पुणे : महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने घेण्यात आलेल्या दहावीच्या परीक्षेत ४७ वर्षांची यशस्वी परंपरा जपत रोझरी स्कुलचा निकाल यंदाही १०० टक्के लागला आहे. विमाननगर, वारजे आणि कॅम्प शाखेतून एकूण ७५८ विद्यार्थी परीक्षेला बसले होते. त्यातील सर्व विद्यार्थी उत्कृष्ट गुणांसह उत्तीर्ण झाले आहेत. ५८२ विद्यार्थी डिस्टिंक्शनमध्ये, तर १६२ विद्यार्थी प्रथम श्रेणीत उत्तीर्ण झाले आहेत.
रोझरी स्कुल विमानगरमधून श्रेयस भारती (९५.८%) प्रथम, ख़ुशी कालनकर (९४.४%) द्वितीय, तर रसिका फुटाणे (९४%) तृतीय आली आहे. रोझरी स्कुल वारजेमधून सुवीरा रुकडे (९७.८०%), पृथ्वीराज बनसोडे (९७.२०%), ईश्वरी जोशी (९६.४०%) गुण मिळवत अनुक्रमे प्रथम, द्वितीय व तृतीय आली आहे. तर झीनल पोटफोडे ९७.४% गुण मिळवून रोझरी स्कुल कॅम्पमधून पहिली आहे आहे. पृथ्वीराज बनसोडे (रोझरी, वारजे) याला संस्कृत विषयात, मुस्कान शेख (रोझरी, विमाननगर) हिला गणित विषयात १०० पैकी १०० तर देवर्षी गायकवाड (रोझरी, विमाननगर) हिला विज्ञान विषयात १०० पैकी ९८ गुण मिळाले आहेत.
रोझरी फाउंडेशनचे व्यवस्थापकीय संचालक विनय अऱ्हाना यांनी यशस्वी विद्यार्थ्यांचे कौतुक केले. अऱ्हाना म्हणाले, “दहावीच्या परीक्षेतील या घवघवीत यशाबद्दल मला विद्यार्थी आणि शिक्षकांचा अभिमान वाटतो. कठोर परिश्रम, अभ्यासातील सातत्य यामुळे कठीण वाटणाऱ्या दहावीच्या परीक्षेतील या विद्यार्थ्यांचे यश म्हणजे भविष्यातील चमकते तारे आहेत. ‘रोझरी’ची यशाची ही परंपरा नव्या वर्षातही याच जोमाने सुरु राहील. विद्यार्थी व पालक यापुढेही आमच्यावर आधीप्रमाणेच विश्वास टाकतील. सत्यस्थितीत बदलेली शिक्षणपद्धती, तंत्रज्ञानाचा वाढत वापर आणि स्मार्ट एज्युकेशन यावर आम्ही काम करतो आहोत.”

