पुणे, दि. ०४ मे २०२२: ‘गेल्या दोन वर्षांपासून कोरोनाचा काळ व दोन्ही चक्रीवादळाच्या नैसर्गिक आपत्तीमध्ये महावितरणचे अभियंते व कर्मचारी हे सुरळीत वीजपुरवठा तसेच ग्राहकसेवेसाठी अत्यंत खडतर व आव्हानात्मक परिस्थितीत कर्तव्य बजावीत आहेत व त्यांचे कार्य अभिमानास्पद आहे’, असे गौरवोद्गार पुणे परिमंडलाचे मुख्य अभियंता श्री. सचिन तालेवार यांनी उत्कृष्ट कर्मचाऱ्यांचा सन्मान करताना काढले.

सन २०२१-२२ मध्ये उत्कृष्ट ग्राहकसेवा, सुरळीत वीजपुरवठा, वीजवाहिन्या व उपकेंद्रांची विनाअपघात तांत्रिक देखभाल व दुरुस्ती करणाऱ्या पुणे परिमंडलमधील उत्कृष्ट १३ यंत्रचालक व ४४ तांत्रिक कर्मचाऱ्यांना महाराष्ट्र दिन व कामगार दिनानिमित्त स्मृतिचिन्ह व प्रशस्तीपत्र देऊन गौरविण्यात आले. रास्तापेठ येथील प्रशासकीय इमारतीच्या प्रांगणात मुख्य अभियंता श्री. सचिन तालेवार यांच्याहस्ते ध्वजारोहण करण्यात आले. यावेळी अधीक्षक अभियंता सर्वश्री प्रकाश राऊत, सतीश राजदीप, सहाय्यक महाव्यवस्थापक सौ. माधुरी राऊत (वित्त व लेखा) व ज्ञानदा निलेकर (मानव संसाधन), उपमुख्य औद्योगिक संबंध अधिकारी श्री. शिरीष काटकर, कार्यकारी अभियंता श्री. भागवत थेटे, श्री. विजेंद्र मुळे यांची उपस्थिती होती. पाहुण्यांच्या हस्ते प्रशस्तीपत्र व स्मृतिचिन्ह देऊन उत्कृष्ट ५७ जनमित्रांना गौरविण्यात आले.

पुणे परिमंडलातील उत्कृष्ट तांत्रिक कर्मचारी पुढीलप्रमाणे – गोपीनाथ शेळके, अनिल येवले, दत्तात्रय चव्हाण, मुरलीधर मुठे (बंडगार्डन विभाग), स्वप्निल जगदाळे, सतीश उंडे, एकनाथ साबळे, दिलीप चव्हाण (नगररोड विभाग), तानाजी शेंडकर, किशोर मस्के, उमेश मिसाळ, गणेश बिडवे, (पद्मावती विभाग), पंडित शिंदे, सत्यवान दराडे, सोनाली विश्वकर्मा, चेतन जाधव (पर्वती विभाग), इरफान मोहम्मद, अजित हांडे, सोमिनाथ कळम, विजय भोसले, राहुल आरुडे (रास्तापेठ विभाग), सुभाष जुंबळे, सिद्धांत गणोरकर, ज्ञानेश्वर मते, कृष्णा आरुडे (भोसरी विभाग), शिल्पा जाधव, अंकुश खुडे, श्रीनिवास दौंड, एकनाथ भाकडे (कोथरूड विभाग), अमीर देवर्षी, राहुल चव्हाण, सुरेश पाटोरकर, बद्रिनाथ जाधव (पिंपरी विभाग), अनिल फाळके, सुनील शेळके, सुदर्शन मुंडे, सिद्धेश घुले, (शिवाजीनगर विभाग), सोमनाथ चव्हाण (गणेशखिंड चाचणी), बंडू नांगरे, अमित महाजन, बाळकू कवटे, राजेश आव्हाड, शिवाजी वाघमारे, शिवाजी लोहकरे (मंचर विभाग), उमेश खोमणे, कैलास सरोगदे, सचिन जावळकर, राजेंद्र खरात, संपत चौधरी (मुळशी विभाग), सोमनाथ जंगले, अमृता चौधरी, अवधुत गिरी, रामकृष्ण मांजरे, दिनेश आगळमे, संभाजी येवले, महेश दरेकर (राजगुरुनगर विभाग)

