– बाराव्या छात्र संसदेचे दिमाखदार उद्घाटन एमआयटी डब्ल्यूपीयूत
– भावी युवा राजकीय नेतृत्व घडवण्यात छात्र संसदेची महत्त्वपूर्ण भूमिका

पुणे, दि. १५ सप्टेंबर: विद्यापीठे आणि शिक्षण संस्थांमधील स्थगित असलेल्या विद्यार्थी निवडणुका पुन्हा सुरू झाल्या पाहिजेत. देशातील सद्यकालीन राजकीय प्रवाह एका स्थित्यंतरातून जात आहे. अशा परिस्थितीत राजकीय पटलावरील भावी युवा नेतृत्व घडवण्यासाठी भारतीय छात्र संसद महत्त्वपूर्ण योगदान देऊ शकेल, अशी अपेक्षा भारत सरकारचे कायदा आणि न्याय राज्यमंत्री प्रा. एस. पी. सिंह बघेल यांनी गुरुवारी येथे व्यक्त केली. प्रा. बघेल यांच्या या वक्तव्याला उपस्थित हजारो विद्यार्थ्यांनी जोरदार टाळ्यांनी प्रतिसाद देत त्यांच्या विधानाचे स्वागत केले.

भारतीय छात्र  संसद फाऊंडेशन, एमआयटी स्कूल आफ गव्हर्नमेंट आणि एमआयटी वर्ल्ड पीस युनिव्हर्सिटी आयोजित बाराव्या छात्र संसदेच्या उद्घाटनप्रसंगी ते प्रमुख पाहुणे म्हणून बोलत होते.

इस्त्रोचे माजी अध्यक्ष डॉ. कैलासवादिवू सिवन,  पर्यावरण अभ्यासक पद्मभूषण डॉ. अनिल प्रकाश जोशी, जे.के. उद्योग समूहाचे सीईओ अनंत सिंघानिया व प्रसिद्ध शास्त्रीय गायिका श्रीमती कौशिकी चक्रवर्ती हे सन्माननीय अतिथी म्हणून उपस्थित होते. तसेच,एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्‍वनाथ दा. कराड, कार्याध्यक्ष व मिटसॉगचे संस्थापक राहुल विश्‍वनाथ कराड, कुलगुरू डॉ. आर.एम. चिटणीस,  एमआयटी शिक्षण संस्था समुहाचे अधिष्ठाता प्रा.शरद्चंद्र दराडे-पाटील, पंडित वसंतराव गाडगीळ व मिटसॉगचे संचालक डॉ. के. गिरीसन  हे उपस्थित होते.

श्री बघेल पुढे म्हणाले, रामराज्य हे आदर्श प्रशासनाचे उदाहरण होते, हे आपण आजही मान्य करतो. एमआयटी विद्यापीठासारख्या शिक्षणसंस्था यापुढे देशाला विश्‍वाच्या पटलावर विश्‍वगुरू ही संज्ञा प्राप्त करून देण्यात महत्त्वाचा वाटा उचलतील, यात शंका नाही.

के. सिवन म्हणाले, अंतराळ संशोधन आणि विज्ञान तंत्रज्ञान हे फक्त राकेट, क्षेपणास्त्रे, उपग्रह प्रक्षेपकांच्या निर्मितीपुरते मर्यादित नाही. या ज्ञानाचा, संशोधनाचा उपयोग ग्रामीण भागातील सर्वसामान्य जनतेला होणे गरजेचे आणि महत्त्वाचे आहे. त्याच्या वापरातून ग्रामीण जनतेच्या कष्टमय आयुष्यात बदल घडले पाहिजेत. अंतराळ संशोधनातील नव्या शोधांमुळे आता आपल्याला वादळे, नैसर्गिक आपत्ती यांची पूर्वसूचना देणे शक्य होत आहे, ज्यामुळे मनुष्य आणि वित्तहानी टाळता येणे शक्य झाले आहे. तसेच मच्छिमार आणि शेतकर्‍यांच्या हिताचे निर्णय घेणे शक्य झाले आहे.

अनंत सिंघानिया म्हणाले, आगामी काळात मी केवळ आत्मनिर्भर भारताचे स्वप्न न पाहता, सारे जग आपल्यावर अवलंबून असल्याचे चित्र पाहात आहे. आगामी काळात लवकरच कल्पनातीत अशी तंत्रज्ञानक्रांती घडून येणार आहे. अशा काळात विद्यार्थ्यांनी नवे मार्ग, नव्या वाटा, नव्या दिशांचा ध्यास घेतला पाहिजे. प्रगती, यश यांच्या नव्या व्याख्या समजून घेतल्या पाहिजेत.

डॉ. अनिल प्रकाश जोशी, म्हणाले, दिल्ली आपली राजकीय राजधानी आहे, मुंबई आपली आर्थिक राजधानी आणि तसाच हिमालय म्हणजे पर्यावरण राजधानी आहे. काही काळापूर्वी आपण आर्थिक संकटातून जात होतो. आज आपण पर्यावरणीय संकटातून जात आहोत. पर्यावरणाचे संवेदनशील मुद्दे अधोरेखित करण्यासाठी आम्ही मुंबई ते उत्तराखंड अशी सायकल रॅली काढत आहोत. समाजमनात पर्यावरणाविषयी जाणीवजागृत निर्माण करण्याचा उद्देश यामागे आहे.

