पुणे, दि. 15: सामाजिक न्याय व विशेष सहाय्य विभागामार्फत दिव्यांग व्यक्ती व विद्यार्थ्यांसाठी महाशरद पोर्टल सुरु करण्यात आले असून त्यांनी https://www.mahasharad.in या पोर्टल वर नोदंणी करण्याचे आवाहन जिल्हा परिषदेचे जिल्हा समाज कल्याण अधिकारी प्रविण कोरगंटीवार यांनी केले आहे.

हे पोर्टल म्हणजे शासनाचा मंच (प्लॅटफॉर्म) असून त्यावर नोंदणीद्वारे राज्यातील दिव्यांग व्यक्ती हक्क अधिनियमाद्वारे व्याख्या केलेल्या दिव्यांग व्यक्तींना मदत तसेच सहाय्य उपलब्ध करुन देण्याची मागणी करता येणार आहे. या पोर्टलवर राज्यातील दिव्यांग नागरिक सुलभतेने आपली नोंदणी करु शकतात.

महाशरद पोर्टल हे दिव्यांग आणि त्यांना देणगी देऊ इच्छिणारे देणगीदार, अशासकीय संघटना, सामाजिक संस्था, कंपन्या, समाजसेवक या सर्वांना विनामूल्य जोडणारा दुवा आहे. या सर्वांना एकाच व्यासपीठाखाली आणणे, सामाजिक न्याय व विशेष सहाय्य विभागांच्या दिव्यांग वित्त व विकास महामंडळांच्या योजनांची माहिती देणे. विविध प्रकारच्या माहितीच्या आधारे दिव्यांगांची परिस्थिती आणि गरजा समजून घेणे या बाबी या पोर्टलमुळे शक्य होणार आहेत, असेही श्री. कोरगंटीवार यांनी कळवले आहे.

• पोलीस उपायुक्त सागर पाटील
  बालकांसाठी एक पाऊल न्यायासाठी उपक्रमाचा शुभारंभ

पुणे,दि. १५ : पुणे शहर तसेच जिल्ह्यात लहान मुले व महिलांसाठी काम करणाऱ्या स्वयंसेवी संस्थानी बालकांच्या अधिकारासंदर्भात कार्य करण्यासाठी एकत्रित यावे असे आवाहन पोलिस उपायुक्त सागर पाटील यांनी केले.अल्पबचत भवन येथे ज्ञानशक्ती विकास वाहिनी व सत्यार्थी चिल्ड्रन फाऊंडेशनच्यावतीने आयोजित ‘बालकांसाठी एक पाऊल न्यायासाठी’ उपक्रमाच्या शुभारंभप्रसंगी श्री.पाटील बोलत होते. यावेळी वरिष्ठ पोलीस निरीक्षक अशोक कदम, बाल कल्याण संरक्षण समितीचे सदस्य अर्जुन दांगट, बाल संरक्षण अधिकारी परमानंद, बालकल्याण समितीचे बीना हीरेकर, कैलास सत्यार्थी चिल्ड्रन फाउंडेशनच्या व्यवस्थापक हेमंती पवार, प्रसाद ताटे उपस्थित होत्या.

श्री. पाटील म्हणाले, आपल्याकडे सद्यस्थितीत बालकांचे प्रश्न मोठ्या प्रमाणात वाढलेले दिसतात, ते सोडविण्यासाठी कुटुंबातील प्रत्येकाची मानसिकता बदलायला हवी. एकत्र कुटुंब पद्धतीमध्ये संस्कृतीची जपवणुक होत असल्याने या संस्कृतीला अनन्यसाधारण महत्त्व असल्याचे त्यांनी सांगितले.

लष्कर पोलीस स्टेशनने पहिले चाइल्ड फ्रेंडली पोलीस स्टेशनचा बहुमान मिळवला असल्याचा उल्लेख करून श्री. पाटील म्हणाले, व्यसनाधिन मुले तसेच न कळत घडणाऱ्या चुकांना सुधारण्याची संधी देण्यासाठी ‘चाइल्ड फ्रेंडली’ पोलीस स्टेशन काम करते. या सर्व उपक्रमात स्वयंसेवी संस्थांचा सहभागही महत्त्वाचा ठरणार आहे. संस्थांनी एकत्रित येत याकामी पुढाकार घ्यावा, असे आवाहनही त्यांनी केले.

