पुणे – पुणे महापालिकेतर्फे महापालिकेची जागा फटाका स्टॉलसाठी भाड्याने देण्यासाठी लिलाव करण्यात आला. मात्र,या लिलावात काही जणांनी दादागिरी करून काहींना बोली लावू न देण्याचा प्रयत्न केल्याचा प्रकार घडला.आणि दहशतीच्या खाली प्रशासनाने हा लिलाव केल्याचा आरोप होऊ लागला आहे. त्या स्कार्न्ही तसेच घडले आहे,कारण बोली लावताना व्यावसायिकांची महापालिकेत व्यावसायिकांमध्ये जोरदार वादावादी झाली.यापूर्वी लोकप्रतिनिधी असताना काही टेंडर साठी असे प्रकार झाल्याचे वेळोवेळी दिसून आलेले आहे पण ज्ञानेश्वर मोळक यांची अधिकार्यांना चांगली साथ होती आणि त्यांच्या सहाय्याने सर्व प्रशासन एकत्र येऊन अशा बाबींचा प्रखर सामना करत.परंतु आता कंत्राटावर घेतलेल्या अवघ्या ८/९ हजार रुपये पगारावरील तात्पुरत्या सुरक्षा रक्षकांच्या जीवावर प्रशासकीय काळात महापालिकेतील कर्मचारी आणि अधिकारी यांना थेट दादागिरी सहन करावी लागत असल्याने या वातावरणातच लीलाव झाल्याचे बोलले जाते आहे.दरम्यान मालमत्ता व्यवस्थापन विभागाचे उपायुक्त राजेंद्र मुठे म्हणाले, ‘३५ स्टॉलसाठी ६६ जणांनी अर्ज केले होते. या लिलावातून महापालिकेला १४ लाख ६० हजार रुपयांचे उत्पन्न मिळाले आहे. यामध्ये एका स्टॉलसाठी सर्वाधिक १ लाख १० हजार रुपयांची बोली लागली आहे. दरम्यान व्यावसायिकांमधील वाद सभागृहाच्या बाहेर झाला आहे,आतमध्ये झालेला नाही.

दिवाळीच्या निमित्ताने फटाके विक्रीसाठी पुणे महापालिकेतर्फे व्यावसायिकांनी दुकान लावण्यासाठी जागा भाड्याने दिली जाते. गेल्या काही वर्षापासून शनिवार पेठेतील वर्तक बागेच्या शेजारी नदी काठच्या रस्त्यावर स्टॉल लावले जातात.यंदा ३५ स्टॉल भाड्याने देण्यासाठी मालमत्ता व्यवस्थापन विभागाने अर्ज मागविले होते. त्यासाठी ६६ जणांनी जागेसाठी अर्ज केले होते.आज महापालिकेतील वडके हॉलमध्ये लिलाव आयोजित करण्यात आला होता. प्रत्येक स्टॉलसाठी २३ हजार ५९५ इतके मुळ भाडे निश्‍चीत केले होते.लिलाव लावताना त्यामध्ये जो जास्त पैसे देईल त्यास स्टॉल मिळणार होता. त्यामुळे व्यावसायिकांकडून बोली लावण्यास सुरवात झाल्यानंतर काही मंडळांच्या पदाधिकाऱ्यांनी दादागिरी करत बोली लावण्यापासून त्यांना रोखण्याचा प्रयत्न केला.यावरून सभागृहाच्या बाहेर व्यावसायिकांमध्ये जोरदार वादावादी झाली. आरोग्य विभागात अधिकार,महिला कर्मचारी काम करत असताना अर्वाच्य शिवीगाळ सुरू होती.त्यामुळे येथील वातावरण तापले होते.अखेर काही जणांनी हस्तक्षेप करून हा वाद संपविण्याचा प्रयत्न केला.

