पुणे दि. १९ : जिल्ह्यातील युवक-युवतींना भारतीय सैन्यदल, नौदल व वायुदलामध्ये अधिकारी पदावर भरती होण्यासाठी पात्र होण्याच्यादृष्टीने कंम्बाईन्ड डिफेन्स सिर्व्हिसेस (सीडीएस) या परीक्षेची तयारी करून घेण्यासाठी छात्रपूर्व प्रशिक्षण केंद्र, नाशिक रोड, नाशिक येथे १६ जून २०२५ ते २९ ऑगस्ट २०२५ या कालावधीत मोफत प्रशिक्षण आयोजित करण्यात येत आहे, या संधीचा लाभ घेण्याकरीता जिल्हा सैनिक कार्यालय येथे १२ जून २०२५ रोजी मुलाखतीस उपस्थित राहावे, असे आवाहन करण्यात येत आहे.

मुलाखतीस येतांना सैनिक कल्याण विभागाच्या www.mahasainik.maharashtra.gov.in संकेतस्थळावरील सीडीएस-६५ अभ्यासक्रमाकरीता (संबंधित जिल्हा सैनिक कल्याण कार्यालयाकडील मुद्रित) प्रवेशपत्र व त्यासोबत असलेली परिशिष्टाची तीन मुद्रीत प्रती सोबत घेऊन यावे. इच्छुक उमेदवार हा कोणत्याही शाखेचा पदवीधर असावा. उमेदवार लोकसंघ आयोग नवी दिल्ली यांच्यामार्फत घेण्यात येणाऱ्या सीडीएस (या परीक्षेकरिता ऑनलाईनपद्धतीने अर्ज केलेला असावा.

अधिक माहितीसाठी प्रभारी अधिकारी, छात्रपूर्व प्रशिक्षण केंद्र, नाशिक रोड, नाशिक यांचा ईमेल आय डी training.pctcnashik@gmail.com व दुरध्वनी क्रमांक ०२५३-२४५१०३२ किंवा व्हॉटस्ॲप क्र. ९१५६०७३३०६ (प्रवेशपत्र मिळविण्याकरीता) कार्यालयीन वेळेत प्रत्यक्ष अथवा दूरध्वनीवर संपर्क साधावा, असे आवाहन जिल्हा सैनिक कल्याण अधिकारी लेफ्टनंट कर्नल स. दै. हंगे (निवृत्त) यांनी केले आहे.

शुक्रवार पेठेतील दोनशे वर्षांहून अधिक पुरातन मंदिरात मोगऱ्याची आरास
पुणे : मोगऱ्याची सुवासिक फुले, झेंडूची फुले आणि केळीचे खुंट वापरून सुशोभित करण्यात आलेल्या शुक्रवार पेठेतील दोनशे वर्षांहून अधिक पुरातन असलेल्या श्री उमा महेश्वर मंदिरात वासंतिक चंदन उटी सोहळा आयोजित करण्यात आला. चंदन उटी सोहळ्यासह मुक्त द्वार भंडारा देखील मंदिरात पार पडला.

श्री उमामहेश्वर मंदिर विश्वस्त मंडळ व व्यवस्थापक, आदिमाया प्रतिष्ठान स्वामी भक्त परिवार, नादब्रह्म ढोल ताशा ध्वज पथक ट्रस्ट आणि सर्व वादक मित्रपरिवार यांच्यातर्फे या सोहळ्याचे आयोजन करण्यात आले होते. यावेळी मंदिराला आकर्षक सजावट करण्यात आली होती.

हिंदुस्तान जागरण न्यासाच्या श्री उमामहेश्वर मंदिर विश्वस्त मंडळातील विनायक थोरात, कैलास सोनटक्के, गुरुनाथ शिरोडकर, महेश करपे, अमोल देशपांडे, प्रसाद डोईफोडे, आनंद कुलकर्णी, मंदिर व्यवस्थापक राजेंद्र टिपरे यांसह आदिमाया प्रतिष्ठान आणि नादब्रह्म ढोल ताशा ध्वज पथक ट्रस्ट चे  कमलेश कामठे, आनंद खंडेलवाल, स्वप्निल जोशी, अक्षय ढाकुळ आदी यावेळी उपस्थित होते.

पुणे, दि. १९: दक्षिण मुख्यालयाअंतर्गत आशा शाळेकरीता कंत्राटी तत्वावर मुख्याध्यापक पदासाठी अर्ज मागविण्यात येत असून इच्छुक उमेदवारांनी २६ मे २०२५ अखेर अर्ज सादर करावेत.