पुणे, दि. ०४ मे २०२२: गेल्या आर्थिक वर्षात कोरोनाच्या दुसऱ्या लाटेचा प्रादुर्भाव ओसरताच नवीन वीजजोडण्या कार्यान्वित करण्यास महावितरणने पुणे परिमंडलात मोठा वेग दिला. त्याची फलश्रृती म्हणून सन २०२१-२२ या वर्षामध्ये पुणे परिमंडलामध्ये तब्बल १ लाख ८३ हजार ७८३ नवीन वीजजोडण्या कार्यान्वित करण्यात आल्या आहेत. विशेष म्हणजे यामध्ये १ लाख ५२ हजार ७५३ घरगूती वीजजोडण्यांचा समावेश आहे.

कोरोनाच्या पहिल्या लाटेमुळे सन २०२०-२१ मध्ये कठोर लॉकडाऊन होता. तरीही महावितरणच्या जिगरबाज अभियंता व कर्मचाऱ्यांनी सुरळीत वीजपुरवठ्याची सेवा दिली होती. मात्र नवीन वीजजोडण्या देण्यासाठी मर्यादा आल्या होत्या. पहिल्या लाटेचा जोर ओसरताच नोव्हेंबर २०२० नंतर नवीन वीजजोडण्या देण्यास गती देण्यात आली व मार्च २०२१ अखेर १ लाख ९ हजार १९ नवीन वीजजोडण्या कार्यान्वित केल्या. त्यानंतरच्या आर्थिक वर्षात एप्रिल ते जून २०२१ पर्यंत कोरोनाच्या दुसऱ्या लाटेचा कहर सुरु असल्याने नवीन वीजजोडण्या देण्याचा वेग मंदावला होता. मात्र मार्च २०२२ पर्यंत महावितरणच्या पुणे परिमंडलाने धडक कामगिरी करीत तब्बल १ लाख ८३ हजार ७८३ नवीन वीजजोडण्या कार्यान्वित केल्या आहेत.  

कार्यान्वित झालेल्या नवीन वीजजोडण्यांमध्ये १ लाख ५२ हजार ७५३ घरगुती, २१ हजार ३५ वाणिज्यिक, ३२७१ औद्योगिक, ५०६९ कृषी व १६५५ इतर वीजजोडण्यांचा समावेश आहे. पुणे शहरामध्ये घरगुती- ६६ हजार ८३७, वाणिज्यिक- ९६८८, औद्योगिक- ७७१, कृषी- ६१ व इतर ४६२ अशा एकूण ७७ हजार ८१९ नवीन वीजजोडण्या देण्यात आल्या आहेत. तर पिंपरी चिंचवड शहरामध्ये घरगुती- ३७ हजार ६०८, वाणिज्यिक- ५१५६, औद्योगिक- ९९८, कृषी- १३२ व इतर ४९२ अशा एकूण ४४ हजार ३८६ वीजजोडण्या तसेच मुळशी, वेल्हे, मावळ, खेड, आंबेगाव, जुन्नर तालुक्यांसह हवेली ग्रामीणमध्ये घरगुती- ४८ हजार ३०८, वाणिज्यिक- ६१९१, औद्योगिक- १५०२, कृषी- ४८७६ व इतर ७०१ अशा एकूण ६१ हजार ५७८ नवीन वीजजोडण्या देण्यात आल्या आहेत.

पुणे परिमंडलातील अभियंते व कर्मचाऱ्यांनी २०२१ मधील कोरोनाच्या दुसऱ्या लाटेमध्ये केवळ १२ ते २४ तासांमध्ये कोविड रुग्णालये, विलगीकरण कक्ष, ऑक्सीजन निर्मिती उद्योग व लसीकरण केद्रांना नवीन वीजजोडणी किंवा वाढीव वीजभार देण्यासाठी युद्धपातळीवर कर्तव्य बजावले आहे. सोबतच वीजग्राहकांना सेवा देत तब्बल १ लाख ८३ हजारांवर नवीन वीजजोडण्या देण्याची कामगिरी देखील बजावली आहे.