पुणे : आरोग्य व पर्यावरण संवर्धनाबाबत जनजागृतीसाठी रविवारी (ता. ९) सकाळी ७ ते ९ या वेळेत सायकल रॅलीचे आयोजन केले आहे. लायन्स क्लब ऑफ इको फ्रेंड्सच्या पुढाकाराने आयोजित ऑक्टोबर सेवा सप्ताहांतर्गत ही सायकल रॅली काढण्यात येत आहे. सारसबाग, टिळक रोड, डेक्कन, फर्ग्युसन रस्ता, संभाजी उद्यान असा या रॅलीचा मार्ग आहे, अशी माहिती समन्वयक अनिल मंद्रुपकर यांनी दिली. या सप्ताहात ‘लायन्स’च्या ट्वेंटी फर्स्ट सेंच्युरी, पुना वेस्ट, फ्युचर, विधिज्ञ, मुकुंदनगर, शिवाजीनगर, सुप्रिम, पुणे रिव्हर साईड, मैत्री या क्लबने सहभाग घेतला आहे, असेही मंद्रुपकर यांनी सांगितले.
कार्बन उत्सर्जन रोखणे, निसर्गाचे संवर्धन, प्रदूषण कमी करणे, स्वच्छ आणि निरोगी जीवन याबाबत जागृती केली जाणार आहे. ‘जॉईन ग्रीन रिव्होल्यूशन स्टॉप पोल्युशन’ हा नारा देत ही सायकल रॅली शहराच्या मध्यवर्ती भागात फिरणार आहे. अधिकाधिक पुणेकरांनी या रॅलीत सहभागी व्हावे. तसेच अधिक माहितीसाठी अनिल मंद्रुपकर (९८८११२८३०३), मयूर बागुल (९०९६२१०६६९) किंवा के. के. गुजराती (९८२३१४९२२१) यांचेशी संपर्क साधावा, असे आवाहन करण्यात आले आहे. 

पुणे दि.७-सर्वसामान्य शेतकरी किंवा कष्टकरी माणसाला मुलांसाठी वही घेणेही कठीण असते. त्यामुळे विद्यार्थ्यांसाठी पुस्तकासोबत वह्यांची पाने जोडण्याबाबत तज्ज्ञांनी विचार करावा आणि त्यादृष्टीने सूचना कराव्यात, असे प्रतिपादन राज्याचे शालेय शिक्षण मंत्री दीपक केसरकर यांनी केले. महाराष्ट्रातील शिक्षण क्षेत्राला दिशा देणारा उपक्रम म्हणून शिक्षकांनी या उपक्रमकडे पाहावे, असे आवाहनही त्यांनी केले.

पाठ्यपुस्तकांमध्ये वह्यांची पाने टाकण्याबाबत बालभारती येथे विषय तज्ज्ञ आणि अधिकाऱ्यांसोबत आयोजित बैठकीत ते बोलत होते. यावेळी बालभारतीचे संचालक कृष्णकुमार पाटील, माध्यमिक शिक्षण मंडळाचे अध्यक्ष शरद गोसावी, शिक्षण संचालक महेश पालकर आदी उपस्थित होते.

श्री.केसरकर म्हणाले, शिक्षकांनी पुस्तकातील विषयावर दिलेली टिपणे विद्यार्थ्याने या पानांवर लिहावे अशी अपेक्षा आहे. त्यावरून शिक्षकांनी वर्गात घेतलेला अभ्यासही लक्षात येईल. गरीबतल्या गरीब मुलालाही वह्यांची पाने असलेली पुस्तके उपयुक्त ठरली पाहिजेत. प्रायोगिक तत्वावर हा उपक्रम राबविण्यात येईल आणि पालक-शिक्षकांकडून येणाऱ्या सूचनांच्या आधारे अंतिम निर्णय घेण्यात येईल. विद्यार्थी किती पानांचा लिखाणासाठी उपयोग करतात याचाही अभ्यास करण्यात यावा. यासाठी तज्ज्ञ शिक्षकांची एक समिती नेमण्यात येणार असून समिती सदस्य या उपक्रमाबाबत शिक्षकांना माहिती देण्यासोबत अभ्यासही करेल.

