भाजप पुणे शहर चिटणीस सुनील माने यांच्या प्रयत्नाला यश

पुणे ता.३ : गेल्या दोन वर्षांपासून सावित्रीबाई फुले पुणे विद्यापीठातील पीएमपीएमएलची खंडीत असलेली बससेवा आजपासून पुन्हा सुरु करण्यात आली. भाजप पुणे शहर चिटणीस सुनील माने व पीएमपीएमएलचे संचालक प्रकाश ढोरे यांनी सावित्रीबाई फुले पुणे विद्यापीठ ते डेक्कन जिमखाना या बसला हिरवा झेंडा दाखवून ही बस मार्गस्थ केली.

यावेळी भाजप शिवाजीनगर मंडल सरचिटणीस आनंद छाजेड, शिवाजीनगर युवा मोर्चा सरचिटणीस रोहित भिसे, खडकी युवा मोर्चा अध्यक्ष अजित पवार, पीएमपीएमएलचे डेपो मॅनेजर नारायण कर्डे, समीर अत्तार प्लानिंग ऑफिसर चंद्रकांत वरपे, संजय शिवले, चालक ज्ञानेश्वर बाविस्कर, वाहक बाळासाहेब तिकोने,   दैनिक सकाळचे बाबा तारे,बातमी डॉट इनचे राजेश माने, सोनाली निकाळजे, वर्षा शिंदे, नंदा खंडागळे, मीरा काकडे, सोनाली तुंडलायत, आशा लोट, स्वीटी दुसाने, लीना पगारे, कल्पना देवरे, मीरा काकडे, बाबुराव बावधाने, सुरेश काशीद,नंदू वाडिया, ऋषिकेश करोते, संदीप बोत्रे, महेंद्र उर्फ बंडू कदम, बुद्धभूषण मंडळाचे उपाध्यक्ष शशिकांत भालेराव, अरुण बागडी, संदीप चौरे, नितीन गायकवाड (एच.एम.), संतोष भिसे, रोहित लोखंडे, हिमांशू मुथय्या, ऋषभ काळे, सिद्धांत जगताप, सुनील कांबळे,राहुल कांबळे,संकेत कांबळे, अनिल माने, प्रतिक वाघमारे, आदि उपस्थित होते.

यावेळी बोलताना सुनील माने म्हणाले, भारतीय जनता पक्षाचा प्रत्येक कार्यकर्ता लोकांच्या समस्या जाणून घेऊन त्या सोडवण्यासाठी प्रयत्न करत असतो. सावित्रीबाई फुले पुणे विद्यापीठातील पीएमपीएमएलची बससेवा गेल्या दोनवर्षांपासून खंडीत करण्यात आली होती. विद्यापीठातील बस सेवा बंद असल्याने विद्यार्थ्यांना अथवा स्थानिक महिलांना शहरात जाण्यासाठी जवळपास तीन किलोमीटर पायी प्रवास करावा लागत होता. पुणे शहराचा महत्वाचा भाग असूनही येथे वाहतुकीची समस्या असल्याने याबाबत मी पीएमपीएमएलचे अध्यक्ष लक्ष्मीनारायण मिश्रा व पीएमएलचे संचालक प्रकाश ढोरे यांना पत्र देऊन ही बस सेवा तातडीने सुरु करण्याविषयी विनंती केली होती. यानुसार आज पासून बससेवा सुरु करण्यात आली.

प्रकाश ढोरे म्हणाले, भारतीय जनता पक्षाच्या माध्यमातून अनेक लोकपयोगी कामे आम्ही सातत्याने करत असतो. या पूर्वी औंध रोड, बोपोडी भागात अनेक विकास कामे केली आहेत. सावित्रीबाई फुले पुणे विद्यापीठामध्ये बस सेवा पूर्ववत सुरु करणे ही सुरुवात असून येणाऱ्या काळात अनेक विकास कामे आम्हाला या भागात करायची आहेत. ही बससेवा पूर्ववत सुरु झाल्याने येथील महिला व विद्यार्थ्यांची गैरसोय कमी होईल.