पुणे -महानगरपालिकेच्या निवडणुकीचे बिगुल आता वाजले असून आम आदमी पक्ष महानगरपालिकेच्या निवडणुकीमध्ये सर्व जागा लढविण्यासाठी सज्ज झाला आहे. असे राज्य प्रवक्ते डॉ अभिजित मोरे यांनी म्हटले आहे . पंजाब विधानसभेतील दणदणीत विजयानंतर आम आदमी पक्षाच्या कार्यकर्त्यांचे मनोबल उंचावले आहे. सर्वसामान्य पुणेकरांकडून विकासाच्या दिल्ली मॉडेलला आणि प्रामाणिक राजकारणाच्या आवाहनाला अतिशय सकारात्मक प्रतिसाद भेटत आहे.असेही त्यांनी सांगितले.

मोरे म्हणाले कि,’गेल्या काही महिन्यांपासून आम आदमी पक्ष प्रभाग पातळीवर कोपरा सभा, गृहभेटी, तिरंगा यात्रा या माध्यमातून जनसंपर्क वाढवण्याचे काम करत आहे. निवडणूक मेळावे आणि सदस्य नोंदणी अभियानाच्या माध्यमातून संघटन वाढवण्याचे काम करत आहे. पुणे मनपा पातळीवरील सर्वसामान्यांचे जिव्हाळ्याचे अनेक मुद्दे आम आदमी पक्षाने मांडले आहेत. पालिकेतील भ्रष्टाचाराची अनेक प्रकरणे उघडकीस आणली आहेत. जनसामान्यांच्या प्रश्नावर आंदोलने केली आहेत.

येत्या महानगरपालिका निवडणुकीमध्ये विकासाचे दिल्ली मॉडेल सर्वसामान्य लोकांपर्यंत पोहोचवून “संधी द्या, सुविधा घ्या” हा नारा देत लोकांना साद घालण्याचे आम आदमी पक्षाने ठरविले आहे.

