पंढरपूर – करिता देवार्चन, घरा आले संतजन…देव सारावे परते, संत पुजावे आरते…या संतवचनाप्रमाणे संत ज्ञानेश्वर महाराज व जगद््गुरू संत तुकाराम महाराज यांच्यासह विविध संतांच्या पालख्या दशमीच्या दिवशी संध्याकाळी तीर्थक्षेत्र पंढरीत दाखल झाल्या. विठ्ठलाच्या दर्शनासाठी राज्याच्या कानाकोपऱ्यातून तसेच शेजारील कर्नाटक, आंध्र प्रदेश, तेलंगण आणि मध्य प्रदेशातून रेल्वे, एसटी आणि खासगी वाहनांमधून लाखोंच्या संख्येने वारकरी येथे दाखल झालेले आहेत.

यंदा सुमारे १५ लाखांहून अधिक भाविक येण्याचा अंदाज बांधून प्रशासनाने जय्यत तयारी केलेली आहे. दरम्यान, ज्ञानेश्वर माउली व तुकोबारायांच्या पालख्यांचे गुरुवारी संध्याकाळी पंढरीनगरीत आगमन झाले. विठ्ठल-रुक्मिणी मंदिर समितीच्या वतीने सर्व पालख्यांचे विसावा येथील विठ्ठल मंदिराजवळ स्वागत करण्यात आले.

मुख्यमंत्र्यांच्या हस्ते महापूजा 
विठ्ठलाच्या शासकीय महापूजेसाठी मुख्यमंत्री देवेंद्र फडणवीस यांचे गुरुवारी पंढरपुरात सपत्नीक आगमन झाले. शुक्रवारी पहाटे २.१० मिनिटांनी त्यांच्या हस्ते महापूजा होईल. मध्यरात्री १२.४५ वाजता पदस्पर्श दर्शन बंद केले जाईल. महापूजेनंतर ३.३० ते ४.१५ वाजेपर्यंत मुख्यमंत्र्यांच्या हस्ते मानाच्या वारकरी दांपत्याचा सत्कार व विविध दिंडीप्रमुखांना निर्मलवारी पुरस्कार प्रदान केला जाईल. मात्र, या कार्यक्रमाचा पदस्पर्श दर्शनाला कोणताही अडथळा होणार नाही, असे मंदिर समितीचे कार्यकारी अधिकारी ढोले यांनी सांगितले.

चंद्रभागेतीरी लोटला अथांग जनसागर
आषाढी एकादशीच्या मुहूर्तावर चंद्रभागा नदीवरील स्नानाला विशेष महत्त्व असते. त्यामुळे चंद्रभागेच्या तीरावर लाखो वारकऱ्यांनी गर्दी केली आहे. गर्दीमुळे पुण्यनगरी पंढरीत वैष्णवांचा अथांग महासागर वाहत असल्याची अनुभूती येत आहे. सर्व प्रमुख रस्ते गर्दीने फुलून गेलेले आहेत.

दर्शनासाठी २० तासांचा कालावधी 
विविध ठिकाणांहून विठ्ठलाच्या ओढीने आलेल्या भाविकांच्या प्रचंड गर्दीमुळे विठ्ठलाच्या पदस्पर्श दर्शनासाठी सुमारे २० तासांहून अधिक कालावधी लागत आहे. मात्र, यंदा मंदिर प्रशासनाने चोख व्यवस्था केल्याने भाविकांचे दर्शन सुलभरीत्या होत आहे.

लवकरच संचालक पदाचा अतिरिक्त पदभार मिळण्याची शक्यता..!

मुंबई- माहिती व जनसंपर्क महासंचालनालयाच्या वरिष्ठ सहायक संचालक श्रीमती मीनल जोगळेकर यांची सांस्कृतिक कार्य संचालनालयाच्या सह संचालक पदी नियुक्ती करण्यात आली आहे.लवकरच त्यांच्याकडे संचालक पदाचा अतिरीक्त पदभार मिळण्याची शक्यता असल्याचे सूत्रांकडून समजते.

