पुणे विद्यार्थी गृहाच्या अभियांत्रिकी महाविद्यालयात ‘ईव्ही’ टेस्टिंग लॅब व रोबोटिक्स-ऑटोमेशन लॅबचे उद्घाटन

पुणे : “आजच्या युगात अभियांत्रिकी अनेक शाखांबरोबर जोडले गेले आहे. त्यामुळे अभियंत्यांनी व्यापक, सर्वसमावेशक आणि बहुशाखीय दृष्टीकोन अंगिकारायला हवा. आपल्या कामाचा जगाला, देशाला आणि समाजाला कसा फायदा होईल, तसेच किमान साधन सामुग्रीमध्ये कमाल उत्पादन कसे देता येईल यावर अभियंत्यांनी लक्ष केंद्रीत करावे ,” असा कानमंत्र ज्येष्ठ शास्त्रज्ञ डॉ. रघुनाथ माशेलकर यांनी दिला.

पुणे विद्यार्थी गृहाच्या अभियांत्रिकी, तंत्रज्ञान व व्यवस्थापन महाविद्यालयामध्ये इलेक्ट्रिक व्हेईकल टेस्टिंग आणि रोबोटिक्स-ऑटोमेशन लॅबचे उद्घाटन डॉ. रघुनाथ माशेलकर यांच्या हस्ते नुकतेच झाले. प्रसंगी वैशाली माशेलकर, पुणे विद्यार्थी गृहाचे कार्याध्यक्ष सुनील रेडेकर, कार्यवाह प्रा. राजेंद्र कांबळे, उपकार्याध्यक्ष सुभाष जिर्गे, खजिनदार आनंद कुलकर्णी, कुलसचिव अमोल जोशी, संचालक प्रा. राजेंद्र कडुसकर, महाविद्यालयाचे प्रभारी प्राचार्य डॉ. मनोज तारांबळे आदी उपस्थित होते.

एआयसीटीई-मॉडरोब योजनेच्या मदतीने, तसेच संस्थेच्या वतीने बावीस लाख रुपयांच्या खर्चातून ही प्रयोगशाळा विकसित केली आहे. ईव्ही तंत्रज्ञानातील सध्याचा ट्रेंड पाहता, विद्यार्थीभिमुख शिक्षणासाठी अत्याधुनिक सुविधांची पूर्तता करण्यासाठी ही लॅब उपयुक्त ठरेल. अभियांत्रिकीचा अभ्यासक्रम आणि उद्योगाच्या गरजा यांच्यातील अंतर भरून काढण्यासाठी, अभियांत्रिकी महाविद्यालय पुणेच्या (सीओईपी) सहकार्याने रोबोटिक्स आणि ऑटोमेशन प्रयोगशाळा विकसित केली आहे, हे आनंददायी चित्र आहे, असे डॉ. माशेलकर यांनी नमूद केले.

तत्पूर्वी, डॉ. रघुनाथ व वैशाली माशेलकर यांनी संस्थेच्या सदाशिव पेठेतील मुख्यालयाला भेट कुलगुरू कै. विष्णू गंगाधर ऊर्फ दादासाहेब केतकर यांच्या ७२ व्या पुण्यतिथीनिमित्त आदरांजली वाहिली. आश्रम वसतिगृहातील विद्यार्थ्यांशी त्यांनी संवाद साधला. डॉ. माशेलकर यांनी त्यांच्या बालपणी प्रतिकुल परिस्थितीमध्ये कशाप्रकारे अभ्यास केला याची माहिती देताना आयुष्यातील पहिला गुरु म्हणून स्वतःच्या आईचा उल्लेख केला.

————————–

उद्योगांचा सहयोग महत्वाचा

प्रयोगशाळांच्या उभारणीत नामांकित कंपन्यांनी भरीव आर्थिक व तांत्रिक मदत केली आहे. त्यात प्रामुख्याने डसॉल्ट सिस्टीम, थिसेनक्रुप, एसएपीएल, एस.सिग्मा, नयन मेकॅट्रॉनिक्स, लेजर अ‍ॅटोमेशन आणि हॉरिझॉन अ‍ॅटोमेशन यांचा सहभाग आहे. औद्योगिक गरजा लक्षात घेऊन अत्याधुनिक, विद्यार्थी केंद्रित मॉड्यूलर अभ्यासक्रम, संशोधन व प्रशिक्षण कार्यक्रम हाती घेतले जाणार आहेत. समाजोपयोगी, शेतीसाठी रोबोट प्रणाली, सांडपाणी निचरा अनुप्रयोग, संगणक दृष्टी प्रणालीसह इतर कामांसाठी रोबो वापरण्याचे प्रयोजन आहे.

