आमदार गिरिष महाजन व आमदार मंगेश चव्हाण सुध्दा उपस्थित
लोकल ट्रेनने केला चर्चगेट ते विरार पर्यंतचा प्रवास
मुंबई, दि. १८ जून- महाविकास आघाडी सरकारच्या विरोधात सध्या सत्ताधारी व अपक्ष आमदारांमध्ये मोठ्या प्रमाणात नाराजी व असंतोषाचे वातावरण दिसत आहे. त्यामुळे विधानपरिषद निवडणुकीच्या निमित्ताने या नाराज आमदारांची नाराजी उघड होऊ शकेल व आम्हाला निवडणुकीत अपेक्षित यश मिळेल असा विश्वास विधानपरिषदेचे विरोधी पक्ष नेते प्रविण दरेकर यांनी आज व्यक्त केला.
विधानपरिषदेचे विरोधी पक्ष नेते प्रविण दरेकर, भाजपचे ज्येष्ठ नेते, आमदार गिरीश महाजन,आमदार मंगेश चव्हाण यांनी आज बहुजन विकास आघाडीचे आमदार हितेंद्र ठाकूर यांची विरार येथे भेट घेतली. विधानपरिषद निवडणुक ही आमच्यासाठी महत्त्वाची असून अपक्ष असो वा छोटे पक्ष यांचे एक-एक मत महत्त्वाचे आहे. याच पार्श्वभूमीवर बहुजन विकास आघाडीचे आमदार हितेंद्र ठाकूर यांची आज विवा कॉलेज येथे भेट घेतली व त्यांच्याशी सोमवारी होणा-या विधानपरिषद निवडणुकीच्या निमित्ताने चर्चा केली असे विरोधी पक्ष नेते दरेकर यांनी सांगितले.

विरोधी पक्ष नेते दरेकर यांच्यासह आमदार महाजन व आमदार चव्हाण यांनी विरारपर्यंतचा प्रवास हा लोकल ट्रेनने केला.विधानपरिषद निवडणुकीच्या निमित्ताने पक्षाच्या महत्त्वाच्या बैठका सध्या होत असून त्या बैठकींनाही उपस्थित राहावे लागणार आहे. त्यामुळे वेळेची बचत होण्याच्या दृष्टीने आम्ही रस्ते मार्गे प्रवास करण्याएवजी रेल्वे लोकल ट्रेनने विरार पर्यंतचा प्रवास केला. असेही दरेकर यांनी सांगितले.

महाराष्ट्र राज्य महिला आयोगाच्या ‘आरोग्यवारी’ अभियानाचा पुण्यातून शुभारंभ

▪️महिला वारकऱ्यांना विसावा कक्ष
▪️स्तनदा मातांसाठी हिरकणी कक्ष
▪️सॅनिटरी पॅड व्हेंडिंग व बर्निंग मशीन
▪️आरोग्य तपासणीसाठी तज्ज्ञ महिला डॉक्टर

पुणे, दि. १८: आगामी पंढरपूर वारीमध्ये सहभागी होणाऱ्या महिला वारकऱ्यांना मुलभूत सुविधा उपलब्ध करुन देण्याच्या ‘आरोग्यवारी’ उपक्रमाचा शुभारंभ पुण्यातील पालखी विश्रामस्थळ असलेल्या निवडुंगा विठोबा मंदिर येथे उद्या १९ जून रोजी दुपारी १२.३० वा. महाराष्ट्र राज्य महिला आयोगाच्या अध्यक्षा रुपाली चाकणकर यांच्या हस्ते होत आहे.

श्रीमती चाकणकर यांच्या संकल्पनेतून हा उपक्रम साकारला जात आहे. या कार्यक्रमाच्या उद्घाटनाला खासदार ॲड.वंदना चव्हाण उपस्थित राहणार आहेत.

आषाढी व कार्तिकी वारीच्या निमित्ताने वारकरी महाराष्ट्राच्या कानाकोपऱ्यातून देहू, आळंदी, पंढरपूर येथे दाखल होत असतात. यामध्ये महिलांची संख्या देखील लक्षणीय असते हे लक्षात घेता श्रीमती चाकणकर यांनी ‘आरोग्यवारी’ या उपक्रमाच्या माध्यमातून वारीमध्ये सहभागी होणाऱ्या महिलांना काही मुलभूत सुविधा उपलब्ध करुन देण्याबाबत आग्रही भूमिका घेतली होती.

