पुणे : “शिक्षणाबरोबर नृत्य, गायन, वादन आदी कला शिकणे आवश्यक आहे. शास्त्रीय नृत्य प्रकार आज शिक्षणामध्ये समाविष्ट केले आहेत. यावरून आपल्याला कला किती महत्त्वाचे आहे, हे जाणवते. त्यामुळे प्रत्येकाने आयुष्यात शिक्षणाबरोबरच एखादी तरी कला आत्मसात करायला हवी,” असे प्रतिपादन अखिल भारतीय कथ्थक तज्ज्ञ डॉ. नंदकिशोर कपोते यांनी केले.

तान्हुराम कल्याणकारी संस्थेच्या वतीने आयोजित पेरीयार ई. व्ही. रामास्वामी नायकन (दक्षिणेचे ज्योतिबा फुले) सामाजिक पुरस्कार व कर्मवीर भाऊराव पाटील शैक्षणिक पुरस्कार वितरण सोहळ्यात डॉ. कपोते बोलत होते. सावित्रीबाई फुले सभागृहात झालेल्या या सोहळ्यावेळी सर्वोच्च न्यायालयातील वकील ऍड. आशुतोष रानडे, प्रसिद्ध वक्ते आणि महाराष्ट्र विद्यार्थी सहायक मंडळाचे सचिव डॉ. विकास आबनावे, माजी सिनेट सदस्य डी. जी. कांबळे, संस्थेचे सचिव म्हस्कू अडागळे, संचालक अॅड. वैशाली भोसले, नितीन भोसले आदी उपस्थित होते.

डॉ. नंदकिशोर कपोते म्हणाले, “अलीकडे विद्यार्थ्यांना कोणताही कला प्रकार शिकला, तर परीक्षेत त्याचे १५ ते २० गुण दिले जात आहेत. त्यामुळे अनेक विद्यार्थी कलेकडे वळत असून, भरतनाट्यम, कथक शिकत आहेत. ही अभिमानाची गोष्ट आहे. विद्यार्थ्यांनी शिक्षणाबरोबर कला जोपासल्यामुळे त्याचा सर्वांगीण विकास होतो. त्यामुळे कलेला महत्व देणे गरजेचे आहे. पेरियार रामास्वामी आणि भाऊराव पाटील यांचे कार्य आपल्या सर्वांसाठी प्रेरणादायी आहे.”

डॉ. विकास आबनावे म्हणाले, “रामास्वामी नायकन यांनी दक्षिणेतील अनिष्ट प्रथांविरोधात लढा उभारला. त्यांच्या नावाने दिल्या जाणाऱ्या पुरस्काराने तरुणांना सामाजिक कार्यासाठी प्रेरणा मिळेल. भाऊराव पाटील यांनी शैक्षणिक क्षेत्रात उभारलेले काम अतुलनीय आहे. काम करुन शिका, असा संदेश देत कर्मवीरांनी रयत शिक्षण संस्थेच्या माध्यमातून समाज घडविला. त्यांनी मूलभूत शिक्षण देऊन समाजाला शहाणे केले. आज मात्र शिक्षणाचे बाजारीकरण होत आहे, हे दुर्दैव आहे. पेरीयार रामास्वामी आणि भाऊराव पाटील दोघेही शापित गंधर्व होते.”

अॅड. आशुतोष रानडे म्हणाले, “शिक्षणाबरोबर काम करणे गरजेचे आहे. त्यामुळे विद्यार्थ्यांना कष्टाची जाणीव होते, तसेच अभ्यास करत असताना विद्यार्थ्यांनी इतर गोष्टीचाही आनंद घेतला पाहिजे. नाट्य, चित्रपट किंवा छंद, आवडीनिवडी अश्या गोष्टीही जपल्या पाहिजेत. अभ्यास एक अभ्यास अशा गोष्टी न करता इतर गोष्टींनाही आयुष्यात महत्त्व देणे गरजेचे आहे. कमवा आणि शिका हाच खरा आयुष्य घडविण्याचा मार्ग आहे.”

सामाजिक, कृषी, शिक्षण आदी क्षेत्रांमध्ये उत्कृष्ट काम केलेल्या मान्यवरांचा सन्मान या दोन्ही पुरस्कारांनी करण्यात आला. वैशाली भोसले यांनी प्रास्ताविक केले. भैरवनाथ कानडे यांनी सूत्रसंचालन केले. नितीन भोसले यांनी आभार मानले.

