पुणे -पुणे नवरात्रौ महोत्सव या सांस्कृतिक महोत्सवाच्या अंतर्गत संपन्न होणार्‍या पुणे नवरात्रौ महिला महोत्सव यंदा 19वे वर्ष साजरे करीत असून याचे उद्घाटन गुरुवार दि. 11 ऑक्टोबर रोजी सकाळी 11.30 वाजता श्री लक्ष्मीमाता मंदिर प्रांगण, मुक्तांगण शाळेसमोर, वसंतराव बागुल उद्याननजीक, शिवदर्शन, पुणे येथे संपन्न होईल. याचे उद्घाटन पुणे महानगरपालिकेच्या
अतिरिक्त आयुक्त शीतल उगले करणार आहेत. याप्रसंगी विविध क्षेत्रात उत्तुंग कामगिरी करणार्‍या महिलांना’तेजस्विनी’ पुरस्कार देऊन गौरवले जाणार आहे. ‘माहेर’ मासिकाच्या कार्यकारी संपादिका सुजाता देशमुख, महाराष्ट्र आर्थिक विकास महामंडळाच्या उपाध्यक्षा मीनल मोहाडीकर आणि भोर येथील राज्य शासनाच्या उपजिल्हा रुग्णालयात शवविच्छेदनाचे काम
करणार्‍या शीतल चव्हाण यंदाच्या ‘तेजस्विनी’पुरस्काराच्या मानकरी आहेत. 5000/- रुपये रोख, स्मृतीचिन्ह, शाल व श्रीफळ असे पुरस्काराचे स्वरूप आहे अशी माहिती पुणे नवरात्रौ महिला महोत्सवाच्या अध्यक्षा सौ. जयश्री बागुल यांनी दिली.
पुणे नवरात्रौ महिला महोत्सवात भाग्यलक्ष्मी स्पर्धा व लकी ड्रॉ यांचे आयोजन करण्यात आले असून स्पर्धेतील विजेत्यांना मोठी बक्षिसे दिली जातील. महिला महोत्सवाच्या उद्घाटन व पुरस्कार वितरण सोहळ्यानंतर होम मिनिस्टर स्पर्धेचे आयोजन करण्यात आले आहे. शुक्रवार दि.12 रोजी सकाळी 10 वाजता कन्यापूजन, दि. 13 रोजी इयत्ता 1 ली ते 3 री, इयत्ता 4 थी ते 6
वी आणि 7 वी ते 9 वी या वयोगटातील मुलींसाठी सकाळी 9 वाजता चित्रकला स्पर्धा, दि. 14 रोजी सकाळी 10 वाजता 8 ते 12 वर्षे व 13 ते 20 वर्षे वयोगटातील मुलींसाठी नृत्य स्पर्धां, दि. 15 रोजी सायंकाळी 6 वाजता महिलांची महाआरती आणि दि. 16 रोजी महिलांचे श्री सुक्तपठण संपन्न होईल. कन्यापूजन व महाआरतीसाठी नाव नोंदणी आवश्यक असल्याचे अध्यक्षा सौ.
जयश्री बागुल यांनी सांगितले.
यंदाच्या ‘तेजस्विनी’ पुरस्काराच्या मानकरी असणार्‍या सुजाता देशमुख या ‘मेनका प्रकाशनामध्ये ग्रंथसंपादक असून माहेर मासिकाच्या कार्यकारी संपादक आहेत. नुकताच साहित्य अकादमीचा पुरस्कार त्यांना मिळाला आहे. आत्तापर्यंत त्यांनी 12 पुस्तके संपादित केली असून यापूर्वी पुण्यातील विविध वृत्तपत्रे व वृत्त एजन्सीमध्ये पत्रकार म्हणून त्यांनी काम केले आहे.’मंथन’या बेळगाव इथल्या संस्थेने आयोजित केलेल्या 21व्या मराठी महिला साहित्य संमेलनाचे
अध्यक्षपदही त्यांनी भूषवले आहे.
मीनल मोहाडीकर महिला उद्योजकांना मार्गदर्शन व योग्य दिशा दाखवण्याचे कार्य आम्ही उद्योगिनी प्रतिष्ठान’तर्फे दीर्घकाळ करीत आहेत.’महाराष्ट्र चेंबर ऑफ कॉमर्स इंडस्ट्रीज अ‍ॅन्ड अ‍ॅग्रीकल्चर’च्या त्या माजी अध्यक्ष असून महाराष्ट्र आर्थिक विकास महामंडळाच्या त्या उपाध्यक्ष
आहेत. महाराष्ट्र, कर्नाटक, गोवा येथे ‘कन्झ्युमर शॉपी’ व फेस्टिव्हल शॉपी या नावाने नियमित प्रदर्शने त्या आयोजित करतात. खाद्य पदार्थ वितरक संस्था ‘स्वरूप एजन्सी’च्या त्या संचालक आहेत.
भोर येथील शीतल चव्हाण या राज्य शासनाच्या उपजिल्हा रुग्णालयात शवविच्छेदनाचे काम करतात. तेथे सफाई कामगार म्हणून काम करणारी ही तरुण मुलगी फार आधीपासून शवविच्छेदन कामात जबाबदारी घेऊन शवविच्छेदन करते. आतापर्यंत शेकडो मृतदेहांचे तिने शवविच्छेदन केले असून एवढ्या लहान वयात शवविच्छेदनाची जबाबदारी पार पाडणारी महाराष्ट्रातील ही पहिलीच मुलगी असावी.
पुणे नवरात्रौ महिला महोत्सवाच्या दि. 11 ऑक्टोबरच्या उद्घाटन सोहोळ्यात या 3कर्तबगार महिलांना ‘तेजस्विनी’ पुरस्कार 5000/- रु. रोख, स्मृती चिन्ह, शाल श्रीफळ देऊन गौरवले जाणार आहे असे सौ. जयश्री बागुल यांनी सांगितले.

