पुणे ः

भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत ‘डिफरंट स्ट्रोक्स ‘  प्रस्तुत   ‘ कलरलेस ‘ कार्यक्रमातून भरतनाट्यम,अभिनय आणि कलेचा एकत्रित आविष्कार  रसिकांना अनुभवायला मिळाला.
  शनीवार, ११ जून  २०२२ रोजी सायंकाळी ६  वाजता  भारतीय विद्या भवनचे सरदार महादेव बळवंत नातू सभागृह,(सेनापती बापट रस्ता) येथे हा कार्यक्रम झाला.
संकल्पना सुचेता जोशी यांची होती. प्रकाश योजना सचिन लेले यांची होती. या सादरीकरणाला  आनंद चाबुकस्वार यांनी आवाज ( व्हॉईस ओव्हर ) दिला. १३ युवती यात सहभागी झाल्या. 
कलरलेस हा या पूर्वग्रहांनी त्रासलेल्या मनाचा व पूर्वग्रहांमधील संवाद होता. मन ज्यावेळा तटस्थपणे आपल्या चुकांकडे बघते, आपण असे  का वागतो याचा मागोवा घेते, तेव्हा त्याला काय दिसते त्याचे प्रतिबिंब कलरलेस मध्ये  दिसले.
हा कार्यक्रम विनामूल्य होता.भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत सादर होणारा हा  १२४ वा कार्यक्रम  होता.भारतीय विद्या भवनचे मानद सचिव प्रा.नंदकुमार काकिर्डे यांनी स्वागत केले. प्रारंभी ज्येष्ठ चित्रकार रवी परांजपे यांना श्रध्दांजली वाहण्यात आली.

भाजपा प्रदेशाध्यक्ष आ. चंद्रकांतदादा पाटील यांचा नारा

कोथरूडमध्ये भाजपाचा विजयी जल्लोष

पुणे-राज्यसभा निवडणुकीत भारतीय जनता पक्षाच्या दणदणीत विजयानंतर सर्वच कार्यकर्त्यांचा पक्षाच्या कार्यकर्त्यांचा उत्साह द्विगुणित झाला आहे. त्यामुळे ‘ये तो बस्स झॉंकी हैं पुणे महापालिका बाकी हैं!’ चा नारा भाजपा प्रदेशाध्यक्ष आ. चंद्रकांतदादा पाटील यांनी दिला.

भाजपा कोथरूड मंडलच्या वतीने विजयी जल्लोष कार्यक्रमाचे आयोजन करण्यात आले होते. या कार्यक्रमात मा. आ. पाटील यांनी सहभागी होऊन सर्वप्रथम छत्रपती शिवाजी महाराज यांच्या पुतळ्यास पुष्पहार अर्पण करून अभिवादन केले. त्यानंतर खासदार गिरीश बापट यांच्या हस्ते प्रदेशाध्यक्ष चंद्रकांतदादा पाटील यांचा सत्कार करण्यात आला. तसेच एकमेकांना पेढे भरवून विजयाचा आनंद साजरा करण्यात आला. यानंतर आ. पाटील यांनी कार्यकर्त्यांशी संवाद साधला.

यावेळी आ. माधुरीताई मिसाळ, पुणे शहर भाजपा अध्यक्ष जगदीश मुळीक, संघटन सरचिटणीस राजेश पांडे, माजी महापौर मुरलीधर मोहोळ, शहर सरचिटणीस दीपक पोटे, राजेश येनपूरे, दत्ताभाऊ खाडे, युवा मोर्चा अध्यक्ष राघवेंद्रबापू मानकर, पुणे शहर प्रवक्ते संदीप खर्डेकर, भाजपा कोथरूड मंडल अध्यक्ष पुनीत जोशी, कसबा मतदारसंघाचे अध्यक्ष प्रमोद कोंढरे यांच्या सह भाजपाचे सर्व पदाधिकारी उपस्थित होते.

आ. चंद्रकांतदादा पाटील म्हणाले की, राज्यसभा निवडणुकीत भारतीय जनता पक्षाच्या विजयाने कार्यकर्त्याचा उत्साह द्विगुणित झाला आहे. या निवडणुकीत माननीय विरोधी पक्षनेते देवेंद्र फडणवीस यांच्या सूचनेनुसार कोल्हापूरचे पैलवान धनंजय महाडिक यांनी जो डाव टाकला, त्यामुळे संजय राऊतांनाही चितपट व्हावे लागले.