अर्जदार प्राधान्याने पदव्युत्तर पदवी, विशेष शिक्षणात पदवीधर आरसीआय नोंदणीकृत असावा. विशेष समावेशक शाळेचे , मुख्यध्यापक , विशेष शिक्षक म्हणून पूर्वीचा अनुभव असल्यास प्राधान्य दिले जाईल. नियुक्तीच्या तारखेला अर्जदाराचे वय ५५ वर्षांपेक्षा कमी असावे.

इच्छुक उमेदवारांनी साध्या कागदावर अनुभवाच्या तपशीलासहित बायोडाटा, अलीकडील पारपत्र आकाराचा फोटो, अनुभव प्रमाणपत्र, प्रशस्ताऐवजांच्या प्रती तसेच संबंधित तपशीलांसह ‘आशा स्कूल, पुणे येथील मुख्याध्यापक पदासाठी अर्ज’ असे लिहिलेल्या सीलबंद लिफाफ्यात नोंदणीकृत किंवा शीघ्रगती टपालाद्वारे (स्पीड पोस्ट) संचालक, आशा शाळा, ८ जिजामाता रोड मुख्यालय दक्षिण महाराष्ट्र आणि गोवा उपक्षेत्र जवळ, पुणे-४११००१ या पत्त्यावर अर्ज सादर करावे. अर्जासोबत सर्व शैक्षणिक पात्रता, गुणपत्रिका, अनुभव, कामगिरी यांच्या साक्षांकित प्रती जोडाव्यात.

अधिक माहितीसाठी ७७७०००४५३८ या क्रमांकावर संपर्क साधावा, असे आवाहन जिल्हा सैनिक कल्याण अधिकारी लेफ्टनंट कर्नल स. दै. हंगे (निवृत्त) यांनी केले आहे.
000

सोमेश्वर फाऊंडेशन आयोजित पुणे आयडॉल स्पर्धेचे उद्घाटन संपन्न

पुणे : आजच्या युवा पिढीला ऐकण्यासाठी मी इथे आलो आहे. गायकांनी भूतकाळात न जागता बदल मान्य केले पाहिजेत. आज कराओके च्या युगात गायकांना वाद्यवृंदासह गायनाचे व्यासपीठ मिळवून देण्याचे सोमेश्वर फाऊंडेशनचे काम  कौतुकास्पद आहे. या संधीचा फायदा महाराष्ट्रातील नवोदित गायकांनी घ्यावा, गायक, कलावंतांनी  कालानुरूप होणारे बदल स्वीकारले पाहिजे असे मत ज्येष्ठ गायक पं. अजय पोहोणकर यांनी व्यक्त केले.  

सोमेश्वर फाऊंडेशनच्या आयोजित कार्यसम्राट आमदार स्व. विनायक निम्हण यांनी गायक कलाकारांना दिलेले मानाचे व्यासपीठ म्हणजे पुणे आयडॉल स्पर्धा. या स्पर्धेचे उद्घाटन आज  पं.  भीमसेन जोशी सभागृह, औंध येथे   पं. अजय पोहणकर यांच्या हस्ते संपन्न झाले यावेळी ते बोलत होते. याप्रसंगी सावनी रविंद्र (राष्ट्रपती पदक विजेती गायिका), ,माजी नगरसेविका स्वातीताई निम्हण, सोमेश्वर फाऊंडेशनचे अध्यक्ष, माजी नगरसेवक सनी विनायक निम्हण,नंदकुमार वाळुंज, बिपिन मोदी, ज्ञानेश्वर मुरकुटे आदि मान्यवर  उपस्थित होते. 

पुढे बोलताना पं. अजय पोहणकर म्हणाले, जसे जुनी घरे जाऊन आज ऊंच इमारती निर्माण झाल्या, भावना तीच आहे फक्त स्वरूप वेगळे असते तसेच गायनातही बदल होत आहेत, ते कलाकारांनी स्वीकारून पुढे गेले पाहिजे. आजच्या स्पर्धेतील मुलांना मी सांगू इच्छितो की त्यांनी श्रवण करणे अत्यंत महत्वाचे आहे, कारण त्यातूनच आपण एक चांगले गायक होऊ शकतो.  आयुष्यात स्पर्धा ही दुय्यम असते, तुम्ही प्रामाणिकपणे गाणे गात रहा असा सल्ला त्यांनी स्पर्धकांना दिला. 

