मालेगाव- येथील मन्सुरा रुग्णालयातील तीन कोरोना बाधित रुग्ण हे उपचाराअंती कोरोनामुक्त झाले आहेत. त्यांना सुदृढ आरोग्याच्या शुभेच्छा देवून आज घरी सोडण्यात आले, मालेगाव शहरातून प्रथमच एकाच वेळी तीन रुग्ण कोरोनामुक्त झाल्याने नागरिकांचा आरोग्य प्रशासनावरील विश्वास वाढुन नागरिकांना नक्कीच दिलासा मिळेल, असा विश्वास कृषी तथा माजी सैनिक कल्याण मंत्री दादाजी भुसे यांनी व्यक्त केला.

मन्सुरा हॉस्पिटल मधून कोरोनामुक्त झालेल्या तीनही रुग्णांना घरी सोडण्यात आले त्यावेळी मंत्री श्री.भुसे बोलत होते. यावेळी महापौर ताहेरा शेख, उपमहापौर निलेश आहेर, सहायक जिल्हाधिकारी तथा घटना व्यवस्थापक डॉ.पंकज आशिया, अपर जिल्हाधिकारी धनंजय निकम, इन्सिडन्ट कमांडट तथा उपायुक्त (प्रशासन) नितीन कापडणीस, उपविभागीय पोलिस अधिकारी मंगेश चव्हाण, डॉ.सुशिलकुमार शिंदे, डॉ.अरुण पवार, महानगरपालिकेचे जनसंपर्क अधिकारी दत्तात्रय काथेपुरी, माजी आमदार रशीद शेख यांच्यासह सर्व विभागांचे प्रमुख उपस्थित होते.

यावेळी मंत्री श्री.भुसे म्हणाले, तालुक्यातील आरोग्य यंत्रणा सक्षम असून रुग्णालयातील डॉक्टरांची टीम, परिचारिका, वॉर्डबॉय आदींसह इतर आरोग्य कर्मचारी अहोरात्र मेहनत घेत आहेत. रुग्णालयातील सर्व रुग्णांची प्रकृती सुधारत असून, इतर सर्व कोरोना रुग्णही या रुग्णांप्रमाणे लवकरच बरे होतील, असा विश्वास व्यक्त करत मंत्री श्री.भुसे म्हणाले, मालेगाव मधील रुग्णांची संख्या जरी वाढत असली तरी वेळेवर रुग्ण दवाखान्यात आले, तर त्यांना बरे करण्याची पूर्ण क्षमता आपल्या आरोग्य प्रशासनात आहे. त्यामुळे नागरिकांनी कोणतीही भीती न बाळगता अथवा गैरसमज न ठेवता आजाराची लक्षणे आढळल्यास तातडीने दवाखान्याशी संपर्क साधावा असेही आवाहन त्यांनी केले.

मालेगाव येथील कोरोनामुक्त झालेले हे रुग्ण अनुक्रमे 7 व 9 एप्रिल 2020 रोजी रुग्णालयात दाखल झाले होते. त्यांच्यावर तज्ज्ञ डॉक्टरांच्या टीमने योग्य उपचार करुन त्यांना कोरोनामुक्त करण्यात मोठे यश संपादन केले आहे. त्या रुग्णांचा अनुक्रमे 21 व 23 रोजी करण्यात आलेल्या चाचणीचा अहवाल निगेटिव्ह आला होता. त्यानंतर पुन्हा 24 तासानंतर घेण्यात आलेल्या दुसऱ्या चाचणीतही त्यांचा अहवाल निगेटिव्ह आल्याने आज ते कोरोनामुक्त घोषित करुन घरी सोडण्यात आले. यात प्रामुख्याने मालेगाव येथील मदिनाबाद परिसरातील 35 वर्षीय महिला व खुशामदपुरा परिसरातील 45 वर्षीय महिला तर चांदवड येथील 27 वर्षाच्या पुरुषाचा समावेश आहे.

शहरातील रुग्णांच्या वाढत्या संख्येमुळे सर्व नागरिकांमध्ये भीतीचे वातावरण निर्माण झाले होते. परंतु आज एकाच वेळी तीन रुग्ण कोरोनामुक्त झाल्याच्या बातमीने काही अंशी दिलासा मिळाला आहे. या यशाने हुरळून न जाता मोठ्या संख्येने दाखल रुग्णांमुळे आपल्या सर्वांची जबाबदारी वाढली आहे. आणि आपण याच प्रमाणे कसोटीने संपुर्ण जबाबदारी पार पाडल्यास शहरातून कोरोनाला हद्दपार करण्यात नक्की यश मिळेल असे घटना व्यवस्थापक डॉ.आशिया यांनी सांगितले. तर नागरिकांनी देखील प्रतिबंधात्मक आदेशाचे व प्रशासनाने दिलेल्या सर्व सुचनांचे पालन करण्याचे आवाहन त्यांनी केले.

