पंतप्रधान नरेंद्र मोदी येत्या 20 आणि 21 जून 2022 रोजी कर्नाटक येथे दौऱ्यावर जाणार आहेत. 20 जून 2022 रोजी दुपारी साडेबारा वाजण्याच्या सुमारास पंतप्रधान बेंगलुरू येथील इंडियन इन्स्टिट्यूट ऑफ सायन्स (आयआयएससी) येथे भेट देतील, त्याठिकाणी ते मेंदू संशोधन केंद्राचे (सेंटर फॉर ब्रेन रिसर्च-सीबीआर) उद्घाटन करतील आणि बागची पार्थसारथी मल्टिस्पेशालिटी रुग्णालयाची पायाभरणी करतील.  दुपारी पावणे दोनच्या सुमारास ते  बेंगलुरू   येथील डॉ. बी आर आंबेडकर स्कूल ऑफ इकॉनॉमिक्स (बीएएसई) येथे भेट देतील, याठिकाणी ते बीएएसई विद्यापीठाच्या नवीन प्रांगणाचे उद्घाटन करतील आणि डॉ. बी आर आंबेडकर यांच्या पुतळ्याचे अनावरण करतील. कर्नाटकमध्ये,  औद्योगिक प्रशिक्षण संस्थांच्या (आयटीआय) परिवर्तनातून विकसित 150 टेक्नॉलॉजी हब पंतप्रधान राष्ट्राला समर्पित करतील. त्यानंतर  दुपारी पावणेतीनच्या सुमारास, पंतप्रधान  बेंगलुरू   येथील कोम्माघट्टा  येथे पोहोचतील, येथे ते 27000 कोटी रुपयांपेक्षा अधिक किमतीच्या अनेक रेल्वे आणि रस्ते पायाभूत सुविधा प्रकल्पांचे उद्घाटन आणि पायाभरणी करतील.  त्यानंतर संध्याकाळी साडेपाच वाजण्याच्या सुमारास पंतप्रधान  म्हैसूर येथील महाराजा कॉलेज मैदानावर सार्वजनिक कार्यक्रमात सहभागी होतील. तेथे नागनहुल्ली येथीस कोचिंग टर्मिनलचा पायाभरणी करतील  आणि  संप्रेषण विकार असलेल्या व्यक्तींसाठी, ऑल इंडिया इन्स्टिट्यूट ऑफ स्पीच अँड हिअरिंग  एआयआयएसएच  मैसूर   येथे सेंटर ऑफ एक्सलन्सदेखील राष्ट्राला समर्पित करणार आहेत. त्यानंतर सायंकाळी सात वाजताच्या सुमाराला   मैसूर   येथील श्री सुत्तुर मठ येथे पंतप्रधान भेट देतील आणि पावणेआठच्या सुमारास, ते म्हैसूर येथील चामुण्डेश्वरी  मंदिराला भेट देतील.

दुसऱ्या दिवशी 21 जून 2022 रोजी सकाळी 06:30 च्या सुमाराला    मैसूर   पॅलेस मैदानावर पंतप्रधान सामूहिक योग प्रात्यक्षिक कार्यक्रमात सहभागी होणार आहेत.

पंतप्रधानांचा  बेंगलुरू  दौरा

बेंगलुरू शहराचा संपर्क आणि दळणवळण वाढावे,यासाठीचे एक पाऊल म्हणून   बेंगलुरू   उपनगरीय रेल्वे प्रकल्पाचे (BSRP) भूमिपूजन पंतप्रधानांच्या हस्ते होणार आहे.  यामुळे  बेंगलुरू   शहर, परिसरातील उपनगरे आणि नवीन वसाहतींशी जोडले जाईल. या प्रकल्पासाठी सुमारे 15,700 कोटी रुपयांहून अधिक खर्च येणार असून यामध्ये एकूण 148 किलोमीटरहून अधिक लांबीच्या 4 कॉरिडोरच्या निर्मितीची योजना आहे.  बेंगलुरू   कॅन्टोन्मेंट पुनर्विकास आणि यशवंतपूर जंक्शन रेल्वे स्थानक विकास कामाचे भूमिपूजन देखील पंतप्रधानांच्या हस्ते होणार आहे. या कामांसाठी अनुक्रमे सुमारे 500 कोटी आणि 375 कोटी रुपये खर्च येणार आहे.

