-विभागीय आयुक्त डॉ.दीपक म्हैसेकर
पुणे दि.28:- पुणे महानगरक्षेत्रात कोरोना बाधित रुग्णांवर 19 हॉस्पीटलमध्ये उपचार सुरू असल्याची माहिती विभागीय आयुक्त डॉ.दीपक म्हैसेकर यांनी दिली.
डॉ. म्हैसेकर म्हणाले, पुणे आणि पिंपरी चिंचवड शहरात वेगवेगळया 19 शासकीय व खाजगी हॉस्पीटलमध्ये कोरोनाबाधित रुग्णांना दाखल करण्याची सुविधा उपलब्ध करून देण्यात आली आहे.
पुणे व पिंपरी चिंचवड महानगरपालिकेने कांही खाजगी हॉस्पीटलबरोबर कोरोना बाधित रुग्णांना उपचारासाठी दाखल करण्याबाबत करार केलेला आहे.
तसेच राज्य शासन याबाबत धोरणात्मक निर्णय घेत असून खर्चाची प्रतिपूर्ती कशी करावी, याअनुषंगाने शासनाकडून मार्गदर्शक तत्वे अपेक्षित आहे; तथापि, तोपर्यत वेगवेगळया हॉस्पीटलच्या सेवा प्राप्त करून घेण्यात येत आहेत आणि या सेवांच्यामार्फत कोरोनाबाधित रुग्णांना सेवा देण्यात येत असल्याचेही त्यांनी सांगितले.
कोरोनाबाधित महिलांच्या प्रसूतीसाठी ससून हॉस्पीटल व महानगरपालिकेचे सोनवणे हॉस्पीटल या दोन हॉस्पीटलमध्ये व्यवस्था करण्यात आली असून या शिवाय कांही खाजगी हॉस्पीटलशी महापालिका करार करीत आहे. हे दोन हॉस्पीटल वगळता ज्या महिला कोरोनाबाधित नाहीत, त्यांच्या प्रसूतीची व्यवस्था करण्यात आल्याचेही त्यांनी स्पष्ट केले..

0000000

पुणे- कोरोना शी संघर्ष सुरु असताना पालिकेच्या सर्वेक्षण कामास ग़ैरहजर राहून नोटिसांना उत्तरे न देणाऱ्या 12 उप शिक्षकांना महापालिका अतिरिक्त आयुक्त रूबल अगरवाल यांनी निलंबित केले आहे .

कोरोना विषाणू प्रादुर्भाव प्रतिबंधात्मक उपाययोजनेअंतर्गत मनपा प्रशासनाकडून विविध कामे युद्धपातळीवर करण्यात येत आहेत,विविध स्तरावर महापालिकेचे अधिकारी व कर्मचारी कामात व्यस्त आहेत,अशा परिस्थितीत विनासुचना रजा घेणे,कार्यालयीन आदेश न पाळणे याबाबत संबंधितांना वेळोवेळी सूचना देउनही त्यांचेवर सोपविण्यात आलेले सर्वेक्षणाचे कामे न केल्यामुळे कामकाजात अडथळे निर्माण झाले,
या कारणास्तव पुणे मनपा शिक्षण मंडळाकडील संबंधित उपशिक्षक यांनी कार्यालयीन आदेशानुसार परिमंडळ उपायुक्त विभागाच्या अंतर्गत येणाऱ्या क्षेत्रीय स्तरावर नागरी सर्वेक्षणाकरिता डॉ,वैशाली जाधव,सहायक आरोग्य अधिकारी यांचेकडे कामास हजर होणे आवश्यक होते,तथापि सदरचे उपशिक्षक हजर झाले नाही,व कारणे दाखवा नोटिसा दिल्यानंतरही खुलासे देण्यात आले नाही,अशाप्रकारचे शिस्तभंग व गैरवर्तनामुळे संबंधीत बारा उपशिक्षकांवर निलंबनाची कारवाई करण्यात येत असल्याचे रुबल अगरवाल, अतिरिक्त महापालिका आयुक्त ( जनरल ) यांनी कळविले आहे.

