पुणे दि.1: दिव्यांग नेमबाजी स्पर्धेचे राज्यमंत्री बच्चू कडू यांच्या हस्ते उद्घाटन झाले. श्री.कडू यांनी नेमबाजी करून स्पर्धकांना प्रोत्साहन दिले.

बालेवाडी क्रिडा संकुल येथे आयोजित स्पर्धेच्या उद्घाटनवेळी क्रीडा उपसंचालक नवनाथ फरताडे, प्रशिक्षक संदीप तरटे, रफिक खान, दिलीप सोनवणे, आकाश कुंभार, भाग्यश्री मोरे,सुनंदा बाम्हणे, अमोल शेरेकर,संजू बनपट्टे उपस्थित होते.

पुणे, ता. १ : डेक्कन एज्युकेशन सोसायटीच्या (डीईएस) वतीने नवोदित उद्योजकांना मार्गदर्शन करण्यासाठी ‘डॉ. प्र. चिं. शेजवलकर उद्योजकता संशोधन केंद्र’ सुरू करीत असल्याची घोषणा  डीईएसचे उपाध्यक्ष महेश आठवले यांनी आज पत्रकार परिषदेत केली.

कार्यवाह प्रा. धनंजय कुलकर्णी, संचालक मिलिंद कांबळे, फर्ग्युसन महाविद्यालयाचे प्राचार्य डॉ. रविंद्रसिंग परदेशी, ‘आयएमडीआर’च्या संचालिका डॉ. शिखा जैन या वेळी उपस्थित होत्या.

आठवले म्हणाले, व्यवस्थापन तज्ज्ञ डॉ. प्र. चिं. शेजवलकर यांच्या स्मरणार्थ हे केंद्र सुरू करण्यात येणार आहे. सावित्रीबाई फुले पुणे विद्यापीठाचे कुलगुरु डॉ. नितीन करमळकर यांच्या हस्ते येत्या शनिवारी (ता. ५ मार्च) सायंकाळी ५ वाजता फर्ग्युसन महाविद्यालयाच्या अम्फिथिएटरमध्ये या केंद्राचे उद्घाटन करण्यात येणार आहे. स्पेल टेक्नॉलॉजीचे अध्यक्ष राजेंद्र शर्मा. ल्युपिन रिसर्च पार्कचे वरिष्ठ उपाध्यक्ष गिरीप पाल सिंग, डॉ. सुषमा केसकर यांची प्रमुख उपस्थिती राहणार आहे.

आठवले पुढे म्हणाले, नावीन्यपूर्ण कल्पनांचे व्यवसायात रुपांतर करण्यासाठी आवश्यक असणारे मार्गदर्शन या केंद्राद्वारे केले जाणार आहे. नवोदित उद्योजकांच्या विचार प्रक्रियेला आकार देणे, व्यवसायाची योजना तयार करणे, कौशल्य विकसित करणे, बाजारपेठेचे सर्वेक्षण, वित्तपुरवठा योजनांची माहीती, विविध परवाने मिळविणे आदी उद्योजकाला आवश्यक असणारे गुण विकसित करण्यासाठी मार्गदर्शन केले जाणार आहे. केंद्रासाठी आवश्यक मूलभूत सुविधा, संगणक कक्ष, प्रयोगशाळा आदी उपलब्ध करून देण्यात येणार असून, विविध क्षेत्रांतील तज्ज्ञ आणि अनुभवी व्यक्तींचे मार्गदर्शन मिळणार आहे.