श्री. दांगट म्हणाले, बालकांच्या संरक्षणासाठी सर्व यंत्रणा कार्यरत आहेत. बालकांची सुरक्षा फक्त कायद्याने निर्माण होणार नाही, त्यासाठी समाजातील प्रत्येक घटकाचा सहभाग असला पाहीजे.

श्री. परमानंद म्हणाले, बालकांची काळजी व संरक्षणाची गरज आहे. आपली सर्वांची ही सामाजिक जबाबदारी आहे. बालकांशी संवाद साधला पाहीजे, त्यांच्या अडचणी समजून घेतल्या पाहीजेत. पुणे जिल्ह्यात चाइल्ड फ्रेंडली पोलीस स्टेशनची संख्या वाढत असून चांगला उप्रकम असल्याचेही ते म्हणाले.

श्री. कदम म्हणाले, कुटुंबातील सुख महत्त्वाचे आहे. पालक व मुलांमधील संवाद महत्त्वाचा आहे. मुलांशी संवादातून मुलांना काय पाहीजे, याबाबत पालकांना सहज समजू शकेल.ज्ञानशक्ती संस्थेच्या कार्यकारी संचालिका गार्गी काळे पाटील यांनी संस्थेच्यावतीने सुरू करण्यात आलेल्या ‘बालकांसाठी एक पाऊल न्यायासाठी’ उपक्रमाबाबत माहिती दिली.15 फेब्रुवारी ते 8 मार्च 2022 या कालावधीत हा जनजागृती उपक्रम राबविण्यात येणार असल्याचे त्यांनी सांगितले.

एमआयटी डब्ल्यूपीयूत ‘ब्रिलियंटाईन डे’ साजरा
परम लखानी एमआयटी डब्ल्यूपीयू पीस कींग व पीस ऑफ क्वीनचा मुकुट सायली डोईफोडेला