सावनी रवींद्र म्हणाल्या, एखादी गोष्ट सुरू करणे सोपे असते मात्र त्यामध्ये सातत्य टिकवणे अत्यंत अवघड काम असते. सोमेश्वर फाऊंडेशनने ते काम करून दाखवले आहे.  लहानपणापासून या व्यासपीठावर येण्याची इच्छा होती, आज इथे येता आले हे मी माझे भाग्य समजते. 

प्रास्ताविकपर भाषणात  सनी विनायक निम्हण म्हणाले, अन्न, वस्त्र, निवारा यासह कला, क्रीडा, सांस्कृतिक वारसा जोपासला तर एक समृद्ध जीवनशैली तयार होते अशी सोमेश्वर फाऊंडेशनची भावना आहे. यामुळेच आम्ही विविध सांस्कृतिक कार्यक्रम घेतो, समृद्ध जीवनशैलीसाठी सांस्कृतिक कार्यक्रमांची रेलचेल महत्वाची असते. त्या अनुषंगाने काम करत  मागील 23 वर्षांपासून पुणे  आयडॉल च्या माध्यमातून काम करत आहोत.   

पुणे आयडॉल स्पर्धा चार गटात होते. या स्पर्धेची महाअंतिम फेरी शनिवार, 24 मे 2025 रोजी  दु. 12  ते  3 यावेळेत बालगंधर्व रंगमंदिर, पुणे येथे पार पडणार आहे. तसेच या दिवशी  बक्षीस समारंभ कार्यक्रमानंतर  जितेंद्र भूरुक प्रस्तुत ‘गीतों का सफर’ या  सांगीतिक कार्यक्रमाने स्पर्धेची सांगता होणार आहे.

अमित मुरकुटे, हेमंत कांबळे, अनिकेत कपोते, वनमाला कांबळे, संजय माजिरे, गणेश शेलार, संजय तरडे आदि  कार्यकर्ते स्पर्धेच्या यशासाठी परिश्रम घेत आहेत. कार्यक्रमाचे परीक्षण गायक जितेंद्र भुरुक आणि मुग्धा वैशंपायन करत आहेत.

पुणे-पुणे शहरातील हडपसर भागात मगरपट्टा येथे चार बीएचके फ्लॅट मध्ये रहाणाऱ्या साॅफ्टवेअर कंपनीच्या मालकाच्या घरी चाेरट्यांनी डल्ला मारत २३ लाख ४३ हजार रुपयांचे साेन्याचे दागिने व राेख रक्कम चाेरी करुन नेल्याचा प्रकार उघडकीस आला आहे. विशेष म्हणजे कुटुंबीय घरातच असताना चाेरट्याने खिडकीवाटे हळूच घरात शिरुन ही चाेरी केल्याने आश्चर्य व्यक्त केले जात आहे.

याप्रकरणी पार्थ मलकन गाैंडा (वय – ४४) यांनी अज्ञात आराेपी विराेधात पाेलिसांकडे फिर्याद दाखल केली आहे. पाेलिसांनी दिलेल्या माहितीनुसार, तक्रारदार पार्थ गाैंडा हे संगणक अभियंता असून त्यांची एक साॅफ्टवेअर आयटी कंपनी आहे. १७ मे राेजी रात्री ते १८ मे राेजी दुपार दरम्यान त्यांचे घरात कुटुंबीय घरातच होते. त्यावेळी अज्ञात चाेरट्याने खिडकीच्या वाटे घरात प्रवेश केला. त्याने बेडरुममधील कपाटात ठेवण्यात आलेली गाेदरेजची छाेटी लाॅकर ताेडली. त्यात ठेवण्यात आलेले २३ लाख ४३ हजार रुपये किंमतीचे साेन्याचे दागिने व राेख रक्कम घेऊन ताे पसार झाला. हा प्रकार उघडकीस आल्यानंतर तक्रारदार यांनी याबाबत पाेलिसांकडे धाव घेत तक्रार दाखल केली.

