पुणे दि.३०- राज्यात चित्रपटांची निर्मिती अधिक नियोजित पद्धतीने व्हावी आणि निर्मितीसाठी आवश्यक सहकार्य मिळणे शक्य व्हावे यासाठी लवकरच चित्रपटाला उद्योगाचा दर्जा देण्यात येईल असे प्रतिपादन राज्याचे सांस्कृतिक कार्य मंत्री अमित देशमुख यांनी केले.

राष्ट्रीय चित्रपट संग्रहालय येथे राज्य शासनाच्या महासंस्कृती आणि पुणे फिल्म फाउंडेशनतर्फे आयोजित १९ व्या पुणे आंतरराष्ट्रीय चित्रपट महोत्सवाच्या समारोप प्रसंगी ते बोलत होते. कार्यक्रमाला ‘पिफ’चे संचालक आणि दिग्दर्शक जब्बार पटेल, विश्वस्त मोहन आगाशे, उल्हास पवार, प्रा.समर नखाते, प्रकाश मकदुम, प्रा.सतीश आळेकर, अखिल भारतीय मराठी चित्रपट महामंडळाचे अध्यक्ष मेघराज भोसले आदी उपस्थित होते.

श्री.देशमुख म्हणाले, चित्रपटांसाठी चांगल्या पायाभूत सुविधा देण्याचे शासनाचे प्रयत्न आहेत. मुंबई फिल्मसिटी येथे चित्रपट, दूरचित्रवाणी मालिका आणि ओटीटी प्लॅटफॉर्मासाठी अधिकाधिक सुविधा देण्यात येत आहेत. या व्यतिरिक्त इतर ठिकाणी चित्रपट निर्मितीसाठी आवश्यक पायाभूत सुविधांची विकेंद्रीकरण करण्याची गरज आहे. पुण्यात चित्रपट निर्मितीसाठी आवश्यक वातावरण आणि कुशल मनुष्यबळ लक्षात घेता अशा ठिकाणी पायाभूत सुविधांची निर्मिती गरजेची आहे. पुणे चित्रपट महोत्सवात त्यासाठी आवश्यक चांगल्या कल्पना पुढे येतील.

गेल्या दोन दशकापासून हे आयोजन होत आहे. कोरोनाचे संकट असतानाही महोत्सवाचे चांगले आयोजन करण्यात आले. महाराष्ट्र शासनाने चित्रपटांना नेहमीच प्रोत्साहन दिले आहे. मुंबई चित्रपटांची राजधानी आहे आणि पुण्यात चित्रपटांसाठी अनुकूल वातावरण आहे. चित्रपट महोत्सवाच्यानिमित्ताने जगातील चित्रपट सृष्टिशी निगडित व्यक्ती एकत्र घेतात, कल्पनांची देवाणघेवाण करतात. हा महोत्सव भविष्यात अधिक व्यापक स्वरूपात आयोजित व्हावा अशी अपेक्षा त्यांनी व्यक्त केली.

कोरोनाच्या नव्या विषाणूच्या पार्श्वभूमीवर सर्वांनी आवश्यक दक्षता घ्यावी असे आवाहन त्यांनी केले. पुढील वर्षी पुणे आंतरराष्ट्रीय चित्रपट महोत्सवाचे आयोजन ३ ते १० मार्च २०२२ या कालावधीत होईल अशी घोषणा त्यांनी यावेळी केली.

प्रास्ताविकात श्री.पटेल यांनी पुणे आंतरराष्ट्रीय चित्रपट महोत्सवाला सहकार्याबद्दल राज्य शासनाला धन्यवाद दिले. राज्य शासनाने महोत्सवासाठी ४ कोटी रुपये देण्याचे मान्य केल्याने चांगले आयोजन शक्य झाल्याचे ते म्हणाले.

यावेळी श्री.देशमुख यांच्या हस्ते चित्रपट महोत्सवातील विविध पुरस्कार प्रदान करण्यात आले. महाराष्ट्र शासनातर्फे देण्यात येणारा ‘संत तुकाराम’ उत्कृष्ट आंतरराष्ट्रीय मराठी चित्रपटासाठीचा पुरस्कार ‘पोरगं मजेत आहे’ या चित्रपटाला आणि आंतरराष्ट्रीय चित्रपटासाठी ‘प्रभात’ पुरस्कार ‘शुड द विंड ड्रॉप’ या चित्रपटाला प्रदान करण्यात आला. इतरही पुरस्काराचे वितरण यावेळी करण्यात आले.