कौशिकी चक्रवर्ती यांनी छोटेखानी मनोगतात संगीताच्या माध्यमातून जीवन समजून घेण्याचा प्रयत्न सुरू असल्याचे सांगितले. गुरूमंत्र, समाजकल्याण, विश्‍वकल्याण आणि स्वतःचा शोध यांचे वर्णन करणार्या पारंपरिक रचना गाऊन कौशिकी यांनी संगीत हा शालेय जीवनापासून विद्यार्थ्यांच्या जीवनाता अविभाज्य भाग बनावा, अशी अपेक्षा व्यक्त केली.

प्रा.डॉ. विश्‍वनाथ दा. कराड  म्हणाले, स्वधर्म, स्वाभिमान आणि स्वत्व, या त्रिसूत्रीचा विद्यार्थ्यांनी स्वीकार करावा आणि आपल्या परंपरेने दिलेले तत्त्वज्ञानाचे, अध्यात्माचे संचित डोळसपणे अभ्यासावे. आपल्या विद्यार्थ्यांनी संतपरंपरेतील ज्ञानेश्‍वर महाराज, तुकाराम महाराज यांचे साहित्यविचार जाणून घेतले पाहिजेत. त्यातून त्यांना आपल्या समृद्ध सांस्कृतिक संचिताचे भान येईल आणि मानवी जीवनाचा खरा हेतू जाणण्यासाठी त्याची मदत होईल.

राहुल विश्‍वनाथ कराड म्हणाले, राजकारण ही कोणत्याही प्रकारे त्याज्य अथवा नकारात्मक गोष्ट नाही. उलट आपल्या जगण्याचा तो अविभाज्य घटक आहे. आपण राजकारणाची सकारात्मक बाजू समाजासमोर आणण्याचा प्रयत्न केला पाहिजे. विद्यार्थ्यांनी सजग नागरिकत्वाचे आदर्श निर्माण केले पाहिजेत. ज्यातून समाजाला राजकीय घडामोडी आणि राजकारण याविषयी सकारात्मक संदेश मिळतील. भारतीय छात्र संसदेच्या माध्यमातून असे शेकडो युवा विद्यार्थी घडवण्याचे आमचे ध्येय आहे. आपल्या देशाचा उल्लेख इंडिया ऐवजी भारत असा करावा, तसेच इंडिपेन्डन्स डे ऐवजी राष्ट्रीय दिवस असा उल्लेख करावा, यासाठी व्यापक अभियान सुरू करावे.

जम्मूकाश्मिरची विद्यार्थिनी नंदिता जामवाल आणि पंजाबचा विद्यार्थी धीरेंद्र सिंह यांनी विद्यार्थ्यांच्या वतीने मनोगत मांडले. प्रा.डॉ. गौतम बापट यांनी सूत्रसंचालन केले आणि डॉ.के. गिरीसन यांनी आभार मानले.

साहित्य संमेलनाचे अध्यक्ष भारत सासणे यांच्या हस्ते वृक्षारोपण मोहिमेस प्रारंभ

पुणे | लोकसेवा प्रतिष्ठान च्या वतीने 25 हजार झाडांची वृक्षारोपण मोहिम सुरू करण्यात आली आहे. अखिल भारतीय मराठी साहित्य संमेलनाचे अध्यक्ष भारत सासणे यांच्या हस्ते फुलगाव येथील लोकसेवा शैक्षणिक संकुलात वृक्षारोपण करून या मोहिमेस मंगळवारी प्रारंभ झाला. पर्यावरणाचे संतुलन केवळ झाडांमुळेच राखले जावू शकते. भविष्य ज्यांच्या हातात आहे त्या विद्यार्थ्यांच्या मार्फत ही 25 हजार झाडांची वृक्षारोपण मोहिम राबविण्यात येत आहे.

लोकसेवा प्रतिष्ठान संचलित नेताजी सुभाषचंद्र बोस सैनिकी शाळेच्या रौप्य महोत्सवी वर्षानिमित्त संस्थापक अध्यक्ष दीपक पायगुडे यांच्या संकल्पनेतून या पर्यावरणपूरक उपक्रमाचे आयोजन करण्यात आले आहे. यावेळी उदगीर येथील अखिल भारतीय मराठी साहित्य संमेलनाचे अध्यक्ष भारत सासणे सपत्नीक उपस्थित होते. त्यांनी विद्यार्थ्यांना मार्गदर्शन केले.

भारत सासणे यांना नेताजी सुभाषचंद्र बोस सैनिकी शाळेच्या विद्यार्थ्यांनी सैनिकी मानवंदना दिली. त्यानंतर ढोल- ताशांच्या गजरात वृक्षारोपण अभियानाची सुरुवात झाली. शाळेतील कलाशिक्षक शंकर साळुंके यांनी रेखाटलेले सासणे यांचे रेखाचित्र त्यांना भेट देण्यात आले.