कोरोनामुक्त रुग्णांची बोलकी प्रतिक्रिया

राज्याचे मुख्यमंत्री महोदयांनी घेतलेले सर्व निर्णय योग्य घेतले आहेत. त्यांच्या सुचनेनुसार सर्वांनी आप-आपल्या घरात थांबणेच योग्य असल्याची प्रतिक्रीया देतांना चांदवड येथील रहिवाशी आणि मन्सुरा हॉस्पिटल, मालेगाव येथुन कोरोनामुक्त झालेल्या 27 वर्षीय युवकाने म्हटले की, आई वडीलांचा आशिर्वाद व मनातील पॉझिटीव्ह विचारामुळे मला यातून बरे होण्यासाठी प्रेरणा मिळाली आहे.  हा आजार घाबरण्यासारखा नाही, यातून बरे होण्यासाठी रोगप्रतिकारशक्ती आणि मनाची सकारात्मकता गरजेची आहे. मालेगावच्या नागरिकांना संदेश देतांना, ज्या रुग्णांना थोडे जरी आजाराची लक्षणे दिसत असली तरी तात्काळ रुग्णालयात जावे. प्रशासन सगळे व्यवस्थित हाताळत असल्याचे त्यांनी सांगितले.

तर कोरोनामुक्त झालेल्या महिलांनी प्रतिक्रिया देतांना सामान्य रुग्णालयातील डॉ.महाले यांच्या टीम कडून खुप चांगल्याप्रकारे उपचार व सुविधा मिळाली असून त्यांचे त्यांनी आभार मानले. त्यानंतर जीवन हॉस्पिटल व मन्सुरा हॉस्पिटल या ठिकाणी स्थलांतरीत केल्यानंतर तेथेही चांगला अनुभव व चांगल्या सुविधा मिळाल्याचा अनुभव त्यांनी यावेळी कथन केला. माझा सात वर्षाचा मुलगा याठिकाणी आजही दाखल आहे, आणि त्याला सोडून जातांना मला खुप दु:ख होत असल्याची भावना व्यक्त करत असा प्रसंग कुणावरही येवू नये यासाठी सर्व नागरिकांनी सतर्क राहिले पाहिजे व प्रशासनाने दिलेल्या सुचनांचे पालन केले पाहिजे अशी प्रतिक्रिया त्यांनी यावेळी दिली.

मुंबई, दि. २६ : आज राज्यात कोरोनाबाधीत ४४० नवीन रुग्णांची नोंद झाली. यामुळे एकूण रुग्ण संख्या ८०६८ झाली आहे. आज ११२ रुग्णांना घरी सोडण्यात आले असून आतापर्यंत राज्यभरात ११८८ रुग्ण बरे झाले आहेत. तर एकूण ६५३८ रुग्णांवर उपचार सुरू आहेत, अशी माहिती आरोग्यमंत्री राजेश टोपे यांनी आज दिली.

आजपर्यंत पाठविण्यात आलेल्या १ लाख १६ हजार ३४५ नमुन्यांपैकी १ लाख ७ हजार ५१९ जणांचे प्रयोगशाळा नमुने करोना करता निगेटिव्ह आले आहेत तर ८०६८ जण पॉझिटिव्ह आले आहेत. सध्या राज्यात १ लाख ३६ हजार ९२६ लोक होम क्वारंटाईनमध्ये असून ९१६० लोक संस्थात्मक क्वारंटाईनमध्ये आहेत.

आज राज्यात १९ कोरोना बाधित रुग्णांचा मृत्यू झाला आहे. राज्यात झालेल्या मृत्यूंची संख्या आता ३४२ झाली आहे. आज झालेल्या मृत्यूंपैकी मुंबई येथील १२, पुणे महानगरपालिका येथे ३, जळगाव येथे २, सोलापूर शहरात १, तर लातूर येथे १ मृत्यू झाला आहे.