विद्यार्थ्यांचा सर्वांगीण विकास आणि त्याचे व्यक्तिमत्व घडविणे हे अंतिम उद्दिष्ट आहे. शैक्षणिक क्षेत्रात नाविन्यपूर्ण उपक्रम राबविताना अनुभवाने त्यात बदलही करता येईल. शालेय शिक्षणाची गुणवत्ता उत्तम राहावी यासाठी आवश्यक उपक्रम राबविताना मुलांवर अभ्यासाचा बोजा पडणार नाही याचीही दक्षता घ्यावी.

शालेय स्तरावर तीन महिन्यांनी परीक्षा घेण्याचा विचार व्हावा. तिमाहीत अनुत्तीर्ण विद्यार्थ्यांवर अधिक लक्ष देऊन त्यांना सहामाही परीक्षेत उत्तीर्ण होण्याच्यादृष्टीने तयारी करून घेता येईल. सहावीपासून राज्यात एकाचवेळी कलचाचणी घेण्यासाठी सॉफ्टवेअर तयार करण्यात येत आहे. विद्यार्थ्यांना आवडीनुसार व्यावसायिक अभ्यासक्रम शिकविता येईल. मुलांना पोषण आहारातून अधिक पौष्टिक तत्व मिळावे यदृष्टीनेही अनुकूल बदल करावे लागतील, असेही मंत्री केसरकर यांनी सांगितले.

पुणे, दि. 7 – येत्या दहा वर्षांत भारत जगातला सर्वांत तरुण देश म्हणून ओळखला जाणार आहे. त्याचे नेतृत्व आजचे विद्यार्थी करणार आहेत. त्यासाठी आवश्यक कौशल्य विकसित करण्याच्या उद्देशाने आधुनिक शिक्षणाच्या सुविधा उपलब्ध करून देण्यास शासन कटिबद्ध असल्याचे प्रतिपादन राज्याचे शालेय शिक्षणमंत्री दीपक केसरकर यांनी केले.
डेक्कन एज्युकेशन सोसायटीच्या (डीईएस) न्यू इंग्लिश स्कूल रमणबाग प्रशालेच्या अमृत महोत्सवी वर्षाच्या सांगता समारंभात केसरकर विद्यार्थ्यांशी संवाद साधत होते. डीईएसच्या नियामक मंडळ आणि परिषदेचे अध्यक्ष डॉ. शरद कुंटे अध्यक्षस्थानी होते. उपाध्यक्ष महेश आठवले, कार्यवाह प्रा. धनंजय कुलकर्णी, शाला समितीचे अध्यक्ष अ‍ॅड. अशोक पलांडे, प्रा. स्वाती जोगळेकर, शाला प्रमुख सुनील शिवले यांची प्रमुख उपस्थिती होती.
केसरकर म्हणाले, “विद्यार्थ्यांचा शारीरिक आणि मानसिक विकास महत्त्वाचा आहे. त्यासाठी शारीरिक शिक्षण या विषयासाठी सुरुवातीच्या काळात चार ते पाच शाळांमध्ये किमान एक शिक्षक देणे शासनाच्या विचाराधीन आहे. विद्यार्थ्यांना मानसिक स्वास्थ्याबरोबर एकाग्रता साधता यावी यासाठी योगाचे विविध प्रकार शिकविण्याची योजना आहे. तसेच आधुनिक तंत्रशिक्षणाबरोबर संगीत, गायन याचे शिक्षण देण्याचा प्रयत्न आहे. त्यासाठी या क्षेत्रांतील नामवंतांचे विद्यार्थ्यांना मार्गदर्शन मिळणार आहे.”
केसरकर पुढे म्हणाले, “नवीन शैक्षणिक धोरण राबविण्यासाठी आवश्यक साधने पुढील शैक्षणिक वर्षापर्यंत शाळांमध्ये उपलब्ध होतील. इयत्ता तिसरीपासून परीक्षा घेता येईल का? याबाबत तज्ज्ञांशी चर्चा सुरू आहे. गृहपाठ स्वयंस्फूर्तिने करायचा अभ्यास आहे. शिक्षकांनी विद्यार्थ्यांना गृहपाठाची किंवा खासगी क्लासची गरज भासू नये असे शिक्षण द्यावे. ई-लर्निंग सुविधा राज्यभर पुरविण्यासाठी सरकार प्रयत्नशील आहे. यासाठी वापरण्यास सुलभ सॉफ्टवेअर विकसित करण्यात येत आहे. भविष्यकाळात शालेय स्तरावर शिक्षण आणि क्रीडा हे दोन्ही विषय सोबत असतील.”
डॉ. के. एच. संचेती, डॉ. प्रमोद चौधरी यांच्यासह विविध क्षेत्रांतील नामवंत माजी विद्यार्थ्यांचा सन्मान करण्यात आला. ‘अमृत कलश’ या स्मरणिकेचे प्रकाशन करण्यात आले. तसेच नव्याने सुरू करण्यात आलेल्या नाट्यछंद वर्गाचे उद्घाटन करण्यात आले. सुनील शिवले यांनी शाळेची माहिती दिली. प्रा. धनंजय कुलकर्णी यांनी प्रास्ताविक व स्वागत केले. मोहन शेटे यांनी परियच करून दिला. अ‍ॅड. अशोक पलांडे यांनी आभार मानले. 