हडपसर पाेलिस ठाण्याचे वरिष्ठ पाेलीस निरीक्षक संजय माेगले याविषयी बोलताना म्हणाले, घटनेच्या दिवशी तक्रारदार व त्यांचे कुटुंबीय घरात झाेपले होते. त्यांच्या पहिल्या मजल्यावरील घरात आराेपी हा पार्किंगमध्ये पार्क करण्यात आलेल्या गाडीच्या टपावरुन गॅलरीत शिरला व तेथून त्याने स्लायडिंग खिडकी उघडून घरात प्रवेश केल्याचा प्राथमिक अंदाज आहे. याप्रकरणात आराेपी घरातून मुद्देमाल घेऊन जातानाचा प्रकार साेसायटी मधील सीसीटीव्हीत कैद झाला आहे. त्याआधारे आराेपीची ओळख पटवण्यात येत आहे. सदर फ्लॅट जवळील सुरक्षारक्षक याच्याकडे देखील याअनुषंगाने तपास करण्यात येत आहे. संशयित आराेपीचा माग काढण्यासाठी पाेलिस पथके कार्यरत झाली आहेत. याबाबत पुढील तपास पाेलिस उपनिरीक्षक एस गेंड करत आहेत.

पुणे :केंद्र सरकारची डॉ. बाबासाहेब आंबेडकर एकात्मिक आंतरजातीय विवाह योजना  बंद करणे हा सामाजिक अन्याय असून ही योजना पूर्ववत सुरू ठेवावी,अशी मागणी ‘विचारवेध असोसिएशन’च्या वतीने समन्वयक अनिकेत साळवे यांनी पत्रकाद्वारे केली आहे.  ‘विचारवेध असोसिएशन’ तर्फे जाती अंत ,आंतरजातीय विवाहा ला प्रोत्साहन देण्याचे कार्य केले जाते.त्यामुळे असोसिएशनने यासंदर्भात मत व्यक्त करून केंद्र सरकारला या योजनेबाबत सकारात्मक राहण्याचे आवाहन करण्यात आले आहे.

जात-धर्माच्या भिंती पार करून विवाह करण्याचं प्रमाण भारतात आजही केवळ 5% इतकं कमी आहे. असे असूनही डॉ. बाबासाहेब आंबेडकर एकात्मिक आंतरजातीय विवाह योजना अचानक बंद करण्यात आली आहे. केंद्र सरकारच्या सामाजिक न्याय व विशेष सहाय्य विभागाची स्वायत्त संस्था असलेल्या डॉ. बाबासाहेब आंबेडकर फाऊंडेशनच्या वतीने २०१४-१५ पासून ही योजना सुरू होती. परंतु, कुठलेही कारण न देता ही योजना बंद करण्यात आली. विशेष म्हणजे, राज्याच्या सामाजिक न्याय विभागाकडे या योजनेसाठी अर्ज करणाऱ्यांना योजना बंद झाल्याचे थेट पत्रच दिले जात आहे.हे अनाकलनीय आहे,असे अनिकेत साळवे यांनी म्हटले आहे.

जातीय भेदभाव नष्ट व्हावा  या दृष्टिकोनातून सुरू करण्यात आलेली डॉ. बाबासाहेब आंबेडकर एकात्मिक आंतरजातीय विवाह योजना अचानक बंद करण्यात आली आहे. केंद्र सरकारच्या सामाजिक न्याय व विशेष सहाय्य विभागाची स्वायत्त संस्था असलेल्या डॉ. बाबासाहेब आंबेडकर फाऊंडेशनच्या वतीने २०१४-१५ पासून ही योजना सुरू होती. परंतु, कुठलेही कारण न देता ही योजना बंद करण्यात आली..समाजात घट्ट असणारी जात. अनेक वेळा आंतरजातीय विवाह करू इच्छिणाऱ्या जोडप्याला कुटुंबियांच्या व समाजाच्या विरोधाला सामोरं जावं लागतं. त्यात जर एक जोडीदार अनुसूचित जाती/जमातीतील असेल तर हा विरोध अधिकच प्रखर असतो. अशा वेळी त्या जोडप्याला एक आधार असणारी आंतरजातीय विवाह योजना केंद्र सरकार तडकाफडकी बंद का करत आहे? केंद्र सरकारला या योजनेचं महत्त्व समजत नाही का? की डॉ.बाबासाहेबांचे विचार पायदळी तुडवण्याचा त्याचा मनसुबा आहे का ? असा सवाल विचारवेध असोसिएशनने केला आहे 

पुणे : भरत नाट्य संशोधन मंदिराची वार्षिक निवडणूक बिनविरोध झाली असून अध्यक्षपदी पांडुरंग मुखडे यांची तर उपाध्यक्षपदी भाग्यश्री देसाई यांची निवड झाली आहे. सुमारे 131 वर्षांची अखंडित परंपरा असलेल्या भरत नाट्य संशोधन मंदिराची निवडणूक बिनविरोध होण्याची सलग दुसरी वेळ आहे.