पुणे, दि. १५ फेब्रुवारी:“खरे सौंदर्य हे बुद्धीमत्तेत आहे. त्यामुळे बुद्धिच्या सौंदर्यांनी सभ्यतेच्या मर्यादा सांभाळून प्रेम करा. प्रेम ही एक शाश्‍वत शक्ती असून संतांनीही त्याची व्याख्या केली आहे. या जीवनात सर्वांवरच प्रेमाचा वर्षाव व्हावा.” असे विचार माजी सनदी अधिकारी अविनाश धर्माधिकारी यांनी व्यक्त केले.
एमआयटी वर्ल्ड पीस युनिव्हर्सिटीतर्फे ‘ब्रिलियंटाईन डे’ साजरा करण्यात आला. त्यानिमित्याने आयोजित केलेल्या ब्रिलियंटाईन स्पर्धेच्या पारितोषिक वितरण प्रसंगी प्रमुख पाहुणे म्हणून ते बोलत होते. जगविख्यात संगणक तज्ज्ञ पद्मभूषण डॉ. विजय भटकर सन्माननीय अतिथी म्हणून उपस्थित होते. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ.विश्‍वनाथ दा.कराड होते. याप्रसंगी एमआयटी डब्ल्यूपीयूचे कुलगुरू डॉ. आर.एम.चिटणीस, सल्लागार डॉ. संजय उपाध्ये, पीस स्टडीजचे सहयोगी अधिष्ठाता प्रा.डॉ. मिलिंद पात्रे आणि सह्याद्री वाहिनीचे माजी संचालक मुकेश शर्मा उपस्थित होते.
भारतीय संस्कृती, परंपरा, पौराणिक कथा, अध्यात्म, धर्म, योग व इतिहास इ. विषयांवर निबंध स्पर्धा, प्रश्‍नमंजूषा आणि वकृत्व स्पर्धा घेण्यात आल्या होत्या. या मध्ये २५० विद्यार्थी सहभागी झाले होते.
‘ब्रिलियंटाईन’ स्पर्धेत परम लखानी (स्कूल ऑफ मिडिया अ‍ॅण्ड जर्नालिझम) यांना एमआयटी डब्ल्यूपीयू पीस कींग व सायली डोईफोडे (स्कूल ऑफ मॅथेमॅटिक अ‍ॅण्ड स्टॅटेस्टिक्स) यांना एमआयटी डब्ल्यूपीयू पीस ऑफ क्वीनचा मुकुट घालून विशेष सत्कार करण्यात आला. सुवर्ण पदक आणि प्रमाणपत्र दिले. तसेच, या स्पर्धेतील पुरूष उपविजेते वेदांत काळे (स्कूल ऑफ मेकॅनिकल इंजिनियरींग), प्रणय करकाळेे(स्कूल ऑफ मेकॅनिकल इंजिनियरींग) आणि महिला उपविजेता सिद्धी देशमुख (स्कूल ऑफ मॅनेजमेंट यूजी, टीवाय बीबीए) व वैष्णवी बावठनकर (फॅकल्टी ऑफ लिबरल आर्ट) यांचाही सत्कार करण्यात आला. हे सर्व विजेते एमआयटी डब्ल्यूपीयूच्या विश्‍वशांती उपक्रमांचे नेतृत्व करतील व इतर महाविद्यालये व विद्यापीठांमध्ये त्याचा प्रचार व प्रसार करतील.
अविनाश धर्माधिकारी म्हणाले,“ खरे नाते हे मित्राचे असते. या नात्याला अध्यात्मात सुद्धा खूप मोठे स्थान दिले गेले आहे. वर्तमान काळात व्हॅलेंटाईन डे ला मार्केटिंगचे स्वरूप आले आहे. त्यामुळे या पासून स्वतःचा सांभाळ करावा. माणसाच्या माणुसपणाचे खरे सौंदर्य हे बुद्धिमत्तेतच दिसून येते.”
डॉ. विजय भटकर म्हणाले,“आंतरिक परिवर्तन हे जीवनात मोठे बदल घडवितात. व्हॅलेंटाईन डे हा आंतरिक प्रेमाचा दिवस आहे. हा दिवस बुद्धिमत्तेचा म्हणजे विद्वतेसाठी साजरा केला जावा. ज्ञानमुळे जीवनात बदलत होत जातात. त्यासाठी ज्ञानला महत्व दिले जावे. भगवद गीतेसारख्या ग्रंथांचे अनुकरण केल्यास परिवर्तन नक्कीच घडते. त्यातून आनंद निर्माण होतो.”
डॉ. विश्‍वनाथ दा. कराड म्हणाले,“वर्तमानकाळात प्रेमाची भाषा बदलत चालली असून त्यात मन आणि बुद्धि महत्वाची आहे. आजची पिढी कोणत्या दिशेने वाटचाल करीत आहे हे पहाणे गरजेचे आहे. त्यातच कुटुंब व्यवस्था ही भरकटत आहे. या साठी ब्रिलियंटाईन डे ही संकल्पना समाजाला नवी दिशा देईल. जीवन कसे जगावे आणि कसे जगू नये हे आम्हाला धर्म शिकवितात. त्या आनंदाचा अनुभूव घ्यायचा असेल तर शाश्‍वतमार्गावर चालावे. विद्यार्थ्यांनी असा व्यवहार करावा की आपल्या आई वडिलांना त्यांचा अभिमान वाटावा.”
डॉ. संजय उपाध्ये यांनी प्रास्ताविकेत सांगितले की, ब्रिलियंटाइन स्पर्धा केवळ शारीरिक रुपाला व दिसण्याला महत्व न देता बुद्धिला व स्वतःच्या अस्तित्वाला महत्व दिले जावे यासाठी आयोजित करण्यात आली होती. विद्यार्थ्यांच्या बुद्धीला चालना व आव्हान देणे महत्वाचे होते.
परम लखानी म्हणाले,“स्पर्धेमुळे माझ्या ज्ञानात भर पडली आहे. यातून अनेक गोष्टी शिकण्याची संधी मिळाली. पुरस्कारामुळे मला खूप आनंद झाला.”
सायली डोईफोडे म्हणाल्या,“माझ्या जीवनात शिक्षकाची भूमिका महत्वाची आहे. त्यांनी केलेल्या मार्गदर्शनामुळे मिळालेला अनुभव भावी आयुष्यासाठी मैलाचा दगड ठरेल. ”
 यावेळी मुकेश शर्मा यांनी आपले विचार मांडले.
पीस स्टडीजचे प्रा.आशिष पाटील व प्रा.मृण्मयी गोडबोले यांनी सूत्रसंचालन केले. डॉ. मिलिंद पात्रे यांनी आभार मानले.