कार्यक्रमाच्या प्रारंभी संरक्षण दल प्रमुख जनरल बिपीन रावत यांच्यासह हेलिकॉप्टर दुर्घटनेत मृत्यू पावलेल्या लष्करी अधिकाऱ्यांना श्रद्धांजली अर्पण करण्यात आली.

पुणे-देशाच्या स्वातंत्र्यलढ्यात आणि स्वातंत्र्यानंतर देश उभारणीत काँग्रेस पक्षाचे योगदान व काम मोठे आहे. मात्र, हे योगदान आणि काम नागरिकांपर्यंत पोहचवण्यात आपण कमी पडतो. त्यामुळे देशाचा इतिहास बदलण्याचे काम केले जात आहे. हे थांबवण्यासाठी सर्वांनी नागरिकांपर्यंत खरा इतिहास पोहचविण्याची जबाबदारी पार पाडली पाहिजे, असे मत राज्याचे महसूलमंत्री व काँग्रेसचे ज्येष्ठ नेते बाळासाहेब थोरात यांनी व्यक्त केले. तसेच देशाला पुन्हा एकदा सोनिया गांधी यांचे नेतृत्व लाभेल, असा विश्वासही त्यांनी व्यक्त केला. ‘सुवर्ण विजय’ द्विसप्ताहासारखा तरुणांमध्ये देशप्रेम वाढविणारा मोठा उपक्रम अतिशय कल्पकतेने केल्याबद्दल याचे संयोजक आबा बागुल यांचे त्यांनी कौतुक करून शाबासकी दिली.

सन 1971 च्या भारत-पाकिस्तान युद्धातील भारताच्या विजयाला 50 वर्षे पूर्ण होत असल्याचे औचित्य साधून महापालिकेतील काँग्रेसचे गटनेते आबा बागुल यांच्यातर्फे सुवर्ण विजय द्विसप्ताहाचे आयोजन केले आहे. या द्विसप्ताहाअंतर्गत आयोजित केलेल्या ‘एक स्वाक्षरी शहीद जवानांच्या अभिवादनासाठी’ या उपक्रमात प्रथम स्वाक्षरी करून बाळासाहेब थोरात सहभागी झाले. त्याप्रसंगी ते बोलत होते. याप्रसंगी ज्येष्ठ गांधीवादी विचारवंत डॉ. कुमार सप्तर्षी व माजी आमदार उल्हास पवार प्रमुख पाहुणे म्हणून उपस्थित होते.काँग्रेसचे शहराध्यक्ष रमेश बागवे, बाळासाहेब शिवरकर, नगरसेवक अरविंद शिंदे, रफिक शेख, नगरसेविका लता राजगुरु, सुजाता शेट्टी, संजय बालगुडे, कमल व्यवहारे, रजनी त्रिभुवन, विरेंद्र किराड, नीता रजपूत, मुख्तार शेख, जयसिंग भोसले, नरेंद्रपालसिंग बक्षी, सौ. जयश्री बागुल, अमित बागुल तसेच ब्लॉक अध्यक्ष, वॉर्ड अध्यक्ष आदींसह काँग्रेस पदाधिकारी, कार्यकर्ते व नागरिक मोठ्या संख्येने उपस्थित होते.याप्रसंगी प्रथम चीफ ऑफ डिफेन्स स्टाफ जनरल (कै.) बिपिन रावत यांच्या प्रतिमेस बाळासाहेब थोरात यांच्या हस्ते पुष्पहार अर्पण करून त्यांना श्रद्धांजली वाहण्यात आली. याप्रसंगी सर्वांनी दोन मिनिटे स्तब्ध उभे राहून या शूर सेनानीला मनोभावे आदरांजली वाहिली.