पुणे, सातारा आणि सोलापूर जिल्हा प्रशासनाला, वारी काळात दर दहा ते वीस कि.मी. अंतरावर वारकरी महिलांसाठी शौचालय व न्हाणी घराची व्यवस्था करणे, सॅनिटरी नॅपकिन वेंडिंग व सॅनिटरी नॅपकिन बर्निंग मशीन उपलब्ध करून देणे, स्त्रीरोग तज्ज्ञांची सुविधा उपलब्ध करुन देणे यासोबतच महिला सुरक्षिततेकरीता महिला हेल्पलाईन क्रमांक मुक्कामाच्या ठिकाणी/मंदिर परीसरात दर्शनी भागात लावण्याचे निर्देश देण्यात आले होते. याशिवाय महिला वारकऱ्यांना विसावा कक्ष, स्तनदा मातांसाठी हिरकणी कक्ष उपलब्ध करण्याबाबतही सूचित करण्यात आले होते.

या तीनही जिल्ह्याच्या प्रशासनाने ‘आरोग्यवारी’ या संकल्पनेला सकारात्मक प्रतिसाद देत महिला वारकऱ्यांसाठी या सुविधा उपलब्ध करून दिल्या आहेत. त्याबद्दल महाराष्ट्र राज्य महिला आयोगाने प्रशासनाचे अभिनंदन केले आहे. आरोग्य आणि सुरक्षाबाबतीतच्या या महत्वाच्या सुविधा महिला वारकऱ्यांच्या उपलब्ध करून दिल्याने पुरोगामी महाराष्ट्रात महिला आरोग्य विषयक जागृतीचा एक नवीन अध्याय सुरु झाला आहे, असे मत श्रीमती चाकणकर यांनी व्यक्त केले आहे.

पुणे : वाहनांची तोडफोड, दहशत माजविणे असे गंभीर गुन्हे दाखल असलेल्या कोथरुडमधील एका गुंडाविरोधात पोलीस आयुक्त अमिताभ गुप्ता यांनी झोपडपट्टी दादा प्रतिबंधक कायद्यान्वये (एमपीडीए) कारवाई करण्याचे आदेश दिले. ऋषीकेश उर्फ शुभम मधुकर वाघमारे (वय २४, रा. गुजरात काॅलनी, कोथरुड) असे कारवाई केलेल्या गुंडाचे नाव आहे.

या गुंडाची औरंगाबादमधील कारागृहात रवानगी करण्यात आली आहे.वाघमारे विरोधात कोथरुड, विश्रामबाग पोलीस ठाण्यात गुन्हे दाखल आहेत. गेल्या पाच वर्षात त्याच्या विरोधात गंभीर स्वरुपाचे पाच गुन्हे दाखल झाले होते. त्याच्या दहशतीमुळे नागरिकही तक्रार करत नव्हते. त्याच्या विरोधात झोपडपट्टी दादा प्रतिबंधक कायद्यान्वये (एमपीडीए) कारवाई करण्याचा प्रस्ताव कोथरुड पोलीस ठाण्याचे वरिष्ठ पोलीस निरीक्षक महेंद्र जगताप आणि गुन्हे प्रतिबंधक शाखेच्या पोलीस निरीक्षक वैशाली चांदगुडे यांनी तयार केला होता.या प्रस्तावाला पोलीस आयुक्त गुप्ता यांनी नुकतीच मंजुरी दिली. वाघमारे याला वर्षभरासाठी ओैरंगाबादमधील कारागृहात स्थानबद्ध करण्यात येणार आहे. शहरात दहशत माजविणाऱ्या ६९ गुंडां विरोधात झोपडपट्टी दादा प्रतिबंधक कायद्यान्वये कारवाई करण्यात आली आहे

अधिकाऱ्याला जीवे मारण्याची धमकी देऊन हुसकावून लावले.

