पुणे-महापालिका हद्दीत तब्बल १ हजार ६५७ मोबाइल टॉवर्स अनधिकृत असल्याची धक्कादायक माहिती समोर आली आहे. त्यामुळे महापालिकेचे उत्पन्न बुडत आहे. विविध मोबाइल कंपन्यांचे केवळ २३८ अधिकृत टॉवर्स आहेत. शिवसेनेचे नगरसेवक प्रमोदनाना भानगिरे यांनी महापालिकेच्या सर्वसाधारण सभेच्या प्रश्नोत्तरात विविध प्रश्न उपस्थित करून माहिती उघडकीस आणली आहे..

महापालिकेच्या हद्दीत विविध मोबाइल कंपन्यांचे इमारतींवर, छतांवर अनधिकृत टॉवरचा सुळसुळाट झाला आहे. त्यामुळे महापालिकेचे उत्पन्नही बुडत आहे. अधिकृत मोबाइल टॉवरला परवानगी देण्यासाठी स्क्रुटिनी फी ६०० रुपये, एकरकमी प्रशासकीय शुल्क ३० हजार रुपये, बांधकाम विकसन शुल्क इमारतीवरील मोबाइल टॉवर बांधकामांसाठी शीघ्रसिद्धगणक दराच्या ४० टक्क्यांपैकी ८ टक्क्यानुसार आकारले जाते. मोकळ्या जागेवर मोबाइल टॉवर असल्यास ८ टक्केपैकी जागेचा शीघ्रसिद्धगणक दरानुसार आकारले जाते. .

महापालिकेला मोबाइल टॉवरच्या माध्यमातून ७ कोटी २४ लाख रुपये उत्पन्न मिळाले आहे. मोबाइल टॉवरच्या माध्यमातून मिळकतकराच्या माध्यमातून ३१ कोटी ३६ लाखांचे उत्पन्न मिळाले. दरम्यान, जुना बाजार येथे पडलेल्या होर्डिंगच्या दुर्घटनेनंतर महापालिकेच्या १५ क्षेत्रीय कार्यालयांकडून नोव्हेंबर अखेरपर्यंत १९२ बेकायदेशीर होर्डिंग पाडण्यात आली आहेत, अशी माहिती प्रशासनाकडून देण्यात आली. .

 पुणे- सर्वोच्च न्यायालयाच्या आदेशानुसार महापालिका प्रशासनाने सुरु केलेई धार्मिक स्थळांवरील कारवाई तात्पुरती थांबवण्याचे आदेश गटनेत्यांच्या बैठकीत प्रशासनाला देण्यात आले. या परिस्थितीत प्रशासन नेमकी काय भूमिका घेणार याकडे आता लक्ष लागून राहणार आहे . या प्रकारामुळे प्रशासन मात्र कात्रीत सापडले आहे .

धार्मिक स्थळांवर सुरु असलेल्या कारवाईचे सोमवारी मुख्य सभेत पडसाद उमटले होते. ही कारवाई थांबविण्याची मागणी सर्वपक्षीय नगरसेवकांनी केली होती. त्यासंदर्भात महापौरांनी बुधवारी पक्षनेत्यांची बैठक घेतली. या बैठकीला आयुक्त सौरभ राव, सभागृह नेते श्रीनाथ भिमाले, उपमहापौर डॉ. सिद्धार्थ धेंडे, काँग्रेस गटनेते अरविंद शिंदे, मनसे गटनेते वसंत मोरे, शिवसेनेचे संजय भोसले, अश्‍विनी लांडगे, सुनिता वाडेकर, अतिक्रमण नियंत्रण विभागप्रमुख माधव जगताप आदी यावेळी उपस्थित होते.

या बैठकीत गटनेत्यांनी शहरात सुरू असलेली धार्मिक स्थळांवरील कारवाई थांबविण्याची मागणी केली. त्यात प्रामुख्याने प्रशासनाने अनधिकृत धार्मिक स्थळांची अ, ब आणि क अशी वर्गवारी केली आहे. त्यामधील क वर्गात जी 546 धार्मिक स्थळे आहेत, ती वाहतुकीला अडथळा ठरणारी नाहीत. त्यामुळे क वर्गातील धार्मिक स्थळांचे स्थलांतर करणे शक्य आहे का हे तपासावे व शक्य होत असल्यास गृहखात्याकडे पाठवलेल्या माहितीत प्रतिज्ञापत्राद्वारे बदल करणे शक्य आहे का, या सगळ्यांची शक्यता पडताळून पाहण्याच्या सूचना प्रशासनाला केल्या असल्याचे महापौर आणि गटनेत्यांकडून सांगण्यात आले.

पुणे– चिंचवडच्या मोहननगर परिसरातून एक व्यवसायिक कुटुंबासह गेल्या पंधरा दिवसांपासून बेपत्ता झाला आहे. याप्रकरणी पिंपरी पोलीस ठाण्यात नोंद करण्यात आली आहे.