ते पुढे म्हणाले की, “विजयानंतर काल माध्यमांशी बोलताना ‘ये तो बस्स झॉंकी हैं २० तारीख बाकी हैं,’ म्हटलं होतं. पण आज ‘ये तो बस्स झॉंकी हैं, पुणे महापालिका बाकी हैं!’ हे आपल्याला दाखवायचे आहे. त्यामुळे महापालिका निवडणुकीत भारतीय जनता पक्षच पुन्हा विजयी होऊन पुणेकरांच्या सेवेत रुजू होतील,” असा विश्वास त्यांनी व्यक्त केला‌.

दरम्यान, या विजयी जल्लोष कार्यक्रमात आ. पाटील यांनी भाजपचा ध्वज खांद्यावर घेऊन सर्व कार्यकर्त्यांसह गाण्यांच्या तालावर ठेका धरला; आणि त्यांच्या उत्साहात सहभाग घेतला. तसेच यानंतर आ. चंद्रकांतदादा पाटील यांच्या वाढदिवसानिमित्त आशिष गार्डन येथे कार्यकर्त्यांकडून दादांचे अभिष्टचिंतन करण्यात आले.

‘जीविधा’ च्या  हिरवाई तपपूर्ती महोत्सवात व्याख्यान

 पुणे :
पर्यावरण संवर्धनासाठी कार्यरत ‘जीविधा’संस्थेच्या ‘हिरवाई तपपूर्ती  महोत्सव’ मध्ये  शनीवार, ११ जून रोजी वनस्पतीशास्त्र अभ्यासक  डॉ विनया घाटे यांनी  ‘ पुण्याची बदलती हिरवाई’ या विषयावर व्याख्यान दिले. त्याला चांगला प्रतिसाद मिळाला.
डॉ. विनया घाटे म्हणाल्या, ‘ पुण्यात मुख्यवस्ती बाहेर शेती, वाडया आणि जंगल होते. सारसबागेत आतापेक्षा मोठे तळे होते.पर्वतीवर देवचाफा, तुळशीबागेत मुचकुंद, खुन्या मुरलीधर मंदिरात बकुळ, मधुकामिनी   या वनस्पति पाहायला   होत्या , काही अजुनही आहेत.
ब्रिटिशांनी शिस्तबद्ध अभ्यासाची सवय लावली. वनस्पतीशास्त्राला त्याचा लाभ झाला. त्यांच्या उपयोगाच्या का होईना, अनेक वनस्पती ब्रिटिशांनी लावल्या.
ब्रिटिशांच्या काळात पुढे एम्प्रेस गार्डन, दापोडी बाग, विद्यापीठ, अशा हिरवाईच्या जागा तयार झाल्या. पेशवे पार्क, संभाजी पार्क त्यानंतर हिरवाईची ठिकाणं तयार झाली. कृषी महाविद्यालय, पुणे विद्यापीठ येथे रस्त्याकडेला मोठी झाडे लावून अॅव्हेन्यू तयार करण्यात आले.
पुण्यात सपुष्प वनस्पतींच्या सोळाशेहून अधिक प्रजाती आहेत. पुण्यातील टेकड्या या आधी गायराने होती.३० हून गवताचे प्रकार आहेत.टेकडयावर ५०० हून अधिक वनस्पति वैविध्य पाहावयास मिळतात.१९६० नंतर टेकड्यांवर ग्लीरिसिडिया लागवड झाली. त्यामुळे हिरवाई वाढली पण गवती रानाची मूळची परिसंस्था बदलली आहे.पुण्याच्या नद्यांमध्ये ५०० हून वनस्पती प्रजाती आढळतात.
शुद्ध पाण्यात येणाऱ्या वनस्पति आता आढळत नाहीत. शहरीकरणात १५०  उद्यानांमुळे, टेकडयांमुळे, हौशी पुणेकरांच्या बागांमुळे हिरवाई टिकून आहे. निराश होण्यासारखे चित्र नसले तरी,अजून जागरूकता वाढवली पाहिजे.
या व्याख्यानानंतर रमा कुकनुर व सहकारी भरतनाट्यम नृत्यातून वनस्पती विश्व साकार केले.
९ ते ११ जून दरम्यान  इंद्रधनुष्य पर्यावरण केंद्र, राजेंद्रनगर येथे हा महोत्सव आयोजित करण्यात आला असून वनस्पती,प्राणी,हिरवाई आणि पर्यावरण रक्षणाची चर्चा करणारी व्याख्याने,बिया वाटप आणि देशी वनस्पतींच्या लागवडीसाठी जनजागृती असे या महोत्सवाचे स्वरूप होते.
‘जीविधा’संस्थेचे संस्थापक राजीव पंडित यांनी प्रास्ताविक केले.वृंदा पंडित यांनी आभार मानले.
 ९ ते ११ जून पासून सायंकाळी ६.३०  ते ८ दरम्यान व्याख्याने झाली.      या महोत्सवात दिनांक 9 ते 11 जून दरम्यान सायंकाळी 4 ते रात्री 8 दरम्यान निसर्गसेवक ‘संस्थेचे  ‘रानभाज्या’ विषयक भित्तीपत्रकाचे प्रदर्शन भरविण्यात आले होते. महोत्सवातील  सगळे कार्यक्रम सर्वासाठी मोफत खुले होते.