– सुनील रेडेकर, कार्याध्यक्ष, पुणे विद्यार्थी गृह

पुणे :’इनोसंट टाईम्स स्कुल ‘आणि ‘ अर्ली इंटरव्हेंन्शन सेंटर फॉर चिल्ड्रन विथ स्पेशल नीडस् ‘  च्या नवीन शैक्षणिक सुविधा केंद्राचे उदघाटन राज्य शासनाच्या समाजकल्याण विभागाचे अतिरिक्त आयुक्त डॉ.दिनेश डोके,  ‘इनोसंट टाईम्स स्कुल ‘च्या संस्थापक डॉ अंकिता संघवी यांच्या उपस्थितीत ८ ऑक्टोबर,शनिवारी सकाळी  गणेशबाग सोसायटी (औंध ) येथे झाले.
 अर्ली इंटरव्हेंन्शन प्रोग्राम फॉर  चिल्ड्रन विथ स्पेशल नीडस् ‘ , डे केअर,नर्सरी,ज्युनिअर के जी,सिनियर के जी च्या सर्वंकष शिक्षण (इन्क्लुझिव्ह एज्युकेशन)  च्या  सुविधा  यावेळी कार्यान्वित करण्यात आल्या . 
यानिमित्त ‘इनोसंट टाईम्स स्कुल ‘यांच्या वतीने शनिवारी दिवसभर  ‘ सुपर हिरो कार्निव्हल ‘आयोजित करण्यात आला होता .२ ते १३ वर्ष वयातील बालके ,थेरपिस्ट आणि डॉक्टर्स त्यात सहभागी झाले. सुपरमॅन,बॅटमॅन,हल्क,आयर्न मॅन अशा सुपरहिरोंशी संबंधित मजेदार खेळांचा समावेश या कार्निव्हल मध्ये होता.
यावेळी बोलताना डॉ दिनेश डोके म्हणाले,’समाजात स्वमग्न (ऑटिस्टिक) बालकांची  संख्या वाढते आहे.प्रत्येक ऑटिस्टिक मूल हे वेगळे असते,स्वतंत्र असते आणि त्याचे प्रश्न वेगळे असतात.त्यांना शिकवणे आणि काळजी घेणे हे फार मोठे आव्हान आहे.हे आव्हान ‘इनोव्हेटिव्ह टाइम्स स्कुल’ ही संस्था पेलेल याची खात्री वाटते.स्वमग्न बालकांना  लागणाऱ्या विशेष सुविधाचे  केंद्र ‘इनोव्हेटिव्ह टाइम्स स्कुल’ ने औंध मध्ये उभारले ही चांगली गोष्ट आहे.शासन सुद्धा दिव्यांग मुलांसाठी काम करीत आहे.स्वयंसेवी संस्थांनी, खासगी क्षेत्राने पुढे यावे,योगदान द्यावे.प्रत्येक जिल्ह्यात ऑटिस्टिक सेंटर झाले पाहिजे,अशी गरज आहे’. 
 स्वमग्नता (ऑटिझम) असलेल्या बालकांची विशेष काळजी विविध उपक्रमातून घेतली  जात असल्याचे  डॉ.अंकिता संघवी यांनी   सांगितले. डॉ.अंकिता संघवी या बालकल्याण संस्थेत ‘ अर्ली इंटरव्हेंन्शनीस्ट ‘ म्हणून विशेष मुलांसाठी, दिव्यांग मुलांसाठी कार्यरत आहेत.या क्षेत्रातील अनुभव यावेळी त्यांनी सांगितले. त्या  म्हणाल्या,’इनोव्हेटिव्ह टाइम्स स्कुल मध्ये ऑटिस्टिक मुलांसाठी विशेष सुविधा असलेले केंद्र उभारण्यात आले आहे.शिवाय सर्वसाधारण (नॉर्मल) बालकांसाठी  डे केअर,नर्सरी,ज्युनिअर के जी,सिनियर के जी शिक्षणाची व्यवस्था येथे करण्यात आली आहे. 
स्वमग्न मुलांसाठी  शिक्षण पद्धती
 स्वत:च्याच विश्वात, विचारात रमणे म्हणजे स्वमग्नता. ही स्वमग्न मुले नेहमी समाजापासून, अवतीभवतीच्या वातावरणापासून अलिप्त राहतात.नातेवाईक, मित्र-मैत्रिणी आजूबाजूचे लोक यांच्याशी त्यांफार संवाद नसतो. भाषा संप्रेषणाची, वैचारिक देवाण-घेवाणीची समस्या स्वमग्न मुलांमध्ये जाणवते. स्वमग्न मुलांना नुसतेच शाळेत घालून उपयोग नसतो तर वेगवेगळ्या उपचार पद्धतींचा अवलंब करावा लागतो. या शाळांमध्ये प्रत्येक मुलाची क्षमता लक्षात घेऊन त्याप्रमाणे आयईपी तयार करण्यात येतो. त्यानंतर प्रायमरी गोल ठरवून त्यावर काम करण्यात येते. विशेष शिक्षण, स्पीच थेरपी, फिजिओथेरपी, ऑक्युपेशनल थेरपी, म्युझिक थेरपी, डान्स थेरपी तसेच ड्रामा थेरपीनुसार मुलांना शिकवले जाते. 
स्वमग्न मुलांसाठी ज्या वेगवेगळ्या थेरपीज चा वापर केला जातो त्या म्हणजे स्ट्रक्चर्ड टिचिंग, चित्रबोली, इंद्रियानुभवाचे एकत्रीकरण पद्धती या सर्व पद्धतींनी विशेष मुलांना शिकवून त्यात त्यांना वैयक्तिक कौशल्ये, सूक्ष्मकारक कौशल्ये, संगीत उपचार पद्धती, एस.आय. पद्धती, चित्रकला पद्धती, भाषाविकास पद्धती, शैक्षणिक विकास पद्धती विविध आणि कल्पकतेचा वापर करून शिकवावे लागते. ज्याचा उपयोग मुलांना व्यावसायिकरीत्या सक्षम करण्यासाठी होतो. आठवड्यातून दोन दिवस संगीत उपचार पद्धती, दोन दिवस ऑक्युपेशनल थेरपी, दोन दिवस स्पीच थेरपी, तसेच वर्तन समस्यांवर वन टू वन रेशिओमध्ये काम करून मुलांना प्रशिक्षित करणे अनिवार्य बनते.