पुणे- पेठ पर्वती स्कीम क्रमांक ३ फायनल प्लॉट क्रमांक ४९९ व ५००अ  स्वारगेट येथील २८ हजार चौ. मीटर एवढ्या क्षेत्रात  महामेट्रोला  (महाराष्ट्र मेट्रो रेल कॉरपरेशन लिमिटेड) मेट्रोस्टेशन  करण्यासाठी रेडीरेकनर दराने महामेट्रोला पुण्याची सार्वजनिक वाहतूक सुखकर व्हावी यासाठी  महानगरपालिकेने  जागा दिली आहे. सार्वजनिक हितासाठी जागा देताना  रेडीरेकनर दराने जागा देणे योग्य आहे. परंतु मेट्रोस्टेशन उभारत असताना येथे  मल्टी मॉडेल हब व्यावसायिक संकुल देखील महामेट्रो करत आहे. सदर जागेचा वापर महामेट्रोने मेट्रो स्टेशन व्यतिरिक्त  मल्टी मॉडेल हब व्यावसायिक संकुल करून नफा मिळवत असेल तर यातून होणाऱ्या वार्षिक उत्पन्नातून ४०-५० टक्के हिस्सा महामेट्रोने पुणे महानगरपालिकेला देणे बंधनकारक केले पाहिजे अशी मागणी काँग्रेस पक्षाचे गटनेते आबा बागुल यांनी केली  
ते म्हणाले,’ पुणे शहरात अनेक जागा मेट्रो स्टेशनसाठी देण्यात आल्या आहेत. त्यापैकी   तीन ठिकाणी  मोक्याच्या जागेत महामेट्रोचा  मल्टी मॉडेल हब व्यावसायिक संकुल उभारण्याचा विचार आहे. यासर्व ठिकाणच्या व्यावसायिक संकुल मधून येणाऱ्या उत्पन्नाच्या ४०-५० टक्के हिस्सा महानगरपालिकेला मिळावा. महानगरपालिकेने महामेट्रोला दिलेल्या क्षेत्राचे ताबे पावती केलेली आहे. परंतु करारनामा झालेला नाही. करारनामा करताना सदर जागेचा व्यावसायिक हेतूने  वापर केल्यास पुणे महानगरपालिकेला होणाऱ्या वार्षिक नफ्यातून ४०-५० टक्के हिस्सा मिळावा अशी अट घालण्यात यावी किंवा ४०-५० टक्के पार्टनरशिप करावी. व स्थायी समिती मार्फत मुख्य सभेत मान्यता घेऊनच करार करावा असे आबा बागुल म्हणाले. 
महानगरपालिकेचे  नफ्याच्या दृष्टीने कार्य करणे हे उद्धिष्ट नाही. परंतु शहराला मूलभूत सुविधा देत असताना उत्पन्न वाढीसाठी विविध पर्याय शोधणे देखील महानगरपालिकेचे कर्तव्य आहे.
महानगरपालिका सार्वजनिक हिताच्या वापरासाठी महामेट्रोला हिस्यापोटी ९५० कोटी रुपये देणार आहे. त्यापैकी काही पैशाच्या स्वरूपात  व उर्वरित जागेच्या स्वरूपात वळती करण्यात येणार आहे. परंतु  सार्वजनिक हेतू सोडून महामेट्रो व्यावसायिक हेतूने येथे  मल्टी मॉडेल हब व्यावसायिक संकुल  उभारत असेल तर महानगरपालिकेला नफ्यामध्ये ४० टक्के हिस्सा असणे गरजेचे आहे.  
पुणे महानगरपालिकेचे व्यावसायिक प्रकल्प पाहणी करिता महानगरपालिकेने स्वतंत्र  कंन्सल्टंट नेमून   महानगरपालिकेला जास्तीतजास्त कसा प्रॉफिट मार्जिन मिळेल यासाठी त्याची मदत घ्यावी. महामेट्रो  मल्टी मॉडेल हबचे प्लॅन पास करताना महानगरपालिकेच्या बांधकाम नियमावलीप्रमाणे चार्जेस भरून घ्यावे. हा प्लॅन सॅंक्शन करताना महानगरपालिकेचा अधिकार देखील राखून ठेवावा. यातून महानगरपालिकेला उत्पन्नाचा मोठा स्रोत निर्माण होईल.  यासाठी आपण भूमिका घेऊन पुणे महानगरपालिकेला महामेट्रोच्या व्यावसायिक संकुलमधील एकूण वार्षिक नफ्याच्या  ४०-५० टक्के हिस्सा मिळण्यासाठी करारनाम्यात अट घालावी अशी मागणी पुणे महानगरपालिका आयुक्तांना आबा बागुलांनी दिलेल्या पत्राद्वारे केली. 