पुणे- चोरांना पकडण्यासाठी, खुन्यांना पकडण्यासाठी शहरभर लावलेले सीसी टीव्ही प्रत्यक्षात सामान्य नागरिकांनाच , दुचाकी स्वारांवरच जास्त लक्ष केंद्रित करत असून त्याद्वारे हेल्मेट सक्ती करून हेल्मेट च्या नावाने पुण्यात करोडो रुपयांची लुट केली जाते आहे , हेल्मेट बाबत ची आपली भूमिका राष्ट्रवादीचे नेते आणि पालकमंत्री अजित पवार यांनी आता स्पष्ट करावी अशी मागणी आम आदमी पार्टीचे युवा नेते कृष्णा गायकवाड यांनी केली आहे.

ते म्हणाले,’भाजपाचे राज्यात सरकार असताना राष्ट्रवादी चे अंकुश काकडे, शांतीलाल सुरतवाला यांच्यासह सर्वांनी हेल्मेट सक्तीला केलेला विरोध , भाजपचे संदीप खर्डेकर, ग्राहक पेठेचे सुर्यकांत पाठक आणि शिवसेनेसह अन्य पक्षाच्या कार्यकर्त्यांनी हेल्मेट विरोधी सुरु केलेली चळवळ ‘नाटकी होती काय ?असा प्रश्न विचारला जाऊ शकेल अशी स्थिती आता निर्माण होऊ पाहते आहे. एकीकडे मेट्रो शहरात आणली जात असताना दुसरीकडे १ टक्का मुद्रांक अधिभार मेट्रो साठी दस्तनोंदणीवर तर लावणार आहेतच , पण गेली वर्षाहून अधिक काळ हेल्मेट च्या नावाखाली सीसी टीव्ही ला कार्यरत करून लाखो दुचाकी चालकांना एसएम एस पाठवून लोक अदालतीच्या नोटीसा पाठवून त्यांच्याकडून हजारो रुपयांची दंड वसुली करून सरकारने करोडो रुपये वसुलीचे तंत्र न्यायिक प्राधिकरण यात घेऊन जमा करण्याचे कारस्थान सुरु ठेवलेले आहे. राष्ट्रवादी कॉंग्रेसचे नेते ,राज्याचे उपमुख्यमंत्री आणि पुण्याचे पालकमंत्री असलेले अजितदादा पवार यांनी आता तरी तातडीने यावर आपली भूमिका स्पष्ट करावी अशी मागणी आम आदमी पार्टीच्या कार्यकर्त्यांनी केली आहे . हेल्मेट सक्ती राज्यात आहेच हे स्पष्ट असून त्यावर नागरिकांना सुट दिलेली नाही . मग आपले कार्यकर्ते जी आंदोलने भाजपा सेना युतीचे सरकार असताना करत होती ते सारे ढोंग होते काय ? असा सवाल देखील गायकवाड यांनी केला आहे .