ट्रिनिटी महाविद्यालयात फॅकल्टी डेव्हलपमेंट प्रोग्रॅम
पुणे : “एकविसावे शतक हे विज्ञान-तंत्रज्ञानाचे आहे. शिक्षकांनी अध्यापनाला आधुनिकता, तंत्रज्ञान आणि संशोधनाची जोड दिली, तर अध्यापन आणखी प्रभावी होईल. नवतंत्रज्ञान समजून घेत आपल्या कार्याचे मूल्यमापन करणेही गरजेचे आहे,” असा सल्ला सावित्रीबाई फुले पुणे विद्यापीठाच्या विज्ञान व तंत्रज्ञान विभागाचे अधिष्ठाता डॉ. मनोहर चासकर यांनी दिला.
येवलेवाडी येथील केजे शिक्षण संस्थेच्या ट्रिनिटी कॉलेज ऑफ इंजिनिअरिंग अँड रिसर्चमध्ये आयोजित दोन दिवसीय फॅकल्टी डेव्हलपमेंट प्रोग्रॅमचे उद्घाटन डॉ. चासकर यांच्या हस्ते झाले. प्रसंगी डॉ. विजयकुमार जत्थी, केजे शिक्षण संस्थेचे संस्थापक अध्यक्ष कल्याण जाधव, कार्यकारी संचालक मेजर जनरल (निवृत्त) समीर कल्ला, ट्रिनिटी कॉलेज ऑफ इंजिनिअरिंगचे प्राचार्य डॉ. अभिजित औटी, ट्रिनिटी अकॅडमी ऑफ इंजिनिअरिंगचे प्राचार्य डॉ. निलेश उके आदी उपस्थित होते.
कल्याण जाधव म्हणाले, “विद्यार्थ्यांच्या सर्वांगीण विकासासाठी काम करावे. त्यातून देशाचा विकास आणि उज्ज्वल भविष्य घडणार आहे. प्राध्यापकांनी शिक्षण क्षेत्रात आधुनिक तंत्रज्ञानामध्ये विकास व संशोधन करून देशाचे नाव जागतिक स्तरावर उंचवावे.”

