पुणे दि. 8 : जनसंपर्कातील नव्या प्रवाहांचे ज्ञान सातत्याने अद्ययावत करणे आवश्यक असून शासकीय योजना, धोरण आदींची माहिती जनतेपर्यंत पोहोचविण्यासाठी समाजमाध्यमांचा प्रभावी वापर करावा असे आवाहन पुणे विभागाचे माहिती उपसंचालक डॉ. पुरुषोत्तम पाटोदकर यांनी केले.

‘स्वातंत्र्याचा अमृतमहोत्सव’ अंतर्गत विभागीय माहिती कार्यालय आणि जिल्हा माहिती कार्यालय पुणेच्या संयुक्त विद्यमाने विभागीय माहिती कार्यालय पुणे तसेच पुणे व सातारा जिल्हा माहिती कार्यालयातील कर्मचाऱ्यांसाठी आयोजित ‘समाज माध्यम कार्यशाळे’च्या उद्धाटनप्रसंगी ते बोलत होते.

डॉ. पाटोदकर पुढे म्हणाले, शासनाचे प्रसिद्धी आणि जनसंपर्काचे माध्यम म्हणून काम करताना माहिती व जनसंपर्क विभागाला बातमीची विश्वासार्हता, अचूकता जपत ती वेगानेही माध्यमांकडे पाठवण्याचे भान राखावे लागते. वृत्तपत्रे, इलेक्ट्रॉनिक माध्यमे आणि आता समाजमाध्यमाद्वारे संदेशवहन वेगाने होते. एखादी बातमी, संदेश लक्ष्याधारित (फोकस्ड) पद्धतीने पोहोचवायचा असेल तर त्यासाठी समाजमाध्यमांमधील बारकावे शिकून घेणे गरजेचे आहे. त्यासाठी ही कार्यशाळा उपयुक्त ठरेल असे डॉ. पाटोदकर म्हणाले.

यावेळी जिल्हा माहिती अधिकारी डॉ. किरण मोघे यांनी उपस्थितांना ट्वीटर, फेसबुक, कू या समाजमाध्यमांबाबत तपशीलवार माहिती दिली. प्रास्ताविक माहिती अधिकारी सचिन गाढवे यांनी तर आभारप्रदर्शन माहिती सहायक गीतांजली अवचट यांनी केले. या कार्यशाळेस माहिती सहायक रोहिदास गावडे यांच्यासह सुहास सत्वधर, मिलिंद भिंगारे, सचिन बहुलेकर, जयश्री रांगणेकर, वैभव जाधव, राहूल पवार, विशाल कार्लेकर, सुजीत भिसे, वर्षा कोडलिंगे, सुमेध मनोर आदी उपस्थित होते.

• राष्ट्रवादी काँग्रेस पक्ष आणि दीवा प्रतिष्ठानच्या वतीने व दीपक मानकर पुढाकाराने आयोजित ‘चित्र शिल्प संवाद’ कार्यक्रमाचे दिमाखदार उद्घाटन

पुणे : शरद पवार साहेब वयाची 81 वर्षे उलटली तरी राज्यासह देशातील विविध कार्यक्रमात सहभागी होत असतात. दोन – तीन तासांचा प्रवास करूनही कार्यक्रमात टवटवीत फुलाप्रमाणे असतात, कारण साहेबांचे संगीत, कला, साहित्य यावर असणारे प्रेम. कायम प्रफुल्लित असण्यामागे कला हेच पवार साहेबांचे औषध आहे असे मत ज्येष्ठ उद्योजक विठ्ठलशेठ मणियार यांनी व्यक्त केले.