पुणे- येवले वाडीतील जागा बळजबरीने हस्तगत करू पाहण्याचा प्रकार एकीकडे उघडकीस आलेला असताना दुसरीकडे कोंढवा बुद्रुक सर्वे नंबर ५५ ता. हवेली येथे हि राज्य वक्फ मंडळाच्या प्रादेशिक वक्फ अधिकारी खुसरो खान यांना भूखंडाच्या कारणावरूनच ५ ते ६ लोकांनी दमदाटी करून जीवे मारण्याची धमकी देऊन शासकीय काम करण्यात अडथळाकरत हुसकावून लावल्याचा प्रकार घडला .कोंढवा पोलीस ठाण्यात याप्रकरणी गुन्हा दाखल करण्यात आला असून फौजदार वैभव सोनावणे अधिक तपास करीत आहेत.सदरची जागा आलमगीर मस्जिद देवस्थान कोंढवा बुद्रुक यांच्या मालकीची असताना या जागेशी अन्य कोणी व्यवहार करू नये म्हणून हे अधिकारी तिथे फलक लावण्यास गेले असताना अगोदरचे फलक आणि लावण्यासाठी नेलेले फलक दोन्ही उखडून फेकून संबधित अधिकाऱ्यास शिवीगाळ, दमदाटी करत जीवे मारण्याची धमकी देऊन हुसकावून लावण्यात आले. अशी माहिती पोलिसांनी दिली आहे.

सोमवारी दिनांक २० जून रोजी सकाळी ११ वाजता आम आदमी पक्षातर्फे हंडा मोर्चाचे आयोजन

पुणे- पाणीटंचाई कृत्रिमरीत्या वाढवून तिचे रूपांतर पाणीबाणीमध्ये केलेले आहे. पुणे मनपा प्रशासनाला पाणीचोरीला पायबंद घालण्यात अपयश आले आहे. टँकर लॉबीला प्रस्थापित नगरसेवकांचे आणि भ्रष्ट प्रशासकीय अधिकाऱ्यांचे संरक्षण असून या पाणीबाणी विरोधात सोमवारी दिनांक २० जून रोजी सकाळी ११ वाजता आम आदमी पक्षातर्फे हंडा मोर्चाचे आयोजन करण्यात आले आहे. या आंदोलनात त्रस्त नागरिकांनी मोठ्या संख्येने सहभागी व्हावे असे आवाहन आप पुणे शहर जल हक्क आंदोलन समितीचे आबासाहेब कांबळे (8390906656) व सुदर्शन जगदाळे (9527911911) यांनी केले आहे.अशी माहिती येथे आप चे राज्य प्रवक्ते डॉ अभिजीत मोरे यांनी दिली आहे.

या संदर्भात डॉ अभिजीत मोरे यांनी सांगितले कि,’ टँकर लॉबीच्या दबावाखाली पुणे शहरात तीव्र पाणीटंचाई निर्माण केली गेली असून त्यामूळे टँकर लॉबीचे उखळ पांढरे झाले आहे. या टँकर लॉबीला प्रस्थापित नगरसेवक आणि प्रशासनाचे संरक्षण आहे. पुण्यातील विशेषत: बाणेर, बालेवाडी, हडपसर, फुरसुंगी, काळे पडळ, साडे सतरा नळी, मोहम्मदवाडी, खडी मशीन चौक, उंद्री, पिसोली, वडकी नाला, येवलेवाडी, कोंढवा बू. वनावडी, कात्रज, आंबेगाव पठार,आंबेगाव बू. , नऱ्हे, वडगाव बू. सिंहगड रोड, धायरी, नांदेड फाटा, किरकटवाडी, कोल्हेवाडी, खडकवासला, वारजे_ माळवाडी गणपती माथा, कोंढावे- धावडे, NDA गेट, बावधान, ससरोड, सुसगाव, बाणेर, बालेवाडी, म्हाळुंगे, दापोडी, बोपोडी, मुळा रोड, विश्रांतवाडी, कळस, धानोरी, लोहगाव, विमान नगर, खराडी, चंदन नगर बायपास, मांजरी, वाघोली या भागांमध्ये तीव्र पाणटंचाई निर्माण केली गेल्याने या परिसरातील हजारो गृह सोसायट्यांना पिण्यासाठी पाणी विकत घ्यावे लागत आहे. त्यासाठी अक्षरशः लाखो रुपये प्रत्येक महिन्याला एका सोसायटीला मोजावे लागत आहे. महागाईच्या जमान्यात तुटपुंज्या पैशात घर चालवणारे वस्तीत राहणाऱ्या लोकांना सुद्धा पाणी विकत घेण्याची वेळ आली आहे. उच्च न्यायालयाने आदेश देऊन सुद्धा पुणे मनपाने शहराच्या परीघावरील नवीन समाविष्ट गावांना आणि पूणे मनपा हद्दीतील जुन्या भागांना पुरेसा पाणी पुरवठा केलेला नाही. नको त्या योजनांवर, भ्रष्ट कंत्राटावर, फुटकळ खरेदीवर, वायफळ बांधकामांवर कोट्यावधी रुपये खर्च करणारी पुणे मनपा नागरिकांना पाणी देण्यासाठी मात्र हात वर करत आहे. या मनपाला तिच्या जबाबदारीची जाणीव करून देणे गरजेचे आहे.पुणे मनपाला पाणीपट्टी भरुन देखील पाण्यासाठी लाखो रुपये नागरिकांना मोजावे लागत आहेत. या विरोधात आम आदमी पक्षाच्या जल हक्क समितीद्वारे वेळोवेळी निदर्शने देखील केली आहेत. तसेच याबाबत अभियान राबवून शेकडो गृह सोसायट्यांनी पुणे मनपाला आम आदमी पक्षातर्फे निवेदने दिलेली आहेत. पण मुर्दाड व्यवस्था अजूनही तशीच आहे. या पाणी चोरीच्या भ्रष्ट व्यवस्थेला जनतेने धक्का द्यायची वेळ आली आहे. याकरिता या हंडा मोर्चाचे आयोजन करण्यात आले आहे.असेही डॉ अभिजीत मोरे यांनी म्हटले आहे.