सुमारे १५० वर्षांपूर्वीचे पुरातन शंकराचे मंदिर
पुणे : श्रीरामजी संस्थान तुळशीबाग च्यावतीने पेशवेकालीन तुळशीबाग राम मंदिर परिसरात महाशिवरात्रीनिमित्त सुमारे १५० वर्षांपूर्वीच्या पुरातन शंकराच्या मंदिरात महारुद्र अभिषेक पूजेचे आयोजन करण्यात आले होते. मंदिराच्या परिसरात मुख्य मंदिराशेजारील मांडवात हा सोहळा पार पडला. संस्थानचे कार्यकारी विश्वस्त रामदास तुळशीबागवाले यांच्या हस्ते महारुद्र अभिषेक करण्यात आला. 
यावेळी संस्थानचे भरत तुळशीबागवाले, राघवेंद्र तुळशीबागवाले, श्रीपाद तुळशीबागवाले, शिशिर तुळशीबागवाले, कोटेश्वर तुळशीबागवाले यांसह तुळशीबागवाले परिवार उपस्थित होते. आराध्ये गुरुजी यांसह ब्रह्मवृंदांनी पौरोहित्य व मंत्रपठण केले. 
तुळशीबाग मंदिर परिसरातील शंकराचे मंदिर फुलांनी सजविण्यात आले होते. तसेच विद्युतरोषणाई देखील करण्यात आली होती. शंकराच्या पिंडीवर सकाळी ७ ते दुपारी १२.३० यावेळेत सलग साडे पाच तास अभिषेक करण्यात आला. दोन ते तीन वर्षांनंतर पुन्हा एकदा तुळशीबागेत महाशिवरात्रीनिमित्त धार्मिक कार्यक्रम उत्साहात होत असल्याने भाविकांनी देखील दर्शनाकरीता हजेरी लावली होती.

राज्यपालांच्या वादग्रस्त विधानाच्या निषेधार्थ शहर काँग्रेसचे आंदोलन

पुणे-महाराष्ट्राचे राज्यपाल भगतसिंग कोश्यारी यांनी छत्रपती शिवाजी महाराज यांच्या बाबत अवमानकारक वक्तव्‍य केल्याच्या निषेधार्थ आज पुणे शहर जिल्हा काँग्रेस कमिटीचे अध्यक्ष रमेश बागवे यांच्या अध्यक्षतेखाली एस. एस. पी. एम. एस. शाळा, शिवाजीनगर येथील छत्रपती शिवाजी महाराज यांच्या पुतळ्याजवळ ‘‘जोडो मारो आंदोलन’’ करण्यात आले. काँग्रेस पक्षाचे पदाधिकारी व कार्यकर्त्यांनी छत्रपती शिवाजी महाराज यांचा जय जयकार करून राज्यपाल भगतसिंग कोश्यारींच्या विरोधात जोरदार घोषणा दिल्या. यावेळी बोलताना रमेश बागवे म्हणाले की, ‘‘महाराष्ट्राचे राज्यपाल यांनी वक्तव्‍य केले की, ‘समर्थ रामदास नसते तर शिवाजींना कोणी विचारलं नसते’. अशा प्रकारे महाराष्ट्राचे दैवत छत्रपती शिवाजी महाराजांना एकेरी शब्दात उल्लेख करून महाराजांचा आणि देशाचा अपमान केला आहे. राज्यपांल सातत्याने वादग्रस्त विधाने करीत आहेत आणि मोदी सरकार त्यांची पाठराखण करीत आहे. भारतीय जनता पक्ष राज्यपालांच्या वक्तव्‍यावर मौन बाळगून आहेत. राज्यपालांनी त्वरीत माफी मागावी अन्यथा काँग्रेस पक्षातर्फे तीव्र आंदोलन करण्यात येईल.’’

     यावेळी बोलताना नगरसेवक अरविंद शिंदे म्हणाले की, ‘‘महाराष्ट्राचे राज्यपालांनी कुठलेही पुरावे नसताना असे सांगितले की, शिवाजी महाराज आणि रामदास स्वामी यांची भेट झाली. खोटे बोलून जनतेची दिशाभुल करणे हा भाजपाचा अंजेडा राज्यपाल अतिशय चोखपणे राबवित आहेत. छत्रपती शिवाजी महाराजांना एकेरी शब्दात उल्लेख करण्याची मजाल राज्यपालांनी केलेली आहे. पंतप्रधान नरेंद्र मोदींनी भगतसिंग कोश्यारी यांचा राजीनामा घ्यावा. जर तसे झाले नाही तर आम्ही महाराष्ट्रात राज्यपालांचा कार्यक्रम होऊ देणार नाही याची नोंद मोदी सरकारने घ्यावी.’’