पुणे :’गांधीना मारल्यानंतरही त्यांचा, त्यांच्या विचारांचा भारतात निरंतर शोध सुरु आहे. त्यांनी राजकारणाला रणभूमी न करता नैतिकतेचे आंदोलन केले, भवतालच्या प्रत्येक समस्येला त्यांनी मानवतेचे कोंदण दिले ‘ , असे प्रतिपादन दिल्ली विश्वविद्यापीठातील प्राध्यापक अपूर्वानंद झा यांनी केले.

महाराष्ट्र गांधी स्मारक निधी आयोजित ‘ राष्ट्रपिता महात्मा गांधी सप्ताह ‘ निमित्त प्रा. अपूर्वानंद झा (प्राध्यापक, दिल्ली विश्वविद्यापीठ) यांनी ‘गांधी की खोज’ विषयावर व्याख्यान दिले.

हा कार्यक्रम शनिवारी सायंकाळी
महाराष्ट्र गांधी स्मारक निधी येथे झाला.

यावेळी व्यासपीठावर अन्वर राजन, संदीप बर्वे, मयुरी शिंदे, अप्पा अनारसे उपस्थित होते.

प्रा.अपूर्वानंद म्हणाले, ‘ महात्मा गांधी ही भारतीय दंतकथा आहे. त्यांना आपण महात्मा समजत असलो तरी एक राजकीय व्यक्ती म्हणून त्यांच्याकडे पाहायला हवे. त्यांनी राजकारणाला रणभूमी न करता नैतिकतेचे आंदोलन केले.
गांधीजींनी भारतीय स्वातंत्र्यासाठी भारतीयांना जागे केलेच पण भारतीय स्वातंत्र्यलढयाला आंतरराष्ट्रीय स्तरावर मानवतेचा लढा असे स्वरुप दिले.

अस्पृश्यता विरोध, न्यायाचा शोध, हिंदू – मुस्लीम एकता हे त्यांच्या जगण्याचे महत्वाचे अंग होते. भवतालच्या प्रत्येक समस्येला ते मानवतेचे कोंदण देत होते. प्रत्येक वेळी ते
अंतरात्म्याचा आवाज ऐकत होते.