पुणे : “पर्यावरण संवर्धनाचा संस्कार विद्यार्थ्यांमध्ये शालेय वयापासूनच रुजायला हवा. यामध्ये पालकांसह शिक्षकांची भूमिका अतिशय महत्वाची आहे. शालेय शिक्षणाबरोबरच शिक्षकांनी विद्यार्थ्यांना पर्यावरणाचे महत्व पटवून द्यायला हवे,” असे मत ‘वनराई’चे अध्यक्ष रवींद्र धारिया यांनी व्यक्त केले.

ऑक्टोबर सेवा सप्ताहांतर्गत ‘वनराई’च्या पर्यावरण वाहिनी व लायन्स क्लब इको फ्रेंड्सच्या पुढाकाराने शिक्षकांसाठी आयोजित कार्यशाळेत धारिया मार्गदर्शन करत होते. प्रसंगी ‘वनराई’चे सचिव अमित वाडेकर, वाहिनीचे प्रकल्प संचालक भारत साबळे, लायन्स क्लब ऑफ इको फ्रेंड्सचे अनिल मंद्रुपकर, किशोर मोहोळकर, प्रतिभा खंडागळे, शमा गोयल, मेघा आंबवले आदी उपस्थित होते. या सप्ताहात ‘लायन्स’च्या ट्वेंटी फर्स्ट सेंच्युरी, पुना वेस्ट, फ्युचर, विधिज्ञ, मुकुंदनगर, शिवाजीनगर, सुप्रिम, पुणे रिव्हर साईड, मैत्री या क्लबने सहभाग घेतला. आभार तृप्ती व्हावळ यांनी मानले.

किशोर मोहोळकर यांनी पर्यावरण आणि आपण या विषयावर मार्गदर्शन केले. वृक्षारोपण, संवर्धन, स्वच्छता, प्लास्टिक मुक्ती, कचरा संकलन, त्याचे वर्गीकरण, कचऱ्यातून अर्थार्जन अशा विविध मुद्यांवर त्यांनी विचार मांडले. अनिल मंद्रुपकर यांनी इको फ्रेंड्सच्या माध्यमातून सुरु असलेल्या पर्यावरण संवर्धनाच्या कार्याचा आढावा घेतला. कार्यशाळेच्या शेवटी सहभागी शिक्षकांना आयुष मंत्रालय व औषधी वनस्पती सुविधा केंद्राचे डॉ. दिगंबर मोकाट यांच्या सहयोगातून औषधी वनस्पतींचे वाटप करण्यात आले.