आधुनिक विमानतळाच्या धर्तीवर विकसित, सुमारे 315 कोटी रुपये खर्चून बांधण्यात आलेल्या, बैयप्पनहळ्ळी इथल्या  भारतातील पहिल्या वातानुकूलित सर एम. विश्वेश्वरय्या रेल्वे स्थानकाचे लोकार्पण पंतप्रधानांच्या हस्ते होईल. यासोबतच, कोकण रेल्वे मार्गावरील (अंदाजे 740 किमी) रोहा ( महाराष्ट्र ) ते ठाकूर ( कर्नाटक ) या स्थानकादरम्यान 100% विद्युतीकरण झालेल्या मार्गावर उडुपी, मडगाव आणि रत्नागिरी येथून चालणाऱ्या विद्युत रेल्वे गाड्यांना झेंडा दाखवून पंतप्रधान या प्रकल्पाचे लोकार्पण करतील. कोकण रेल्वे मार्गावरील या विद्युतीकरणासाठी 1,280 कोटी रुपयांपेक्षा अधिक खर्च आला आहे. याखेरीज, दुहेरीकरण करण्यात आलेले  दोन रेल्वे मार्ग प्रकल्प : अर्सिकेरे ते तुमकुर ( सुमारे 96 किमी) आणि येलाहंका ते पेनूकोंडा (सुमारे 120 की. मी) यांचे लोकार्पण  पॅसेंजर  आणि मेमु रेल्वेला झेंडा दाखवून पंतप्रधान  करतील. या दोन्ही मार्गांच्या दुहेरीकरणासाठी अनुक्रमे 750 कोटी आणि 1,100 कोटी रुपयांपेक्षा जास्त निधी खर्च करण्यात आला आहे.

या दौऱ्यात, पंतप्रधान बेंगलुरू   रिंग रोड प्रकल्पाच्या दोन भागाच्या बांधकामाची पायाभरणी करतील. सुमारे 2280 कोटी रुपये खर्चून बांधण्यात येणाऱ्या या प्रकल्पामुळे  बेंगलुरू   शहरातील वाहतूककोंडी कमी होईल. पंतप्रधान इतर काही  रस्ते  प्रकल्पांची देखील पायाभरणी करतील. यामध्ये, राष्ट्रीय महामार्ग क्रमांक 48 वरील नेलमंगला – तुमकुर दरम्यानच्या रस्त्याचे सहा पदरीकरण; राष्ट्रीय महामार्ग क्रमांक 73 वरील पंजलकट्टे ते चारमंडी दरम्यानच्या रस्त्याचे रुंदीकरण; राष्ट्रीय महामार्ग क्रमांक 69 च्या काही भागाचा विकास आणि पुनर्वसन यांचा समावेश आहे. या सर्व प्रकल्पाची एकूण किंमत सुमारे 3,150 कोटी रुपये आहे.  बेंगलुरू   शहरापासून 40 किलोमीटर अंतरावर असलेल्या मुद्दलिंगनहळ्ळी इथे सुमारे 1,800 कोटी रुपये गुंतवून बांधण्यात येणाऱ्या मल्टी मोडल लॉजिस्टिक पार्कची पायाभरणी देखील पंतप्रधानांच्या हस्ते केली जाणार आहे. यामुळे वाहतूक, हाताळणी तसेच दुय्यम मालवाहतूक खर्च कमी होईल. पंतप्रधानांच्या हस्ते  बेंगलुरू  शहरातल्या डॉक्टर बाबासाहेब आंबेडकर स्कूल ऑफ इकॉनॉमिक्सच्या   ( BASE) नव्या परिसराचे उद्घाटन केले जाणार आहे. डॉक्टर बाबासाहेब आंबेडकर यांची स्वतंत्र भारताच्या विकासातील अनुकरणीय योगदानाची ओळख म्हणून तसेच त्यांच्या 125 व्या जयंतीनिमित्त श्रद्धांजली रूपात 2017 मध्ये हे निवासी विद्यापीठ स्थापन करण्यात  आले आहे.