विद्यार्थ्यांना मार्गदर्शन करताना सासणे म्हणाले की, विद्यार्थ्यांनी सत्याची कास धरावी. भावी आयुष्यात त्यांना हा मूलमंत्र उपयोगी पडेल. पुस्तक वाचनातून प्रगती करता येते. विद्यार्थ्यांच्या वयोगटानुसार पुस्तके उपलब्ध करून देण्यात यावीत अशी सूचना त्यांनी शाळेला दिली. वर्षभर विविध प्रतिभासंपन्न साहित्यिकांचे मार्गदर्शन विद्यार्थ्यांना घडावे व विद्यार्थ्यांमध्ये साहित्याची आवड निर्माण करावी.

साहित्य क्षेत्रातील उत्तुंग व्यक्तिमत्त्वाला पाहून व ऐकून विद्यार्थी भारावून गेले होते. त्यांच्यामध्ये चैतन्याचे वातावरण पसरले होते. यावेळी शिक्षण तज्ज्ञ डॉ. अ. ल. देशमुख यांनी मार्गदर्शन केले. ते म्हणाले की, पुस्तक वाचल्याने मन प्रसन्न होते, पुस्तकातील ओळी थेट हृदयापर्यंत पोहचतात. म्हणून आपल्याला आवडतात ती पुस्तके वाचावीत.

हरी उद्धव धोत्रे विद्यालयाचे मुख्याध्यापक लोंढे, धर्मवीर संभाजी राजे माध्यमिक विद्यालय तुळापूरचे मुख्याध्यापक ए. बी. जाधव, नवीन माध्यमिक विद्यालय मरकळच्या मुख्याध्यापिका लाटे, लोणीकंद प्राथमिक शाळेचे लंघे, लोकसेवा परिवारातील लेखक तानाजी गोरे, युवा स्पंदनचे चेतन धोत्रे, लोकसेवा फार्मसी कॉलेजचे प्राचार्य नरहरी पाटील, पांडुरंग जगताप, भारत पवार, तुषार वाघमारे, ईश्वर पाटील यांच्या उत्कृष्ट कार्याबद्दल भारत सासणे यांच्या हस्ते त्यांचा सन्मान करण्यात आला.

कार्यक्रमाचे प्रास्तविक लोकसेवा प्रतिष्ठानचे संचालक व लोकसेवा कॉलेज ऑफ फार्मसी चे प्राचार्य नरहरी पाटील यांनी केले. तर, पांडुरंग जगताप यांनी प्रमुख पाहुण्यांचा परिचय करून दिला. कार्यक्रमाचे संयोजन अर्जुन शिंदे यांनी केले. कार्यक्रमाचे सूत्रसंचालन मराठी विभाग प्रमुख साधना शिंदे यांनी केले. यावेळी नेताजी सुभाषचंद्र बोस सैनिकी शाळेचे प्राचार्य अमर क्षीरसागर, लोकसेवा इंग्लिश मिडियम स्कूलचे प्राचार्य डेनसिंग, टेन टी इंटरनॅशनल स्कूलचे प्राचार्य पी. शोफीमॉन, लोकसेवा मुलींची सैनिकी शाळेच्या प्राचार्या लक्ष्मी कुलकर्णी, विद्यार्थी, शिक्षक व शिक्षकेतर कर्मचारी मोठ्या संख्येने उपस्थित होते.

• पालिकेने सद्यस्थितीत वाढीव रक्कम घेऊ नये, बैठकीत सूचना
• उच्च व तंत्र शिक्षण मंत्री चंद्रकांत पाटील यांनी घेतली बैठक