राष्ट्रवादी काँग्रेस पक्ष आणि दीवा प्रतिष्ठान यांच्या संयुक्त विद्यमाने लोकनेते शरद पवार यांच्या वाढदिवसानिमित्त महाराष्ट्रातील नामवंत चित्रकार आणि शिल्पकार यांचा सहभाग असणारा “चित्र-शिल्प संवाद” हा एक आगळा वेगळा उपक्रम दि. 8 ते 12 डिसेंबर 2021 या काळात पुणे येथे आयोजित करण्यात आला आहे. या उपक्रमाचे उद्घाटन बालगंधर्व रंगमंदिर येथे विठ्ठलशेठ मणियार यांच्या हस्ते करण्यात आले यावेळी ते बोलत होते. याप्रसंगी महापौर मुरलीधर मोहोळ, राज्य महिला आयोगाच्या अध्यक्षा रूपाली चाकणकर, राष्ट्रवादी काँग्रेसचे शहराध्यक्ष प्रशांत जगताप, राष्ट्रवादी काँग्रेसचे प्रवक्ते अंकुश काकडे, आयोजक ‘दीवा प्रतिष्ठान’चे संस्थापक दीपक मानकर, महापालिका विरोधी पक्ष नेत्या दीपाली धुमाळ, राष्ट्रवादी काँग्रेस कोथरूड विधानसभा अध्यक्ष हर्षवर्धन मानकर, दीवा प्रतिष्ठानचे अध्यक्ष करण मानकर आणि राष्ट्रवादी काँग्रेस कला व सांस्कृतिक विभाग जिल्हा अध्यक्षा प्रिया बेर्डे, राष्ट्रवादी काँग्रेस कला व सांस्कृतिक विभाग पश्चिम महाराष्ट्र अध्यक्षा सुरेखा कुडची, ज्येष्ठ चित्रकार मुरलीधर लाहोटी, शिल्पकार विवेक खटावकर, बापूसाहेब झांजे, दत्ता सागरे, निलेश आर्टिस्ट आदी मान्यवर उपस्थित होते.

पुढे बोलताना विठ्ठलशेठ मणियार म्हणाले की, पवार साहेबांचे कार्य कर्तृत्व महाराष्ट्राला सांगायची गरज नाही. साहेबांच्या वाढदिवसानिमित्त दीपक मानकर नाविन्यपूर्ण उपक्रम राबवत असतात. या प्रदर्शनात पवार साहेबांचे अनेक दुर्मिळ फोटो त्यांनी जमा केल्याचे दिसते. पवार साहेबांच्या कला, संगीत, साहित्य विश्वातील आठवणींना उजाळा दिला. तसेच हे चित्र शिल्प प्रदर्शन बारामती येथे पवार साहेबांसाठी घ्यावे असे निमंत्रण मणियार यांनी दीपक मानकर यांना दिले.

रुपाली चाकणकर म्हणाल्या, कलाकारांच्या कलेचे मोल लावता येत नाही. माणसाच्या किमान गरजा संपल्या की कलेची गरज निर्माण होते. अवघड परिस्थितीत सकारात्मक विचार करण्यासाठी कला आणि कलाकार खुप मदत करतात. आपल्याकडे छत्रपती शिवाजी महाराजांच्या काळापासून कलाकारांना राजाश्रय देण्याचा शिष्टाचार आहे. आज शरद पवार यांच्या काळातही हा शिष्टाचार सुरू आहे. पवार साहेब मुख्यमंत्री असताना त्यांनी कलाकारांना मानधन देऊन त्यांचा सत्कार केला तसेच यामध्ये सातत्य राहावे यासाठी सातत्याने प्रयत्न केले.

प्रशांत जगताप म्हणाले, आपल्या सर्व सामान्य माणसाशी नाळ बांधून ठेवलेला नेता म्हणजे शरद पवार साहेब. ज्येष्ठ राजकारणी वयाच्या एका टप्प्यावर आल्यानंतर आता बास असे म्हणतात; पण वयाच्या 81 वर्षी ही पवार साहेब भारतभर फिरत आहेत. महाराष्ट्र हे कधीही विसरणार नाही. राजर्षी शाहू महाराज यांच्या पासून राज्यात कलाकारांना राजाश्रय देण्याचा प्रघात आहे. त्यानंतर राज्याचे पहिले मुख्यमंत्री यशवंतराव चव्हाण आणि त्यानंतर शरद पवार यांनी हा वारसा पुढे चालू ठेवला आहे. पवार साहेब यांनी राजकारणापलीकडे जाऊन अनेक कलाकार तसेच विविध साहित्य संमेलने यांना मदत केलेली आहे.