डॉक्टर बाबासाहेब आंबेडकर स्कूल ऑफ इकॉनॉमिक्स येथल्या कार्यक्रमादरम्यान, संपूर्ण कर्नाटक राज्यातील औद्योगिक प्रशिक्षण संस्थाचा (ITIs) कायापालट करून नव्याने उभारण्यात आलेल्या 150 टेक्नॉलॉजी हबचे लोकार्पण पंतप्रधानांच्या हस्ते केले जाईल. या अभिनव उपक्रमासाठी सुमारे 4 600 कोटी रुपये खर्च आला असून या खर्चात अनेक औद्योगिक संस्थांनी योगदान दिले आहे. या उपक्रमाचा मुख्य उद्देश औद्योगिक क्षेत्रासाठी आवश्यक असलेले कौशल्य युक्त मनुष्यबळ 4.0 तयार करणे हा आहे. हे टेक्नॉलॉजी हब विविध नवोन्मेषी अभ्यासक्रद्वारे आधुनिक तंत्रज्ञानाचे सर्वोत्तम कौशल्य प्रशिक्षण देऊन औद्योगिक प्रशिक्षण संस्थेच्या स्नातकांना रोजगाराच्या आणि नव व्यवसायाच्या नव्या संधी प्राप्त करून देतील.

बेंगलुरूमध्ये  भारतीय विज्ञान संस्थेत, पंतप्रधान एका मेंदू संशोधन केंद्राचे (CBR) उद्घाटन करतील. या संशोधन केंद्राची पायाभरणी देखील पंतप्रधानांच्या हस्ते झाली होती. वयानुरूप होणाऱ्या मेंदूच्या आजारांवरील उपचारांच्या प्रमाण आधारित संशोधनासाठी हे केंद्र उभारण्यात आले आहे. यावेळी पंतप्रधानांच्या हस्ते 832 खाटांच्या बागची पार्थ-सारथी मल्टीस्पेशालिटी रुग्णालयाची पायाभरणी केली जाईल. हे रुग्णालय   बेंगलुरू  मधील भारतीय विज्ञान संस्थेच्या परिसरात उभारण्यात आले असून यामुळे विज्ञान, अभियांत्रिकी आणि वैद्यकीय शाखांना एकत्रीकृत संशोधन करणे शक्य होणार आहे. यामुळे देशात चिकित्सा विषयक संशोधनाला चालना मिळणार आहे तसेच यातून संशोधित होणाऱ्या नव नव्या उपचार पद्धतीमुळे देशात आरोग्य सेवेमध्ये सुधारणा घडणार आहे.

पंतप्रधानांचा मैसूर दौरा

मैसूरमधल्या महाराजा महाविद्यालय मैदानावर होणाऱ्या एका सार्वजनिक कार्यक्रमात, पंतप्रधान 180 कोटी रुपये खर्चून नागनहुळ्ळी रेल्वेस्थानक येथे उभारण्यात करण्यात येणाऱ्या उपनगरीय वाहतूकीसाठी कोचिंग टर्मिनलची पायाभरणी करतील. कोचिंग टर्मिनल मध्ये मेमु शेडची सुविधा असणार आहे त्यामुळे सध्या अस्तित्वात असलेल्या मैसूर यार्डातील वाहतूक कोंडी कमी होऊन मैसूर स्थानकातून धावणाऱ्या लांब पल्ल्याच्या तसेच मेमू रेल्वे गाड्यांची संख्या वाढेल, याची परिणती म्हणून मैसूरचा संपर्क वाढून पर्यटनला चालना मिळेल. याचा फायदा रोज प्रवास करणारे प्रवासी तसेच लांब अंतरावर प्रवास करणाऱ्या प्रवाशांना देखील होईल.

या दौऱ्यात, मैसूर येथील अखिल भारतीय वाचा आणि श्रवण संस्थेत उभारण्यात आलेल्या सेंटर फॉर एक्सलन्स फॉर परसन्स विथ कम्युनिकेशन डीसॉर्डर चे लोकार्पण पंतप्रधानांच्या हस्ते होईल. या केंद्रात संप्रेषण कमतरता असलेल्या लोकांच्या निदान, परिक्षण आणि पुनर्वसनासाठी आवश्यक असलेल्या अनेक सुविधा उपलब्ध करुन देण्यात आल्या आहेत.