पुणे -राज्यसभा निवडणुकीच्या विजयाचा भाजपकडून शनिवारी पुण्यात विविध ठिकाणी जोरदार जल्लोष करण्यात आला. विशेषतःशरद पवारांच्या राजनीतीला शह दिल्याचा आनंद भाजपा पदाधिकारी आणि कार्यकर्ते यांच्या गगनी मावेनासा झाला होता तर कोल्हापूरचे भाजप उमेदवार धनंजय महाडिक यांच्या विजयाने कार्यकर्ते आनंदी झालेत.भाजपचे खासदार गिरीश बापट आणि त्यांचे सहकारी या आनंदोत्सवात सहभागी होत कुठे पेढे वाट होते तर कुठे गुलाबाची फुले वाटत होती . भाजपचे प्रदेशाध्यक्ष आमदार चंद्रकांत पाटील येताच कोथरूड मध्ये एकच लहर उठली , माजी महापौर मुरलीधर मोहोळ , शहर अध्यक्ष जगदीश मुळीक यांनी अगोदरच विविध गाण्यांवर ठेका धरत जोरदार डान्स केला होता चंद्रकात पाटील येताच ते स्वतः आणि संदीप खर्डेकर, दीपक पोटे आदी मांडली या डान्स महोत्सवात सहभागी झाली.

फुगडी खेळून आनंदोत्सव

पुणे शहराचे ग्रामदैवत कसबा गणपतीसमोर भाजपचे शहराध्यक्ष जगदीश मुळीक,गणेश बिडकर ,राजेश येनपुरे यांनी कार्यकर्त्यांसह जल्लोष केला. यावेळी एकमेकांना पेढे भरविण्यात आले. तर महिला कार्यकर्त्यांनी फुगडी खेळून आनंदोत्सव साजरा केला. मुळीक म्हणाले, भाजपच्या या विजयाने विरोधी पक्षनेते देवेंद्र फडणवीस यांच्या नेतृत्वावर शिक्कामोर्तब झालेले आहे. फडणवीस यांनी योग्यप्रकारे मतांची बेरीज करत तिसऱ्या पदासाठी उमेदवार कोटा नसतानाही निवडून आणण्यात यश मिळवले. राज्यसभा निवडणुकीत महाविकास आघाडीच्या नेतृत्वाला अपयश आल्याचे निकालावरून स्पष्ट होत आहे. विधानसभा निवडणुकीत भाजप क्रमांक एकचा पक्ष असतानाही, शिवसेनेने त्याला बाजूला केले त्याला राज्यसभा निवडणूकीच्या माध्यमातून प्रत्युत्तर मिळाले आहे. आगामी पुणे महापालिकेच्या निवडणुकीतही या विजयाचा आम्हाला फायदा होईल. त्याचप्रमाणे महाराष्ट्रातील विविध पदांच्या निवडणुकीत भाजपचा हाच झंजावात आगामी काळात देवेंद्र फडणवीस यांच्या नेतृत्वात दिसून येईल अशी अपेक्षा त्यांनी व्यक्त केली.