बी आरटी येणार म्हणून, सायकल मार्ग उभारीत , बीआरटीचा वापर जास्त लोकांनी करावा म्हणून बीआरटीला स्वतंत्र लेन देत अगदी एसटी आणि मोठी वाहने देखील त्यातून बाजूला करत पुण्यात खाजगी वाहन चालकांना रस्ते अरुंद करून त्यांची गळचेपी करण्याचे कारस्थान राबविले गेले आता मेट्रो येणार म्हणून देखील हे दंड वसुलीचे प्रकार राबवून लोकांना मेट्रो कडे कसे वळविता येईल याचे षड्यंत्र राबविले जाते आहे . पुण्यात वाहन नाही तर नौकरी अगर कामधंदा करता येत नाही अशा स्थितीत चालविलेली हि पुणेकरांची लुट आणि ज्यांच्या पक्षांचे सरकार आहे आणि होते त्यांनी सुरु ठेवलेले हे प्रकार असल्याने आता त्यांच्या नेत्यांनाच आम आदमी पार्टीने जाहीर आव्हान केले आहे यावर आपली भूमिका स्पष्ट करा म्हणजे लोक हि आपली भूमिका मग मतदानातून व्यक्त करतील असे आम आदमी पार्टीच्या कृष्ण गायकवाड यांनी म्हटले आहे.

श्री महालक्ष्मी मंदिर सारसबाग तर्फे ३८ व्या वर्धापनदिनानिमित्त आयोजन ; संतुलन संस्थेला धान्य भेट

पुणे : श्री महालक्ष्मी, श्री महासरस्वती, श्री महाकाली व श्री विष्णू भगवान यांच्या सारसबागेसमोरील श्री महालक्ष्मी मंदिरातील उत्सवमूर्तींची धान्यतुला करुन ते धान्य दगडखाण कामगारांच्या मुलांसाठी कार्यरत संतुलन संस्थेला देण्यात आले. याशिवाय सुवर्णकमल व रजतकमल अर्चना कार्यक्रमांतर्गत सोने व चांदींची पुष्प अर्पण करुन देवीचरणी आरोग्यसंपन्न भारताकरीता प्रार्थना करण्यात आली.

श्री बन्सीलाल रामनाथ अग्रवाल धार्मिक व सांस्कृतिक ट्रस्ट, श्री महालक्ष्मी मंदिर सारसबागच्या ३८ व्या वर्धापनदिनानिमित्त मंदिरात ब्रह्मोत्सव सुरु आहे. राजस्थान डिडवाना येथील अनंत श्री विभुषित जगतगुरु रामानुजाचार्य झालरिया पीठाधीपती पूज्य श्री श्री १००८ स्वामीजी घनश्यामाचार्याजी महाराज यांच्या आशिर्वादाने विविध धार्मिक कार्यक्रम मंदिरात होत आहेत. ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड.प्रताप परदेशी, विश्वस्त नगरसेवक प्रविण चोरबेले, हेमंत अर्नाळकर, नारायण काबरा आदी उपस्थित होते.

धान्यतुला उपक्रमाचे चंदाबाई भुतडा, विशाल मेहता, विजया भुतडा, रोहित अरोरा, सुरेखा काबरा, प्रविण चोरबेले, अरुणा वट्टे, पूजा कांबळे, संगीता पोफलिया हे तर सुवर्णकमल व रजतकमल अर्चना कार्यक्रमाचे विशाल मेहता, रोहित अरोरा, प्रणाली भूमकर, ठाकू रदास बलसारा हे यजमान होते.

अमिता अग्रवाल म्हणाल्या, सामाजिक कार्यक्रमांमध्ये मंदिरातील उत्सव मूर्तीची धान्यतुला करुन ते धान्य वाघोली येथील संतुलन पाषाण या दगडखाण कामगारांच्या मुलांसाठी काम करणा-या संस्थेस देण्याचा उपक्रम राबविण्यात आला. धान्यतुलेमध्ये विविध प्रकारचे धान्य, बिस्कीटे व खाऊ ठेवण्यात आला होता. याशिवाय सोने व चांदीची फुले देखील मान्यवरांच्या हस्ते उत्सवमूर्तीला अर्पण करण्यात आली.