पुणे : राष्ट्रवादी कॉंग्रेसकडून खडकवासला विधानसभा मतदारसंघ लढविण्यासाठी 8 जण इच्छूक होते. मात्र, प्रदेशाध्यक्षांनी ऐन मुलाखती वेळी सूचना करत मतदारसंघातून केवळ तीनच जणांची नावे सर्वानुमते देण्याची सूचना केल्याने या मतदारसंघातील इतर पाच इच्छूकांची चांगलीच कोंडी झाली. त्यानंतर सर्वानुमते, महिला प्रदेशाध्यक्षा रूपाली चाकणकर, महापालिकेचे विरोधीपक्ष नेते दिलीप बराटे आणि नगरसेवक सचिन दोडके यांची नावे देण्यात आली, तसेच या सर्वांनी मुलाखतीही दिल्या. मात्र, इतर सात मतदारसंघातील इच्छूकांचे एकमत न झाल्याने त्यां सर्वांनी मुलाखती दिल्या. त्यात माजी महापौर तसेच पक्षाचे पदाधिकारी राहिलेल्या इच्छूकांची संख्या लक्षणीय होती. तर मुलाखती असलेल्या उमेदवारांनीही यावेळी जोरदार शक्ती प्रदर्शन करत लक्ष वेधण्याचा प्रयत्न केला.

प्रदेशाध्यक्ष जयंत पाटील यांनी रविवारी पुण्यात राष्ट्रवादीच्या आठ विधानसभा मतदारासंघातील इच्छूकांच्या मुलाखती घेतल्या, आमदार विद्या चव्हाण यांच्यासह, शहराध्यक्ष चेतन तुपे यांनी या मुलाखती घेतल्या. यावेळी प्रत्येकच मतदारसंघात उमेदवारांची संख्या जास्त असल्याने प्रदेशाध्यक्षांनी प्रत्येक मतदारसंघातील इच्छूकांना एकत्र बसून प्रत्येकी 3 नावे सुचविण्याच्या सूचना केल्या. खडकवासला मतदारसंघतील आठही इच्छूकांच्या मुलाखती झाल्यानंतर प्रदेशाध्यक्ष पाटील यांनी यांनी या सर्वांना तुम्ही एकत्र बसून एक नाव निश्‍चित केले तर चांगले होईल तसेच एक नाव निश्‍चित होत नसेल तर तीन नावे निश्‍चित करावी अशा सूचना केल्या. त्यानंतर हे सर्व इच्छूक एकत्र बसून त्यांनी ही तीन नावे निश्‍चित केली.

पुणे  :- गांजाची तस्करी करण्याच्या आरोपावरून कात्रज परिसरात काल भारती विद्यापीठ पोलिसांनी धनंजय जाधव नावाच्या व्यक्तीला सुमारे साडेसात किलो गांजासह रंगेहात पकडले .

