पुणे, दि. २८: विभागीय माहिती कार्यालय पुणे आणि पुणे श्रमिक पत्रकार संघाच्या संयुक्त विद्यमाने पत्रकार भवन येथे माध्यम प्रतिनिधींना पत्रकारांसाठी असलेल्या शासनाच्या विविध योजनांची माहिती देण्यासाठी विकास पत्रकारिता कार्यशाळेचे आयोजन करण्यात आले.

यावेळी राज्य अधिस्वीकृती समिती सदस्य एस. एम. देशमुख, स्वप्नील बापट, शरद पाबळे, विभागाचे माहिती उपसंचालक डॉ.किरण मोघे, पुणे विभागीय अधिस्वीकृती समितीचे अध्यक्ष हरिष पाटणे, पुणे सदस्य सुनीत भावे, चंद्रसेन जाधव, पुणे पत्रकार संघाचे खजिनदार शिवाजी शिंदे, सरचिटणीस मीनाक्षी गुरव आदी उपस्थित होते.

डॉ. मोघे म्हणाले, माहिती व जनसंपर्क विभागाच्या संकेतस्थळावर पत्रकारांसाठीच्या योजनांची माहिती देण्यात आली आहे. प्रत्यक्ष पत्रकारांशी संवाद साधून त्यांच्यापर्यंत या योजना पोहोचविण्यासाठी या कार्यशाळेचे आयोजन करण्यात आले. विकास पत्रकारिता वास्तवाचा स्वीकार करणे, विश्लेषण करणे, मूल्यांकन करणे आणि सामाजिक जबाबदारी या चार पैलूंवर आधारीत आहे. अशा पत्रकारितेला प्रोत्साहन देण्यासाठी राज्य शासनातर्फे विकास पत्रकारिता पुरस्कार देण्यात येतात. यासोबतच पत्रकारांसाठी शासनाने विविध योजना सुरू केल्या आहेत.

स्व. शंकरराव चव्हाण पत्रकार कल्याण निधीतून विविध आजारांवरील उपचारांसाठी अधिस्वीकृतीधारक पत्रकारांना, त्यांच्यावर अवलंबून असणारे पती/पत्नी आणि दोन मुलांनाही १५ हजारापासून ते १ लाख रुपयांपर्यंत मदत मिळते. तसेच केंद्र शासनाच्या पत्रकार कल्याण योजनेअंतर्गतही अधिस्वीकृतीधारक पत्रकार आणि किमान ५ वर्षे पत्रकारिता करणाऱ्या पत्रकारांना अर्थसहाय्य करण्यात येते, अशी माहिती त्यांनी दिली. डॉ.मोघे यांनी आचार्य बाळशास्त्री जांभेकर पत्रकार सन्मान योजना आणि अधिस्विकृती संबंधितच्या नियमावलीचीही माहिती दिली. या योजनांचा लाभ घेण्याचे आवाहन त्यांनी केले. पत्रकारांना योजनांचा लाभ देण्यासाठी माहिती विभागाची नेहमीच सकारात्मक भूमिका राहील, असेही डॉ.मोघे म्हणाले.

एस. एम. देशमुख म्हणाले, बहुसंख्य पत्रकारांना आपल्या लाभाच्या योजनाची माहिती नसल्याने योजनांपासून वंचित राहत होते. त्यामुळे माहिती व जनसंपर्क विभागाने या योजनांच्या माहितीची पुस्तिका काढून त्याचे वितरण करावे. शासकीय योजनांचा अधिकाधिक पत्रकारांना लाभ व्हावा यासाठी शासनाकडे राज्य अधिस्विकृती समितीच्या माध्यमातून पाठपुरावा करण्यात येत आहे. अधिस्वीकृतीसाठी आपण कोणत्या संवर्गात पात्र ठरतो याचा अभ्यास करुन पत्रकारांनी अर्ज केल्यास अधिस्वीकृती मिळण्याची कार्यवाही लवकर होते, असेही ते म्हणाले. पत्रकारांना शासकीय योजनांची माहिती देण्यासाठी अशा कार्यशाळा उपयुक्त असून कार्यशाळेचे आयोजन प्रत्येक जिल्ह्यात व्हावे, असे आवाहन त्यांनी केले.