भारतीय नागरिक,अनुयायी,सहकाऱ्यांकडूनही ते कठोर योगदानाची अपेक्षा करीत. गांधीजींच्या स्वप्नात एक भारत होता, त्या भारताचा ते सतत शोध घेत होते.

अहिंसा ही रणनीती न मानता नीति म्हणून अंगीकारावी असा त्यांचा आग्रह होता.
गांधींजींनी स्वतःसाठी आणि भारतीयांसाठी निवडलेला उच्च नैतिकतेचा मार्ग अत्यंत खडतर होता, हेही त्यांच्या हत्येचे कारण होते का ? असा प्रश्न पडतो. सवर्णांचा क्रोध हेही त्यांच्या हत्येला कारणीभूत ठरले.

गांधीजींचे जीवन ही प्रयोगांची साखळी आहे. त्यात यश -अपयशाच्या पलिकडे बरेच काही आहे. गांधींचे अपयश हे त्यांची हाक न ऐकणाऱ्यांचेही अपयश आहे. गांधींचे अपयश आपले अपयश न मानणे , ही आत्मवंचना ठरेल, असेही प्रा. अपूर्वानंद यांनी शेवटी सांगीतले.

पुणे : “बांधकाम, इन्फ्रास्ट्रक्चर उद्योगात नोकरीच्या मोठ्या संधी उपलब्ध आहेत. परंतु, त्यासाठी केवळ अभियांत्रिकीची पदवी पुरेशी नाही. पदवीसोबतच विद्यार्थ्यांनी इतर कौशल्य आत्मसात करणे ही आजची गरज आहे. कारण उद्योगक्षेत्राकडून कुशल मनुष्यबळाची मागणी केली जात आहे,” असे मत नॅशनल इन्स्टिट्यूट ऑफ कन्स्ट्रक्शन मॅनेजमेंट अँड रिसर्चच्या (एनआयसीएमएआर) ‘प्लेसमेंट अँड इंडस्ट्री रिलेशन विभागाचे अधिष्ठाता डॉ. विश्वनाथ लेले यांनी व्यक्त केले.

वाघोली येथील जीएच रायसोनी इन्स्टिट्यूट ऑफ इंजिनिअरिंग अँड टेक्नॉलॉजीच्या स्थापत्य अभियांत्रिकी विभागातर्फे ‘बांधकाम व इन्फ्रास्ट्रक्चर क्षेत्रातील नोकरीच्या संधी’ या विषयावर आयोजित एक दिवसाच्या सेमिनारमध्ये डॉ. लेले बोलत होते. याप्रसंगी ‘एनआयसीएमएआर’चे अधिष्ठाता डॉ. चंद्रकांत गोखले, डॉ. जोनार्दन कोनेर, महाविद्यालयाचे प्राचार्य डॉ. आर. डी. खराडकर, विभागप्रमुख प्रा. एस. जी. बन, प्रा. एस. व्ही. जोशी यांच्यासह इतर मान्यवर उपस्थित होते.

डॉ. चंद्रकांत गोखले म्हणाले, “पायाभूत सुविधा उभारणीचे काम जोमाने चालू आहे. बांधकाम क्षेत्रालाही चांगले दिवस येत आहेत. त्यामुळे या क्षेत्रात मोठ्या संधी आहेत. त्याचा लाभ घेण्यासाठी संबंधित विषयात आपली निपुणता असली पाहिजे.” डॉ. जोनार्दन कोनेर यांनीही विद्यार्थ्यांना मार्गदर्शन केले. उपप्राचार्य डॉ. एन. यू. कोरडे यांनी प्रास्ताविक केले. प्रा. एस. एस. शिंदे यांनी संयोजन केले व आभार मानले. 

पुणे -शहरातील धोकादायक होर्डींग्ज तातडीने महाप्लीकेने काढून घ्यावेत आणि जुनाबाजार येथील दुर्घटनाग्रस्तांना अगर त्यांच्या नातलगांना रेल्वेने नौकरी द्यावी अशी मागणी काल महापालिकेतील विरोधीपक्षनेते आणि राष्ट्रवादी कॉंग्रेस चे अध्यक्ष चेतन तुपे पाटील यांनी केली .