पुणे विभागातील 56 हजार 414 कोरोना बाधित रुग्ण बरे होऊन घरी
विभागात कोरोना बाधित 95 हजार 76 रुग्ण
-विभागीय आयुक्त डॉ.दीपक म्हैसेकर

पुणे दि. 29 :- पुणे विभागातील 56 हजार 414 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 95 हजार 76 झाली आहे. तर ॲक्टीव रुग्ण 36 हजार 77 आहे. विभागात कोरोनाबाधीत एकुण 2 हजार 585 रुग्णांचा मृत्यू झाला आहे. तसेच 955 रुग्ण गंभीर असून उर्वरीत निरीक्षणाखाली आहेत. पुणे विभागामध्ये बरे होणा-या रुग्णांचे प्रमाण 59.34 टक्के आहे. तर मृत्यूचे प्रमाण 2.72 टक्के इतके आहे, अशी माहिती विभागीय आयुक्त डॉ.दीपक म्हैसेकर यांनी दिली.
यापैकी पुणे जिल्हयातील 76 हजार 669 बाधीत रुग्ण असून कोरोना बाधित 47 हजार 197 रुग्ण बरे होवून घरी गेले आहेत. ॲक्टीव रुग्ण संख्या 27 हजार 663 आहे. यामध्ये पुणे महानगरपालिका क्षेत्रातील 19 हजार488 , पिंपरी चिंचवड महानगरपालिका क्षेत्रातील 6 हजार 327, जिल्हा शल्य चिकीत्सक यांचेकडील 93, पुणे कॅन्टोंन्मेंट 144 , खडकी विभागातील 24 , ग्रामीण क्षेत्रातील 1 हजार 587 , यांच्याकडील रुग्णांचा समावेश आहे.
पुणे जिल्हयात कोरोनाबाधित एकूण 1 हजार 809 रुग्णांचा मृत्यू झाला आहे. यामध्ये पुणे महानगरपालिका क्षेत्रातील 1 हजार 254 , पिंपरी चिंचवड महानगरपालिका क्षेत्रातील 322 , जिल्हा शल्य चिकीत्सक यांच्याकडील 53, पुणे कॅन्टोंन्मेंट 31 , खडकी विभागातील 37, व ग्रामीण क्षेत्रातील 112 , रुग्णांचा समावेश आहे. तसेच 698 रुग्ण गंभीर असून उर्वरित निरीक्षणाखाली आहेत. पुणे जिल्हयामध्ये बरे होणा-या रुग्णांचे प्रमाण 61.56 टक्के आहे. तर मृत्यूचे प्रमाण 2.36 टक्के इतके आहे.
कालच्या बाधीत रुग्णांच्या संख्येच्या तुलनेत पुणे विभागात बाधीत रुग्णांच्या संख्येमध्ये एकूण 3 हजार 11 ने वाढ झाली आहे. यामध्ये पुणे जिल्ह्यात 2 हजार 20, सातारा जिल्ह्यात 182 , सोलापूर जिल्ह्यात 263 , सांगली जिल्ह्यात 112 तर कोल्हापूर जिल्ह्यात 434 अशी रुग्ण संख्येमध्ये वाढ झालेली आहे.
सातारा जिल्हयातील कोरोना बाधीत 3 हजार 524 रुग्ण असून 1 हजार 865 बाधित रुग्ण बरे होवून घरी गेले आहेत. ॲक्टीव रुग्ण संख्या 1 हजार 540 आहे. कोरोनाबाधित एकूण 119 रुग्णांचा मृत्यू झाला आहे.
सोलापूर जिल्हयातील 7 हजार 942 कोरोना बाधीत रुग्ण असून 4 हजार 648 बाधित रुग्ण बरे होवून घरी गेले आहेत. ॲक्टीव रुग्ण संख्या 2 हजार 824 आहे. कोरोना बाधित एकूण 470 रुग्णांचा मृत्यू झाला आहे.
सांगली जिल्हयातील कोरोना बाधीत 1 हजार 765 रुग्ण असून 612 बाधित रुग्ण बरे होवून घरी गेले आहेत. ॲक्टीव रुग्ण संख्या 1 हजार 96 आहे. कोरोना बाधित एकूण 57 रुग्णांचा मृत्यू झाला आहे.