गेले अनेक महिन्यापासून सांस्कृतिक कार्य संचालनालयाचे सह संचालक पद रिक्त होते.त्यामुळे दैनंदिन कामकाजाचा भार हा सर्व संचालकांवर येत होता.

सध्या  सांस्कृतिक कार्य विभाग आणि सांस्कृतिक कार्य संचालनालयामध्ये जोरदार शीतयुद्ध सुरू आहे.संचालनायच्या कारभारावर मंत्रालयातील वरिष्ठ अधिकारी प्रचंड नाराज असल्याचे कळते.म्हणून या मनमानीला चाप लावण्यासाठी सांस्कृतिक कार्य मंत्री कार्यालयाने आपले  वजन वापरून माहिती व जनसंपर्क महासंचालनालयातून प्रतिनियुक्तवर श्रीमती जोगळेकर यांची सह संचालक पदी तातडीने नियुक्ती केली आहे.

लवकरच त्यांच्याकडे सांस्कृतिक कार्य संचालनालायच्या संचालक पदाचा अतिरिक्त पदभार येण्याची शक्यता असल्याची जोरदार चर्चा मंत्रालयात सुरू आहे.

मुंबई / सोलापूर. ( शाहरुख मुलाणी ) – ब्राह्मण समाजातील विविध समस्या सोडवण्यासाठी लवकरात लवकर परशुराम आर्थिक विकास महामंडळाची स्थापना करण्याचे आश्‍वासन मुख्यमंत्री देवेंद्र फडणवीस यांनी दिल्याची माहिती समस्त ब्राह्मण समाज समन्वय समितीचे समन्वयक प्रा. काकासाहेब उर्फ मनोज  कुलकर्णी यांनी दिली.

मुख्यमंत्री सोलापूर दौर्‍यावर आले असता प्रा. काकासाहेब कुलकर्णी यांनी त्यांची भेट घेऊन त्यांना विविध मागण्यांचे निवेदन दिले.  22 जानेवारी रोजी मुंबईतील आझाद मैदानावर समस्त ब्राह्मण समाजाच्या वतीने  परशुराम आर्थिक विकास महामंडळाची स्थापना करणे, पौरोहित्य करणार्‍या ब्राह्मणांना मानधन देणे, ब्राह्मण विरोधी लिखाणावर बंदी घालणे, पंढरपुरातील बडवे आणि उत्पात यांना पुन्हा मंदिरात सामावून घेणे यासह विविध मागण्यांसाठी आंदोलन केले होते. त्यावेळी आपण सर्व मागण्या मान्य केल्या. मात्र त्याची अंमलबजावणी अद्याप झाली नाही, असे कुलकर्णी यांनी सांगत मुख्यमंत्र्यांना निवेदन दिले. त्यावर मुख्यमंत्री देवेंद्र फडणवीस यांनी सर्व मागण्या लवकरच मान्य करण्यात येतील असे सांगत परशुराम आर्थिक विकास महामंडळ लवकरात लवकर सुरू करू असे आश्‍वासन दिल्याचे कुलकर्णी यांनी सांगितले. मुख्यमंत्र्यांचे सचिव अभिमन्यू पवार यांनी मुख्यमंत्र्यांची भेट घेण्यासाठी सहकार्य केले. यावेळी  शहर समन्वयक विक्रम डोनसळे, पौरोहित्य आघाडीचे मधुकर कुलकर्णी, उमेश काशीकर, युवा नेते अजित कुलकर्णी, सचिन वेणेगुरकर, श्याम पुजारी, अक्कलकोटचे योगेंद्र पुजारी यांच्यासह बहुसंख्य समाजबांधव उपस्थित होते.

मुंबई. ( शाहरुख मुलाणी ) – मुख्यमंत्री देवेंद्र फडणवीस यांनी ब्राह्मण समाजाच्या मागण्या तत्वतः मान्य केल्याचे सांगितले असताना देखील अद्याप कोणतीही कार्यवाही होत नसल्यामुळे मागण्या मान्य होण्यासाठी समस्त ब्राह्मण समाजाने पुन्हा एकदा कंबर कसली असून आता खुद्द मुख्यमंत्र्यांच्या मतदारसंघात नागपूर येथील संविधान चौकात 03 ऑगस्ट 2019 रोजी सकाळी 11.00 वाजता घंटानाद आंदोलनाचे आयोजन करण्यात आले असून यात एकूण 80 संघटनांनी एकत्र असल्याची माहिती आमच्या सूत्रांकडून मिळालेली आहे.

