३० व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचा समारोप समारंभ

पुणे, दि. ३० नोव्हेंबर: ” सध्याचे जग हे एआयचे बनत आहे. एआय तंत्रज्ञानाला मर्यादा आहेत. मानवी बुद्धिमत्ता महत्वाची असून उद्याचे जग हे एआय च्या तंत्रावर नव्हे ज्ञानोबा – तुकोबांच्या मंत्रावर चालेल.” असे विचार ज्येष्ठ लेखक आणि ९९ व्या अखिल भारतीय मराठी साहित्य संमेलनाचे नियोजित अध्यक्ष विश्वास पाटील यांनी व्यक्त केले.
एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे यांच्या संयुक्त विद्यमाने आयोजित करण्यात आलेल्या ३० व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेच्या समारोप समारंभ प्रसंगी प्रमुख पाहुणे म्हणून ते बोलत होते.
यावेळी  एमकेसीएलचे वरिष्ठ सल्लागार व शास्त्रज्ञ डॉ. विवेक सावंत हे कार्यक्रमाच्या अध्यक्षस्थानी होते. विश्वशांती केंद्र (आळंदी), माईर्स एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्वनाथ दा. कराड, एमआयटी विश्वशांती विद्यापीठाचे कार्याध्यक्ष डॉ. राहुल कराड, कुलगुरू डॉ. रविकुमार चिटणीस, प्र. कुलगुरू डॉ. मिलिंद पांडे, अधिष्ठाता डॉ. मिलिंद पात्रे हे यावेळी उपस्थित होते.
यावेळी विश्वशांतीच्या जीवन कार्यासाठी उपस्थित सर्वांच्या वतीने डॉ. विश्वनाथ कराड यांचा विशेष सत्कार करण्यात आला.  योगगुरू अनंत कोंडे व मारूती पाडेकर गुरूजी यांचाही मान्यवरांच्या हस्ते सत्कार करण्यात आला. तसेच पीस स्टडीज च्या वतीने ‘सेंटर फॉर एक्सेलेन्स इन संस्कृत अँड आयआरएस स्टडीज’ कोर्सच्या माहितीपत्रकाचे प्रकाशन करण्यात आले.

विश्वास पाटील म्हणाले, ” शिवाजी महाराजांना जिजाऊंनी विश्वशांतीची प्रेरणा दिली. त्यांच्यावर संतांच्या विचारांचा प्रभाव होता. शक्ती, युक्ती आणि भक्तीचा संगमातून स्वराज्य निर्माण केले. हिंदवी स्वराज्यातून मानवी जातीचे कल्याण केले. म्हणून शिवाजी महाराज सर्वश्रेष्ठ राजे झाले.”

डॉ. विवेक सावंत म्हणाले, ” विज्ञान आणि अध्यात्म यांच्यामधील अद्वैत कल्पना ही आपली संतपरंपरा आहे. ती पुढे नेण्याचे काम डॉ. कराड सरांनी केले.आज  बहुविद्याशाखीय शिक्षण व्यवस्थेची गरज असून त्यातूनच भारत आत्मनिर्भर होईल. विद्यार्थ्यांना स्व चा शोध घ्यायला शिकवा. स्व च्या शोधाच्या साधनेतून विश्वशांती प्राप्त होईल.”

प्रा.डॉ. विश्वनाथ दा. कराड म्हणाले, ” भारतीय संस्कृती, परंपरा आणि तत्वज्ञानाचा संदेश जगभर पसरविण्यासाठी या व्याख्यानमाला महत्वपूर्ण आहेत. ज्ञानोबा तुकोबा टाळकुट्यांचा विषय नाही, हे एक चांगले जीवन जगण्याचे सारं आहे. माणूस म्हणून समृद्ध होण्यासाठी संतांचाच एकमेव मार्ग आहे.”

डॉ.आर. एम. चिटणीस यांनी स्वागत व प्रास्ताविक केले. डॉ. मिलिंद पात्रे यांनी सूत्रसंचालन केले.डॉ. मिलिंद पांडे यांनी आभार मानले.