पत्रकार सन्मान योजनेंतर्गत प्रति लाभार्थी दरमहा ११ हजार रुपये सन्मान निधी देण्यात येतो. देशात इतकी मोठी रक्कम देणारी योजना राबविणारे इतर कोणतेही राज्य नाही. सन्मान योजनेचा लाभही अधिकाधिक पत्रकारांना मिळावा यादृष्टीनेही प्रयत्न होत आहेत. पत्रकारांनी योजनेची माहिती जाणून घ्यावी आणि अधिकाधिक अर्ज करावेत. त्याचा अधिकाधिक पत्रकारांना लाभ व्हावा यासाठी प्रयत्न व्हावेत, असेही ते म्हणाले. यावेळी श्री. देशमुख यांनी अधिस्वीकृतीसाठीचा वरिष्ठ पत्रकार संवर्ग, कोटा पद्धती, अर्जासोबत जोडावयाची कागदपत्रे आदींची माहिती देऊन याबाबत पुणे अधिस्वीकृती समितीकडून चांगला पुढाकार घेतल्याचे नमूद केले.

श्री. पाटणे म्हणाले, ग्रामीण भागातील पत्रकारांना अधिस्वीकृती पत्रिका आणि अन्य योजनांची माहिती नसल्याने त्यांच्याकडून अर्ज येत नाहीत. मात्र गेल्या दीड वर्षात पुणे विभागीय अधिस्वीकृती समितीच्यावतीने पत्रकारांना माहिती देण्यात आल्याने त्याचे सकारात्मक परिणाम दिसून आले आहेत, त्यामुळे ग्रामीण पत्रकारांना या सुविधेचा लाभ देता आला. अर्जाची काटेकोर तपासणी केली जातेच परंतु अर्जात काही त्रुटी असल्यास समितीकडून त्रुटी दूर होण्यासाठी आवश्यक मार्गदर्शन केले जाते. लवकरच सातारा येथेही अशी कार्यशाळा घेण्यात येईल, असे त्यांनी सांगितले.

प्रास्ताविकात श्री. भावे यांनी पत्रकारांसाठीच्या योजनांची पत्रकारांना माहिती असणे आवश्यक असून त्यासाठी पुणे श्रमिक पत्रकारसंघाने पुढाकार घेऊन कार्यशाळेचे आयोजन केल्याचे सांगितले.

यावेळी उपस्थित पत्रकारांच्या शंकांना उत्तरे देण्यात आली. विविध वृत्तपत्रांचे, प्रसारमाध्यमांचे प्रतिनिधी कार्यशाळेस उपस्थित होते.

विद्यार्थी हितासाठी आक्रमक होण्याचा इशारा 

पुणे :

 अकरावी ऑनलाइन प्रवेश प्रक्रियेतील त्रुटींबाबत हिंदू महासंघाच्या पालक आघाडीने  शिक्षणमंत्री दादा भुसे यांची मुंबई निवासस्थानी भेट घेऊन  निवेदन दिले. पालक आघाडीच्या प्रतिनिधींसह हिंदू महासंघाचे संस्थापक अध्यक्ष  आनंद दवे ,सौ.आदिती जोशी, सौ. तृप्ती तारे, नितीन शुक्ल,अजित जोशी,सौ.तृप्ती वाकडे,अश्विन वाकडे,कविता दोशी आणि आरती जोशी उपस्थित होते.यावेळी ११ वीच्या प्रवेशाच्या जी.आर. मध्ये आवश्यक बदल करण्याबाबत चर्चा करण्यात आली. शिक्षण मंत्री  दादा भुसे यांनी पालक आघाडीला सकारात्मक आश्वासन दिले आहे.परंतु ३ जून २०२५ पर्यंतच प्रवेश प्रक्रियेची  मुदत असल्यामुळे पालक आघाडी मागणीबाबत आक्रमक राहणार आहे. सीईटीप्रमाणे प्रवेशप्रक्रिया सुलभ असल्याचे सांगीतले जात  आहे. मात्र प्रत्यक्षात अडचणी येत आहेत.प्रवेश प्रक्रियेतील अर्ज भरण्याकरिता असलेले संकेतस्थळ बिघडते. विद्यार्थ्यांच्या शाळेच्याच असलेल्या महाविद्यालयाचे संकेत स्थळावर दिसतच नाही. रहिवासी असलेल्या ठिकाणापासून जवळ असलेले महाविद्यालय देखील संकेत स्थळावर दिसत नाही. महाविद्यालयात असलेला प्रशासकीय जागा देखील शासकिय जागा शासनाकडे जमा झाल्याने  महाविद्यालयांकडे पर्याय शिल्लक नाही.या सर्व अडचणीमुळे विद्यार्थ्यांबरोबरच पालक  चिंताग्रस्त झाले असून संतप्त प्रतिक्रिया सर्व स्तरातून येत आहेत.चांगले गुण असले तरी प्रवेश प्रक्रिये मुळे चांगले महाविद्यालय मिळण्याची खात्री उरलेली नाही.हिंदू महासंघाने या विषयाकडे लक्ष देऊन राज्यभर पालक आणि विद्यार्थ्यांच्या पाठीशी ठामपणे उभे राहून येत्या काळात न्यायासाठी संघर्ष सुरू ठेवण्याचा निर्धार व्यक्त केला आहे.