पुणे- येवलेवाडी येथील जमिनीचा आपल्याबरोबरच व्यवहार करावा , यासाठी धमकावून गुंडांमार्फत जीवे मारण्याचा प्रयत्न केल्या प्रकरणी भाजपचा माजी नगरसेवक विष्णु अप्पा हरिहर यांच्यासह चौघांवर गुन्हा दाखल करण्यात आला आहे.विष्णु अप्पा हरिहर, राहुल दत्ताराम खुडे (वय ३८, रा. डायस प्लॉट, गुलटेकडी), प्रेम शाम क्षीरसागर (वय १८, रा. पर्वती दर्शन) व त्याचे इतर साथीदारांवर गुन्हा दाखल करण्यात आला आहे स्वारगेट पोलिसांनी राहुल खुडे व प्रेम क्षीरसागर या रेकॉर्डवरील गुंडांना अटक केली आहे.

याबाबत सादीक सलीम खोजा (वय ३९, रा. बोट क्लब रोड) यांनी स्वारगेट पोलीस ठाण्यात फिर्याद (गु. रजि. नं. ११५/२२) दिली आहे. ही घटना सॅलिसबरी पार्कमधील गोल्डन बेकरीसमोर २७ मे रोजी रात्री साडेनऊ व ६ जून रोजी दुपारी चार वाजता घडली. पोलिसांनी खूनाचा प्रयत्न केल्याचा गुन्हा दाखल केला आहे.

याबाबत पोलिसांनी दिलेल्या माहितीनुसार, फिर्यादी यांचा जमीन खरेदी विक्रीचा व्यवसाय आहे त्यांची वडिलोपार्जित जमीन कोंढवा येवलेवाडी येथे आहे. तेथे त्यांना काही तरी व्यावसायिक प्रकल्प सुरु करायचा होता. पण, लॉकडाऊनमुळे ते व्यवसाय सुरु करु शकले नाही. २०२१ मध्ये विष्णू हरिहर व राहुल खुडे यांच्याकडे आले व ती जमीन त्यांना पाहिजे असल्याचे सांगितले. योग्य भाव दिल्यास व्यवहार करु असे बोलणे झाले. त्यानंतर ती जागा हरिहर यांनाच विकण्यासाठी त्यांच्यावर दबाव आणू लागले. २७ जून रोजी रात्री साडेनऊ वाजता फिर्यादी यांचे मित्र नसीर अन्सारी यांच्या सॅलिसबरी पार्क येथील गोल्डन बेकरीजवळ विष्णु हरिहर व इतर लाठ्या, काठ्या, कोयते घेऊन आले. नसीर अन्सारी यांना दमदाटी करुन त्यांच्या कारची तोडफोड केली. स्थानिक राजकीय व्यक्ती एकनाथ ढोले यांनी मध्यस्थी केल्याने नसीर अन्सारी यांनी तक्रार केली नव्हती.