     यावेळी माजी मंत्री बाळासाहेब शिवरकर, गटनेते आबा बागुल, कमल व्‍यवहारे, संजय बालगुडे, अनिल सोंडकर, शेखर कपोते, पुजा आनंद, विशाल मलके, नीता रजपूत, सोनाली मारणे, हाजी जाकीर शेख, नगरसेवक रविंद्र धंगेकर, लता राजगुरू, अविनाश बागवे, रफिक शेख, संगिता तिवारी, राजेंद्र शिरसाट, द. स. पोळेकर, रजनी त्रिभुवन, अरूण वाघमारे, राजाभाऊ कदम, प्रकाश पवार, रामदास मारणे, बाळासाहेब अमराळे, मुख्तार शेख, साहिल केदारी, यासीर बागवे, नारायण पाटोळे, राजू साठे, सचिन आडेकर, राजेंद्र भुतडा, प्रविण करपे, विजय खळदकर, रमेश सकट, विजय जाधव, वाल्मिक जगताप, अजित जाधव, अविनाश अडसूळ, मुन्नाभाई शेख, क्लेमेंट लाजरस, रॉर्बट डेव्हिड, परवेज तांबोळी, सुरेश कांबळे, विनोद रणपिसे गणेश भंडारी, बबलू कोळी, राजू गायकवाड, ॲड. राजश्री अडसूळ, सिमा महाडिक, शारदा वीर, फैय्याज शेख, रवी मोहिते आदींसह काँग्रेस पदाधिकारी व कार्यकर्ते उपस्थित होते.

पुणे-साहित्यिक कट्टा वारजे आयोजित जागतिक मराठी भाषा दिना निमित्त मराठी भाषा अध्यापकांचा सन्मान आणि ”मराठी आमची असे मायबोली” या विषयावर प्रा. मिलिंद जोशी यांच्या व्याख्यानाचे आयोजन करण्यात आले होते यावेळी महापालिकेतील विरोधी पक्षनेत्या दिपाली प्रदिप धुमाळ ,प्रदिप उर्फ बाबा धुमाळ, वा दा. पिंगळे उपस्थित होते

यावेळी प्रा. मिलिंद जोशी बोलताना म्हणाले समाजाविषयी आस्था आणि आपुलकी असणारे नगरसेवक असतात पण इथे साहित्यिक उपक्रम झाले पाहिजे समाजाच्या वैचारिक भरण पोषण झालं पाहिजे असं वाटणारी लोकप्रतिनिधि फार कमी असतात प्रदीप धुमाळ आणि दिपाली धुमाळ हे समाजसेवेला संसार मानणारी मंडळी आहेत त्यामुळे त्यांनी आयोजित केलेल्या कार्यक्रमात उपस्थित रहायला मिळाले याचा मला आनंद झाला

प्रा. जोशी पुढे म्हणाले मी आणि माझ्या सहकाऱ्यांनी राज ठाकरे यांच्यापासून अजित पवार यांच्यापर्यंत आणि पृथ्वीराज चव्हाण यांच्यापासून ते प्रकाश आंबेडकर यांच्यापर्यंत सगळ्यांच्या गाठीभेटी घेतल्या मला महाआघाडी सरकारचे खरोखरच कौतुक वाटते की आपले मंत्री मराठी भाषेला अभिजात भाषेचा दर्जा मिळावा एवढा एकच मुद्दा घेऊन दिल्लीला जाऊन सांस्कृतिक मंत्रालयात भेटले ही गोष्ट मला फार महत्त्वाची वाटते आज मराठी भाषेला अभिजात भाषेचा दर्जा मिळावा असं वाटत असेल तर राजकीय इच्छाशक्तिचा प्रभाव जास्त महत्त्वाचा आहे आमच्या साहित्य क्षेत्रातील काही टीकाकार असे म्हणतात की आम्हाला अभिजात भाषेचा दर्जा मिळून काय करायचे त्यासाठी येणार पचाशे कोटी  त्याच्यावरती सगळ्यांचा डोळा असेल साहित्य परिषद म्हणून आम्ही नेहमीच भूमिका मांडत आलो त्या पाचशे कोटींशी आम्हाला काही घेणं देणं नाही शेवटी मराठी भाषेला अभिजात भाषेचा दर्जा मिळणे हा आमचा अभिमान आहे आणि तो आमच्या अस्मितेशी निगडित आहे असे मिलिंद जोशी यावेळी म्हणाले