महिला स्वयंसहाय्यता समूहांकडून खरेदीला पुणेकरांची पसंती

पुणे, दि. 11: पुणे जिल्हा परिषद व उस्मानाबाद जिल्हा परिषद तसेच पुणे आणि उस्मानाबाद जिल्हा ग्रामीण विकास यंत्रणा यांच्या संयुक्त विद्यमाने आयोजित दोन दिवसीय तांदूळ व डाळ महोत्सवात एकूण 4 लाख 3 हजार 200 रुपयांची विक्रीची उलाढाल झाली. पुणेकरांनी महोत्सवात खरेदीला पसंती दिली, अशी माहिती पुणे जिल्हा ग्रामीण विकास यंत्रणेच्या प्रकल्प संचालक शालिनी कडू यांनी दिली.

पुणे जिल्हा परिषद येथे 9 व 10 जून असे दोन दिवस तांदूळ व डाळ महोत्सव आयोजित करण्यात आला होता. ‘उमेद – महाराष्ट्र राज्य ग्रामीण जीवनोन्नतीअभियान’मार्फत महिला स्वयंसहायता समूहातील महिलांनी तयार केलेल्या उत्पादनांना बाजारपेठ उपलब्ध व्हावी व त्यांची आर्थिक उन्नती व्हावी या उद्देशाने हा महोत्सव आयोजित करण्यात आलेला होता.

महोत्सवामध्ये सेंद्रिय पद्धतीने उत्पादित इंद्रायणी तांदूळ, आंबेमोहोर, कोलम, काळा तांदूळ, काळा गहू आणि उडीद, मटकी, मूग, हरभरा, तूर डाळ व  राजमा विक्रीस ठेवण्यात आला होती. पुणे जिल्ह्यातील एकूण 10 महिला स्वयंसहायताकडून दोन दिवसांमध्ये 1 लाख 67 हजार 700 रुपये एवढी उलाढाल झालेली आहे. तसेच 250 किलोग्रॅम तांदळाची मागणी नोंदवण्यात आलेली आहे. उस्मानाबाद जिल्ह्यातील 5  महिला स्वयंसहायता समूहांची 2 लाख 35 हजार 500 रुपयांची डाळीची विक्री झाली आहे.

या महोत्सवास भारत सरकारच्या ग्राम विकास मंत्रालयाचे संचालक राघवेंद्र सिंग, ‘उमेद’, नवी मुंबई चे मुख्य कार्यकारी अधिकारी हेमंत वसेकर, जिल्हा परिषदेचे मुख्य कार्यकारी अधिकारी आयुष प्रसाद, उस्मानाबाद जिल्हा परिषद मुख्य कार्यकारी अधिकारी राहुल गुप्ता, पुणे स्मार्ट सिटीचे मुख्य कार्यकारी अधिकारी संजय कोलते, विभागीय आयुक्त कार्यालयाचे उपायुक्त (विकास) विजय कुमार मुळीक, जिल्हा ग्रामीण विकास यंत्रणा उस्मानाबादच्या प्रकल्प संचालक श्रीमती प्रांजल शिंदे, पुणे जिल्हा परिषदेचे अतिरिक्त मुख्य कार्यकारी अधिकारी कमलाकर रणदिवे तसेच विविध विभागातील अधिकारी व कर्मचारी यांनी महोत्सवास भेट देऊन खरेदी केली.

या महोत्सवाचे यशस्वी आयोजनामागे उमेद पुणेचे अधिकारी व कर्मचारी व उमेद उस्मानाबादचे अधिकारी व कर्मचारी तसेच जिल्हा ग्रामीण विकास यंत्रणेचे सर्व अधिकारी, कर्मचारी यांनी महत्वाची भूमिका बजावली.