पंतप्रधानांचा 21 जूनचा कार्यक्रम

आठव्या आंतरराष्ट्रीय योग दिनाला  21 जून 2022 या दिवशी मैसूरमधल्या मैसूर पॅलेस मैदानावर होणाऱ्या  योग प्रात्यक्षिक कार्यक्रमात हजारो सहभागींसह पंतप्रधानही सहभागी होतील. स्वातंत्र्याच्या अमृतमहोत्सवी वर्षात 8 व्या आंतरराष्ट्रीय योग दिनानिमित्त देशभरात 75 वैशिष्ट्यपूर्ण ठिकाणी 75 केंद्रीय मंत्र्यांच्या नेतृत्वात योग प्रात्यक्षिकांचे आयोजन करण्यात आले आहे, पंतप्रधानांच्या नेतृत्वातील मैसूर येथील योग प्रात्यक्षिक आयोजन त्यापैकीच एक आहे. देशभरात अनेक शैक्षणिक, सामाजिक, राजकीय , सांस्कृतिक, धार्मिक, कार्पोरेट तसंच इतर नागरी संस्थांनी योग प्रात्यक्षिकांचे कार्यक्रम आयोजित केले असून त्यामध्ये करोडोंच्या संख्येने नागरिक सहभागी होणार आहेत.

पंतप्रधानांचा मैसूर येथील योग प्रात्यक्षिक कार्यक्रम हा देखील गॉर्जियन योग रिंग या अभिनव कार्यक्रमाचा भाग आहे. हा कार्यक्रम देशांच्या सीमा ओलांडत योगाचा प्रभाव सर्व जगात पसरवण्याच्या उद्देशाने 79 राष्ट्रांमध्ये तसेच संयुक्त राष्ट्रांमध्ये  साजरा केला जाणार आहे. ज्याप्रमाणे सूर्य पूर्वेकडून पश्चिमेकडे संक्रमण करत जाताना दिसतो, त्याच प्रमाणे, योगदिनी जगभरात सहभागी देशांमध्ये एकापाठोपाठ एक अशी महा योग प्रात्यक्षिके सादर केली जाणार आहेत. यामध्ये ‘एक सूर्य  – एक पृथ्वी’ ही संकल्पना दिसून येईल. या नाविन्यपूर्ण कार्यक्रमाचे थेट प्रक्षेपण 21 जून या दिवशी डीडी इंडिया या वाहिनीवरून भारतीय वेळेनुसार सकाळी 3 वाजल्यापासून ( फिजी येथून प्रक्षेपण ) भारतीय वेळेनुसार रात्री 10 वाजेपर्यंत ( अमेरिकेतल्या सॅन फ्रान्सिस्को येथून प्रक्षेपण ) केले जाणार आहे. याच कार्यक्रमाचा भाग म्हणून पंतप्रधानांच्या मैसूर येथील योग प्रात्यक्षिकाचे थेट प्रक्षेपण इंडिया या वाहिनीवरून भारतीय प्रमाणवेळेनुसार सकाळी 6:30 वाजता करण्यात येईल.

जगभरात 2015 पासून 21 जून या दिवशी आंतरराष्ट्रीय योग दिन साजरा केला जात आहे. यावर्षीच्या योग दिनाची मुख्य संकल्पना मानवतेसाठी योग अशी आहे. या वर्षीची संकल्पना कोविड महामारीच्या काळातील मनुष्याच्या वेदना कमी करण्यात योग क्रिया कशी लाभदायक ठरली याची दर्शक आहे.

केंद्र सरकारने जाहीर केलेली ‘अग्निपथ’ योजना (Agnipath scheme) रद्द होणार नसून लवकरच या योजनेअंतर्गत भरती प्रक्रिया राबवली जाणार असल्याची माहिती लष्कराच्या वतीने देण्यात आली आहे. तसेच भरती अगोदर युवकांना हिंसा आणि तोडफोडीत सहभागी नसल्याचे प्रमाणपत्र देणे बंधनकारक असल्याचेही लष्कराकडून स्पष्ट करण्यात आले. तीनही सेना दलाच्या वतीने आज संयुक्त पत्रकार परिषदेचे आयोजन करण्यात आले होते. त्यामध्ये बोलताना लेफ्टनंट जनरल अनिल पुरींनी ही माहिती दिली.