आदर आणि विश्वास संपादन करणारे शिक्षक जुन्या काळामध्ये होते आणि आजही आहे मला त्याचा विशेष आनंद होतो आणि त्यामुळे मराठी भाषा साहित्य आणि संस्कृती जपायची असेल तर तो संस्कार शालेय जीवनापासून होणे गरजेचे आहे आणि त्यासाठी शिक्षकांची आणि पालकांची दोघांची जबाबदारी महत्त्वाची आहे असे ही मिलिंद जोशी यावेळी म्हणाले

आपल्या मुलांना मातृभाषेतून शिक्षण देणे खूप गरजेचे आहे आणि त्यासाठी आपण सर्वांनी मिळून प्रयत्न केले पाहिजे आपली मातृभाषा, आपली मराठी भाषा आणि आपण मनापासून त्याविषयी प्रेम निर्माण केले पाहिजे मराठी भाषा दिन हा एका दिवसापुरता साजरा न होता वर्षभर साजरा व्हावा अशी अपेक्षा दिपाली धुमाळ यांनी यावेळी व्यक्त केलीआपल्या मराठी भाषेला अभिजात दर्जा मिळण्यासाठी प्रयत्न सुरु आहेत शाळेतील शिक्षक विद्यार्थ्यांमध्ये मराठी भाषा रुजविण्याचे काम शिक्षक करत असतात आणि त्यांनी या कामात खंड पडू नये यासाठी प्रयत्न केले पाहिजे असे प्रदीप धुमाळ यावेळी प्रस्ताविकात म्हणाले

पुणे-छत्रपती शिवाजी महाराजांचा एकेरी उल्लेख करणारे महाराष्ट्राचे राज्यपाल भगतसिह कोशारी यांचा शिवसेना पुणे शहराचे वतीने जाहिर निषेध करून त्यांनी राजीनामा द्यावा अशी मागणी करण्यात आली. याप्रसंगी शहरप्रमुख संजय मोरे, गजानन थरकुडे, नगरसेवक संजय भोसले, पल्लवी जावळे, विशाल धनवडे, गजानन पंडित, राजेंद्र शिंदे, मतदार संघ संपर्कप्रमुख रामभाऊ कदम, दिपक शेडे, प्रशांत राणे, भरत कुंभारकर, उत्तम भुजबळ, प्रविण डोंगरे, संजय डोंगरे, उमेश गालिंदे, अनिल दामजी, चंदन साळुंके, सुरज लोखंडे, राहुल जेकटे, जावेद खान, प्रसाद काकडे, योगेश पवार, नंदू येवले, संदिप गायकवाड, जगदिश दिघे, सागर बारणे, बाळासाहेब गरुड महिला आघाडीच्या सुनिता खंडाळकर, करूणा घाडगे, प्रज्ञा लोणकर, स्वाती कथलकर, धनश्री बोराडे, वैशाली दारवटकर, जयश्री भणगे, अनुपमा मांगडे, युवा सेनेचे आकाश शिंदे, युवराज पारिख, सनी गवते, परेश खांडके, अक्षय फुलसुंदर आदी सैनिक उपस्थित होते .