पुणे, १४ सप्टेंबर –
मिळकत करामध्ये ४० टक्के सवलत देण्याबाबत आता राज्याचे मुख्यमंत्री एकनाथ शिंदे निर्णय घेणार आहेत. या विषयाबाबत मुख्यमंत्र्यांकडे बैठक लावली जाणार असून तोपर्यंत महानगरपालिकेने नागरिकांकडून कोणताही वाढीव मिळकत कर वसूल करू नये, अशा सूचना बुधवारी मुंबई येथे झालेल्या बैठकीत देण्यात आल्या.
पुणे महानगरपालिकेच्या वतीने मिळकत करामध्ये दिली जाणारी ४० टक्के सवलत पुन्हा लागू करावी तसेच नागरिकांकडून घेतली जाणारी ही फरकाची रक्कम वसूल करू नये, अशी मागणी पुणेकर नागरिक आणि सामाजिक संघटनांकडून केली जात आहे. यावर चर्चा करून पुणेकरांना दिलासा देण्यासाठी कोथरूड विधानसभा मतदार संघाचे आमदार आणि राज्याचे उच्च व तंत्रशिक्षण मंत्री चंद्रकांत पाटील यांनी बुधवारी मुंबई येथे बैठक घेतली. त्यामध्ये पुणे महानगपालिकेतील मिळकत कर विभागाचे अधिकारी, नगर विकास विभाग २ चे अधिकारी उपस्थित होते. पालिकेतील माजी सभागृह नेते गणेश बिडकर यांनी अशी बैठक घेऊन निर्णय घ्यावा, अशी विनंती पाटील यांना केली होती. त्या पार्श्वभूमीवर ही बैठक घेण्यात आली. माजी सभागृह नेते बिडकर, भाजपचे शहर प्रवक्ते संदिप खर्डेकर, नगर विकास विभागाच्या उपसचिव छापवाले मॅडम, मिळकत कर विभागाचे प्रमुख अजित देशमुख, विधी सल्लागार निशा चव्हाण, यावेळी उपस्थित होते.
शहरातील मिळकत धारकांना दिली जाणारी ४० टक्के सवलत रद्द करण्यात येत असून पालिकेने यापुढील काळात ही सवलत देऊ नये, असे राज्य सरकारने यापूर्वीच पालिकेला कळविले आहे. त्यानुसार पालिका आयुक्त विक्रम कुमार यांनी ४० टक्के सवलत रद्द केली आहे. तसेच गेल्या तीन वर्षापासून ही सवलत रद्द झाल्याने नागरिकांकडून फरकाची रक्कम वसूल करण्याच्या सूचना केलेल्या आहेत. यामुळे वाढीव कराचा बोजा नागरिकांवर पडणार आहे. ही फरकाची रक्कम तातडीने भरण्याबाबतचे एसएमएस देखील पालिका प्रशासनाने पाठविल्याने नागरिकांमध्ये असंतोष आहे. यावर तोडगा काढण्यासाठी उच्च व तंत्रशिक्षण मंत्री पाटील यांनी बुधवारी ही बैठक घेतली. यामध्ये सर्व अधिकाऱ्यांचे म्हणणे ऐकून घेतल्यानंतर राज्याचे मुख्यमंत्री एकनाथ शिंदे यांच्याबरोबर बैठक घेऊन या विषयावर तोडगा काढण्याचा निर्णय बैठकीत घेण्यात आला. मुख्यमंत्री शिंदे यांच्याबरोबर बैठक होऊन जोपर्यंत कोणताही निर्णय घेतला जात नाही तोपर्यंत महापालिकेने नागरिकांकडे ही रक्कम भरण्याचा तगादा लावू नये, अशा स्पष्ट सूचना यावेळी देण्यात आल्या.

पुणे-गुंठेवारीतील जाचक अटी दूर होईपर्यंत दस्तनोंदणी त्वरित सुरु करून सर्वसामान्यांना न्याय देण्याचा निर्धार असून त्याबाबतचा प्रस्ताव त्वरित सादर करावा असे आदेश महसूल मंत्री राधाकृष्ण विखे पाटील व उच्च व तंत्रशिक्षण मंत्री चंद्रकांतदादा पाटील यांनी दिले.पुण्यातीलच नव्हे तर राज्यभरात तुकडेबंदी व ग्राम पंचायत हद्दीतील सदनिकांची दस्तनोंदणी बंद असून त्यामुळे सर्वसामान्य सदनिकाधारक त्रस्त झाला आहे. यावर तोडगा काढण्यासाठी भाजप प्रवक्ते संदीप खर्डेकर सातत्याने पाठपुरावा करत होते. त्यास सकारात्मक प्रतिसाद देऊन उच्च व तंत्रशिक्षण मंत्री चंद्रकांतदादा पाटील यांनी आज मंत्रालयात उच्च स्तरीय बैठकीचे आयोजन केले होते. सदर बैठकीला चंद्रकांतदादा पाटील, महसूल मंत्री राधाकृष्ण विखे पाटील, पमहसूल सचिव नितीन करीर,नोंदणी महानिरीक्षक श्रावण हर्डीकर यांच्यासह भाजपा प्रवक्ते संदीप खर्डेकर, माजी सभागृह नेते गणेश बिडकर, सरपंच सुभाषशेठ नाणेकर, व्यापारी असोसिएशन चे अध्यक्ष सारंग राडकर, ऍड. नितीन दसवडकर, दत्ताशेठ मारणे, सुभाष शिंदे सरकार,अभिजित कोंडे, मंगेश माळी, गुणवंत वागलगावे यांच्यासह महसूल व नोंदणी खात्याचे वरिष्ठ अधिकारी उपस्थित होते.
यावेळी चंद्रकांतदादा पाटील यांनी सदनिकाधारकांची बाजू मांडताना महाराष्ट्र नोंदणी नियम 1961 मधील कलम 44/1 (i) याला उच्च न्यायालयाने कोणत्याही प्रकारची स्थगिती दिली नसल्याचे महसूल मंत्र्यांच्या निदर्शनास आणून दिले. त्यानंतर महसूल मंत्री राधाकृष्ण विखे पाटील यांनी अप्पर सचिव नितीन करीर यांना त्याबाबत चा प्रस्ताव तत्काळ सादर करण्याचे आदेश दिले असून त्यामुळे लवकरच दस्तनोंदणी सुरु होईल असा विश्वास दोन्ही मंत्र्यांनी व्यक्त केला आहे. त्याचबरोबर सर्वसामान्यांना कायम स्वरूपी दिलासा मिळावा यासाठी येत्या अधिवेशनात कायद्यात बदल करण्याचे मंत्री महोदयांनी सूचित केले. तसेच 2001 च्या गुंठेवारी कायद्याला मुदतवाढ देताना त्यात अनेक जाचक अटी घालण्यात आल्या व दंडाची रक्कम ही अवाच्यासवा आकरण्यात येत असल्यामुळे मनपा किंवा पी एम आर डी ए हद्दीत गुंठेवारीची अत्यल्प प्रकरणे दाखल झाली आहेत.त्यामुळे यात ही सुधारणा करून सर्वसामान्यांना न्याय देण्याचा प्रयत्न शासन करेल असे चंद्रकांतदादा पाटील यांनी स्पष्ट केले.