अग्निवीरांच्या वयोमर्यादेत वाढ
योजनेला वाढता विरोध पाहता केंद्र सरकारने या योजनेमध्ये अनेक तरतुदी जाहीर केल्या आहेत. या योजनेसाठी वयोमर्यादा दोन वर्षांनी वाढवण्यात आली आहे. तसेच अग्निवीरांसाठी संरक्षण मंत्रालय आणि कोस्ट कार्डमध्ये १० टक्के जागा आरक्षित ठेवण्यात आली आहे. पात्रता निकष पूर्ण करणाऱ्या अग्निवीरांसाठी संरक्षण मंत्रालयातील नोकऱ्यांच्या १० टक्के जागा राखीव ठेवण्याच्या प्रस्तावाला संरक्षण मंत्री राजनाथ सिंह यांनी मंजूरी दिली आहे. हे आरक्षण माजी सैनिकांसाठीच्या सध्याच्या आरक्षणाव्यतिरिक्त असणार असल्याचे लष्कराकडून स्पष्ट करण्यात आले आहे.

लष्कराला जोश आणि होश असणाऱ्या युवकांची गरज
अग्निपथ योजनेअंतर्गत येत्या २४ जूनपासून वायू दलात भरती प्रक्रियेस सुरुवात होणार आहे. तसेच भारतीय लष्कराकडूनही लवकरच भरती प्रक्रियेबाबत अधिसूचना जारी केली जाईल असे सांगण्यात आले आहे. २०५० पर्यंत ५० टक्के लोकसंख्या ही ५० वर्षाच्या आतील असेल त्यामुळे लष्कराला जोश आणि होश असणाऱ्या युवकांची गरज असल्याचे पुरी म्हणाले.

मुंबई दि. 19 : पंढरपूरला जाणाऱ्या पालखी मार्गावरील ग्रामपंचायतींना अनुदान देण्यासाठी दोन कोटी एकोणसाठ लाख पंच्याहत्तर हजार रुपयांच्या तसेच वारकरी भाविकांना तात्पुरत्या स्वच्छता सुविधा पुरविण्यासाठी सहा कोटी त्र्याहत्तर लाख वीस हजार रुपयांच्या निधीस राज्य शासनाने मंजुरी दिली आहे, अशी माहिती ग्रामविकास मंत्री हसन मुश्रीफ यांनी आज दिली. पंढरपूरची आषाढी वारी निर्मल वारी होण्यासाठी यामुळे मदत होणार आहे, असेही श्री. मुश्रीफ यांनी सांगितले.

उपमुख्यमंत्री तथा वित्त मंत्री अजित पवार यांच्या अध्यक्षतेखाली झालेल्या बैठकीत आषाढी एकादशी निमित्त पालखी मार्गावरील ग्रामपंचायतींना अनुदान देण्याबाबत मागणी करण्यात आली होती. त्यानुसार हा निर्णय घेण्यात आला आहे, असे श्री मुश्रीफ यांनी सांगितले.

आषाढी एकादशीच्या निमित्त पुणे, सातारा, सोलापूर जिल्ह्यांतून विविध संतांच्या पालख्या सोबत मार्गक्रमण करणाऱ्या वारकऱ्यांना सोयी सुविधा पुरविण्यासाठी पालखी मार्गावरील ग्रामपंचायतींना अनुदान देण्यात येते. यानुसार पुणे, सातारा आणि सोलापूर जिल्ह्यातील विविध ग्रामपंचायतींना अनुदान देण्यासाठी दोन कोटी एकोणसाठ लाख पंच्याहत्तर हजार रुपयांचा निधी मंजूर करण्यात आला आहे. त्याबाबतचा शासन निर्णय जारी करण्यात आला आहे, असे श्री. मुश्रीफ यांनी सांगितले.

पुणे, सातारा व सोलापूर जिल्हा परिषदेच्या मुख्य कार्यकारी अधिकारी यांनी मागणी केलेल्या निधीच्या पन्नास टक्के निधी राज्य शासनाने उपलब्ध करून दिला आहे. उर्वरित निधी जिल्हा परिषदांनी त्यांच्या स्वनिधीतून अथवा अन्य निधीतून उपलब्ध करावयाचा आहे. हा निधी जिल्हा परिषदांनी ग्रामपंचायतींना मागणीनुसार उपलब्ध करून द्यायचा आहे, असे श्री. मुश्रीफ यांनी सांगितले.

पुणे जिल्हा परिषदेला ब्याऐंशी लाख रुपये, सातारा जिल्हा परिषदेला वीस लाख पंचवीस हजार रुपये तर सोलापूर जिल्हा परिषदेला एक कोटी सत्तावन्न लाख पन्नास हजार रुपयांचा निधी वितरित करण्यात येणार आहे.