मुख्याध्यापक, शिक्षक व विदयार्थी यांच्या सहकार्यातून पर्यावरण संवर्धन आणि शाश्वत ग्रामीण विकासाचा कार्यविस्तार पुढच्या पिढ्यांपर्यंत नेण्यासाठी वनराईची पर्यावरण वाहिनी काम करत असून राज्यातील ४०० शाळांतील विद्यार्थ्यांना पर्यावरणाचे शिक्षण देण्यात येत आहे. लहान मुलांमध्ये पर्यावरण संवर्धनाचे बीजे रोवणे, त्यांना पर्यावरणाप्रती संवेदनशील आणि कृतीशील बनविण्यासाठी वनराई शिक्षकांसाठी  अशा कार्यशाळा घेत असल्याचे साबळे यांनी सांगितले.

पुणे, दि.६: शैक्षणिक विकासाच्या माध्यमातून व्यक्तीच्या सर्वांगीण विकासासोबतच चांगल्या समाजाची निर्मिती होत असते; त्यामुळे शिक्षण क्षेत्रामध्ये योगदान देत सशक्त समाजनिर्मितीसाठी कार्य करणाऱ्या संस्थांना शासनाकडून सर्वतोपरी सहकार्य करण्यात येईल, अशी ग्वाही राज्याचे उच्च व तंत्रशिक्षण मंत्री तथा पुणे जिल्ह्याचे पालकमंत्री चंद्रकांत पाटील यांनी दिली.

महाराष्ट्र राज्य अध्यापक विकास संस्था येथे आयोजित बैठकीत ते बोलत होते. यावेळी उच्च व तंत्रशिक्षण विभागाचे प्रधान सचिव विकास रस्तोगी, महाराष्ट्र राज्य अध्यापक विकास संस्थेचे कार्यकारी संचालक डॉ. निपुण विनायक, तंत्र शिक्षण संचालक अभय वाघ आदी उपस्थित होते. मंत्री श्री. पाटील यांच्या उपस्थितीत महाराष्ट्र राज्य अध्यापक विकास संस्था आणि विविध विद्यापीठे, राष्ट्रीय, राज्यपातळीवरील शिक्षण संस्था तसेच शिक्षण क्षेत्रात कार्यरत संस्थासोबत सामजस्य करार करण्यात आले.

सामंजस्य करारांवरील स्वाक्षऱ्यांनंतर संस्थाचे अभिनंदन करुन श्री. पाटील म्हणाले, जागतिक पातळीवर देशाची प्रतिमा उंचावत आहे. शैक्षणिक क्षेत्रातही देशपातळीवर चांगले काम होत आहे. चांगले काम करणाऱ्या संस्थेच्या पाठीमागे राज्य शासन भक्कमपणे उभे आहे. आपण शिक्षण क्षेत्रात बदल घडविण्याचे आवानात्मक काम स्वीकारले असून त्यातून व्यक्तीमत्व विकासाचे काम होणार आहे.

नवीन शैक्षणिक धोरणाशी सुसंगत प्रशिक्षण शिक्षकांना देण्यात येणार आहे. त्यामुळे शैक्षणिक धोरणातील संकल्पना समजून समाजापर्यंत पोहचिण्याचे कार्य शिक्षकांच्या हातून होणार आहे. प्रत्येक बाबींचे विश्लेषणात्मक सखोल मार्गदर्शन प्रशिक्षणातून मिळणार आहे. प्रशिक्षणामुळे आत्मविश्वास वाढण्यास मदत होते. महाराष्ट्र राज्य अध्यापक विकास संस्थेच्या कार्यपद्धती शिक्षकांना दिशादर्शक आहे. येत्या नोव्हेंबर महिन्यात प्रशिक्षण सत्राचे आयोजन करण्याचा सूचनाही त्यांनी यावेळी दिल्या.