अंकुश काकडे म्हणाले, वाढदिवस म्हटले की अलीकडे फक्त फ्लेक्स बाजी असते. परंतू दीपक मानकर गेल्या 15 वर्षांपासून पवार साहेबांचा वाढदिवस वेगवेगळे विधायक कार्यक्रम घेवून साजरे करीत आहेत. मागील दोन वर्षात कोरोनामूळे उध्वस्त झालेले सामान्य जनतेसह कलाक्षेत्रातील अनेक संसार दीपक भाऊंनी पुन्हा उभे करून दिले. कलाकारांना राजाश्रय मिळावा असे अनेकजण म्हणतात पण किती लोक त्यासाठी प्रयत्न करतात? या उपक्रमातून दीपक भाऊंनी आज अनेक कलाकारांना व्यासपीठ उपलब्ध करून दिले आहे.

प्रास्ताविक भाषणात दीपक मानकर म्हणाले की, शरद पवार साहेब माझे दैवत आहेत. साहेबांनी दाखवलेल्या मार्गाने चालण्याचा माझा प्रयत्न आहे. साहेबांच्या वाढदिवसानिमित्त राज्यातील चित्रकार, शिल्पकार यांना एकत्रित करून वेगळा उपक्रम राबविण्यात येत आहे, या प्रदर्शनातील चित्रे आणि शिल्प बारामती येथे एका हॉल मध्ये ठेवण्याचा आमचा मानस आहे, जेणेकरून साहेबांना भेटायला येणाऱ्या राज्यभरातील कार्यकर्त्यांना ते बघायला मिळेल.
यावेळी विवेक खटावकर, प्रमोद कांबळे, प्रिया बेर्डे यांनीही मनोगत व्यक्त केले. कार्यक्रमाचे सूत्रसंचालन मिलिंद कुलकर्णी यांनी केले तर आभार योगेश सुपेकर यांनी मानले.

पहिले शिल्प महापौरांचे

‘चित्र शिल्प संवाद’ या उपक्रमात 30 हुन अधिक दिगग्ज कलाकार सहभागी होणार आहेत. चित्र-शिल्प संवाद उपक्रमाच्या उद्घाटनानंतर शिल्पकार विपुल खटावकर आपले प्रात्यक्षिक सादर करणार होते. दीपक मानकर यांनी उपक्रमातील पहिले शिल्प पुण्याचे महापौर मुरलीधर मोहोळ यांचे साकारण्याचा मानस व्यक्त केला आणि महापौर मोहोळ यांनीही तात्काळ संमती दिली व विपुल खटावकर यांनी महापौरांचे शिल्प साकारले.

पुणे दि.८- स्वातंत्र्याच्या अमृत महोत्सवानिमित्त राज्य शासनाच्या मोफत ७/१२ वाटप मोहिमेचा एक भाग म्हणून ७ डिसेंबर (७-१२) रोजी जिल्ह्यातील ६६३ गावात एकाच दिवसात १ लाख २४ हजार मोफत सातबारा वितरण करण्यात आले.

जिल्ह्यात २ ऑक्टोबरपासून १२ लाख ३४ हजार खातेदारांपैकी ११ लाख ५६ हजार अर्थात ९३ टक्के खातेदारांना ७/१२ वितरण करण्यात आले आहे. मंगळवारी आयोजित विशेष मोहिमेत तलाठी, मंडळ अधिकारी, तहसिलदार आणि उपविभागीय अधिकाऱ्यांनी सजांच्या ठिकाणी भेट देऊन नागरिकांना ऑनलाईन ७/१२ घेण्याबाबत मार्गदर्शन केले. ही सुविधा https://digitalsatbara.mahabhumi.gov.in/dslr या संकेतस्थळावर उपलब्ध आहे. १५ रुपये शुल्क ऑनलाईन अदा करून अधिकाधिक शेतकऱ्यांनी हवे असलेले ७/१२डाऊनलोड करून घ्यावे, असे आवाहन जिल्हाधिकारी डॉ.राजेश देशमुख यांनी केले आहे.