सोशल रिस्पॉन्सिबिलिटी समूह महाराष्ट्रच्या वतीने कृषीमंत्री माणिकराव कोकाटे यांना निवेदन

पुणे : सोशल रिस्पॉन्सिबिलिटी समूहाच्या वतीने राज्यात स्वतंत्र नैसर्गिक शेती विज्ञान विद्यापीठ व्हावे, यासाठी कृषीमंत्र्यांना निवेदन देण्यात आले. नैसर्गिक शेतीला चालना देण्यासाठी देखील मागण्या यावेळी करण्यात आल्या. महाराष्ट्र शासन कृषी विभागाच्या वतीने आयोजित प्रगतशील व प्रयोगशील शेतकरी परिसंवाद कार्यक्रमात राज्याचे कृषिमंत्री माणिकराव कोकाटे यांना निवेदन देण्यात आले

यावेळी कृषी भूषण जगन्नाथ मगर, सोशल रिस्पॉन्सिबिलिटीचे अध्यक्ष  विजय वरुडकर, संचालक ज्ञानेश्वर शिंदे, कृषी भूषण शशिकांत पुदे, चंद्रकांत बागल, खुशालचंद मोरे, संदीप यादव, विजय जवळकर, प्रमोद इंगळे तसेच नैसर्गिक शेती करणारे शेतकरी मोठ्या संख्येने उपस्थित होते. नैसर्गिक शेती संदर्भात देखील निवेदन यावेळी देण्यात आले.

विजय वरुडकर म्हणाले, केंद्र सरकारने राष्ट्रीय नैसर्गिक शेती योजना सुरू केली आहे. राज्यात २ लाख शेतकरी या विषयी सहभागी व्हावे हे उद्दिष्ट ठरण्यात आले आहे. प्रशासकीय यंत्रणेची मर्यादा पाहता नैसर्गिक शेती उत्पादन व गुणवत्ता पूर्वक नियोजन करण्यासाठी राज्य सरकारने स्वयंसेवी संस्था व नैसर्गिक शेती प्रशिक्षक यांना एकत्रित करून योजना अंमलबजावणी करावी. सर्वांनी मिळून नैसर्गिक शेती प्रशिक्षण, माती पाणी परीक्षण, नैसर्गिक शेती प्रमाण पत्र, प्रक्रिया उद्योग, निविष्ठा निर्मिती, बीज बँक निर्मिती, नैसर्गिक खते निर्माण, उत्पादन विक्री यंत्रणा अशा विविध पैलूतुन शेतकऱ्यांच्या बांधावर म्हणजे गावात प्रशिक्षण व सोयी उपलब्ध झाल्यास नैसर्गिक शेतीला प्रतिसाद मिळेल.

ज्ञानेश्वर शिंदे म्हणाले, नैसर्गिक शेतीसाठी आर्थिक प्रोत्साहन आणि अनुदान देण्यात यावे. सेंद्रिय उत्पादनांसाठी किमान आधारभूत किंमत ठरवण्यात यावा. नैसर्गिक शेती उत्पादन विक्रीसाठी राज्यातील प्रत्येक कृषी उत्पन्न बाजार समितीत स्वतंत्र विशेष बाजारपेठ साठी जागेची तरतुद करण्यात यावी.

