कॅटलिस्ट फाऊंडेशनतर्फे झालेल्या नेत्र तपासणी शिबिरास उदंड प्रतिसाद

पुणे . :- “समाजाप्रती देण्याची भावना जपणारी आपली महान भारतीय संस्कृती आहे. पैसा आणि प्रसिद्धीने माणूस कितीही मोठा झाला तरी त्याच्यातील दातृत्वाची भावना हीच त्याचे खरे कर्तुत्व सिद्ध करते. अशा दानशूर आणि दायित्व जपणाऱ्या कर्तुत्ववान व्यक्तीमत्वांच्या उपक्रमास प्रोत्साहन देणे हे मी माझे कर्तव्य समजते. ” अशा शब्दांत प्रसिद्ध अभिनेत्री सई ताम्हणकर यांनी भावना व्यक्त केल्या. मातोश्री हिराबाई माने यांच्या स्मरणार्थ कॅटलिस्ट फाऊंडेशनचे अध्यक्ष सुनील माने यांनी व्हिजन नेक्स्ट फाउंडेशनचे संचालक डॉ. अंबरीश दरक यांच्या सहयोगाने मोफत मोतीबिंदू शस्त्रक्रिया, मधुमेह व नेत्र तपासणी शिबीर एकूण तीन केंद्रात भरवले होते.या शिबिराच्या उदघाटन प्रसंगी त्या बोलत होत्या.

यावेळी आमदार विजय काळे, भाजप सरचिटणीस उज्वल केसकर, शहर सुधारणा समितीचे अध्यक्ष अमोल बालवडकर, नगरसेवकअविनाश साळवे,  उमेश गायकवाड, विजय शेवाळे, नगरसेवक प्रकाश ढोरे, आदित्य माळवे, डॉ. सुरेंद्र पाटील, माजी नगरसेवक श्रीकांत पाटील, बनी दालमिया, किरण साळी, विनोद सातव आदी उपस्थित होते. दळवी हॉस्पिटल (शिवाजीनगर), राजीव गांधी रुग्णालय (येरवडा) आणि व्हिजन नेक्स्ट फाउंडेशन आय हॉस्पिटल (बोपोडी) अशा एकूण तीन केंद्रावर हे शिबीर पार पडले. या शिबिरात सुमारे ५०० हून अधिक गरजू रुग्णांची नेत्र तपासणी करण्यात आली.

यावेळी माने म्हणाले की, समाजाकडून आपण खूप काही घेतो, मात्र आपल्यात देण्याची प्रवृत्ती वाढली पाहिजे. ‘मरावे परी, अवयव रुपी उरावे’ ही मानसिकता समाजात रुजली पाहिजे. आज असंख्य रुग्णांना डोळे ,मूत्रपिंड, यकृत यांसारख्या अवयवांची गरज आहे. परंतु, लोकांच्यामध्ये आजही अवयवदानाबद्दल जागरुकता नाही. या परिस्थितीत बदल झाला पाहिजे. या भावनेने आईचे मरणोत्तर नेत्रदान केले, स्वत:चे देहदान केले. आपल्या कार्यातून गरजू रुग्णांना फायदा व्हावा, या उद्देशाने घेतलेले शिबीर डॉ. दरक यांच्या अमूल्य सहकार्यामुळे यशस्वी झाले. आजच्या तपासणीनंतर ज्या रुग्णांमध्ये मोतीबिंदू आढळला आहे, त्यांच्यावर आम्ही मोफत शस्त्रक्रिया करणार आहोत.

दरक हे स्वत: सुप्रसिद्ध नेत्रशल्यचिकित्सक आहेत. ८५ हजारांहून अधिक शस्त्रक्रिया करून त्यांनी वेगळा विक्रम प्रस्थापित केला आहे. भविष्यातही कॅटलिस्ट फाऊंडेशनच्या माध्यमातून आम्ही यासारखे लोकाभिमुख उपक्रम राबवणार आहोत.

दरक म्हणाले की, स्वत:चे वैयक्तिक रुग्णालय बंद करून त्याहून अधिक समर्पकपणे व्हीजन नेक्स्ट फाउंडेशनच्या माध्यमातून नेत्र रुग्णांच्या सेवेचा वसा हाती घेतला. नेत्रदानाची चळवळ अधिक व्यापक झाली पाहिजे, हे ओळखून सुनील माने यांनी या कार्याला हातभार लावला. गरजू नेत्र रुग्णांसाठी त्यांनी राबवलेला हा उपक्रम स्तुत्य असून मलाही याचा भाग होता आले याचे समाधान वाटते.