तृतीयपंथीयांना समाजात सन्मान मिळवून देण्यासाठी शासन प्रयत्नशील

पुणे दि.१४- ‘तृतीयपंथीयांचा लोकशाहीतील सहभाग’ या विषयावर आयोजित दोन दिवसीय राज्यस्तरीय परिषदेच्या तिसऱ्या सत्रात प्रशासनातील वरिष्ठ अधिकाऱ्यांनी सहभागी होत ‘तृतीयपंथीयांचे शिक्षण व रोजगार’ या विषयावर चर्चा करण्यात आली. तृतीयपंथीयांना समाजात सन्मान मिळवून देण्यासाठी शासन आणि प्रशासनातर्फे शिक्षण, आरोग्य, घरकूल आणि रोजगारासाठी प्रयत्न करण्यात येत आहे असा सूर या चर्चेत उमटला.

चर्चेत सहभाग घेताना एमटीडीसीचे संचालक राजेश पाटील म्हणाले, पिंपरी चिंचवड महापालिकेने वंचित घटकांसाठी योजना राबविताना यावर्षापासून धोरणात अनुकूल बदल केले. तृतीयपंथीयांसाठी ३ हजार रुपये मासिक भत्ता सुरू केला. सुरक्षा रक्षक म्हणून २० तृतीयपंथीयांना प्रशिक्षण देऊन नेमण्यात आले. त्यामुळे त्यांची ओळख निर्माण होण्यास मदत झाली. या समूहाच्या कल्याणासाठी हा महत्वाचा निर्णय ठरला. तृतीयपंथीयांचे बचत गटांना उद्यानाच्या देखभालीचे काम, ग्रीन मार्शल पथकात नेमणूक, करवसुली अशी कामे प्रशिक्षण देऊन त्यांच्यावर सोपविण्यात आली आहेत. अशा उपक्रमांमुळे जनतेशी संवाद वाढून त्यांच्या मनात आत्मविश्वास तयार होईल.

समाज कल्याण आयुक्त डॉ.प्रशांत नारनवरे म्हणाले, समाज कल्याण विभागाने ट्रान्सजेंडर पोर्टल तयार करून १ हजार ३५० तृतीयपंथीयांची नोंदणी करण्यात आली. हे प्रमाण वाढविण्यासाठी २ ऑक्टोबरपर्यंत विशेष मोहिम राबविण्यात येत आहे. स्वयंघोषणापत्राच्या आधारे ही नोंदणी करता येते. प्रधानमंत्री आवास योजना आणि समाज कल्याण विभागाच्या माध्यमातून तृतीयपंथीयांना घरे देण्याचा प्रयत्न आहे. या समूहाच्या शिक्षण आणि रोजगारासाठी प्रशिक्षण व मार्गदर्शनावर भर देण्यात येत आहे. आरोग्य वाहिनी, विभागीय स्तरावर आधार आश्रम आणि बीज भांडवल योजनाही प्रस्तावीत करण्यात आली आहे. समुदायातील पात्रताधारक सदस्यांना स्पर्धा परीक्षेचे प्रशिक्षण देण्याबाबतही विचार करण्यात येईल.

राष्ट्रीय उच्च शिक्षण अभियानाचे संचालक डॉ. निपूण विनायक म्हणाले, शिक्षणामुळे समाजात सन्मान मिळतो आणि परस्पर संवाद साधता येतो. शिक्षणाचा अधिकार तृतीयपंथींयासाठीदेखील तितकाच समान आहे. याबाबत जागरुकता निर्माण करण्यासाठी खूप प्रयत्न करावे लागतील. शिक्षण सर्वांसाठी आहे ही भावना सर्वांमध्ये निर्माण होणे महत्वाचे आहे. राज्यातील महाविद्यालयांपर्यंत तृतीयपंथीयांबाबत माहिती देण्यासाठी स्वतंत्र प्रशिक्षणाची रचना करण्यात येईल.

कौशल्य विद्यापीठाच्या कुलगुरू डॉ.अपूर्वा पालकर म्हणाल्या, पारंपरिक कौशल्याचा विचार न करता महत्वाकांक्षा बाळगून नव्या क्षेत्राचा विचार करणे गरजेचे आहे. परिषदेच्या माध्यमातून असे क्षेत्र सुचविल्यास त्या विषयांवर आधारीत अल्प कालावधीच्या पदविका अभ्यासक्रमाची रचना करण्यात येईल. शासन स्तरावर कौशल्य विकास प्रशिक्षणासाठी निधीची उपलब्धता आहे. समूह उद्योजकतेकडे वळणेही गरजचे आहे, असे त्यांनी सांगितले. 