कृषी भूषण जगन्नाथ तात्या मगर यांनी सांगितले की सरकारी खरेदीत सेंद्रिय उत्पादनांना प्राधान्य द्यावे. नैसर्गिक शेती वरील राज्य सरकारच्या वतीने लावण्यात आलेला जीएसटी रद्द करण्यात यावा, अशा मागण्या करण्यात आल्या आहेत.

ते पुढे म्हणाले, याशिवाय नैसर्गिक  शेतीमध्ये डेटा विश्लेषण, सेन्सर तंत्रज्ञान आणि कृत्रिम बुद्धिमत्तेचा  वापर करून पीक आणि जमिनीचे व्यवस्थापन करण्यात यावे. नैसर्गिक शेतमालाच्या गुणवत्तेची विश्वासार्हता साठी कठोर तपासणी यंत्रणा स्थापित करावी. नैसर्गिक शेतीसाठी प्रशिक्षण व डिजिटल प्लॅटफॉर्म  विकसित करणे. नैसर्गिक शेतीसाठी सुलभ आणि परवडणारे प्रमाणीकरण व प्रमाणीकरण संस्थांना प्रोत्साहन द्यावे. राज्यातील महानगरपालिका, नगर परिषद क्षेत्रात तसेच शासकीय जागेमध्ये  शेतकरी बाजारसाठी जागा उपलब्ध करून द्यावी, अशा विविध मागण्या निवेदनात केल्या आहेत.

नैसर्गिक शेती मिशन विषयी सहभागासाठी  ८४४६००४५८० या क्रमांकवर संपर्क साधावा, अशी माहिती कार्यक्रम वेळी करण्यात आली.

पुणे-

“समाविष्ट 34 गावांसह प्रामुख्याने मांजरी बुद्रुक येथील नागरिकांना समान व नियमित पाणीपुरवठा व्हावा यासाठी पाणी योजनेचा सुधारित आराखडा तयार करून आवश्यक तो निधी तातडीने मंजूर करावा”, अशी आग्रही मागणी शिवसेना उद्धव बाळासाहेब ठाकरे पक्षाच्या वतीने शहरप्रमुख संजय मोरे यांच्या नेतृत्वाखालील शिष्टमंडळाने पुणे महानगरपालिका आयुक्त तसेच मुख्य अभियंता पाणीपुरवठा विभाग यांच्याकडे प्रत्यक्ष भेटून लेखी निवेदनाद्वारे केली आहे.
शिष्टमंडळामध्ये शहरप्रमुख संजय मोरे, प्रवीण रणदिवे, वर्षा खलसे, संतोष ढोरे, गणेश मरळ, स्वप्निल वसवे, किरण खलसे, अशोक ढेंबरे, रमेश सूर्यवंशी, किरण जाधव, नितीन राखपसरे आदींचा समावेश होता.
तत्कालीन मांजरी बुद्रुक ग्रामपंचायतीने मांजरी बुद्रुक गावचा पाणी प्रश्न कायमचा सुटावा यासाठी सन 2008 मध्ये लोकसंख्येचा सर्व्हे करून मांजरी करांना पाणी मिळावे यासाठी काम केलेले होते.
त्यानंतर सन 2014 मध्ये हीच लोकसंख्या गृहीत धरून महाराष्ट्र जीवन प्राधिकरण पाणी योजना मंजूर करण्यात आली होती. परंतु काही कारणास्तव ती पुढे स्थगित करण्यात आली. विशेष म्हणजे प्रशासनाने भविष्यातील वाढत्या नागरीकरणाचा विचार न करता पुन्हा तोच सर्व्हे गृहीत धरून त्यानंतर तब्बल दहा वर्षानंतर म्हणजेच सन 2018 मध्ये महाराष्ट्र जीवन प्राधिकरणची पाणी योजना पुन्हा मंजूर झाली.
ही योजना सहा ते सात वर्षानंतर सन 2024 च्या अखेरीस प्रत्यक्षात कार्यान्वित करण्यात आली. त्या पाण्याचा लाभ मांजरी बुद्रुकमधील केवळ 50 ते 55 % नागरिकांना अपुरा व अनियमित पद्धतीने का होईना होत आहे. उर्वरित जवळपास 45 % मांजरीकर नागरिक अजूनही पाण्याच्या प्रतीक्षेत आहेत याकडेही मोरे यांनी लक्ष वेधले आहे.
प्रामुख्याने रेल्वेगेट परिसर, गोडबोले वस्ती, घावटे वस्ती, रंगीच्या ओढ्याच्या दोन्ही बाजूकडील रहिवासी परिसर, मांजरी – मुंढवा रोड, झेड कॉर्नर पर्यंतचा परिसर, मोरे वस्ती, भापकरमळा, शेवाळवाडी या परिसरात लोकसंख्येच्या प्रमाणात जवळपास 5 ते 6 पाण्याच्या टाक्यांची उभारणी करून त्यासोबतच आवश्यक ते मुख्य व अंतर्गत जलवाहिन्यांचे जाळे उभे करणेही गरजेचे आहे. अशी प्रमुख मागणीही यावेळी करण्यात आली.
यासोबतच जलवाहिन्यांची कामे होत असताना ती दर्जेदार व पारदर्शक पद्धतीने कशी होतील, यासाठी प्रशासनाने त्यावर प्रत्यक्ष नियंत्रण ठेवणे आवश्यक आहे. अशी अपेक्षाही व्यक्त करण्यात आली.