पुणे-माजी मुख्यमंत्री आणि विरोधी पक्षनेते देवेंद्र फडणवीस यांच्या पत्नी अमृता फडणवीस यांनी यांनी भारतात देखील देहविक्री व्यवसायाला ‘प्रोफेशन’ म्हणून मान्यता देण्याची सरकारकडे मागणी केली. तसेच इतर व्यवसायांप्रमाणे देहविक्री व्यवसायाला सन्मान मिळाला पाहिजे, अशी अपेक्षा व्यक्त केली. त्या पुण्यात शनिवारी (११ जून) दुपारी १ वाजता बुधवार पेठेतील महिलांसाठी मोफत आरोग्य शिबीर व मुलींसाठी सुकन्या कार्डचे वाटप कार्यक्रमात आल्या होत्या. यावेळी देहविक्री व्यवसायातील महिलांसमोर त्या बोलत होत्या.अमृता फडणवीस म्हणाल्या, “मी सरकारला असंच सांगेन की जसा इतर व्यवसायांना सन्मान असतो, त्याप्रमाणे देहविक्री व्यवसायाला देखील आदर मिळाला पाहिजे. त्याला एक व्यवसाय म्हणून स्विकारलं पाहिजे. जर्मनीसारख्या देशांमध्ये देहविक्री व्यवसाय करणाऱ्यांचं आदरणीय स्थान आहे. देहविक्री व्यवसाय करणारे या देशांमध्ये कर देखील भरतात. तेच स्थान आपण सर्वजण एकत्र आलो तर भारतात देखील मिळू शकतं. मी या निर्णयाच्या पाठीशी आहे.”

“तुम्ही तुमच्या आरोग्याकडे लक्ष देणं गरजेचं आहे. त्यामुळे कितीही घाई असेल तर देहविक्री व्यवसायातील महिलांनी आपली वैद्यकीय तपासणी करावी. तुम्ही ज्या व्यवसायात आहात त्यात काही आजार होण्याचा धोका असतो, तो धोका ओळखा. तसेच नियमितपणे आपली तपासणी करून घ्या. त्यासाठी तुमच्यामागे भारतीय जनता पक्ष उभा आहे,” असं अमृता फडणवीस यांनी सांगितलं.

अमृता फडणवीस पुढे म्हणाल्या, “आपल्या मुलींना शिकवा. आपल्या मुलांसाठी बचत करा. त्याचा तुम्हाला नक्की उपयोग होईल. वृद्धापकाळात वृद्धाश्रमाची गरज असते. त्यासाठी आपण पूर्णपणे प्रयत्न करू. मात्र, तुम्ही देखील आपल्या मुलांसाठी बचत करायला विसरू नका.”

“योगा करणं सर्वांनी गरजेचं आहे. तुम्ही सर्वजण तयार असाल तर मी तुमच्यासाठी चांगले प्रशिक्षक आणून तुमचे योगा सेशन घेईन. तुम्ही हा योगा घरी केला तर तुम्हाला कोणताही आजार होणार नाही. कोणत्याही परिस्थितीत तुम्ही तंदुरुस्त राहाल. आम्ही बुधवार पेठेतील तुमच्या भागात हवं तिथं योगा क्लासेस उपलब्ध करून देऊ,” असंही अमृता फडणवीसांनी नमूद केलं.

पुणे -प्रेषित मोहम्मद पैगंबर यांच्याविषयी वादग्रस्त ट्वीट केल्याप्रकरणी भारतीय जनता पक्षातून हकालपट्टी करण्यात आलेले नवीनकुमार जिंदाल यांच्याविरोधात कोंढवा पोलिस ठाण्यात गुन्हा दाखल करण्यात आला आहे.

या प्रकरणी झाकीर इलियास शेख यांनी फिर्याद दिली आहे. त्यानुसार, जिंदाल यांच्याविरोधात राष्ट्रीय एकात्मतेला बाधा पोहोचविणे, धार्मिक भावना दुखावणे आदी कलमांनुसार गुन्हा दाखल करण्यात आला आहे. जिंदाल यांनी एक जून रोजी हे वादग्रस्त ट्वीट करत विशिष्ट धर्मियांच्या भावना दुखावल्या, असे फिर्यादीत नमूद आहे. भाजपचे दिल्लीतील माध्यम प्रभारी असताना जिंदाल यांनी केलेल्या या ट्वीटनंतर देशातून, तसेच आंतरराष्ट्रीय स्तरावरून तीव्र प्रतिक्रिया उमटल्या होत्या. त्यामुळे पक्षाच्या धोरणाचे उल्लंघन केल्याचा ठपका ठेवत भाजपने जिंदाल यांचे प्राथमिक सदस्यत्व रद्द करत त्यांची पक्षातून हकालपट्टी केली आहे

शेख यांनी तक्रारीत सांगितले आहे की, जिंदाल यांनी 1 जून रोजी आक्षेपार्ह ट्वीट करत मुस्लिमांच्या भावना दुखावल्या आहे. मुस्लिमांच्या धार्मिक भावना दुखावण्याचा प्रयत्न केल्याप्रकरणी त्यांना अटक करण्यात यावी अशी आमची मागणी आहे. याबाबत कोंढवा पोलिस ठाण्यात आम्ही अर्ज दाखल केला असून यासंदर्भात पोलिसांनी कारवाई करावी अशी मागणी आहे.