सामाजिक कार्यकर्त्या ॲड.आशिष शिगवण म्हणाले, समाजात आपल्या हक्कासाठी खूप मोठा कालावधी लागला. समाजात कायद्याविषयी जागरुकता निर्माण केल्यास विविध योजनांचा लाभ घेता येईल. समुदायातील सदस्यांना आर्थिक स्थैर्याचा दृष्टीकोन ठेवून कौशल्याचे प्रशिक्षण देण्यात यावे.

कार्यक्रमाला राज्याचे मुख्य निवडणूक अधिकारी श्रीकांत देशपांडे, जिल्हाधिकारी डॉ.राजेश देशमुख उपस्थित होते. कार्यक्रमाचे सूत्र संचालन सामाजिक कार्यकर्त्या शमिभा पाटील यांनी केले.

पुणे , दि. १४ सप्टेंबर: भारतीय छात्र संसद फाऊंडेशन, एमआयटी स्कूल ऑफ गव्हर्नमेंट आणि एमआयटी वर्ल्ड पीस युनिव्हर्सिटी, पुणे यांच्या संयुक्त विद्यमाने तीन दिवसीय १२व्या भारतीय छात्र संसदेचे दि.१५ सप्टेंबर ते १७ सप्टेंबर २०२२ दरम्यान स्वामी विवेकानंद सभामंडप, एमआयटी वर्ल्ड पीस युनिव्हर्सिटी, कोथरूड, पुणे येथे आयोजन केले आहे. सन २०११ पासून दरवर्षी या छात्र संसदेचे आयोजन करण्यात येत असून, छात्र संसदेचे हे बारावे वर्ष आहे.
 महाराष्ट्र राज्याचे उच्च व तंत्रशिक्षण मंत्रालय, तसेच, क्रीडा व युवक कल्याण मंत्रालय आणि मानवाधिकार, लोकशाही, शांतता आणि सहिष्णुतासाठीचे युनेस्को अध्यासन यांच्या सहकार्याने ही छात्र संसद होत आहे. अनेक राष्ट्रीय संस्थांनीही या संसदेला पाठिंबा दिला आहे.
बाराव्या भारतीय छात्र संसदेचा उद्घाटन समारंभ गुरुवार, दि.१५ सप्टेंबर २०२२ रोजी सकाळी ११.०० वाजता होणार आहे. या समारंभासाठी भारत सरकारच्या कायदा आणि न्याय राज्यमंत्री एस.पी. सिंह बघेल हे प्रमुख पाहुणे म्हणून उपस्थित राहणार आहेत.
बिहारचे विरोधी पक्ष नेते व माजी सभापती विजय कुमार सिन्हा, इस्त्रोचे माजी अध्यक्ष डॉ. कैलासवादिवू सिवन,  हरित कार्यकर्ता आणि हिमालयन पर्यावरण अभ्यासक आणि संवर्धन संस्थेचे संस्थापक पद्मभूषण डॉ. अनिल प्रकाश जोशी, जे.के. उद्योग समूहाचे सीईओ आणि आयएमसी चेंबर ऑफ कॉमर्स इंडस्ट्रीचे अध्यक्ष अनंत सिंघानिया व प्रसिद्ध शास्त्रीय गायिका श्रीमती कौशिकी चक्रवर्ती हे सन्माननीय अतिथी म्हणून उपस्थित राहणार आहेत.
शनिवार, दि.१७ सप्टेंबर २०२२ रोजी दुपारी ३.०० वाजता या संसदेचा समारोप होणार आहे. महाराष्ट्राचे राज्यपाल भगतसिंग कोश्यारी हे प्रमुख पाहुणे म्हणून उपस्थित राहणार आहेत. लोकसभेच्या माजी अध्यक्ष डॉ. मिरा कुमार या अध्यक्षिय भाषण देणार आहेत. तसेच लोकसभेच्या माजी सभापती पद्मभूषण श्रीमती सुमित्रा महाजन सन्माननीय अतिथी म्हणून उपस्थित राहणार आहेत.
तसेच, जगविख्यात शास्त्रज्ञ पद्मविभूषण डॉ. आर.ए. माशेलकर, नालंदा विद्यापीठाचे कुलपती पद्मभूषण डॉ. विजय भटकर, इतिहासकार, लेखक, आर्थिक विश्लेषक डॉ. विक्रम संपत , एमआयटी डब्ल्यूपीयूचे संस्थापक अध्यक्ष प्रा.डॉ. विश्वनाथ दा. कराड आणि एमआयटी डब्ल्यूपीयूचे कार्याध्यक्ष राहुल विश्वनाथ कराड, हे उपस्थित राहणार आहेत.
छात्र संसदेच्या उद्घाटन व समारोप समारंभा खेरीज या छात्र संसदेमध्ये ६ सत्रे आयोजित केली आहे.
पहिले सत्र गुरुवार दि. १५ सप्टेंबर रोजी दुपारी ३.०० वाजता सुरू होणार आहे. भाषण स्वातंत्र्य-लक्ष्मण रेषा कोठे? या विषयावर राष्ट्रीय कॉग्रेस कमिटीचे सहसचिव अ‍ॅड. कृष्णा अलवारू व सिबीआयचे माजी संचालक डी.आर. कार्तिकेयन हे आपले विचार मांडतील. उत्तर प्रदेश विधानसभेचे सभापती सतिश महाना हे अध्यक्षपदी असतील.
यावेळी ओडिसाचे गृहराज्यमंत्री तुषार कांती बेहरा, हिमाचल प्रदेशचे आमदार श्रीमती रेना कश्यप यांना आदर्श युवा विधायक पुरस्काराने तसेच, आध्यात्मिक गुरू पूज्य श्री. इंद्रेश उपाध्याय यांना युवा अध्यात्मिक गुरू पुरस्काराने गौरविण्यात येईल.
भारताचे केंद्रीय अर्थ राज्यमंत्री डॉ. भागवत कराड यांचे आर्थिक दृष्या भारत जगाचे नेतृत्व करेल. याविषयावर विशेष भाषण होईल.