सावित्रीबाई फुले पुणे विद्यापीठामध्ये अनेक समस्या आहेत मात्र ते जाणून घेण्यासाठी आजवर आमच्या पर्यंत कोणी आले नव्हते. पहिल्यांदाच भारतीय जनता पार्टीच्या माध्यमातून या भागातील समस्या सोडवण्यासाठी नगरसेवक प्रकाश ढोरे व सुनील माने यांनी पुढाकार घेतला आहे. असे मत या भागातील महिलांनी व्यक्त केले. 

कीर्तनभूषण ह.भ.प. पूजा देशमुख ; श्रीरामजी संस्थान तुळशीबागतर्फे भागवत एकादशीनिमित्त कीर्तन
पुणे : समर्थ रामदास स्वामींनी आदर्श जीवनपद्धती सांगितली आहे. दासबोधात याबाबत सुरेख मार्गदर्शन देखील करण्यात आले आहे. माणसाच्या प्रत्येक प्रश्नाचे उत्तर दासबोधात मिळते. मनाच्या श्लोकांतून समर्थांनी मनाला बोध दिला आहे. असे संतांचे वाड्.मय फक्त पाठांतराकरीता नसून आचरणाकरीता आहे. ख-या अर्थाने जीवनात सकारात्मकता आणणारे संतांचे वाड्.मय आहे, असे मत ह.भ.प. पूजा देशमुख यांनी व्यक्त केले. 
श्रीरामजी संस्थान तुळशीबाग च्यावतीने तुळशीबाग राम मंदिरात भागवत एकादशीनिमित्त कीर्तनाचे आयोजन करण्यात आले. यावेळी संस्थानचे कार्यकारी विश्वस्त रामदास तुळशीबागवाले, भरत तुळशीबागवाले, राघवेंद्र तुळशीबागवाले, श्रीपाद तुळशीबागवाले, शिशिर तुळशीबागवाले, कोटेश्वर तुळशीबागवाले यांसह तुळशीबागवाले परिवार उपस्थित होता. 
ह.भ.प.पूजा देशमुख म्हणाल्या, हरिभक्ती आचरताना कोण काय म्हणेल, याचा विचार भक्त करीत नाहीत. हरिभक्तीत जे आपले आयुष्य सार्थकी लावतात, तेच जीव धन्यता मिळवितात. संतांच्या अनेक गोष्टी, विचार, साहित्याकडे दुर्लक्ष होत असून संतांचे वाड्.मय हीच आपली खरी संपत्ती आहे. परमार्थिक वृत्ती घडविण्याचे काम हरिभक्ती करते. 
त्या पुढे म्हणाल्या, गरीबाची झोप ही ख-या अर्थाने श्रीमंत असते. मात्र, श्रीमंताला अनेक चितांमुळे झोप येत नाही. मनाचा संतोष हा हरिभक्तीमध्ये असतो. मनाचा संतोष हे आपले भाग्य, धन आणि परमेश्वर आहे. त्यामुळे जीवनात धन्यता मिळण्यास हरिभक्तीशिवाय पर्याय नाही, असेही त्यांनी सांगितले.