पुणे-स्पा तसेच मसाज सेंटरच्या नावाखाली चालणार्‍या सेक्स रॅकेटचा पर्दाफाश सामाजिक सुरक्षा विभागाने गुरुवारी संध्याकाळी केला. याप्रकरणी सहा जणांना अटक करताना तब्बल अकरा जणांवर शुक्रवारी गुन्हा दाखल करण्यात आला. यावेळी चार मणीपुरी तरुणींचीही सुटका करण्यात आली.

मालकाचा शोध सुरू

स्पा सेंटरचे सहायक व्यवस्थापक जूनेल हुसेन इलास अली (वय 32), राय सोलोमन (वय 26), विजय सुनील पवार (वय 22), स्टिफन खांगबा रांग (वय 25), महमद फुजेल अहमद सीराजिल हक (वय 22) आणि काबूल हुसेन अमीर अली चौधरी (वय 26) असे अटक केलेल्या आरोपींचे नाव आहेत. तसेच अमोल दिलीप रामगडे (मॅनेजर), स्पा सेंटरचे मालक नौशाद शेख, सुधीर पाटील, अमित प्रताप डोमले, राजू बाळकृष्ण शेडगे यांचा पोलिस शोध घेत आहेत.

एक्स्ट्रा सर्व्हिसच्या नावाखाली…

सामाजिक सुरक्षा विभागाचे वरिष्ठ निरीक्षक राजेश पुराणिक यांनी सांगितले, गुरुवारी संध्याकाळी सहा वाजता कोरेगाव पार्क पोलिस स्टेशन हद्दीतील नॉर्थमेन रोडवर लिबर्टी सोसायटीतील फेज 2 मध्ये गोल्डन ओक स्पा, मसाज सेंटरच्या नावाखाली वेश्या व्यवसाय चालवत असल्याची माहिती आम्हाला मिळाली. त्यानुसार सायंकाळी सहा वाजण्याच्या सुमारास बनावट गिर्‍हाईक पाठवून सापळा रचण्यात आला. या ठिकाणी पीडित मुलींकडून मसाजसह एक्स्ट्रा सर्व्हिसचे नावाखाली वेश्या व्यावसाय चालत असल्याचे निदर्शनास आले. यावेळी सहा जणांना अटक करण्यात आली. तर चार तरुणींची सुटका करण्यात आली.

गोल्डन ओक स्पामध्ये मालीश व स्पा बरोबरच लोकांना एक्स्ट्रा सर्व्हिसेस नावाखाली महाविद्यालयीन तरुणींमार्फत खुल्या प्रमाणात वेश्या व्यवसाय करीत असल्याचे समजले होते. यासाठी त्यांनी वेबसाईटवर एक उत्तेजक लेख लिहून वेबपेजवर अपलोड केले होते. या छाप्यात कारवाई करण्यात आलेला गोल्डन ओक स्पाचा व्यवस्थापक अमोल दिलीप रामगडे हा झिरो पोलिसिंगचे देखील काम करीत असल्याचा धक्कादायक प्रकार समोर आला आहे.