डॉ. विनायक यांनी संस्थेच्या कार्यपद्धतीची माहिती दिली. विविध क्षेत्रातील संस्थेसोबत सामंजस्य करार करण्यात आले असून कराराप्रमाणे अंमलबजावणी करण्यात येईल, असेही ते म्हणाले.

यावेळी आयसर, कवी कुलगुरु संस्कृत विद्यापीठ, जेजे ग्रुप संस्था, फ्लेम विद्यापीठ, आयआयटी बॉम्बे, ललीत कला केंद्र, सिम्बॉयसिस विद्यापीठ, श्रीमती नाथबाई दामोधर ठाकरसी महिला विद्यापीठ, परिवर्तन ट्रस्ट, महाराष्ट्र राष्ट्रीय विधी विद्यापीठ, एक्सआरसीव्हीसी, मनोपचार आरोग्य संस्था, पुण्यश्लोक अहिल्याबाई होळकर सोलापूर विद्यापीठ, इनोव्हेटिव्ह ऑफ चेंज, गोंडवाना, हाय प्लेस, संत गाडगेबाबा अमरावती विद्यापीठ, आयुका, टाटा इन्स्टियूट सोशल सायन्स, फोटोग्राफी प्रमोशन ट्रस्ट, रोटरी, विश्वकर्मा विद्यापीठ, इन्स्टियूट ऑफ केमिकल टेक्नोलॉजी, आरआयआयडीएल, कवयित्री बहिणाबाई चौधरी उत्तर महाराष्ट्र विद्यापीठ जळगाव, समीर आयआयटी गांधीनगर, डॉ. होमी भाभा स्टेट विद्यापीठ, एनएफबी खालसा कॉलेज, जीआयईईई सोबत सामंजस्य करार करण्यात आला.

श्रीमती नाथबाई दामोधर ठाकरसी महिला विद्यापीठाच्या कुलगुरु डॉ. उज्वला चक्रदेव, पुण्यश्लोक अहिल्याबाई होळकर सोलापूर विद्यापीठाच्या कुलगुरु डॉ. मृणालीनी फडणवीस, गोंडवाना विद्यापीठाचे कुलगुरु डॉ.प्रशांत भोकरे, संत गाडगेबाबा अमरावती विद्यापीठाचे कुलगुरु डॉ. दिलीप मालखेडे, डॉ. होमी भाभा स्टेट विद्यापीठाचे कुलगुरु डॉ. रजनीश कामत, रुसाचे सल्लागार विजय जोशी तसेच विविध संस्थांचे प्रतिनिधी यावेळी उपस्थित होते.

पुणे-धरणे वारंवार भरताहेत ,नदीत पाणी सोडले जातेय ,ऑक्टोबर मध्येही पाऊस थांबायचे नाव घेईना , धरणात पाणी मावेना पण ते पुणेकरांना देता येईना .. असा गलथान कारभार पुणे महापालिका प्रशासनाचा सुरु असल्याने राष्ट्रवादीचे अर्बन सेल चे अध्यक्ष नितीन कदम यांनी महापालिका प्रशासनावर जोरदार टीकास्त्र सोडले आहे.

ते म्हणाले,प्रशासनावर अंकुश राहिलेला नाही ,मनमानी कारभार सुरु आहे,आज पाणी येणार नाही याची माहिती नागरिकांपर्यंत पोहोचवण्याची योग्यती खबरदारी पुणे मनपाने घेतली नसल्यामुळे पुणेकरांना कोणतीच पूर्वतयारी करता आली नाही.त्यामुळे आज पाणी नसल्यामुळे नागरिकांना प्रचंड मनस्ताप व हाल सोसण्याची वेळ आली..याबाबत पुणे मनपा नेहमीच्या पद्धतीने प्रेस नोट काढून वृत्तपत्राद्वारे आधीच नागरिकांना कल्पना देते.दुर्दैवाने “दैनिक सकाळ”(बंदच्याआदल्या दिवशी 5 ऑक्टोबरला) व्यतिरिक्त कोणत्याच वृत्तपत्रांनी ही बातमी दिली नसल्यामुळे आजचा पाणीपुरवठा बंद हा नागरिकांसाठी “गुपित” च राहिला. त्यात ज्या भागाचा पाणीपुरवठा बंद असणार आहे ती माहिती सुद्धा अर्धवटच छापण्यात आली होती.