जिल्ह्यात ई-पीक पाहणी ॲपद्वारे ४ लाख ३० हजार शेतकऱ्यांनी पीकपाहणीची नोंदणी केली आहे. जिल्ह्यात मुळशी, खेड, पिंपरी-चिंचवड आणि पुणे शहर वगळता इतर सर्व तालुक्यात रब्बी पिकांची लागवड मोठ्या प्रमाणात झाली आहे. शेतकऱ्यांनी पेरणी झालेल्या पिकांची नोंद ‘ई-पीक पाहणी (E-Peek Pahani)’ या मोबाईल ॲपवर अपलोड करावी असे आवाहनही जिल्हाधिकाऱ्यांनी केले आहे.
0000

पुणे : पुणे जिल्हा सहकारी मध्यवर्ती सहकारी बँकेच्या निवडणुकीत उपमुख्यमंत्री अजित पवार यांची बिनविरोध निवड झाली आहे. बारामती तालुका अ वर्ग मतदारसंघातून शेतकरी कृती समितीचे नेते सतीश काकडे यांनी आपला उमेदवारी अर्ज माघारी घेतल्याने अजित पवार यांची जिल्हा बँकेवर बिनविरोध निवड झाली. उमेदवारी अर्ज माघारी घेण्याचा आज शेवटचा दिवस होता. त्यामध्ये बारामती तालुक्यातून अ वर्गातून उपमुख्यमंत्री अजित पवार यांच्यासह शेतकरी कृती समितीचे अध्यक्ष सतीश काकडे यांचाही अर्ज दाखल करण्यात आलेला होता. मात्र आज सतीश काकडे यांनी आपला अर्ज माघारी घेतल्याने उपमुख्यमंत्री अजित पवार यांची बिनविरोध निवड झाली आहे.यावेळी सतीश काकडे म्हणाले, पुणे जिल्हा मध्यवर्ती सहकारी बँक मर्या. पुणे या बँकेचे संचालक मंडळ निवडणुकीसाठी ‘अ’ वर्ग सोसायटी प्रतिनिधी या मतदार संघातून उमेदवारी अर्ज दाखल केला होता. त्यावर माझी आणि अजित पवार यांची सोमेश्वर कारखान्याच्या विषयावर चर्चा झाली. त्यावर पवारांनी काही विषय मार्गी लावले आहेत व इतर सर्व विषय मार्गी लाऊन देतो, असे आश्वासन दिलेले आहे. पुणे जिल्हा बँक ही जिल्ह्याचा आर्थिक कणा असल्याने त्या बँकेवर प्रतिनिधी म्हणून अजित पवारांसारखा कणखर नेता असणे अत्यंत गरजेचे आहे. आपण पाहतो की बऱ्याच जिल्हा बँका सक्षम नेतृत्व नसल्यामुळे अडचणीत गेलेल्या आहेत त्यांच्याकडे शेतकऱ्यांना पिक कर्जवाटप करण्यासाठी सुध्दा पैसे नाहीत. त्यामुळे अजित पवार सारखा आभ्यासू नेता जर बॅंकेमध्ये असेल तर बॅंक अडचणीत जाणार नाही, असंही काकडे म्हणाले.मी कोणत्याही पक्षामध्ये नाही किंवा मी कोणत्याही वैयक्तिक स्वार्थासाठी पुणे जिल्हा बँकेसाठी निवडणुक अर्ज भरला नव्हता. मी आत्तापर्यंत पारदर्शक पध्दतीने शेतकऱ्यांसाठी काम करीत आलेलो असुन यापुढेही शेतकऱ्यांच्या प्रश्नांवर काम करीत राहणार आहे. त्यामुळे मला कोणत्याही पदाची अपेक्षा नाही व आवश्यकताही नाही.