आज झालेल्या मृत्यूंपैकी ११ पुरुष तर ८ महिला आहेत. आज झालेल्या १९ मृत्यूपैकी ६० वर्षे किंवा त्यावरील ७ रुग्ण आहेत तर १० रुग्ण हे वय वर्षे ४० ते ५९ या वयोगटातील आहेत तर २ रुग्ण ४० वर्षांखालील आहेत. या १९ मृत्यूंपैकी ४ रुग्णांच्या इतर आजारांबाबत माहिती अद्याप मिळालेली नाही. उर्वरित १५ रुग्णांपैकी ११ जणांमध्ये (७३ टक्के) मधुमेह, उच्च रक्तदाब, हृदयरोग, क्षयरोग अशा स्वरुपाचे अतिजोखमीचे आजार आढळले आहेत.

राज्यातील जिल्हानिहाय रुग्णांचा आतापर्यंतचा तपशील : (कंसात मृत्यूंची आकडेवारी) मुंबई महानगरपालिका: ५४०७ (२०४), ठाणे: ७३८ (१४), पालघर: १४१ (४), रायगड: ५७ (१) मुंबई मंडळ एकूण: ६३४३ (२२३), नाशिक: १३१ (१२), अहमदनगर: ३६ (२), धुळे: २५ (३), जळगाव: १९ (४), नंदूरबार: ११ (१) नाशिक मंडळ एकूण: २२२ (२२), पुणे: १०५२ (७६), सोलापूर: ४७ (५), सातारा: २९ (२) पुणे मंडळ एकूण: ११२८ (८३), कोल्हापूर: १०, सांगली: २७ (१), सिंधुदुर्ग: १, रत्नागिरी: ८ (१) कोल्हापूर मंडळ एकूण: ४६ (२), औरंगाबाद: ५० (५), जालना: २, हिंगोली: ८, परभणी: १ औरंगाबाद मंडळ एकूण: ६१ (५), लातूर: ९ (१), उस्मानाबाद: ३, बीड: १, नांदेड: १ लातूर मंडळ एकूण: १४ (१), अकोला: २९ (१), अमरावती: २० (१), यवतमाळ: ४८

बुलढाणा: २१ (१), वाशिम: १ अकोला मंडळ एकूण: ११९ (३), नागपूर: १०७ (१), वर्धा: ०, भंडारा: ०, गोंदिया: १, चंद्रपूर: २, गडचिरोली: ० नागपूर मंडळ एकूण: ११० (१), इतर राज्ये: २५ (२), एकूण: ८०६८  (३४२).

(टीप- या तक्त्यातील रुग्ण संख्या रुग्णाने दिलेल्या पत्त्यानुसार आहे. केंद्र शासनाच्या मार्गदर्शक सूचनांनुसार आय सी एम आर संकेतस्थळावरील माहिती जिल्हावार उपलब्ध असल्याने ती जिल्हावार सादर करण्यात आलेली आहे.)

राज्यातील ज्या भागात रुग्णांचे क्लस्टर सापडले आहेत त्या ठिकाणी केंद्र सरकारच्या मार्गदर्शनानुसार क्लस्टर कंटेनमेंट कृतियोजना अंमलात आणण्यात येत आहे. राज्यात सध्या ६०४ कंटेनमेंट झोन क्रियाशील असून आज एकूण ८६०३  सर्वेक्षण पथकांनी काम केले असून त्यांनी ३३.७२ लाख  लोकसंख्येचे सर्वेक्षण केलेले आहे.

 गल्लीपासून दिल्लीपर्यंत या बाजाराची चर्चा

वर्धा, दि. 26 :  कोरोना विषाणूचा संसर्ग टाळण्यासाठी सामाजिक अंतर राखण्याचा प्रयत्न सर्वत्र होत आहे. जिल्हा प्रशासनाच्या सोबतीला सामाजिक संस्था हातभार लावत आहे. वर्ध्याच्या सामाजिक संस्थानी पुढाकार घेऊन जिल्हा प्रशासनासोबत एक आगळी वेगळी संकल्पना राबवली आहे. केसरीमल कन्या शाळेच्या मैदानावरील हा भाजी बाजार सध्या कोरोनाचा लढ्यात मदतगार ठरत आहे.