या घटनेनंतर १ जून रोजी फिर्यादी यांना राहुल खुडे यांचा फोन आला. त्यात खुडे याने फिर्यादींना धमकाविले.
येवलेवाडी येथील जमिनीचा व्यवहार विष्णु हरिहर बरोबर कर. नाही तर गोळ्या घालून मारेल, अशी धमकी दिली.
फिर्यादी यांनी त्याला महत्व दिले नाही.

फिर्यादी हे ६ जून रोजी दुपारी नसीर अन्सारी यांना भेटण्यासाठी गोल्डन बेकरी येथे आले होते.त्यांच्याशी व्यवहारासंबंधी मिटींग करुन ते बेकरीबाहेर लावलेल्या कारकडे आले असताना त्यांना काही अंतरावर राहुल खुडे हा मोटारसायकलवर आलेला दिसला.त्यांना पाहून तो मोटारसायकलवरुन उतरुन त्यांच्या दिशेने रिव्हाल्व्हरसारखे काही तरी काढून त्यांच्या दिशेने रोखून धरत होता.फिर्यादी हे घाबरून तातडीने कारमध्ये बसून जीवाच्या भितीने वेगात कार चालवत घरी आले.धाडस करुन ते महर्षीनगर पोलीस चौकी येथे तक्रार देण्यासाठी गेले.परंतु जीवाच्या भितीने राहुल खुडे व विष्णु हरिहर काही तरी अपाय करेल, या भितीने त्यांनी सविस्तर तक्रार दिली नाही.पोलीस उपनिरीक्षक भोसले तपास करीत आहेत.

पुणे : झाशीची राणी लक्ष्मीबाई यांच्या पुण्यतिथीनिमित्त बालगंधर्व चौकात राणी लक्ष्मीबाई यांच्या अश्वारूढ पुतळ्याजवळ अहिल्यादेवी शाळा आणि मा. स. गोळवलकर गुरुजी प्रशालेच्या विद्यार्थ्यांनी अभिवादन केले.
ढोल-ताशाच्या गजरात गोळवलकर गुरजी प्रशालेच्या विद्यार्थ्यांनी मानवंदना दिली. मेरी झांसी नहीं दूंगी, खूब लड़ी मर्दानी वो तो झांसीवाली रानी थी, वंदे मातरम, भारत माता की जय अशा घोषणांनी वातावरण दुमदुमून गेले.
स्वरा अपामार्जने या विद्यार्थिनींने पोवाड्याचे गायन केले. हिरण्याक्षी पवार हिने लक्ष्मीबाईंची चरित्रकथा, पराक्रम कथन केला. गाथा राऊत या विद्यार्थिनीने झाशीच्या राणीची वेशभूषा केली होती.       अहिल्यादेवीच्या पर्यवेक्षिका चारुता प्रभुदेसाई, शिक्षिका दीपाली थोरात, डॉ. सुलोचना शिंदे-माने, सुभाष निंबाळकर, प्रशांत जाधव यांनी संयोजन केले.

मंत्री धनंजय मुंडे यांच्याकडून विद्यार्थ्यांचे अभिनंदन

पुणे दि.१८-राज्यात समाज कल्याण विभागामार्फत चालविण्यात येणार्‍या डॉ. बाबासाहेब आंबेडकर अनुसूचित जाती मुलां व मुलींच्या शासकीय निवासी शाळेमधील विद्यार्थ्यांनी दहावीच्या परीक्षेत घवघवीत यश संपादन केले आहे. राज्यात कार्यरत असलेल्या एकूण ९० पैकी ७७ निवासी शाळांचा निकाल हा १०० टक्के लागला आहे. विद्यार्थ्यांच्या या लक्षणीय कामगिरीबद्दल सामाजिक न्याय मंत्री धनंजय मुंडे यांनी निवासी शाळेतून उत्तीर्ण झालेल्या सर्व विद्यार्थ्यांचे अभिनंदन केले आहे व पुढील वाटचालीस शुभेच्छा दिल्या आहेत.