कॅंटोन्मेंट राष्ट्रवादी युवक कॉंग्रेस च्या वतीने काल पुणे शहरातील शाहीर अमर शेख चौकातील बेकायदा होर्डीगचा सांगाडा कोसळुन चार नागरीकांचा बळी गेला त्या मृत्युमुखी पडलेल्या नागरीकांना राष्ट्रवादी युवक कॉंग्रेस पार्टी पुणे कॅन्टोमेंट मतदार संघाच्या वतीने कॅन्डल लावुन भावपुर्ण श्रद्धांजली वाहण्यात आली. यावेळी रस्त्यावरुन जाणाऱ्या नागरीकांनी याविषयी तीव्र असंताप व्यक्त केला. या होर्डिंग्सचे जे व्यवसायिक आहेत त्यांच्याकडुन मिळणारी मलई खावुन जे अधिकारी अशा धोकादायक होर्डिंग्स ला भरिस त्यांच्यावर सुध्दा कारवाई व्हावी अशी मागणी नागरीक करत होते. राष्ट्रवादी कॉंग्रेस पक्षाचे शहराध्यक्ष चेतन तुपे पाटील यांनी श्रध्दांजली वाहताना यासारखे अनेक धोकादायक होर्डिंग्स पुणे शहरात आहेत त्या सर्व होर्डिंग्सवर लवकरात लवकर कारवाई करण्यात यावी व राज्यात जी होर्डिंग्स पॉलीसी आहे ती पुणे शहरामध्ये राबविण्यात यावी तसेच रेल्वेने जी मदत जाहीर केली आहे त्यापेक्षा त्या कुटुंबातील सदस्याला रेल्वे मध्ये नोकरी देण्यात यावी अशी आग्रही मागणी करण्यात आली. यावेळी नगरसेवक प्रदिप गायकवाड,भोलासिंग अरोरा, राकेश कामठे, फहीम शेख, शशी भिसे, विशाल नाटेकर,गणेश नलावडे,मिनाताई पवार, मेहबुब शेख, अजीम गुडाकुवाला, नितीन राठोड, निखिल बटवाल, राहुल तांबे, माधुरी भांडरकर, गोपी कुवर , संतोष गायकवाड, मंगेश मोरे, दिपक कांबळे, जावेद इनामदार,भारत परदेशी तसेच या भागातील स्थानिक नागरीक उपस्थित होते.

पुणे : “तरुणपिढी स्वैराचारी, सोशल मीडियात गुरफटत असून, वाचनसंस्कृती लोप पावत आहे, असे म्हणणे अयोग्य आहे. तरुणांमध्ये ज्ञानाची भूक मोठी आहे. ही भूक इंटरनेट भागवू शकत नाही. मराठी तरुणाईला वैचारिक वाङ्मय वाचायला आवडते. तसे सकस साहित्य उपलब्ध करून देणे ही आपली जबाबदारी आहे,” असे मत ज्येष्ठ साहित्यिक व विचारवंत डॉ. आ. ह. साळुंखे यांनी व्यक्त केले.

पुण्यातील फर्ग्युसन रस्त्यावर ‘पुस्तकांबरोबर चहा’ या संकल्पनेतून सुरु झालेल्या ‘वर्ड्स अँड सीप्स’ या बुक कॅफेला डॉ. साळुंखे यांनी भेट दिली. त्यावेळी माध्यम प्रतिनिधींनी त्यांच्याशी संवाद साधला. येथे असलेल्या मराठी, हिंदी आणि इंग्रजीतील अनेक गाजलेली दर्जेदार पुस्तके पाहून डॉ. साळुंखे यांनी कौतुक केले. प्रसंगी सनदी अधिकारी धीरज मोरे, ‘वर्ड्स अँड सीप्स’चे एजाज शेख आदी उपस्थित होते.