कोल्हापूर जिल्हयातील 5 हजार 176 कोरोना बाधीत रुग्ण असून 2 हजार 92 बाधित रुग्ण बरे होवून घरी गेले आहेत. ॲक्टीव रुग्ण संख्या 2 हजार 954 आहे. कोरोना बाधित एकूण 130 रुग्णांचा मृत्यू झाला आहे.
आजपर्यत विभागामध्ये एकुण 4 लाख 69 हजार 420 नमूने तपासणीसाठी पाठविण्यात आले होते, त्यापैकी 4 लाख 64 हजार 547 नमुन्यांचा अहवाल प्राप्त झाला आहे. तर 4 हजार 873 नमून्यांचा अहवाल प्रतीक्षेत आहे. प्राप्त अहवालांपैकी 3 लाख 68 हजार 625 नमून्यांचा अहवाल निगेटीव्ह आहे.

( टिप :- दि. 29 जुलै 2020 रोजी दुपारी 3.00 वा. पर्यंतच्या आकडेवारीनुसार )

पुणे : महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने घेण्यात आलेल्या दहावीच्या परीक्षेत मुकुल माधव विद्यालयाच्या विद्यार्थ्यांनी घवघवीत यश संपादन केले. दहावीची परीक्षा देणारी विद्यालयाची ही पहिलीच तुकडी होती. एकूण २६ विद्यार्थ्यांनी या परीक्षेमध्ये उत्तम यश संपादन केले. २६ पैकी १९ विद्यार्थ्यांनी ७५% पेक्षा जास्त गुण प्राप्त करून विशेष श्रेणी प्राप्त केली. उर्वरित सात विद्यार्थ्यांना ६४% ते ७३% यादरम्यान गुण प्राप्त झाले. मुकुल माधव विद्यालयाची ही पहिलीच तुकडी असल्याने वर्षाच्या सुरुवातीपासूनच विद्यार्थ्यांना विशेष मार्गदर्शन करण्यात येत होते. अभ्यासाबरोबरच त्यांच्या सर्वांगीण विकासासाठी मुकुल माधव विद्यालयतर्फे विशेष लक्ष देण्यात आले होते.
शिक्षणाचा हा वसा पुढे नेण्याच्या दृष्टीने तसेच ग्रामीण भागातील मुलांना पुणे-मुंबई यासारख्या ठिकाणी देण्यात येणार्‍या उच्च प्रतीच्या शिक्षणाचा दर्जा कायम टिकवत मुकुल माधव विद्यालयातर्फे यंदाच्या शैक्षणिक वर्षांपासून (२०२०-२१) ज्युनिअर कॉलेजची मुहूर्तमेढ रोवण्यात येणार आहे. विज्ञान आणि वाणिज्य या दोन शाखासह जुनिअर कॉलेजची सुरुवात होणार आहे. कनिष्ठ महाविद्यालयासाठी विद्यार्थ्यांना बाहेर जाण्याची गरज असून, मुकुल माधव विद्यालयाच्या जूनियर कॉलेजमध्ये प्रवेश घ्यावा, असे आवाहन विद्यालयातर्फे करण्यात येत आहे. या सर्व यशस्वी विद्यार्थ्यांना मुकुल माधव विद्यालयाच्या शिक्षकांचे अमुल्य मार्गदर्शन लाभले. मुकुल माधव फौंडेशनच्या व्यवस्थापक विश्वस्त रितू प्रकाश छाब्रिया यांनी सर्व यशस्वी विद्यार्थ्यांचे, शिक्षकवर्ग व पालकांचे अभिनंदन केले. 