जिल्हाधिकारी विवेक भीमनवार यांच्या संकल्पनेतून वर्धा शहरात गोल मार्केट व बजाज चौकात भरणारा भाजी बाजार 15 ठिकाणी स्थलांतरित केला होता. मात्र त्याठिकाणी स्वच्छतेची काळजी राखली जात नसल्याचे लक्षात येताच उपविभागीय अधिकारी सुरेश बगळे आणि नगर परिषद मुख्याधिकारी प्रदीप जगताप यांनी याबाबत सामाजिक संस्थांशी चर्चा केली. चर्चेतून पुढे आलेली आदर्श व सुरक्षित बाजाराची संकल्पना कोरोनाच्या युद्धात महत्त्वाची ठरत आहे.  पब्लिक प्रायव्हेट पार्टनरशिपचे उत्तम उदाहरण यानिमित्ताने वर्ध्यात पाहायला मिळाले.

प्रशासनाने केसरीमल कन्या शाळेचे मैदान उपलब्ध करून दिले. बाजार उभारण्यासाठी रोटरीने मनुष्यबळ, साहित्य आणि नियोजन करून दिले. नगरपरिषद वर्धा यांनी येथील स्टॉल्सचे वाटप, आणि तेथील साफसफाईची जबाबदारी घेतली. पोलीस प्रशासनाने तेथे होणारी गर्दी नियंत्रित करून प्रत्येक  व्यक्ती रांगेतच येईल यासाठी नियोजन व काम केले.

पैश्यासाठी सामाजिक बांधिलकी म्हणून व्यावसायिक नितीन शिंदे यांच्यासह रोटरीच्या सदस्यांनी खर्चाचा भार उचलला.

असा आहे बाजार

केसरीमल कन्या शाळेच्या मैदानावर 80 भाजी आणि फळ दुकानाची व्यवस्था करण्यात आली असून आज 60 पेक्षा जास्त दुकाने लागली आहेत. (पुण्याच्या सोसायट्यांत एखाद्याला भाजी विक्रीचा मक्ता देवून तो विकेल तेवढ्या चढ्या दराणे भाजी विक्री होते .येथे तसे नाही .अनेक विक्रेते .एकामागून एक ग्राहक ,एक ग्राहक अनेक विक्रेत्यांकडून हव्या त्या त्या वस्तू खरेदी करू शकतो ..फक्त अट एवढीच एकाचे झाल्या शिवाय दुसरा विक्रेत्यापुढे जात नाही )

कोरोनाच्या पार्श्वभूमीवर हा आगळावेगळा प्रयोग करताना बाजारात येणाऱ्याचे स्वागत करण्यासाठी स्वागत कमान, मैदानाच्या मध्यभागी एक डायस तयार करून ग्राहकांना कोरोनापासून सावध करण्यासाठी सिनेमाच्या आधारावर थीम बनविण्यात आल्या आहेत. यामध्ये बकेट लिस्ट, डार्लिंग, मुंबई- पुणे मुंबई, गच्ची या सिनेमाच्या थीम वापरून जनजागृतीपर संदेश देण्याचं कामही यावेळी करण्यात येत आहे.

इथे येणाऱ्या नागरिकांना गेटपासून हात स्वच्छ धुण्याची ठीक ठिकाणी सोय, प्रत्येक दुकानासमोर सॅनिटायझरची बॉटल, तापमान पाहता हिरवी चटाई, दोन दुकानातील ठराविक अंतर, दुकासमोर गर्दी टाळत सोशल डिस्टनसिंग ठेऊन बसायला खुर्च्या, भाजी विक्रेत्याना मास्क आणि हॅन्डग्लोज, नागरिकांनी प्लास्टिकचा उपयोग टाळावा म्हणून कापडी पिशव्या अशा सोयी उपलब्ध करून देण्यात आल्या आहेत. भाजी बाजारातून कोरोनाचा संसर्ग होण्याचा धोका टळला म्हणायला सध्यातरी हा भाजी बाजार आदर्श ठरत आहे. कारण लोकांची सवय तोडायला गर्दी केल्यास लाऊडस्पीकरवर सूचना देण्याची व्यवस्थाही आहे.

विभागीय आयुक्त डॉ. संजीव कुमार, जिल्हाधिकारी विवेक भीमनवार, जिपचे मुख्य कार्यपालन अधिकारी डॉ.सचिन ओम्बासे, उपविभागीय अधिकारी सुरेश बगळे, तहसीलदार प्रीती डुडुलकर, मुख्याधिकारी प्रदीप जगताप, रोटरीचे महेश मोकलकर, पंकज शर्मा, आसिफ जाहिद यांच्या उपस्थितीत बाजारास प्रारंभ झाला.