पुणे, दि.२७ : पुण्यश्लोक अहिल्यादेवी होळकर यांच्या ३०० व्या जयंती वर्षानिमित्त शनिवार ३१ मे रोजी बालगंधर्व रंगमंदिर पुणे येथे दुपारी १२.३० वाजता भव्य सांस्कृतिक महोत्सवाचे आयोजन करण्यात आले आहे. या कार्यक्रमाला विनामूल्य प्रवेश असून सर्व नागरिकांनी कार्यक्रमाचा लाभ घ्यावा असे आवाहन करण्यात आले आहे.

कार्यक्रमाचे आयोजन सांस्कृतिक कार्य विभाग, महाराष्ट्र शासन आणि पुण्यश्लोक फाउंडेशन, पुणे यांच्या संयुक्त विद्यमाने करण्यात आले आहे. कार्यक्रमाच्या अध्यक्षस्थानी महाराष्ट्राचे सांस्कृतिक कार्य मंत्री ॲड.आशिष शेलार असणार आहेत. कार्यक्रमाला मुख्यमंत्र्याचे तथा सांस्कृतिक कार्य विभागाचे अपर मुख्य सचिव विकास खारगे यांचे मार्गदर्शन लाभले आहे.

कार्यक्रमाची रूपरेषा पुढीलप्रमाणे- दुपारी १२.३० ते १.०० वा. स्वागत सत्र, १.०० ते १.३० शाहिरी पोवाडा, १.३० ते २.३० उद्घाटन, मान्यवर सत्कार व मनोगत आणि संध्याकाळी २.३० ते ५.१० वाजता पुण्यश्लोक महानाट्य सादर केले जाईल. पुण्यश्लोक अहिल्यादेवी होळकर ह्या केवळ राज्यकर्त्या नव्हत्या तर प्रजाहितदक्ष होत्या. त्यांनी अनेक घाट, मंदिरांचा जिर्णोद्धार, पानपोई, धर्मशाळा आदी अनेक कामे केली आहेत. त्यांच्या कार्याचे स्मरण म्हणून हा कार्यक्रम आयोजित करण्यात आला आहे.

या सोहळ्यात शाहिरी पोवाडा, भारूड, वासुदेव यांसारखे पारंपरिक सांस्कृतिक कार्यक्रम लोककलाकर सादर करणार आहेत, तसेच पुण्यश्लोक अहिल्यादेवी होळकर यांच्या जीवनावर आधारित महानाट्य हे विशेष आकर्षण असणार आहे, असे सांस्कृतिक कार्य संचालक विभीषण चवरे यांनी कळविले आहे.
0000

पुणे, दि. २७: केंद्र शासनाच्या इलेक्ट्रॉनिस आणि माहिती तंत्रज्ञान विभागाच्या राष्ट्रीय इलेक्ट्रॉनिक्स आणि माहिती तंत्रज्ञान संस्थेत (एनआयईएलआयटी) या नामांकित प्रशिक्षण संस्थेद्वारे औद्योगिक व उन्नत कौशल्य विकासासाठी, महाराष्ट्र संशोधन, उन्नती व प्रशिक्षण प्रबोधिनी (अमृत) संस्थेमार्फत नि:शुल्क प्रशिक्षण देण्यात येणार आहे. याकरीता खुल्या प्रवर्गातील इच्छुक विद्यार्थ्यांनी ऑनलाइन पद्धतीने अर्ज करण्याचे आवाहन करण्यात येत आहे.