पुणे-लॉकडाऊनच्या काळात नागरिकांकडून त्याचा फज्जा उडणे, विनाकारण फिरत राहणे यामुळे प्रशासनावरचा ताण वाढत आहे. त्यामुळे नागरिकांमध्ये लॉकडाऊनचे पालन व्हावे आणि वाचन संस्कृती वाढीस लागावी यासाठी भारतीय जनता पक्षाचे प्रदेशाध्यक्ष आणि कोथरुडचे आमदार चंद्रकांतदादा पाटील यांनी पुढाकार घेतला आहे. श्री. पाटील यांनी कोथरुड मधील सोसायट्यांमध्ये पुस्तकांचे वाटप केले आहे.

सध्या पुण्यात कोरोनाबाधितांची संख्या वाढत आहे. त्यातच अनेक भागांत लॉकडाऊनचा फज्जा उडताना दिसत आहे. तसेच तरुण वर्ग विनाकारण रस्त्यांवर फिरत आहेत. तर अनेक ठिकाणी सोसायटीच्या आवारात विरंगुळ्यासाठी गर्दी करत आहेत. त्यामुळे संचारबंदीच्या नियमांची पायमल्ली होत आहे. त्यामुळे नागरिकांमध्ये वाचन संस्कृती वाढीस लागावी यासाठी भाजपा प्रदेशाध्यक्ष आमदार चंद्रकांतदादा पाटील यांनी पुढाकार घेत, आपल्या मतदारसंघात पुस्तकांचे वाटप केले आहे. मतदारसंघातील अनेक सोसायट्यांमध्ये पुस्तके उपलब्ध करून दिली आहेत.

यासोबतच लॉकडाऊननंतर अडचणीत असलेल्यांसाठी भोजन व्यवस्था केली आहे. तसेच गरजू कुटुंबांना शिधा वाटप आणि वयोवृद्ध व्यक्तींना २५ टक्के सवलतीच्या दरात औषधे घरपोच देण्यात येत आहे. त्याचबरोबर पुण्यातील कोरोनाबाधितांची सेवा करणार्या डॉक्टर, परिणाम यांना स्वसंरक्षणासाठी पीपीई किटचे वाटप देखील करण्यात आले आहे.