संतोष एकनाथ शिंदे (वय-47) त्यांच्या पत्नी सविता संतोष शिंदे (वय-41), मुलगा मुकुंद शिंदे (वय-22), मुलगी मैथाली शिंदे (वय-18) असे सर्व बेपत्ता झाले आहेत. याप्रकरणी संतोष यांचे भाऊ नितीन एकनाथ शिंदे (वय-38) यांनी पिंपरी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, शिंदे यांचा ट्रान्सपोर्टचा व्यवसाय आहे. त्यांच्या एकूण दहा गाड्या आहेत. शिंदे यांनी धंदा व इतर कामांसाठी विविध ठिकाणाहून तब्बल दोन कोटीच्या आसपास कर्ज काढले होते. यासाठी त्यांनी खासगी पतसंस्था तसेच कर्जदारांचे पैसे परत मागण्यासाठी फोन येत होते. या त्रासाला कंटाळून ते गेल्या अनेक दिवसांपासून अस्वस्थ होते. शिवाय त्यांनी राहत्या घरावर कर्ज काढण्याचा मानस देखील त्यांच्या नातेवाईकांना बोलून दाखवला.

मात्र, 5 डिसेंबर रोजी सारे कुटुंब घरातून जाण्यासाठी निघाले. यावेळी भावाने हटकले देखील मात्र त्यांनी फिरायला जातोय असे सांगितले. त्यांच्या ड्रायव्हरने त्यांचा चिंचवड रेल्वे स्थानकाजवळ सोडले. त्यानंतर ते कुटुंबीय रिक्षाने बेपत्ता झाले. रात्री उशीर झाला तरी कुटुंबीय घरी न परतल्याने घरच्यांनी शोधाशोध सुरु केली. मात्र त्यातील एकही जण फोन उचलत नव्हते. अखेर ते राहत असलेल्या खोलीचा दरवाजा उघडला असता चौघांचेही फोन घरातच होते. यावेळी घरच्यांना तेथे एक चिठ्ठी सापडली. त्यामध्ये शिंदे यांनी लिहिले होते की, माझ्या साऱ्या व्यवहाराचा तपशील डायरीत लिहून ठेवला आहे. मी माझा परिवार आत्महत्या करत आहोत. चिठ्ठी शेजारीच घरातील कपाटाच्या चाव्याही ठेवल्या होत्या.

मुलाची परीक्षा तोंडावर
मुकुंद हा मेकॅनिकल इंजिनिअरींग करत आहे. तर मुलगी मैथाली ही बारावीमध्ये शिक्षण घेत आहे. मुकंदची इंजिनिअरींगची परीक्षा तोंडावर असतानाच हे कुटुंब बेपत्ता झाले आहे. पोलीस सर्व बाजुंनी तपास घेत असून अद्याप तरी पोलिसांना कोणतीही माहिती मिळाली नाही. मात्र, या घटनेमुळे शिंदे यांचे नातेवाईक पूर्णपणे खचले आहे. त्यांनीही शोध सुरु केला असून कोणाकडेही या कुटुंबाची माहिती असल्यास संपर्क साधण्याचे आवाहन पोलिसांनी केले आहे.

पुणे,- कृषी विभाग आणि मत्‍स्य व्‍यवसाय विभागाने शेतक-यांसाठीच्‍या योजना एकत्रितरित्‍या आणि समन्‍वयाने राबवाव्‍यात, अशा सूचना जिल्‍हाधिकारी नवल किशोर राम यांनी दिल्‍या. जिल्‍हाधिकारी कार्यालयात नीलक्रांती योजना जिल्‍हा सुकाणू समितीच्‍या बैठकीत ते बोलत होते. यावेळी अतिरिक्‍त मुख्‍य कार्यकारी अधिकारी नृसिंह मित्रगोत्री, निवासी उपजिल्‍हाधिकारी डॉ. जयश्री कटारे, जिल्‍हा अधीक्षक कृषी अधिकारी बाळासाहेब पलघडमल, मत्‍स्‍्यव्‍यवसाय विभागाचे प्रादेशिक उपायुक्‍त अभय देशपांडे, सहायक आयुक्‍त अविनाश नाखवा, मत्‍स्य  व्‍यवसाय विकास अधिकारी जनक भोसले, जिल्‍हा माहिती अधिकारी राजेंद्र सरग, जिल्‍हा अग्रणी बँकेचे किरण अहिरराव, प्रशासन अधिकारी प्रशांत दीक्षीत, कृषी अधिकारी तुषार तांदळे आदी उपस्थित होते.