यावेळी शिवसेना शहर प्रमुख संजय मोरे म्हणाले कि,’ छत्रपती शिवाजी महाराजांचा इतिहास आणि पराक्रम संपूर्ण देशाला माहिती आहे, परदेशात त्यांच्या युद्धनीतीचा अभ्यास केला जातो. राज्यपालांना महाराष्ट्रातील इयत्ता पाचवीतील विद्यार्थी शिवाजी महाराजांचा ज्वलंत इतिहास व पराक्रमाची माहिती देउ शकेल. ती त्यांनी आत्मसात करावी. महाराष्ट्रात भाजप नेत्यांकडून छत्रपती शिवरायांचा कायम अवमान होत आहे. आणि इतर राज्यामधे देखील त्यामधे उपराष्ट्रपती व्यंकय्या नायडू, कर्नाटक सरकार, केंद्रीय मंत्री, राज्यपाल भगतसिंग कोशारी, पुणे शहर भाजप यासर्वांनी छ. शिवाजी महाराजांचा अवमान केला आहे. महाराजांचा एकेरी उल्लेख करून त्यांना दुय्यम दर्जाचे स्थान देण्याचा भाजप नेत्यांकडून कायम प्रयत्न केल्याचे निदर्शनास आले आहे. कोशारींच्या वक्तव्यावर भाजप कडून राजीनामा घेतला जाणार का ? हे जाहिर करावे.

मध्यान्ह भोजन योजनेमध्ये सरकारी शाळांमधील १३००० पेक्षा जास्त मुलांना जेवण पुरवून साहाय्य प्रदान केले जात आहे

हिमालया बंगलोरमधील अक्षय पात्र स्वयंपाकघराची केपेक्स आवश्यकता पूर्ण करण्यात देखील साथ देत आहे

पुणे  २८ फेब्रुवारी २०२२: प्रत्येक घरामध्ये आरोग्य व सुख नांदावे आणि प्रत्येक मन आनंदी राहावे यासाठी प्रयत्न करत राहण्याच्या वचनबद्धतेचा एक भाग म्हणून हिमालया वेलनेस कंपनीने भारतातून भूकमारी आणि कुपोषण या समस्या कायमच्या दूर व्हाव्यात यासाठी काम करणाऱ्या, अक्षय पात्र फाउंडेशन या विना-नफा तत्त्वावर चालवल्या जाणाऱ्या संस्थेसोबत आधीपासून असलेली आपली भागीदारी अधिक मजबूत केली आहे. या उपक्रमामार्फत हिमालया सरकारी शाळांमध्ये शिक्षण घेत असलेल्या १३,००० पेक्षा जास्त मुलांना मध्यान्ह भोजन योजनेमार्फत साहाय्य प्रदान करत आहे. अक्षय पात्र फाउंडेशनच्या बंगलोर येथील स्वयंपाकघरामध्ये हेवी ड्युटी मिक्सर, रोस्टर मशीन आणि बेंच ड्रिलिंग मशीन पुरवून त्याठिकाणी अत्याधुनिक सोयीसुविधा उपलब्ध व्हाव्यात यासाठी केपेक्स साहाय्य देखील हिमालयाने पुरवले आहे.

शाळेत जाणारी, खास करून ६ ते १२ वर्षे वयोगटातील मुले रोजच्या जेवणातून पुरेसे पोषण मिळत नसल्याने कुपोषणाने ग्रस्त असतात. मध्यान्ह भोजन योजनेमध्ये मुलांना वेळेवर, आरोग्यवर्धक आणि पोषक जेवण पुरवले जाते. कुपोषणाची समस्या दूर व्हावी हा यामागचा उद्देश आहे. शालेय शिक्षण अर्धवट सोडून देणाऱ्या मुलांची संख्या कमी व्हावी आणि सरकारी शाळांमध्ये विद्यार्थ्यांच्या उपस्थितीचे प्रमाण वाढावे यासाठी देखील या योजनेचे खूप मोठे योगदान आहे.