पुणे : पूना क्लबच्या वतीने पूना क्लब प्रीमियर लीग क्रिकेट स्पर्धेचे आयोजन करण्यात आले आहे. ही स्पर्धा पूना क्लब येथे दिनांक ७ ते १२ मार्च दरम्यान होणार आहे. जेट सिंथेसिस, देसाई ब्रदर्स, फिनलॅंड इंटरनॅशनल स्कूल हे स्पर्धेचे मुख्य प्रायोजक तर ब्रिहन नॅचरल प्राॅडक्टस हे सहयोगी प्रायोजक आहेत. अशी माहिती स्पर्धा समितीचे अध्यक्ष शशांक हळबे  यांनी दिली. 
स्पर्धेचे यंदा ८ वे वर्ष आहे. क्लबमधील खेळाडूंना प्रोत्साहन देण्यासाठी ही स्पर्धा आयोजित केली जाते. स्पर्धेचे उद्घाटन सोमवार, दिनांक ७ मार्च  रोजी सायंकाळी ४ वाजता होणार असून यावेळी  पूना क्लबचे अध्यक्ष नितीन देसाई, उपाध्यक्ष सुनील हांडा, अमेय कुलकर्णी, मुख्य प्रायोजक राकेश नवाणी, तारीक पारवानी, उमेश पिल्लई,रणजित पांडे उपस्थित राहणार आहेत. 
स्पर्धेत क्लबमधील १२ ते ५५ वयोगटातील सदस्य सहभागी होणार आहे. या खेळाडूंची लिलावाद्वारे विभागणी करण्यात आली आहे. अर्जून मोटाडू या खेळाडूला लिलावात सर्वाधिक बोली लागली. त्याला टायगर्स संघाने ७  हजार ८०० रुपये बोली लावून संघात घेतले. 
शशांक हळबे म्हणाले, प्रत्येक संघात १२ ते १४ खेळाडू असणार आहेत. यातील ९ खेळाडू मैदानात असतील. ही स्पर्धा साखळी आणि बाद फेरी स्वरुपात होणार आहे. प्रत्येक सामना ६ षटकांचा असणार आहे. स्पर्धेत दहा संघ सहभागी होणार असून, या संघांची दोन गटांत विभागणी करण्यात आली आहे. या दोन गटांतून चार संघ उपांत्य फेरीत दाखल होतील आणि त्यानंतर अंतिम सामना १२ मार्चला खेळला जाणार आहे. 
स्पर्धेतील विजेत्या संघाला ट्रॉफी देऊन गौरविण्यात येणार आहे. त्याचबरोबर स्पर्धेतील सर्वोत्तम खेळाडू, सर्वोत्तम यष्टिरक्षक, सर्वोत्तम फलंदाज, सर्वोत्तम गोलंदाज यांनाही वैयक्तिक पारितोषिके देण्यात येणार आहे. आॅल स्टार्स, जॅग्वार्स, जेटस्, किंग्ज, माॅव्हरिक, सेलर्स, टायगर्स, टायफून्स, वेलकिन ईगल्स, वाॅरियर्स हे संघ स्पर्धेत सहभागी झाले आहेत. 

डॉ. राजीव श्रीवास्तव यांचे मत, डॉ. विश्‍वनाथ कराड यांना डब्ल्यू.बी.आर.ने दिले प्रमाणपत्र