पुणे :  सलग १२ तासांच्या स्वरयज्ञात सतार, व्हायोलिन, तबला, हामोर्नियमन, सिन्थेसायझर, गिटार, माऊथ आॅर्गन, अ‍ॅकॉर्डियन, बासरी तर काही कलाकारांनी शिळ वादनातून, चित्रांतून गानसम्राज्ञी लतादीदींना श्रध्दांजली अर्पण केली. आपल्या स्वरांनी फक्त भारतालाच नव्हे तर संपूर्ण जगाला मोहित करणाºया लतादीदींना पुणेकरांनी स्वरांच्या मैफलीतून अखेरचा दंडवत दिला. यावेळी अनेक दिग्गज कलाकारांनी लतादीदींच्या आठवणींना उजाळा दिला. 
पूना गेस्ट हाऊस स्नेहमंचच्यावतीने गानसम्राज्ञी लता मंगेशकर यांना अभिवादन करण्यासाठी सलग १२ तासांच्या स्वरयज्ञाचे आयोजन लक्ष्मी रस्त्यावरील पूना गेस्ट हाऊस येथे करण्यात आले. कार्यक्रमाच्या सुरूवातीला ज्येष्ठ शिक्षणतज्ज्ञ डॉ. न.म.जोशी, माजी आमदार उल्हासदादा पवार, निवेदक सुधीर गाडगीळ, गायक उपेंद्र भट, गायिका मंजुषा पाटील, ज्येष्ठ समिक्षीका सुलभा तेरणीकर, शिरीष रायरीकर, लेखक राजन लाखे, पीएनजी सन्सचे अजित गाडगीळ, रेणू गाडगाळ यांच्यासोबत अनेक मान्यवर उपस्थित होते. 
पूना गेस्ट हाऊसचे किशोर सरपोतदार, साधना सरपोतदार यांनी कार्यक्रमाचे आयोजन केले. या स्वरयज्ञात दिवसभरात तब्बल शंभरहून अधिक कलाकारांनी सहभाग घेतला. पुण्याचे महापौर मुरलीधर मोहोळ व सावित्रीबाई फुले पुणे विद्यापीठाचे कुलगुरु डॉ.नितीन करमाळकर यांनी देखील स्वरयज्ञ कार्यक्रमाला भेट देऊन लतादीदींना आदरांजली अर्पण केली. 
कार्यक्रमाची सुरूवात व्हायोलिन वादक रमाकांत परांजपे, सिंथेसायजर विवेक परांजपे, बासरी वादक निलेश देशपांडे, तबलावादक राजेंद्र दुरकर, गायिका मनिषा निश्चल यांच्या सादरीकरणाने झाली. त्यानंतर कलाकारांनी दीदींच्या भावगीत, बालगीत, शृंगारगीत, प्रेमगीत, देशभक्तीपर गीतांची स्वरमाळ गुंफली. त्याचबरोबर हेमंत गद्रे यांनी माऊथआॅर्गन मधून तर अनिल गोडे यांनी अ‍ॅकॉर्डियन वादनातून दीदींच्या अनेक अपरिचत गाण्यांनी उजाळा दिला. नगरचे शिल्पचित्रकार प्रमोद कांबळे यांनी चार चित्रे रेखाटली, तर इक्बाल दरबार यांनी सेस्कोफोनवर आणि स्वाती जोशी यांनी माऊथ आॅर्गनद्वारे सादरीकरण करीत स्वरांजली अर्पण केली. 
किशोर सरपोतदार म्हणाले, मंगेशकर घराण्याचे आणि सरपोतदार घराण्याचे जवळचे संबंध आहेत. लहान असताना मास्टर दिनानाथ मंगशेकरांबरोबर लतादीदी पूना गेस्ट हाऊसमध्ये येत असत. त्यावेळी तेरा वर्षांच्या असताना त्यांनी पूना गेस्ट हाऊस मध्ये गायन केले होते. त्यामुळे त्यांना अभिवादन करण्यासाठी या स्वरयज्ञाचे आयोजन केले असून अनेक कलाकारांनी आपल्या कलेच्या माध्यमातून त्यांना अभिवादन केले असल्याचे त्यांनी सांगितले. मनिष गोखले यांनी कार्यक्रमाचे सूत्रसंचालन केले. अजित कुमठेकर यांनी कार्यक्रमाचे समन्वयक म्हणून काम केले.