चीफ ऑपरेटिंग ऑफिसर व चीफ फायनान्शियल ऑफिसर श्रीमती जयश्री उल्लाल यांनी सांगितले, “अल्पपोषण, लक्षात न येणारी भूक आणि स्थूलपणा हे असे महत्त्वाचे घटक आहेत जे मुले आणि वयस्कांच्या आयुष्याला, वाढीला आणि विकासाला धोकादायक ठरतात.  मुलांचे भविष्य निरोगी राहायला हवे असेल तर त्यांना लहानपणापासून आवश्यक पोषण पुरवले जाणे अत्यंत गरजेचे आहे. लोकांनी अधिक निरोगी आणि अधिक आनंदी जीवन जगावे यासाठी त्यांना सक्षम बनवण्यासाठी हिमालया नेहमीच प्रयत्नशील असते.  आरोग्य, शिक्षण आणि स्वच्छता याबाबतीत वेगवेगळ्या उपक्रमांच्या माध्यमातून सकारात्मक व दीर्घकालीन प्रभाव निर्माण करण्यासाठी आम्ही झटत असतो. २०१६ पासून अक्षय पात्र फाउंडेशनसोबत सातत्याने अधिकाधिक दृढ होत असलेल्या आमच्या भागीदारीमागचा विचार देखील हाच आहे.  मुले आनंदी राहावीत, उत्तम पोषणाच्या माध्यमातून त्यांच्या आयुष्याचा भक्कम व निरोगी पाया रचला जावा यासाठी आवश्यक साहाय्य पुरवण्याचे काम आम्ही सुरूच ठेवू.”

कृतज्ञता व्यक्त करताना द अक्षय पात्र फाउंडेशनचे सीएमओ श्री. संदीप तलवार यांनी सांगितले, “लाखो मुलांना आरोग्य आणि पोषण पुरवण्याच्या आमच्या वाटचालीत गेली अनेक वर्षे आम्हाला हिमालयाची मोलाची साथ लाभत आहे याबद्दल आम्ही त्यांचे शतशः आभारी आहोत. आरोग्यवर्धक मध्यान्ह भोजन पुरवण्याच्या सत्कृत्यामध्ये हिमालया सातत्याने साहाय्य प्रदान करत आहे याबद्दल त्यांचे आभार! भारतभरातील वंचित समुदायांमधील मुलांना पोषक जेवण पुरवण्याचे आमचे उद्दिष्ट पूर्ण करण्याच्या कामी हिमालयाचा सहयोग खूप महत्त्वाचा ठरत आहे.”

सरकारी आणि सरकारी अनुदान प्राप्त शाळांमधील मुलांना अक्षय पात्र फाउंडेशन पोषक जेवण पुरवते.  २०१६ पासून अक्षय पात्र फाउंडेशनचे कॉर्पोरेट पार्टनर म्हणून हिमालयाने आजवर सरकारी शाळांमधील ५०००० हुन जास्त मुलांना साहाय्य प्रदान केले असून गरजू शाळकरी मुलांना जवळपास ५० लाख जेवणे पुरवली गेली आहेत. याबरोबरीनेच लॉकडाऊनच्या काळात वाटप करण्यात आलेली ७१४६ “हॅप्पीनेस किट्स” किंवा सुक्या रेशनची किट्स देखील त्यांनी प्रायोजित केली होती. 

थकबाकीचा तात्काळ भरणा न केल्यास वीजपुरवठा खंडित होणार

पुणे, दि. २८ फेब्रुवारी २०२२: जिल्ह्यातील महावितरणच्या घरगुती, वाणिज्यिक, औद्योगिक, कृषी, सार्वजनिक पाणीपुरवठा योजना, पथदिवे तसेच सार्वजनिक सेवा व इतर सर्व वर्गवारीतील ९ लाख ४३ हजार ५६४ ग्राहकांच्या वीजबिलांची थकबाकी सद्यस्थितीत ३१०९ कोटींवर गेली आहे. या थकबाकीमुळे निर्माण झालेली आर्थिक कोंडी फोडण्यासाठी महावितरणकडून पुणे जिल्ह्यात वीजपुरवठा खंडित करण्याची कारवाई तीव्र करण्यात आली आहे.