पुणे-“हॉटेलमध्ये बॉम्ब ठेवला आहे, तात्काळ हॉटेल रिकामे करा,” शुक्रवारी दुपारी हॉटेलच्या लँडलाईनवर खणखणलेल्या या एका फोनमुळे कोरेगाव पार्कमधील एका प्रसिद्ध पंचतारांकित हॉटेलमध्ये एकच खळबळ उडाली. या धमकीमुळे पोलिस यंत्रणा आणि बॉम्ब शोधक पथकाची चांगलीच धावपळ झाली. मात्र, हॉटेलची कसून तपासणी केल्यानंतर हा फोन बनावट असल्याचे स्पष्ट झाले आणि हॉटेल प्रशासन व ग्राहकांनी सुटकेचा निश्वास टाकला.

यासंबंधीच्या वृत्तानुसार, शुक्रवारी (ता. 29) दुपारी साडेबारा वाजण्याच्या सुमारास ही घटना घडली. कोरेगाव पार्क भागातील एका नामांकित पंचतारांकित हॉटेलच्या लँडलाईनवर एका अज्ञात मोबाइल क्रमांकावरून फोन आला. फोनवरील व्यक्तीने हॉटेल बॉम्बने उडवून देण्याची धमकी देत हॉटेल रिकामे करण्यास सांगितले. या प्रकारामुळे हॉटेल कर्मचाऱ्यांमध्ये घबराट पसरली.

व्यक्तीने धमकी देताच, हॉटेलच्या सिक्युरिटी मॅनेजरने तत्काळ पुणे पोलिसांना याची माहिती दिली. घटनेचे गांभीर्य ओळखून कोरेगाव पार्क पोलिस आणि बॉम्ब शोधक व नाशक पथक तातडीने घटनास्थळी दाखल झाले. पथकाने संपूर्ण हॉटेल परिसर पिंजून काढला, प्रत्येक कोपरा तपासला. मात्र, कोणतीही संशयास्पद वस्तू किंवा स्फोटके आढळून आली नाहीत. अखेर हा खोडसाळपणा असल्याचे निष्पन्न झाले.

या प्रकरणी हॉटेलच्या सिक्युरिटी मॅनेजरने दिलेल्या फिर्यादीवरून कोरेगाव पार्क पोलिस ठाण्यात गुन्हा दाखल करण्यात आला आहे. धमकी देण्यासाठी 9832252517 या मोबाइल क्रमांकाचा वापर करण्यात आला होता. पोलिस आता सायबर सेलच्या मदतीने संबंधित कॉलरचे लोकेशन ट्रेस करत असून लवकरच त्याला अटक करण्यात येण्यात असल्याची माहिती मिळत आहे.

राज्यातील वाढती गुन्हेगारी आणि महिलांवरील अत्याचार मोठी गंभीर समस्या बनली असून पुणे शहरातील गुन्हेगारीही पोलिसांपुढे मोठे आव्हान बनले आहे. त्यामुळे, पुणे पोलिसांकडूनही सातत्याने सतर्कता बाळगली जाते. त्यातच अशा बनावट फोन कॉल्समुळे पोलिस यंत्रणेवर नाहक ताण येत आहे. नागरिकांनी अशा अफवांवर विश्वास ठेवू नये, मात्र सतर्क राहावे, असे आवाहन पोलिसांकडून करण्यात आले आहे.

देशपातळीवर घेण्यात आलेल्या स्पर्धेत बहुमान

पुणे : दिल्लीतील पंडित बिरजू महाराजजी कलाश्रमतर्फे देशपातळीवर घेण्यात आलेल्या नृत्य स्पर्धेत नृत्यगुरू शभा भाटे यांची शिष्या आणि पुण्यातील युवा कथक नृत्यांगना श्रद्धा मुखडे हिला पहिल्या नृत्यगुरू पंडित बिरजू महाराज युवा पुरस्काराने गौरविण्यात आले.