रितू प्रकाश छाब्रिया म्हणाल्या, “आमचे विद्यार्थी, पालक, शिक्षक आणि मुकुल माधव विद्यालयाचा संपूर्ण कर्मचारीवृंद यांमुळे आम्हाला आज अभिमानाचा क्षण अनुभवता येत आहे. खरेतर आमची शाळा फक्त ११ वर्षांपूर्वी सुरू झाली आणि या दरम्यान अनेक संकटांना सामोरे जावे लागले. परंतु समाजाला जास्तीत जास्त चांगले देण्याचा आमचा प्रयत्न सफल झाला आहे. विद्यार्थ्यांनी घेतलेल्या परिश्रमाबद्दल कौतुक करून त्यांना आनंदी आरोग्यदायी भविष्यासाठी शुभेच्छा देते.”

पुणे – प्रोग्रेसिव्ह एज्युकेशन सोसायटीचे मॉडर्न हायस्कूल वारजे प्रशालेचा निकाल शंभर टक्के लागला असून प्रशालेत प्रथम क्रमांक गावडे रोहित पुंडलिक ९३.२०% द्वितीय मिरकले साक्षी रविकांत ९१.२०% तृतीय भिलारे हर्षल रामचंद्र ९०.६०%  या विद्यार्थ्यांनी प्रशालेत प्रथम तीन क्रमांक प्राप्त केले.शाळेचा शंभर टक्के निकाल लागला.मुख्याध्यापिका रोहिणी काळे, शाळा समिती अध्यक्ष आणि कार्यवाह शामकांत देशमुख, प्रमुख्याध्यापक योगेश ठिपसे यांनी उत्तीर्ण विद्यार्थी,शिक्षक,शिक्षकेत्तर कर्मचाऱ्यांचे अभिनंदन केले.संस्थेचे कार्याध्यक्ष डॉ.गजानन एकबोटे,उपकार्यवाह व नगरसेविका,महिला बालकल्याण सभापती पुणे म.न.पा.ज्योत्स्ना एकबोटे यांनी सर्व उत्तीर्ण विद्यार्थी, सर्व शिक्षक,शिक्षकेत्तर,मुख्याध्यापक यांचे कौतुक केले.

पुणे दि.29 : – सन 2019-20 या शैक्षणिक वर्षात इयत्ता 10 वी, 12 वी, पदवी, पदव्युत्तर, वैद्यकीय व अभियांत्रिकी इ.अभ्यासक्रमामध्ये विद्यार्थ्यांना सरासरी 60 टक्के किंवा त्यापेक्षा जास्त टक्केवारीने गुण प्राप्त करुन उत्तीर्ण झालेल्या मातंग समाज व तत्सम 12 पोटजातीतील मांग, मातंग, मिनी मादिग, मादिग, दानखणी मांग, मांग महाशी, मदारी, राधेमांग, मांग गारुडी, मांग गारोडी, मादगी, मादिगा इत्यादी विद्यार्थी / विद्यार्थींनींना महामंडळाकडुन ज्येष्ठता व गुण क्रमांकानुसार जिल्हयातील प्रथम 3 ते 5 विद्यार्थ्यांस उपलब्ध निधींच्या अधीन राहुन साहित्यरत्न लोकशाहीर आण्णाभाऊ साठे शिष्यवृत्ती मंजुर करण्यात येते. याकरीता 10 ऑगस्ट 2020 पर्यंत संपुर्ण कागदपत्रानिशी जिल्हा कार्यालयास संपर्क करुन खालीलप्रमाणे कागदपत्रे दोन प्रतीत सादर करावीत.
जातीचा दाखला, फोटो, मार्कशिट, शाळा सोडल्याचा दाखला, रेशनकार्ड, आधारकार्ड, पुढच्या वर्गात प्रवेश घेतल्याची पावती किंवा बोनाफाईड सर्टिफिकेट इत्यादी जिल्हा व्यवस्थापकांच्या नावे शिष्यवृत्ती मिळणेबाबतचा अर्ज सोबत कार्यालयास अथवा ईमेलवर स्कॅनकरुन स्वस्वाक्षरीने पाठविण्याचे आवाहन साहित्यरत्न लोकशाहीर अण्णाभाऊ साठे विकास मंहामंडळ मर्या, पुणेचे जिल्हा व्यवस्थापक यांनी केले आहे.