वाढत्या थकबाकीच्या पार्श्वभूमिवर विजेची मागणी व पुरवठा यामध्ये महावितरणला वीजखरेदीचा आर्थिक ताळमेळ बसविण्यासाठी सध्या वीजग्राहकांच्या सहकार्याची अत्यंत आवश्यकता आहे. दरमहा वसुलीच्या सुमारे ८० ते ८५ टक्के रकमेतून वीजखरेदी केली जाते. ‘कोरोना’ची तिसरी लाट ओसरल्यामुळे जनजीवन सुरळीत आहे. सोबतच वाढत्या उन्हामुळे सर्वच वर्गवारीमध्ये वाढत्या वापराने विजेच्या मागणीत मोठी वाढ होत आहे. दुसरीकडे थकबाकी वाढतच असल्याने वीजखरेदीसाठी पैसे कुठून आणायचे हा प्रश्न महावितरणसमोर निर्माण होत असल्याने थकबाकी वसूलीला वेग देण्यात आला आहे. वीजग्राहकांनी सहकार्य करून थकीत व चालू वीजबिलांचा भरणा करावा, असे आवाहन प्रादेशिक संचालक (प्र.) श्री. अंकुश नाळे यांनी केले आहे.

पुणे जिल्ह्यात सद्यस्थितीमध्ये घरगुती ६ लाख ३० हजार ५८१ ग्राहकांकडे १३७ कोटी २७ लाख, वाणिज्यिक ८८ हजार ६६ ग्राहकांकडे ४३ कोटी ५० लाख, औद्योगिक ११ हजार ५८२ ग्राहकांकडे १८ कोटी ५६ लाख रुपये तसेच कृषी ३ लाख १२ हजार ९८३ ग्राहकांकडे २३२४ कोटी ३५ लाख आणि पथदिवे, सार्वजनिक पाणीपुरवठा योजनांकडे ५६८ कोटी १९ लाख व सार्वजनिक सेवा वर्गवारीसह सर्व ग्राहकांकडे एकूण ३१०९ कोटी ९ लाख रुपयांची थकबाकी आहे. यामध्ये कृषी ग्राहकांनी दि. ३१ मार्च २०२२ पर्यंत २३२४ कोटी ३५ लाखांपैकी ५० टक्के थकबाकीचा भरणा केल्यास त्यांना उर्वरित थकबाकी माफ करण्यात येत आहे.

महावितरणच्या महसुलाचा आर्थिक स्त्रोत प्रामुख्याने वीजबिलांची वसुली हाच आहे. वीजखरेदी, दैनंदिन देखभाल व दुरुस्ती खर्च, कर्जांचे हप्ते, कंत्राटदारांची देणी, आस्थापनांचा खर्च आदींचा सर्व खर्च वीजबिल वसुलीवरच अवलंबून आहे. त्यामुळे थकबाकीदार ग्राहकांनी वीजपुरवठा खंडित करण्याची कटू कारवाई टाळण्यासाठी थकीत व चालू वीजबिलांचा प्राधान्याने भरणा करावा असे आवाहन महावितरणकडून करण्यात आले आहे.

या मोहिमेत थकबाकीमुळे वीजपुरवठा खंडित केल्यानंतर संबंधित वीजजोडण्यांची स्वतंत्र पथकांद्वारे पडताळणी सुरु आहे. तसेच या वीजजोडण्यांची सायंकाळनंतर देखील विशेष तपासणी करण्यात येत आहे. या दोहोंमध्ये शेजाऱ्यांकडून किंवा इतर ठिकाणाहून वायर किंवा केबलद्वारे विजेचा वापर आढळल्यास शेजारी व वीज वापरणाऱ्या व्यक्तींविरुद्ध भारतीय विद्युत कायदा २००३ च्या कलम १३५/१३८ नुसार फौजदारी कारवाई करण्यात येत आहे. सोबतच थकीत बिलाची रक्कम किती आहे हे न पाहता नियमानुसार वीजपुरवठा खंडित करण्याची कारवाई सुरु आहे.

घरबसल्या वीजबिल भरण्यासाठी लघुदाब वर्गवारीतील सर्व वीजग्राहकांना www.mahadiscom.in वेबसाईट व मोबाईल अॅपद्वारे ‘ऑनलाईन’ सोय उपलब्ध आहे. लघुदाब वर्गवारीतील औद्योगिक, वाणिज्यिक व घरगुती ग्राहकांचे वीजबिल १० हजार रुपयांपेक्षा अधिक असल्यास त्यांना ‘आरटीजीएस’ किंवा ‘एनईएफटी’द्वारे थेट वीजबिल भरण्याची सोय उपलब्ध करून देण्यात आली आहे.