पुणे, दि.4 ( जिमाका ) : कोविडने निधन झालेल्या व्यक्तींच्या कुटूंबाला 50 हजार रुपयांची मदत शासनाने जाहीर केली आहे. याबरोबरच महिला व बाल विकास विभाग व महिला आर्थिक विकास महामंडळाच्या योजनांचा लाभ देऊन अशा एकल महिलांच्या पुनर्वसनाला प्राधान्य द्या. तसेच कोविड रुग्णांना जादा बिले आकारणाऱ्या रुणालयांवर कारवाई करा, असे निर्देश विधान परिषदेच्या उपसभापती डॉ. नीलम गोऱ्हे यांनी आज येथे दिले.
पुणे येथील विधान भवनात आयोजित उस्मानाबाद जिल्ह्याच्या कोविड आढावा बैठकीत त्या बोलत होत्या. यावेळी कृषी, महसूल, पशुसंवर्धन, वनीकरण विभागाचा आढावा घेण्यात आला. यावेळी खासदार ओमप्रकाश राजेनिंबाळकर (दूरदृश्यप्रणालीद्वारे), उस्मानाबादचे जिल्हाधिकारी कौस्तुभ दिवेगावकर, मुख्य कार्यकारी अधिकारी राहूल गुप्ता, महिला आर्थिक विकास महामंडळाच्या अध्यक्ष ज्योती ठाकरे उपस्थित होत्या.
उपसभापती डॉ. गोऱ्हे म्हणाल्या, उस्मानाबाद जिल्ह्यामध्ये भूकंप पुनर्वसनाचा एक मोठा अनुभव पाठीशी आहे. कोविड विधवांच्या विकासासाठी शाश्वत विकास उद्दिष्टांवर आधारित प्रकल्प तयार करावा. एकल शेतकरी विधवा महिलांना प्राधान्याने बी -बियाणे , खते उपलब्ध करून द्यावीत. जिल्हा स्तरावर एकल महिला समिती स्थापन करून विविध शासकीय महामंडळे आणि माविम उमेद महिलांविषयक काम करणाऱ्या स्वयंसेवी संस्था यांची मदत घ्यावी. आठवडी बाजार, धार्मिक स्थळे येथे लसीकरण केंद्र सुरु करावे. लोकशाही दिनाचे आयोजन करुन एकल महिला, महिला शेतकरी यांच्या अडचणी सोडविण्यात याव्यात. शिक्षकांनी दिलेल्या निधीबाबत लवकरात लवकर धोरणात्मक निर्णय घेण्यात यावा, अशा सूचनाही त्यांनी यावेळी दिल्या .
एकल महिलांच्या पुनर्वसनासाठी समिती तयार करुन 50 हजार रुपयांची मदत मिळण्याबाबत आलेल्या 1 हजार 29 अर्जांपैकी शेतकरी महिला ज्यांची मुले लहान आहेत किंवा ज्यांच्या मुली 12 ते 15 वयाची आहेत , अशा महिलांना प्राधान्याने मदत देण्यात यावी. बालविवाह रोखण्यासाठी महिला पोलीस अधिकाऱ्यांची मदत घ्यावी. घरातील कर्ता पुरुष गेल्याने अशा कुटूंबाचे समुपदेशन करावे, एकल महिला शेतकऱ्यांच्या शेतजमीनींबाबत काही अडचणीअसल्यास त्या सोडविण्यासाठी तसेच शासकीय प्रमाणपत्रे उपलब्ध करून देण्यासाठी समाधान शिबिरे आयोजित करावीत, असेही डॉ. गोऱ्हे यांनी यावेळी सांगितले.
बैठकीत आशा सेविका, अंगणवाडी सेविका यांच्या माध्यमातून लसीकरण, कृषी तज्ञांची मदत घेऊन शेळी पालनासाठी मर्यादित कुरणाची व्यवस्था करावी , करार पद्धतीने काम करत असलेल्या वाहन चालकांचे वेतन, 50 हजाराची मदत मिळालेल्या महिलांची यादी जिल्हाधिकारी कार्यालयात लावणे आदी विषयांचा आढावा यावेळी घेण्यात आला.
बैठकीला कृषी, सामाजिक वनीकरण, जिल्हा परिषद, पशुसंवर्धन, महिला व बालविकास, प्रादेशिक परिवहन विभागाचे अधिकारी उपस्थित होते.

पुणे दि.४-संत ज्ञानेश्वर महाराज आणि संत तुकाराम महाराज पालखी सोहळ्यासाठी आवश्यक नियोजन निर्धारीत वेळेत करण्यात यावे आणि पालखी मार्गाच्या केलेल्या पाहणीत आढळलेल्या तृटींबाबत तातडीने कार्यवाही करण्यात यावी, असे निर्देश जिल्हाधिकारी डॉ.राजेश देशमुख यांनी दिले.

जिल्हाधिकारी कार्यालयात दूरदृष्य प्रणालीद्वारे पालखी सोहळ्याबाबत आयोजित प्राथमिक आढावा बैठकीत ते बोलत होते. बैठकीस निवासी उपजिल्हाधिकारी हिम्मत खराडे, जिल्हा आपत्ती व्यवस्थापन अधिकारी विठ्ठल बनोटे उपस्थित होते. तर संबंधित तालुक्यातील उपविभागीय अधिकारी व तहसीलदार दूरदृष्य प्रणालीद्वारे उपस्थित होते.

डॉ.देशमुख म्हणाले, पालखी तळ आणि विसाव्याच्या ठिकाणी आरोग्य सुविधा, पिण्याच्या पाण्याची सुविधा आणि स्वच्छतेबाबत आवश्यक नियोजन करण्यात यावे. स्वच्छतेची कामे तातडीने पूर्ण करण्यात यावी. पालखी महामार्गाची कामे सुरू असल्याने वाटेत अडथळा येणार नाही याची दक्षता घ्यावी. संबंधित विभागांकडून आवश्यक कामे तातडीने करून घ्यावीत.