दुसरे सत्र शुक्रवार दि.१६ सप्टेंबर रोजी सकाळी ९.३० वा.सुरू होणार आहे. घराणेशाही- प्रत्येक राजकीय पक्षाचे कटू सत्य ?  या विषयावर राज्यसभेचे खासदार राघव चड्डा, भारतीय जनता पार्टीचे प्रवक्ते श्रीमती भारतीय घोष आणि सुप्रसिद्ध पत्रकार रशिद किडवाई हे विचार मांडतील. लोकसभेचे माजी अध्यक्ष डॉ. मिरा कुमार या अध्यक्षस्थानी असतील. तसेच लोकसभेचे माजी अध्यक्ष शिवराज पाटील यांची विशेष उपस्थिती राहणार आहे.
राजस्थान विधानसभेचे सभापती डॉ. सी.पी.जोशी यांना आदर्श विधानसभा सभापती पुरस्काराने गौरविण्यात येईल.
तिसरे सत्र शुक्रवार दि.१६ सप्टेंबर रोजी सकाळी ११.४५ वा. सुरू होणार आहे. लोकशाही आणि कॉर्पोरेटशाही- सत्ता कोणाकडेे? या विषयावर राज्यसभेचे खासदार संजय सिंग, सोशल आणि डिजिटल मिडियाच्या प्रमुख सुप्रिया श्रीनाथे, प्रसिद्ध पत्रकार, लेखक परंजॉय गुहा ठाकुर्ता, राष्ट्रीय संस्कृती विद्यापीठाचे कुलपती पद्मभूषण एन.गोपाला स्वामी हे विचार मांडतील. हरियाणा विधानसभेचे सभापती ज्ञानचॉद गुप्ता हे अध्यक्षस्थानी असतील. तसेच उत्तरप्रदेशचे वैद्यकीय शिक्षण मंत्री सुरेश कुमार खन्ना हे उद्घाटनपर भाषण करतील.
यावेळी मध्यप्रदेश आमदार डॉ. हिरालाला अलावा, पॉडिचेरीचे आमदार रायचंद जोहन कुमार आणि उत्तरप्रदेशचे आमदार डॉ. रागिनी सोनकर यांना आदर्श युवा विधायक पुरस्काराने गौरविण्यात येईल.
त्याच प्रमाणे गडचिरोली जिल्ह्यातील भामरागड येथील कोटी गावाच्या सरपंच कु. भाग्यश्री लेकामी, पंजाब मधील जालंधर येथील बोलनिया गावाचे सरपंच कुलविंदर भागा आणि  जम्मू कश्मिर येथील माणाकोट्टेचे सरपंच समरिन खान यांना  उच्च शिक्षित आदर्श युवा सरपंच सन्मानाने गौरविण्यात येणार आहे.
चौथे सत्र शुक्रवार दि.१६ सप्टेंबर रोजी दुपारी ३.०० वा. सुरू होणार आहे. कमी भारतीय अधिक पाश्चत्याः भारतीय चित्रपटाचा बदलते स्वरूप या विषयावर लोकसभेचे खासदार अनुभव मोहंती, अ‍ॅड गुरू व डायरेक्टर प्रल्हाद कक्कड आणि सुप्रद्धि फिल्म दिग्दर्शक रवि रॉय हे आपले विचार मांडतील. या सत्राचे अध्यक्ष  झारखंड विधानसभेचे माजी सभापती प्रा. दिनेश ओरन हे असतील.
राजस्थानचे आमदार कु. दिव्या महिपाल मादेरना आणि मध्यप्रदेशेचे आमदार प्रविण पाठक यांना आदर्श युवा विधायक पुरस्कारानेे गोरविण्यात येईल.
तसेच पंजाब येथील माणकखाना गावाचे सरपंच शेषानदीप कौर सिद्दू, तेलंगणाच्या मदनपुरम गावाच्या सरपंच अखिला यादव आणि हरागावचे सरपंच पल्लवी ठाकूर यांना उच्च शिक्षित आदर्श युवा सरपंच सन्मानाने गौरविण्यात येणार आहे.
पाचवे सत्र शनिवार दि. १७ सप्टेंबर रोजी सकाळी ९.३० वा. सुरू होणार आहे.  भारतीय माध्यमांवर गोगाट्याचे की कायद्याचे राज्य? या विषयावर पंजाबचे शिक्षण मंत्री अ‍ॅड. हरज्योत सिंग बायन्स, खासदार मनिष तिवारी, आयर्न लेडी युरोम शर्मिला, लँडटॉक आणि इंडिया टुडे हिंदीचे संस्थापक आणि प्रसिद्ध पत्रकार आशितोष, को चे मुख्य कार्यकारी अधिकारी व सहसंस्थापक अप्रामिया राधाकृष्ण आणि राष्ट्रीय व आंतरराष्ट्रीय गायक व सामजिक कार्यकर्त्या हेमा सरदेसाई हे आपले विचार मांडतील. अध्यक्षस्थानी बिहार विधानसभेचे अध्यक्ष देवेशचंद्र ठाकुर हे असतील.
राजस्थानचे आमदार राजकुमार रोत यांना आदर्श युवा विधायक पुरस्काराने गौरविण्यात येणार आहे.
सहावे सत्र शनिवार दि. १७ सप्टेंबर रोजी सकाळी ११.४५ वा. सुरू होणार आहे.  समान नागरी संहितेची वेळ आली आहे का ? या विषयावर गोव्याचे पर्यावरण कायदा व न्याय मंत्री निलेश काबरल, सुप्रिम कोर्टाचे वरिष्ठ वकिल अ‍ॅड. मनिलक्ष्मी पवानी आणि द जिनियसचे अध्यक्ष प्रद्यूत भिकाराम माणकिया डेब ब्रह्मा हे विचार व्यक्त करतील. अध्यक्षस्थानी उत्तराखंड विधानसभेचे सभापती श्रीमती रीतू खंडारू भूषण हे असतील.
उत्तर प्रदेशचे आमदार अमितसिंग चव्हाण यांना आदर्श युवा विधायक पुरस्कार  आणि साध्वी डॉ. विश्वेश्वरया देवी यांना युवा अध्यात्मिक गुरू पुरस्काराने गौरविण्यात येईल.