समस्त ब्राह्मण समाज महाराष्ट्र च्या वतीने नागपूर येथे सर्व संघटना प्रतिनिधींची बैठक आयोजीत करण्यात आली होती. ब्राह्मण समाजाच्या वतीने दि. 22 जानेवारी 2019 रोजी मुंबई येथे आझाद मैदानात धरणे आंदोलन करण्यात आले होते. यावेळी मुख्यमंत्री श्री देवेंद्र फडणवीस यांनी ब्राह्मण समाजाच्या मागण्या तत्वतः मान्य केल्याचे सांगितले होते. परंतु, आजतागायत या मागण्यांवर कोणतीही कारवाई झाली नाही. ब्राह्मण समाजाने स्वतंत्र आर्थिक विकास महामंडळ, पुरोहितांना मानधन, महापुरुषांच्या बदनामी विरोधी कायदा, वर्ग 2 जमिनी वर्ग 1 करण्यासाठी कायदा, स्वातंत्र्यवीर सावरकरांना भारतरत्न पुरस्कार, श्री दादोजी कोंडदेव व श्री राम गणेश गडकरी यांचे पुतळे पुन्हा सन्मानाने प्रस्थापित करणे, प्रत्येक जिल्ह्यात वसतिगृह, पेशवे बाळाजी विश्वनाथ यांचे श्रीवर्धन येथील स्मारकाचे काम पूर्ण करणे, छत्रपती शिवाजी महाराजांचे अरबी समुद्रातील स्मारक लवकरात लवकर पूर्ण करणे, शनिवार वाडा येथे श्रीमंत बाजीराव पेशव्यांच्या 44 लढायांचे युद्ध स्मारक निर्माण करणे या सर्व मागण्या मान्य होण्यासाठी समस्त ब्राह्मण समाजाने पुन्हा एकदा कंबर कसली असून आता खुद्द मुख्यमंत्र्यांच्या मतदारसंघात नागपूर येथील संविधान चौकात 03 ऑगस्ट 2019 रोजी सकाळी 11.00 वाजता घंटानाद आंदोलनाचे आयोजन करण्यात आले आहे या आंदोलनात समाजबांधवांनी मोठ्या संख्येने सहभागी व्हावे असे आवाहन समन्वय समिती च्या वतीने विश्वजीत देशपांडे, सौ. अर्चना देशमुख, मनीष द्विवेदी, रामनारायण मिश्रा आदींनी केले असल्याचे कळत आहे.

ब्राह्मण समाजाच्या मागण्यांबाबत 04 निवेदनाद्वारे राजस्थान, तेलंगणा, आंध्रप्रदेश, कर्नाटक आदी राज्यांनी काय काय योजना केला आहेत त्याचे अभ्यास पूर्ण असे त्याच धर्तीवर 130 पानांचा अहवाल मुख्यमंत्री देवेंद्र फडणवीस यांना परशुराम सेवा संघाचे अध्यक्ष विश्वजित देशपांडे यांनी दिले आहे. तसेच एकूण 13 ब्राह्मण समाजाचे आमदार असून त्यापैकी 04 आमदारांची बैठक मुंबई मध्ये आमदार मनीषा कायंदे, सुधीर गाडगीळ, संजय केळकर, राज पुरोहित यांच्या सहित झाली होती. अशी माहिती सूत्रांकडून मिळालेली आहे.

मुंबई:

कोणत्याही कारणांनी वीजपुरवठा खंडित झाल्याने ग्राहकांना मोठा त्रास सहन करावा लागतो. ही बाब लक्षात घेऊन गेल्या तीन-चार वर्षांत वीज वितरण क्षेत्रात झालेल्या चांगल्या कामांच्या बळावर ग्राहकांना अखंडित वीजपुरवठा देण्यासाठी काम करा, अशा सूचना ऊर्जामंत्री ना. श्री. चंद्रशेखर बावनकुळे यांनी दिल्या. तसेच या कामात कुचराई करणाऱ्या अधिकारी व कर्मचाऱ्यांवर कारवाई करण्याचा इशाराही त्यांनी दिला.