कोरोना संसर्गात मदत करण्यासाठी सर्वच सामाजिक संघटना पुढे आल्या आहेत. रोटरीने सेवाग्राम रुग्णालयात डॉक्टरांच्या सुरक्षेसाठी युनिट तयार करून दिले.  केसरीमल कन्या शाळेच्या मैदानावर उभारण्यात आलेल्या भाजी बाजाराला आपण स्वत: भेट दिली. अतियश शिस्तबद्ध आणि भाजी दुकानासमोर  ग्राहकांना बसण्यासाठी दिलेल्या खुर्च्या, प्रत्येक दुकानादाराजवळ सॅनिटायझरची व्यवस्था करण्यात आली आहे. सर्व सामाजिक संस्था व नागरिकांच्या मदतीनेच वर्धा जिल्हा कोरोना मुक्त ठेवण्यात यश मिळाले असल्याचे जिल्हाधिकारी विवेक भिमनवार यांनी सांगितले.

भाजी बाजारातील गर्दी कमी करण्यासाठी या भाजीबाजाराच्या उपक्रमाची चांगली मदत होत आहे. वर्धा जिल्हा ग्रीन झोनमध्ये आहेच. या बाजारामुळे हिरव्या मॅटमध्ये सावलीत असणारा बाजार हा तापमाना सोबतच कोरोनाला सुद्धा लढा देईल यात शंका नाही.

मुंबई दि.२६ एप्रिल :- कोरोनामुळे सगळीकडे लॉकडाउन करण्यात आले आहे. नेमके यातच आयआयटी जेईई आणि नीट प्रवेश परीक्षेच्या पूर्वतयारीसाठी गेलेले महाराष्ट्रातील विद्यार्थी कोटा येथे अडकून पडले आहेत. खानावळ बंद झाल्याने विद्यार्थ्यांचे जेवणाचे हाल होत आहेत.या विद्यार्थ्यांची खाण्याची योग्य सोय नाही.त्यांची गैरसोय होत आहे. तेथील खासगी शिकवणी वर्गही बंद आहेत, ऑनलाइन क्‍लासही होत नाहीत. या परिस्थितीचे गांभीर्य लक्षात घेत कोटा येथे अडकून पडलेल्या महाराष्ट्रातील विद्यार्थ्यांना स्वगृही आणण्यासाठी मुख्यमंत्र्यांनी सकारात्मक निर्णय घ्यावा अशी मागणी विधान परिषदेचे विरोधी पक्ष नेते प्रवीण दरेकर यांनी मुख्यमंत्री उद्धव ठाकरे यांना पत्राच्या माध्यमातून केली आहे.

राजस्थानी येथील कोटा हे १२ वी च्या विद्यार्थ्यांसाठी विशेषतः वैद्यकीय व इंजिनिअरिंग क्षेत्रात भवितव्य करू पाहणार्‍या विद्यार्थ्यांसाठी शैक्षणिक केंद्र बनले आहे. सद्य स्थितीत महाराष्ट्रातील तीन हजार मुले व मुली शिक्षण घेण्यासाठी तिथे वास्तव्य करीत आहेत. लॉकडाउनमुळे ही मुले गेल्या दोन महिन्यापासून तेथेच अडकून पडल्याने विद्यार्थ्यांमध्ये आणि पालकांमध्ये अस्वस्थेतेचे वातावरण असल्याचे श्री.दरेकर यांनी पत्रात नमूद केले आहे.

महाराष्ट्राप्रमाणे इतर राज्यातील विद्यार्थी कोटा तेथे शिकण्यासाठी गेले होते. उत्तर प्रदेश राज्याचे मुख्यमंत्री योगी आदित्यनाथ यांनी विद्यार्थ्यांना आणण्यासाठी विशेष वाहनांची व्यवस्था केली. परंतु महाराष्ट्रामध्ये अद्याप अशी व्यवस्था झालेली नाही. एवढेच नव्हे तर जे पालक आपल्या मुला-मुलींना आणण्यास इच्छुक आहेत त्यांनाही पोलीस महासंचालक यांच्या कार्यालयातून परवानगी मिळत नसल्याने पालक वर्ग चिंतेत आहे. म्हणूनच मुख्यमंत्र्यांनी या प्रकरणात लक्ष घालून कोटा येथे शिकणारे महाराष्ट्रातील विद्यार्थी महाराष्ट्रात पुन्हा कसे येतील याबाबत सकारात्मक निर्णय लवकरात लवकर घ्यावा अशी मागणी श्री.दरेकर यांनी केली पत्राच्या माध्यमातून केली आहे.