आ. चंद्रकांतदादा पाटील यांच्या प्रयत्नांना यश.
पुणे- भाजपा प्रदेशाध्यक्ष आ. चंद्रकांतदादा पाटील यांनी आज पोलीस आयुक्त अमिताभ गुप्ता यांची भेट घेऊन सवाई गंधर्व महोत्सवास 50% उपस्थिती सह परवानगी द्यावी तसेच शनिवारवाडा देखील कार्यक्रमासाठी खुला करावी अशी मागणी केली.यावेळी सह पोलीस आयुक्त रवींद्र शिसवे, महोत्सवाचे संयोजक श्रीनिवास भीमसेन जोशी व भाजपा प्रवक्ता संदीप खर्डेकर उपस्थित होते, महामारीच्या काळातील नियम व बंधने पाळून राजकीय नसलेले सांकृतिक कार्यक्रम करण्यास यावेळी पोलीस आयुक्तांनी अनुकुलता दाखविली .अशी माहिती शहर प्रवक्ते संदीप खर्डेकर यांनी येथे दिली

ते म्हणाले,’या दोन्ही विषयांवर सकारात्मकता चर्चा झाली. ओमीक्रोन च्या प्रादुर्भावामुळे नव्याने बंधने आली असली तरी नियम बदलत असतात, मात्र सध्या चा ओमीक्रोन चा धोका बघता 25% उपस्थिती चे बंधन आहे, पण तरीही महोत्सव चांगल्या वातावरणात आणि नियमांच्या अधीन राहून रसिकांच्या उपस्थितीत यशस्वी पणे पार पडेल असा विश्वास आ. चंद्रकांतदादा पाटील यांनी व्यक्त केला.तसेच एल्गार परिषदेनंतर कोणतेही संयुक्तिक कारण नसताना शनिवारवाड्यावर सरसकट कार्यक्रम करण्यास परवानगी नाकारली जाते हे अयोग्य असल्याने त्याबाबत ही निर्णय घ्यावा असे आग्रही मत आ. चंद्रकांतदादा पाटील यांनी मांडले. त्याबाबत ही आयुक्तांनी सकारात्मक भूमिका घेतली व अराजकीय कार्यक्रमाना परवानगी देण्याबाबत निर्णय घेण्याचे मान्य केले.

पुणे :मेट्रोच्या शिवाजीनगर ते स्वारगेट दरम्यान चालू असलेल्या भुयारी मार्गाची पहाणी आमदार सिद्धार्थ शिरोळे यांनी आज बुधवारी केली. भुयारी मार्गाचे काम लवकरच पूर्ण होईल, असे आ. शिरोळे यांनी सांगितले.

शिवाजीनगर ते स्वारगेट या भुयारी मार्गामध्ये मेट्रोची ५ स्टेशन्स होणार असून शिवाजीनगर सिव्हील कोर्ट येथील स्टेशनच्या कामाची पहाणी मेट्रोच्या अधिकाऱ्यांसमवेत केली. शिवाजीनगर बस स्थानक आणि शिवाजीनगर सिव्हील कोर्ट या भुयारी स्टेशनचे काम जून २०२२पर्यंत पूर्ण होईल, असे मेट्रोच्या अधिकाऱ्यांनी आ. शिरोळे यांना सांगितले.

शिवाजीनगर सिव्हील कोर्ट ते स्वारगेटला जाणारा मुठा नदी खालील मेट्रोचा भुयारी मार्ग जमिनीच्या पातळीपासून सुमारे ३० मीटर खाली बनविण्यात येत आहे. तो नदीच्या तळाच्या १० मीटर खाली आहे. भुयारी मार्गाचे काम न्यू ऑस्ट्रियन टनेलिंग मेथड या तंत्रज्ञानाच्या साहाय्याने करण्यात येत आहे. मेट्रोचे काम अतिशय वेगाने चालू आहे, याबद्दल आ. शिरोळे यांनी समाधान व्यक्त केले.