प्राचार्य डॉ. अभिजित औटी यांच्या पुढाकारातून ‘कोर्स आऊटकम बेस्ड एज्युकेशन’ अंतर्गत ही कार्यशाळा आयोजिली होती. या कार्यशाळेत एकूण २०० प्राध्यापकांनी व ५० शिक्षकेत्तर कर्मचाऱ्यांनी सहभाग घेतला. सहभागी प्राध्यापकांना प्रमाणपत्र देऊन सन्मानित करण्यात आले. डॉ. विजयकुमार जत्धी यांनी परिणामाधारित शिक्षणाचे महत्त्व यावर मार्गदर्शन केले. समीर कल्ला यांनीही मार्गदर्शन केले. 
डॉ. अभिजित औटी यांनी कार्यक्रमाच्या आयोजनामागील भूमिका मांडली. प्रा. उजमा शेख यांनी सुत्रसंचालन केले. प्रा. जयश्री सत्रे (विभागप्रमुख), प्रा. महेंद हंडोरे (विभागप्रमुख), डॉ. शुभांगी हंडोरे (विभागप्रमुख), डॉ. गीतिका नारंग (विभागप्रमुख), प्रा. प्रतिक आकरते (विभागप्रमुख), प्रा. वैभव शेलार (विभागप्रमुख), प्रा. गजानन आरसलवाड (विभागप्रमुख), प्रा. विष्णु घागरे, प्रा. मीना काझी, पा. प्राजक्ता जमाले, प्रा. स्वानंद कुलकर्णी, प्रा. जितेश धुळे, प्रशांत रेणुसे, सिध्दार्थ खंडागळे, निलेश वाबळे तसेच सर्व शिक्षक व शिक्षकेत्तर कर्मचारी यांचे मोलाचे सहकार्य लाभले.

पुणे, दि. 8- महाराष्ट्र लोकसेवा आयोगाची महाराष्ट्र दुय्यम सेवा अराजपत्रित गट-ब संयुक्त पूर्व परीक्षा- 2022 आज राज्यातील 37 जिल्हा केंद्रांवर सुरळीत पार पडली. पुण्यातील विमलाबाई गरवारे प्रशालेतील परीक्षा उपकेंद्राला आयोगाचे अध्यक्ष किशोरराजे निंबाळकर यांनी अचानक भेट दिली. परीक्षार्थ्यांसाठी असलेल्या सुविधांसह केंद्राची त्यांनी पाहणी केली.

महाराष्ट्र लोकसेवा आयोगाच्या महाराष्ट्र दुय्यम सेवा अराजपत्रित गट-ब संयुक्त पूर्व परीक्षा- 2022 द्वारे सहायक कक्ष अधिकारी, राज्य कर निरीक्षक, पोलीस उपनिरीक्षक आणि दुय्यम निबंधक/मुद्रांक निरीक्षक या संवर्गातील 800 पदांची भरती करण्यात येणार आहे. यासाठी  राज्यभरातील 37  केंद्रांवर आज  पूर्व परीक्षा घेण्यात आली. या परीक्षा प्रक्रियेची महाराष्ट्र लोकसेवा आयोगाचे अध्यक्ष किशोरराजे निंबाळकर यांनी पुणे शहरातील डेक्कन जिमखाना येथील विमलाबाई गरवारे प्रशालेच्या केंद्रांवर भेट देऊन पाहणी केली.

यापूर्वी देखील लोकसेवा आयोगाच्या विविध परीक्षांच्या वेळी अध्यक्ष श्री. निंबाळकर यांनी नागपूर येथील शासकीय विज्ञान संस्था, डॉ. बाबासाहेब आंबेडकर महाविद्यालय, दीक्षाभूमी, धनवटे नॅशनल कॉलेज, कमला नेहरू महाविद्यालयातील परीक्षा केंद्रांना तसेच पुण्यातील काही परीक्षा केंद्रांना अचानक भेट देऊन पाहणी केली होती.