सहा कोटी त्र्याहत्तर लाख रुपयांचा निधी पुणे जिल्हा परिषदेला मंजूर

पुणे, सातारा व सोलापूर जिल्ह्यातून मार्गक्रमण करणाऱ्या विविध संतांच्या पालख्या सोबत असणाऱ्या भाविकांना स्वच्छता पुरविण्यासाठी भाडेतत्त्वावर तात्पुरत्या शौचालयाची व्यवस्था करण्यासाठी सहा कोटी त्र्याहत्तर लाख वीस हजार रुपयांचा निधी पुणे जिल्हा परिषदेला उपलब्ध करून देण्यास मान्यता दिली असल्याचेही ग्रामविकास मंत्री हसन मुश्रीफ यांनी सांगितले. एकूण मंजुरीच्या वीस टक्के प्रमाणात म्हणजेच एक कोटी चौतीस लाख चौसष्ठ हजार रुपयांचा निधी पुणे जिल्हा परिषदेचे मुख्य कार्यकारी अधिकारी यांना बीडीएस प्रणालीद्वारे वितरित करण्यात आला असल्याची माहितीही श्री. मुश्रीफ यांनी दिली.

नवी दिल्ली, दि. 19 : ऊर्जा क्षेत्रातील उल्लेखनीय कार्यासाठी महाराष्ट्राला ‘स्टार ऑफ गव्हर्नन्स-स्कॉच अवार्ड इन पावर अँड एनर्जी’ प्रदान करण्यात आला. राज्याच्या ऊर्जा विभागाचे प्रधान सचिव दिनेश वाघमारे यांनी हा पुरस्कार स्वीकारला.

स्कॉच ग्रुपच्यावतीने शनिवारी येथील इंडिया हॅबिटॅट सेंटरच्या सिल्वर ओक सभागृहात आयोजित कार्यक्रमात  शासन, अर्थ, बॅंकिंग, तंत्रज्ञान  क्षेत्रात उल्लेखनीय कार्य करणाऱ्या व्यक्ती व संस्थांना पुरस्कार प्रदान करण्यात आले. ऊर्जा क्षेत्रातील उल्लेखनीय कार्यामुळे महाराष्ट्र शासनाचा ऊर्जा विभाग ‘इंडिया गव्हर्नन्स फोरम’ च्या ‘स्कॉच स्टेट ऑफ गव्हर्नन्स रिपोर्ट’ 2021 मध्ये देशात प्रथम स्थानावर राहिला. या उपलब्धीसाठी राज्याच्या ऊर्जा विभागालाही यावेळी पुरस्काराने गौरविण्यात आले. स्कॉच ग्रुपचे अध्यक्ष समीर कोचर यांच्या हस्ते प्रधान सचिव दिनेश वाघमारे यांनी हा पुरस्कार स्वीकारला. महाराष्ट्र राज्य विद्युत मंडळाच्या महापारेषण कंपनीचे सल्लागार श्याम प्रसाद, सुत्रधारी कंपनीचे निवासी कार्यकारी संचालक प्रफुल्ल पाठक यावेळी उपस्थित होते.

                                            ऊर्जा विभागाच्या उपलब्धीविषयी      

राज्य शासनाच्या ऊर्जा विभागाच्या महापारेषण कंपनीने ड्रोनचा वापर करून दुर्गम भागातील अति उच्च दाब वाहिन्यांचे  सर्वेक्षण व देखरेख केली. मुंबई उपनगर व शहरी भागातील महत्त्वाच्या पारेषण वाहिन्यांच्या जुन्या तारा बदलून नवीन एचटीएलएस कंडक्टरचा उपयोग करून वाहिन्यांच्या क्षमतेत वाढ केली. मोनोपोल मनोऱ्यांचा वापर सुरू केला परिणामी, वहिवाट मार्गाची समस्या कमी करण्यात व रखडलेले प्रकल्प पूर्ण करण्यासाठी नवा पर्याय उपलब्ध झाला.

‘एचव्हीडीसी योजने’अंतर्गत एकूण 1 लाख 29 हजार 546 कृषीपंप ऊर्जान्वित झाले. ‘मुख्यमंत्री सौर कृषीपंप योजने’अंतर्गत एकूण 99 हजार 744 कृषीपंप बसविण्यात आले. 24 एप्रिल 2021 पासून सुरू झालेल्या ‘डॉ.बाबासाहेब आंबेडकर जीवन प्रकाश योजने’अंतर्गत अनुसूचित जाती, जमाती व भटक्या विमुक्त घटकांसाठी सुमारे 12 हजार 102 घरगुती वीजजोडणी देण्यात आली.

