणि समाजात प्रेम टिकवायचे असेल तर सामुहिक भजन करावे. घरात प्रेम टिकवायचे असेल तर गुरूंचा आदर, वाणीत सभ्यता आणि कुटुबीयांमध्ये प्रेम असावे, असा गुरूमंत्र मुनिश्री प.पु.108 पुलकसागर महाराज यांनी शनिवारी दिला. तसेच ज्या घरात या तिन्ही गोष्टी असतात, त्या घरात लक्ष्मीचा वास असतो. हल्ली माणसांपेक्षा जास्त प्रेम जनावरांवर केले जाते. प्राण्यांवर प्रेम केलेच पाहिजे, पण ते करताना मनुष्याबाबत तिरस्कार करू नये. बहुतांश लोक मी का आधी बोलू? या विचाराने आपण आपली भांडणे संपविण्याचा प्रयत्न करत नाही. जग अतिशय सुंदर आहे, थोडेसे प्रयत्न केले तर वर्षांपासून चालत असलेले तंटे पण लगेच संपुष्टात येतात. मात्र हे प्रयत्न प्रेमपूर्वत असावेत, असेही मुनिश्री यांनी सांगितले.

सकल जैन वर्षा योग समितीतर्फे धर्मानुरागी रसिकलाल एम. धारिवाल नगरी, महालक्ष्मी लॉन्स येथे मुनिश्रींच्या चातुर्मासाचे आयोजन करण्यात आले आहे. यानिमित्त आयोजित ज्ञानगंगा महोत्सवात मुनिश्रींचे प्रवचन होते. प्रवचनाचे सातवे पुष्प गुंफताना ‘प्रेम’ या विषयावर ते बोलत होते. यावेळी समितीच्या अध्यक्षा शोभा धारिवाल, कार्याध्यक्ष मिलिंद फडे, ऍस्पायर नॉलेज अ‍ॅन्ड स्किल्स् प्रा.लि.चे अध्यक्ष व व्यवस्थापकीय संचालक संजय गांधी, पुढारी वृत्तपत्राचे बिझनेस संपादक अनिल टाकळकर, समितीच्या उपाध्यक्षा सुजाता शहा, अजित पाटील, विरकुमार शहा हे मंचावर उपस्थित होते. कार्यक्रमाची सुरूवातीस सुरगुंडा पाटील आणि परिवार यांच्या हस्ते कलशस्थापना करण्यात आली. यानंतर ज्योती दोशी आणि परिवारातर्फे मुनिश्रींचे पादप्रक्षालन करण्यात आले. यावेळी गंधारी कोठाडिया व आनंदी शाह यांनी मुनिश्रींना शास्त्र भेट दिली. पुण्याच्या हिया मेहता या मुलीने ’आई’ वरील गाणे सादर केले तसेच बारामती येथील भक्ती ग्रुपच्या कलाकारांनी मंगलाचरण सादर केले. यानंतर मान्यवरांच्या हस्ते दीपप्रज्वलन करण्यात आले.

यावेळी ऍस्पायर नॉलेज अ‍ॅन्ड स्किल्स् प्रा.लि.चे अध्यक्ष व व्यवस्थापकीय संचालक संजय गांधी यांनी उपस्थितांना कौशल्य विकासाचे महत्व याबाबत मार्गदर्शन केले. आपल्याकडे रोजगाराच्या संधी मोठ्या प्रमाणात उपलब्ध आहेत. मात्र त्यासाठी आवश्यक कौशल्य आपण आत्मसात केले पाहिजे. यामध्ये परकीय भाषेचा विशेषत: पुण्यामध्ये जपानी भाषेचा समावेश होतो. पुणे शहराचा आसपास सुमारे 112 जापनीज कंपन्या आहेत. याठिकाणी रोजगाराच्या अनेक संधी उपलब्ध आहेत. जर तुम्ही जपानी भाषा शिकल्यास याठिकाणी काम करण्याची संधी तुम्हाला मिळू शकेल. याबाबत तुम्हाला मार्गदर्शन करण्यासाठी आमच्या संस्थेचे प्रतिनिधी याठिकाणी उपलब्ध आहेत त्याचा तुम्ही लाभ घ्यावा” असे गांधी यांनी सांगितले.

पुढारी वृत्तपत्राचे बिझनेस संपादक अनिल टाकळकर म्हणाले, माझी सून जैन समुदायातील असून ती समाजातील परंपरा अतिशय भक्तीभावाने निभावते. तिच्या माध्यमातून जैन समाजाशी जुडता आले. मी अध्यात्माचा खूप मोठा अभ्यासक नाही. परंतु आज जर अध्यात्म तुमच्या सोबत नसेल तर तुमच्या आयुष्यातील गोंधळ वाढतो. मुनिश्रींसारखे अध्यात्मिक मार्गदर्शक तुमच्या सोबत असतील तर हा गोंधळ कमी होण्यास मदत मिळते. चातुर्मासानिमित्त मुनिश्रींचे विचार ऐकायला मिळण्याचे भाग्य पुणेकरांना मिळत आहे, ही अतिशय आनंदाची बाब आहे.

रविवारी दि. 19 ऑगस्ट रोजी सकाळी 8.30 वाजता ‘बेटी बचाव’ विषयावर मुनिश्रींचे प्रवचन होईल. तसेच दुपारी 3 वाजता ‘भक्तंबर स्तोत्राची महती’ या विषयावर सुजाता फुलफगर यांचे मार्गदर्शन करणारे व्याख्यान होईल. हा ज्ञानगंगा महोत्सव तीन सप्टेंबरपर्यंत दररोज सकाळी 8.30 ते 10 यावेळेत धर्मानुरागी रसिकलाल एम. धारिवाल नगरी, महालक्ष्मी लॉन्स येथे होणार आहे.

मुनिश्रींच्या चातुर्मासानिमित्त रसिकलाल एम. धारिवाल फाउंडेशनतर्फे 3 सप्टेंबरपर्यंत रक्तदान महायज्ञ आयोजित करण्यात आला आहे. त्यासाठी सर्व सुविधांनी परिपूर्ण अशी मोठी धारिवाल फाउंडेशनची बसही येथे उपलब्ध करण्यात आली आहे. तसेच महिलांसाठी हाडांची ठिसूळता तपासणीसोबतच कॅन्सर डिटेक्शन चाचणीची सोय देखील येथे उपलब्ध करून देण्यात आली. गेल्या 3 दिवसात एकून 550 स्त्री-पुरूषांनी हाडाच्या ठिसूळपणाची तपासणी करून घेतली. तसेच आज महिलांच्या कॅन्सर निदान तपासणी शिबीरात 102 महिलांनी सहभाग घेतला. दि. 19 रोजी देखील हे महिलांसाठी कॅन्सर निदान तपासणी शिबीर संपन्न होणार आहे.