पुणे, दि. ८ – डेक्कन एज्युकेशन सोसायटीच्या डीईएस पूर्व प्राथमिक शाळेत दिवाळीनिमित्त कुंभाराने शाळेत येऊन मातीपासून पणत्या बनविण्याची प्रात्यक्षिके दाखविली. चाकावर माती ठेवून पणत्या घडवून दाखवल्या.  विद्यार्थ्यांकडून प्रात्यक्षिके करून घेतली. मुख्यध्यापिका माधुरी बर्वे यांच्या संकल्पनेतून हा उपक्रम राबविण्यात आला. 

पुणे, दि. ८ – फर्ग्युसन महाविद्यालयातील ’सोशल आऊटरीच अ‍ॅण्ड एनाबलिंग सेंटर‘च्या (एसओएसी) वतीने महाविद्यालयातील 58 सफाई कर्मचार्‍यांचा (आरोग्य मित्र) डेक्कन एज्युकेशन सोसायटीचे उपाध्यक्ष महेश आठवले यांच्या हस्ते सत्कार करण्यात आला. या सेवकांनी स्वच्छता आणि आरोग्य या क्षेत्रात दिलेल्या बहुमूल्य योगदानाबद्दल हे सत्कार करण्यात आले. प्राचार्य डॉ. रविंद्रसिंह परदेशी यांच्या मार्गदर्शनाखाली शिक्षक समन्वयक प्रसन्न देशपांडे, अमृता शिरपूरकर यांनी संयोजन केले.

आरोग्य, स्वच्छता, शिक्षण, स्त्री-पुरुष समानता, शाश्वत विकास या क्षेत्रांत काम करण्यासाठी ‘एसओएसी’ची स्थापना करण्यात आली आहे. सामाजिक कार्य करण्यासाठी या संस्थेत आठशेहून अधिक स्वयंसेवकांनी नोंदणी केली आहे. विद्यार्थ्यांमध्ये पुस्तकी ज्ञानाबरोबर सामाजिक ज्ञान जोपासावे हा संस्थेचा उद्देश आहे. 

पुणे दि.७:  कामगारांच्या आरोग्य, शिक्षणासोबतच त्यांच्या जीवनात परिवर्तन घडविण्याऱ्या विविध योजना प्रभावीपणे राबविण्यासोबतच कामगारांच्या सुरक्षेला सर्वोच्च प्राधान्य देण्यात येईल, असे प्रतिपादन कामगार मंत्री डॉ. सुरेश खाडे यांनी केले.

क्रेडाई संस्थेच्या सर्वोत्तम सुविधा पुरस्कार वितरण कार्यक्रमात ते बोलत होते. यावेळी आमदार माधुरी मिसाळ, क्रेडाईचे राष्ट्रीय अध्यक्ष सतीष मगर, राज्याचे अध्यक्ष सुनील फुरडे, पुण्याचे अध्यक्ष  अनिल फरांदे आदी उपस्थित होते.

कामगार मंत्री श्री. खाडे म्हणाले, आपला प्रत्येक कामगार ही आपली शक्ती आहे. त्यामुळे कामगारांच्या सुरक्षेला सर्वोच्च प्राधान्य देण्यात येत आहे. कामगारांच्या  सुरक्षेसाठी शासनाच्या विविध योजना आहेत.  कामगारांना सुरक्षे संदर्भात देण्यात आलेल्या सुविधांचा कामगारांनी उपयोग करावा.

कामगारांच्या अडचणी सोडविण्यासाठी प्रत्येक जिल्हा मुख्यालय स्तरावर कामगार भवन उभारण्यात येईल तसेच कामगारांसाठी घरकुल योजना राबविण्यात येईल. संघटित कामगारांसोबतच असंघटीत कामगारांसाठीदेखील सोई सुविधा देण्यात येतील, असेही त्यांनी सांगितले.

आमदार माधुरी मिसाळ म्हणाल्या, कामगारांना सोईसुविधा देणाऱ्यांचा गौरव केला जात आहे, हा अत्यंत चांगला उपक्रम आहे. कामगारांना चांगल्या सोईसुविधा देण्याचा शासनाचा प्रयत्न आहे. कामगाराच्या आरोग्यासाठी असलेल्या विमा योजनेसाठी कामगारांनी नोंदणी करावी, असे आवाहन त्यांनी केले.

यावेळी क्रेडाई संस्थेच्यावतीने तयार करण्यात आलेल्या स्मरणिकेचे प्रकाशन करण्यात आले.