पुणे, दि.२ मार्च: “एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्‍वनाथ दा. कराड यांनी संकल्पना, डिझाईन, नियोजन करून तत्वज्ञ संत श्री ज्ञानेश्‍वर-तुकाराम महाराज विश्‍वशांती घुमट या अद्वितीय अशा वास्तूशिल्पाची निर्मिती ही राजबाग, लोणीकाळभोर, पुणे, महाराष्ट्र येथे केली आहे. या घुमटाचा व्यास १६० फूट व उंची २६३ फूट आहे. आणि २४ पिलर्स आहेत. याची आम्ही सर्व प्रकारे पहाणी केली. आमच्या असे लक्षात आले की, हा घुमट जगातील सर्वात मोठा विश्‍व शांतीचा घुमट आहे. म्हणूनच वर्ल्ड बुक ऑफ रेकार्डसतर्फे हे प्रमाणपत्र दिले आहे.” असे उद्गार लंंडन येथील वर्ल्ड बुक ऑफ रेकॉर्डसचे उपाध्यक्ष डॉ. राजीव श्रीवास्तव यांनी काढले. एमआयटी वर्ल्ड पीस युुनिव्हर्सिटीतर्फे कोथरुड येथील संत श्री ज्ञानेश्‍वर सभागृहात  आयोजित पत्रकार परिषदेत ते बोलत होते.
यावेळी लंंडन येथील वर्ल्ड बुक ऑफ रेकॉर्डसचे उपाध्यक्ष डॉ. राजीव श्रीवास्तव, डब्ल्यू.बी.आर.महाराष्ट्राचे उपाध्यक्ष मेहबूब चांदभाई सय्यद यांनी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्‍वनाथ दा. कराड यांचा प्रमाणपत्र देऊन गौरव करण्यात आला.
याप्रसंगी डॉ. विजय दास, संस्कृतचे गाढे अभ्यासक पं.वसंतराव गाडगीळ, डब्ल्यूपीयूचे कुलगुरू डॉ. आर.एम.चिटणीस, प्र कुलगुरू डॉ. मिलिंद पांडे, विश्‍वशांती केंद्र(आळंदी)चे सल्लागार व माजी कुलगुरू डॉ. एस.एम.पठाण, डब्ल्यूपीयूचे सल्लागार डॉ. संजय उपाध्ये आणि डॉ. मिलिंद पात्रे उपस्थित होते.
डॉ. राजीव श्रीवास्तव म्हणाले,“आमची संस्था जगातील अशा काही घटनांचा शोध घेऊन त्याची पहाणी करते आणि त्यानंतर त्यांना संस्थेतर्फे प्रमाणपत्र देते. त्यातच डॉ. विश्‍वनाथ कराड यांनी उभा केलेला जगातील सर्वात मोठा विश्‍वशांती घुमट हा जगातील संपूर्ण मानवजातीला विश्‍वशांती आणि मानवकल्याणाचा संदेश देईल. ३ हजार लोक बसतील असे विश्‍वशांती प्रार्थना सभागृह आहे. ६२ हजार ५०० स्केअर फूट असलेले विश्‍वशांती ग्रंथालय आहे. म्हणून हा घुमट अद्वितीय असा आहे. या सर्व गोष्टींचा अंतर्भाव असल्यामुळे आम्ही त्यांना हे प्रमाणपत्र देऊन गौरव करीत आहोत.”
डॉ. विश्‍वनाथ कराड म्हणाले,“या अद्वितीय घुमटातून जागतिक दर्जाची तत्वे समोर येणार आहेत. एकीकडे रशिया आणि युक्रेनची लढाई सुरू असतांना विश्‍वशांतीसाठी कार्य करणार्‍या या डोमला असा बहुमान मिळणे हे अभिनंदनीय आहे. आता संपूर्ण जगाला भारतच सुख, समाधान आणि शांतीचा मार्ग दाखवेल.”
डॉ. एस.एन.पठाण म्हणाले, “१२ वर्षांच्या अथक प्रयत्नांमुळे डॉ. कराड यांनी विश्‍वशांती घुमटाची निर्मिती केली आहे. जगातील सर्वात मोठा हा घुमट असला तरी यातून दिला जाणारा संदेश संपूर्ण जगात शांतीसाठी कार्यरत असेल.”
डॉ. विजयकुमार दास म्हणाले,“शिक्षण क्षेत्रात कार्य करीत असतांना डॉ. कराड  शांती, मानवता धर्म आणि सहिष्णूतेसाठी जे कार्य करीत आहेत ते अलौकिक आहे.”
डॉ. संजय उपाध्ये म्हणाले, “जगामध्ये शांतता प्रस्थापित करण्यासाठी खूप लोकांनी कार्य केले आहे. परंतू डॉ. कराड यांनी संत ज्ञानेश्‍वर व तुकाराम महाराज यांच्या नावाने उभारण्यात आलेल्या घुमटाच्या माध्यमातून शांतीसाठी कार्य सुरू केले आहे. आजच्या काळात सर्वात महत्वाचे आहे.”
प्रा.डॉ. मिलिंद पांडे यांनी सूत्रसंचालन केले. डॉ. मिलिंद पात्रे यांनी आभार मानले.