पुणे दि.28 : – पुणे विभागामध्ये कोरोना विषाणू ( कोवीड -19) संसर्गजन्य आजाराची लागण झालेले रुग्ण आढळून येत आहेत. हा विषाणू अतिसंसर्गजन्य असल्यामुळे त्यावर तात्काळ प्रतिबंधात्मक उपाययोजना करणे आवश्यक असल्याने, राज्यात साथरोग अधिनियम -1897 च्या अनुषंगाने महाराष्ट्र कोव्हीड उपाययोजना नियम 2020 नियम अस्तित्वात आले आहेत व ते दि.15 मार्च 2020 पासून लागू झालेले आहेत.
कोरोना (कोवीड -19) प्रादुर्भाव नियंत्रित व प्रतिबंधित करण्याच्या अनुषंगाने पुणे विभागामध्ये कामाच्या समन्वयाकरीता अधिकारी / कर्मचा-यांच्या समिती गठीत करण्यात आल्या आहेत. त्यानुसार क्षेत्रीय स्तरावरील रुग्णालये व प्रयोगशाळा यांचे परिनिरीक्षण करणे तसेच प्रयोगशाळेमध्ये पाठविण्यात येणा-या नमुन्याची माहिती संकलित करुन समन्वय राखणेकरीता आरोग्य सेवा विभागाचे सहाय्यक संचालक आर.एस.आडकेकर व वैद्यकीय अधिकारी डॉ.अशोक रणदिवे तसेच आवश्यकता भासल्यास अतिरिक्त मानव संसाधन उपलब्ध करुन देण्याकरीता महसूल विभागाचे उपायुक्त् प्रताप जाधव व उपजिल्हाधिकारी स्नेहल बर्गे तसेच नायब तहसिलदार संजय शिंदे, त्याचप्रमाणे विभागातील पॅरामेडीकल, डॉक्टर्स, वैद्यकीय कर्मचारी आशा कर्मचारी, अंगणवाडी सेविका यांना प्रशिक्षित करण्यासाठी उपायुक्त् ( विकास आस्थापना) पी.बी.पाटील, गट विकास अधिकारी (प्रशासन), आर.जी.खाडे व सहा.आयुक्त् (तपासणी) उदय पाटील इ.ची नेमणूक करण्यात आली आहे.
कोवीड-19 चा प्रादूर्भाव रोखण्याच्या अनुषंगाने औषधे, वैद्यकीय उपकरणे यांची मागणी व उपलब्धतेबाबत समन्वय राखणेकरीता उपायुक्त (विकास योजना) राजाराम झेंडे, सहायक संचालक (लेखा) कैलास भोसले व सहा.आयुक्त् (तपासणी) संतोष हराळे, तसेच पायाभूत सुविधा व्यवस्थापन करणे व तद्अनुषंगीक कामकाज त्यामध्ये प्रामुख्याने विलगीकरण / अलगीकरण कक्ष व त्यामधील व्यवस्था करण्यासाठी उपायुक्त् (सामान्य प्रशासन) संजयसिंह चव्हाण, उपजिल्हाधिकारी जिल्हा मुद्रांक शुल्क प्रकाश अहिरराव व लेखाधिकारी ( लेखा शाखा) गणेश सस्ते तर प्रसार माध्यमात येणा-या बातम्या तसेच शासनाद्वारे प्रसारीत करण्यात येणारी माहिती योग्यरित्या प्रसारीत करण्यासाठी उपसंचालक ( माहिती) मोहन राठोड, जिल्हा माहिती अधिकारी राजेंद्र सरग व माहिती अधिकारी वृषाली पाटील तर प्रसार माध्यमांना अचूक माहिती उपलब्ध करुन देण्याकरीता नगरपालिका प्रशासनाचे प्रादेशिक उपसंचालक प्रशांत खांडकेकर यांची नेमणूक करण्यात आली आहे.
कोवीड-19 चा प्रादुर्भाव रोखण्याच्या अनुषंगाने करण्यात येणा-या उपाय योजना, विविध बैठकांचे इतिवृत्त, शासनाकडून प्राप्त होणा-या मार्गदर्शक सूचना त्या अनुषंगाने करण्यात येणारी कार्यवाहीबाबत प्राप्त दस्तऐवज तयार करणेकरीता पशुसंवर्धन विभागाच्या उपायुक्त साधना सावरकर, पुनर्वसनचे तहसिलदार विवेक साळुंके तसेच खाजगी रुग्णालयात उपचार घेणा-या रुग्णांची माहिती घेऊन संक्रमित रुग्ण शोधणे, खाजगी रुग्णालयाशी समन्वय साधणे,आवश्यकतेनुसार खाजगी रुग्णालये अधिग्रहण करणेकरीता आरोग्य विभागाचे उपसंचालक, संजय देशमुख व जिल्हा शल्य चिकित्सक डॉ.अशोक नंदापूरकर व वैद्यकीय अधिकारी डॉ. संजय जठार तर रुग्णवाहिका तसेच औषधांची वाहतूक करणारे वाहन चालक यांना प्रशिक्षण देणे, रुग्णवाहिका सेवा 24 तास उपलब्ध करुन देणे,त्या अनुषंगाने इतर उपाययोजना करण्याकरीता रोजगार हमी योजनेच्या उप आयुक्त नयना बोंदार्डे, कृषि अधीक्षक विनयकुमार आवटे तर सर्व शासकीय विभागांशी संपर्क साधणे व माहितीची देवाण घेवाण करणेकरीता मागासवर्ग शाखेच्या सहा.आयुक्त रुपाली डंबे-आवले, नायब तहसिलदार अपर्णा कौलगेकर यांची नेमणूक करण्यात आली असल्याची माहिती विभागीय आयुक्त डॉ.दीपक म्हैसेकर यांनी दिली आहे.
0 0 0 0