बाळासाहेब थोरात पुढे म्हणाले की, ‘दिवंगत पंतप्रधान इंदिरा गांधी यांच्या नेतृत्वाखाली 1971 साली झालेले भारत-पाकिस्तान युद्ध देशाला दिशा देणारे होते. या युद्धात आणि बांगलादेशच्या निर्मितीमध्ये इंदिरा गांधी यांनी मुत्सद्देगिरी दाखवत महत्त्वाची भूमिका बजावली. त्यावेळी अटलबिहारी वाजपेयी यांनी संसदेत कौतुक करताना इंदिरा गांधी यांचा उल्लेख ‘दुर्गामाता’ असा केला होता. यावरून दोन्ही नेत्यांचा मोठेपणा दिसून येतो,’ असे ते म्हणाले.मात्र, आता असा मोठेपणा पहायला मिळत नाही असे सांगून ते म्हणाले की, स्वातंत्र्यलढ्यात आणि देश उभारणीत काँग्रेस आणि गांधी-नेहरू घराण्याचे असलेले योगदान पुसून टाकण्याचा प्रयत्न केला जात आहे. नागरिकांना चुकीचा इतिहास सांगितला जात आहे. बातम्यांमधून बदनामी करण्याचे काम केले जात आहे. गांधी-नेहरूंच्या विरोधात बोलणार्‍या महिलेला 40 जवानांचे संरक्षण देऊन पद्मश्री पुरस्कार दिला जात आहे. त्यामुळे खरा इतिहास नागरिकांपर्यंत पोहचविण्याची जबाबदारी आपण सर्वांनी पार पाडायला हवी. ही जबाबदारी आपण योग्य पद्धतीने पार पाडली तर पुन्हा एकदा देशाला सोनिया गांधी यांचे नेतृत्व लाभेल आणि सोनियाचे दिवस येतील, असा विश्वासही थोरात यांनी व्यक्त केला.

याप्रसंगी डॉ. कुमार सप्तर्षी यांनी असा द्विसप्ताह आयोजित केल्याबद्दल आयोजक आबा बागुल यांचे कौतुक करून म्हटले की, आपले राष्ट्र धर्मनिरपेक्ष विचारांवर उभे आहे, त्यामुळे ते आजवर टिकून आहे. धर्मावर आधारलेल्या अनेक राष्ट्रांचे अनेक तुकडे झाले आहेत. मात्र, आज आपल्या देशाची वाटचाल धर्माच्या आधारावर सुरू आहे. महात्मा गांधी, भारतीय राज्यघटना आणि स्वातंत्र्य लढा या तीन गोष्टी दत्तमूर्तीसारख्या आहेत. मात्र, आज देशातील काही लोक दत्ताच्या तीन चेहर्‍यांपैकी केवळ एकच चेहरा हवा, असे म्हणत केवळ संविधान मान्य करत आहेत. गांधी आणि स्वातंत्र लढा नाकारत आहेत असे सांगून ते म्हणाले की, ‘कंगना ही पोपट आहे, तिचा बोलविता धनी वेगळाच आहे. देशाच्या सर्वोच्च सैनिकाचा आणि सर्वांत उत्तम असलेल्या हेलिकॉप्टरचा अपघात होतो, हे देशाला शोभणारे नाही, असेही डॉ. सप्तर्षी म्हणाले.

याप्रसंगी उल्हास पवार म्हणाले की, ‘तरुण पिढीमध्ये इतिहासातून देशभक्तीची प्रेरणा निर्माण होण्यासाठी आबा बागुल यांनी हा स्तुत्य उपक्रम हाती घेतला आहे. महात्मा गांधी आणि देशासाठी बलिदान देणार्‍यांचा अपमान केला जातो. मात्र याचा निषेध करण्यासाठी एकही साहित्यिक पुढे येत नाही, हे दुर्दैव आहे. देशातील लोकशाही जिवंत ठेवण्यासाठी आपण सर्वांनी प्रयत्न करणे गरजेचे असल्याचेही ते म्हणाले.

कार्यक्रमाचे प्रास्ताविक आबा बागुल यांनी केले. ते म्हणाले, ‘देशातील युवा पिढीला पंतप्रधान इंदिरा गांधींचे नेतृत्व आणि भारतीय सैन्यदलाचे कर्तृत्व याची ओळख चांगल्या रीतीने होण्यासाठी अशा द्विसप्ताहाचे मी आयोजन केले आहे. यास पुणेकरांनी फार मोठा प्रतिसाद दिला याबद्दल त्यांनी समाधान व्यक्त केले.

याप्रसंगी शहरातील 25 नामवंत चित्रकारांनी साकारलेल्या ‘इंदिरा गांधी व 1971 चे युद्ध’ या विषयावरील पेंटिंग्जच्या प्रदर्शनाची पाहणी त्यांनी भारतरत्न पं. भीमसेन जोशी कलादालनात केली. 16 डिसेंबर या विजयदिनी वसंतराव बागुल उद्यानात 120 फूट लांब व 40 फूट उंच पाण्याच्या पडद्यावर 20 मिनिटांची थ्रीडी लेझर फिल्मचे उद्घाटन होणार आहे. याचा तीन मिनिटांचा टीझर याप्रसंगी दाखविण्यात आला. शेवटी विरेंद्र किराड यांनी आभार मानले. घनश्याम सावंत यांनी सूत्रसंचालन केले. राष्ट्रगीताने कार्यक्रमाची सांगता झाली.