पुणे : संशोधनाची सुरुवात पाश्चात्य गोष्टींवर होते, ते आपल्याकडील गोष्टींवर देखील व्हायला हवे. पाश्चात्य विज्ञान कमी नाही, मात्र आपल्या ज्ञानपरंपरा देखील मोठया आहेत. भारतात 14 विद्या आणि 64 कला आहेत, असे आपण म्हणतो. त्यामुळे भारतीय ज्ञानपरंपरेची ओळख प्रत्येकाला होणे गरजेचे आहे. त्यामुळे कुलगुरु आणि गुरुकुल पद्धतीतील जे चांगले आहे, त्यावर आधारित भारताचे शैक्षणिक मॉडेल तयार व्हावे, असे मत राष्ट्रीय मूल्यांकन आणि अधिस्वीकृती परिषदेचे (नॅक) नवनिर्वाचित अध्यक्ष डॉ.भूषण पटवर्धन यांनी व्यक्त केले.  
सांस्कृतिक मंत्रालय भारत सरकार, मुख्य वैज्ञानिक सल्लागार समिती भारत सरकार यांचे कार्यालय आणि विज्ञान प्रसार यांच्या संयुक्त विद्यमाने विज्ञान सर्वत्र पूज्यते या विज्ञान प्रसार महोत्सवाचे आयोजन शिक्षण प्रसारक मंडळीचे सर परशुरामभाऊ महाविद्यालय येथे करण्यात आले होते. भारतीय स्वातंत्र्याच्या अमृतमहोत्सवानिमित्त हा महोत्सव आयोजित करण्यात आला असून त्याचा समारोप लेडी रमाबाई हॉलमध्ये सोमवारी झाला. यावेळी शि.प्र.मंडळीचे अध्यक्ष अ‍ॅड.सदानंद फडके, शि.प्र.मंडळी नियामक मंडळाचे अध्यक्ष अ‍ॅड.एस.के.जैन, उपाध्यक्ष श्रीकृष्ण चितळे, सचिव राधिका इनामदार, विज्ञान भारतीचे जयंत सहस्त्रबुद्धे आदी व्यासपीठावर उपस्थित होते. कै.प्राचार्य बी.व्ही.भिडे फाऊंडेशनतर्फे प्रा.डॉ.प्रशांत दुराफे आणि डॉ. गौरी साठे यांच्या क्रोनो बायोलॉजी या पुस्तकाचे प्रकाशन यावेळी झाले. तसेच महोत्सवातील विजेत्यांना पारितोषिके देखील देण्यात आली. 
शि.प्र. मंडळीच्या नियामक मंडळाचे सदस्य अ‍ॅड. मिहीर प्रभुदेसाई, राजेंद्र पटवर्धन, पराग ठाकूर, प्राचार्य डॉ.सविता दातार, विज्ञान भारतीच्या मानसी मालेगावकर, विज्ञानमंडळ प्रमुख डॉ.संदीप काकडे, समन्वयक डॉ.गीतांजली फाटक, डॉ.सुचेता गायकवाड, मंदार उपासनी आणि सर्व प्राध्यापकांनी महोत्सवाचे नियोजन केले होते.
डॉ.भूषण पटवर्धन म्हणाले, आपल्या मनावर, मेंदूवर वेळोवेळी प्रहार होत गेले आहेत. पाश्चात्यांकडून येते, तेच विज्ञान असा विशिष्ट विचारधारेचे प्रभाव आपण आजपर्यंत मानत आलो आहोत. आपल्याकडील ज्ञान कमी दर्जाचे नसून भारतीय विचारांची मोठी परंपरा आपल्याकडे आहे. आंतरराष्ट्रीय पातळीवर देखील त्याकडे काणाडोळा झाला आहे. भारतीय ज्ञानपरंपरेबद्दल विकिपिडायावर देखील उल्लेख नाही. 
ते पुढे म्हणाले, संस्कृती नष्ट करीत भाषेवर हल्ला चढविण्याची ब्रिटिशांची पद्धती होती. त्याला हद्द््पार करण्याची प्रक्रिया सुरु झाली आहे. आत्मसन्मान पुन्हा मिळविण्याचे प्रयत्न देखील आता सुरु आहेत. आयुर्वेद आणि योग याकडे आपण गांभीर्याने पहात नाही. कोविडने आपल्याला धडा दिला आहे की उपचारापेक्षा प्रतिबंधात्मक उपाययोजना गरजेच्या आहेत. त्यामुळे त्याचा अवलंब आपण करायला हवा. 
अ‍ॅड.सदानंद फडके म्हणाले, ब्रिटिशांचे आपल्यावरील गारुड बाजूला काढून आपल्याला सद््विचार जगभरात पोहोचवायचा आहे. ब्रिटिशांनी सांगितलेल्या गोष्टी आपल्या पूर्वजांनी हजारो वर्षांपूर्वी सांगितलेल्या आहेत. आपले संशोधन व शोध कितीही चांगला असला, तरी देखील पाश्चात्य चष्म्यातून असल्याशिवाय त्याला मान्यता नाही. त्यामुळे आपले विसरलेले तत्वज्ञान आपण पुन्हा एकदा विज्ञानाने प्रज्वलित करुया. 
महोत्सवात ७५ शास्त्रज्ञ आणि ७५ वैज्ञानिक शोध यांची भित्तिचित्रे बघण्यासाठी उपलब्ध होती. तसेच डीआरडीओ यांच्यातर्फे भित्तिचित्रे आणि मॉडेल्स देखील प्रदर्शित करण्यात आली. विज्ञान महोत्सवात विज्ञान व्याख्याने, विज्ञान प्रदर्शन, विज्ञान चित्रपट महोत्सव, विज्ञान पुस्तक मेळा, विज्ञान साहित्य उत्सव, वैज्ञानिक रांगोळी, वक्तृत्व स्पर्धा, विज्ञानामृत प्रश्नमंजुषा अशा नाविन्यपूर्ण कार्यक्रमांचा समावेश होता. अ‍ॅड.मिहिर प्रभुदेसाई यांनी प्रास्ताविक केले.  