समाजात सकारात्मक बदल घडवून आणण्याच्या उद्देशाने ‘कॅटलिस्ट फाऊंडेशनची’ स्थापना झाली असून खासदार गिरीश बापट हे या संस्थेचे पालक आहेत. लष्करी सेवेतून निवृत्त झालेले लेफ्टनंट जनरल डॉ. डी.बी. शेकटकर या संस्थेचे मेंटॉर आहेत. अण्णाभाऊ साठे यांच्यावरील पहिली वेबसाईट, सांगली पूरग्रस्तांना मदत, हृद्यरोगाची प्राथमिक लक्षणे याविषयी तज्ज्ञांचे व्याख्यान यांसारखे समाजपयोगी उपक्रम फाउंडेशनने राबवले आहेत.

नेत्रदानाच्या जनजागृतीसाठी पुढाकार : ताम्हणकर

रक्तदानाइतकेच नेत्रदान ही श्रेष्ठदान आहे. तुम्ही कमावलेला पैसा, संपत्ती नश्वर आहे परंतु, तुमच्या पश्चातही तुमच्या दृष्टीतून ही सुंदर सृष्टी कोणाला तरी अनुभवता येते, ही भावना चिरकाल टिकणारी आहे. सुनील माने आणि डॉ. दरक यांनी राबलेला हा उपक्रम अतिशय स्तुत्य असून त्यांच्या प्रेरणेतून मी ही नेत्रदानाचा निर्णय घेतला आहे. भविष्यात या कार्यात माझा सक्रीय सहभाग असेल, असे सई ताम्हणकर यांनी यावेळी सांगितले.

पुणे -पुणे फेस्टिव्हल अंतर्गत आज दि. ३ सप्टेंबर रोजी ६.३० वाजता बालगंधर्व रंगमंदिर येथे ‘रामायण बॅले’ हा कार्यक्रम सादर झाला. डॉ. शशिकला रवी आणि त्यांचे विद्यार्थी यांनी भरतनाट्यम् बॅलेच्या माध्यमातून प्रभू रामाची कथा ‘रामायण’ सादर केली. याची संकल्पना आणि नृत्यदिग्दर्शन डॉ शशिकला रवी यांची होती. या सादरीकरणासाठी महाराजा स्वाती तिरुनाल यांची रचना ‘भावयामी रघुराम’ जी रागमालिका आणि रूपक तालामध्ये होती. ही गाणी संस्कृतमध्ये होती आणि समजण्यास सुलभ होती.

रामायणातील विविध प्रसंग, जसे राक्षकांचा विनाश करण्यासाठी विश्वामित्र अयोध्येस येऊन प्रभू रामास निमंत्रण देतात, सीतेचे स्वयंवर, श्रीरामाचा वनवास, भरत यांची चित्रकूटात भेट, पंचवटीतील शुर्पणखेशी सामना, रावणाकडून सीतेचे अपहरण, श्रीरामांची हनुमान व सुग्रीवाशी मैत्री, वालीची हत्या, समुद्रावर पूल बांधणे, रावणाचा मृत्यू, सीतेची अग्नी परिक्षा आणि श्रीरामाचा पट्टाभिषेक हे प्रसंग सादर केले गेले.

संगीतकार होते – एन.एन. शिवप्रसाद, मृदंगम – एस शंकरनारायणन, व्हायोलिन – अनंतरमन रवी, आणि नट्टुवंगम – कार्तिका प्रसाद यांनी साथ संगत केली. डॉ.शशिकला रवी यांच्यासमवेत कार्तिका प्रसाद, रिया थॉमस, दक्षता जोशी, अनु मेनन आणि दक्षा पाठक यांनी नृत्याविष्कार सादर केले. या कार्यक्रमास प्रेक्षकांनी मोठा प्रतीसाद दिला.

याप्रसंगी पुणे फेस्टिव्हलतर्फे सांस्कृतिक कार्यक्रमांचे प्रमुख मोहन टिल्लू, उगवते तारे आणि इंद्रधनुचे संयोजक रवींद्र दुर्वे, बालगंधर्व रंगमंदिराचे पुणे फेस्टिव्हलचे समन्वयक श्रीकांत कांबळे आणि रवी चौधरी यांचा हस्ते कलाकारांचे सत्कार करण्यात आले.