खुल्या प्रवर्गातील ब्राह्मण, मारवाडी, राजपूत, गुजराती, कम्मा, कायस्थ, बंगाली, कोमटी, आर्य वैश्य, सिंधी, ठाकूर, येलमार, त्यागी, सेनगूथर, बनिया, राजपुरोहित, नायर, आयंगार, नायडू, पाटीदार या जातीतील विद्यार्थ्यांना कोणत्याही शासकीय विभाग, संस्था किंवा महामंडळामार्फत योजनांचा लाभ मिळत नाहीत, अशांना प्रशिक्षण देण्यात येणार आहे.

अर्जदार लक्षित गटातील असावा, महाराष्ट्राचा रहिवासी असावा, अर्जदाराच्या कुटुंबाचे एकत्रित उत्पन्न आठ लाख रुपयाच्या आत असावे. विद्याथ्यांनी अभियांत्रिकी पदविधारक (आयटी,संगणक विज्ञान, इलेक्ट्रानिक्स, टेलीकम्युनिकेशन, इलेक्ट्रीकल, इन्स्युमेंटेशन अथवा बीएस्सी, बीएसए, बीसीएस, एमएस्सी (संगणक विज्ञान) एमसीए आदी पदवी उत्तीर्ण असावा. अर्जदार अमृतच्या लक्षित गटातिल असावा.

अर्ज करण्याकरीता आधार कार्ड, अधिवास प्रमाणपत्र (वय, राष्ट्रीय आणि रहिवाशी प्रमाणपत्र), अमृत लक्षित गटातील जातीचा उल्लेख असलेला शासकीय पुरावा. ८ लाख रुपयाच्या खालील उत्पन्नाचे प्रमाणपत्र किंवा आर्थिक दुर्बल घटक प्रमाणपत्र (२०२५-२६), तसेच शैक्षणिक अर्हतेचे प्रमाणपत्राची कागदपत्रांची आवश्यकता आहे.

एनआयईएलआयटी संस्थेच्या संकेतस्थळावर अमृत प्रशिक्षण योजनेसाठी गुगल लिंक उपलब्ध करुन देण्यात येणार आहे. अमृत संस्थेच्या https://mahaamrut.org.in आधार संलग्र मोबाइल क्रमांकाद्वारे नोंदणी करावी. संकेतस्थळाच्या मुख्य पृष्ठावरील योजना या टॅबमध्ये जाऊन एनआयईएलआयटी प्रशिक्षण योजना हे बटनावर क्लि करून अर्जाची नोंदणी करावी.

टपालाने किंवा ईमेलद्वारे प्राप्त अर्जाचा विचार केला जाणार नाही. जाहिरात रद्द किंवा मुदतवाढीबाबत तसेच अर्ज नाकारणे व स्विकारणे, निवडीची पद्धत बदलणे याबाबतचे सर्व अधिकार व्यवस्थापकीय संचालक अमृत, यांचेकडे राहतील. कोणत्याही माध्यमातून व अंतिम निवड प्रक्रियच्या दरम्यान किंवा प्रशिक्षणाच्या कोणत्याही टप्प्यावर उमेदवारांनी सादर केलेली माहिती चुकीची, दोषपूर्ण दिशाभूल करणारी असल्यास विद्यार्थ्यांची निवड रद्द करण्यात येईल. अर्ज भरताना कोणत्याही अडचणी आल्यास info@mahaamrut.org.in या मेल वर अथवा मोवाइल क्र. ९७३०१५१४५० संपर्क करावा, एनआयईएलआयटी संस्थेच्या अधिकृत संकेतस्थळावर भेट द्यावी, असे आवाहन ‘अमृत’चे व्यवस्थापकीय संचालक विजय जोशी यांनी केले आहे.

 एमआयटी एडीटी विद्यापीठात आंतरराष्ट्रीय शिखर संमेलन

पुणे:  भारतासह एकंदर जगातील शिक्षणाचे महत्व आणि परिभाषा बदल आहे. सध्याचे शिक्षण हे विद्यार्थ्यांना कौशल्ये प्रदान करून त्यांना रोजगाराच्या संधी उपलब्ध करून देण्यावर भर देते. त्यामुळे, एकंदरशिक्षणाचे भवितव्य हे केवळ तंत्रज्ञानावर नव्हे, तर विद्यार्थ्यांच्या गरजा समजून घेणाऱ्या अध्यापनशैलीत दडलेले आहे,” असे मत एमआयटी एडीटी विद्यापीठाचे कुलगुरु प्रा. डॉ. राजेश एस. यांनी मांडले.