सासवड पालखी मुक्कामाच्या ठिकाणची जागा स्वच्छ करून घ्यावी. पुढील १० दिवसात संबंधित यंत्रणांची बैठक घेऊन कामांचे सूक्ष्म नियोजन करावे. गेल्या दोन वर्षात कोविडमुळे पालखी सोहळा न झाल्याने यावर्षी अधिक संख्येने भाविक येण्याची शक्यता लक्षात घेऊन त्यादृष्टीने सुविधांचे नियेाजन करावे, अशा सूचना त्यांनी दिल्या.

पुणे-कोर्टाने जरी ओबीसी आरक्षणाशिवाय निवडणुका घेण्याचे जाहीर केले असले तरी, राष्ट्रवादी काँग्रेस पार्टीच्या वरिष्ठ नेत्यांच्या आदेशानुसार पुणे शहरात राष्ट्रवादी कांग्रेस पार्टी तिकीट वाटपात ओ.बी.सी बंधु भगिनींना सर्वसाधारण कोट्यातून त्यांच्या वाट्याची तिकिटे देणार आहेत. ओ.बी.सी बांधवांवर कुठल्याही प्रकारचा अन्याय होऊ न देण्याची काळजी राष्ट्रवादी कांग्रेस पार्टी घेईल.असे राष्ट्रवादीचे शहर अध्यक्ष प्रशांत जगताप यांनी स्पष्ट केले आहे.

ते म्हणाले,’सर्वोच्च न्यायालयाच्या निकालानुसार राज्य निवडणूक आयोगास ओ.बी.सी आरक्षणाशिवाय दोन आठवड्यात स्थानिक स्वराज्य संस्थांच्या निवडणुका जाहीर करण्याचे आदेश कोर्टाने दिले आहेत. सर्वप्रथम सन्माननीय सुप्रीम कोर्टाचा आम्ही आदर करतो. अर्थात अशा प्रकारचा निर्णय होणे राष्ट्रवादी कांग्रेस पार्टीला अपेक्षित नव्हते. महाराष्ट्रातील ओ.बी.सी बांधवांना त्यांच्या हक्काचे आरक्षण मिळालेच पाहिजे, ही राष्ट्रवादी काँग्रेस पार्टीची आग्रही भूमिका होती, आहे आणि यापुढेही राहील. ओ.बी सी बांधवांना निवडणुकीतील राजकीय आरक्षण मिळावे यासाठी आमची सुरू असणारी लढाई यापुढे देखील सुरूच राहणार आहे. परंतु आज कोर्टाच्या निर्णयाचा मान राखत असताना निवडणुका कधी घ्यायच्या याबाबतचे सर्व अधिकार राज्य निवडणूक आयोगाचे आहेत. अशा परिस्थितीत निवडणूक आयोगाने तत्काळ निवडणुका जाहीर केल्या, तर पुणे शहर राष्ट्रवादी कांग्रेस पार्टी महानगरपालिकेच्या निवडणुकीसाठी सज्ज आहे.

पुणे : महापालिकेच्या पाणी पुरवठ्याच्या प्रमुख अधिकाऱ्यांच्या ढिसाळ नियोजनाचा फटका उद्या ( गुरुवारी) पुणेकरांना बसणार आहे. पालिकेकडून वडगाव जलकेंद्र आणि विमान नगर आणि धोनोरी टाकीवरील पाणी पुरवठा बंद ठेवण्यात येणार असल्याने सिंहगड रस्ता आणि नगर रस्ता परिसरात काहीभागात पाणी बंद असणार आहे.

दरम्यान, गुरुवारी पाणी बंद ठेवण्याचे नियोजन एक आठवडा अधीच ठरलेले असतानाही पालिकेच्या पाणी पुरवठा विभागाकडून आणि जनसंपर्क विभागाकडुन बुधवारी दुपारी ही माहिती देण्यात आली. त्यामुळे, आधीच नागरिकांना उन्हाळ्यात जादा पाण्याची गरज असताना आयत्या वेळी हा निर्णय जाहीर करण्यात आल्याने नोकरदार वर्गास उद्या पाण्यासाठी मनस्ताप सहन करावा लागणार आहे.