भरत नाट्य संशोधन मंदिराची सर्वसाधारण सभा आणि वार्षिक निवडणूक आज (दि. 18) भरत नाट्य मंदिर येथे झाली. निवडणूक निर्णय अधिकारी म्हणून मोहन मुळ्ये यांनी काम पाहिले. सन 2025-2026 या वर्षासाठी पदाधिकारी निवड झाली आहे. कार्यकारिणीत अध्यक्ष – पांडुरंग मुखडे, उपाध्यक्ष – भाग्यश्री देसाई, विश्वस्त – अनिवाश ओगले, कार्याध्यक्ष – अभय जबडे, कार्योपाध्यक्ष – चारुलता पाटणकर, कार्यवाह – संजय डोळे, सहकार्यवाह – राजेंद्र उत्तुरकर, खजिनदार – अविनाश बेलसरे, नियामक मंडळ सदस्य – शंतनू खुर्जेकर, श्याम भुर्के, भक्ती पागे, कार्यकारी मंडळ सदस्य – प्रचिती सुरू-कुलकर्णी, विश्वास पांगारकर, राजन कुलकर्णी, प्रियांका गोगटे, अंतर्गत आयव्यय – अपर्णा पेंडसे यांचा समावेश आहे.

भरत नाट्य संशोधन मंदिराचे पदाधिकारी रसिकांसाठी आणि संस्थेसाठी राबवित असलेल्या उपक्रमांबद्दल सदस्यांनी समाधान व्यक्त केले आहे. रसिकांच्या मागणीनुसार गेल्यावर्षी दिवाळीत संगीत नाट्य महोत्सव सुरू करण्यात आला. नुकताच वासंतिक नाट्य महोत्सवही रसिकांच्या उत्स्फूर्त प्रतिसादात रंगला. भविष्यातही विविध उपक्रम राबविण्याचा मानस आहे.

• पांडुरंग मुखडे, अध्यक्ष

पुणे : दक्षिणी कमांड मिलिटरी इंटेलिजन्स पुणे आणि पुणे शहराच्या खराडी पोलीस ठाण्याच्या संयुक्त कारवाईत हवाई दलाच्या जवानाच्या वेशात फसवणूक करणाऱ्या एका व्यक्तीला अटक करण्यात आली असल्याची माहिती पुणे पोलिसांनी रविवारी दिली.

पुणे पोलिसांच्या माहितीनुसार, आरोपी गौरव कुमार (वडिलांचे नाव – दिनेश कुमार) याच्या संशयास्पद हालचालींबाबत गोपनीय माहिती मिळाल्यानंतर त्याला अडवण्यात आले.

सखोल पडताळणी आणि निगराणीच्या प्रक्रियेनंतर, दक्षिणी कमांड मिलिटरी इंटेलिजन्स पुणे आणि खराडी पोलीस ठाण्याच्या संयुक्त पथकाने १८ मे रोजी रात्री ८:४० वाजता पुणे शहरातील खराडी परिसरात आरोपीला ताब्यात घेतले.

शोध मोहिमेदरम्यान, आरोपीकडून फसवणुकीसाठी वापरले गेलेले काही साहित्य जप्त करण्यात आले, ज्यामध्ये दोन हवाई दलाचे टी-शर्ट, एक हवाई दलाचा कॉम्बॅट पँट, एक जोडी हवाई दलाचे कॉम्बॅट शूज, दोन हवाई दलाचे बॅजेस, एक ट्रॅक सूट अप्पर समाविष्ट आहे, अशी माहिती पुणे पोलिसांनी दिली.

पुणे पोलिसांनी आरोपीवर भारतीय दंड संहिता (BNS) च्या कलम १६८ अंतर्गत खराडी पोलीस ठाण्यात गुन्हा दाखल केला आहे. सध्या आरोपीचा चौकशी सुरू असून, त्याच्या कृत्यामागील हेतू आणि संभाव्य सुरक्षेशी संबंधित परिणाम तपासले जात आहेत. अधिक तपशील लवकरच उपलब्ध होण्याची शक्यता आहे.