पुणे, दिनांक 28- जिल्‍ह्याचे पालकमंत्री अजित पवार आणि जिल्‍हाधिकारी नवल किशोर राम यांच्‍या सूचनेनुसार पुणे शहर तहसिल कार्यालयातील सर्वच कर्मचाऱ्यांची कोवीड 19 बाबतची पूर्वतपासणी करण्‍यात आली. मेट्रो मेडिकल फाऊंडेशन व पुनीत बालन ग्रुप यांच्या सहकार्याने आयोजित शिबीरात ही तपासणी करण्‍यात आल्याची माहिती तहसिलदार तृप्‍ती कोलते-पाटील यांनी दिली.

पुणे शहर तहसील कार्यालयांतर्गत अनेक झोपडपट्टया आहेत. त्यात वास्तव्य करणारे, हातावर पोट असणा-या अनेक नागरिकांवर ‘लॉकडाऊन’मुळे वाईट वेळ आली आहे. महाराष्ट्रातील इतर जिल्‍ह्यांबरोबरच परराज्यातील मजुरांचे प्रमाण जास्त आहे. गेले महिनाभर तहसिल कार्यालय पुणे शहर येथील क्षेत्रीय अधिकारी म्हणजेच गाव कामगार, तलाठी, कोतवाल, मंडळाधिकारी हे पुणे शहरातील गरजू, बेरोजगार मजुरांकरिता अन्नधान्याचे किट वाटप करतात. प्रसंगी अतिसंवेदनशील भागांमध्ये जाऊनही तलाठ्यांना नागरिकांसाठी कीट उपलब्ध करून द्यावी लागतात. कर्मचाऱ्यांच्या स्वास्थ्याची काळजी घेणे हे कार्यालय प्रमुखाचे आद्य कर्तव्य आहे. त्यामुळेच पालकमंत्री अजित पवार, विभागीय आयुक्‍त डॉ. दिपक म्‍हैसेकर आणि जिल्‍हाधिकारी नवल किशोर राम यांच्‍या सूचनेनुसार कार्यालयातील कर्मचाऱ्यांना नागरिकांची सेवा अक्षयपणे करता यावी म्हणून प्री कोविड 19 च्‍या तपासण्या करून घेतल्या. यामुळे कर्मचाऱ्यांच्या कार्यक्षमतेत तसेच आत्‍मविश्‍वासात नक्कीच वाढ होणार असल्‍याचेही श्रीमती पाटील यांनी सांगितले.

कर्मचाऱ्यांच्या तपासणीबरोबरच त्यांना वैयक्तिक संरक्षणासाठी पीपीई कीट, सॅनिटायझर, मास्‍क, हातमोजे, द्रवरुप हँडवॉश असे सुमारे ६५०० रुपये किमतीचे किट देण्यात आले. तसेच प्रतिकारशक्ती वाढीकरि‍ता कर्मचारी व त्यांच्या कुटुंबियांकरीता कामधेनू व तत्वसेवा या संस्थेतर्फे मोफत होमियोपथी औषधे व डॉ. बनसोडे यांच्यातर्फे सुमारे २२०० रूपयांची मोफत आयुर्वेदिक औषधे देण्यात आली आहेत. त्यामुळे कर्मचाऱ्यांचे आत्मबल व मनोधैर्य वाढण्‍यास नक्‍कीच मदत होईल, असेही तहसिलदार तृप्‍ती कोलते-पाटील यांनी सांगितले.