शुक्रवार दिनांक ०६ मे रोजी सकाळी उशीरा व कमी दाबाने पाणीपुरवठा होण्याची शक्यता आहे.
पाणी पुरवठा बंद असणारा भाग
१) वडगाव जलकेंद्र परीसर :- हिंगणे, आनंदनगर, वडगाव, धायरी, आंबेगाव पठार,
दत्तनगर, धनकवडी, कात्रज, भारती विद्यापीठ परीसर, कोंढवा बुद्रुक इत्यादी.
२) भामा आसखेड प्रकल्प :
i) विमाननगर टाकी परिसर :- संजय पार्क, संपूर्ण विमाननगर , म्हाडा कॉलनी, एस.आर.ए भाग कुलकर्णी गरेज भाग, यमुना नगर, दत्त मंदिर परिसर इ.

ii) धानोरी टाकी परिसर :- कमल पार्क, माधव नगर ,धानोरी गावठाण, परांडे नगर, लक्ष्मी
नगर, गोकुळ नगर, भैरवनगर, काशिनाथ नगर, आनंद पार्क, श्रमिक नगर, सिद्धार्थ नगर,
सुदामा नगर, अंबानगरी, हरिकृष्ण पार्क परिसर

पुणे-महाविकास आघाडी सरकार आणि भाजप दोघे ओबीसी आरक्षणासंदर्भात गंभीर नव्हते आणि फक्त एकमेकांवर चिखल फेक करत होते. सर्वोच्च न्यायालयाने दिलेल्या आदेश हा नाकारता येणार नाही पण स्थानिक स्वराज्य संस्थांमध्ये ओबीसी समाजाला राजकीय आरक्षण मिळालेच पाहिजे ही आम आदमी पार्टीची मागणी पहिल्यापासून राहिली आहे आणि या पुढे ही राहील.
पिंपरी चिंचवड महानगरपालिका निवडणूकीसंदर्भात आम आदमी पार्टी तयार आहे आणि सर्व जागा लढवविणार आहे.
आप महानगरपालिकेची निवडणूक पहिल्यांदाच लढवत असून लोकांना अरविंद केजरीवाल यांचे शिक्षण, आरोग्यावर आधारित दिल्ली मॉडेल मनात भरले आहे आणि संपूर्ण पिंपरी चिंचवडकर याची मागणी करत आहे. लोकांच्या मनातच आप असल्यामुळे येणाऱ्या निवडणुकीमध्ये आप चांगली कामगिरी करेल आणि जनतेचे खरे नगरसेवक पालिकेत रुजू होतील अशी आम्हाला खात्री आहे.

पुणे, दि.४ : राज्य शासनाच्या सामाजिक न्याय विभागांतर्गत खेड तालुक्यात चांडोली येथील अनुसूचित जाती व नबवबौद्ध मुलींच्या शासकीय निवासी शाळेत ६ वी ते १० वीच्या विद्यार्थ्यांसाठी प्रवेश प्रक्रीया सुरू करण्यात आली आहे.

अनुसूचित जातीच्या मुलींसाठी ८० टक्के, अनुसूचित जमाती १० टक्के अपंग प्रवर्ग३ टक्के, विमुक्त जाती व भटक्या जमाती ५ टक्के आणि विशेष मागास प्रवर्गासाठी २ टक्के जागा आरक्षित आहेत. प्रवेशासाठी गुणपत्रक, शाळा सोडल्याचा दाखला, उत्पन्नाचा दाखला, जातीचा दाखला, महाराष्ट्र निवासाचे प्रमाणपत्र, विद्यार्थी नोंद पत्रिका, विद्यार्थी व पालकांचे रंगीत चार छायाचित्रे, विद्यार्थ्याचे आधारकार्ड व बँकेचे पास बुक आवश्यक आहे.

प्रवेश अर्ज मुलांची निवासी शाळा पेठ (आंबेगाव), दिवे (सासवड), तरंगवाडी (इंदापूर) आणि चांडोली (राजगुरुनगर) येथे उपलब्ध आहेत, असे मुख्याध्यापक एम.एम.वाघमारे यांनी कळविले आहे.