पुण्याच्या मेट्रोला २०१६ साली तत्कालीन मुख्य मंत्री देवेंद्र फडणवीस यांच्या कारकीर्दीत मंजुरी मिळाली. पंतप्रधान नरेंद्र मोदी यांच्या हस्ते मेट्रोचे भूमीपूजन करण्यात आले. या कामाचे प्रत्यक्ष परिणाम पुणेकरांना दिसू लागले आहेत. पुणेकरांनी भाजपवर विश्वास दाखविला त्याची ही पावती आहे, अशी प्रतिक्रिया आ. शिरोळे यांनी व्यक्त केली.

पुणे, ता. ८ : डेक्कन एज्युकेशन सोसायटीच्या डीईएस पूर्व प्राथमिक शाळेत राष्ट्रीय हस्तकौशल्य सप्ताहा निमित्त (८ ते १३ डिसेंबर) ‘टाकाऊतून टिकाऊ’ या विषयावर विद्यार्थ्यांनी तयार केलेल्या वस्तूंच्या प्रदर्शनाचे उद्घाटन गरवारे बालभवनच्या ओरिगामीमध्ये कुशल असणाऱ्या तज्ज्ञ शिक्षिका नेहा सुगवेकर यांच्या हस्ते करण्यात आले.
या विषयावरील विविध वस्तू बनविण्याचे विद्यार्थ्यांना ऑनलाइन प्रशिक्षण देण्यात आले होते. विद्यार्थ्यांनी पालकांच्या सहाय्याने तयार केलेल्या वस्तू प्रदर्शनात मांडण्यात आल्या होत्या. तसेच मुलांसाठी टॅटू काढणे, मेहंदी काढणे आणि विविध प्रकारच्या खेळांचे आयोजन करण्यात आले होते. मुख्याध्यापिका माधुरी बर्वे यांच्या संकल्पनेतून उपक्रमाचे आयोजन करण्यात आले.
प्रदर्शन ११ डिसेंबरपर्यंत सर्वांसाठी खुले राहणार आहे.

पुणे : सहकाराचे सक्षमीकरण व्हावे आणि या क्षेत्रात युवकांचा सहभाग वाढावा, याउद्देशाने पुण्यामध्ये ३६ व्या राष्ट्रीय संशोधन परिषदेचे आयोजन दिनांक १० व ११ डिसेंबर रोजी करण्यात आले आहे. इंडियन सोसायटी फॉर स्टडिज इन को -आॅपरेशन, पुणे (आयएसएससी) तर्फे सावित्रीबाई फुले पुणे विद्यापीठाच्या ज्ञानेश्वर सभागृहात ही परिषद आहे. देशभरातून ६० पेक्षा अधिक संशोधक आपले शोधनिबंध या परिषदेत सादर करतील. तसेच देशभरातून सहकारातील कार्यकर्ते, प्राध्यापक व संशोधक या परिषदेत उपस्थित राहणार आहेत, अशी माहिती आयएसएससीचे मानद सचिव प्रा.अनिल कारंजकर यांनी पत्रकार परिषदेत दिली.

पत्रकार परिषदेला संस्थेतर्फे अ‍ॅड.सुभाष मोहिते, अ‍ॅड.जयंत कुलकर्णी, प्रा.डॉ.मुकुंद तापकीर, संजीव खडके आदी उपस्थित होते. इंडियन सोसायटी फॉर स्टडिज इन को-आॅपरेशन, पुणे (आयएसएससी) यांच्यासह पद्मश्री डॉ.विखे पाटील सावित्रीबाई फुले अध्यासन पुणे विद्यापीठ आणि वैकुंठ मेहता राष्ट्रीय सहकारी प्रशिक्षण संस्था, पुणे यांच्या संयुक्त प्रयत्नातून  ही परिषद होत आहे.