पुणे दि.28: आपल्या जीवाची पर्वा न करता अहोरात्र कोरोना बाधित रुग्णांवर उपचार तसेच रुग्णांची सेवा करणा-या डॉक्टरांना विश्रांतीची अत्यंत आवश्यकता असते, हीच बाब लक्षात घेवून या डॉक्टरांच्या राहण्याची व्यवस्था पुणे स्टेशन परिसरातील पंचतारांकित हॉटेलमध्ये करण्यात आली असून त्याठिकाणी त्यांना आवश्यक त्या सर्व सोईसुविधा देण्याचा प्रयत्न प्रशासनाने केला असून या डॉक्टरांचीही विशेष काळजी घेण्यात येत असल्याची माहिती जिल्हाधिकारी नवल किशोर राम यांनी आज दिली.
पुणे शहरात कोरोनाचा वाढता संसर्ग विचारात घेत डॉक्टरांची मोठी टीम अहोरात्र कार्यरत आहे. आपल्या कुटुंबापासून दूर राहणे आवश्यक असल्याने प्रशासनाने या डॉक्टरांची राहण्याची वेगळी व्यवस्था केली आहे. पुणे स्टेशन परिसरासह शहरातील व्हीव्हीआयपी विश्रामगृहासह हॉटेल ब्लू डायमंड, हॉटेल लेमन ट्री या पंचतारांकित हॉटेलमध्ये निवास व्यवस्था करण्यात आली आहे. डॉक्टरांसाठी दर्जेदार जेवण मिळावे, यासाठी नामांकित दोन केटर्सचीदेखील नियुक्ती करण्यात आली आहे.

पुणे  :कोरोना च्या संकटामुळे हवालदिल झालेल्या जनतेला मदत करण्याची मोहीम उघडलेल्या भाजपच्या नगरसेवक दिलीप वेडे पाटलांनी केलेल्या पाठपुराव्याला अखेरीस आज यश आले आणि चक्क महापालिकेच्या शाळेत रेशनचे दुकान सुरु झाले . वेडे पाटलांनी सुरुवातीला वार्डात फवारणी करणे, अन्नधान्याचे कीट वाटणे ,सनीटायझर वाटणे ,घरोघरी आरोग्य तपासणी व्हावी म्हणून  भारतीय जैन संघटना यांच्या संयुक्त विध्यमानाने आज डाॅक्टर आपल्या दारी डिस्पेनसरी व्हॅन हा उपक्रम राबविणे असे विविध कामे हाथी घेतली .पण रेशनचे दुकान नसल्याने येथे शासकीय धान्यवाटप कसे करायचे हा प्रश्नच होता आज तो हि त्यांनी निकाली काढला . पुणे मनपा शाळा क्रं. 153, बावधन खुर्द येथे स्वस्त धान्याचे केंद्र सुरू झाले व प्रत्यक्ष धान्य वाटप सुरू झाले.

बावधन खुर्द हा तहसील मुळशी (पौड) या ग्रामीण भागात होता. परंतु तेथील रेशनिंगचा  हा भाग प्रभाग क्रं. 10 पुणे शहर विभागामध्ये समाविष्ट करण्यासाठी नगरसेवक दिलीप वेडेपाटील यांच्या अथक प्रयत्न व तत्कालीन अन्न व नागरी पुरवठा मंत्री तसेच पुण्याचे विद्यमान खासदार गिरीश बापट यांच्याकडे सातत्याने केलेल्या पाठपुराव्यामुळे याला मंजूरी मिळून रेशनिंग  कार्ड ग्रामीण भागातून पुणे शहर अन्न धान्य पुरवठा विभागात समाविष्ट करण्यात आला. आता या भागातील बंद व सुरू असलेल्या केशरी रेशन कार्ड धारकांना देखील केंद्र आणि महाराष्ट्र शासनाने ठरवून दिलेल्या निकषानुसार प्रत्येक व्यक्तीस 2 किलो तांदूळ 12 रुपये व 3 किलो गहू 8 रुपये दराने मिळणार आहे.यावेळी मं.विभागाचे परिमंडळ अधिकारी मा.गजानन देशमुख, पुरवठा निरीक्षक नागरगोजे, नगरसेवक दिलीप वेडेपाटील, नगरसेवक किरण दगडे पाटील व आदि मान्यवर उपस्थित होते.