डॉ. आ. ह. साळुंखे म्हणाले, “पुस्तके आणि चहा असे मिश्रण असलेले ग्रंथालय पहिल्यांदाच पाहिले. सहज चहा घेताना सेल्फमध्ये लावलेल्या पुस्तकांवर नजर पडते आणि पुस्तक वाचण्याची इच्छा होते, असे हे बुक कॅफे आहे. तरुणपिढीला वाचायला लावण्याचा हा अनोखा प्रयत्न कौतुकास्पद आहे. व्यासंगी वाचकांसाठी या तरुणांनी साहित्याचा एक खजिना उपलब्ध करून दिला आहे.” एजाज शेख यांनी स्वागत केले.

पुण्यातल्या होर्डिंग दुर्घटने प्रकरणी रेल्वे कर्मचारी पांडुरंग वनारे आणि संजय सिंग या दोघांना अटक करण्यात आली आहे. संजय सिंग हा रेल्वेमध्ये सेक्शन इंजिनिअर आहे तर पांडुरंग वनारे हा रेल्वेमधे लोहार म्हणून काम करतो. हे दोघे होर्डींग काढण्याचे काम करत होते. मात्र होर्डींग वरुन कापण्याऐवजी त्यांनी खालून कापण्यास सुरुवात केली होती. शुक्रवारी दुपारी जुना बाजार येथील मुख्य चौकात होर्डिंगचा लोखंडी सांगाडा कोसळून झालेल्या भीषण अपघातात चार जणांना जीव गमवावा लागला तर सात जण गंभीर जखमी झाले. मध्ये रेल्वेच्या जागेत रस्त्यालगत हे होर्डिंग उभारण्यात आले होते.

दुघर्टनेसाठी ‘रेल्वे’ जबाबदार; जाहिरात कंपनीचा दावा

मध्य रेल्वे प्रशासनाने यासाठी जाहिरात एजन्सीला दोषी ठरवले आहे. परंतु, आता ज्या जाहिरात कंपनीकडे या होर्डिंगचा ठेका होता. त्यांनी मात्र या दुर्घटनेसाठी मध्य रेल्वेच दोषी असल्याचा दावा केला आहे. यासाठी त्यांनी यापूर्वी मध्य रेल्वेशी हे होर्डिंग काढण्यासाठी केलेल्या पत्रव्यवहाराच्या प्रती पुरावा म्हणून सादर केले आहेत. त्यामुळे आता या प्रकरणाला वेगळे वळण लागण्याची शक्यता निर्माण झाली आहे. परंतु, या प्रकारातून मध्य रेल्वे प्रशासनाची अनास्थाही समोर आली आहे.

शुक्रवारी पुण्यातील जुना बाजार मुख्य चौकातील होर्डिंगचा लोखंडी सांगाडा काढताना तो सिग्नलसाठी उभ्या असलेल्या लोकांच्या अंगावर पडला होता. यात चार जणांना नाहक जीव गमवावा लागला होता. या दुर्घटनेनंतर एकमेकांकडे बोट करण्यात आले.
या होर्डिंगचा ठेका कॅप्शन या जाहिरात कंपनीकडे होता. यापूर्वी या कंपनीने अनेकवेळा मध्य रेल्वेच्या अभियंता विभागाला हे होर्डिंग काढण्याबाबत पत्रव्यवहार केला. पण त्यांना रेल्वे प्रशासनाकडून कोणतेच उत्तर देण्यात आले नाही. या अनास्थेमुळे मात्र चार जणांना आपला जीव गमवावा लागला आहे.

दरम्यान, रेल्वे प्रशासनाने या दुर्घटनेतील मृतांच्या नातेवाईकांना प्रत्येकी ५ लाख रुपयांची नुकसान भरपाई देण्याची घोषणा केली आहे. त्याचबरोबर गंभीररित्या जखमींना प्रत्येकी १ लाख रुपये तर किरकोळ जखमी झालेल्यांना ५० हजार रुपयांची मदत जाहीर केली आहे. त्याचबरोबर या घटनेच्या उच्चस्तरीय चौकशीचे आदेशही दिले आहेत