रामदास आठवले यांची पत्रकार परिषदेत मागणी; ‘छत्रपती शिवाजी महाराज स्वयंभू राजे’

पुणे : “आगामी महापालिका निवडणुकीत भारतीय जनता पार्टी आणि रिपब्लिकन पार्टी ऑफ इंडिया यांची युती होणार असून, आम्हाला २५ जागा द्याव्यात, अशी आमची मागणी आहे. तसेच सत्ता आली आणि अनुसूचित जातीचे आरक्षण पडले, तर ‘रिपाइं’ला महापौर पद देण्याची मागणी करणार आहे,” असा पुनरुच्चार रिपब्लिकन पक्षाचे राष्ट्रीय अध्यक्ष आणि केंद्रीय सामाजिक न्याय राज्यमंत्री रामदास आठवले यांनी मंगळवारी पत्रकार परिषदेत केला.नवीन विश्रामगृहात झालेल्या पत्रकार परिषदेवेळी ‘रिपाइं’चे शहराध्यक्ष शैलेंद्र चव्हाण, प्रदेश सचिव बाळासाहेब जानराव, उपमहापौर सुनीता वाडेकर, माजी उपमहापौर डॉ. सिद्धार्थ धेंडे, पश्चिम महाराष्ट्र युवक आघाडीचे अध्यक्ष परशुराम वाडेकर, राष्ट्रीय निमंत्रक ऍड. मंदार जोशी, नगरसेविका हिमाली कांबळे, असित गांगुर्डे, अल्पसंख्याक आघाडीचे ऍड. आयुब शेख, महिला आघाडीच्या संगीता आठवले, कार्याध्यक्ष बसवराज गायकवाड, संजय सोनवणे, सरचिटणीस महिपाल वाघमारे, शाम सदाफुले आदी उपस्थित होते.

‘…म्हणून परेशान युक्रेन-रशिया-युक्रेन युद्धावर भाष्य करताना आठवले यांनी चारोळी करत ‘पुतीन यांचा बिघडला आहे ब्रेन, म्हणून परेशान आहे युक्रेन’ अशी टिपण्णी केली. त्याचबरोबर केंद्र सरकार युक्रेनमध्ये अडकलेल्या भारतीयांच्या सुटकेसाठी सर्वतोपरी प्रयत्न करत आहे. काँग्रेस नेते राहुल गांधी यांनी केवळ टीका करू नये. सरकारला सूचना जरूर कराव्यात. एका भारतीय विद्यार्थ्याचा युक्रेनमध्ये मृत्यू झाला, ही दुःखद बाब आहे, असे आठवले यांनी नमूद केले.