लखनऊ घराण्याचे प्रसिद्ध कथक नर्तक, पद्मविभूषण पंडित बिरजू महाराज यांनी कलाश्रम ही संस्था स्थापन केली. पंडित बिरजू महाराज यांच्या निधनानंतर त्यांच्या स्मृती चिरंतन रहाव्यात यासाठी संस्थेतर्फे पंडित बिरजू महाराज कलाश्रमतर्फे साधना महोत्सवात १८ ते २५ वयोगटातील कथक नृत्य कलाकारांसाठी देशपातळीवर कथक नृत्य स्पर्धेचे आयोजन करण्यात आले होते. स्पर्धेत सहभागी होण्यासाठी संस्थेतर्फे अर्ज मागविण्यात आले होते. देशाच्या विविध भागातून या स्पर्धेत सहभागी झालेल्या कलाकारांमधून २० कलाकारांची अंतिम फेरीसाठी निवड झाली. अंतिम फेरी दिल्ली येथील त्रिवेणी कलासंगम ऑडिटोरिअम येथे घेण्यात आली. महाराष्ट्रातील केवळ तीन स्पर्धक अंतिम फेरीत पोहोचले होते.

नृत्यगुरू शभा भाटे यांच्याकडे गेल्या १० वर्षांपासून श्रद्धा मुखडे नृत्याचे प्रशिक्षण घेत असून त्यांच्या समवेत विविध नृत्य महोत्सवांमध्ये सहभागी होत आहे. कथक गुरू मंजुश्री चॅटर्जी आणि कथक गुरू डॉ. पद्मश्री शोभना नारायण यांच्या हस्ते श्रद्धा मुखडे हिला पंडित बिरजू महाराज युवा पुरस्कार देऊन गौरविण्यात आले.

गुरू मंजुश्री चॅटर्जी, गुरू गीतांजली लाल, संगीता सिन्हा, कल्पना वर्मा, अनिता कुलकर्णी यांनी स्पर्धेचे परिक्षण केले.

पुणे – चाकण परिसरात पहाटेच्या सुमारास एक मोठी दुर्घटना टळली आहे. तळेगाव-चाकण रस्त्यावरील खराबवाडी गावात असलेल्या इंडियन ऑईल पेट्रोल पंपाजवळ डिझेल भरण्यासाठी आलेल्या एका मोठ्या कंटेनरला अचानक आग लागण्याची घटना घडली. या कंटेनरमध्ये 40 नवीन इलेक्ट्रिक दुचाकी ठेवण्यात आल्या होत्या. कंटेनर पूर्णपणे पेटल्याने या सर्व बाइक काही क्षणातच जळून खाक झाल्या. सुदैवाने कोणतीही जीवितहानी या घटनेत झालेली नाही. मात्र रात्री शांत असलेल्या या परिसरात अचानक पेटलेल्या मोठ्या आगीमुळे भीतीचे वातावरण निर्माण झाले. ही आग नेमकी कशी लागली याचा तपास सुरू असून, प्राथमिक माहितीनुसार आग लागण्याचं कारण समजू शकलेले नाही.

ही घटना पहाटेच्या सुमारास घडली. NL-01AE-7346 असा क्रमांक असलेला हा कंटेनर डिझेल भरण्यासाठी पेट्रोल पंपावर आला होता. कंटेनर चालकाने त्यासाठी आपल्या मालकाला फोन केला होता. मात्र मालकाने फोन न उचलल्याने चालकाने कंटेनर पंपाच्या शेजारीच उभा केला. तो काही काळ तिथेच थांबून मालकाशी संपर्क करण्याचा प्रयत्न करत होता. तेवढ्यात एका रस्त्याने जाणाऱ्या नागरिकाने कंटेनरमधून धूर येत असल्याचे चालकाला सांगितले. सुरुवातीला चालकाला काहीतरी किरकोळ दोष वाटला. पण धूर वाढत चालल्याने त्याने तातडीने परिस्थिती बघण्यासाठी कंटेनरचा मागील दरवाजा उघडला आणि क्षणाचा अवधी न लागता आगीच्या प्रचंड लाटा बाहेर पडल्या. समोर पेटलेल्या दुचाक्या पाहून तो हादरून गेला. चालकाने लगेच मदतीसाठी आरडाओरडा केला. कामगारांनीही स्वतःचे जीव वाचवणेच पसंत केले.