परिषदेचे उद््घाटन शुक्रवार, दिनांक १० डिसेंबर रोजी सकाळी १०.३० वाजता सावित्रीबाई फुले पुणे विद्यापीठाच्या ज्ञानेश्वर सभागृहात होणार आहे. परिषदेचे उद््घाटन भारतीय राष्ट्रीय सहकार परिषदेचे अध्यक्ष दिलीपभाई संघानी (माजी मंत्री, गुजरात) यांच्या हस्ते होईल. यावेळी राज्यमंत्री विद्याधर अनास्कर, माजी सनदी अधिकारी डॉ.एस.के.गोयल, आयएसएससीचे अध्यक्ष जी.एच.अमीन आदी मान्यवर उपस्थित राहणार आहेत. दोन दिवसीय परिषदेत सहकाराविषयी व युवकांच्या सहभागासाठी अनेक संशोधन प्रकल्प देखील सादर होणार आहेत. तसेच संस्थेच्या माध्यमातून आर्थिक सहाय्य देण्यात आलेल्या प्रकल्पांचे सादरीकरण होईल. यावेळी आर्थिक सहाय्य वितरण देखील होणार आहे.

सहकाराची सहकारी संस्था सक्षम करण्यासाठी आयसीटीचा उपयोग, सहकारी संस्थांची स्वायत्तता आदी विषयांवर चर्चा व मार्गदर्शन परिषदेत होणार आहे. परिषदेचा समारोप शनिवार, दिनांक ११ डिसेंबर रोजी दुपारी १.३० वाजता वैकुंठ मेहता राष्ट्रीय सहकारी प्रशिक्षण संस्थेच्या सभागृहात होणार आहे. यावेळी राज्याचे सहकार आयुक्त अनिल कवडे, आयएसएससीचे अध्यक्ष जी.एच.अमीन, वैकुंठ मेहता नॅशनल इन्स्टिटयूटच्या संचालक डॉ.हेमा यादव, सावित्रीबाई फुले पुणे विद्यापीठाचे प्र-कुलगुरु डॉ.एन.एस.उमराणी आदी मान्यवर उपस्थित राहणार आहेत.

पुणे : सामाजिक क्षेत्रात फासेपारधी समाजासाठी उल्लेखनीय कार्य करणारे पद्मश्री गिरीश प्रभुणे, शैक्षणिक क्षेत्रात मराठवाडा मित्र मंडळाच्या माध्यमातून कार्यरत असलेले डॉ.बी.जी. उर्फ भाऊसाहेब जाधव आणि धार्मिक क्षेत्रातील योगदानाबद्दल प.पू. सद्गुरु प्रेमल माताजी यांना कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे देण्यात येणारा गुरुमहात्म्य पुरस्कार प्रदान करण्यात येणार आहे. तसेच लक्ष्मीबाई स्मृती पुरस्कार बालकामगारांसाठी कार्यरत असलेल्या कोल्हापूरच्या अवनी संस्थेच्या अनुराधा भोसले यांना श्री दत्तजयंती उत्सवात देण्यात येणार असल्याची माहिती ट्रस्टचे अध्यक्ष सुनिल रुकारी यांनी पत्रकार परिषदेत दिली. 
पत्रकार परिषदेला ट्रस्टचे राजू बलकवडे, अक्षय हलवाई, अ‍ॅड.रजनी उकरंडे, युवराज गाडवे, अ‍ॅड.शिवराज कदम जहागिरदार आदी उपस्थित होते. यांसह ट्रस्टचे विश्वस्त डॉ.पराग काळकर, अ‍ॅड.प्रताप परदेशी, महेंद्र पिसाळ यांनी देखील उत्सवाचे नियोजन केले आहे. ट्रस्टचे यंदा १२४ वे वर्ष आहे. 