महावितरणच्या राज्यभरातील वरिष्ठ अधिकाऱ्यांशी आज मुंबई मुख्यालयातून व्हिडीओ कॉन्फरन्सिंगद्वारे आयोजित बैठकीत ना. ऊर्जामंत्री बोलत होते. या बैठकीस प्रधान ऊर्जा सचिव श्री. अरविंद सिंग, महावितरणचे अध्यक्ष व व्यवस्थापकीय संचालक श्री. संजीव कुमार, महाराष्ट्र राज्य वीज मंडळ सूत्रधारी कंपनीचे संचालक श्री. विश्वास पाठक, संचालक (संचालन) श्री. दिनेशचंद्र साबू, संचालक (प्रकल्प) श्री. भालचंद्र खंडाईत, संचालक (मा.सं) ब्रिगेडियर श्री. पवन कुमार गंजू उपस्थित होते. ऊर्जामंत्री ना. श्री. बावनकुळे म्हणाले, सध्या अतिरिक्त वीज उपलब्ध असतांनाच्या कालावधीत मोठ्या शहरातील खंडित विजेचे प्रमाण शून्यावर आले पाहिजे. त्यादृष्टीने नियोजन करून प्राधान्यक्रम ठरवावेत व त्यानुसार काम करावे. मुख्य अभियंता, अधीक्षक अभियंता यांनी आपापल्या कार्यक्षेत्रात दौरे करून वीज ग्राहकांच्या समस्या जाणून घ्याव्यात व स्थानिक अधिकाऱ्यांच्या समन्वयातून त्या सोडवाव्यात. ग्रामीण भागात यावर्षी पावसाळ्याच्या सुरुवातीला मोठ्या प्रमाणात विजेचे खांब पडले आहेत. यापुढे ग्रामीण भागातही नवीन तंत्रज्ञानाचा वापर करून विजेचे खांब उभारण्याची कामे करावीत, अशा सूचना त्यांनी यावेळी दिल्या.

अध्यक्ष तथा व्यवस्थापकीय संचालक श्री. संजीव कुमार यांनी सांगितले  की, मोठ्या वीज ग्राहकांचा वीजपुरवठा थोड्या कालावधीसाठी खंडित झाला तरी त्यांचे प्रचंड नुकसान होते. त्यामुळे अशा ठिकाणी महिन्यातून एकदाच देखभाल-दुरुस्तीची कामे करावीत व यासंदर्भात संबंधित ग्राहकांना प्रणालीद्वारे माहिती द्यावी. तसेच  बैठकीत एकात्मिक ऊर्जा विकास, पंडित दीनदयाळ उपाध्याय ग्रामज्योती, उच्चदाब वीज वितरण प्रणालीद्वारे कृषिपंपांना जोडणी, मुख्यमंत्री सौर कृषिपंप आदी योजनांच्या कामांचा आढावा घेऊन आवश्यक त्या सूचना देण्यात आल्या.

महावितरणच्या पेमेंट वॉलेटचे लोकार्पण

वीज ग्राहकांना विशेषतः ग्रामीण भागात वीजबिल भरणे अधिक सुलभ व्हावे, यासाठी महावितरणने स्वतःचे डिजिटल पेमेंट वॉलेट तयार केले आहे. या वॉलेटचे ऊर्जामंत्री ना. श्री. बावनकुळे यांच्या हस्ते प्रकाशगड मुंबई येथे महावितरणच्या मुख्यालयात व्हिडीओ कॉन्फरन्सिंगद्वारे लोकार्पण करण्यात आले. वॉलेटमुळे ग्राहकांना वीजबिल भरण्याच्या सोयीसोबतच देयकाच्या वसुलीतून मिळणाऱ्या कमिशनच्या माध्यमातून  अनेकांना उत्पन्नाचे नवीन साधन उपलब्ध होणार आहे.