ही आग पेट्रोल पंपाच्या अगदी शेजारी लागल्याने परिस्थिती अत्यंत गंभीर बनली होती. पेट्रोल पंपावर इंधनाचे मोठे टँक असतात. थोडा जरी विलंब झाला असता किंवा आग पंपापर्यंत पोहोचली असती तर मोठा स्फोट होऊन व्यापक हानीकारक घटना घडली असती. मात्र पंपावरील कर्मचारी आणि चालकाने तातडीने पोलिस व अग्निशमन दलाला कळवले. काहीच मिनिटांत महाळुंगे MIDC पोलिस ठाण्याचे पथक तसेच अग्निशमन दलाच्या तीन गाड्या घटनास्थळी दाखल झाल्या. अग्निशामक कर्मचाऱ्यांनी शर्थीचे प्रयत्न करून आग पसरू न देण्याचा प्रयत्न केला आणि अखेरीस आगीवर नियंत्रण मिळवले.

ज्या इलेक्ट्रिक बाइक्स जळून नष्ट झाल्या त्या सर्व नवीन

या घटनेनंतर परिसरातील नागरिकांची एकच धांदल उडाली. पहाटेचा वेळ असल्याने गावात शांतता होती. पण अचानक आगीचा धूर आणि आवाज ऐकूण जागे झालेले लोक घटनास्थळी धावले. मात्र पोलिसांनी सुरक्षा लक्षात घेऊन त्या परिसरात गर्दी रोखली. विशेष म्हणजे ज्या इलेक्ट्रिक बाइक्स जळून नष्ट झाल्या त्या सर्व नवीन होत्या. त्यांची डिलिव्हरी विविध ठिकाणी करण्यासाठी हा कंटेनर निघाला असल्याचे समोर आले आहे. लाखो रुपयांचे नुकसान झाल्याचा अंदाज व्यक्त केला जात आहे. मालक आणि संबंधित कंपनीच्या अधिकाऱ्यांनाही घटनास्थळी बोलावण्यात आले असून, नुकसान भरपाईसंदर्भातही चर्चा होत आहे.

दि रास्ता पेठ एज्युकेशन सोसायटीतर्फे डॉ. अ. ल. देशमुख यांना ‌‘आबासाहेब अत्रे पुरस्कार‌’ तरविनया देसाई, संजय भैलुमे यांचा ‌‘इंदिरा आबासाहेब अत्रे पुरस्कार‌’

पुणे : शिक्षण हे परिवर्तनाचे मोठे साधन आहे. शिक्षणामुळे केवळ स्वतःमध्ये नाही तर समाज आणि देशामध्येही बदल घडून येण्यास मदत होते. त्यामुळे शिक्षणाकडे दुर्लक्ष झाले तर समाज परिवर्तन होणार नाही. त्यामुळे शिक्षणाला कायमच विशेष महत्त्व असायला हवे, असे मत सर्जनशील शिक्षणतज्ज्ञ व प्रोग्रेसिव्ह एज्युकेशन सोसायटीचे अध्यक्ष डॉ. गजानन एकबोटे यांनी व्यक्त केले.

दि रास्ता पेठ एज्युकेशन सोसायटीतर्फे किराणा घराण्याच्या ज्येष्ठ गायिका स्वरयोगिनी डॉ. प्रभा अत्रे पुरस्कृत ‌‘आबासाहेब अत्रे पुरस्कार‌’ ज्येष्ठ शिक्षणतज्ज्ञ डॉ. अ. ल. देशमुख यांना तर ‌‘इंदिरा आबासाहेब अत्रे पुरस्कार‌’ क्रीडा क्षेत्रातील निवृत्त शिक्षक, सामाजिक कार्यकर्ते संजय भैलुमे तसेच कर्णबधिर मुलांच्या शिक्षिका, निवेदक, लेखिका विनया देसाई यांना डॉ. एकबोटे यांच्या हस्ते आज (दि. २९) प्रदान करण्यात आला. त्या वेळी ते बोलत होते. संस्थेच्या खुल्या सभागृहात कार्यक्रमाचे आयोजन करण्यात आले होते. पुरस्काराचे हे १४ वे वर्ष आहे.