भारतीय छात्र संसदेविषयी :
    तरुण पिढीच्या मानसिकतेत क्रांतीकारक बदल घडवून आणणे, राष्ट्र व समाज निर्मितीच्या कार्यासाठी सार्वजनिक कार्यात सहभागी होण्यास प्रेरणा देणे, या हेतूने २०११ मध्ये भारतीय छात्र संसदेचा प्रारंभ झाला. एमआयटी वर्ल्ड पीस युनिव्हर्सिटीचे कार्याध्यक्ष आणि भारतीय छात्र संसदेचे संस्थापक प्रा. राहुल विश्वनाथ कराड हे या छात्र संसदेचे संकल्पक व समन्वयक आहेत. तसेच एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्वनाथ दा. कराड हे या छात्र संसदेचे मार्गदर्शक आहेत. छात्र संसद हा अ-राजकीय उपक्रम असून, त्याचा कोणत्याही राजकीय पक्षाशी संबंध नाही.छात्र संसद हा भविष्यातील राजकीय नेते घडविणारा देशातील एकमेव व विशाल प्रशिक्षण वर्ग आहे. या संसदेच्या माध्यमातून राजकारण, राजकीय नेते, लोकशाही याकडे बघण्याचा युवकांचा दृष्टिकोन बदलत आहे. या नवव्या छात्र संसदेत देशभरातील वेगवेगळ्या महाविद्यालयांतून १० हजारांहून अधिक उत्साही विद्यार्थी सहभागी होणार आहेत.

भारतीय छात्र संसदेची प्रमुख वैशिष्टये :

-२९ राज्यांतील ४५० विद्यापीठांतील ३० हजार महाविद्यालयातून राजकीय व सामाजिक क्षेत्रात क्रियाशील विद्यार्थ्यांचा थेट सहभाग. महाविद्यालयांच्या पातळीवर विद्यार्थ्यांची चाचणी होऊन त्यापैकी १० ते १२ हजार विद्यार्थ्यांना या छात्र संसदेत प्रत्यक्ष सहभागी करुन घेतले जाते.
-२०० विद्यापीठातील ९० हजार विद्यार्थ्यांचा वेबकास्टिंगद्वारे सहभाग.
– भारतातील ६ राज्यातील विधानसभांच्या सभापतींचा सहभाग.
– भारतातील ६ राज्यातील संसदीय कार्यमंत्र्यांचा सहभाग.
– भारतातील ६ विविध विद्यापीठातील कुलगुरूंचा सहभाग
– निरनिराळ्या राज्यातील आणि विविध पक्षातील तरुण आमदारांचा सत्कार.
– आदर्श मुख्यमंत्री पुरस्कार व आदर्श युवा विधायक पुरस्कार देण्यात येणार आहे.
– आदर्श उच्च शिक्षित युवा सरपंच सन्मान व आदर्श युवा आध्यात्मिक गुरू सन्मान सुध्दा देण्यात येणार आहेत.
    अशी माहिती एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड, कार्याध्यक्ष राहुल विश्वनाथ कराड, कुलगुरू डॉ. रवी. चिटणीस, प्र कुलगुरू डॉ. मिलिंद पांडे, प्र कुलगुरू डॉ. तपन पांडे, कुलसचिव डॉ. प्रशांत दवे, डॉ. प्रसाद खांडेकर, मिटसॉगचे संचालक डॉ. के. गिरीसन व प्रा. सुधाकर परिमल यांनी पत्रकार परिषदेत दिली.