पो उप निरीक्षक सुबराव लाड, पो हवालदार बढे, कुंदन शिंदे, सर्फराज देशमुख, पो नाइक  पवार ,पो. शिपाई . राहुल तांबे, चिचंकर, मंडलीक, अभिजीत जाधव, व रत्नपारखी असे पोलीस मांगडेवाडी, गुजरवाडी भागात खाजगी वाहनाने पेट्रोलिंग करत असताना मुस्तान हॉटेलच्या जवळ, जाधवनगर येथे आले असता, एक ग्रे रंगाचे जाकीट घातलेला इसम हा त्याच्या पाठीवर काळे रंगाची बॅग घेवुन संशयीत रित्या दिसला. त्या इसमास पोलीसाची चाहुल लागताच तो पोलीसांना पाहुन तो पळु लागल्याने त्याला थोड्याच अतंरावर  त्याचा पाठलाग करुन पकडले. त्याला त्याचे नाव पत्ता विचारले असता ना त्याने त्याचे नाव घंनजय रामा जाधव,वय २५ वर्षे, रा. साळुखे यांच्या भारतनगर येथील खोलीत, निंबाळकरवस्ती, कात्रज पुणे मूळ रा.सिध्दनाथवाडी, ता वाई, जि. सातारा असे सांगितले.त्याच्या बॅग मध्ये काहीतरी संशयास्पद वस्तू असल्याचा संशय आल्याने बॅगची तपासणी केली असता, त्याच्या बॅग मध्ये खाकी रंगाच्या चिकट पटी चिटकविलेले तीन बॉक्स मिळुन आले, तसेच त्याच्या खाली निळ्या रंगाची कापडी लहान आकाराचे पिशवी व त्याच्या आत हिरवा सुका-ओला बोंडासह पाला दिसला, त्याचा वास घेऊन पाहिला असता, गांजाचा वास येऊ लागला.सदरच्या पिशवीमध्ये गजा हा अंमली पदार्थ असल्याचे दिसल्याने लगीच पोलीस निरीक्षक गुन्हे श्री विष्णु ताम्हाणे यांना तपास पथकाने ब त्या ठिकाणी बोलावुन घेवुन त्यांनी खात्री करुन त्यांनीआरोपीच्या ताब्यातुन ०७ किलो ३९६ ग्रॅम वजनाचा गांजा, रेडमी कंपनीचा मोबाईल व रोख पंधराशे रुपये असा एकुण १, लाख ऐकोणिस हजार ४४० रुपयाचा माल जप्त करण्यात आला आहे.
गुन्ह्याचा तपास पो उप निरीक्षक सुबराव लाड हे करीत आहेत.सदरची कारवाई हि मा.श्री श्रीकांत तरवडे सो अप्पर पोलीस आयुक्त पश्चिम प्रादेशिक विभाग, मा.श्री सरदेशपांडे सो पोर्न स उप-आयुक्त परि-२ पुणे शहर, माएम एम पाटील सहा.पोलीस आयुक्त स्वारगेट विभाग पुणे, यांचे मार्गदर्शनाखाली व विष्णु ताम्हाणे पोलीस निरीक्षक (गुन्हे), यांच्या दिमतीत तपास पथकाचे अधिकारी पो.उप-निरीक्षक श्री. सुबराव लाड पोलीसहवालदार कृष्णा बढे, कुदंन शिंदे, सराज देशमुख,राहुल तांबे, गणेश चिंचकर, सचिन पवार,महेश मंडलिक, अभिजित जाधव, आणि अभिजित रत्नपारखी यांचे पथकाने कारवाई केलेली आहे.

पुणे – महाराष्ट्रातील महिलांमध्ये उद्योजकता व व्यवसायासंबंधी नवकल्पनांना प्रोत्साहित करण्याच्या हेतूने ‘हिरकणी नवउद्योजक महाराष्ट्राची’ ही योजना शासनामार्फत सुरु करण्यात आली आहे. या योजनेमध्ये भाग घेण्यास राष्ट्रीय ग्रामीण जीवनोन्नती अभियान (NRLM), राष्ट्रीय शहरी जीवनोन्नती अभियान (NULM), महिला आर्थीक विकास महामंडळ (MAVIM) व उमेद- महाराष्ट्र राज्य ग्रामीण जीवन अभियान (MSRLM) या अंतर्गत तयार केलेले पंचसूत्रीचे पालन करणारे ग्रामीण व शहरी भागातील महिला बचत गट पात्र असतील. या संधीचा लाभ सर्व महिला बचतगटांनी घ्यावा, असे आवाहन सहायक संचालक अनुपमा पवार यांनी केले आहे.

पुणे जिल्हयामध्ये या योजनेची अंमलबजावणी सुरु करण्यात आली असून पहिल्या टप्प्यांतर्गत जिल्हयातील सर्व तालुक्यांमध्ये माहिती सत्रांद्वारे स्पर्धेविषयी माहिती देण्यात येत आहे. या योजनेचा दुसरा टप्पा हा तालुकास्तरीय कल्पना सादरीकरणाचा असून यामध्ये विजयी होणा-या बचतगटांना प्रत्येकी रु.52 हजार 500 अर्थसहाय्य (रु.2 हजार 500 भत्त्यासह) उपलब्ध होणार आहे. तसेच जिल्हास्तरावरील कल्पना सादरीकरण सत्रात सहभागी होण्यास तालुकास्तरावरील विजयी बचतगट पात्र असणार आहेत.

जिल्हयातील सर्व तालुक्यांमध्ये सादरीकरणाची प्रक्रिया पूर्ण झाल्यानंतर जिल्हास्तरावर कल्पना सादरीकरण आयोजित करण्यात येईल व त्याद्वारे विजयी होणा-या बचतगटांना प्रत्येकी रुपये 2 लाख अर्थसहाय्य व प्रमाणपत्र देऊन गौरविण्यात येईल. तरी, या संधीचा लाभ सर्व महिला बचतगटांनी घ्यावा, असेही पुणे कौशल्य विकास, रोजगार व उदयोजकता विभागाच्या सहायक संचालक तथा हिरकणी योजनेच्या नोडल अधीकारी अनुपमा पवार यांनी कळविले आहे.