एमआयटी डब्ल्यूपीयूच्या स्कूल ऑफ इलेक्ट्रॉनिक्स आणि कम्युनिकेशन इंजिनीअरिंग विद्यार्थ्यांचे यश

पुणे,दि.११: एमआयटी वर्ल्ड पीस युनिव्हर्सिटीच्या स्कूल ऑफ इलेक्ट्रॉनिक्स आणि कम्युनिकेशन इंजिनीअरिंगच्या अंतिम वर्षाच्या विद्यार्थ्यांनी स्वयंचलित ई-रथ वाहनाची निर्मिती केली आहे. रिमोट ड्रायव्हेबिलिटी आणि ऑटोनॉमस ड्रायव्हिंग क्षमता असलेली चार चाकी ई-रथ इलेक्ट्रिक वाहन यशस्वीरित्या डिझाइन केले आहे.
विद्यार्थ्यांच्या यशा बद्दल एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड आणि कार्याध्यक्ष राहुल विश्वनाथ कराड यांनी भविष्यासाठी शुभेच्छा दिल्या. तसेच, इंजिनिअरींग विभागाचे अधिष्ठाता डॉ. प्रसाद खांडेकर, डॉ. भरत चौधरी, डॉ. अनिल हिवाळे, डॉ. विनया गोहोकर, डॉ. अनुराधा फडके, डॉ. सुनिल सोमाणी व डॉ. जी.एन.मुळे यांनी विद्यार्थ्यांना शुभेच्छा दिल्या.
या वाहनाची निर्मिती इलेक्ट्रॉनिक्स अँड कम्युनिकेशन इंजिनिअरिंगचे विद्यार्थी मिरज इनामदार, प्रज्वल वेर्णेकर, साईबाबा नरगुंद, प्रथमेश वाणी सहित मेकॅनिकल विभागाचे विद्यार्थी अद्वैत उटगीकर, सौमित्र महाजन व पूर्वा अपराज यांनी केली आहे. यांना डॉ अल्का एस. बारहत्ते आणि प्रा. पी.एस. महाजनी यांनी मार्गदर्शन केले.
ई-रथ मॅन्यूअल ड्राइव्ह तसेच संगणक आणि रेडिओ नियंत्रणाद्वारे रिमोट ड्राइव्ह करण्यास सक्षम आहे. यात ओपन डिफरेंशियल एक्सल असलेली इलेक्ट्रिक मोटर असून जी ड्रम ब्रेक सह येते. याची ऑनबोर्ड लोड क्षमता २०० किलोग्रॅम आणि टोइंग क्षमता ३०० किलोग्रॅम आहे. ३० किमी प्रतितास वेगमर्यादा असून यात डयुअल अ‍ॅप्लिकेशन मेकॅनिझममुळे अद्वितीय ब्रेक असेब्ली आहे. त्यामुळे मॅन्युुअल आणि रिमोट दोन्ही मोडमध्ये बोल्ट ऑफ प्रक्रियेसह हे वाहन वापरले जाऊ शकते.
ओसीएम इलेक्ट्रॉनिक पॉवर स्टीयरिंग सिस्टम याची विशेषता आहे. दिशा नियंत्रित करण्यासाठी रिमोट मोडमध्ये अखंडपणे वापरली जाऊ शकते. थ्रॉटल यंत्रणा दुहेरी चॅनल प्रणालीमध्ये देखील सुधारणा केली गेली आहे. यात भौतिक पेडल्स व ऑनबोर्ड संगणकावरून इनपूट प्राप्त होते. यामुळे वाहनाचे लोकोमोशन सोपे व अधिक कार्यक्षम बनते.
विद्यार्थी प्रज्वल वेर्णेकर म्हणाला,“ विद्युत वाहन निर्मितीमध्ये अनेक नावीन्यपूर्ण संशोधन होत आहे. तोच प्रयत्न आम्ही केला आहे. माझ्यातील ऑटोमोटिव्ह संदर्भातील ज्या कल्पना आहेत त्याला सत्यात उतरविण्यास आकार दिला गेला आहे.”
मिराज इनामदार म्हणाला,“ ही माझ्यासाठी एक उत्तम संधी होती. वाहनांमधील बदल पाहताना मॅन्युअल ते स्वायत्ता असा बदल ही आता दूर नाही. कमी कालावधीत, मार्यादित निधी आणि प्रत्येक पायरीवरील गुंतागुंत लक्षात घेतली आहे. मला मिळालेल्या संधी बद्दल आभारी आहे.”
साईबाबा निरगुड म्हणाला,“ या प्रकल्पाच्या व्याप्तीमध्ये आमूलाग्र बदल करूनही, विविध यांत्रिक, इलेक्ट्रिकल आणि सॉफ्टवेअर प्रणालीच्या एकत्रिकरण आणि अंमलबजावणी करणे एक मोठे आव्हान आहे. ”