या सर्व शाळांमधून ९० टक्क्यांपेक्षा अधिक गुण मिळवणारे ११९ विद्यार्थी आहेत हे विशेष. ६ शाळांचा निकाल ९५ टक्के लागला आहे, तर ४ निवासी शाळांचा निकाल ९० टक्के लागला आहे. या सर्व निवासी शाळेच्या विद्यार्थ्यांमधून अमरावती विभागाच्या रुपाली रमेश सभादींडे हिने प्रथम क्रमांक पटकावला आहे. तिला ९५.८० टक्के गुण मिळाले आहेत. द्वितीय क्रमांक गायत्री रामकृष्ण सरदार ९५.२० टक्के, तर तृतीय क्रमांक ममता बाळू तायडे हिला ९५ टक्के गुण मिळाले आहेत. समाज कल्याण विभागाच्या शाळांमध्ये मुलींनी उल्लेखनीय यश मिळविले आहे.

राज्यातील सर्व निवासी शाळांच्या कामगिरीबद्दल सामाजिक न्याय मंत्री धनंजय मुंडे, राज्यमंत्री डॉ.विश्वजीत कदम, सचिव सुमंत भांगे, आयुक्त डॉ. प्रशांत नारनवरे यांनी सर्व विद्यार्थी, शाळांचे मुख्याध्यापक, कर्मचारी, शिक्षक यांचेदेखील अभिनंदन केले आहे.

चोकट

डॉ. प्रशांत नारनवरे, आयुक्त समाज कल्याण विभाग -राज्यातील अनुसूचित जातीच्या मुला-मुलींच्या इयत्ता दहावीतील लक्षणीय यशाबद्दल विद्यार्थ्यांचे हार्दिक अभिनंदन. येणाऱ्या काळात देखील गुणवत्ता वाढीसाठी अधिक प्रयत्न विभागाच्यावतीने करण्यात येणार असून लवकरच या निवासी शाळांमध्ये सीबीएससी अभ्यासक्रम सुरू करण्यात येणार आहे

पुणे, दि.१८:  विघ्नहर गणपती देवस्थान ट्रस्टच्या संकल्पनेतून श्री क्षेत्र ओझर येथे लहान मुलांच्या मनोरंजनासाठी व जेष्ठाना विरंगुळा मिळावा यासाठी साकारण्यात आलेल्या विघ्नहर उद्यानाचे उद्घाटन शुक्रवारी सायंकाळी (दि.१७) राज्याचे उच्च व तंत्र शिक्षण मंत्री उदय सामंत यांच्या हस्ते झाले.

श्री विघ्नहर मंदिरालगत या उद्यानाची निर्मिती करण्यात आली आहे. या उद्घाटन सोहळ्याप्रसंगी माजी खासदार शिवाजीराव अढळराव पाटील, जिल्हा परिषदेच्या माजी सदस्या आशाताई बुचके, विघ्नहर सहकारी साखर कारखान्याचे चेअरमन सत्यशील शेरकर, जुन्नर शहराचे माजी नगराध्यक्ष श्याम पांडे, ओझर गावच्या सरपंच मथुरा कवडे,ओझर नं-२ च्या सरपंच तारामती कर्डक, देवस्थान ट्रस्टचे अध्यक्ष गणेश कवडे ,उपाध्यक्ष अजित कवडे, सचिव दशरथ मांडे आदी उपस्थित होते.

देवस्थान ट्रस्टने निर्माण केलेले आणि त्यात एकवीस पत्री गणेशाच्या प्रिय वनस्पतीची लागवड असलेले हे महाराष्ट्रातील एकमेव उद्यान असेल असा उल्लेख करून मंत्री श्री. सामंत यांनी भाविकांच्या सुख सोईसाठी निर्माण केलेल्या सर्व सुविधांचे विशेष कौतुक केले. 

श्री. सामंत म्हणाले, हे उद्यान लहान-थोरांचा विचार करून कल्पकतेने निर्माण करण्यात आले आहे. लहानांचे मनोरंजन आणि ज्येष्ठांची विश्रांती या दोन्ही बाबी येथे साध्य होतील. पुढील काळात देवस्थान ट्रस्टला विकासासाठी शासनाकडून निश्चितच सहकार्य दिले जाईल.

याप्रसंगी देवस्थान ट्रस्टचे पदाधिकारी, सदस्य, ग्रामपंचायत सदस्य, ग्रामस्थ उपस्थित होते.