डॉ. देशमुख यांना दिल्या गेलेल्या पुरस्काराचे स्वरूप पंधरा हजार रुपये व मानचिन्ह तर संजय भैलुमे व विनया देसाई यांना दिल्या गेलेल्या पुरस्काराचे स्वरूप प्रत्येकी दहा हजार रुपये व मानचिन्ह असे आहे. दि रास्ता पेठ एज्युकेशन सोसायटीचे कार्याध्यक्ष संजीव महाजन, सचिव प्रफुल्ल निकम, डॉ. प्रभा अत्रे फाऊंडेशनचे मानद अध्यक्ष अशोक वळसंगकर मंचावर होते. पुरस्कार संयोजन समिती प्रमुख प्रसाद भडसावळे, डॉ. प्रभा अत्रे फाऊंडेशनच्या सचिव डॉ. भारती एम. डी. यांची उपस्थिती होती.

डॉ. एकबोटे म्हणाले, आबासाहेब अत्रे हे माझ्या वडिलांचे जवळचे मित्र होते, त्यामुळे त्या काळात प्रतिकूल परिस्थितीत आबासाहेबांनी ही शाळा उभी करण्यासाठी आणि वाढवण्यासाठी काय कष्ट घेतलेत ते मी जवळून पाहिले आहेत. अशा व्यक्तींमुळेच शिक्षणाचे महत्त्व टिकून आहे. आपला देश हा राजकारण्यांमुळे चालत नाही, तर समाजात विविध क्षेत्रात मनापासून काम करणाऱ्या व्यक्तींमुळे हा देश चालत आहे. अशा व्यक्ती समाजातील आदर्श आणि हिरे असतात.

शिक्षणावर विश्वास ठेवायलाच हवा..

शिक्षणतज्ज्ञ डॉ. अ. ल. देशमुख म्हणाले, सध्या शिक्षणाची मोठ्या प्रमाणात ससेहोलपट झाली आहे. पूर्वीच्या काळातील शिक्षण आणि आताचे शिक्षण यामध्ये खूप मोठी दरी निर्माण झाली आहे. शिक्षणाशिवाय देश, समाज मोठा होऊ शकत नाही, त्यामुळे शिक्षणावर विश्वास ठेवायलाच हवा.

विनया देसाई आणि संजय भैलुमे यांनीही मनोगत व्यक्त केले. उदय जगताप यांनी संजय भैलुमे यांचा, सुप्रिया गोडबोले यांनी विनया देसाई यांचा आणि स्नेहल दामले यांनी डॉ. अ. ल. देशमुख यांचा परिचय करून दिला. अपर्णा डोळे यांनी कार्यक्रमाचे सूत्रसंचालन केले.

जगाला भारताने शिक्षणाची परंपरा दिली असून आजही भारतीय शिक्षण पद्धतीमुळे देश अनेक क्षेत्रात उंचीवर आहे. शिक्षणाच्या माध्यमातून प्रेरणा आणि प्रोत्साहन द्यायला हवे, हे सांगत असताना लाडकी बहिण योजनेसोबतच सरकारने लाडका शिक्षक योजना राबवायला हवी. राजकारण्यांनी शिक्षणाकडे पाहण्याचा दृष्टीकोन बदलायला हवा.

–        डॉ. अ. ल. देशमुख

अखिल भारतीय मराठी प्रकाशक संघातर्फे अशोक मुळे यांचा जीवनगौरव तर ल. म. कडू यांचा साहित्यसेवा कृतज्ञता  पुरस्काराने गौरव

पुणे : नव्या काळाची आव्हाने स्वीकारत मराठी भाषा, साहित्य आणि प्रकाशन व्यवसायाला उत्थानाची गरज आहे, असे प्रतिपादन ज्येष्ठ साहित्यिक,  अखिल भारतीय मराठी साहित्य संमेलनाचे माजी भारत सासणे यांनी केले.

अखिल भारतीय मराठी प्रकाशक संघ आयोजित उत्कृष्ट ग्रंथनिर्मिती, दिवाळी अंक निर्मिती पुरस्कार, जीवनगौरव आणि साहित्यसेवा पुरस्कार वितरण सोहळ्यात सासणे अध्यक्षपदावरून बोलत होते. टिळक रस्त्यावरील मराठा चेंबर ऑफ कॉमर्स येथील सभागृहात  या कार्यक्रमाचे आयोजन करण्यात आले होते.  ज्येष्ठ बालसाहित्यकार ल. म. कडू, डिंपल प्रकाशनाचे अशोक मुळे, प्रसिद्ध लेखक, नाटककार,  दिग्दर्शक, अभिनेते योगेश सोमण, अखिल भारतीय मराठी प्रकाशक संघाचे अध्यक्ष राजीव बर्वे, पराग लोणकर व्यासपीठावर उपस्थित होते.