यावेळी क्रेडाईचे श्री. मगर आणि श्री. फुरडे यांनी मनोगत व्यक्त केले. क्रेडाई संस्थेच्या सर्वोत्तम सुविधा देणाऱ्या बांधकाम क्षेत्रातील तसेच विविध उद्योग समूहांचा पुरस्कार देऊन गौरव करण्यात आला.

पुणे, दि.७ : कामगारांच्या कल्याणार्थ चांगले प्रकल्पांचे प्रस्ताव सादर करावेत, असे निर्देश कामगार मंत्री डॉ. सुरेश खाडे यांनी दिले. कामगारांच्या मुलांसाठी क्रीडांगण निर्मितीसाठी प्रयत्न करण्यासह प्रत्येक जिल्ह्यात अभ्यासिका, जलतरण तलाव, महिलांसाठी शिवणकला वर्ग, कौशल्य विकास आदी सोयीसुविधा टप्प्या टप्प्याने निर्माण केल्या जातील अशी ग्वाहीदेखील डॉ. खाडे यांनी दिली.

साखर संकुल पुणे येथे आयोजित कामगार कल्याण मंडळ, माथाडी कामगार मंडळ, राज्य कामगार विमा हॉस्पिटल व सुरक्षा रक्षक मंडळाच्या आढावा बैठकीत ते बोलत होते.

बैठकीस आमदार माधुरी मिसाळ, प्रधान सचिव विनिता वेद सिंघल, कामगार आयुक्त सुरेश जाधव, अपर कामगार आयुक्त अभय गिते, कामगार कल्याण मंडळाचे सहायक कल्याण आयुक्त समाधान भोसले, राज्य कामगार विमा हॉस्पिटलचे रविंद्र चौधरी आदी उपस्थित होते.

श्री. खाडे म्हणाले, कामगारांच्या कल्याणकारी योजनेसाठी निधी उपलब्ध करून दिला जाईल. कामगारांच्या मुलांसाठी प्रत्येक जिल्ह्यात जागा उपलब्ध करून क्रीडा संकुल उभारण्यासाठी प्रयत्न केले जातील. तसेच अन्य सोयीसुविधांसाठी निधी उपलब्ध केला जाईल. सर्व कामगारांची नोंदणी करणे तसेच कामगारांचा डेटा अद्यावत असणे आवश्यक आहे, असेही ते म्हणाले.

माथाडी कामगारांचे हक्क त्यांना मिळावेत

माथाडी कामगार मंडळाच्या आढावा बैठकीत श्री. खाडे म्हणाले, जास्तीत जास्त कंपन्यांनी माथाडी अधिनियमानुसार नोंदणी करावी. ज्या कंपन्या माथाडी कामगारांचा वापर करत नाहीत त्यांची यादी बोर्डाने सादर करावी. कामगारांसाठी चांगल्या योजना राबवाव्यात. कंपनी मालकाकडून १०० टक्के लेव्ही कर येणे आवश्यक आहे, त्यासाठी बोर्डाच्या मुख्य कार्यकारी अधिकारी यांनी प्रयत्न करावेत. माथाडी कामगारांचे हक्क त्यांना मिळायलाच हवेत, असे निर्देश त्यांनी यावेळी दिले.

राज्य कामगार विमा हॉस्पिटलच्या बैठकीत श्री. खाडे म्हणाले, बिबवेवाडी येथे कामगार रुग्णालयाचे काम सुरु असून या परिसरातील अतिक्रमण पोलिसांची मदत घेवून हटवण्यात यावे. या हॉस्पिटलचे काम केंद्रीय सार्वजनिक बांधकाम  विभागाकडून  करण्यात येत आहे. त्यासाठी पुणे जिल्हाधिकारी आणि महानगरपालिका यांच्याकडून ना हरकत प्रमाणपत्र घेण्यासाठी कार्यवाही करावी.

राज्य सुरक्षा मंडळाच्या बैठकीत बोलताना श्री. खाडे म्हणाले, सुरक्षा रक्षकांचा प्रॉव्हिडंट फंडाची कपात झाली पाहिजे. कामगारांना कायद्यानुसार सर्व लाभ गतीने मिळतील याकडे लक्ष द्यावे, अशा सूचनाही त्यांनी दिल्या.

यावेळी प्रत्येक विभागाने सादरीकरणाने माहिती दिली. बैठकीस पुणे विभागातील सर्व सहायक कामगार आयुक्त, माथाडी कामगार मंडळाचे मुख्य कार्यकारी अधिकारी उपस्थित होते.