पुणे: महापौर मुरलीधर मोहोळ यांच्या अडचणीत वाढ झाली आहे. कारण, जिल्हा न्यायालयाने पुण्याचे महापौर मुरलीधर मोहोळ यांच्यावर अ‍ॅट्रॉसिटी अंतर्गत गुन्हा दाखल कऱण्याचे आदेश दिले आहेत.

शहरातील सार्वजनिक शौचालय, अतिक्रमणावर केलेल्या कारवाई दरम्यान झालेल्या वादानंतर न्यायालयाने हे आदेश दिले आहेत. या प्रकरणी गुन्हा दाखल करुन एक महिन्यांत अहवाल द्यावा असे आदेश न्यायालयाने दिले आहेत.

काही दिवसांपूर्वी कोथरूड परिसरातील सार्वजनिक शौचालयाचे बांधकाम तोडण्याचे निर्देश प्रशासनाने दिले होते. या कारवाईवरुन मोठा वाद झाला होता. परिसरातील नागरिकांनी जागा सोडून जावे यासाठी महापौर मुरलीधर मोहोळ यांनीच ही कारवाई केल्याचा आरोप फिर्यादीत करण्यात आला आहे. त्यानंतर एका व्यक्तीने न्यायालयात याचिका दाखल केले होती. यावर जिल्हा न्यायालयाने सुनावणी करताना पोलिसांना गुन्हा नोंद करुन तपास करण्याचे आदेश दिले आहेत. याप्रकरणी महापौर मुरलीधर मोहोळ यांना विचारले असता त्यांनी म्हटले, या प्रकरणात आपण सविस्तर माहिती घेऊन आपली बाजू लवकरच मांडणार आहोत.

पुणे, दि.8 : राज्य शासनाच्या सामाजिक न्याय विभागांतर्गत सासवड येथील डॉ. बाबासाहेब आंबेडकर मागासवर्गीय मुलांचे शासकीय वसतिगृहात 2021-2022 साठी अनुसूचित जाती, विशेष मागास प्रवर्ग, अपंग, अनाथ आदी प्रवर्गाच्या विद्यार्थ्यांना विनामूल्य प्रवेश देण्याची प्रकिया सुरू करण्यात आली आहे.

प्रवेशासाठी विद्यार्थी हा बाहेरगावचा परंतु सासवड ता.पुरंदर येथील महाविद्यालयात शिक्षण घेणारा असावा. मागील वर्षी उत्तीर्ण झाल्याची गुणपत्रिका, सक्षम प्राधिकाऱ्याच्या सहीचे जातीचे प्रमाणपत्र, तहसीलदारांच्या स्वाक्षरीचे वडिलांचे उत्पन्नाचे प्रमाणपत्र, महाराष्ट्र निवासाचे प्रमाणपत्र, तसेच महाविद्यालयाचे बोनाफाईड प्रमाणपत्र, मुलाचे आणि वडिलांचे आधारकार्ड, शिधापत्रिकेची सत्यप्रत अर्जासोबत जोडावी. कोविड-19 आजाराबाबत वडिलांचे/लाभार्थ्यांचे लेखी संमतीपत्रक असावे. शाळा अथवा महाविद्यालय प्रत्यक्ष सुरू असल्याबाबत मुख्याध्यापक किंवा प्राचार्यांचे लेखी हमीपत्र देखील अर्जासोबत असणे आवश्यक आहे.

शासकिय वसतिगृहात विनामुल्य निवास व भोजनाची सुविधा आहे. शासनाने ठरवून दिलेल्या दराने पुस्तके, इतर शैक्षणिक साहित्य आदीकरिता रक्कम आणि दरमहा निर्वाह भत्ता रक्कम 500 रुपये आधार क्रमांक जोडलेल्या विद्यार्थ्याच्या बचत खात्यावर जमा होते.

कोविड-१९ महामारीमुळे रिक्त जागेच्या ५० टक्केच जागा भरल्या जाणार आहेत. बाहेरगावाकडील परंतू सासवड ता.पुरंदर परिसरात शिक्षण घेणा-या गरीब होतकरू विद्यार्थ्यांनी अर्ज भरण्याकरिता वसतिगृहात येऊन नोंदणी करावी, असे आवाहन वसतीगृह अधीक्षक व्ही.आर.जवळकर यांनी केले आहे.