या समारंभात डिंपल पब्लिकेशनचे संचालक अशोक मुळे यांना जीवनगौरव पुरस्काराने तर बालसाहित्यकार ल. म. कडू यांना साहित्यसेवा कृतज्ञता  पुरस्काराने गौरविण्यात आले. सुप्रसिद्ध अभिनेते, लेखक, दिग्दर्शक योगेश सोमण यांची प्रमुख उपस्थिती होती.

सासणे पुढे म्हणाले, आपली प्राचीन ज्ञानपरंपरा पोहोचणारे ऋषी, हे प्रकाशन व साहित्याचे आद्य रूप म्हटले पाहिजे. लेखकाचे शब्द रसिकांसमोर, वाचकांसमोर आणणारा दुवा, प्रकाशक असतो. नव्या काळात वाचक कमी होणे, मराठी वाचन घटणे अशी आव्हाने आहेत.  त्यासाठी मराठीमधील अभिजात साहित्य पुन्हा प्रकाशित करण्याची आवश्यकता आहे. मराठी साहित्य आणि प्रकाशन व्यवसायाने कात टाकून उभे राहिले पाहिजे, असे ते म्हणाले.

योगेश सोमण यांच्या मुलाखतीचा कार्यक्रम या वेळी आयोजित करण्यात आला होता. त्यांच्याशी अमृता कुलकर्णी आणि पराग लोणकर संवाद साधला. सोमण म्हणाले, मी लेखन, दिग्दर्शन, प्रशिक्षण आणि अभिनय क्षेत्रात काम करतो. यापैकी लेखकाची आणि प्रशिक्षकाची भूमिका मला सर्वांत जवळची वाटते. सोमण यांनी त्यांच्या जडणघडणीची माहिती या वेळी दिली. पं. सत्यदेव दुबे, वासुदेव पाळंदे, प्रकाश पारखी यांच्यामुळे अभिनयाचे मार्गदर्शन मिळाले. लेखक म्हणून मी अनेक साहित्यप्रकार हाताळले असले तरी एकांकिका लेखनात मी मनापासून रमतो. एकांकिका लेखन हा साहित्याचा स्वतंत्र प्रकार आहे, असे मत सोमण यांनी व्यक्त केले. हिंदी चित्रपटसृष्टीत काम करताना, तेथील व्यावसायिकतेचे कौतुक वाटते. ही मंडळी मराठी रंगभूमीवरील कलावंतांना अतिशय मानतात, हे जाणवते.  

मनोगत मांडताना ल. म. कडू म्हणाले, मी गेल्या ४० वर्षांपासून मुलांत मूल होऊन रमत आलो आहे. मूल समजून घेणे अवघड असते. ते मूलपण समजून, त्यांच्या वृत्ती, भावनांचा वेध लेखकांनी घेतला पाहिजे. वयोगट लक्षात घेऊन बालसाहित्यिकांनी लिहिले पाहिजे. मुलांशी संवाद साधून, त्यांना पुनरावृत्ती आवडते, हे जाणून लेखकांनी लिहावे. तसेच मनोरंजनाला प्राधान्य, प्रबोधन नंतर, हा क्रम लक्षात घ्यावा, असेही ते म्हणाले. प्रकाशन व्यवसाय माझ्यासाठी व्यवसाय नाही. माझ्यासाठी ते व्रत आहे, हे मानूनच मी आजवरची वाटचाल केली आहे, असे त्यांनी सांगितले.

अशोक मुळे यांनी डिंपल प्रकाशनाच्या माध्यमातून गेली ५० वर्षे केलेल्या साहित्यसेवेचा गौरव झाल्याबद्दल कृतज्ञता व्यक्त केली. शाळकरी वयात वाचनालयात नोकरी केल्याने पुस्तकांविषयी आस्था निर्माण झाली. नंतर सतत चांगलीच माणसे भेटत गेल्याने व्यावसायिक क्षेत्रात दखलपात्र काम केल्याचे समाधान त्यांनी व्यक्त केले.