उत्सवाची सुरुवात सामाजिक पर्यावरण शुद्धीचा सिद्ध वेदघोष असलेल्या प.पू.वासुदेवानंद सरस्वती टेंबेस्वामी रचित लोकमंगल वर्धक घोरात्कष्टात स्तोत्राचे सामुदायिक पठण दत्तभक्त करणार आहेत. कै.लक्ष्मीबाई दगडूशेठ हलवाई दत्तमंदिर ट्रस्ट आणि प.पू. नाना महाराज तराणेकर प्रणीत अखिल भारतीय त्रिपदी परिवार, इंदोर तर्फे या कार्यक्रमाचे आयोजन बुधवार पेठेतील दत्तमंदिरासमोरील उत्सव मंडपात रविवार, दिनांक १२ डिसेंबर रोजी सकाळी ७ वाजता करण्यात आले आहे. यावेळी प्रमुख अतिथी म्हणून प.पू.श्री.गुरू षठब्रम्ह १०८ ज्ञानभास्कर महादेव शिवाचार्य स्वामीजी, वाई हे उपस्थित राहणार आहेत. तर, अखिल भारतीय त्रिपदी परिवार, इंदोरचे प.पू. बाबामहाराज तराणेकर यांचे आॅनलाईन प्रवचन होणार आहे. 
* दत्तजयंती उत्सवात सप्तस्वरोत्सव व सामाजिक कार्यक्रमांचे आयोजन :-
दत्तजयंती सोहळ्यातील मुख्य कार्यक्रम असलेला गुरुमहात्म्य पुरस्कार व लक्ष्मीबाई स्मृती पुरस्कार प्रदान सोहळा सोमवार, दिनांक १३ डिसेंबर रोजी सायंकाळी ५ वाजता बालगंधर्व रंगमंदिर येथे होणार आहे. सावित्रीबाई फुले पुणे विद्यापीठाचे कुलगुरु डॉ.नितीन करमाळकर, ज्येष्ठ साहित्यिक डॉ.सदानंद मोरे, श्री विठ्ठल रुक्मिणी मंदिर समितीचे माजी अध्यक्ष डॉ.अतुल भोसले यांच्या हस्ते पुरस्कार प्रदान करण्यात येणार आहेत. यावेळी स्वरतीर्थ स्व.सुधीर फडके यांच्या चिरस्मरणीय श्रवणीय गीतांचा बहारदार कार्यक्रम असलेला बाबूजी व मी हा ज्येष्ठ गायक व संगीतकार श्रीधर फडके आणि सहकारी सादर करणार आहेत. 
बुधवार, दिनांक १५ डिसेंबर रोजी सायंकाळी ५ वाजता बालगंधर्व रंगमंदिर येथे संत ज्ञानेश्वरांच्या जीवनचरित्रावर आधारित मोगरा फुलला हा कार्यक्रम व्याख्याते गणेश शिंदे व गायिका सन्मित्रा शिंदे सादर करणार आहेत. यावेळी गरजू विद्यार्थी शिष्यवृत्ती अर्थसहाय्य प्रदान समारंभ असून पुणे मनपा स्थायी समिती अध्यक्ष हेमंत रासने यांच्या उपस्थितीत आयोजित करण्यात आला आहे. तसेच श्री गुरुदत्त दिनदर्शिका रौप्य महोत्सवी वर्ष २०२२ चे प्रकाशनही कार्यक्रमात होणार आहे. श्री शिवाजी मराठा सोसायटीच्या मानद सचिवपदी निवड झाल्याबद्दल  अण्णा थोरात व सदस्यपदी निवड झाल्याबद्दल दत्तमंदिराचे माजी विश्वस्त बी.एम.गायकवाड यांचा विशेष सन्मान करण्यात येणार आहे.  
दत्तजयंती उत्सवांतर्गत मंदिरासमोरील मंडपात दररोज दुपारी १ ते रात्री ९ दरम्यान भजन, कीर्तन, सांस्कृतिक कार्यक्रम देखील आयोजित करण्यात आले आहेत. कोविड प्रतिबंधक अनुरूप व्यवहाराच्या शासकीय नियमावली नुसार मुखपट्टी अनिवार्य असेल, दर कार्यक्रमानंतर उत्सव मंडपाचे निर्जंतुकीकरण, अभ्यागतांचे प्रवेशद्वारावर तापमान मापन, इ. कार्यप्रणालीची काटेकोर अंमलबजावणी करण्यात येईल. दत्तजयंती सोहळा व सप्तस्वरोत्सवाकरीता प्रवेश विनामूल्य असून पुणेकरांनी सहभागी व्हावे, असे आवाहन करण्यात आले आहे.