पुणे, दि.8 : राज्य शासनाच्या सामाजिक न्याय विभागांतर्गत पिंपरी-चिंचवड, सेक्टर -4, स्पाईनरोड पथ क्रमांक-8, ॲक्वार्ड हॉस्पिटल मोशी प्राधिकरण येथील 250 मागासवर्गीय मुलांच्या शासकीय वसतिगृहात 2021-22 साठी अनुसूचित जाती, विशेष मागास प्रवर्ग, अपंग, अनाथ आदी प्रवर्गाच्या विद्यार्थ्यांना विनामूल्य प्रवेश देण्याची प्रकिया सुरू करण्यात आली आहे.

प्रवेशासाठी विद्यार्थी हा बाहेरगावचा परंतु पुणे, पिंपरी-चिंचवड, मोशी प्राधिकरण येथील महाविद्यालयात शिक्षण घेणारा असावा. मागील वर्षी उत्तीर्ण झाल्याची गुणपत्रिका, सक्षम प्राधिकाऱ्याच्या सहीचे जातीचे प्रमाणपत्र, तहसीलदारांच्या स्वाक्षरीचे वडिलांचे उत्पन्नाचे प्रमाणपत्र, महाराष्ट्र निवासाचे प्रमाणपत्र, तसेच महाविद्यालयाचे बोनाफाईड प्रमाणपत्र, मुलाचे आणि वडिलांचे आधारकार्ड, शिधापत्रिकेची सत्यप्रत अर्जासोबत जोडावी. कोविड-19 आजाराबाबत वडिलांचे/लाभार्थ्यांचे लेखी संमतीपत्रक असावे. शाळा अथवा महाविद्यालय प्रत्यक्ष सुरू असल्याबाबत मुख्याध्यापक किंवा प्राचार्यांचे लेखी हमीपत्रदेखील अर्जासोबत असणे आवश्यक आहे.

शासकिय वसतिगृहात विनामुल्य निवास व भोजनाची सुविधा आहे. शासनाने ठरवून दिलेल्या दराने पुस्तके, इतर शैक्षणिक साहित्य आदीकरिता रक्कम आणि दरमहा निर्वाह भत्ता रक्कम ८०० रुपये आधार क्रमांक जोडलेल्या विद्यार्थ्याच्या बचत खात्यावर जमा होते.

कोविड-19 महामारीमुळे रिक्त जागेच्या 50 टक्केच जागा भरल्या जाणार आहेत. बाहेरगावाकडील परंतू पुणे पिंपरी-चिंचवड, मोशी प्राधिकरण परिसरात शिक्षण घेणा-या गरीब होतकरू विद्यार्थ्यांनी अर्ज भरण्याकरिता वसतिगृहात येऊन नोंदणी करावी, असे आवाहन वसतीगृह अधीक्षक व्ही.आर.जवळकर यांनी केले आहे.

पुणे दि. 8: मागासवर्गीय मुलींचे शासकीय वसतिगृह येरवडा (पुणे) या संस्थेला सर्व सोईसुविधायुक्त खासगी इमारत भाड्याने आवश्यक असून इमारत भाड्याने देऊ इच्छिणाऱ्या व्यक्तींनी संपर्क साधावा, असे आवाहन वसतिगृहाच्या गृहपालांनी केले आहे.

या वसतिगृहामध्ये इ. 11 वी ते 12 वी आणि पदविकापर्यंतच्या वर्गात शिकणाऱ्या मुलींना मोफत प्रवेश दिला जातो. या संस्थेसाठी 5 हजार ते 5 हजार 500 चौ. फूट इतक्या क्षेत्रफळाची इमारत आवश्यक असून त्यामध्ये किमान 20 ते 25 खोल्या, 10 संडास, 10 बाथरुम, वीज, पिण्याचे पाणी, पाणी साठवणुकीची सोय आदी सुविधा तसेच इमारतीभोवती संरक्षक भिंत असणे आवश्यक आहे.

इमारत भाड्याने देऊ इच्छिणाऱ्या पुणे शहराच्या जवळपासच्या भागातील इमारत मालकांनी सहायक आयुक्त समाजकल्याण, पुणे (दूरध्वनी 020-29706611) अथवा गृहपाल, मागासवर्गीय मुलींचे शासकीय वसतिगृह, येरवडा पुणे 06 (भ्रमणध्वनी क्र. 9561568459) येथे संपर्क साधावा.