पुणे-३१व्या पुणे फेस्टिव्हल अंतर्गत आज दि. ३ सप्टेंबर रोजी सायं ५ वाजता ‘कथक परंपरा’ हा कार्यक्रम बालगंधर्व रंगमंदिर येथे सादर झाला. यामध्ये नृत्यांगना अबोली अभ्यंकर – थत्ते यांचा मुख्य सहभाग होता. अबोली या ऋजुता सोमण यांच्या ज्येष्ठ शिष्यांपैकी एक आहेत. कथकचे मुघल काळात असलेले रूप व आजचे कथकचे बदललेले रूप हे या प्रस्तुतीकरणामधून सादर केले गेले.

कार्यक्रमाची सुरुवात ‘त्रीदेवी’ स्तुतीने झाली. त्यानंतर कृष्णावर आधारित एक युगल कीर्तन. कथकचे तांत्रिक अंग दर्शवणारा ‘ताल नील’ देखील प्रस्तुत केले गेले. कथक मधील अनोखा ‘चैलू चतरंग’ प्रस्तुत केला ज्यामध्ये प्रियकराला भेटण्यासाठी आतुर असलेल्या  नायिकेच्या अवस्थांचे वर्णन केले आहे. कार्यक्रमाची सांगता ‘तीश्र-चतुश्र’ नावाच्या विशिष्ठ प्रस्तुतीने झाली. यामध्ये अबोली यांना त्यांच्या गुरुभगिनी सानिका देवधर, पूर्वा देशपांडे, तुलसी कुलकर्णी यांनी साथ दिली, त्याच बरोबर ऋजुता सोमण कल्चरल अकॅडमीच्या सानिका जोशी, ईशानी अभ्यंकर, रेवा दिवेकर आणि श्रेया खाडिलकर यांचाही सहभाग होता.

याप्रसंगी पुणे फेस्टिव्हलतर्फे सांस्कृतिक कार्यक्रमांचे प्रमुख मोहन टिल्लू, उगवते तारे आणि इंद्रधनुचे संयोजक रवींद्र दुर्वे आणि बालगंधर्व रंगमंदिराचे पुणे फेस्टिव्हलचे समन्वयक श्रीकांत कांबळे यांचा हस्ते कलाकारांचे सत्कार करण्यात आले.

पुणे : ता. ३: कॅटलिस्ट फाऊंडेशन, भारतीय जनता पक्ष आणि व्हिजन नेक्स्ट फाऊंडेशन यांच्या संयुक्त विद्यमाने, उद्या बुधवारी (४ सप्टेंबर) रोजी मोफत मोतीबिंदू शस्त्रक्रिया शिबीर आयोजित केले आहे. या शिबिरात गरजू रुग्णांसाठी मोफत मधुमेह व नेत्र तपासणी केली जाणार आहे. बोपोडी येथील व्हिजन नेक्स्ट फाउंडेशन, आय हॉस्पिटल येथे सकाळी ९.३० वाजता भाजप शहराध्यक्षा आमदार माधुरी मिसाळ व सिनेअभिनेत्री सई ताम्हणकर यांच्या विशेष उपस्थितीत या शिबिराचे उदघाटन होणार आहे, अशी माहिती कॅटलिस्ट फाऊंडेशनचे अध्यक्ष सुनील माने यांनी प्रसिद्धीपत्रकाद्वारे दिली आहे.

मातोश्री हिराबाई माने यांच्या स्मरणार्थ हे शिबीर घेण्यात येत असून दळवी हॉस्पिटल (शिवाजीनगर), राजीव गांधी रुग्णालय(येरवडा) आणि व्हिजन नेक्स्ट फाउंडेशन आय हॉस्पिटल (बोपोडी) येथे सकाळी ९ ते ६ या वेळेत हे शिबीर होईल. शिबिरात सहभागी होण्यासाठी संबंधितांकडे आधार कार्ड सोबत असणे आवश्यक असेल. या शिबिरात करण्यात आलेल्या नेत्र तपासणीनंतर ज्या रुग्णांमध्ये मोतीबिंदू आढळेल, त्यांच्यावर तज्ञ नेत्रशल्यचिकित्सकांमार्फत मोफत शस्त्रक्रिया केली जाईल.