जिल्‍हाधिकारी नवल किशोर राम म्‍हणाले,  शेतक-यांचे उत्‍पन्‍न वाढावे, यासाठी विविध योजना आहेत. कृषी विभाग, पशुसंवर्धन, मत्‍स्य व्‍यवसाय विकास आदी विभागांनी समन्‍वयाने आणि एकत्रितरित्‍या योजनांची अंमलबजावणी केल्‍यास शेतक-यांना त्‍याचा लाभ होऊ शकतो. शेतीबरोबरच पूरक व्‍यवसायामुळे उत्‍पन्‍नात  वाढ होऊ शकते. देशाला अन्‍न सुरक्षा प्रदान करण्‍यासाठी, शेती आणि शेतीपुरक उत्‍पादनांमध्‍ये वाढ होण्‍यासाठी विविध विभागांच्‍या योजना साह्यभूत ठरु  शकतात.

देशात उपलब्‍ध असलेल्‍या भूजलाशयीन व सागरी क्षेत्रातील संसाधनांचा पूर्ण क्षमतेने वापर करुन मत्‍स्योत्‍पादनात वाढ करणे हा नीलक्रांती योजनेचा उद्देश असल्‍याची माहिती सहायक आयुक्‍त अविनाश नाखवा यांनी दिली. नीलक्रांती योजनेंतर्गत गोड्या पाण्‍यातील योजना राबविण्‍यात येतात. नवीन तळी बांधकाम, तळ्यांची दुरुस्‍ती, नूतनीकरण व पुनरुज्‍जीवन, मत्‍स्यबीज उत्‍पादन केंद्रांची स्‍थापना, नवीन नौका व जाळी खरेदी करणे आदींचा त्‍यात समावेश आहे. अनुसूचित जाती, अनुसूचित जमाती, महिला, महिलांच्‍या सहकारी संस्‍था यांना प्रकल्‍प किंमतीच्‍या 60 टक्‍के मर्यादेपर्यंत अनुदान देय राहील, असे त्‍यांनी सांगितले.

पुणे-ख्रिश्चन लीगल असोसिएशन पुणेच्यावतीने वकील बांधवांचा आनंद  मेळावा साजरा झाला . रास्ता पेठ मधील सिटी चर्चमध्ये झालेल्या या ख्रिसमस आनंद मेळाव्याचे आयोजन ऍड जॉन रॉड्रिक्स , पास्टर बरनवाज  सुंदरराजन , ऍड संजय साळवी , ऍड के व्ही त्रिभुवन , ऍड सॅमसन अँड्रूज , ऍड प्रताप साबळे , ऍड एस एम देव , ऍड अनुपमा जोशी , डॉ मॅनवेल डिसोझा , ऍड फ्रान्सिस भोसले , ऍड अँथोनी बनसोडे, ऍड अँजीलिना कांबळे , ऍड मेरी जोसेफ , ऍड टी डी आयझॅक  , ऍड एस एस काळे , ऍड संपत  कांबळे , ऍड  जॉन रिजारू , ऍड बाजीराव दळवी , ऍड  बाळासाहेब चोकर , ऍड  संगीता मेनजेस , ऍड  मार्क परमार , ऍड अँथोन कदम , ऍड  लुईस तिलोरे , ऍड स्टेला मेंडीस , ऍड  आर जे डिसिल्वा , ऍड  समीर मनतोडे , ऍड  संगीता फर्नांडिस , ऍड  विजयन भास्करन , ऍड  ब्रिजेस मेंडिस , ऍड नॉवेल फर्नाडिस  आदी ख्रिस्ती समाजातील वकील बांधव व राजेश नायर , निकी मार्टिन , अँथोनी मस्किटा, दीपक कदम, स्मिता नायडू , मॅथ्यू आर्लेंड  आदी मान्यवर उपस्थित होते .

प्रत्येक चर्चमध्ये कायदेशीर सल्लागार या पदावर ख्रिस्ती वकिलाची नेमणूक झाली पाहिजे , तसेच चर्चच्या कायदेशीर अडचणी सोडविण्यासाठी ,  ख्रिश्चन लीगल असोसिएशन मदत करेल , ख्रिस्ती समाजबांधवांच्या कायदेशीर अडचणी सोडविण्यासाठी ख्रिश्चन लीगल असोसिएशन लीगल डेस्क सुरू करणार , सोशल मीडियाचा माध्यमातून ख्रिस्ती समाजातील वकील बांधवानी एकत्र आणले जाईल , तसेच सोशल मीडियाच्या माध्यमातून अडचणी सोडविण्यासाठी वकिलांनी संपर्कात राहावे . आदी विषयांवर चर्चा करण्यात आली .

ख्रिश्चन लीगल असोसिएशन हे देशात कार्यरत राहणार ख्रिस्ती वकील बांधवांची संघटना असून १८ राज्यात ९१ शहरात एक हजार व्यावसायिक वकील बांधव ख्रिश्चन लीगल असोसिएशनचे सदस्य आहेत . अशी माहिती  ऍड जॉन रॉड्रिक्स यांनी दिली .