शिवाजी महाराज स्वयंभू राजे-
छत्रपती शिवाजी महाराजांचे गुरु कोण होते, यावरून विनाकारण वाद घालण्यात येत आहे. छत्रपती शिवाजी महाराज हे स्वयंभू राजे होते. शौर्य आणि धैर्याचे महामेरू होते. रामदास स्वामी हे शिवाजी महाराजांचे गुरू नव्हते, तर राजमाता जिजाऊ या महाराजांच्या गुरू होत्या. महाराष्ट्राचे राज्यपाल भगतसिंह कोश्यारी यांनी छत्रपती शिवाजी महाराजांबद्दल केलेल्या वक्तव्याबाबत राज्यपालांना भेटून माझे मत सांगणार आहे. समर्थ रामदास स्वामी त्यांच्या जागी श्रेष्ठ असले, तरी छत्रपती शिवाजी महाराजांना कोणत्याही गुरूची आवश्यकता नव्हती. संपूर्ण देशात छत्रपती शिवाजी महाराजांना आदर्श मानले जात असल्याचे आठवले यांनी स्पष्ट केले.

ठाकरे काँग्रेस-राष्ट्रवादीच्या चक्रव्यूहात-रामदास आठवले म्हणाले, “केंद्रीय तपास यंत्रणांचा वापर करून भाजप महाविकास आघाडी सरकार पडण्याचा प्रयत्न करतेय, यात तथ्य नाही. या यंत्रणा त्यांचे काम करत आहेत. मुख्यमंत्री उद्धव ठाकरे काँग्रेस आणि राष्ट्रवादीच्या चक्रव्यूहात अडकले आहेत. अजूनही वेळ गेलेली नाही. ठाकरे यांनी महाविकास आघाडी सरकारमधून बाहेर पडत भाजपसोबत यावे आणि युतीचे सरकार स्थापन करावे. ठाकरे यांच्याशी माझे चांगले संबंध असून, याबाबत त्यांच्याशी बोलणार आहे.”
पाचही राज्यात भाजपाची सत्ता-“देशात होत असलेल्या पाचही राज्यांच्या निवडणुकांमध्ये भाजपची सत्ता येईल. उत्तरप्रदेश, पंजाब, गोवा, मणिपूर आणि उत्तराखंड या राज्यातील जनता पंतप्रधान नरेंद्र मोदी आणि भाजपच्या कामावर समाधानी असून, या निवडणुकीत भाजपाला मोठे यश मिळेल. सर्व अनुसूचित जाती-जमातीमधील लोकांसाठी मोदींनी घेतलेले निर्णय, आणलेल्या योजना यामुळे त्यांचा फायदा होत आहे. भाजप प्रणित एनडीएला निर्भेळ यश मिळणार आहे,” असे आठवले यांनी नमूद केले.

देशो,देशीच्या सीमा पुसू देत ,हे विश्व मानवाचे घर राहू देत….

पुणे- काँग्रेस पार्टी आणि राष्ट्रवादी पार्टी च्या महिलांनी खडकी येथील शिवमंदिरात युद्ध थांबून जगात शांतता स्थापित व्हावी, आणि आमचे सर्व भारतीय विद्यार्थी सुखरूप परत यावे म्हणून श्री भोलेनाथ भगवान यांना साकडे घातले.युक्रेन येथे अडकलेल्या हजारो भारतीय विद्यार्थ्यांन च्या सुटके साठी आणि सुखरूप भारतात परत येण्यासाठी आज महाशिवरात्री च्या दिवशी महामृत्युंजय मंत्रा च्या जाप करण्यात आला ह्या प्रसंगी शिवमंदिरात वायुदल, स्थलदल, नौदल चे माजी अधिकारी ही उपस्थित होते, ह्या वेळी महाराष्ट्र प्रदेश महिला काँग्रेस उपाध्यक्ष संगीता तिवारी. राष्ट्रवादी च्या नेत्या रुपाली पाटील ठोंबरे, पुणे शहर महिला काँग्रेस अध्यक्ष पूजा आनंद ,शोभना पणीकर , आरती साठे, सुनीता नेमुर्, कांता ढोणे, शुभांगी वखारे, सुंदरा ओव्हाळ, चिमटे, ज्योती परदेशी आदी महिला कार्यकर्त्यांनी शिवपूजा केली.