ते एमआयटी आर्ट, डिझाईन अँड टेक्नॉलॉजी विद्यापीठ, पुणे आणि इंटरनॅशनल सोसायटी फॉर एज्युकेशनल लीडरशिप (आयएलईएल) यांच्या संयुक्त विद्यमाने, तसेच केम्ब्रिज युनिव्हर्सिटी प्रेस अँड असेसमेंट, लंडन यांच्या सहकार्याने आयोजित ‘ईएलटी समिट २०२५’ या दोन दिवसीय आभासी आंतरराष्ट्रीय शिखर संमेलनाच्या उद्घाटन कार्यक्रमात बोलत होते.  

विद्यापीठाचे कार्यकारी अध्यक्ष प्रा. डॉ. मंगेश कराड आणि आयएलईएलचे अध्यक्ष डॉ. कृष्णमूर्ती यांच्या मार्गदर्शनाखाली झालेल्या या शिखर परिषदेस शैक्षणिक क्षेत्रातील मान्यवर आणि तज्ज्ञांची उपस्थिती लाभली. यावेळी परिषद अध्यक्ष डॉ. तरुण पटेल, संयोजक डॉ. अतुल पाटील यांच्यासह डॉ. क्रिस्टिन हॅन्सन (युनिव्हर्सिटी ऑफ कॅलिफोर्निया, बर्कले, अमेरिका), डॉ. हुआहुई झाओ (युनिव्हर्सिटी ऑफ लीड्स, यूके), एरिक एच. रोथ, सारा डाविला, डॉ. इल्का कोस्ट्का, रिचर्ड जोन्स (यूएसए) यांसह आंतरराष्ट्रीय स्तरावरील तज्ज्ञ वक्त्यांनी सहभाग घेतला. यासह, शैक्षणिक प्रकाशन क्षेत्रातील इयान काउले, प्रा. जोआना स्जोक, आणि जोशुआ ग्नानक्कन (केम्ब्रिज युनिव्हर्सिटी प्रेस अँड असेसमेंट) हेही या परिषदेचे विशेष आकर्षण ठरले.

“Linguistics and Poetics as an Antidote to the Virtual” या विषयावर उद्घाटनपर व्याख्यान देताना डॉ. हॅन्सन यांनी साहित्याच्या संवेदनशीलतेचे आणि मानवी मूल्यांचे तंत्रज्ञान युगातील महत्त्व अधोरेखित केले. तसेच, डॉ. झेड. एन. पाटील, माजी अध्यक्ष, ईटीटीएआय पुणे यांना ईएलटी क्षेत्रातील दीर्घकालीन कार्यासाठी ‘आयएसईएल लाईफटाईम अचिव्हमेंट अवॉर्ड’ने गौरविण्यात आले.

या समिटमध्ये भारत, अमेरिका, कॅनडा, बांगलादेश, भूतान, फिलीपिन्स व ऑस्ट्रेलिया या देशांमधून आलेल्या १२१ हून अधिक शोधनिबंधांपैकी ८० शोधनिबंध सादरीकरणासाठी निवडण्यात आले होते. एआयचा ब्लेंडेड आणि हायब्रिड क्लासरूममध्ये वापर, चॅटजीपीटी पलिकडील एआय अनुप्रयोग, बहुभाषिक संदर्भात एआयचा उपयोग, आदी विषयांवर सखोल चर्चा झाली.

समारोप समारंभात मॉडर्न कॉलेज ऑफ बिझनेस अँड सायन्स, मस्कत (ओमान) येथील डॉ. आरती मुजुमदार आणि प्रा. पाटील यांनी एआय आणि भाषा अध्यापनातील समकालीन बदल व आव्हानांवर भाष्य केले. उद्घाटन सत्राचे सूत्रसंचालन डॉ. अशोक घुगे आणि प्रा. अमिषा जयकर यांनी केले, तर समारोप सत्राचे सूत्रसंचालन प्रा. स्नेहा वाघटकर आणि डॉ. स्वप्नील शिरसाठ यांनी केले.