कोरोना काळात राज्यातील जनतेला अखंडित व विक्रमी वीजपुरवठा झाला. सुयोग्य नियोजन केल्यामुळे तौक्ते, निसर्ग चक्रीवादळ, पूरपरिस्थितीतही विद्युतपुरवठा सुरळीत ठेवला. या सर्व बाबींच्याआधारे महाराष्ट्राने ‘स्कॉच स्टेट ऑफ गव्हर्नन्स रिपोर्ट’ 2021 मध्ये देशात प्रथम स्थान मिळविले आहे.

कानपूर दि. 19 : महिला सुरक्षेबाबत संवेदनशिलतेने पाऊले उचलण्यासाठी मार्गदर्शक यंत्रणा निर्माण करणे आवश्यक आहे. या विषयात स्त्री आधार केंद्र संस्थेच्या माध्यमातून 1996 ते 2010 या काळात पोलिस अधिकारी आणि कर्मचारी यांच्यासाठी स्त्री-पुरुष समानता आधारित प्रशिक्षण घेण्यात आली. सध्याही आम्ही पोलिस व महिला कार्यकर्त्यांच्या सहकार्याने काम करीत आहोत, अशा सक्रीय सहभागाशिवाय सामाजिक विकास प्रक्रिया अपूर्ण असते, असे प्रतिपादन महाराष्ट्र विधान परिषदेचे उपसभापती डॉ. नीलम गोऱ्हे यांनी केले.

कानपूर स्थित समाजसेविका श्रीमती नीलम चतुर्वेदी यांच्या सखी केंद्राच्या वतीने आयोजित कार्यक्रमात डॉ. गोऱ्हे यांनी मार्गदर्शन केले. त्यांनी महाराष्ट्रातील स्त्री आधार केंद्राच्या माध्यमातून पोलीस अधिकारी व अधिकाऱ्यांच्या मदतीने एकूण 80 कार्यशाळा पूर्ण करण्यात आल्याचे सांगितले. वेगवेगळ्या प्रकरणांमध्ये विहित कार्यप्रणाली ठरविणे हा या कार्यशाळेचा उद्देश होता. बलात्कार, अत्याचाराच्या घटनांमध्ये पीडित महिलेचा जबाब कसा घ्यायचा. अशा आपत्तीमध्ये सापडलेल्या जर कोणी मूकबधिर, कर्णबधिर, विशेष अपंग महिला असेल तर त्यांची उत्तरे कोणत्या माध्यमातून मिळवायची, पोलिसांशी कसे बोलावे, याचे प्रशिक्षण देण्यात आले. या विहित कार्यप्रणाली तयार करण्याचे काम सुमारे दहा वर्ष चालले आणि आजही सुरु आहे. पोलिसांशी संवाद आणि सहकार्याने हे काम केले जात आहे. विधान परिषदेची रचना, कायद्याची माहिती आणि सहाय्यक कार्य, कायदेशीर सहाय्य, पर्यावरणीय बदल, महिलांना न्याय मिळवून देण्यासाठी सेवा आणि महिला संस्थांचे व्यवस्थापन यांसारख्या महत्त्वाच्या मुद्द्यांवर डॉ. गोऱ्हे यांनी मार्गदर्शन केले. आंतरराज्य स्तरावर, महिला संस्थांचा संवाद आवश्यक आहे आणि ज्यांना महिला संस्थेच्या कार्यात सहभागी व्हायचे आहे त्यांनी संपर्क करण्याचे आवाहन केले.

सखी केंद्राच्या संचालिका नीलम चतुर्वेदी यांनी समाजातील विविध व्यक्ती जसे की, दिव्यांग जेष्ठ नागरिकांनी हिंसाचार पीडित महिलांसाठी सखी केंद्र कसे काम करत आहे याची माहिती दिली. सखी केंद्राने संकेतस्थळ व मोबाईल ॲप तयार केले आहे. सर्वांनी या ॲपच्या माध्यमातून संस्थेच्या कामात सहभागी होण्याचे आवाहन त्यांनी केले. महिला कार्यकर्त्यांनी कोविडच्या कामकाजाच्या काळात संस्थांना केलेल्या मदतीबाबत त्यांचे अनुभव कथन केले.