दृष्टी कमी होण्याच्या पाठीमागे मोतीबंदू हे एक कारण आहे. वयाच्या ६० व्या वर्षानंतर बहुतांशी लोकांना मोतीबिंदू आढळतो. चष्मा किंवा औषधाने हा आजार बरा होत नाही. यासाठी शस्त्रक्रिया हाच पर्याय आहे. डोळ्यांसबंधित आजाराकडे अनेकदा कानाडोळा केला जातो. आर्थिक परिस्थितीही देखील यास अनेकदा कारणीभूत असते. दुर्देवाने, समाजातही या विषयी म्हणावी, तशी जनजागृती होताना दिसत नाही म्हणून आम्ही हे शिबीर भरवत असल्याचेही माने यांनी नमूद केले आहे.

समाजात सकारात्मक बदल घडवून आणण्याच्या उद्देशाने ‘कॅटलिस्ट फाऊंडेशनची’ स्थापना झाली असून खासदार गिरीश बापट हे या संस्थेचे पालक आहेत. लष्करी सेवेतून निवृत्त झालेले लेफ्टनंट जनरल डॉ. डी.बी. शेकटकर या संस्थेचे मेंटॉर आहेत. अण्णाभाऊ साठे यांच्यावरील पहिली वेबसाईट, सांगली पूरग्रस्तांना मदत, हृद्यारोगाची प्राथमिक लक्षणे याविषयी तज्ज्ञांचे व्याख्यान यांसारखे समाजपयोगी उपक्रम फाउंडेशनने राबवले आहेत.

पुणे, 3 सप्टेंबर 2019- पीवायसी हिंदू जिमखाना यांच्या तर्फे आयोजित पीवायसी बुद्धिबळ लीग स्पर्धेत गोल्डन किंग,  7नाईट्स या संघांनी आपापल्या गटात अव्वल स्थान कायम राखत अंतिम फेरीत प्रवेश केला.

पीवायसी हिंदू जिमखाना येथे सुरू असलेल्या या स्पर्धेत राउंड रॉबिन फेरीत निखिल चितळे, तन्मय चितळे, शुभांकर मेनन आणि  सारंग उर्धवर्षे  यांनी केलेल्या अफलातून कामगिरीच्या जोरावर 7 नाईट्स संघाने किंग्ज 64  संघाचा  4-2 असा पराभव केला. 7 नाईट्स संघाने राउंड  रॉबिन फेरीत 4 विजय, 1 पराभवासह 23.5 गुणांसह अव्वल क्रमांक पटकावत अंतिम फेरीत प्रवेश केला. तर, गोल्डन किंग  व वाडेश्वर विझार्डस यांच्यातील सामना 3-3 असा बरोबरीत सुटला. गोल्डन किंग संघाने 3 विजय व 1 बरोबरीसह 20.5 गुण पटकावत अंतिम फेरीत धडक मारली.

अन्य लढतीत द बिशप्स चेक संघाने गोल्डफिल्ड ट्रायडेंट्स संघाचा 4-2 असा पराभव करून विजय मिळवला.

स्पर्धेचा सविस्तर निकाल: राउंड रॉबिन फेरी:

 गोल्डन किंग बरोबरी वि.वाडेश्वर विझार्डस 3-3(हेमंत उर्धवर्षे वि.वि.आशिष राठी 1-0; प्रियदर्शन डुंबरे पराभूत वि. अक्षय साठ्ये 0-1; अजिंक्य जोशी वि.वि.अमोल मेहेंदळे 1-0; निरंजन गोडबोले वि.वि.रोनित जोशी 1-0; अर्णव कुंटे पराभूत वि.कौस्तुभ वाळिंबे 0-1; अभिषेक देशपांडे पराभूत वि.कुणाल भुरट 0-1);

किंग्ज 64 पराभूत 7 नाईट्स 2-4(राजन जोशी पराभूत वि. निखिल चितळे 0-1; जय केळकर पराभूत वि.तन्मय चितळे 0-1; आदित्य लाखे वि.वि.आदित्य भट 1-0; अद्वैत जोशी पराभूत वि.शुभांकर मेनन 0-1; रोहीन लागू पराभूत वि. सारंग उर्धवर्षे  0-1; राघव बर्वे वि.वि.विजय देशपांडे 1-0);

गोल्डफिल्ड ट्रायडेंट्स पराभूत वि.द बिशप्स चेक 2-4(अमेय कुलकर्णी पराभूत वि.अश्विन त्रिमल 0-1; अमोद प्रधान पराभूत वि. चारू साठे 0-1; राजशेखर करमरकर पराभूत वि. अभिषेक गोडबोले 0-1; ईशान लागू पराभूत वि. किरण खरे 0-1; विजय ओगळे वि.वि.असिम देवगांवकर 1-0; पराग चोपडा वि.वि.केतन रावल 1-0).