धरणात एवढे पाणी असताना पुणेकरांना पाण्यासाठी वण-वण का! हाच प्रश्न नागरिकांना कडून विचारला जात आहे..पुणे मनपाच्या पाणीपुरवठा विभागाच्या या गचाळ कारभारामुळे पुन्हा एकदा नागरिकांना मनस्ताप व हाल सोसण्याची वेळ आलेली आहे. याबाबत आपण त्वरित चौकशी होऊन दोषींवर कारवाई व्हायला हवी अशी मागणी देखील राष्ट्रवादी अर्बन सेल पुणे शहर मागणी करीत आहे.असे नितीन कदम यांनी सांगितले .

पुणे, ६ ऑक्टोबर: एमआयटी वर्ल्ड पीस युनिव्हर्सिटीचा चौथा दीक्षांत समारंभ शनिवार, दि. ८ ऑक्टोबर २०२२ रोजी सकाळी १०.०० वाजता, विश्व सभामंडप, विश्वराजबाग, लोणीकाळभोर, पुणे येथे आयोजित करण्यात आला आहे.
या समारंभासाठी भारत सरकारचे परराष्ट्र व्यवहार व शिक्षण राज्यमंत्री डॉ. राजकुमार रंजन सिंग हे प्रमुख पाहुणे म्हणून उपस्थित राहणार आहेत. इस्त्रोचे माजी अध्यक्ष व राष्ट्रीय शैक्षणिक धोरण २०२० चे अध्यक्ष पद्मविभूषण डॉ. के. कस्तुरीरंगन, जगप्रसिद्ध शास्त्रज्ञ पद्मविभूषण डॉ. रघुनाथ माशेलकर व नालंदा विद्यापीठाचे कुलपती व जगविख्यात संगणक तज्ञ पद्मभूषण डॉ. विजय भटकर हे सन्माननीय अतिथी म्हणून उपस्थित राहणार आहेेत. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड हे असतील. तसेच, एमआयटी डब्ल्यूपीयूचे कार्याध्यक्ष राहुल विश्वनाथ कराड व कुलगुरु  डॉ. आर.एम. चिटणीस उपस्थित राहणार आहेत.या दीक्षांत समारंभरात बीटेक मधील केवल पद्मवार याला फाउंडर प्रेसिडेंट मेडल व बॅचलर ऑफ एज्युकेशनचे मिनू कलिता यांचा एक्जीकेटीव्ह प्रेसिडेंट मेडलने गौरव करण्यात येणार आहे. तसेच विद्यार्थ्यांना सुवर्ण पदक, रौप्य आणि कास्य पदक देण्यात येणार आहे. अभियांत्रिकी आणि तंत्रज्ञान, व्यवस्थापन (यूजी व पीजी), लिबरल ऑर्टस , बीएड, फाइन ऑर्टस, मिडिया अ‍ॅण्ड पत्रकारिता, वाणिज्य, अर्थशास्त्र, विज्ञान,फॉर्मसी, सस्टेनेबल स्टडीज, डिझाइन, गर्व्हनन्स इ. शाखेत मिळून एकूण ४५७६ विद्यार्थ्यांना पदवी देण्यात येणार आहे.
अशी माहिती एमआयटी वर्ल्ड पीस युनिव्हर्सिटीचे कुलसचिव डॉ. प्रशांत दवे आणि परिक्षा नियंत्रक प्रा. गणेश पोकळे यांनी दिली.