श्रीमती जेहलम जोशी यांनी पर्यावरण बदलाविषयी आपले विचार मांडले. विकासाच्या सीमेपासून कोणालाही दूर ठेवू नये यासाठी काम करत असल्याचे सांगितले. तसेच स्त्री आधार केंद्र शाश्‍वत विकासाच्या उद्दिष्ट बद्दल कशा पद्धतीने काम करीत आहे याबाबत भूमिका सांगितली महिला कार्यकर्त्यांना तयार करण्याचे कामही स्त्री आधार केंद्राच्या माध्यमातून केले जाते.

स्त्री आधार केंद्राच्या विश्वस्त आणि डॉ. नीलम गोऱ्हे यांच्या भगिनी श्रीमती जेहलम जोशी सामाजिक कार्यकर्ता श्रीमती नीलम चतुर्वेदी, विधानपरिषदेचे उपसभापती यांचे विशेष कार्य अधिकारी सचिन चिखलकर व मोठ्या संख्येने स्थानिक महिला कार्यकर्त्यांची यावेळी उपस्थिती होती.

मुंबई दि. 19 : मुंबई पोलिसांच्या वतीने नरिमन पॉईंट येथे संडे स्ट्रीट उपक्रमात विविध कार्यक्रमांचे आयोजन करण्यात आले होते. या कार्यक्रमाला गृहमंत्री दिलीप वळसे-पाटील यांच्यासह अभिनेता अक्षय कुमार उपस्थित होते. गृहमंत्री दिलीप वळसे-पाटील यांनी या उपक्रमाचे कौतुक करून शुभेच्छा दिल्या.

मुंबई शहरातील लोकांना तणावमुक्त वातावरणामध्ये वावरता यावं. त्यांना मनोरंजन, योगा, जॉगिंग, सायकलिंग आणि सांस्कृतिक खेळ यांसारख्या कार्यक्रमांचा आनंद घेता यावा याकरिता मुंबई पोलिसांमार्फत ‘संडे स्ट्रीट‘ संकल्पना राबवण्यात येत आहे. मुंबई पोलीस आयुक्त संजय पांडे, मुंबई पोलीस सह आयुक्त विश्वास नांगरे-पाटील यांसह वरिष्ठ पोलीस अधिकारी आणि कर्मचारी यावेळी उपस्थित होते.

गृहमंत्री श्री.वळसे-पाटील म्हणाले, संडे स्ट्रीट अतिशय चांगला उपक्रम असून तो सातत्याने सुरु राहिल असा विश्वास वाटतो. मुंबई पोलीस आयुक्त संजय पांडे मुंबईतील विविध भागात याचे आयोजन करण्यासाठी प्रयत्नशील आहेत. या उपक्रमाच्या माध्यमातून पोलिसांमधील कलागुणांना वाव मिळतो आहे, ही अतिशय कौतुकास्पद बाब आहे.

यावेळी अभिनेता अक्षय कुमार म्हणाले, कोविड काळात सर्वत्र शांतता होती. परंतु आता दिसणारे हे चित्र दिलासादायक आहे. संडे स्ट्रीट कल्पना कायम स्वरूपी राबवावी. पोलिसांचे लोकांसोबत संबंध दृढ करण्यासाठी हा चांगला उपक्रम आहे.

मुंबईमध्ये आज एकूण 13 ठिकाणी ‘संडे स्ट्रीट‘ कार्यक्रमाचे आयोजन करण्यात आले होते. मुंबई पोलिसांच्या या उपक्रमाचे मुंबईकरांनी स्वागत केले असून नागरिक मोठ्या संख्येने उपस्थित होते.

मुंबई,दि.19 : मुंबईमधील कामाठीपुरा येथील शरीरविक्रय करणाऱ्या महिलांच्या 8 मुलींनी तयार केलेल्या सचित्र पोस्टकार्ड्सचे अनावरण राज्यपाल भगतसिंह कोश्यारी यांच्या हस्ते शनिवारी (दि. 18) राजभवन येथे करण्यात आले.

मुंबई सर्कलच्या पोस्ट मास्टर स्वाती पांडे, प्रोजेक्ट मुंबईचे मुख्याधिकारी  शिशिर जोशी, रुपेश सोनवाले तसेच इतर मान्यवर यावेळी उपस्थित होते.